Ka Nupepa Kuokoa, Volume XXXIV, Number 43, 26 October 1895 — Page 3
| This text was transcribed by: | Kara Ueki |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA HUI ALAHAO ME AINA O OAHU
MANAWA HOLO.
@ai a Mahope aku o Iulai 5, 1895.
A.M. A.M. P.M. P.M.
HAALELE IA HONOLULU 6:@0 9:15 1:45 5:10
HAALELE IA MA@A@N 7:@0 9:@@ 2:2@ 5:@@
HAALELE WILI O EWA @:1@ 10:1@ 2:@@ 6:1@
HIKI I WAIANAE - 10:@@ - 6:@@
HAALELE IA WAIANAE 6:44 - 1:@2 -
HAALELE IA WILI O EWA 7:19 9:10 2:07 3:@1
HAALELE IA MA@A@A 7:@0 9:@@ 2:@@ 4:22
HIKI I HONOLULU 8:22 10:30 3:11 4:55
Ma nā po Poaono a me Sabati e hiki ana ko ka Wili o Ewa mai kaa i Honolulu ma ka @:@@ aole ma ka 4:@5 P.M.
E lawe ana na kaa ahi hali ukana i na kaa ohua o ka pepa ekahi.
G. P. DENSION,
Luna. F.C. SMITH,
Luna Kuai Palapala Holo.
NU HOU HAWAII
E noho loa ana o Dr. J. K. Smith o Koloa ma Honolulu nei.
Ua huli hou mai o Prof. Berger o ka Puali Bana ma ka Australia o keia pule. Hele oia a ike i kona one hanau a huli hoi no ke one hookama.
O J. T. Walakahauki ka mea e noho Peresidena kuikawa ana no ka Papa Ola, mamuli o ke kaawale ana aku o W. O. Smith no kekahi manawa loihi.
Ma kekahi o na kolamu o keia pepa e heluheluia ai ka moolelo o ka make walohia ana o Joseph U. Kawainui, ka Lunahooponopono o ka Nupepa KUOKOA.
Ma na lono mai Molokai mai, ua hoea loa na Kia ahiu ma kai i keia wa. Nui ka poino o na laau i ke nali ia e keia holoholona, pau pu me na kumu lehua.
Ua uku iho nei ka Papa Ola i na poe maiai Hawaii no na loi kalo a me laiki i hanaino ia malalo o ka lakou kauoha i ka wa i laha iho nei ka mai kolera, he $3,600 no na kalo, a he $600 no ka laiki.
Ua kokoke e pau loa na hemahema o ka luakini o Kawaiahao e hana hou ia nei. Ma kekahi po o keia pule, ua hoomalamalama ia o loko me na kukui uila hou, a he nani olino maoli ko ke nana aku.
E lilo aku ana o Lunakanawai Kaapuni H. E. Cooper i Kuhina o ko na Aina E ke holo aku o Hon. F. M. Haki i Wasinetona. He nui na inoa e wawaia nei no ke Kulana Lunakanawai Kaapuni.
I kela mahina aku nei, ua holo kino aku he ekolu poe alii o ka aoao Hema o Aferika e kukai olelo me Victoria ma Ladana. Mahalo lakou i ka hana a na misionari mawaena o ko lakou lahui.
Ua lilo iho nei ma ke kuai ia F. G. Walker ka moku kalepa kahiko "Sumatra" e ku nei i ke awa no na huina dala &750. E wawahi aku ana o Walker a kuai i na papa i wahie. Ua manaolana oia e puka ana no oia.
Ua hoole akea ae ko Kuhina Iapana ma Wasinetona aole makaleho o Iapana ia Hawaii nei a ua hoole ponoi mai no hoi ke Kuhina Iapana i Hawaii nei, aole ona upu e ku mai ana kekahi mokukaua o kona aupuni ia nei.
Ua makemake ia na lala apau o ka Hui Repubalika Hawaii e akoakoa ae ma ko lakou keena halawai mau ma ke kihi o na alanui Nuuanu a me Moi ma keia ahiahi Poalua ae, Okatoba 29. He halawai ano nui ke malama ia ana.
Ma ka halawai a ka Papa Ola i ke ahiahi Poakolu iho nei, ua hookoku ia o Dr. Alvarez o Waialua no ke kahua mai ma kalihi, e hele naʻe oia e ao hou ma na aina e. O Dr. Wayson aku ana kona pani ma Waialua.
