Ka Nupepa Kuokoa, Volume XXXIV, Number 39, 28 September 1895 — Page 3
| This text was transcribed by: | Malialani Cabaniss |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Puka Hou ke Korela.
Ia makou e hoomakaukau ana e hoi e pai i ke Kilohana Pookela i ke kakahiaka o nehinei me ka piha hauoli e kukala aku imua o ka lahui, aia hoi hooho ana ka leo, ua puka hou mai ia he mai korela. Ua manawa ole ua hiki aku la makou i ke Keena o ka Papa Ola. He oiaio, ua puke io ae ke korela ia Paina (w), nona na makahiki he 65 a i noho iho nei ma Kikihale. Ua hului ia ae oia a eia ma ka halemai korela e Kakaako. No ke kokoke o kona wahi i kahawai, ua hopohopo ia malia ua kii oia i kekahi mau mea i papa ia e ai. Nolaila e kapae loa i ka ai ana i ka papai, ka opae a me na mea maka o ka wai a me ke kai. Mai hookuli o nui ko kakou poino!
--Honolulu, Sept. 27, hora 9:30 A.M.
KA HUI ALAHAO ME AINA O OAHU
MANAWA HOLO.
Mai a Mahope aku o Iulai 5, 1895.
Wili o Ewa Hiki i Wai Hiki i Wili Hiki i Waia
Kaa Ukana anae na la o Ewa na la nae la pau
Na la a pau pau, a pau
koe Sabati
A.M. A.M. P.M. P.M.
HAALELE IA HONOLULU 6:40 9:15 1:45 5:10
HAALELE IA MANANA 7:40 9:58 2:2@ 5:53
HAALELE WILI O EWA 8:10 10:19 2:49 6:14
HIKI I WAIANAE -- 10:54 -- 6:49
Waianae na Wili o Ewa Waianae na Wili o Ewa
la a pau Kaa Ukana la a pau na la a pau
Na la a pau
Koe Sabati
A.M. A.M. P.M. P.M.
HAALELE IA WAIANAE 6:44 -- 1:@2 --
HAALELE IA WILI O EWA 7:19 9:10 2:07 8:51
HAALELE IA MANANA 7:50 9:48 2:38 4:22
HIKI I HONOLULU 8:28 10:30 3:11 4:55
Ma na po Poaono a me Sabati e hiki ana ko ka Wili o Ewa mai kaa i Honolulu ma ka 5:53 aole ma ka 4:55 P.M.
E lawe ana na kaa ahi hali ukana i na kaa ohua o ka papa ekahi
G.P. DENISON, Luna
F.C. SMITH, Luna Kuai Palapala Holo.
NU HOU HAWAII
Ua lawe iho nei o George E. Smithies i ka hoohiki malalo o ke Kumukanawai o ka Repubalika o Hawaii.
E hoomau ia aku ana ke komo kauhale ana o na poe komite malama oia me ka ukuia a hookahi no ka apana hookahi.
Ma ka Poakahi aenei e hoomaka ai na kula, ke ole e puka hou mai ke korela a keia kulanakauhale i hooikaika iho nei e anai a kipaku aku mai Honolulu aku nei.
Ua hoi mai o Lunakanawai Kiekie Alapaki mai kona home pali Koolau mai o Kualoa ma ka Poakolu nei, mahope o ka hoomaha ana no ka manawa he elua malama.
Ma Koula, Honolulu nei, i ka la 20 o Sepatemaba nei, ua hanau mai na ka wahine a E. Wodehouse a kaikamahine hoi a Mrs. Victoria Ward, he keikikane.
E hoomaka ia ana na haawina hana o ke Kula Kahunapule ma ka Poakahi elua o Okatoba. U konoia na keiki hou e akoakoa mai me ka eleu mamua ae o ka la hana mua.
E hoomaka ana ke Kulanui o Oahu a me ke Kula Hoomaamaa o Punahou ma keia Poakahi iho, Sepatemaba 30, ke hoopau ia ka hoomalu e ka Papa Ola ma ia manawa.
O ka nui o na mea ai i haawiia aku i ka poe hune o ka Hui Manawalea Hawaii i ka hebedoma e pau ana i Sepatemaba 21, he 22,218; a o na hoolilo no ia hebedoma, he $1,186.05.
Ua mare ia ma ke kulanakauhale o Kapalakiko i ka la 26 o Augate i hala, e Rev. Dr. Stebblas, o Mr. Allen Hutchinson, ko Honolulu nei kalai kii maamaalea, me Miss F. Ferrie o Kapalakiko.
Ua pau mai i ka hookuu ia na pake limahana a ka mokuahi Rio de Janeiro i halihali mai ai mai Kina i kela mau pule aku nei, a i hoomalu ia iho nei ma Kahakaaulana a piha na la hoomalu.
I ka la 15 o Sepatemaba nei, ua manele ia aku i ke aupuni uhane, mai ka poli aku o Mr. a me Mrs. Aubrey Robinson o Makaweli, Kauai, ka laua kaikamahine muli umikumamakahi malama o ke ola ana.
