Ka Nupepa Kuokoa, Volume XXXIV, Number 11, 16 March 1895 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

KA HUI ALAHAO ME AINA O OAHU

MANAWA HOLO.

Mai a Mahope aku o Iune 1, 1893.

NA KAA AHI

 

                             HONOULIULI.

                                                    B     B         A         D        

                                                 A.M.   P.M.    P.M.    P.M.

HAALELE IA HONOLULU.....8:45            1:45     4:35     5:10

HAALELE IA MANANA.........9:30            2:30     5:10     5:56

HIKI 1 HONOULIULI..............9:57            2:57     5:36     6:22

                            NO HONOLULU.

                                                    C     B         B         A

                                                  A.M.  A.M.    P.M.    P.M.

HAALELE IA HONOULIULI..6:21            10:43   3:43     5:42

HAALELE IA MANANA.........6:55            11:15   4:15     6:10

HIKI 1 HONOLULU.................7:30            11:55   4:55     6:45

  A  No na Poaono wale no.

  B  No keia ame keia la.

  C  Koe na la Sabati.

  D  Koe na Poaono.

 

NU HOU HAWAII

 

  Ke noonoo nei ke aupuni no ka hoakea a hooloihi aku i kekahi mau alanui o ke kulanakauhale nei a me ka wehe i mau alanui hou ke ae mai ka poe mea aina.

 

  A keia Poakahi iho, Maraki 18, e halulu mai ai ka mokuahi Australia i Honolulu nei mai Kapalakiko mai, a e pelu hou aku ana no oia no ia awa hope ma ka la 20 koke mai no.

 

  Ua  lilo mai ia D.B. Smith ka mae o R. Keelikolani maloko o Keoua Hale, ma ke kuai kudala ia ana o na waiwai lewa o C.R. Bishop i ka Poalua iho nei, no ke kumukuai he $200.

 

 Ua hala aku ke Kuhina Kalaiaina King a me Mr. C.L. Wight ma ke Kinau o ka auina la Poalua iho nei no Hilo, a e hoi mai ana no maluna o ia mokuahi ke huli hoi mai i keia hebedoma aku.

 

 Ua lohe mai makou ma na palapala, ua puka ae ka ma'i ulalii ma Hana, a aia ke laha la.  E malama loa ka poe e loaa ana i keia ma'i aole e kuuiaia wale, no ka mea he ma'i palaueka wale no ke malama pono loa ia e ka poe i kau ia e ia ma'i.

 

  Ma ka la 10 o Maraki, ua pau i ka huli a kuekaa ia kauhale o Young Hee pale ma Wailuku e na makai, a ua loaa aku la ma ia huli ana, he kanaono kumamalima mau tini opiama.  O na pake elua i loaa pu aku ai, ua hopu ia, hookolokolo ia a hoopaii ma ka uku dale he $250 pakahi.

  Ua hoouna aku ka Oihana Leta nui o Honolulu maluna o ka mokuahi "Kahului" i haalele mai ai ia Honolulu nei a huli hoi aku no Kapalakiko, i na leta he 1250 a me 713 nupepa.  O ke kumu o keia kupihipihi o na eka leta, io ke kanalua ia e hiki ana paha i keia mokuahi ke holo iloko o umi mau la, a i ole e oi aku ana paha i ke anahulu.

 

  Ua hala aku o Kapena poe R.P. Waipa o ka puali makai o Honolulu nei, e hoomaha pokole ma Kauai me ke keiki paniolo o Lihue, he hoomaha hoi i kupono loa ke haawi ia i keia luna aupuni i hoopapau i ke kiai a me ka makaala ma ka halia, a i hooi aku hoi i kona ku wati ana e moe ai ma ka hale oihana makai no kekahi mau malama mamua aku a mahope mai nei o ke kana a na kipi hohe wale.

 

  Ma ke Sabati, Maraki 24, e upu ia aku nei e ku mai ana ka mokuahi "Miowera" ma Honolulu nei mai Victoria, Beritania Columebia mai ma kona aia e holo loa aku ai no Fiji a me Kikane.  A ma ka la 29 aka no hoi o Maraki nei, e halulu mai ai ka mokuahi "Peru" ma keia awa mai Kikane a me Iapana mai ma kona ala moana e niau loa aku ai no ke kulanakauhale Moiwahine o ka Pakipika, oia o Kapalakiko.

 

  Ua hoopau ia o David L. Kalawaia a me Sam Hanaia mai ko laua noho ana lawelawe oihana iloko o ke keena auhaua, no ke kumu ka hoohiki ole malalo o ke kumukanawai o ka Repubalika, a ua noho laua e kaukau ai wale no mai Iulai mai o 1894 a hiki i ka hoopau ia ana aku ia i Maraki o 1895.  Ua haalele aku la laua i ka ai a me ka ia, a ua huli aku la e hui me ka he luna nui o na poe Iopa hana ole.

 

  Ma ka la 2 o Okatoba o ka makahiki i hala, ua lawe ia mai imua o ka Aha Apana o Honolulu nei o Kaholoua a me Keoki Beka no ka hewa kuai bia hoawaawa puka io ia iho me ka laikini ole.  Ua ae laua i ko laua hewa ia wa, a nolaila ua kapae ia ka hoopai o ia hewa aia a hana hou i ka hewa, alaila hooko ia ka hoopai maluna o laua.  Ma ka la 2 iho nei o Maraki, ua hopu hou ia keia mau kanaka no a i elua no ia hewa like loa me ka mua.  Nolaila ma ka la 12 o Maraki nei, ua kau ia ka hoopai maluna o laua pakahi he $100.  Nolaila, o ka hookuli maoli no ke kumu o keia hoopai koikoi ia.

 

  He mau la pa pukiki aku nei kela i hala a ka makani ma ke kulanakauhale nei, a o ka mea loaa no hoi a ia ano puahiohio o ke ku o kaea o ka lepo o na alanui.

 

  He mau la pa pukiki aku nei kela i hala a ka makani ma ke kulanakauhale nei, a o ka mea loaa no hoi a ia ano puahiohio o ke ku o kaea o ka lepo o na alanui.

 

  He halawai ko ka Papa Loio Hawaii i ka hora 8 auina la onehinei, no ka hooholo ana i mau olelo hoalohaloha no C.L. Carter a me H.N. Castle, he mau loio.

