Ka Nupepa Kuokoa, Volume XXXI, Number 38, 17 September 1892 — Page 3
| This text was transcribed by: | Pulama Goodhue |
| This work is dedicated to: | Pualani Kauikeaokupaianaha Estocado |
Ka Nupepa Kuokoa
KE KILOHANA POOKELA NO KA LAHUI HAWAII.
------------------------------------------------------------------------------------------------------------
NU HOU HAWAII.
------
E nana ae i na hoolaha hou ma @@@@@@@ makou pea o keia la.
------
Eia ke hanu mai nei na kaiko kii @@@@re i keia mau la, no ka liuliu i @@@kaukau i o la honua mamua o ka @@@@o ana mai o ke kau ma ka la 3 @@@@ ei o Okatoaa.
----------
Eia ke makahehi ia nei ke kula @@@@@ holo kaa hehihehi wawae ma ka @@@@e Paikau o Manamana, ke hele @@@ ka po Poaono nei a puua i ka poe @@@ makemake ia hana hooikaika kino.
----------
Mawaena o na ohua a ka moku @@@@ Auseteralia i hoohikihiki aku @@@ @o ke awa ipuka gula o Kaleponi, @@@@ @e Komisina Pukiki Canavaro a @@@@ ka Rev. Makua Gulekana, Bi@@@ @@@a o Panopolisa, kekahi.
----------
Ma ka la 22 aenei o keia malama, @@@@@ mai ai ka mokuahi Alameda @@@@ na Panalaau mai o ka Hema a @@@@ loa aku no Kapalakiko. A ma @@@@ hookahi no, e kapalulu mai ai @@@ mokuahi Monowai mai Kapala@@ @@@ mai a holo aku no na Panalaau.
----------
Pehea ana la na Hui Heihei @@@apa Healani a me Matala e liki @@@ i na ikaika hoehoe waapa o laua @@@ahi. E heihei io ana anei no @@@@kiaha makana a ka waapa i ha@@@ i ka waapa nana ke eo? Ina @@@@, o ka ulele wale no ka mea i @@@.
----------
Ma ka hookuku kinipopo i ma@@@aia mawaena o na pali Iwilei a @@@ ka puali inoa namu ma ke ka@@@ paani o Makiki i ka auina la @@aono i hala, ua haalele loa la i @@@liwaa o Iwilei, ma ka loaa ana ia @@@ou he 10 wale no puni, a i kona @@@@ paonioni he 20.
----------
Ua awihi ia mai makou, eia ke @@@kokoi nei kekahi mau lunamaka@@@ ana Hawaii ma ka hale oihana o @@@@kahi kahu hanai o ka bila loteri. @@eaha ka lakou hana olaila, aole @@akou i mahui mai, aka, ua pono @@ nae i ka lehulehu ke haku iho i @@@ lakou manao.
----------
Ma ka uwapo mokuahi Kaleponi @@ ka Puali Puhi Ohe i ke awakea @@akolu aku nei, kahi i hookuukuu @@ i ka lakou mau ohe leo lea nui @@@ale e makahehi nui ia nei e na malihini makaikai a me ka poe i @@e wale aku i ke kaulana o keia @@ea maikai a Hawaii.
----------
O Kamaka Pupule o Kona Hema, Hawaii, i hoopii ia ai no ka pepehi kanaka i ke kaikamahine a kana wahine me ke kane mua a i waiho @@ no ke kau kiure o Kau, ua hoo@@uu ia mai nei no ka lawa ole o na @@ke e pono ai ke pakaha i ka hanu @@ kekahi mea kino uhane ola.
----------
Ua hoihoi mai ka Malulani i ka la 13 aku nei, ia Lunakanawai Kie@ie Judd, ke kahi o ka Aha Kiure Kaapuni o Kau, Hope Loio Kuhina @reighton, na hoa o ka Papa Loio @. K. Ka-ne a me W. C. Achi, a me na Hoa Hanohano o ka Ahaolelo na Alii J. Kauhane me H.P. Baldwin a me na Lunamakaainana J. N. Kapahu me J. Kaluna.
----------
Ua haawe aku ka mokuahi Ause@eralia no ke awa o Kapalakiko mahope iho o ka hora 12 awakea o ka Poakolu aku nei, ia 39 ohua kapean, 61 ohua oneki a me 5 opeope ali kao, 292 ili pipi, 14 mau pahu hala kahiki, 3,597 mau eke laiki, 4,971 eke kopaa a me 7,041 ahui maia, no lakou na waiwai io i koho ia he $45,205.
----------
Ua haawi aku nei na Misses Adeline a me Beatrice Willis, na kaikamahine hoahanau a Bihopa Willis o ka Ekalesia Enelani, i ko laua mau hookauwa ana e kokua ia Rev. S. H. Davis ma ka malama i ke Kula Hanai Kaikamahine o Kainaliu, Kona Waena, Hawaii. A ma ka la inehinei, ua kau aku laua ma ka mokuahi Malulani, a holo ka Malulani no ke kahua hana.
----------
Ua akena ae ke kapena o ka mokuahi "China" i hekau mai ai ma ka nuku o Mamala i ke ahiahi o ka Poaha o ka pule i hala aku, ua hiki i kona mokuahi ke holo mai Kapalakiko a i Honolulu maloko mai o elima la. Ina pela, e pau ana ko kakou kuhihewa ma ka huakai a ua mokuahi nei e haalele ai ia Kapalakiko i ka la 29 o Sepatemaba nei a holo mai no ka nuku o Malama a me na awa ma Iapana a me Kina.