E wehe hou ia ana na hana anaina haipule o ka ekalesia o Kawaiahao ma ke awakea o ka la apopo (Sabati) e like me ka mea mau, oiai ua hoonoa aenei ka Papa Ola i ka lakou rula. Nolaila, e hele hou mai kakou a pau e hoopunana ma ko ke Akua wahi mau e hoomana akea ia nei, na hoahanau a me na makamaka. Mai haalele i ka akoakoa mau ana.
I ka wa a ka mai korela i laha iho nei, ua pani ia iho la ka Hale Haawi Laau Lapaau o ke Aupuni ma Alanui Moi, a ua hoomaemae hou ia ma ke pena hou ia ana oloko a me waho. A ma ka Poakolu iho nei, akahi no a wehe hou ia kona mau ipuka.
He mau haneri o na kanaka o ka puali hamo puna a me hoomaemae kauhale o ka Poakahi a me ka Poalua iho nei, i akoakoa ae mamua iho o ke alo e Kuapapanui i ka auina la Poakolu iho nei, no ka ohi ana i ko lakou uku hana o na la elua mamua koke iho no, ma ke $1.50 o ke kanaka hana a he $2.00 o ka luna o ka la hookahi. Ua pau lakou a pau i ka uku ia mai. Holo ka hana!
O ka nui o na poe a pau loa i loaa i ka mai korela, mai ka la 17 o Augate i hala a hiki i Sepatemaba 19, he 85. Mailoko mai o ia heluna, he 25 i ola mai, a he 60 i make aku. O na lahui o ka poe i loaa, he 3 Amerika, 2 Pukiki, 1 Pake, 1 Iapana a me 75 Hawaii a me 3 hapa Hawaii. O na make ma na lahui, he 3 Amerika, 1 Pake, 1 Iapana a me 55 Hawaii.
Eia ke ku nei mamua iho o Kuapapanui ke paila o na eke lanahu i aihue ia e kekahi poe kamalii o keia kulanakauhale i kela a me keia wa e loaa ai he manawa kaawale e ike ole ia ai ke lawe mai na puu lanahu mai e hoahu ia noi e na poe mea lanahu ma na uapo. Ua hookolokolo ia iho kekahi poe o lakou a ua ku i ka hewa i hoopaiia. Hookahi o keia mau keiki aihue oia o Keamohuli, he mai lepera. E hoounaia ana oia i Kalihi a hala loa aku i Kalawao.
Ua hala aku i ka make i ka Poalua iho nei mai Leleo aku, o D. Kamiki Kanehiwa, he Hawaii i noho elele loihi no ke Keena o ko na Aina e mamua a haalele iho nei. O kona mai i make ai he anu ma ke akemama. Ma ke awakea Poakolu mai, ua malama ia he anaina kupapau nona maloko o Ariona Holo, malalo o ka ekalesia Moremona i hooponopono hou ia, no ka mea he hoahanau oia no ia manaoio. Pau na hana malaila, alaila ua lawe ia aku ke kino a waiho ia ma ka ilina o Kawaiahao.
Ma ke ahiahi Poakahi iho nei i hoaeae mai ai ka hone ana a na leo o na Puali Puhiohe o ke Aupuni, ma ka pa o ka Hale Mana Hooko, a ua hooho ae la kekahi poe i lohe mua ole he puhi ohe, "E pau ke korela, ke hauoli mai nei na ohe a na keiki punahele a ka Repubalika." Ma ke ahiahi Poakolu mai, haawi hou ia no he anaina puhi ohe malaila, a ua lehulehu ka poe i hele ae e hoolohe, ma na wawae, na lio a ma na kaa. I keia auina la, e hoi ana ke puhi ohe ma ke kahua mau o Emma Kuea.
Ka Huakahi i ke Panalaau o na Mai.
Ma ka huakai a Rev. C.M. Hyde D.D. i hole ai i ke Panalaau Mai Lepera o Molokai i ka malama aku nei o Augate i hala, ua hoi mai oia me kekahi mau mea hoomanao waiwai nui o kona makaikai kino ana, a makou e lawe mai nei malalo iho:
Ua hookaawaleia na aina o Kalaupapa a me Kalawao e ke Aupuni Hawaii i ka makahiki 1866, no ka lawe ana aku i na mai lepera a malaila e nohoalii ai. O ka nui o keia mau aina o Kalaupapa a me Kalawao, ma kahi o ka 3,800 mau eka.
He wahi hapa uuku wale no o ke Panalaau kai kukuluia i na hale, oia kela hapa o ka aina he hapalua mile ke akea, e moe ana ma ke kumu o ka laina pali. He 178 o keia mau hale no ka Papa Ola, a he 231 e ona ia nei e na mea mai. Ua hookueneia me ka nana ia no na alanui kekahi, aole hoi e like me ke ano mau o na kauhale kanaka. O ke ano hale hookahi no e like me ko Honolulu a me na wahi e ae, he lanai mamua o ke alo, he elua keena a me na lanai mahope i paa i ka paku ia, a loaa he elua mau keena hou. O ka hapanui loa o lakou he pena hemo puna ia. Ma na pa liilii e hoopuni ana i na hale e maopopo ai ke ano o ka mea noho hale. He maikai a hiohio ko kekahi, a he waiho wale iho no ano hoihoi ole ke kekahi, a o ko kekahi me he mea la aole no he wahi malama ikiia. He mau malapua ko kekahi, he mau laau huaai, a me na lau hihi me he mea la he poe lakou i maa i ka noho ana hoomaemae a nanaina oluolu.