 

  Ua make o Mr. Stevens, aka o ke aupuni ana i keha iho ai "o ke aupuni oi loa o ka maikai ma Hawaii," eia no ia ke ku nei i hooia no kana olelo kaukau no ke aupuni o Hawaii.

 

  Piha pono o Keoua Hale i ka Poalua aku nei i ka poe hele e nana i ke kuai kudala ia ana o na lako hale oloko o ua Hale Kakela nani nei o Honolulu.  Makena ka poe koho a pipii no hoi na mea kuai.

  Ua hoi mai ka Peresidena a me Mrs. Dole ma ke ahiahi Poakahi iho nei ma ka laua huakai mama aku nei i ke kaapuni ia Oahu nei ma ke ala aku o ka pali i haalele iho ai ianei ma ka Poaono o ka hebedoma i hala.

 

  E noho ana ka Ahahui Euanelio Mokupuni o Oahu ma ka luakini o Kaumakapili, he hiki aku i ka hora 10 i ke kakahiaka o ka Poakolu mua o Aperila ae nei.  Nolaila ke konoia aku nei na lala a pau o ia aha, e hiki ae ma kahi a ma ka manawa i hoikeia maluna ae.

 

  Mahope iho o ka hora 8 o ke kakahiaka onehinei (Poalima), ua ku mai ka mokuahi Mariposa iloko o na la holo 6 a keu mai Kapalakiko me 26 mau ohua kapena, 129 mau eke leta a me na ukana.  Ma ia la no, ua niau loa aku oia i ke kikihi no na Panalaau o Nu Kilani a me Ausetaralia.

 

  He wahi bele pauahi kai kani kuike ae ma ke aumoe o ka Poakolu nei no kekahi wahi hale mahope aku o ke alanui Pauahi, aka mamua o ka hoea ana aku o ke kaa wai, ua pio e iho la i ke kinai ia.  Pomaikai maoli i ka pio e ana, no ka mea ina i palahalaha ae kela ahi a hemo aku i ka loa, ina aole nao ai i ka papaa, no ka mea, he pukiki i kauna ole ka makani e pa ana ia wa, a he wahi pili hoi ia o na hale laau.

 

  Mahope o ka hala ana o na la he 26 o ke kaawale ana aku o ke Kilauea mai Honolulu aku nei, no ka hoohikihiki a me ke a oloolo ukana ana mawaena o Hamakua, Hilo.  Akau a me ke awa kumoku ponoi o Hilo, e kiai ana e loaa ona manawa maikai e hiu mai ai i kekahi mau lako ipuhao o ka mokuahi poino Kihalani i ili ai ma Hakalau, ua hoi mai la oia a ku ma Honolulu nei i ka Poakolu nei.

 

  O Papa, ka elemakule i pakele mai ai mai ka pahu ana o ka hale ma Kamoiliili i ke diana pauda a daimenaita paha i hoihoi ia ai i ka Hale Moiwahine, ua hala aku la oia i ka make ma ka hora 4 wanaao Poaha nei, aole no kekahi kumu e ae, aka no ka lele o kona hauli i kela pakele mahunehune ana mai ai mai ka pau ana i ke ahi a mai ke pahu ia mai o ka hale ana e moe aua i ka po Poakahi iho nei.

 

  Ua hoouna ia mai i waho nei e hoohana ia ai i ka Poaha iho nei mai ka hale paahao mai o Kawa, he haneri iwakalua kumamawalu mau paahao kalaiaina, oia hoi ua hoouna ia kekahi poe ma na lua eli pohaku o Kamoiliili a me ke kula Kamehameha, a o kekahi poe ma na alanui o Manoa a me Makiki.  O keia no ka huina i hiki ke lawelawe hana, a ua kahiko iho no hoi lakou i na aahu apana paewa kuluma i ke komo ia e ka mamo a ka manehune.

 

  O kela hihia a Patrick Cullen i kipu ai ma ka la 25 o Ianuari ma Kaalaea Koolaupoko a make loa ka pake nona ka inoa Mew Hee, ua kahea ia ma ka Poalua iho nei imua o ka Aha Apana o Honolulu nei i ka Poalua iho la o keia hebedoma, ua waiho ia aku la a ka Poakahi aenei e hoolohe ia ai.  E kokua ana o Cecil Brown a me W. A. Kinney i ka aoao o ke Aupuni ma keia hihia, a o J.A. Magoon ka loio o ka mea pale.

 

  Ua puka hou mai ka nupepa Ka Leo o ka Lahui, aole hoi ma kona kahua mua i pukalaki mau ai e like me ka makani puahiohio kuehu lepo, aka ua ano kanahai mai nei hoi e nihi hele mai nei, me he mea la no kela hihia ohumu kipi no paha e hookahuli i ke Aupuni i loaa pono ai na pu lehulehu i hunakele loa ia ma kahi nalo iloko o kona hale,  Ma ka hua e ike ia ai ke ano ka laau, a ma ka hana hoi e ike ia ai ke ano o ke kamaka.  Aka o ka mea i lohe i ka oleloao maikai a malama ole, alaila i ona no ia hewa.

 

  Ma ka Poakolu iho nei, Maraki 13, ua hoopukaia mai ka hoopai e na poe i hookolokolo no ke kipi, a o ka panina hoi o na hihia kipi i a hewa ia a e hoopai ia nei ma ka elima makahiki hoopaahao pakahi a me $5,000.  O ka hoopai dala, ua hoopau ia e ka Peresidena a o ka hoopaahao wale no koe.  O ko lakou mau inoa, o J. Kama, Keakahiwa, Kanuu, D. Keaunui, Kolomona, Pehu, Keamopohaku, Kamaka a me Aikake.

 

  Ua nana launa ole mai no na akua lapu a na anee alii poo ole o kakaola hele nei e hoolaha mawaena o ka poe puni hoomanamana a me na Aitiopa haalele, ua kauoha aku ia o Peresidena Cleveland e hoopaahao i kanakolu mau luna Senate lahui o Amerika Huipuia no ka hewa no ka lawe i ke kipe no ka mea e pili ana i ka ninau o Hawaii.  Aole o makou manaoio ke ike ko lakou ma na nupepa mai Amerika mai, aohe hoi ma na palapala malu, he kalahea keia na ka poe puni hoomanamana, a ina e hookolo ia aku alaila e loaa kekahi kanaka hookohukohu kahuna ana.