----------
I ke kakahiaka o ka Poalima i hala, ua halawai o David Crowningberg, kekahi luna e malama ana i ka puali paahao hana mauka o Maemae, me ka ulia ehaeha kuhohonu, ma ka lele ana mai o kekahi pohaku e hoopahupahuia ana e na paahao, a pa maluna o ke poo puka pu. Ua kauoha koke ia o Kauka Peterson a nana i wa-hi ae i na palapu me ka hopohopo loa ia. Aka mamuli o ka malama akahele loa ia, ke pii mai nei ka paapana.
----------
Ua hoi mai ka Mea Kiekie ke Kamaʻliiwahine Pomaikelani ma ka Malulani o ke Poalua nei, mai Kailua, Hawaii mai, mahope o ka hoohala ana ma ia wahi a na ea oluolu i lualai ai no kekahi mau malama loihi i hala aku.
----------
Mamuli o ka piha loa o na oneki o ke KUOKOA me na ohua mai na aina mamao, na palapala a na makamaka, na nohou kuloko, na hoa hanahano o ka ahaolelo a me kekahi mau mea hou e ae me na olelo hoolaha, ua hoopanee ia kekahi mau ohua [mea heluhelu] e keia pule ae.
----------
Ua hooholo ka Ahahui Euanelio e lulu dala na Ekalesia a pau loa no ka pono o ke Kula Kahunapule ma ka la Sabati mua o Okatoba. E pono no i na Kahu Ekalesia e paipai i ko lakou mau hoahanau e hooholo loa i keia hana maikai. E pono ke hoouna koke mai i na dala ia W. W. Hall, ka Puuku o ka Papa Hawaii.
----------
Ua hoouna aku ka Oihana Leta Nui o Honolulu no na aina e ma na mokuahi malalo iho penei: Separemaba 9, ma ka mokuahi Kina no Kapalakiko, he 4,139 leta a me 1,521 nupepa. Sepatemaba 14, ma ka mokuahi Auseteralia no Kapalakiko, he 5,449 leta a me 2,089 mau nupepa. Huina nui i hoouna ia aku iloko o ka hebedoma hookahi, he 9,688 leta a me 3,610 nupepa. Owai ke olelo mai aole keia he anaina kakau leta nui wale.
----------
Ua hoohuiia ma ka mare ma ke kulanakauhale o Rochester, Nu Ioka, ma ka la 24 o Augate, o Mr. Gardner K. Wilder o Honolulu nei, me Miss Gertrude L. Barnes o Rochester, kaikamahine a Mr. W. H. Barnes o ia kulanakauhale, i mua o ke aniani nui a makolukolu. Ua lehulehu wale na makana kumukuai nui. O ka wahine mare, oia kekahi o na kaikamahine @@ o ke kulanakauhale o Rochester, a o ke kane mare, oia ka hope Ilamuku o Honolulu nei.
----------
Ua hoea aku i Kalaupapa ma ka la 6 aku nei i hala, he wahi moku ku@a uuku i manao wale ia o "Ka Hae Hawaii" ka inoa. Ua noi aku ke kapena i ka Luna Nui o ka Panalaau e ae ia mai oia e hoolele aku i kana ukana i manao ia he lanahu, aka, ua hoole ia aole e hoolele aku. Mahope koke iho o ka hoole ia ana aku, ua pupuhi koke aku la ua wahi moku la i ke kai akea. Ua hooili ia aku nae ua ukana lanahu la ma ka inoa o ke kokua Damiena i hala aku i ka make.
----------
Ua amu ke ahi ia loko o na paia o ka hale kauwa o Mr. F. S. Dodge a puka iluna o kaupoku maloko ae, e ku nei ma alanui Moi, ma Waikiki aku o ka pa ulu niu o Mrs. C. P. Ward, a na ka pake i pii a luna o kaupoku, ninini ia iho me ka pakeke wai, pio ai. Ua hiki ae no ke Kaawai Helu 1, aka, o i imi wale i kahi o ka puka wai o ia alanui, a hala okoa he manawa, nolaila aole i kiwai iki i ka hale pauahi. Ua manaoia he ahi mai kela no ka aiana pio ole i waiho palaka ia.
----------
PAPA LEO NO KA PONO WAI.-- Ma ka Poalua, Sept. 13, ma Kalaepaa, e kokoke ana i kahi kaulana o Kalihi, oia hoi ka auwai o Kaluaopalena e moe nei ma ka aoao komohana o ke kahawai o Kalihi, ua papa leo o Mrs. Mary Akoni me kekahi Pake no ka pono wai, a hiki i ka hoao ana o ka Pake e hapai i kana oo me ka manao e uhau maluna o Mele, aka, ua hoomaka koke ae la oia e kahea i mau kokua nona, a ua hoea koke ae la o S. Kaaiai me D. Kaaiai. O ke kumu, ua hookahe naaupo ka Pake i ka wai o ka auwai no kona mau loi me ka nana ole i ka pono o kela wahine, oiai he elua laua ia la hookahi.--KALIHI.