O ka waiho ana o ka aina, he ano hapa poepoe i hoopili ia aku i ka paia pali kiekie e palulu mai ana. O ka palahalaha, me he la aia ma ka elua a me ka hapalua mile mai ka hikina a ke komohana, a pela no hoi paha mai ka akau a ka hema. Ke ulu nei ka mauu manienie maluna o na wahi i paa ole i ka hoopuniia i ka pa e hoolawa ana i aina kula maikai e ola ai na poo pipi he 758 e ona ia nei e ka Papa Ola a me 694 mau lio a me na hoki, mailoko ae o ia heluna, ke ona nei ka Papa Ola he 75.
Aia ma Kalaupapa a me Kalawao ke ku nei he mau luakini pakahi no na hoomana Hoole Pope a me Katolika Roma, a me hookahi hale halawai Moremona ma Kalaupapa. Aia he 145 mau hoahanau o ka ekalesia Hoole Pope ma na luakini elua, aka ua oi aku mamua o ka papalua ia heluna, he mau hoahanau i ae ole e hookuu ia mai ko lakou mau ekalesia mai. He 80 ka averiga o ka poe hele mau i ke Kula Sabati ma Kalaupapa, a he 125 hoi ka poe hele mau i ke anaina pule kakahiaka, a o ka hapalua paha o ia heluna ma Kalawao.
He 92 wale no poe kino ola mai ole e noho ia ma ke Panalaau. Aia ke noho nei he 46 mau keiki mai ole me ko lakou mau makua. He 96 ka nui o na keikikane e noho nei maloko o Balawina Home ma Kalawao a he 114 mau kaikamahine ma Pauahi Home. O ka heluna nui o na mai ma ka wa o keia makaikai ana (Augate, 1895), he 431 wahine a me 619 kane. Mailoko mai o keia heluna, he 3 Beritania, 4 Geremania, 5 Amerika, he 7 Pukiki, 21 Pake a me 2 o na lahui e ae, a o ke koena aku, he Hawaii wale no.
Ua lawe ia i ke Panalaau mai ka hoomakaia ana e hookaawale ma Molokai, na mai he 4,904 ka nui iloko o na makahiki he umikumamawalu, e averiga ana ma ka 174 o ka makahiki. A ua make iloko o ia manawa na mai he 3,191 a he 247 i hookuu ia aohe mai.
O ka Mokolii ka mokuahi nana e halihali mau nei na eke leta, ka ai a me na ukana e ae i kela a me keia hebedoma.
Ke haawiia nei ka mai lepera i kela a me keia hebedoma, he 21 mau paona paiai, (a i ole ia he 8 a me hapa paona papaa berena me 1 paona kopaa, a i ole ia he 9 paona laiki, a i ole ia he 12 a me hapaha paona palaoa maka), he hapa paona sopa, he 1 a me hapaha paona paakai, he 1 kukaa ahi koe, he hapalua paina aila mahu, 7 paona io pipi a i ole ia he 5 paona kamano, koe ka umi dala mawaho ae o ka makahiki e haawiia ai e ke aupuni no ke kuai ana i ka lole a pela aku. He haawina nui maoli na lilo no ke aupuni ma ka bila haawina o na makahiki elua. O na lilo o ka makahiki e like me ia i ike a ma ka bila haawina i waiheia mai ma Maraki 31, 1894, he $88,210. O ka lilo no ke keikikane hookahi ma ka home Balauwina i ka makahiki, he $69; ko ke kaikamahine hookahi hoi ma ka home Pauahi he $78.
I na makahiki elua i pau he umi kumamaha mau poe kanaka e waho i komo wale mai iloko o ke Panalaau i hopu a hoopai ia, he 6 hoi mau mea mai lepera i hoao e mahuka. He hana nui ka hookekena ana i na kanaka Hawaii e kaawale mai ke kahua aku o ke Panalaau. O kekahi poe o lakou aole he poe mai, he poe manaka i ka hana no ko lakou ola iho, ua hoao e onou maoli ia lakou e hoopaaia ma ka heluna o ka poe mai lepera, i mea e loaa ai ia lakou ka haawina ai a ke aupuni e malama nei i kela a me keia hebedoma.
O ka hoao ana o kekahi mai e mahuka mai ke Panalaau aku ma ke kai, he nui ka poino, no ka mea, eia ka aina ke waiho wale nei i na makani akau, a o ka holo ana mai maluna o ke kowa i na mokupuni e ae, he nui na pilikia a kekahi e ae ole ai e hoonahea. O ke alanui olowi e pii ai iluna o ka pali, oia kekahi o na alahele a kekahi poe e ae ole ai ke hele. Na ka lawe leta me kona lio e hali mai i na leta i kela a me keia Poalua mai Kaunakakai mai, a ma kela Poalima keia Poalima e lawe ia ai na leta hoouna iwaho mai ke Panalaau aku. Aole he pilikia o ke ala e iho ai ilalo o ka pali. O na kualapa pali kuhoho e kai lalani la ma ka akau o Molokai, aole no he pohaku paakiki maoli aka he lepo, ua okiia he alanui anapuu, mai ka ekolu a hiki i ka eono kapuai ma kahi kuhoho o ka pali, a ua hana mau ia i mau ka maikai. Aka, he aneane no nae ka houpo, ina oe ma ua aia pali olowi la a nana iho ai ilalo o ka pali he 2000 kapuai mailuna iho a hiki ilalo i ka aekai. He elua makahiki i hala i ka hali leta ma keia aia pali, ua kaa mai kekahi pohaku a pa ma kona poo a make loa. Ma na wa malie mau, aohe no he pilikia o ka iho ana.