 

  Eia ke hoomaemae ia nei keia pa waiho wale ma ke kihi kema o na huina alanui Rikeke a me Kalepa ma ko ke ia ana o ke kahua a iliwai like , na hookomo ia na piula wai, a e hooulu ia aku ana oloko me ka mauu manienie. Ua haawi manawalea mai o Mr. W.G. Irwin i keia pa i ka Hui Tennis Pakipika, oia hoi ka Hui Paani Pai Popo paku upena o waena o ke kahua, i wahi no na lala o keia Hui e paani ai.  Hookahi wale no uku o keia manawalea, oia ka malama hoomaemae mau ia ma ke kulana maikai, aole hoi ka waiho wale ma ke ano kapulu ia ana keia kahua i ka wa e makaukau ai ke kahua me kona mau hana hou i makemake ia.

 

Anaina o na Kahuna Lapaau.

  Ua noonoo ia ka pono o ka hoakoakoa ana i na kauka lapaau a pau e noho lawelawe oihana nei malalo o ke aupuni ma kahi hookahi no ke kaana ana i na kukakuka noonoo no ka mea pili i ka oihana malama ola, a e kukulu hoi i ahahui kauka, a e halawai i hookahi manawa oloko o ka makahiki.  Ua hooholo ia keia hoolala manao a ua hoopaa ia o ka la 23 o Mei aenei, oia ka manawa e akoakoa ai o na kauka ma Honolulu nei.  Ua manao ia, aole no paha e pau loa mai, aka ua hoomaopopo ia nae malia e pau mai ana ka hapanui o lakou, a e kukulu i keia hoakoakoa ana o na kahuna lapaau oloko nei o ka aina.

 

Na Limahana Iapana Hou.

  Ua ku mai ka mokuahi Keremania "Independent," kapena Ahrenkiel, i ke kakahiaka Poaha nei, iloko o na la holo he 15 mai Kobe Iapana mai.  Ua haalele aku keia mokuahi i kela awa maluna ae ma la 26 o Feberuari, a holo mai ia no Honolulu nei.  Ua hoohikihiki mai oia ia 165 mau ohua Iapana kuokoa a me 743 mau limahana kepa no na mahiko.  Mailoko mai o ka heluna o na limahana, he 142 wahine a he 15 kamalii.  Ua pau aku na limahana i ka hoolele ia i kai o Kahakaaulana e hoomalu no kekahi mau la alaila hookuu.  Ua lawe pu mai oia ia 400 mau tona ukana waiwai Iapana.

  He mahui ko makou, o keia iho la ke aluka paahana hope no kekahi manawa loihi, no ka mea ua hoole ka Papa Hoopae Limahana i na noi no ka hookomo hou mai.  O ke kumu, ua piha kuineki loa ka aina i keia ano lahui.  He manao maikai keia e mahalo ia ai, oiai ka aina ua piha i na limahana.

 

Pa hanai Osetarika a ke Kauka Farani

  Ma ke kuai kudala ia ana o na manu Osetarika punahele a ke Kauka Farani i hoomoamoa ai no ka hoopulapula a laha nui aku ma ke ano kumu waiwai imi loaa i ka Poaono aku nei I hala, ua hului ia mai na manu a pau he kanakolu kumamaha ka nui e Mr. C.M. Cooke ma ka $22.50 o ka manu hookahi.  E hapai ana he hui i ka hanai manu Osetarika, aole nae ma Honolulu nei, aka ma ka mokupuni kihapai.  Ua loaa ia Cooke he wahi apana aina maikai ma Kauai, a nolaila e hoihoi aku ana oia i ka hana hoopulapula Osetarika malaila e hookawowo ai, no ka mea he wahi apana kela aia ua pili i kahakai, a ua paku ia e na pali ma na aoao.

 

  Ua hoohuiia aenei i hui malalo o ke kanawai ka hana hanai manu Osetarika, a ua koho ia na luna o ka hui penei:  J.B. Atherton, Peresidena; W.H. Rice, Hope Peresidena:  Henry Waterhouse, Kakauolelo; Chas. M. Cooke, Puuku: P.C. Jones, Luna Hooia; Mr. Turner, Luna nui.  O ke kumawaiwai, he $15,000.

 

Paikau o na Koa o ka Piladelepia ma ka Aina.

  Mamuli o ka ae ia ana aku e ka Repubalika, ua hooleleia mai maluna o na lana elima ka bataliona o na koa ke hui ia me na luina o ka mokukaua lawe hae o ka Adimarala Amerika o ka moana Pakipika, ma ka hora 8 o ke kakahiaka Poalua iho nei me na pu a koe aku na poka a ua pii paikau ae ma na alanui Moiwahine, pii ma alanui Papu, kipa ma Alanui Hotele, pii ma Rikeke a hele loa ma alanui Beritania a kipa ma kahua paikau koa mau ma Makiki.  Ma keia kahua, ua paikau ia lakou ma na ike kaua i hoomaamaa ia ai ia lakou, malalo o ke aliikoa paikau nui Lutanela Ingersoll.  O na aliikoa papa malalo aku ona , o Kapena H.C. Cochrane ko na koa marina, o Lutanela P.J. Werlich ko ke komopani alua o na koa luina, Aliihae H.A. Field ko ke komopani ekolu o na koa luina a me Aliihae W.R. Shoemaker ko ke komopani eha, a he puali manele kekahi no ka poe e loaa ana i na poino o ke kaua.  Mahope o ka paikau ia ana no ka manawa kokoke elua hora ua huli hoi paikau mai ia lakou a pau nui ana i ka hoi iluna o ka papu moku.  Ua alakai ia ka bataliona e ka puali puhi ohe o ka Adimarala ma ka hele ana aku a me ka hoi ana mai.

  E hoomanaoia o ka heluna piha o na kanaka o luna o ka moku Adimarala Piladelapia e lawa ai, he 475 aka, he 315 wale no paha i loaa i keia wa.  Aka, o ka nui o na kanaka iloko o ka laina ke hui pu ia me ka puali puhi ohe ma kela la paikau hoomaamaa, aia ma ka 237 wale no.  Hookahi wale no ia wahi moku la, lonalona na kanaka ke lele mai iuka nei o ka aina.  Hanehane aku paha a he elua a ekolu mokukaua o ia ano, aohe i kana mai ka hewa i ka wai o ua mea he kanaka.

  E hoomu ia aku ana ka lele mai o ko ka Piladelapia bataliona koa mauka nei o ka aina i kela a me keia hebedoma ma keia mua aku, e like me ka loihi o ko ka mokukaua ku ana ma Honolulu nei.