----------
OIHANA KUKUI UWILA.--Ke hoike mai nei ka emi loa o na luawai i keia mau la. I Dekemaba, 1891, ua hoopihaia ka luawai Helu 1, e pili la i ka Hale Kukui Uwila, he 21,304,211 galani wai; Kahapaakai, luawai Helu 2, he 10,712,230; Luakaha, luawai Helu 3, he 7,301,639. Ma na pule hope o Iune oikeia makahiki, ua hoomaka mai ke emi o ka wai a hiki i ka la 13 iho la o keia malama, a penei ke kuhikuhi o keia mau luawai e hoopihapihaia nei mai ka hora 7 a.m. a hiki i ka hora 6 ahiahi: Helu 3, mai ka 7 a emi mai i ka 4 galani wai e komo mai ai iloko ke paipu a komo i ke kio; iloko o 12 hora e hoopihapihaia ai ka luawai Helu 2, he 2 a 3 kapuai o ka la. Eono la i maloo loa ai aohe wai. O ka nui o ka wai e ume ia ana eka uwila, mai kela mau luawai mai a komo iloko o ka Helu 1, iloko o ka 12 hora e a ai ke kukui, he 4 a 5 kapuai, a o ia no kahi wai e hoolawa nei i ke kulanakauhale i kela a me keia la. E maloo ana i ka hora 10, a i ka hora 3 i kahi manawa.--T.S.KALAMA.
------------------------------------------------------------------------------------------------------------
NUHOU KUWAHO.
----------
Ua holo heihei mai nei na mahimahi o ka moana Atalanika Alaska a me Auraria mawaena o Enelani a me Nu Ioka, ma ka haalele like ana i ke ahiahi o ka la 7 o Augate, he 55 minute ke kaawale o ka mokuahi mua i ko ka hope, a ua hiki like laua i Nu Ioka ma ke kakahiaka o ka la 14 o Augate. Ua holo ia kela akea o ka moana Atalanika e ka mokuahi Auraroa iloko o eono la, 15 hora a me 8 minute, a o ko Alaska manawa holo, he 16 hora a mr 3 minute.
E ia maluna o ka mokukaua Italia "Garigalano," o Manilo Garibaldi, ke keikikane hope loa a Generala Garibaldi a he Hope Lutanela no ke aumokukaua alii o Italia, me ke kia hoomanao o Kolona. E haawiia ana i ke kekikane a ka moho mokomoko o ke kuokoa, he ahaaina a hookipa hanohano nui ma Nu Ioka, e na hoa makaainana ona e noho ana ma Nu Ioka.
Ua hoouna aku o Lanouehere, kekahi lunamakaainana o ka Aoao Kuokoa o Enelani, he elua mae mamala olelo i ka Agena Hoolaha Mea Hou ma Ladana e hoike ana, ua hookomo ia kona inoa ma kekahi o na kuhina, aka ua holoi ia kona inoa e ke Alii ka Moiwahine, a oia kue ana iaia ua kukuluia maluna o kona kue ikaika loa i na haawina i ka ohana alii.
Mamuli o ke noi a na makaainana o Dekemaka i na luaui Moi a me Moiwahine, e waiho ia ma kekahi wahi hoikeike akea ka laua makana nani o ka piha ana o ko laua mau makahiki he kanalima o ka noho ana maemae iloko o ka mare, ua ae aku laua. Nolaila ua lawe ae na makaainana he haneri tausani i ka pomaikai o ka hele ana aku e ike kino i na hookupu a ka lahui i ko lakou mau aliiaimoku i mahalo nui ia.
O na wahine ukali hele i ke Alii ka Moiwahine Victoria, ke uku ia nei lakou he $1,500 pakahi o ka makahiki. Ua kauoha ia lakou e hele mai imua o ka Moiwahine i kela la keia la me na kahiki hou wale no, a e ku makaukau mau naa i kela a me keia wa @o ka ukali ana ka Moiwahine i na hora a pau o ka la.
I ka piha koke ana mai nei o na makahiki he kanaha o ka Moiwahine Olga e Helene, ua kaa iaia ka hanohano o ka lilo ana i kupuna wahine i ke kanakolu kumamaiwa o kona mau makahiki. O ka Emeperese Ferederika hoi, ua lilo no oia i kupuna wahine i ke kanakolu kumamaiwa o kona mau makahiki, oiai hoi ka Emeperese o Auseturia i ae aku ai ma ia keehina hanohnao i ke kanakolu kumamaono wale no o kona mau makahiki.
Ua hoolaha ia ae na inoa o ka poe a ka Moiwahine i papahi aku ai i na hoohanohano ana penei: O ka Earl o Zetland, ka Viceroy o Irelani, ua hookiekie ia i Maquisa; o Viscount Crankbrook a me Baron Willoughby de Bresby, ua hookiekie ia laua i mau Earl. Mawaena o ka poe i hookiekie ia ae i mau Baroneta, oia o John Jaf@ray o ka nupepa Birmingham Pou a me Edward Larson o ka nuepa Teregarapa o Ladana.
He makahiki pomaikai nui no ke Alawai Oki o Sueza ka 1891 i pau. Ke olelo nei ka hoike a ka Papa Alakai Beritania o ka Hui i hoopuka ia, ua komo maloko o ke Alawai Oki i ka makahiki i hala, na tona moku he 1,808,683 ka oi aku mamua o ko ka makahiki 1980, a he 1,915,590 na tona oi aku mamua o ko ka makahiki 1889. Ua pii pu ae na loaa mai no ke Alawai mai ka $13,233,516 i ka 1889 a i ka $16,684,240 i ka 1891.
--------------------------------------------------------------
--------------------------------------------------------------
NA LETA
----------
[Aole o makou makemake e lawe i ke koikoi o na hala no na manao i hoopuka ia malalo o keia poo e ko makou poe mea kakau.]
----------
Haule ka Maluhia o ka la Sabati ma Ewa,
----------
MR LUNAHOOPONOPONO:
E oluolu oe e hookomo iho ma kahi kaawale o kou kino holookoa i keia mau hua e kau ae la maluna.
