Ka Nupepa Kuokoa, Volume XXXI, Number 51, 17 December 1892 — Page 4
| This text was transcribed by: | Iasona Ellinwood |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Nupepa Kuokoa
ME
Ko Hawaii Paeaina i Huiia
No ka Makahiki, - - - $2 00
No Eono Mahina. - - - 1 00
Kuike ka Rula.
HOOPUKAIA E KA
HAWAIIAN GAZETTE CO.
H. M. WHITNEY, Luna Nui,
J. U. KAWAINUI, Luna Hooponopono.
POAONO, - DEKEMABA 17, 1892.
KULA SABATI.
Ianuari 1, 1893. Ka hoi hou ana mai ka noho pio ana ma Babulona. Ezera 1:1-11.
1 Ka makahiki akahi o Kuro ke alii o Peresia, i hookoia ai ka olelo a Iehova ma ka waha o Ieremia, hoala mai o Iehova i ka naau o Kuro ke alii o Peresia, a kukala aku ia ma kona aupuni a pau, a ma ka palapala hoi, i ka i ana e,
2 Peneia ka olelo a Kuro ke alii o Peresia, O Iehova ke Akua o ka lani, ua haawi mai ia no'u i na aupuni a pau o ka honua; a ua kauoha mai oia ia'u e hana i hale nona ma Ierusalema i Iuda.
3 Owai la ka mea iwaena o oukou no kona poe kanaka a pau? o kona Akua kekahi me ia, a e pii aku ia ma Ierusalema i Iuda, a e hana i ka hale ma Ierusalema no Iehova ke Akua o ka Iseraela, oia ke Akua.
4 A o kela mea keia mea e noho ana ma na wahi a pau ana e noho la, e kokua mai na kanaka o kona wahi iaia me ke dala, a me ke gula, a me ka waiwai, a me na holoholona, me ka makana no hoi no ka hale o ke Akua ma Ierusalema.
5 Alaila ku ae la ka poe koikoi o ua makua no ka Iuda, a me ka Beniamina, a me na kahuna, a me na Levi, o na mea a pau a ke Akua i hoala mai ai i ko lakou mau naau e pii ae e hana i ka hale no Iehova ma Ierusalema.
6 A kokua mai no ko lakou poe hoalauna a pau ia lakou me na kiaha dala, a me ke gula, me ka waiwai, a me na holoholona, a me na mea maikai, a he okoa hoi na mea a pau i haawi lokomaikai ia mai.
7 A lawe mai la o Kuro, ke Alii, i na kiaha o ka hale o Iehova, na mea a Nebukaneza i lawe ae mai Ierusalema mai, a waiho ia lakou iloko o ka hale o kona mau Akua;
8 Oia mau mea ka Kuro ke alii o Peresia i lawe mai ai iwaho, ma ka lima o Miteredate, ka puukukala, a helu aku la ia mau mea no Sesebazara, ka luna no ka Iuda.
0 A eia ka huina o ia mau mea; he kanakolu ipu gula, a hookahi tausani ipu dala, he iwakaluakumamaiwa pahi.
10 He kanakolu bola gula, eha haneri a me ka umi keu na bola dala maikai iki iho, a o na kiaha e ae hookahi tausani.
11 O na mea gula a pau, a me ke dala, elima tausani a me na haneri eha. O keia mau mea a pau ka Sesbazara i lawe aku ai i ka pii ana o ka poe pio mai Babulona aku a Ierusalema.
Pauku Gula. Kanawailua 30:3. A laila e hoohuli aku o Iehova kou Akua i kou pio ana a e aloha mai ia oe.
Manao Nui. E pono i ko ke Akua poe manaoio ke paulele loa i kona hooko ana i kana mau olelo wanana.
OLELO HOAKAKA.
Pakolu ka lawe pio ana i na Iudaio, (1) M.M. 606, o Daniela ma. (2) M. K. 589, o Ezekiela, Mondekai, he poe 10,000. (3) M. K. 586 i ka wa a Nebukaneka i hoopau ai i ka luakini a me ke kulanakauhale o Ierusalema. O ka huina pau oia paha 200,000. Ua noho pu kekahi poe Iudaio a lilo i poe kuonoono. O na hua maikai e ae no keia popilikia lahui oia no ka hoopau ana i na hana hoomanamana, ka lilo ana i mau kanaha haipule maoli, ka huli ana i na Palapala Hemolele, ka hookea ana i na manao ma ka launa pu ana me na malihini. Ua lawa ko ke Akua hoopai ana ia lakou. Ua ao ia mai lakou e pili paa ia Iehova. Alaila ua hooko ia na olelo wanana a Ioane a me Ieremia, M. K. 576, ua lilo o Kuro i Moi ma Babulona, mamuli o ka wanana a Isaia 44:28; 45:1.