 

Ke Kulana Aupuni a me ka Hoohuiaina a na Anee Alii o Honolulu.

  Ua ike au i kau e Loio Hawaii Naauao o Honolulu, ma ka helu 8 o ka Nupepa Kuokoa o Feberuari 23, 1895, e pili ana i ke kulana o ko kakou aupuni i keia kulana o ko kakou aupuni i keia wa, a he mea na'u i hauoli loa ai, ua like ko'u mau noonoo a pau e like me kau i hoakaka ai, a ke hooia aku nei au, ua pololei kou mau manao a pau, a he mea uuku wale no ka like ole, aole no nae ia he mea nui i ko'u manao, o kau i kamailio ai o ka hoohui i keia manawa, o ka'u hoi aole pela, ke manao nei au, aia a pau ae ka manawa o ka peresidena pauaka a holokee o Amerika Huipuia, alaila, hoohui aku, a o  kekahi kumu no hoi, o ke kali aku i ka manao o ko kakou Ahaolelo Kaukanawai.

  O kou kahua no i ku ai, oia no ko'u kahua, mai ka hookahuliia ana o ke aupuni moi a hiki i keia la a kaua e haaheo ai ke puana ae ua lanakila ka pono, a ua haule ka haaheo.  Ua ike au ua mahalo oe i ka halawai hoohuiaina a J.F. Kolopana S. Parker, J.L. Kaulukou ma, ka poe anee alii a ohumuhumu kipi pu no, me ka poe i ahu lala kukui aku la i ka halepaahao o Kawa.  No'u iho, aole au e haawi i ko'u mahalo ia lakou, oiai o ke kumuhana hoohuiaina oia ka mea i noonoo mua ia iloko o na lolo noeau o na poo alakai o ko kakou aupuni maikai e ku nei i keia la, a ua kakoo pu aku kaua a me ko kaua mau hoa naauao e ae ma ia alanui hookahi me ka manao koho maopopo maoli iloko o'u, he uhiuhi lau mamane, aia no ka ino iloko, oiai lakou e hui ana i keia mau la no ka hoohuiaina, alaila, o ka ninau, ihea ka lakou hoohuiaina i waiho aku ai?  A ma ke alanui hea lakou e hana akua ai?  Ua maopo lea ia kakou ko lakou manao i keia makahiki elua i kaahope ae, he pahenehene, he hoauwaepuu, he hoopuukahua, pau pu me ka puulu lalau o kaua o Honolulu.  Aka, a hiki mai nae i keia hora, wikiwiki i hui hoohuiaina.  Ua poina anei ko kakou mau poo aupuni ia ninau hoohuiaina?  A ua poina pu anei me kaua keia mau hoa lolo Hawaii no keia ninau?  A ua poina anei ko kalaiaina noeau o ka nupepa Kuokoa i keia ninau?  A ua poina anei ka poe i kokua mahope o ke Aupuni Kuikawa a hiki i ka la 4 o Iulai, 1894 i ku ai ke Aupuni Repubalika e ku nei i keia hora me ke kilakila?  Aole loa makou i poina a me ka makou poe keiki no ia mea, a ke kali nei makou i ka noonoo maikai o na lii a me na hoa lunamakaainana a makou i koho pono ai, i ka manawa e kahea ia mai ai e ka Peresidena, oluolu, akahai, huhu ole, waipahe, a na miliona o ka honua e haawi mai ai i na mahalo.  A ia manawa e ike aku ai kakou i ka hopena o ua ninau hoohuiaina nei,  Ua manao anei lakou ka poe anee alii e hoala mai nei i hui hoohuiaina he poe lolo a hupo ka poe nana i kukulu keia aupuni maikai.  Aole, aole loa no.  O ka ahahui kupono a J.F. Kolopana ma e kukulu ai, e kahea aku lakou i na anee alii a pau, a e ao aku ia lakou e like me Kahikina Kelekona e kalahea nei i na mea a pau.  Ka hua i ka umauma la haina mai, alaila, ao aku e hoopau i ko lakou mau manao kuhihewa, a e huli ae kakou i ke aupuni maikai, a e haalele i na manao awahua o ka lokoino e like me keia kipi ino loa a oukou i manao iho nei e holopono ana, a e hookahe i ke koko hala ole o na karistiano hoopono nana i kuni iho i ke sila o ke aupuni Repubalika o Hawaii.  Aka, aole pela ka manao o ke Akua, ua hoolilo mai ke Akua i ka oukou mau hana iho i kuko ai me ko oukou mau puuwai eleele, i mea e ike ai oukou i ka nani o kona inoa, a e maopopo ai ia oukou ka mana, ka oiaio, ka hemolele o kona Akua ana, a oukou i hailiili mai ai me na huaolelo, nu mikanele pakaha aina a kolea kauahua Kai iho la no nae i na waha ulaula o oukou e ai ana i ka io kamano o Kawa.

  Pau ka oe hana, pio ka oe ahi.  E na hoaloha, na makamaka, na hoahanau, na kahunapule i kapa ia lakou he aloha aina, e hoopau i ko oukou manao kuhihewa, a e huli mai iloko o ka noho lokahi o ke aupuni maikai.  Aia no he la e hiki mai ana e komo aku ai kakou malalo o na eheu maluhia o ka Repubalika Nui o ke ao nei, alaila he lani iluna, o Hawaii no malalo, lalau na lima i na mea hana, mahi i kou aina iho, ku na loikalo, na mala uala, na ipu haole, na kapiki, na akaakai, a pela wale aku, makaukau ka waa, hopu ka hoe, ka ipuaho, ka maunu, holo i ka moana, loaa mai na ia o na ano a pau, hoi mai kuai kekahi, ai kekahi, aole hana i koe, kau ke poo i ka uluna o Welehu ka malama, a heaha ka mea i koe?  I hoonani ia ke Akua ma na lani kiekie loa, he malu ma ka honua, he aloha no i kanaka.

LOIO HAWAII,

  Lahaina, Maraki 12, 1895.

 

 

 

 

Hoolaha Hou.