1. O ka la Sabati ma Ewa nei, he la ia e pii ai na kanaka a me na hapa haole, na Pake, na hapa Pukiki a me na haole ponoi i kuahiwi o Waiawa Manana a me Waiau, i ke alualu puaa holonahele, me ka manao ole ae he la Sabati. E hoi ana me na puaa ola a me na eke puaa ua pau i ka lole ia ma ke alanui Lehua.
2. O ka la Sabati, he la ia e lawaia ai ka haole, kanaka a me na lahui e ae. He kohu la noa ka lawe ae no ai, a pela wale aku.
3. O ka la Sabati o ia ka la e malama ia ai he mau ahaaina la hanau, a la luhi i ka hana, o ka hora 8 a me 9, e a ana ka inu puaa, oia ko Honolulu poe ke hele ae nei ma kuaunaloi laiki. Ua pa wahi kiaha kini no me na omole no i ka poli, e imu ana, e hula ana, kani na pila, e uwa ana, a e hakaka ana.
4. O ka la Sabati, he la ia e pepa ai, pepa na kanaka Hawaii, pepa na Iapana, pepa na Pake, uwa aku uwa mai, nui na leo, aole he manao ae he la Sabati.
5. O ka la Sabati, o ia ka la e ona rama ai na wahine a me na kane, e uwa ana, e holo kaa ahi ana, he mea ole ka leo o ka hele. O keia ae la na mea aʻu e waiho aku nei na ka lehulehu e kaana mai. O keia mau hana kahiko loa mai no keia.
E ninau mai paha auanei ka Ilamuku a me ka Loio Kuhina, auhea ka hoi ka Hope Makai o Ewa a me kona mau makai hoi, aʻu i hoonoho aku ai e malama i ka maluhia o ke aupuni. E auhea oe, eia no lakou nei i ka oni a ke kaa ahi. E hoopau i ka poe haihai kanawai, me kuu kanalua ole, ua pili keia hewa i ka Hope Mai nui o Ewa nei, mamuli o kona nana maka wale ana me ka hooko ole i ke kanawai o ka la Sabati. Ua pili pu i na makai palaualelo keia hewa, a mamuli o koʻu ano, he kokua ma na hana pono, he mea ehaeha i ka manao o ka poe haipule ka nana ana aku e hana ia mai ana na ino e ka poe hoomaloka, e haalele loa. Ke noi nei au i na haipule mai Hawaii a Niihau, e pule mai i ke Akua i oki ka hana hewa ana, a i pau ka noho ana o ka poe aia ma ka noho ana maluna o na Oihana o ke Aupuni.
G. W. K. AEKAIOKULOLOIA.
Manana, Ewa, Sept. 5, 1892.
-----------------------------------------------------
Paani Kinipopo ma ka Aina Mauna ma
Uka o Waimea Malalo o na
Kuahiwi.
----------
Ma ka la hanau o ka Moiwahine Liliuokalani, Sept. 2, 1892, hora 10 a.m. ua wehe ia he paani kinipopo mawaena o na hui Waimea kue ia Kamehameha.
Kameh. Kulana Waimea
S.Mahuka Nou Vedenburg
S.Koki p. 1 M.Koki
A.Kaaua p. 2 J.Chesebro
Paukeaho p. 3 Kawai
W.Lindcey h. D Koki
W.Spencer h. p. Amokoki
Sidney k. a. E.Lindsey
Betuela k. h. Puna
W.Jarett k. w. Kalei
Ma ka paani ana iloko o na hora 3, ua kue mai o Kamehameha i na puni 17 ia Waimea me na puni 4 wale no. He like no a like na eleu o laua, ka miki, a me ka makaukau, aka, o ka pilikia wale no i ko Waimea nei mau keiki, ua ano e ka lakou hele a me ka holo ana, a ina paha iluna o ka lio e hoohei ia ai ka popo i ke kaula ili, alaila, e haanui ae au e pau loa ana na na keiki o Waimea i ka pii i kalua o Pele me ka uku ole.
E Rev. W. B. Oleson, eia mai ko mau keiki ke hoi aku la me na puolo he umi 17 puni ka lanakila, he hiwahiwa a me ka hanohano a kulana helu ekahi o ka makaukau i ike ia.
Hookahi no S. Mahuka o Waimea nei pii ia ana o kalua o Pele me ka uku ole. Aka, ua kaa nae hoi na ko Waimea nei ma E. Lindsey ala ka haihai ana i ka laau hahau o pokopoko liilii. Aole makou e uhai aku ana i ka pii i ka lua o Pele me ka uku ole, aka i na he holo i New York me ka uku ole, alaila, e hoomanao iho oe, elua makahiki mai ka la aku e puka ai o keia. E holo auanei ua Waimea nei i ka ihu o ka mokuahi hao o na ale o ka moana Pakipika.
Pau ke kinipopo ana, kau mai ana ka hua i ka umauma a ka L. K. apana S. H. Mahuka Esq. He papa ahaaina i piha me na ono a pau e hiki ole ai ke hoolahalaha. He papaaina keia i wehe ia no ka hanohano o ke keiki kaulana o ka ua Kipuupuu nei i ke kinipopo, Sam. Mahuka, a kona mau luaui i hanai ai. Ma ka noho ana i luna o na pakaukau a kohu moa uakea no hoi na kaikamahine me na aahu kohu hau ala no Maunakea i ka poli o Lilinoe.