Ua pau na makahiki he 70 i olelo ia ma Ieremia 25:12;29:10,11. Ua kuahaua o Kuro e hiki ana i na Iudaio ke hoi hou aku i ko lakou alua hanau mamuli o ko lakou makemake. Ma ka buke o Ezera ua loaa ka moolelo o keia hoi hou ana, oiai, aole i hoi hou mai o Ezera a hiki i M. 458. Ia wa ua ae aku ka Moi Aretasaseta ia Ezera, he kahuna, he mamo na Peneasa, ke keiki a Aarono, e kai aku i kekahi huakai kaahele hou o ka poe Iudaio mai Babulona a hiki i Ierusalema. Ua nui na hana a Ezera, o kekahi o kona hooulu ana i na palapala hemolele o ke kauoha kahiko me ka hooponopono hou ana ia lakou. O na mokuna mua eono o ka buke Ezera, oia no kekahi mau moolelo kuauhau i hoohui ia. He wa kowa mawaena o ka mokuna eono a me ka mokuna ehiku, he mau makahiki 58.
Akahi, ma Babulona. He mau makahiki 20 nona ma Peresia. 2. Lani, oia no ka inoa hanohano na ke Akua mamuli o ke ano hana o ka lahui Peresia. Kauoha, Isaia 61:1-4. 4 Noho, ua nui ka poe Iudaio i noho mau ai ma Babulona. 5 Pii, o ka helu oia no 50,000. 8 Serubazara, Kolobabera ka inoa Helene.
I. Ke kuahaua a Kuro, pp. 1-4. Owai ke alii o Babulona i ka wa i olelo ia, p, 1? Owai ka inoa o kona aupuni? Heaha ka Kuro kuahaua? Owai ka mea nana i hoala ae i keia manao maikai o Kuro? Heaha ke kauoha mai Iehova mai ia Kuro? Heaha ka Kuro olelo paipai i ka poe pii ole? Heaha ke kumu o ka noho pio ana o na Iudaio? Ehia mau makahiki no ko lakou noho pio ana ma Babulona? Heaha kekahi mau mea pono e loaa ai i ka lahui Iudaio no ko lakou noho pio ana? Heaha ka manao lokomaikai a ke Akua ma ka hooili ana i na poino maluna o kakou, Hebera 12:5-11?
II. Ka hooala ana i ka lahui, pp. 5,6. Owai ka poe i ae mai i ke kuahaua? Owai na mea kokua? Owai ke alii Iubaio, p. 8? Ehia poe i hoi hou, Ezera 2:64-65? Ua hului ia aku anei ka poe hoole, ua hele anei ka poe makemake wale no? Heaha na mea i lawe puia? Ua like anei keia me kekahi mau kanaka i keia wa, e kokua ana i ka hana a ka Haku, oiai, aole i huli lakou i ka pono? Ua kupono anei ko kakou noi i ko lakou mau dala kokua?
III. Ka hoihoi hou ana i na kiaha hoano, pp. 7-11. Heaha na mea a Kuro i haawi aku ai i na Iudaio? Owai ka mea nana i lawe aku i keia mau kiaha mai Iuresalema aku? Owai ka mea nana i helu ia lakou? Owai kona inoa e ae? Ezera 2:2. Ehia ka nui o keia mau kiaha? Heaha na kumu no keia helu nui? Ehia mau mahina no ka pii ana aku mai Babulona a hiki i Ierusalema, Ezera 7:2? Heaha ka lakou mele, Halelu 126? Owai ka poe e makemake nui ana i ka hooko ia ana o na olelo wanana i keia wa, 2 Petero 3:12?
MANAO PILI.
1. E hooko ana o Iehova i kana mau olelo wanana.
2. E hoala ana oia i na kanaka e hooholo ai i kana hana.
3. E hoopomaikai hou ana oia i ka poe popilikia, ina paha ua ao ia lakou a maemae hou ko lakou ano noho.
4. E kono anei oia i ka poe makemake wale no e komo i ka pomaikai lani.
5. E kono ana oia i ka poe manawalea e kokua i ka hana a ka Haku.
He Kumu Manao na Mrs. D. L. Naone i Heluhelu.