GOO KIM

411 Alanui Nuuanu.

  MEA HOOKOMO MAI A KUAI AKU I NA Lole Europa a me Pake a me na lole o na ano a pau.  Ma na moku i ku hope mai nei.  ua loaa mai ia makou na waiwai lawa pono o na PAPALE WAHINE i kau ia i ka lipine a me na papale i kau ole ia i ka lipine, na LOLE KANE o na ano a pau o ke ano maikai hou loa.  E kipa mai i o'u e ninau mua ai no na lole maikai a me na ano SILIKA waihooluu like ole.                                                                            2587-1yr

 

Hoolaha a ka Lunahooponopono Waiwai.

  UA HOOKOHU IA MAI KA MEA NONA ka inoa malalo iho ma ka la 16 o Aperila, 1894.  i Lunahooponopono Waiwai me ka palapala kauoha i hoopili ia a C. Manaole la, e waiho koke mai me na hooiaio kupono, ina he mau hooiaio kekahi, a ina paha he moraki maluna o ka waiwai paa iaia, ma kona keena oihana ma Alanui Kalepa, ma Waikiki iho o ka Hale Leta, maloko mai o na malama eono mai keia la aku, a i ole ia e hoole mau loa ia aku no.

  Honolulu, Maraki 4, 1895.

  25 36-4                                                       J. A. MAGOON.

 

 

OLELO HOOLAHA.

  E IKE AUANEI NA MEA A PAU MA keia hoolaha, owau o AKI (k), makuakane ponoi o L. WAIOLAMA (k) o Pauoa-uka, a ma kekahi palapala kuai i hana ia e a'u a me ka'u wahine mare, i kopeia ma ke Keena Kakau Kope  o ke Aupuni, Buke 125 aoao 82, i ka la 3 o Mei, 1890, no ke kumukuai Hookahi Dala ($1.00).  A ke hoopau nei au i ua mana kuai la no na kumu penei:  Aole he malama ia o ko maua ola, ka ai a me ka i'a, a me na pono a pau i ko'u wa e ola ana, a ina ua hoolilo moraki ia ua aina ala e L. Waiolama, a hoolilo paha ma kekahi ano e ae, aia no maluna o L. Waiolama ko lakou koi poho ana, aole maluna o ko'u waiwai paa.  No ka oiaio o keia hoolaha, ke sila nei au i ko'u inoa.

MR. AKI (k),

  Pauoa-uka, Honolulu, Maraki 7, 1895.                                                             2536-4

 

Hoolaha a ka Lunahooponopono Waiwai.

 UA HOOKOHU IA MAI KA MEA NONA ka inoa malalo i Lunahooponopono Waiwai no ka waiwai o A.P. Jones, ke hoolaha aku nei i na mea a pau he mau koina ka lakou i ka waiwai o A.P. Jones, e waiho koke mai me na hooiaio kupono, ina he mau hooiaio kekahi, a ina paha ua paa ma ka moraki ka aina, iaia ponoi ma ke keena oihana o J.A. Magoon, Alanui Kalepa, ma Waikiki iho o ka Hale Leia, maloko mai o na malama eono mai keia ia aku, a i ole ia e hoole loa ia aku no.

MRS. RACHAEL JONES,

  Ma o kona loio la

J. ALFERD MAGOON,

  Honolulu, Mar. 4, 1895.                                                                                      2536-4

 

Hoolaha a ka Lunahooponopono Waiwai.

  UA HOOKOHU IA MAI KA MEA NONA ka inoa malalo iho ma ka la 4 o Ianuari, 1895, i Lunahooponopono no ka waiwai o Martha J. McGowan, ke hoolaha aku nei i ka poe a pau he mau koina ka lakou i ka waiwai o Martha J. McGowan, e waiho koke mai i ka lakou mau koina me na hooiaio kupono ina he mau hooiaio kekahi, a ina paha ua paa i ka moraki ka waiwai paa iaia ponoi, ma ko J. Alfred Magoon keena oihana ma Alanui Kalepa ma ka hikina o ka Hale Leia, maloko mai o na malama eono mai keia la aku, a i ole ia e hoole loa ia aku no.

W. W. McGOWAN

  Ma o kona loio la

J. ALFRED MAGOON.

  Honolulu, Mar. 4, 1895.                                                                                    2586-4

 

Hoolaha a ka Luna Hooko Kauoha.

  O KA MEA NONA KA INOA MALALO IHO nei, ma ka la 27 o Feberuari A.D. 1895, ua hookohu pono ia e Hon. J.W. Kalua, Lunakanawai o ka Aha Kaapuni Apana Elua, i Lunahooko Kauoha no ka waiwai o Makuakane (w) i make no Wailuku, Maui.  Nolaila o ka poe a pau i aie i ka mea i make, e hookaa mai ia'u a o ka poe a ka mea make i aie ai, e waiho mai lakou i na Bila i hooiaio ponoia iloko o na malama eono mai keia la aku, o hoole loa ia.

ABRAHAM KALUHI,

  Lunahooko Kauoha me ka Palapala Kauoha a Makuakane (w) i make.

  Wailuku, Feberuari 28, 1895.                                                                             2536-3

 

Hoolaha a ka Lunahooponopono Waiwai.

  UA HOOKOHU IA MAI KA MAE NONA ka inoa malalo iho ma ka la 17 o Dekemaba, 1894, i Lunahooponopono no ka waiwai o S. Kukii, ke hoolaha aku nei i ka poe a pau he mau koina ka lakou i ka waiwai o S. Kukii, e waiho koke mai me na hooiaio kupono, ina he mau hooiaio kekahi, a ina paha ua paa malalo o ka moraki ka aina iaia, ma kona keena oihana ma Alanui Kalepa, ma Waikiki iho o ka Hale Leta, maloko mai o na malama eono mai keia la aku, a i ole ia e hoole loa ia aku no.

  Honolulu, Maraki 4, 1895.                J. ALFRED MAGOON.                          2536-4

 

Hoolaha Hou.

 

Hoolaha Hooko o ka Moraki a me ke Kuai.

  I KULIKE AI ME NA HOOKO ANA O KE-kahi moraki i hana ia e KEMAHALUAE a me MELE kana wahine ia S.E. Bishop, ma ka la 15 o Okatoba, 1890, kope ia maloko o ke Keena Kakau Kope o ke Aupuni Buke 126, aoao 374 a me 375, nolaila ke hoolaha ia aku nei ka lohe i na mea a pau, ke makemake nei ka mea e paa nei i ka moraki e hooko aku no ke kumu ka uhai ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai. 