O ke mele a ka makua Lyons, i kela wa kahiko. He iʻa ke kukui, aka, ano ua makaukau he pipi me ka puaa kaka ia, ua pau ua nalo naʻlii. A koe na makaainana ke noho nei e kaukau. Ma ka noho ana o na mea a pau iluna o ua papaaina ala, hookahi a ka lio, ko na keonimana elua no hoi a ka lio, ko na lede no hoi ua like no me ko na keonimana.
Ua mahalo ia a ua hanai ia na mea a pau ma ka la hanau o ko kakou Moiwahine e ko ka ua kipuupuu nei me ka maluhia. E ola ka Moiwahine i ke Akua mau loa.
H. P. K. MALULANI.
Waimea, Sept. 5, 1892
------------------------------------------------------------------------------------------------------------
------------------------------------------------------------------------------------------------------------
Hoolaha Hou
------------------------------------------------------------------------------------------------------------
------------------------------------------------------------------------------------------------------------
Hoolaha a ka Papa Nana!
----------
Apana 1 o Honolulu Mahele 2.
----------
E malama ana ka Papa Nana Koho Balota o ka Apana 1, Mahele 2, i halawai no ka hooponopono ana i ka Papa Inoa o ka poe koho ma ka pakui ana mai i na ino o ka poe hou a kiola paha i na inoa o ka poe i make, a ano e ae paha i kupono ole, ma ka Halekula ma Alanui Beritania e like me keia:
Ma ka Poaha, Sepatemaba 22, a me ka Poakolu, Sepatemaba 25, mai ka hora 7 a 9 ahiahi; a ma ka Poaono, Sepatemaba 24, 1892, mai ka hora 4:30 a 8:30 ahiahi.
J . ALFRED MAGOON,
2497-4@. Lunahoomalu.
------------------------------------------------------------------------------------------------------------
Ma ka mokuahi Kulanakauhale o Hivaoa o ka la 10 o Lufilufi i hala, i hoea mai ai na aekai o Hawaii nei o Poropeka W. Kifu, ka haole iniliki hoe kaulana i ka hoolele leo mahope o kona kaapuni ana ia Ni@ice no kekahi mau makahiki. Ma ka Poaha iho nei, ua kipa mai la oia ma ko makou nei keena, a ua haawi ae la oia i kekahi o na leo hoolele ana i aʻo ai a ike, ua pii aku kona leo i ka nui e like me ka leo o ka hipopotamu noho muliwai o Nile a i ka nanahe o ka leo o ka manu oo o ka uka o Laa. Oiai no oia e kuupau ana i kona ike hoolele leo, ua lohe aku la na manu nunu lawe leta i keia leo kohu pupu kanioe i ka po lai, ua pau mai la lakou i ka huli hou mahope o ko lakou auwana ana no kekahi mau anahulu. E wehe ana oia he hoikeike i kekahi o na po o keia pule ae ma Waolani, no ka uku he elima keneta. Ke kono aku nei makou i na eepa a pau e hele ae e ike i ka po lea o Halalii. He ku maoli no i ka ii pa hoolele leo ana akeia iniliki hoe.
--------------------------------------------------
Ke pii mahuahua mai nei ka makemake ia o ka Chamberlain Colic Chorela a me Diarrhoea Laau Lapaau Ola, mamuli o ka ike o ka poe a pau i hoao i na hopena maikai i loaa mai, a na lakou aku hoi i hoikeike aku i ko lakou mau hoalauna. Ke hilinai nei makou aohe mau hookaulana kiekie e ae a nui. E kuai ia aku no e na mea kuai laau lapaau a pau, BENSON, SMITH & Co. na Ageua ma Honolulu.
----------
He nui ka hoonaluea ana a ka maʻi ma ka opu i keia kau, wahi a G. W. Shivell, ka mea kuai laau lapaau, o Wickliffe, Kenetuke, "a ua nui launa ole mai na noi no ka Chamberlain Colic, Cholera a me Diarrhoea Laau Lapaau ola. Ua hoolilo aku au ma ke kuai ia eha mau omole o kela laau i keia kakahiaka. Ua ike ia kekahi ola ano kupanaha a keia laau, a ma na maʻi no a pau ua keu a ka holopono." E kuai ia aku no e na poe kuai laau lapaau a pau, BENSON, SMITH & Co. na Agena ma Honolulu. 2406-4t.
------------------------------------------------------------------------------------------------------------
------------------------------------------------------------------------------------------------------------
Hoolaha Hou.
------------------------------------------------------------------------------------------------------------
------------------------------------------------------------------------------------------------------------
OLELO HOOLAHA.
----------
MAI KEIA LA A MAHOPE AKU NEI, UA lilo loa ka mana o ka Hale Haba Papale ia
MRS. GOOD.
E hoi aku ana o Miss McGowan ma ka Poakahi, Sepatemaba 12.
[KIʻI] O na aie a pau e koe nei.
E HOOKAA KOKE IA MAI,
ia Mrs. Goodm a i ole e haawin koke ia no iloko o na lima o ka mea ohi aie.
O NA LOLE I HOOWEHIWEHI IA
e kuai ia aku no
MA KE KUMULILO
--a hiki i--
NOVEMABA EKAHI.
2407-4T.
------------------------------------------------------------------------------------------------------------
OLELO HOOLAHA.
E IKE AUANEI NA KANAKA A PAU KE kahea aku nei au i kuu kane male ia Alo Pake e hoi mai aʻu, ina aole oia e hoi mai no na mahina ekolu, ua mana iaʻu e imi hou i makua noʻu. Aole oia malama mai iaʻu i ka ai me ka ia a me na mea a pau; ua like me 11 makahiki o ko maua kaawale ana a hiki i nei la aʻu e hoolaha aku nei imua o ka lehulehu.