O ka haawina i haawi ia mai ai na'u e hoakaka i mua o kakou i keia po, oia no ke kauoha a ka Haku i kana mau haumana i hoikeia ma ka hapa mua o ka pauku 19 o ka mokuna 28 o Mataio, penei i palapala ia: E hele ae oukou e hoohaumana aku i na lahui kanaka a pau, nolaila o keia kauoha ua pili no ia i na haumana a Iesu i kela wa, aka, no kakou no na haumana a Iesu i keia wa ka ninau, "Heaha la na ano a kakou e hoohaumana aku ai?" E like me ke kauoha i hoike ia ae la maluna mamua o ko'u hai ana aku i kekahi mau haina o ko kakou ninau, e nonoi aku ana au i ka oluolu o ke anaina e kala mai ina he hewa ka'u mau hoakaka ana, no ka mea, o ka mua no keia o ko'u ku ana i mua o kekahi anaina nui e like me keia. Eia ka haina mua; "ma ka hele maoli ana no." Oia kekahi ano a kakou e hoohaumana aku ai. Ina kakou e nana aku i ko ka Haku Iesu hookumu ana i keia hana mahope iho o kona hoowalewale ia ana e Satana ma ka waonahele, ua kaahele ae la oia ma Galilaia, a ike aku la ia ia Simeona i kapaia o Petero a me kona kaikaina o Anederea e kuu ana i ka upena i ka loko, no ka mea, he mau lawaia laua. "I mai la oia ia laua, e hahai mai olua ia'u, ae hoolilo au ia olua i mau lawaia kanaka, a pela no hoi i kona hele ana ma ia wahi aku, ike aku la no oia ia Iakoba ke keiki a Zebedaio a me kona kaikaina o Ioane, maluna o ka moku me ko laua makuakane Zebedaio, a kahea mai la oia ia laua a hahai aku la laua iaia a pela no ka Haku Iesu i hana ai a lawa na haumana he umi-kumamalua, nolaila, ma keia haina ae la ke ike nei kakou i ko Iesu hoohaumana ana i waena o kana mau haumana, "ma o kona hele maoli no," a pela no hoi ko Barenaba a me Saulo hoohaumana ana i ko na aina e mamuli no o ko laua hele maoli ana no i kona aina e i loaa ai ke ola ia lakou ma o Iesu Kristo ala. Pela no hoi me ko kakou mau hoaloha i hoouna ia aku nei e ka Papa Hawaii i Maikonisia, nolaila, ma keia haina ae la, ua maopopo, me ia ano kakou e hoohaumana aku ai. Ke waiho aku nei au i ke koena o na manao i koe malalo o keia haina na oukou e hoolawa aku. Eia ka haina elua, "ma ke a'o ana aku," oia kekahi ano a kakou e hoohaumana aku ai. Pela i hoike ia ai ma ka pauku 14 o ka mokuna ekolu o Mareko, penei ka heluhelu ana: Wae mai la ia i umi-kumamalua e noho pu me ia, i hoouna oia ia lakou e a'o aku, pela no hoi kekahi olelo a ka Haku i hoike ia ma Mataio mokuna 10 pauku 7, penei ka heluhelu ana: I ko oukou hele ana e a'o aku, me ka i ana, ua kokoke mai ke aupuni o ka lani. Hoike hou ia mai ma Mareko mokuna 6 pauku 12; penei ka heluhelu ana: Hele ae la lakou iwaho a'o aku la i kanaka e mihi lakou. Pela no hoi o Petero i hoike mai ai ma Oihana mokuna 10 pauku 42; penei i palapala ia: Nana no makou i kauoha iho e a'o aku i kanaka a e hoike aku, oia ka mea i hooholo e ia e ke Akua i lunakanawai no ka poe ola a me ka poe make. Ua hoike maopopo mai ka poe kaula a pau nona, ke kala ana o ka hala ma kona inoa, i ka poe a pau i manaoio iaia, a nolaila, ua maopopo ae la oia kekahi ano a kakou e hoohaumana aku ai, a o na manao aku i koe na oukou ia e hoolala aku. Eia ka manao hope, he mea pono i ka mea e hele ana e hoohaumana, me ka manao hookahi, aole me na manao papalua, e like me ka Haku Iesu i olelo mai ai i kana mau haumana, penei: Alaila, houluulu mai la ia i ka poe umi-kumamalua, a hoomaka e hoouna papalua ae la ia lakou, a haawi mai la i ka mana na lakou maluna iho o na uhane ino. Papa mai la oia ia lakou, mai lawe aku oukou i kekahi mea no ka hele ana, i kookoo wale no, aohe puolo, aole berena, aole dala iloko o ka hipuu. E hawele i na kamaa, aole hoi e papalua ke kapa komo. Pela i hoike ia ma Mareko mokuna 6 pauku 7-9. Nolaila, o ka hope keia o ko'u manao, a ke haawi aku nei au i ko'u hoomaikai i ko kakou Kahu a me keia anaina i akoakoa mai i ka hoolohe ana i na manao i hoakakaia aku nei, nolaila, o na hemahema a pau o keia kumuhana me a'u ia. Me ka mahalo.