Ua lilo mai nei ka eo o ka hapa nui o na heihei kukini a me lele pa i na keiki Amerika, a ua haule ino na moho a Enelani i hoouna mai ai e paio. Lilo ka eo o ka heihei 100 la i ke keiki Amerika iloko o 9 5@8 sekona. he makani paahiohio ka hoa like. Ka heihei lele pa, eo no i ke keiki Amerika he 6 kapuai me 5 iniha. He kohu kia maoli ka lele ana. He 23 kapuai hoi ka Kaohele i lele ai i Molokai, i ka palahalaha nae ʻia.
Ma ka la 6 o Novemaba ae nei e mareia ai o Miss Consuelo Vanderbilt o Amrika me ke Duke o Marlborough o Enelani. He $10,000,000 ka loaa makahiki o keia kaikamahine. He 4,000 palapala kono i hoopuka ia i keia wa.
Ua lilo ia J. S. Martin, kekahi haole humuhumu lole o keia kulanahauhale, ma ke koho haahaa, ka humhumu ana i na paa lole hou o na koa o na Puali G. (Hawaii) ame H. He $1.50 ko ka lole wawae, a he $6.20 ko ke kuka.
Eia ka mea eli awa ke hoomaka mai nei e eli makai iho o ka makeke kahiko. E hoomau aku ana oia i ka paeli ana a hiki i ka uapo o Haaliliamanu. Makai iho, ma kahi pili me ka uapo o Ka Hui Alahao o Oahu e hoahu ia ai ka lepo e eli ia ai.
Maikai ka D. L. Keliipio nana ana i na i'a e kuai ia mai nei i ka makeke hou. No ia kumu, he mau i'a hou wale no ia e kuai ia mai nei, aole hei o na i'a ano melumelu e like me mamua. E hoomau aku i ke kiai pono ana i ke ola o ka lahui.
I ka mokukaua Amerika Olympia aku nei i Lahaina, ua hamu ae kona poe luina i na hua moa o Lahaina a pau a ua neoneo o Lahaina i ka hua ole i kona wa i haalele aku ai ia awa. hookahi kauoha ia ana he 430 kakini hua, like me 5,160 hua moa. He laki ia no na poe hanai moa olaila.
Mahope iho o ka piha ana o na makahiki he umikumamalima o ko Kapena Morse noho kapena ana no ka mokumahu Alameda e holoholo nei mawaena o Kapalakiko, Honolulu nei a me Australia, ua waiho aku oia i kona kulana kapena, a ua pani ia kona hakahaka e Kapena Ottend@f oluna o ka mokuahi Zealandia mamua. Ua mahui wale ia mai no, ua ohu ka oia i ka lei i kela huli hoi ana aku nei i Kaleponi, a ua ano luhe ka i ka wai.
O kela haole nona ka halekuai ko kanake a me kuai buke ma alanui Hotele o W. H. Johnson, i kii ia mai ai e ka makai kiu Wylie a loaa i Honolulu nei mai Musatine, Iowa, no ka hewa aihue i ka waiwai i haawiia e malama, ua ae i ka hewa ma kekahi kumu hoopii ma ka aha o Iowa a ua hoopaiia mai nei he hoopaahao ma ka hana oolea no umikumamalima malama.
Ke Kula Hanai o Hilo.
MR. LUNAHOOPONOPONO:
E oluolu oe, i na he mea ia e pomaikai ai kou poe heluhelu, e hookomo iho ma kekahi o na kolamu o ke KUOKOA i ka manao malalo iho nona ke poo maluna ae.
Ma ka lokomaikai o Rev. S. L. Desha, kahu o Haili ma Hilo, ame na kumu o ke Kula Hanai o Hilo, ua loaa ia'u ka hoomaikaiia ma ke kula i olelo ia, a no lakou au e pahola aku nei i na hoomaikai nui ana malia o lilo keia hoike ana ma ke akea i mea e pomaikai ai ka lehulehu.
O keia kekahi o na kula kahiko o keia Paeaina, a malaila i hoonaauao ia ai kekahi heluna nui o na keiki Hawaii, i ao ia ma ka olelo makuahine, a ua loaa ia'u kekahi mau mea waiwai ke pono ke hoike aku imua o ka lahui e pili ana i kekahi mau ike e ao ia nei ma keia kula i keia wa, malia o lilo ia he mau mea e hauoli ai na makua he mau keiki ka lakou, na haumana kahiko i hoonaauao mua ia malaila, a me ka poe a ae aole i hoomapopo i ke kulana o keia kula i keia wa.
O na ike ano nui a'u i makemake ai e hoikeike aku oia, na ike hana lima a me ike mahiai.