MRS. IUKINA KAOHE.
Naalehu, Sept. 11, 1892. 2407-tf@
------------------------------------------------------------------------------------------------------------
OLELO HOOLAHA.
O MAKOU O KA EKALESIA O KAUMAKApili, ma o ko makou Kahu Ekalesia la, ke hoike aku nei i ko makou mau makamaka a pau, e hoopuka ana makou i mau pepa noi dala, a e ike mai oukou i ko oukou mau komite me ke aloha.
J. WAIAMAU,
Kahu Ekalesia.
Honolulu, Augate 22, 1892. 2405-4t.
------------------------------------------------------------------------------------------------------------
Hoolaha a na Luna Hooko Kauoha.
O KA POE A PAU HE MAU KOINA KO LAkou i ka waiwai o JOHN H. WOOD, i make me ke kauoha o Honolulu, Oahu, ke kauoha ia aku nei lakou e waiho mai me na hooia kupono, i na mea nona na inoa malalo iho maloko mai o na malama eono mai keia la aku, a ina aole e waiho ia mai na koina iloko o ia manawa, e hoole mau loa ia aku no. A o ka poe a pau i aie i ka mea i make, ke kauoha ia aku nei lakou e hookaa koke mai i na mea nona na inoa malalo iho.
ALFRED S. HARWELL,
HENRY WATERHOUSE,
Na Luna Hooko Kauoha o ka Palapala Kauoha o John H. Wood i make.
Honolulu, K. H. P. A. Aug. 30, 1892.
[2405-4t]
------------------------------------------------------------------------------------------------------------
Hoolaha Hooko o ka Moraki a me ke Kuai.
I KULIKE AI ME NA HOOKO ANA O KEkahi moraki i hana ia e TIN WO ia S. C. Allen, ma ka la 30 o Aperila, 1892, i kope ia iloko o ke Keena Kakau Kope ma Honolulu, Buke 138 a ma na aoao 52 a me 53, ke hoolaha ia aku nei ka lohe i na mea a pau, ke makemake nei ka mea e paa nei i ka moraki e hooko, no ka uhaki ia o ka aelike, oia ka hookaa ole ia o elua mau manawa o ke kumupaa i ka wa e hookaa ai.
Ke hoolaha hou ia aku nei, mahope aku o ka pau ana o ekolu hebedoma mai keia la aku, a i ka POAKOLU, la 21 o SEPATEMABA, 1892, e kuaiia aku @o ka waiwai i paa ma ua moraki la ma ke kudala akea ma ka Hale Kudala o J. F. Morgan, Honolulu, hora 12 awakea.
No na mea i koe, e ninau ia J. Magoon, Loio no
S. C. ALLEN
Kakau ia ma Honolulu, Augate 6, 1892.
O ka waiwai i paa maloko o ua moraki la, oia ka hoolimalima o kela aina e waiho la ma Alanui Moi kokoke i kahi hookio o ke Alahao o Oahu, mai a Sam Wo mai a i ua Tin Wo nei, i hana ia i ka la 2 o Iulai, 1891, no ka manawa he umikumamaha makahiki a me ewalu a me hapa malama mai ka la 1 mai o Augate, 1891, ma kauku hoolimalima he ekolu haneri dala o ka makahiki, i kope ia iloko o ke Keena Kakau Kope, Buke 134 aoao 81-83. 2404-4t
------------------------------------------------------------------------------------------------------------
KA HALE HOIKEIKE
MEA - KAHIKO
---- o ----
Bernice Pauahi Bihopa.
--------
E wehe ia ana no ka makaikai ia mai e ka lehulehu ma na POALIMA, mai ka hora 9 ahiki i ka 12, a ma na POAONO, mai ka hora 2 ahiki i i ka 5 auina la. O ka ae ana aku i na poe makaikai ma na la e ae, he mea ia e hoopilikia mai ai i ka hana mau o ka Hale Hoikeike. Ma ke kauoha a na Kahu Waiwai.
W. T. BRIGHAM,
2406-3T Mea Malama.
------------------------------------------------------------------------------------------------------------
Hoolaha Hou.
------------------------------------------------------------------------------------------------------------
------------------------------------------------------------------------------------------------------------
[KIʻI] MUTUAL 76----NA TELEPONE----BELL 179 [KIʻI]
C. E. WILLIAMS,
KA POE HOOKOMO MAI, KUAI AKU A ME
HANA PAKA O NA HOONANI HALE
MAIKAI O NA ANO A PAU ME KA MAKEPONO.
ME NA E LOAA NO
Piano i Hanaia Na He Kupapau
Me ke Kupeno i [KIʻI] Na Pohaku Mabela, e
keia ea, wae ai a ka
Aole Mu e komo. Makemake Lawe.
----MAANEI E LOAA AI----
NA LAKO KANI KUPAPAU, KAA
A me na Pono Ia-loa i ke kino o ka mea aloha.
HELU 105 ALANUI PAPU - - - - HONOLULU.
@@83-@
------------------------------------------------------------------------------------------------------------
------------------------------------------------------------------------------------------------------------
Ka Halekuai Laau Lapaau Hou
HUINA O NA ALANUI PAPU ME MOI.
Ke hoolako mau ia nei me na laau lapaau oi loa o ka maikai ma Honolulu nei a ke kuai ia nei ma ka emi loa.