AHAOLELO O 1892
Na ke Alii Cornwell, mai Kula Maui mai, i $600 no ka hana hou ana i na alanui malaila. Haawi ia i ke Komite wae, Cornwell, Walbridge, R. W. Wilikoki, Kanealii a me Edmond.
NA HOIKE KOMITE
Na ke Alii Williams, ua pau i ke pai ia kekahi mau bila.
Na Kamauoha o ka hapa uuku o ke Komite bila 127, pili i ka Papa Ola, e hoopau loa i ka Oihana o ka Papa Ola. Waiho ia a noonoo pu me ka bila.
NA OLELO HOOHOLO.
Na ke Alii Peterson, e lawe ia ka hoopii 176, pili i na palena pau ahi, mai ka papa ae a haawi ia ke Komite Peterson, Berger, Wilder, Kauhi a me ka Loio Kuhina.
Ma ke kapae ia ana o na rula, ua waiho mai o Wilder o ke Komite Kalepa i ka hoike no ka palapala hoopii a W. E. Simpson o ka Hui Mokuahi Halihali ohua a me ukana o Puget Sound a me Hawaii, e ae ana i ka haawi ana i ka hui i $500 no ka huakai holo puni hookahi. Waiho ia a noonoo pu me ka Bila Haawina.
Heluhelu mua mai o Kamauoha i ka bila e hooponopono ai i ke koho ia ana o na kumukula o na Kula Kumumua. A ma ke kapae ia ana o na rula, ua heluhelu alua ia ma ke poo a haawi ia i ke Komite Hoonaauao.
Waiho mai o Kapahu, he mau ninau i ke Kuhina no ke oki ia o na laau o kekahi mau aina ma Kau, Hawaii.
Ma ke kapae ia ana o na rula, ua hoolaha mai o Waipuilani he bila e hoomana ai i na loio o na aha haahaa, e lawelawe i mua o na aha kaapuni.
Ma ke noi, ua hapaiia
NA HANA O KA LA.
Heluhelu ekolu ana i ke koena aku o ka Bila Haawina.
Noi ke Kuhina Jones, e hookomo ia koena aie i na kiai Hale Dute a hiki i Nov. 20, 1893, i $960. Holo.
No ke koena aie i na poe paahana o ke Keena Anaaina a hiki i Nov. 20, 1892, i $2,010. Holo.
Noi ke Alii Hopkins, no ka hooponopono a hoonohonoho ana i na moolelo o Hawaii nei, $5,965
Hoololi mai o Smith i $2,500. Holo ka hoololi.
No ke telepone mai Kailua a Kawaihae, $2,000. Holo.
Ma ke kapae ia ana o na rula, ua heluhelu mai o White, he hoopii na ka Puali Kinai Ahi Helu 2, e noi ana i $1,000 no ke kuai ana i kaa ili.
Noi o White, e hapai ia ka noonoo o na haawina malalo o ka Oihana Kinai Ahi. Ae ia.
Kaa ili me na lio, $1,000. Holo.
Na kiai o Aliiolani Hale me Kapuaiwa, $1,200.
Kiai Pa Ilina alii, $300
Na lilo koho balota, $10,000
Na lilo koho balota i uku ole ia- $9,617
Kokua Hale Moiwahine, $20,000.
Na lilo no ka hoopuka ana i na Palapala Hooia Palena Aina, $200.
Kela me keia lilo kanawai home liilii, $2,000.
Hoomalu holoholona ma'i, $1,000.
Na Pa Aupuni, $500.
Hale hoailona moku ma Leahi, $2,000.
Noi ia e hookaawale i haawina e uku papalua ai i na lunamakaainana malalo o ka holo ana o ka hoololi kumukanawai.
Nui ka hoopaapaa ikaika ana a haawi ia i ke Komite Hookolokolo.
Ma ke kapae ia ana o na rula, ua waiho mai o Kamauoha i ka hoike a ka hapa uuku o ke komite wae no ka bila 95, no ke koho ana i na elele hana kumukanawai, e koi ana e hooholo ia ka bila. Waiho ia a noonoo pu me ka hoike a ka hapanui.
Na ke alii Cornwell i hoike mai no ka hoopii a ke Kula i $600 no ka hana ana i na alanui, e hooholo aku. Waiho ia a noonoo pu me ka Bila Haawina.