NO KA IKE MAHIAI.
Ma keia kula, ke ao ia nei ka maiai kalo, ka mahi kope, ka mahi ko a me ka mahi pia, a ua hoolako pu ia kekahi mau mikini no kekahi o keia mau oihana. No ka mahi kalo, he hana kahiko no ia ma ia kula mai mua loa mai, aka he mea pono e makaukau na keiki ma keia oihana mahi, no ka mea he oihana kumu ia mai ko kakou mau kupuna mai a hiki i keia wa, a o ke kalo no ka kakou ai kumu; aole e hiki i ke kalo ke nalo ae mai na Hawaii ae. He pono i na keiki ke ike i na loina o ke kanu ana, ka hoomaemae ana a me ka hoomaa ana ma ke ano hou, a hoomama, a hoopokole hana. Eia ka mea pou a'u i ike ma keia kula, o ka wili ana i ke kalo a lilo i poi. Ua pau ke ano kahiko, oia ke kui ana ma ka papa me ka pohaku; a o ke ano hou i keia wa, he mikini wili poi.
He wahi mekini uuku wale no keia i hana ia me ka laau, a na ka wai e hooniniu i kona huila. He poke laau paepae keia, he elua paha kapuai ke ana waena, a he ekolu paha kapuai ka loa; eia kona kiekie ua pao la o loko a hakahaka me he barela la, a ma na paia maloko, he mau nihoniho ano like ole. Ua hookomoia iloko o keia hakahaka kekahi poke laau okoa e ae me kona mau nihoniho ano like ole a puni kona ili hualala, a ua hoopaa ia ma ke poo maluna o keia poke he huila nana e hooniniu iaia, a o ka anai ana o na nihoniho o keia mau poke, oia ka mea e wali ai o ke kalo a lilo i poi. Ua hanaia he puka ma ka aoao kahi e hookomo aku ai o ke kalo, me ka pipi pu ana aku i wai liilii ma ia puka, a malalo ae o keia mikini, ua kukulu ia ka barela, a e kulu mau ana ka ai wali iloko o ke ano paakiki e pono ai no ke kupele lima aku.
No ka hoomoa ana i ke kalo, me ka mahu no. Ua hoopiha ia kekahi kula hao huinaha, poi ia a paa, a hookuu ai i ka mahu ma ke paipu mailoko mai o ka ipu mahu nui, a pele e hoomoa ia ai.
NO KA MAHI KOPE
Ke ao ia nei keia kula i na loina o ka mahi kope, ke ano o ke kanu ana, ke ano o ka hehu, ke ano o ka makalua, ke ano o ka omuo ana i mea e mau ai o kahua o ke kope, a e ao ia aku ana lakou i ka ohi ana a me ka hoomaemae ana ma keia mua aku.
He wahi mala kope no lakou, hookahi paha a oi aku eka; elua ano kope e ulu ana - he kope hou loa no ekolu paha malama, a he kope ua hua.
O na kope kahiko, ua hoike mai lakou i ka makaukau o ka poe nana i kanu ia lakou. Ua kanuia ma ka lalani pololei oa o ka eono a ehiku paha kapuai ke kaawale, eono kapuai ke kiekie, punonohu ka ulu ana, ua mu-o ia oluna, a ua hele a luluu i na hua e hoomaka mai ana e pala kekahi. A ke hoike ae nei au i ko'u mahalo ia Rev. S. L. Desha a me David Kapahee, kekahi o na kumu ma ia kula, i ko laua hoomakili ana mai i kekahi mau loina o ka omuo ana.
He hookahi mikini i loaa ma keia kula, oia ka mikini hoomaemae i ka ili elua, oia ka ili o loko; a e loaa aku ana ka mikini o ka ili ulaula ma keia mua aku ke nui ke kope.
NO KE KO A ME KA PIA.
He mala ko no ka lakou a ke ao ia nei na haumana ma na loina o ke kanu ana, a koe aku ka hoolilo ana i kopaa, oiai he nui loa ke dad e pono ai no na lako o ia oihana, aka aole no e nele ana ko lakou ao ia i na kumu mua loa o ka loaa ana o ke kopaa.
NO NA IKE HANALIMA
He hale hanalima nui ko keia kula e ku nei, aia maloko o ia hale hookahi na mea paahana like ole. Na mea paahana kamana, amara, he mikini olo, he mikini pai, he mikini kukui uila, he mikini hau a ma na lako pai palapala.