[E hoomau ia aku ana.]
I Mau Home Hawaii.
E ka "Nupepa KUOKOA,"
Aloha oe:
E ke mai ia'u e hoakaka aku i kekahi mau mea e pili ana i ke poo manao maluna ae:
Ina e nana aku kakou i ke au i hala no na makahiki he 70 i kaa hope aku; a me na makahiki he 30 e hiki mai ana, i lawa ai i keneturia o ko kakou noho ana lahui; alaila, e ike auanei kakou ina ma ke ano o na makahiki he 70 i hala ke ano o ko kakou alakai ana no ka noho ana no na makahiki he 30 e hiki mai ana, alaila e hiki aku ana kakou i ke kulana kakaikahi loa o na home Hawaii. O ka huaolelo "Home" he huaolelo haole ia; aka, ke laweia nei ma ke ano he huaolelo Hawaii; a o kona ano maoli, oia no, he hale kahi e noho ai kekahi kanaka a ohana paha; a ua pili no hoi i ka aina kahi e noho ai o ke kanaka. Aole au e olelo ana ma keia kukulu manao, ua nele maoli na Hawaii i na "home" ole; aka, e hoao ana au ma keia poo manao e hoakaka i kekahi mau mea; i mea e alakai ia ai na Hawaii i loaa ole na home i keia wa, e hooikaika i loaa ona mau home no lakou. No na makahiki mua o na makahiki he 70 i hala ae nei, mai ka wa mai i hiki mua mai ai o Kakinama ma na kapakai oluolu o Kailua i Hawaii, a hiki mai i ke au i nohoalii ai o Kauikeouli ka Lokomaikai maluna o keia Lahui Kanaka; aole no e hiki ke oleloia, ua loaa maoli i na Hawaii o ia mau la he mau home maoli no lakou; a mahope mai o ka M.H. 1845, ka wa hoi i haawiia ai ka pono i na kupa o ka aina e hookuleana i mau "home" no lakou; ia wa, ua nui a lehulehu na Hawaii i hookuleana i mau aina, a kukulu i mau Hale no lakou iho maluna o na aina a lakou i hookuleana ai; a oia mau Hale pili o ka wa kahiko i kukulu ia maluna o na aina i haawi lilo loa ia no lakou, ua hiki no ke kapaia he mau "Home"; a no lakou ka huina mawaena o 11,000 a me 12,000. Ke nana hoi kakou mai la wa mai a hiki i keia wa, he mea kanalua ole ke oleloia mamuli o ka hana a na keiki, a me na moopuna a me na hooilina e ae o ua poe 11,000 la, ua akaka loa, ua emi loa mai ka nui o na "Home" Hawaii i keia la; nolaila, i na o ke ano o ka noho ana o ka Lahui Hawaii ma keia mau makahiki aku he 30 e hiki mai ana, e hoohalike ana lakou me ke ano o ka noho ana o na makaiki he 15 a 30 i hala ae nei; alaila, aole auanei e loaa ka makemake o keia poe manao maluna'e. Ke ike nei hoi au ano o ke kulana o ka Lahui Hawaii iloko o ko lakou aina ponoi, ua nele ka hapanui i na "Home" ole no lakou iho. Ke nana ia ma ke kulanakauhale nei o Honolulu, e ike ia no; o ka hapanui loa o ka Lahui Hawaii, ke noho nei ma na Hale hoolimalima; a ua pili loa no hoi keia poo manao i na poe e noho ana ma Honolulu nei. Ke hoohalikelike i ka noho ana o na poe e noho ana ma Honolulu nei me ka poe e noho ana ma Honolulu nei me ka poe e noho ana ma na apana mawaho aku o Honolulu; ua akaka loa, ua oi maoli aku aku ka lako o na Hawaii ma na apana e ae i na Home mamua o ka poe e noho ana ma Honolulu.