  Ke hoolaha hou ia aku nei ka lohe i na mea a pau, mahope aku o ka pau ana o na hebedoma ekolu mai ka la aku o keia hoolaha ana, alaila e waiho ia aku no ma ke kuai kudala akea ka waiwai i paa maloko o ua moraki la ma ka Hale Kudala o Jas. F. Morgan, Honolulu, ke hiki aku i ka POAKOLU, APERILA 10, 1895, hora 12 awakea o ia la.

  No na mea i koe, e ninau ia

J. ALFRED MAGOON,

Loio no S.E. Bishop mea o paa nei i ka moraki.

  Kakauia Honolulu, Mar. 14, 1895.

  O na waiwai i paa maloko o ua moraki la, oia kela apana aina e waiho la ma Haliulalo.  Honolulu, Oahu, a i kuhikuhi pono ia ma na Apana 2 a me 3 o ka Palapala Sila Nui Helu 6979 Kuleana Helu 2661 ia Kuukuu.                                                                2537-4

 

Hoolaha Hooko o ka Moraki a me ke Kuai.

  I KULIKE AI ME NA HOOKO ANA O KE-kahi moraki i hanaia e CHARLES B. WILSON o Honolulu, Oahu, ia George P. Townsend o ua Honolulu la, ma Augate 9 A D 1894, kopeia ma ke Keena Kakau Kope o ke Aupuni Buke 147 aoao 478, 479 a me 480, ke hoolaha ia aku nei ka lohe i na mea a pau, ke manao nei ka mea e paa nei i ka moraki e hooko aku, no ka uhai ia o ka aelike, oia ka hookaa ole ia o ka ukupanee i ka wa e hookaa ai.

  Ke hoolaha hou ia aku nei ka lohe, mahope iho o ka pau ana o na hebedoma eha mai keia la aku, e kuai ia aku no ma ke kudala akea ka waiwai i paa maloko o ua moraki la ma ka Hale Kudala o Jas. F. Morgan, Honolulu ma ka POAONO la 13 o APERILA, A D 1895, hora 12 awakea o ia la.

  O ka waiwai i paa maloko o ua moraki la, ua kuhikuhi ia penei malalo iho:

  O kela apana aina e waiho la ma Kulaokahua ma ua Honolulu la, i kuhikuhi ia na palena penei:  E hoomaka ana ma ke kihi mauka o na alanui Young a me Piikoi, a e hoio ana i ka Hikina ma ke alanui Youna 219.8 kapuai, alaila i ka Akau 150 kapuai, alaila Komohana a hiki i alanui Piikoi 210.9 kapuai, alaila Hema ma alanui Piikoi 150.3 kapuai a hiki i kahi i hoomaka ai, nona ka ili he 731-1000 o ka eka.

GEORGE P. TOWNSEND,

  Ma o kona mau loio la CARTER & KINNEY.

  Mea a paa nei i ka moraki.

  No na mea i koe, e ninau ia Carter & Kinney na loio no ka mea e paa nei i ka moraki.

 Helu 410 Alanui Papu, Honolulu.

  Honolulu, Mar. 11, 1895.                                                                            2537-4

 

Hoolaha Hooko o ka Moraki a me ke Kuai.

  KE HOOLAHA IA AKU NEI KA LOHE I na mea a pau, i kulike ai me na hooko ana o ke kuai i hookomo ia iloko o kekahi moraki i hana ia e KAAPA (w) a me KAALOKAHI kana kane ia Alexander Hutchinson, ma ka la 3 o Iune AD 1873, kope ia ma ke Keena Kakau Kope o ke Aupuni Buke 55 aoao 111 a me 112, a o ua moraki ia a me ka nota a me ka aie i paa malaila, ua hoolilo ia aku ia J.O. Carter a me J.S. Walker, na lunahooko kauoha o ka palapala kauoha a ua Alexander Hutchinson la ia W.G. Irwin a me Claus Spreckles, na hoahui malalo o ka hui nona ka inoa "W.G. Irwin & Co." ma ka palapala i hana ia i Feberuari 28 AD 1881, kope ia ma ke Keena Kakau Kope Buke 70 aoao 1 a me ka palapala i hana ia Feberuari 28 AD 1881, kope ia ma ua Keena Kakau Kope la Buke 70 aoao 2, 3, 4 a me 5 e W.G. Irwin & Co. a me kekahi poe e ae i hoolilo ia aku i ua Mahiko la o Hutchinson, he Hui Hawaii i hoohui ia ma ka la 28 o Novemaba AD 1884, kope ia ma ke Keena Kakau Kope Buke 93 aoao 16, 17 a me 18 a mai ua Hui aku la ua hoolilo aku ka Hui Mahiko Hutchinson ia Louis Sloss ma ka palapala i hana ia ma Iune 1 AD 1889, kope ia ma ke Keena Kakau Kope Buke 119 aoao 120 a me 121, a mai ua Louis Sloss la i hoolilo ia aku ai i ka Hutchinson Sugar Plantation, he hui i hoohui ia malalo o na kanawai o ka mokuaina o Kaleponi Amerika Huipuia ma ka palapala i hana ia i Iune 11, 1889, kope ia ma ke Keena Kakau Kope Buke 118 aoao 376 a me 377, o ua hui hope la ka poe nona na inoa malalo iho, ke manao nei e hooko aku i ka moraki no ka uhai ia o ka aelike, oia ka hookaa ole ia o ke kumupaa a me ka ukupanee maluna o ka nota aie a me ka aie i paa maluna o ka moraki.

  Ke hoolaha hou ia aku nei ka lohe, o ka waiwai i paa maloko o ua moraki la e kuai ia aku ana ma ke kudala akea ma ka Hale Kudala o Jas. F. Morgan ma Honolulu Mokupuni o Oahu, ma ka POAONO, la 13 o APERILA, AD 1895, hora 12 awakea o ia la.

  O ka waiwai i paa maloko o ua moraki ia, penei ke kuhikuhi ana malalo iho:

  O na pono a pau, na pomaikai a me na kuleana o ua Kaapa a me Kaalokahi ia iloko o kela aina a pau o Kawala, Kau, Mokupuni o Hawaii, oia ka Apana 1 iloko o ka Palapala Sila Nui Kuleana noona Helu 620 ia Lawe liilii a nona ka ili he umikumanai wa (19) mau eka.

  THE HUTCHINSON SUGAR PLANTATION COMPANY.

  No na mea i koe e ninau ia Carter & Kinney na loio no ka Hutchinson Sugar Plantation Company.