Hoomaha ka hale a noho hou i ka hora 1:30 auina la.
HALAWAI AUINA LA.
Akoakoa hou ka hale i ka hora 1:40.
Hoolimalima Aina hale dute ma Kahuli, $600. Holo.
Aie hookaa ole ia, $300. Holo.
Hoolimalima hale leta ma Hilo, $1,200. Holo.
Hoohoihoi ahaiolelo manu ku, $500. Holo.
Olelo hooholo no ka pono o J. Kahahawai, $2,600. Holo.
Noi ka Loio Kuhina, no na olelo hooholo ke pono o Peter High a me Geo. Dillingham, $1,600. Holo.
Hope Luna Hooia, ke hui pu ia kona mau manawa i hala, $5,000.
Noi ka Loio Kuhina, e hooholo i ka haawina penei: No na hookauwa i ka manawa i hala, $3,175. Holo.
Noi ka Loio Kuhina, kokua i ka oihana kinai ahi o Hilo, $1,000. Holo.
Ma ke kapae ia ana o na rula, ua waiho mai o White he olelo hooholo e uku ia o F. J. Testa i $100 no na hookauwa ana a ka Papa Hoonaauao i ke kau i hala, ke apono ke Komite o na Buke Helu. Aia i ke komite o na Buke Helu.
Noi ke alii Cornwell, e hookomo malalo iho o ka haawina 365, no ka hana ana i na alanui o Kula $600. Holo.
Hapai ia ka noonoo i ka hoike a ke komite kalepa e hookaawale ana i $500 no ka huakai holo puni hookahi a ka Laina mokuahi mawaena o Tacoma a me Honolulu a apono ia.
Na lako Halealii, $5,000. Holo.
Noi o S. K. Pua, hoohoihoi kanu ramie, $4,000. Hoopanee loa ia mahope o ka hoopaapaa ia ana.
Noi ke alii Pua, no ka pa ana i ka ilina kupapau o Kapalama, $300. Holo.
No ke koi a Eli no ke poho o ka loko i'a ma Molokai, ua manao ke Kuhina Kalaaina i $200. Aponoia ka hoike, a hookomoia no ke koi a Eli $200.
Hoopanee ka Hale.
He Moolelo
NO KA
Ui Nohea Berela.
Ke Kamehai hoopono—Ke kupaa me ka luli ole—He wahine na ke kane hookahi—Ke au popilikia a me ka huli ana o ka pomaikai mahope o ka wahine.
MOKUNA XXXI.
BERELA ILOKO O KA MOEUHANE MAULE.—KANA MEA I HANA AI.
"E oluolu ana no oia no ka hele ana," wahi hou a ke kauka. "He mea pono e hooko aku oe i kau mea i manao mua ai, e Desemona. He mea pono no hoi e loaa iaia ka e-a hou. Ke olelo hou nei au, ua hoonawaliwali ia kona kino mamuli o ka hoopapau loa i ka hana a ma ka loaa pu ole iaia ka ai kupono, aka, me he mea la, ua ano kuhihewa paha au ma ko'u manao hope. O ka malama pono a he mau la pokole e noho ai ma Brighton e hoi hou ae no oia a ka mau. E hooko aku i keia kauoha a'u."
Puka aku la ke kauka a hoi aku la, a o ko Desemona manawa no hoi ia i lalau iho ai ia Berela a kaikai aku la no ko Berela keena ponoi, a hoomoe aku la iluna o ka moe. O kekahi pahu lole o Berela ua paa a ua makaukau, a o kekahi e waiho hamama ana no ke koena lole o Berela oia ka aahu mare.
Ua puka aku o Desemona iwaho o ke keena, a wehewehe ae la o Makaleka wahine i ko Berela mau aahu a hoomoe aku la. Hoohainu pu aku la no hoi i ka laau pauda hoohiamoe a puka aku la. Ua hoi loa aku la oia ilalo i ke keena hookipa, aka, no Desemona, ua noho iho la oia mawaho o ka ipuka o ke keena o Berela no ke kiai ana.
He pauda laau ano ikaika keia a ke kauka i waiho iho ai, a i hakalia no a inu o Berela, o kona wa no ia i haule aku ai iloko o ka hiamoe kulipolipo. Ua hele kona helehelena a keokeo pu me he kupapau la, a i koe wale no mamuli o ka nape o ka hanu. He manawa mahope iho, ua komo aku la o Desemona, nana iho la oia maluna o na helehelena o kana wahine me ka uumi ana o ka hanu.