Nolaila, e hoopili ana au i keia manao oia hoi; i mau Home Hawaii i ka poe e noho nei ma Honolulu nei i keia wa. Aka, he mea oiaio no, ma na kulanakauhale nui a pau o ke ao nei, he ano like no ka nele i na Home ponoi ole, me ko ka poe e noho ana ma Honolulu. Malia paha; he mea pono e ninau ia; Heaha la na poino ke hoomau na Hawaii i keia ano noho ana no kekahi wa hou aku? Ke hoao nei au e pane i ka ninau mua, i ku like me ia a'u i hoakaka ae nei mamua ae; o ka noho ana o ka hapanui o na Hawaii ma Honolulu nei; aia no ia ma ke ano hoolimalima; ke ike nei kakou, mamuli o ka makemake o na poe imi waiwai e mahuahua ko lakou mau puka; nolaila, ke hoomau mai nei no lakou i ka hookomo ana i na limahana i loko o ka aina; i na pela, alaila, e lilo ana ia i mea e kipaku mai ai i na Iapana a me na Pake hanalima ma na mahiko i keia wa iloko e ke kulanakauhale nei; o ka hopena maa mau hoi ma ia komo nui ana mai o na kanaka iloko o ke kulanakauhale nei a aina paha; e pii loa ana ka uku hoolimalima o na hale a aina paha, e emi loa mai ana hoi na uku hana i ka poe hana lima a poe e ae paha. Nolaila, ma ia ano, alua poino e loaa ana i ka poe i loaa oi i mau Home no lakou; oia hoi ka pii loa o na uku hoolimalima a me ka emi pu o na uku hana; a ia wa hookahi hoi e pii loa ana na mea ai. Aia manawa, aneane lilo i mea nui maoli na kela a me keia poe ohana ka hana e ka malama ana i ke ola o ko lakou mau ohana pakahi iho. A ke olelo nei au i keia la; i na e hoomau na kanaka Hawaii, i ko lakou noho ana o keia mau makahiki i hala, a oia ko lakou ano a kuleana e noho hou aku ai no na makahiki he 13 a 20 e hiki mai ana; alaila, e kau mai no auanei keia mau poino i hoakaka ia maluna'e maluna o ku'u Lahui Aloha. ua lohe nui kakou ma Amerika i ke kipaku ia o na Ilikini ma na kuahiwi o ko lakou aina; aka, aole au e olelo ana e kipaku ia ana na kanaka Hawaii ma na kuahiwi o ko lakou aina; aka, ke olelo nei au o na Hawaii "Home" ole e lilo ana ka hiki oleia lakou e uku i na uku hoolimalima ma keia hope aku, i mea no lakou e hele aku ai a noho ma na kulahiwi o Hawaii aloha. He nui a lehulehu na poino e ae e hiki ai ia'u ke hoakaka aku; aka, ua lawa keia mau hoakaka pokole maluna'e i mea e loaa ai kekahi mau noonoo ana i kela a me keia Hawaii no na poino no ka wa e hiki mai ana, maluna ona, a o kana mau mamo paha mahope aku ona. A ano, e hoao ana au e hoakaka aku imua o ku'u Lahui ponoi i kekai mau ala e loaa ai na Home Hawaii. I na e nana ia ma ke kulanakauhale o Honolulu nei; he nui a lehulehu wale o na kanaka Hawaii; i loaa na aku malama he $46 a oi aku; o na poe a pau oia ano, ua hiki no e loaa ia lakou i mau "Home" ponoi iloko o na makahiki elima a emi mai paha; e like me na Makai, na Kakauolelo o na Keena Aupuni a me na Hale Kalepa. E lawe ana au a hoakaka no ke kanaka he Makai oihana; Ina i loaa i ka makana he $40 o ka malama; ua hiki no e loaa iaia ka hale kupono nona, kana wahine a me na keiki no $5 o ka malama; alaila i $5 no ka poi no ka malama i $10 no ka ia a me na lilo liilii e ae; a i $10 no na wahi lole; ua like ia me $30 no na lilo apau; ma ia ano ua oluolu maikai no ke ola ana ma na ano apau; he mea pono hoi e komo pu na wahine ma keia hoao ana e loaa i Home ponoi.
Alaila, e koe ana he $10 i kela a me keia makai i ka malama hookahi; apau na makahiki elima, ua loaa ma ka waihona na dala he $600, me ia mau dala, ua loaa kahi apana aina kupono no $300 a $300 no kahi hale; a mahope aku o ia wa, ua loaa i kela makai he $15 hou no kona mau hoolilo mau; oia hoi na dala $5 o ka uku hoolimalima hale a me na dala he $10 i hookoe mau ia i kela a me keia malama a loaa ai iaia kela $600.
Eia hou: i mea hoi e loaa koke ai na home i keia wa i kekahi poe o na makai, a e kaulike ia no hoi ma kekahi ano i mea e kaulike ai na pomaikai penei paha: E hui i 10 makai ma kela a me keia hui, ma ka houluulu ana i $10 pakahi o ka malama, alaila, e loaa ana i $100 i kela a me keia hui i ka malama, iloko o na malama eono, ua loaa i kekahi makai kona home ponoi; aka e hana ia no nae ma ke ano i ole oia e hoohemahema i ka uku ana i kana $10 o ka malama. Ina e hui na makai a pau ma ia ano, alaila malalo mai o na makahiki elima e noho ana na makai iloko o ko lakou mau home ponoi.
Ina ua hiki ke hooponoono ia a loaa i na makai i mau home, alaila, he mea maalahi loa i na poe uku malama mahuahua ae ka loaa ana i mau home.
No ka poe i loaa ole na uku he $40 o ka malama; e loaa no ko lakou mau home no ka wa loihi aku, a o hoemi mai no hoi ko lakou mau lilo Mamuli o ko'u kamaaina i ka noho ana o na kanaka Hawaii ma Honolulu nei, ua hiki no i ke kane ka wahine a me na keiki ke ola me ka maikai maoli no $4 o ka pule, oia hoi i $16 no ka malama. Nolaila, ma ka hoohui ana i na mea a pau i hoakaka ia maluna ae, e loaa ana keia hoakaka pokole i mea e loaa ai na home Hawaii.