  Kakauia ma Honolulu, Maraki 12, 1895.                                                              2537-tf

 

Hoolaha Hooko o ka Moraki a me ke Kuai.

  KE HOOLAHA IA AKU NEI KA LOHE I na mea a pau, mamuli o ka mana o ke kuai hookomo ia iloko o kekahi moraki i hana ia ma ka la 26 o Novemaba AD 1887 e D.W. KAHUAKAI o Honolulu Mokupuni o Oahu, ia Alexander Campbell (i make i keia wa), kope ia ma ke Keena Kakau Kope o ke Aupuni Buke 108 aoao 366 a me 367, ke manao nei o Margaret Campbell, Elizabeth Rycroft, kana kane Robert Rycroft, ke hui a ae nei o Alexander J. Campbell, Mark P. Robinson kahu o J.L.P. Robinson, H.A. Robinson a me A.C. Robinson, na keiki a Sophia Louise Robinson nona ka inoa Campbell, W.H.C. Campbell, John T. Campbell, na hooilina o Alexander Campbell, e hooko i ka moraki no ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.

  Ke hoolaha hou ia aku nei, o na aina a pau, ua pono hoaaina a me pono pilikino iloko o ua moraki la, e kuai ia aku no ma ke kudala akea ma ka Hale Kudala o Jas. F. Morgan ma Alanui Moiwahine Honolulu, ke hiki aku i ka POAKAHI la 25 o MARAKI, A D 1895, hora 12 awakea o ia la.

  O ka waiwai i paa maloko o ua moraki la, oia keia:

  O kela mahele hapakolu i mahele oie ia a pau a me ke kuleana o D.W. Kahuakai iloko o ka apana aina e waiho la ma Puuepa Kohala, Mokupuni o Hawaii, nona ka ili he 19 mau eka a me 730 anana kuea, a oia ka aina i kuhikuhi ia iloko o ka Palapala Sila Nui Helu 7257, Kuleana Hoona Aina Helu 8088 i hoopuka ia no Hoomanoloaina, o ua mahele la ua hoolilo ia mai ia D.W. Kahuakai e Keamohuli ma ka palapala kuai i hana ia ma Mei 3, 1886, kope ia ma ka Buke 102 aoao 5 a me 6.

MARGARET CAMPBELL,

                                                       ELIZABETH RYCROFT,

                                                       ROBERT RYCROFT,

    ALEXANDER J CAMPBELL,

                                                       MARK P. ROBINSON,

  Kahu o J.L.P. Robinson, A.M. Robinson, a me A.C. Robinson,

                                                       W.H.C. CAMPBELL,

                                                        JOHN T. CAMPBELL,

  Na Hooilina o Alexander Campbell i make, mea e paa nei i ka moraki.  Kuike ke dala,  Na uku hana palapala i ka mea e lilo ai.  No na mea i koe, e ninau ia

                                                        J. M MOSARRAT,

  Loio no na Hooilina o ka mea e paa nei i ka moraki.

  Honolulu, Feberuari 26, 1895.                                                                                       2535-4

 

 

Hoolaha Hou.

 

Hoolaha Hooko o ka Moraki a me ke Kuai.

  I KULIKE AI ME NA HOOKO ANA O KE-kahi moraki i nana ia ma ka ka la 7 o Iune A.D. 1884, e CHARLES WALLACE a me ANN WALLACE kana wahine o Waihee Mokupuni o Maui ia John S. Walker a me F.H. Hayselden, Kahu malalo o ka palapala kauoha a James G. Hayselden o Honolulu i make, kope ia ma ke Keena Kakau Kope o ke Aupuni Buke 80 ma na aoao 106, 107 a me 108.

  Ke hoolaha ia aku nei ka lohe i na mea a pau, ke makemake nei ka mea noua ka inoa malalo iho ke kahu e ola nei e hooko aku i ua moraki la no ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.

  Ke hoolaha hou ia aku nei ka lohe i na mea a pau mahope aku o ka pau ana o na hebedoma ekolu mai ka la aku o keia hoolaha ana.  alaila e kuai kudala ia aku no ka waiwai i paa maloko o ua moraki la ma ke kulanakauhale o Honolulu Mokupuni o Oahu, ma ka POAONO, MARAKI 23, hora 12 awakea o ia la ma ka Hale Kudala o James F. Morgan.

  No na mea i koe, e ninau ia

F. H. HAYSELDEN,

  Kahu e ola nei o ka Palapala Kauoha a Jas. G. Hayselden

  A i ole ia

CECIL BROWN, Loio.

  Kakauia ma Honolulu, Feberuari 14, 1895. 

  O ka waiwai i paa maloko o keia moraki, oia kela mau apana aina iloko o na Ili o Kapokea a me Loikahi iloko o Waihee nona ka ili he 1 34-100 mau oka a me kela mau apana aina pu iloko o ka Ili o Kapokea a me Loikahi iloko o Waihee nona ka ili he 3 47-100 mau eka.  o kela mau apana aina a pau aia ua kuhikuhi ia iloko o ka Palapala Sila Nui Helu 5360, Kuleana Helu 3775 ia Anakalea apana 2 a me 1.                                                                                        2534-4

 

Hoolaha Hooko o ka Moraki a me ke Kuai.

  I KULIKE AI ME NA HOOKO ANA O KE-kahi moraki i hana ia i ka la 1 o Augate A.D. 1893 o Jas. H.S. MARTIN o Waiohinu Kau Mokupuni o Hawaii ia Cecil Brown o Honolulu Mokupuni o Oahu, kope ia ma ke Keena Kakau Kope o ke Aupuni, Buke 145 ma na aoao 276 a me 277.

  Ke hoolaha ia aku nei ka lohe i na mea a pau, ke makemake nei ka mea nona ka inoa malalo iho e hooko aku i ua moraki la no ke kumu ka uhaki ia o ka aelike, oia ka hookaa ole ia o ke kumupaa a me ka ukupanee i ka wa e hookaa ai.

  Ke hoolaha hou ia aku nei ka lohe i ha mea a pau, mahope iho o ka pau ana o na hebedoma ekolu mai ka la aku o keia hoolaha ana, alaila e waiho ia aku no ka waiwai i paa maloko o keia moraki ma ke kudala akea ma ke kulanakauhale o Honolulu Mokupuni o Oahu ma ka POAONO, MARAKI 23, 1895, hora 12 awakea o ia la ma ka Hale Kudala o Jas. F. Morgan.