"Ua like loa oia me kekahi pua lilia i ulupa ia e ka makani a haki," wahi ana e noonoo nei. Heaha la keia pilikia i kau iho nei maluna ona? He minute o ka hauoli ana, a i kekahi minute mai ua loohia iho la i kekahi ma'i ikaika. Heaha la keia mea a'u i ike ole ai i komo mai nei mawaena o maua? Ua ike anei oia i ka manawa hope loa aole oia i aloha ia'u? Aole e manaoio ana ua komo ia manao iloko ona. Aka, heaha la keia mea pohihihi i komo mai nei mawaena ona a me a'u?"
Aole he hiki iaia ke mawehe ae i ka puana a ka moe.
Ku iho la oia ma ka aoao no kahi manawa loihi e nana ana hoi oia maluna o na helehelena kohu make o kana wahine.
"E hoike mai no oia i na mea a pau ke ola ae oia," wahi hou ana e noonoo nei.
Kulou aku la oia imua a honi iho la, alaila, puka aku la iwaho.
Ua aui ka la a eia ke hele aku nei i na hora e poeleele ai. Ua pii malie aku la o Makaleka wahine e ho-a i na kukui, a loaa aku la iaia o Desemona e noho kiai ana no mawaho o ka puka o ke keena o Berela.
"Aole he pono o kou noho ana malaila," wahi ana i kamailio aku ai ia Desemona. "Mahope oe loaa i ke anu a o kou waiho mai no ia ma kahi moe. Eia no hoi kekahi, aole oe i hookomo wahi ai iki mai ke kakahiaka mai. E iho kaua ilalo a e haawi aku no au i bola ti nou. Aia ka poe a pau maloko o ke keena hookipa a ua nui ko lakou aloha nou. Ua like ka hale nei me he hale kupapau la ka meha pu. Me ka leo hawanawana wale no lakou e kamailio ai. Aole no hoi i hoopa ia ka mea ai o ka papaaina mare. Ua kokoke e kani ka hora elima i keia wa. Aole paha olua e hiki ana i Brighton i keia la."
"Aole io no maua e hiki ana i Brighton i keia wa," wahi a Desemona i pane aku ai me ka malie. E kali ana maua a ka la apopo. Ke hiamoe mai la o Desemona wahine a aole paha e ala ana no kekahi mau hora hou aku. Manao au ina oia e ala ae ana ua oluolu oia a ua hoi hou a kona ano mau."
"O ko'u manao no ia," wahi hou a Makaleka wahine. "O ka loaa ana i ka ma'i maule aole no ia he mea akahiakahi. O ka hapanui o na wahine opio e mare mai nei, ua loaa pu ia lakou keia ano haawina. He mea maa keia i ike ia. Ua loaa keia mamuli o ka pihoihoi a me ka ohohia o ka manao. Ua ike oe i ka manao o ka'u mea e kamailio nei. No Miss Star—oia hoi, Desemona wahine. Ua hoonawaliwali ia kona kino mamuli o ka hoopapau loa i ka hana a me ka lawa kupono ole o kana mea e ai ai, i like no hoi me ka ke kauka i olelo iho nei. , Ua puai ae kela manao pihoihoi o ka hauoli iloko o Berela e like me ia a'u i olelo mua ae nei, a mamuli o ka nawaliwali o ke kino ua haule aku la oia. E manaoio mai i ka'u, he pohala ae no koe."
"Ua manao anei oe no laila wale no ke kumu i maule ai oia?"
O ko'u manao paa ia. Heaha anei ia mea nana e hoopuiwa i kona noonoo? E manaoio mai i ka'u a e iho ae kaua ilalo a e haawi aku au a bola ti nou oiai oia e hiamoe ana."
Aole i ae aku o Desemona. Hoi-iho la o Makaleka wahine i na kukui a iho aku la ilalo. Aole i loihi aku o Makaleka wahine ilalo-ua pii koke mai la ke Kahunapule kekahi o na mea hoolimalima o ka hale a koi ikaika aku la ia Desemona e iho ilalo e hookomo wahi ai ai. Ua hoole paakiki o Desemona, aka, no ka manawa hope ua ae aku la oia. Aole io no oia i hookomo wahi ai iki mai ke kakahiaka mai a hiki i keia wa. Ua hele no hoi oia a pololi. No hapalua hora wale no ka manawa kowa o kona noho ana iloko o ke keena hookipa, aka, iloko o kela manawa kowa o hapalua hora wale no, ua loli ae la ke au o ka manawa o ko laua ola ana.