1. E hooikaika mau ke kanaka Hawaii i ka hana.
2. E hoemi mai i na lilo o ka noho ana.
3. E malama ma kahi o uhauha ole ia ai ke keena loaa o kela a me keia pule a malama paha.
4. E paa keia manao iloko e kou puuwai. I home no'u a me ko'u ohana.
5. I ka wa e loaa ai ke dala no ka aina, e kuai koke i ka aina.
6. I lawa ke dala no ka hale, e kukulu koke i ka hale.
7. Mai hoao e moraki i kou home i loaa ma ia ano.
Ma keia mau hoakaka maluna ae, ke lana nei kuu manao, e heluhelu ana kuu mau hoa Hawaii i keia kukulu manao a hoao e hooko i na kuhikuhi ana i hoakakaia maluna ae.
Ina pela, aole e hala i umi makahiki mai keia la aku, ua lawa ka hapanui o na Hawaii me na home no lakou iho.
Owau no me ka haahaa,
W.C. ACHI,
Honolulu, Sept. 25, 1895.
Ka Make ana o John Kalama Esq.
Ua hookuu mai i keia ola ana, ma ka hora 4 wanaao o ka la 20 o Sepatemaba nei, ka Mea Mahaloia John Kalama, kekahi o ko Maui mau Loio ike nui ia, ma kona home ma Makawao, a ua naue kololani aku la i ke aupuni uhane, mahope o ke kaa pokole ana aneane e hookahi hebedoma i ka mai he anu ma ke akemama, i loaa iaia ma ka la 14 keke no mamua iho, oiai oia e hoi ana ma Wailuku mai no ka home oiwi i Makawao.
Ua hanau ia ka mea nona keia kanaenae ma Pulehu, Kula, apana o Makawao, Maui, na G.S. Kalama a me kana wahine, i ka la 12 o Mei, 1832. Ua hoonaauao ia ma ke Kula Kiekie o Lahainaluna a puka mai. Mahope iho, ua komo oia i ke Kula Ao Lapaau malalo o Kauka G.P. Judd ma Honolulu nei e malama ia ana maluna ae o ka hale laau e ku nei ma ke kihi hema o na huina alanui Papu a me Kalepa. A i ka hookuuia ana, ua hele e lawelawe ma ia oihana hoola, aka makemake oia e loaa ka ike kanawai, a nolaila ua ao ia ike ma ka heluhelu kanawai e ae. I kekahi mau makahiki i hala, ua hele kaapuni oia me Keaweamahi a me ka laua mau wahine ma ka hana kokua i ke kinai waiona. Mahope mai, ua loaa iaia ka laikini loio, ua noho he lunakanawai apana no Makawao no kekahi mau makahiki.
Ua waiho iho oia mahope nei, he hoa make he wahine, he mau kaikamahine a me na kini o na makamaka a me na hoaloha, e u pu nona iloko o keia wa a ke kumakena a me ka luuluu.
Ma ia auina la no, ua malama ia he anaina pule kupapau maluna o kona kino holowaa maloko o ka betela o Pookela, e Rev. S. Kapu i kokua ia e na Rev. E.G. Beckwith, O. Nawahine o Waihee a me J.P. Kuia o Paia. Ia Hon. J.W. Kalua ka haiolelo no kona moolelo, a i na kaikamahine o Maunaolu ka hone ana o na himeni. A pau na hana ma betela, ua manele ia aku la kona kino make ma ka ilina, malaila e lolii ai a hiki i ka wa a ka anela e hoala mai ai i ko ke ao holookoa.
E hookipa aku ka waine kanemake, na kaikamahine a me na pilikana i ko makou aloha paumako no ka mea aloha i kiko e ia mai e ka make. Aloha ka makamaka o ka lehulehu o ia aina.
Ma ka halawai o na hoaloha o Mr. J. Kalama e noho ana ma Honolulu i malama ia ma ka auina la o Sepatemaba 24 no ka hoalohaloha ana no, ua hooholo ia keia mau olelo hooholo ia keia mau olelo hooholo hoaloaloha malalo iho, penei:
IA MRS. JOHN KALAMA,
Me ke aloha:--
Mamuli o kekahi lono i loaa mai, ua oluolu i ke Akua Kiekie Loa ma Kona Mana ike oleia, e lawe aku mai keia honua i ka hanu ola o kau kane i aloha nui ia John Kalama Esq., mai ko olua Home aku ma Makawae, Mokupuni o Maui, ma ka hora 4 wanaao o ka Poalima, Sepatemaba 20th, 1895; nolaila, o makou o kona mau hoalona oiaio e noho ana ma ke kulanakauhale o Honolulu, Mokupuni o Oahu, i akoakoa ma ke anaina i kahea ia i ka 24 o Sepatemaba, 1895, no ka hoalohaloha ana nona, ke hooholo nei;
1. Ke komo pu aku nei makou me oe kana wahine kanemake, me ke aloha paumako a me ka luuluu no keia haawina i loohia maluna ou a o kakou hoi a pau; a ke pule nei i ka Makua Lani, e hoomama mai i kou mau kaumaha a me kou ehaeha.
2. E hoounaia i kope o keia Olelo Hooholo i na Nupepa Hawaii o keia kulanakauhale.
O makou no me ka haahaa na hoaloha a pau o John Kalmaa Esq. e noho ana ma ke kulanakauhale o Honolulu.