Ka Laau Kunu maikai,
Ka Laau Hoomaemae Koko Saseparila,
Na Hua-ale maikai,
Na Hua-ale maʻi fiva maikai,
Na Paakai pipii maikai,
Na Paakai hoonaha maikai,
Na Sopa a me na Waiala maikai,
Na Aila Niu hamo lauoho maikai.
[KIʻI] E hoomanao i ka inoa a me kahi o
HOBRON a me NEWMAN,
Huina o na Alanui Papu me Moi. 2383-tf.
------------------------------------------------------------------------------------------------------------
------------------------------------------------------------------------------------------------------------
HOOLAHA KOMOHEWA.
KE HOOLAHA AKU NEI KA MEA NONA inoa malalo iho, ua papa loa ia na kanaka a pau aole e komohewa ma kekahi hapa o ke Ahupuaa o Lumahau ma Hanalei, Kauai, malalo o ka hoolimalima i kana keikikane tong Na@, aole hoi e lawe i kekahi mea mailuna aku o ua aina la. Ke kauoha ia aku nei na ona o na holoholona a pau e holo ana maluna o ua aina la, e hoonee koke aku me ke kali ole, a i ole ia e hoopii ia no e like me ka wikani o ke kanawai. T. ALO.
Waioli, Hanalei, Kauai, Sept. 12, 1892. 2407-4t.
------------------------------------------------------------------------------------------------------------
Hoolaha Hooko o ka Moraki a me ke Kuai.
I KULIKE AI ME NA HOOKO ANA O KEkahi moraki i hanaia e KUAWELA ia Jonathan Austin, Kahu Malama, ma ka la 27 o Okatoba, 1886, i kopeia ma ke Keena Kakau Kope, Buke 101, ma na aoao 294 me 295 a i hoolilo ia aku ia J A Magoon e Jonathan Austin ma ka la 14 o Dekemaba, 1887, ke hoolahala aku nei ka lohe, ke makemake nei ka mea e paa nei i ka moraki e hooko aku, no ke kumu ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.
Ke hoolaha hou ia aku nei, mahope aku o ka hala ana o na hebedoma ekolu mai keia la aku, ma ka POAKOLU la 21 o SEPATEMABA e kuai kukala ia aku no ka waiwai i paa ma ua moraki la ma ka Hale Kudala o Jas F Morgan, Honolulu, hora 22 awakea o ia la.
No na mea i koe e ninau ia
J A MAGOON.
Kakauia, Augate 6, 1892.
O ka aina i paa maloko o ua moraki la, oia kela apana aina e waiho la ma Waimea, Kona, Kauai, i kuhikuhi ia ma ka Palapala Sila Nui Helu 7746 a Kuleana Helu 3608 ia Kaniahe.
2404-4t.
------------------------------------------------------------------------------------------------------------
HOOLAHA.
E ike auanei na kanaka a pau ma keia, owau o ka mea nona ka inoa malalo iho nei, ke hoike aku nei i na poe a pau i aie mai ma koʻu
HALEKUAI MA HILO, HAWAII,
e pono e hookaa koke mai i ko lakou mau aie mua maloko o na
Mahina - Ekolu
mai keia la aku; a e oluolu ia ana no na poe e hookaa pau mai ana ia mau aie, e aie hou mai.
O na waiwai o koʻu halekuai ma keia mua aku, e kuai ia aku no ma ke
KUMUKUAI OLUOLU
a makepono no hoi, a e hoopiha ia no hoi me na
WAIWAI ANO HOU LOA
i oi ae mamua o ko na au i hala aku, a he emi iho na kumukuai ma
Ke Dala Kuike
Owau no me ke aloha,
C. Y. AIONA.
Hilo, Hawaii, Aug. 26, 1892. 2405-9t
------------------------------------------------------------------------------------------------------------
KAUKA LEONG KENG TONG,
(L. AKINA.)
--------
E IKE AUANEI NA ANO LAHUI A PAU, E noho ana ma ke Aupuni Hawaii, mai na kane, wahine a me na keiki; i loaa i na maʻi o kela a me keia ano, e naue mai i koʻu keena hana, a naʻu e hoopau aku i na ehaeha a ka maʻi maluna o oukou e na makamaka, he hiki iaʻu ke lapaau i na ano maʻi a pau: maʻi iloko o ka opu, huʻi ke kino, aki iloko o ka iwi, eha o ke poo, maʻi wahine, a pela aku. Mai hoololohe aku e na hoa, a he hiki iaʻu ke lapaau i ka maʻi hookaawale ohana. Hele mai hookahi, hele mai elua, hele mai no a pau loa; he oluolu ka auhau, ke hui me ia ma na kukai olelo ana; ua makuakua au e pulama mai i na kono ana mai mai na Mokupuni mai, me ka eleu me ka hikiwawe loa, he makamaka a he hoaloha maikai no oukou e na Hawaii oiaio.
DR. L. AKINA,
Helu 40, Huina o na Alanui Kamika a me Hotele, Honolulu.
2405-1y@
------------------------------------------------------------------------------------------------------------
KUAI HOOPAU!
--------
A. G. SILVA & CO.
HAWAENA O NA ALANUI HOTELE ME NUUANU.
--------
Mamuli o ka manao e nee aku ana iloko o ka
malama, nolaila e kuai aku ana makou i
ko makou ahua waiwai nui a pau
MALALO IHO O KE KUMUKUAI
oia hoi
Na Kamaa,
Na Kakini Kane a me Wahine,
NA KALAKOA, NA LIHILIHI,
Na Lipine, na Huluhulu, na Marina,
NA WAIHOOLUU I WAE IA;
NA LAKO PALEMAI, a pela aku.
