Ka Nupepa Kuokoa, Volume XXXIII, Number 14, 7 April 1894 — Na Mea Pili Kalainina o Hilo Nei [ARTICLE]

Na Mea Pili Kalainina o Hilo Nei

Ua ku aenei he elua mau hui kaawale o ka Hui America i Hoolokahiia o Hilo nei. O ka inoa o ka mua, o ka Hui Kuwaena o ka Hui Amerika i Hoolokahiia. Ua kohoia na luna, a oia keia: Peresidena, F. S. Lyman; Hope Peresidena, A. G. Curtis; Kakauolelo, E. E. Richards; Puuku, F. L. Winter; Komite Hooko, C. C. Kennedy, J. R. Willron, E. D. Baldwin Jos. Viera, V. Creselho, J. Babtiste R. A. Lyman Sr., Geo. Weight, Chas. Notley. Ua lokahi ka manao o na mea a pau ma ka lawe ana a hoohiki i na kahua a me na kanawai o ka American Union Party, aole hookahi ona o na mahiko i kue, hookahi mea nui wahi a lakou o ke kokua i ke Aupuni Kuikawa ma na ano a pau, oiai wahi a lakou, aole i loaa ia Hawaii nei he aupuni maemae mamua e like me keia e ike ia nei e ke ao holookoa i mahalo mai ai i na kalai aina naauao a loea o na alakai o keia Aupuni Kuikawa. O keia hui a'u i hoike ae la a me kona mau hoa, ma ka hora 7:30 ahiahi Poaono la 24 iho nei, ua komo nui mai na lala e kakau i ka hoohiki, a ua hiki aku ka heluna o na lala i ka 141, he

hui keia ma ke ano laula e like me keia mai Olaa a hiki i Healani. O ka lua o na hui, oia ke noho Peresidena ia nei e D. H. Hikikoki. Ua lawe lakou i ke kahua hookahi a ka Hui Amerikca i hookahua ai ma na apana koho balota, oia hoi, mai ka palena o Olaa a ke kahawai o Puukihae, aole o lakou makemake e komo mai na wahi e aku i ka lakou hui a ua loaa na lala he hookahi haneria a oi iki, ma ko'u nana ana aole i komo nui na kanaka Hawaii i keia mau hui. Ua halawai na anee alii, a ua lohe ia aku ua ano uluaoa ae ko lakou halawai a mai ulele puupuu kekahi mau hoa. Ua ala mai he hoopaapaa mamuli o kekahi mau palapala noi elua, oia hoi, e noi ana i ka Moiwahine Vitoria o Enelani, e kokua mai ia lakou; a o ka lua, e noi ana ia Farani ma ia ano hookahi no. Ua kue hoi kekahi poe, oiai aole ka i haalele mai o Kalivalana ia kakou, hana e no kakou i mau palapala noi. Mai ka malie mai na olelo, a o ka hele ia a mai ulele puupuu. He halawai no ka na aee alii o Puueo, o ka manao nui ma ia halawai, aole lakou e ae e hoohiki, aole hoi e hele e koho balota i ka Elele Hana Ku0 mukanawai. Ua like na kanaka o Hilo nei me ke kekake hoololohe auwai ma na hana pili kalaiaina. Nui ka nalu me ka makani ma ke kukulu akau mai, eia nae hoi, ohuohu Hilo Bay i na moku. O na awa pae o Hamakua, ua lohe ia maii ua pau i ka lilo. O ke kewe o Koholalele, ua lilo i ke kai a ua koao ka mokukuna Ka Moi e huli aole i loaa, a ku wale io makou i Hilo nei. Mahope mai ka Lehua, loaa ua kewe nei iwaho ae o Laupahoehoe, he aneane elua mile me hapa ka mamao mai ka aina aku. He hoike ana mai keia ua pii ke kai a ka pou o na haka, ke lilo la ka hale kake huki ukana o Ookala i ka moana. No ka nui o ka ino, ua hiki ole i ka Lehua e kii aku i kela kewe pela mai ke kupakako. Ke kohokoho wale ia nei, malia mailoko ae o J. Kauhane, F. S. Lyman, W. W. Goodale, Jas. Renton, H. L. Holstein, J. H. Waipuilani, a i ole kekahi o na keiki Wright o na moho. PUMEHANA, Hilo, Maraki 26, 1894.