Ma o
JOHN L. KAULUKOU, Lunahoomalu.
Ma o
JOS. U. KAWAINUI, Kakauolelo.
Hanaia ma Honolulu, Oahu, Sept. 24th, 1895.
I ka wehe ana o ka Aha Apana o Makawao i ke kakahiaka o ka la 20 o Sepatemaba nei, ua kapae ia na hana mau ma ke noi a ka Hope Makai nui W.H. King, a e malama ia i anaina hoalohaloha no ka make ana o Mr. J. Kalama, he lunakanawai i pau a he loio no keia apana. Ua haku ia e ka Aha na olelo hoalohaloha, a na J.P. Kapihe i heluhelu mai, penei:
OLELO HOALOHALOHA.
Aha Apana o Makawao }
Sepatemaba 20, 1895. }
MRS. S. SARAH KALAMA,
Me ka luuluu:--
Oiai, ma ka Lokomaikai o ka Mea Mana Loa, ua lawe aku Oia i ka Mea Mahaloia kau kane aloha John Kalama ma ka hora 4 o ka wanaao la 20 o Sepatemaba, A.D. 1895, Nolaila, e
1. Hooholoia: O makou o ka Aha Apana o Makawao, ka Hope Makai nui a me ka Puali Makai o ka Apana o Makawao, ke hui pu aku nei makou me oe e auamo pu i na luuluu a pau no ka hala ana'ku o kau kane a makua hoi i aloha nui ia.
2. Oiai, ma ka lawe ana aku o ka Mea Mana Loa i kau kane a hoaloha nui o makou, ua hoonele ia mai la keia Aha me ka Loio ole e kiai mau ana i ka hanohano o keia Aha.
3. Oiai no hoi, ma kona ano naauao a koikoi iloko o keia Apana, ua hoonele loa ia mai keia Aha i na alakai naauao a hoopono no na mea e pili ana i ka pono o ka lehulehu.
4. Oiai eia he kahu no keia Aha no kekahi mau makahiki i hala. Nolaila, ua komo kuhohonu makou a pau me ka luuluu nui nona, a nona no hoi makou e hoopoina ole ai. Na ke Akua e hoomama mai i ko kakou mau naau kaumaha, a Nana hoi e malama ia oe oiai oe e noho kane ole ana.
O makou iho no me ka naau kaumaha a luuluu nui.
Peter N. Kahokuoluna, Wm. H. King a me na makai o Makawao e Joeshp P. Kapihe, Paulo Kalai, D.H. Aukai, H. Kahiamoe, D. Nahaku, Bila Papoko, Fukuda Iapana, Thomas K. Pa.
Hoolaha Hou.
AHA HOOKOLOKOLO KAAPUNI APANA Eha o ko Hawaii Pae Aina. Ma ka hana o ke Kahu Malama Waiwai o Grace Black o Hilo, Hawaii.
Ma ka heluhelu a me ka waiho ana mai o ka palapala noi a me ka papa hoike helu a Joseph Nawahi, ke kahu malama o ka waiwai o Grace Black o Hilo, Hawaii, e noi ana e aponoia ma hoolilo he 8569 mailoko mai o na dala he 8720 i loaa iaia, a e noi ana e nana a aponoia keia mau mea, a e kauohaia e mahele i ka waiwai e paa nei iaia i ka poe kuleana, a e hookuu iaia a me kona mau hope mai ka noho malama ana.
Ke kauoha ia nei o ka Poalua, la 27 o Okatoba A.D. 1896, hora 10 a.m. imua o ia lunakanawai ma ke keena, ma ka hale hookolokolo ma Hilo, Hawaii, oia kahi a me ka manawa i kohoia ae ka hoolohe ana i ua noi la a me ka helu waiwai, a malaila a ma ia wahi e hele mai ai ka poe a pau i kuleana e hoike mai ina he kumu ka lakou e ae ole ia ai ua noi la, a e hoike mai i ka poe i kuleana i ua waiwai la.
Kakauia ma Hilo, Hawaii, Sept. 17, 1895.
Na ka Aha:
DANIEL PORTER, Kakauolelo.
2363-3
AHA HOOKOLOKOLO KAAPUNI APANA Ekahi o ko Hawaii Pae Aina. Ma ka hana o ka waiwai o Kaalalo k. o Honolulu i make.
Ma ka heluhelu a me ka waiho ana mai o ka palapala noi a me ka papa hoike helu a Kamakoe w. Lunahooponopono e ka palapala kauoha a Kaalalo k. o Honolulu, i make, e noi ana e aponoia na hoolilo h 8167 mailoko mai o na dala he 8107 i loaa iaia, a e noi ana o nana a aponoia kel mau mea, a e kauohaia e mahele i kawaiwai e paa nei iaia i ka poe i kuleana, a e hookuu iaia a me kona mau hope mai ka noho malama ana.
Ke kauohaia nei, o ka Poakahi la 28 o Okatoba, A.D. 1895, hora 10 a.m. ma ke keena ma ka hale hookolokolo ma Honolulu, oia kahi a me ka manawa i kohoia no ka hoolohe ana i ua nei la a me ka helu waiwai, a malaila a ma ia wa e hele mai ai ka poe a pau i kuleana e hoike mai ina he kumu ka lakou e ae ole ia ai ua noi la, a e hoike mai i ka poe i kuleana i ua waiwai la.