  No na mea i keo, e ninau ia

CECIL BROWN,

Mea e paa nei i ka moraki.

  Kakauia ma Honolulu Feberuari 14, 1895.

  O ka waiwai i paa maloko o ua moraki la, ole kela apana aina e waiho la ma Kamaoa, Kau, Hawaii, a i kuhikuhi ia ma ke Kuleana Hoona Aina Helu 10680 nona ka ili he 3 66-100 mau eka a me kekahi apana aina e waiho la ma Waiohinu Kau Hawaii a i kuhikuhi pono ia maloko o ka Palapala Sila Nui i Helu 3206 Kuleana Hoona Aina Helu 6946.                                        2534-4

 

Hoolaha Hooko o ka Moraki a me ke Kuai.

  I KULIKE AI ME NA HOOKO ANA O KE-kahi moraki i hana ia ma ka ka la 8 0 Okatoba 1894 e CHAS. T. GULICK Kahu no HENRY F. POOR o Honolulu Mokupuni o Oahu ia William H. Rice o Lihue Mokupuni o Kauai, kope ia ma ke Keena Kakau Kope o ke Aupuni Buke 151 ma na aoao 161 a me 162.

  Ke hoolaha ia aku nei ka lohe i na mea a pau.  ke makemake nei ka mea nona ka inoa malalo iho e hooko aku i ua moraki la no ke kumu ka uhaki ia o ka aelike, ola ka hookaa ole ia o ke kumupaa a me ka ukupanee i ka wa e hookaa ai.

  Ke hoolaha hou ia aku nei ka lohe, mahope iho o ka pau ana o na hebedoma ekolu mai ka ia aku o keia hoolaha ana, e waiho ia aku no ka waiwai i paa maloko o ua moraki ia ma ke kudala akea e Jas. F. Morgan ma ka Pa Halelio ma Alanui Kula mawaena o na alanui Nuuanu a me Lilihu, Honolulu, ma ka POAONO la 23 o MARAKI, 1895, hora 12 awakea o ia la.

  No na mea i koe, e ninau ia

W. H. RICE,

Ka mea e paa nei i ka moraki.

  A i ole ia CECIL BROWN, Loio.

  Kakauia ma Honolulu, Feberuari 18, 1895.

  O ka waiwai i paa maloko o ua moraki la, oia kela umi (10) pipi waiu a me na ohi i kuni ia me ka hao W R ma ka uha hope hema, a i lawe ia e ka mea e paa nei i ka moraki malalo o na olelo o ua moraki la.  a eia ma ke Kula Hanai Holoholona o Waialae Mokupuni o Oahu e malama ia nei na pipi.                                                                                                                      2534-4

 

HOOPAU HUI.

  KE HOOLAHA IA AKU NEI KA LOHE I na mea a pau, o ka hui i ku iho nei mawaena o ANTONIO FERNANDES a me J. E. GOMES, malalo ka inoa Fernandes ame Gomes.  ua hoopau ia i keia la mamuli o ka aelike ana.  Na Antonio Fernandes e hoomau aku ana ka lawelawe ana i ka hana ma kahi kahiko a e uku i na aie a me na mea a pau i pili.

  Kakauia ma Honolulu, Feberuari 15, 1895.

ANTONIO FERNANDES.

2536 4                                              J. E. GOMES.

 

Hoolaha a ke Kahu Malama o James Love.

  MA KEIA LA, UA HOOKOHU IA MAI AU i kahu malama no James Love, he mea uhauha, nolaila ke hoolaha ia aku nei ka lohe i na mea a pau aole loa e ili ana maluna o'u ka hookaa ana i na bila i hana ia e ia a mea e ae paha ma kona inoa, aia wale no a hoomana ia e a'u ma ke kakau.

J. ALFRED MAGOON.

  Honolulu, Feberuari 14, 1895.                                                                                        2536-4

 

Hoopau Hui.

  KE HOOLAHA IA AKU NEI I NA MEA A pau o ka Hui i ku iho nei mawaena o J. N. WRIGHT a me T. J. KING i ike ia ma ka inoa CALIFORNIA FEED COMPANY, ua hoopau ia i kela la mamuli o ka aelike ana.

  Na T. J. King e lawe ana a hookaa aku i na aie a pau o ka Hui, a o na poe aie i ka Hui e hookaa aku iaia.

J. N. WRIGHT.

T. J. KING.

  Honolulu, Feb. 22, 1895.                                                                                            2535-3

 

HOOLAHA HOOHUI.

  KE HOIKE NEI KEIA O KA POE NO LAKOU na inoa malalo iho, J. I. Dowsett, J. I. Dowsett Kahu, Gilbert J. Waller, B. F. Dillingham, H.M. Von Holt Kahu, Cecil Brown, John Ena, W.B. Godfrey, S. M. Damon, Geo. J. Campbell, Samuel Parker, W. G. Irwin, M.P. Robinson, A.J. Campbell, F.M. Swanzey, L.L. McCandless, Brown a me McCandless, J.P. Mendoca, H. Focke Kahu, Paul R. Isenberg, Geo. F. McLeod, William Heilbron a me Gasper Silva o Honolulu, mokupuni o Oahu, H.P. Baldwin, H.P. Baldwin Kahu a me W.H. Cornwell mokupuni o Maui, George Clark, E.C. Greenwell Kahu, August Hanneberg, Eben p Low me John Maguire o ka mokupuni o Hawaii, ua hoohuila lakou ma ka lawelawe oihana ma ka kulanakauhale o Honolulu mokupuni o Oahu, ma ka hana kuai pipi nui a me kuai liilii ame ke kuai ili pipi a me ili kao malalo o ka inoa hui Metropolitan Meat Company.

  Kakauia ma Honolulu, Feberuari 13, 1895.

C. J. WALLER.

  Luna nui o ka Metropolitan Meat Company.                                                                  2534-2

 

E Haawi i na keiki Ai Waiu

A ME NA POE OMAIMAI

MELLIN'A

FOR INFANTS AND INVALIDS.

FOOD

I ka Mea Ail

He Ai Hooulu Oi Loa

No ka hooulu Kamalii

Ka Hoopohala mai an

Na Mai Ake Pau

Na Opu Ai wali ole.

a me na elemakule loaa ina

Nawaliwali.

- HE -

AI MAKAI LOA

No  na Pokii Hanai Lima ua

BENSON, SMITH & CO.

Na Araaa wale no @ e Hawaii Pae Ania