No ka mea, o ka haawina mua loa i ike ia, oia no keia: Aole oia i hapalua aku o ke alapii ua ala ae la o Berela. Aole oia i ala ae ma ke ano puiwa, a i ole, onioni ae ma ka puha ana, aka, ua ala ae oia o ke ala maikai ana me ka hoomaopopo no i na mea a pau. Ua au ae la kona mau maka ma o a maanei o ke keena a ala loa ae la a noho iho la ma ke kae o ka moe.
A i keia wa ana e noho nei ma ke kae o ka moe me he mea la ua hiki ke ike ia aku ma kona helehelena ua ano hoohamani ia ka ma'i a ehaeha o ke kino. Aia he nanaina li-o ma na maka. He ano o ka hopohopo. Ua hooholo ae oia i kekahi lima ma ke poo me he mea la e hoao ana e pale aku i kekahi mea nana e hoouluhua ana iaia. Ua lele iho la oia ilalo o ka moe a hoomaka iho la e komo i kona aahu.
"Poor Desemona," wahi ana i puana malie ae ai. "E kau aku ana ke koikoi o keia haawe maluna ona. Ina paha oia e ike a me kona ohana, e hoouna ana paha lakou ia'u i ka halepaahao. Ma na ano no nae a pau aole au he wahine na Desemona. Ke ike nei au aole au he wahine nana. He wahine au na Dane Konia a eia no oia ke ola nei. Pehea la, o Desemona anei ka'u kane mare oiaio a owau hoi kana wahine? E lilo ana anei keia he mea e kamailio nui ia ai? Ke lilo keia i mea kamailio nui ia e nui loa ana ka ehaeha o kona naau. O! ina he hiki ia'u ke hoonalowale loa aku i ko'u kino mai ka ilihonua aku e like me kekahi pohaku i kiola ia iloko o ka muliwai, aole ona meheu i waiho iho mahope e hiki ai ke hookolo ia aku a loaa hou. E kanikau no oia no'u, aka, aole he aka hoopakalaki nana e hoohaahaa i kona kulana. E make ano! E make ano."
[Aole i pau.]
Hoolaha Kumau.
OLELO HOOLAHA.
E IKE AUANEI NA MEA A PAU OWAU O ka mea nona ka inoa malalo iho, ke papa a ke hookapu loa aku nei au i kuu apana aina e waiho la ma ke ahupuaa o Pahoehoe, Kona Akau, Hawaii, aole hookuu wale na mea holoholona; ina e loaa i ku'u luna i hookohu ia e a'u oia o A. P. Nahulu e uku ia e like me ke kanawai.
H. W. HALULU.
Honolulu, Nov. 10, 1892. 2413-2m
Hoolaha a ka Lunahooponopono Waiwai.
O NA POE A PAU HE MAU KOINA KA LAkou i ka waiwai o KEKAHA i make o Waiehu, Wailuku, Maui, Ko Hawaii Pae Aina, e hoouna koke mai me na hooia kupono i hoohiki ia imua o ka Notari o ka Lehulehu, i ka mea nona ka inoa malalo iho ka mea i hookohu ia i Lunahooponopono Waiwai no ka waiwai o ka mea i make, maloko mai o na malama eono, a i ole ia e hoole mau loa ia aku no. O ka poe a pau i aie i ka waiwai o ka mea i make, e hookaa koke mai ma ka manawa a mamua ae o ka pau ana o ka eono malama.
W. H. DANIELS,
Lunahooponopono Waiwai o Kekaha i make.
Wailuku, Maui, Oct. 25, 1892. 2414-6m
Hoolaha Hookapu Aina.
KE PAPA A HOOKAPU LOA IA AKU NEI ka holo ana o na holoholona o ka poe e ae maluna o na aina hanai holoholona o'u ma Piihonua a me ka hapa mauka o Humuula, Hilo, Hawaii, a ke kauoha ia aku nei e hoonee aku i na holoholona me ka hookaulua ola, a i ole, e hoopii ia no e like me ke kanawai.
J. T. BAKER.
Hilo, Hawaii, Mar. 31, 1892. 2388-tf
KAUKA LEONG KENG TONG.
(L. AKINA.)
E IKE AUANEI NA ANO LAHUI A PAU. E noho ana ma ke Aupuni Hawaii, mai na kane, wahine a me na keiki; i loaa i na ma'i o kela a me keia ano, e naue mai i ko'u keena hana, a na'u e hoopau aku i na ehaeha a ka ma'i maluna o oukou e na makamaka, ke hiki ia'u ke lapaau i na ano ma'i a pau: ma'i iloko o ka opu, hu'i ke kino, aki iloko o ka iwi, eha o ke poo, ma'i wahine, a pela aku. Mai hoololohe e na hoa, a he hiki ia'u ke lapaau i ka ma'i hookaawale ohana. Hele mai hookahi, hele mai elua, hele mai no a pau loa; he oluolu ka auhau, ke hui me ia ma na kukai olelo ana; ua makaukau au e pulama mai i na kono ana mai mai na Mokupuni mai, me ka eleu me ka hikiwawe loa, he makamaka a he hoaloha maikai no ou e na Hawaii oiaio.