Kakauia ma Honolulu, Sepatemaba 25, 18@@
Na ka Aha:
J.A. THOMPSON, Kakauolelo
2363-3
AHA HOOKOLOKOLO KAAPUNI APANA Eha o ko Hawaii Pae Aina. Ma ka Aha Aha Hooponopono Waiwai. Ma ka hana o ka waiwai o Makala k. o Hilo, Hawaii i make.
No ka mea, ua waihoia mai imua o keia Aha ma ka la 3 o Sepatemaba, A.D. 1895, he palapala i oleloia oia no ka palapala kauoha hope loa a Makala k. o Hilo, Hawaii, i make, me kekahi palapala e noi ana e hooiaio iia ua palapala kauoha la a e hoopukaia na palapala hookohu lunahooponopono waiwai ia Moke Kaneapua i waihoia mai e Moke Kaneapua.
Ke kauoha ia nei o ka Poalua, la 22 o Okatoba A.D. 1895, hora 10 kakahiaka o ia la, ma ke keena hookolokolo o ua Aha la ma Hilo, Hawaii, oia kahi a me ka manawa i koho ia no ka hooiaio ana i ua palapala kauoha hope la a me ua palapala noi la. A malaila a ma ia manawa o hele mai ai na poe a pau i kuleana e kue i ua palapala kauoha la, a me ka ae ana i ka hoopuka ana i na palapala hookohu lunahooponopono waiwai.
Hanaia ma Hilo, Hawaii, Sept. 8, 1895.
Na ka Aha:
DANIEL PORTER, Kakauolelo
2363-3
Hoolaha a ka Lunahooponopono Waiwai.
Ua hookohuia mai ka mea nona ka inoa malalo iho e ka Aha Kaapuni Apana Eha i Lunahooponopono no ka waiwai o J.K. Mokuola, i make o Honokaa, Hamakua, Hawaii, nolaila ke hoolahaia aku nei ka lohe i na mea a pau he mau koina ka lakou i ka waiwai o ka mea i make, e waiho koke mai me na hooiaio kupono maloko mai o na malama eono, a i ole ia e hoole mau loa ia aku no, a o na mea a pau i aie i ka mea i make, e hookaa koke mai i ka mea nona ka inoa malalo iho me ka hookaulua ole.
CHARLES WILLIAMS, Lunahooponopono Waiwai o J.K. Mokuola i make.
Honokaa, Hawaii, Sept. 14, 1895.
2363-4
Hoolaha Hoopau Hui.
O F da Camara, M. Machado a me J. Vierra, ka poe i lawelawe iho nei ma ka hana a me ka pipiele wai momona a me wai paipai e ae ma Hilo malalo o ka inoa hui o F. da Camara a o M. Machado a me J. Vieira ke hoomau aku ana i ka hana me ka uku i na aie a pau.
Kakauia ma Hilo, i Sepatemaba 7, 1895.
F.M. WAKEFIELD, Loio no F. da Camara & Co.
2363-3
Hoolaha Lunahooponopono Waiwai.
MAMULI o ka hookohuia ana o ka mea nona ka inoa malalo iho i Lunahooponopono ma ka Waiwai o D W Kalua i make kauoha ole. Nolaila, ke hoolahaia aku nei ka lono i na poe a pau i kuleana e waiho mai i ka lakou mau koi iloko o na mahine eono mai keia la aku ma kona wahi noho ma Komoiliili, Honolulu Oahu: a o ka poe i aie i ka mea make, e hookaa koke mai lakou ano, E hole loa ia no na koi i waiho ole ia mai iloko o na mahina eono.
MIRIAMA KALUA,
Lunahooponopono o ka waiai o D.W. Kalua i make.
2360-3
Ed. A. Willams C.E. Williams
C.E. WILLIAMS & SON.
Hookahi Wale no o Laua Halekuai.
Aole lana i pili iki me kekahi Hale Hoolako hale a me Hale Hana Pahu Kupapau e ae, aia ma ka Hale Helu 611 Alanui Moi, mauka mai o ka Pa Kuai Papa o Lui me Kuke.
Hana Pahu a me laloa Kupapau,
Na pahu kupapau mai ka 83.00 a pii aku iluna.
Kaa kupapau pakahi lio oi o ka maikai ma ke Kaona iho, he $3.00.
Kaa kupapau palua lio oi o ka maikai ma ke Kaona iho, he $3.00.
@@@@
GOO KIM
411 Alanui Nuuanu.
MAI KEIA POAONO AKU, AUGATE 31, E kuai hoopoho a makepono loa aku ana ma ka Halekuai o Goo Kim, a nolaila e hele koke mai na makamaka oiai ka wa makepono. O ke kalakoa i kenikeni o ka iwilei mamua, O keia wa he 20 iwilei no ke $1.00. Na keokeo maikai a me na kukaenalo, like pau loa. Ahinahina 8 iwilei $1.00. Na lolo paa o na @@@, na kuka, na wawae a me ko na wahine, aole e pau i ka helu pakahi aku, e kuai hoemi loa ia aku ana.
2361