Ua ao ia kekahi keiki, oia o Pio ma ka hoohana ana i keia ma mikini a pau, a ua loaa iaia ka makaukau ma keia mau hana, a he kumu waiwai hoi nona.
Ua noi ia aku kona oluolu e hoikeike mai i kona hoohana ana i keia mau ike. Ua hoomaka oia ma ke olo wahie, a ua ike ia ka uwe ana o ka pahiolo e like me kahi o Hapa i Honolulu. I ka mikini kukui uila, ua hoopuiwa ia na kumu oiai ma ka hala noho, i ka huila o ke kukui i ke awakea, aole hoi i ka wa mau o ka po. I ka mikini hau aku hoi, ua ike ia ka lana ana mai o ka pauku hau iloko o ka wai. Me keia mau mea ua hoopiha ia ka puuwai o ke kamahele ma ka hauoli nui i ka ike ana i kekahi keiki Hawaii, ua loaa ka makaukau ma keia mau ike, a e kaena auanei ko Puna, "o Puna no ka oi," no ka mea no Puna paiaala ua keiki la.
Me keia wahi mikini kukui uila, ua hoomalamalama ia na hale a pau o ke kula, a me keia mikini hau no hoi, ua hoolawaia ke kulanakauhale o Hilo me ka hau. Ma kekahi aoao o keia hale hana, ua hookaawaleia he keena pai palapala, a aia no hoi maloko o ia keena na mea paahana a pau o ia oihana.
NO KA HALE KULA.
Ua alakai aku kekahi o na kumu oia o David Kapahee i ka malihini ma ka hale kula, a ua ike hapa i na na mea i ao ia. Aia ma na papa eleele a aweawe ana na hua kakaulima; he mau poke laau e mokaki ana ma ka papahele, ua kolikoli pahi ia he mau kii maluna kupono no ke pai ma ka pepa. He pauku kaulahao laau, 1@ paha kapuai ka loa, i kolikoli ia mailoko mai o kekahi pauku laau. He mau ohe keleawa no ka hana puhi ohe o ke kula.
O keia na mea a'u i ike maka ma keia kula; malia, e like me ko'u hauoli, pela e hauoli mai ai na makua mea keiki he mau keiki ka lakou e noho nei ma ua kula la; a i ole ia, he mau makua mea keiki e ae paha e noho mai nei ma o a maanei o ka aina, a e manao ana e ao ia ka lakou mau keiki ma keia mau ike, a i ole ia o kekahi paha o keia mau ike. E pono ke noonoo i keia wa a e hookomo i keia kula. Ke ao ia nei keia kula ma na ike ae ae e like me na kula e ae ma ka olelo Beritania, a ua hai ia mai ia'u he $25 ka uku makahiki, a malalo mai paha ma kekahi ano e ae, e like me ke kuka ana me ka Papa Kahu Waiwai o ke kula.
Ke hoolana aku nei au i ka manao o na makua mea keiki o Na Kona, ka aina kaulana i ke "kope ono," aole i ko Na Kona wale no, aka, i ko ka Paeaina a pau e hoomahui, a e hoao e hoouna i kekahi, a mau keiki paha ma keia kula, a malaila e hoomaamaa ia ai lakou i na loina o ka mahi a me ka hoomaemae kope.
He mea nui ka loaa ana o ka makaukau ma keia oihana; oiai, ke nee awiwi nei ka holo ana o keia oihana iloko o ka aina, a mamuli ola kumu, ua pii pa-umi ae ka uku hoolimalima ame ka waiwai io o na aina o Na Kona i keia wa, i ko ka wa he elima makahiki i hala ae nei. I ka wa e puka mai ke keiki mai ke a kula mai me ka loaa o keia makaukau, e hoomaka koke e hana maluna o na wahi apana aina kuleana o ka makua, a ina ua nele, e haawi i kana mau hookauwa ana malalo o kekahi me kanu kope a hui paha, me ka nana ole aia a nui ka uku, laila hana; aka, na ka ike hana e alako mai i ka uku maikai, a e hoomanao i ka rula paa loa, "E uku ia kela me keia mea e like me kana hana."
Eia kekahi mea e pono ke noonoo ia, a he mea e pomaikai ai ma keia kula, o ka hoohana ia ana o na keiki ma ke kula ma kela mau hana like ole, he mea ia e maa ai lakou i ka hana mau, a ano nalo aku ka ohea, ke ano palaualelo, hoohanohano ame ke ola kino nawaliwali.