DR. L. AKINA.
Helu 40, Huina o na Alanui Kamika a me Hotele Honolulu. 2405-1v*
Hale Hana Kopa o Honolulu.
Ua paa aenei ka Hale Hana Sopa Mahu Hou o ka poe no lakou na inoa malalo iho a ua makaukau lakou e hoolawa aku i ka poe piepiele i na
Kope Maikai Loa Maoli
I hookomo ia iloko o na Pahu 100 paona mai ke 42 a 56 auka Kopa pakahi.
Ke hooia nei makou i ka oi o la MAIKAI o ka makou KOPA mamua o na Kopa o waho mai.
Ua kuni ia mawaho o ko makou mau Pahu me ka hoailona "HONOLULU SOAP CO.," a e
Kuai ia e na Halekaui Liilii a Pau.
HUI HANA KOPA O HONOLULU
M. W. McChesney & Sons,
Na Egona.
239@
PAPA! PAPA!
AIA MA KAHI O
Lewers & Cooke
(LUI MA),
Ma ke kahua hema o Alanui Papu me Moi.
E LOAA NO NA
PAPA NOUAIKI
O kela a me keia ano,
Na Pani Puka, na Puka Aniani, na Olepelepe, na Pou, na O'a, na Papa Hele, na Papu Ku, me na Papa Moe he nui loa.
NA PILI HALE O NA ANO A PAU
a me na
WAI HOOHINUHINU NANI
O na ano a pau loa.
Na Balaki o na Ano he Nui Wale
Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua oihana no ka
Uku Haahaa Loa,
E like me ka mea e holo ana mawaena o Laua a me ka Mea Kuai.
Hele Mai e Wae no Oukou iho.
2396-q
Hoolaha Kumau.
KAKELA
ME
KUKE
KA HALEKUAI NUI
O NA
WAIWAI LIKE OLE
NA LAKO
HANA KAMANA A PAU.
Na Pahi,
Na Upa,
Na Pulupulu,
Na Pena, a me na
KAA - PALALA
NA IPUKUKUI ME KA AILA
PALAU!
A me na mea Mahiai.
NA PAKEKE POI
Na Ipuhao,
Na Iliwai,
Na Makou, a me na
Aho Lawaia.
Mikini Humuhumu
MIKINI A WILCOX ME GIBBS
Na Mikini a Remington.
Kakela me Kuke
2396-q
KA AYER SASEPARILA
Oia ka LAAU oi loa o ka maika no na mai i hookumu ia mai ke koko ino mai. Ua oi loa ae hoi, no ka mea, o kona kahua i hookumuia ai o ka
Honodorusa Saseparila Oiaio,
No ka mea, o ka LAU NAHELEHELE a me na mea a pau i maa i ka hoohuihui ia, oia na laau oi loa o ka maikai, a no ka mea hoi ua ike ia ka waiwai io ma ka lapaau ana i na MA'I o ke KOKO—ua oi ka
Ayer Saseparila
ma na mea a pau e hooikaika a e kukulu hou ai i ke kino i hoonawaliwali ia e ka ma'i a me ka eha.
Ua hoonoono ia ka ai, ua hoopau ia ka ma'i o ka waihona hoowali ai, ua hooikaika ia ke Ake a me ka Puu Hoowali ai, a hoohana maikai ia na lala a pau o ke kino. Ua hookuke ia mai ke kino ae, ka laau make o ka ALAALA, ua hoola ia na EHA, na PUHA, na RUMATIKA, na MAIHEHE, na HUEHUE a me na ma'i ma ke poo kahe wale o ka hupe, a ma na wahi a pau ke hooia mai nei na Kauka alakai i ka maikai o keia laau.
Ke hoola nei ia hai, a e hoola no hoi ia oe.
No ke KUNU a me ke ANU o ka
Ayer Cherry Pectoral
ka laau lapaau alakai o na ohana.
No ka NALULU, ka LEPOPAA ka LENA a me kekahi mau mea inoino e ae o ka opu, e lawe i ka
AYER HUAALE CATHARTIC
E makemakenui ia nei e ko ke ao puni.
Hoomakaukauia e Kauka J. C. AYER & Co., Lowell, Masekuseta.
HOLLISTER & CO.
Na Agena ma ka Paeaina Hawaii.
2396-q