--------
2405-4t. A. G. SILVA & CO.
------------------------------------------------------------------------------------------------------------
P PUHALAHUA.
LOIO LOIO LOIO
Ua ae ia mai au e lawelawe imua o na Aha Hoomalu a me Apana a pau o keia Aupuni. He Agena Hooiaio Palapala no ka Apana o Hana, Mokupuni e Maui.
E loaa no au i ka Ua Peepapohaku o Kaupi, a ma Hana i kekahi manawa. 2387-@y@
------------------------------------------------------------------------------------------------------------
J. HOPP & CO.,
Na Poe Hana ma na Lako
Hale o na ano a pau!
Hana Moe, Na Uluna Pulu, Etc.
Noho no ka Hoolimalima ana, ua
Lako Hale me ke kumu@uai emi.
Honolulu. 2357@
------------------------------------------------------------------------------------------------------------
Hoolaha Hookapu Komohewa.
KE HOIKE IA AKU NEI KA LOHE I NA Ona a pau o na holoholona e helehewa la maluna o ko makou mau Aina ma HUMUULA a me ka hapa mauka o Piihonua, Hilo, Hawaii, e lawe koke aku ia lakou me ka hookaulua ole, a i ole ia e hoopii ia no e like maka piha o ke kanawai.
HIMUULA SHEEP STATION CAMPANY
Na ARMIN HANEBERG.
Kalaieha, Apr. 8, 1892. 2385-tf.
------------------------------------------------------------------------------------------------------------
Hoolaha Hookapu Aina.
KE PAPA A HOOKAPU LOA IA AKU NEI ka holo ana o na holoholona o ka poe e ae maluna o na aina hanai holoholona oʻu ma Piihonua a me ka hapa mauka o Humuula, Hilo, Hawaii, a ke kauoha ia aku nei e hoonee aku i na holoholona me ka hookaulua ola, a i ole, e hoopii ia no e like me ke kanawai.
J. T. BAKER.
Hilo, Hawaii, Mar. 31, 1892. 2384-tf
------------------------------------------------------------------------------------------------------------
Hoolaha a ka Luna Hooponopono Waiwai.
O WAU O KA MEA NONA KA INOA MALALO iho ko kauoha ia aku nei na mea a pau ma ka waiwai o D. W. Kalua (k), no Kawainui, Hilo, Hawaii, i make kauoha ole, ina he mua koina ka oukou i na waiwai la e waiho mua mai maloko o na mahina eono ma koʻu lima mai kela la aku, a i ole e hoole ia, a ina hoi ke paa ia nei kekahi waiwai ma ko oukou lima e hoihoi ia mai i koʻu lima maloko o eono mahina.
D. KAMAI.
Luna Hooponopono Waiwai o D. W. Kalua.
Hilo, Aug. 25, 1892. 2405-@@
------------------------------------------------------------------------------------------------------------
E IKE IA KAKOU HAWAII.
E Oʻu mau hoaloha a me na makamaka--
Aloha nui oukou.
Ua hoi mai nei o KUKIMA mai Kina mai, a nolaila e kuai aku ana oia me ka makepono loa i na lole o ka Halekuai Hui o Kukima Ma, e ku nei ma alanui Nuuanu ma ka Hale pohaku o Pico. E hoomaka ana ke kuai emi i keia
Poaono, Iulai 30.
A e hoomauia aku ana no
ELUA PUKE WALE NO.
Ua hoemila na Lole e like me keia: He 18 iwilwi kalakoa maikai no $1.00; he 14 iwilei keokeo paina no $1.00; kukaenalo, $1.00 no 14 iwilei.
Na Lole kane Ka@@mea huluhulu paa maikai loa o na ano like ole, e kuai pio ia aku ana me ke emi loa. Na Lipine o na waihooluu like ole e kuai hoemi loa ia aku ana
No ke Dala Kuike,
Na Paa Lole kane o kela a me keia ano, palule, palemai, kakini, papale opiopi ano hou loa o na ano a pau. Emi loa make dala kuike. Na huluhulu moe o na ano a pau.
Na Lole Alapia wahine, he oluolu loa ke kumukuai. Na lole wahine nahenahe, he makepono loa ke kuai pio. Na palekoki, muumuu, kakini, pua papale, a he nui loa aku na mea i koe aole e hiki ke helu papa aku. Na kihei wahine liilii a nunui, he makepono loa.
Na Lole o Kela a me Keia Ano, a
me Kela me Keia mea he
Nui wale aku.
E hele nui mai e kuai, a e ike no oukou iho.
GOO KIM.
Honolulu, Iulai 30, 1892. 2100-8t
------------------------------------------------------------------------------------------------------------
Hale Hana Kopa o Honolulu.
--------
Ua paa a@nei ka Hale Hana Sopa Mahu Hou o ka poe no lakou na inoa malalo iho o ua makaukau lakou e hoolawa aku i ka poe piepiele i na
Kopa Maikai Loa Maoli
I hookomo ia iloko o na Pahu 100 paona mai ke 42 a 56 auka Kopa pakahi.
Ke hooia nei makou i ka oi o la MAIKAI o
ka makou KOPA mamua o na Kopa
o waho mai.
--------
[KIʻI] Ua kuni ia mawaho o ko makou mau Pahu me ka hoailona "HONOLULU SOAP CO.," a e
Kuai ia e na Halekaui
Liilii a Pau.
HUI HANA KOPA O HONOLULU
M. W. McChesney & Sons,
Na Egena.
2383-@