O kekahi mau makua, ua hemahema loa, aole i ao aku i na keiki i ka hana lima; he mau keiki akamai nae ma na ike buke; a i ko lakou hemo ana mai ke kula mai, ua makau lakou e lawelawe i na hana lima; aka, kali wale aku o ka haawi ia mai o na hana mama, a he kuhihewa nui kela.
Nolaila, e loaa ana he ekolu mahele nui e loaa ana ma keia kula. 1 O ka ike Palapala e like me na kula e ae. 2. O ka ike Hana. 3. O ka maa i ka hana.
T. K. R. Amalu.
Hookena, S. Kona, Sept. 1, 1895
KELA ME KEIA.
Wasinetona, Okatoba 16. - He $182,460,921 ke koena dala ma ka waihona o ke aupuni i keia la, a he $93,130,254 dala gula mawaho ae o keia huina.
Ma na lono hope loa mai o ka Poaha nei ma ka Alameda, ua hooia loa ia mai ka pepehia ia ana o ka Moiwahine o Corea. Ua hoike ae ka hooilina alii, oia kekahi me kona makuahine i ka wa i pepehiia ai. Ua hoouna malu mai oia mai ka halealii mai i na kuhikuhi e loaa ai na poe Iapana lopa na lakou i hana kela hana ekaeka. Ua hookumu ia keia hana e na poe luna Aupuni o Corea i hoopau ia a na lakou i hoolimlima i na Iapana e hooko i ko lakou makemake.
Ua hoea aku o Kamura me kekahi Komisina mai Iapana aku, a na lakou e imi pono aku na poe i komo iloko o keia hana.
Aole keakea o Rusia i na koa Iapana i ko lakou hoao ana e kinai i ka haunaele.
E heluhelu i keia malalo iho i lawe ia mailoko mai o ka palapala a Chas. M. Gutfield o Reedley, Fresne Co. Cal.
"Me ka hauoli au e hoike aku nei ma ko'u inu ana no hookahi la i ka CHAMBERLAIN'S Laau Kunu, ua hoola i ke kunu koikoi i loaa ia'u. Ua nalulu ino loa ia ko'u poo a hiki ole ke moe i ka po. Ke hoikeike aku nei au i keia laau laapau ola. O ke anu i kokoke loa e komo iloko o ke poo a mahope hoohele aku i ka puu a me na ake. Ma o ka inu ana la i keia laau i ka wa koke e loaa ai i ke anu, e hoola koke ia i ka wa pokole a keakea ia ke komo loa ana aku iloko o na ake. E loaa keia laau ma na Halakuai Laau Lapaau a pau, a o BENSON SMITH & Co. na Agena ma ko Hawaii Paeaina. tf
Arago, Coos Co., Oregon Nov. 10, 1893.-Ke makemake nei au e hoike aku ia oe i ka waiwai nui o ka Chamerlain's Pain Balm laau maikai i hoola ai i ka'u wahine. Ua loaa iaia ka ma'i rumatica ma na lima no eono malama, a ua hoao oia i na laau lapaau i kuhikuhi ia no ia ma'i, aka aohe nae ouolu iki ahiki i ka wa i hamo ai i keia laau Pain Balm; hookahi wale no omole o keia laau, ua ola loa oia. Nolaila ke lawe nei au i keia wa ma ka hoikeike ana aku he laau ola keia no ia ma'i. Owau iho no, o C. A. Bullord. He 50 keneta a he $1.00 o ka omole, a e kuai ia e ka Halekuai Laau Lapaau o Benson, Smith & Co. na Agena.
Ka Laau Lapaau Oi Loa o ke Ola no ke Korela
Ke lawelawe koke a pololei ia hikiwawe loa ke ola. Ua ike piha ia keia i ka wa i laha ai ke Kolera ma Nu Ioka i ka 1866. E hoi koke ma ka moe i ka wa koke e hoomaka iho ai na hoailona, moe pela me ka malie a inu i ka Chamberlain's Colie Cholera and Diarrhoea Remedy ma ka palua puna i ka manawa hookahi a hiki i ka pau ana o ka eha, alaila i hookahi inu ana aku mahope o kela me keia naha ana i oi ae ka hana i ka mea maa mau. E hoouna koke i ke kauka, aka me ka inu no i ka laau e like me kela kuhikuhi ae la a hoea mai ke kauka. E malama mau la keia laau ma ka hale me ka makaukau no ka hoohainu. E inu koke i ka laau iloko o elima minute mahope iho o ka hookau ana iho o na hoailona. O ka Chamberlain's Colie, Cholera and Diarrhoea Remebdy, oia ka laau oi loa o ke ola i ike ia, aole wale no na ano lahilahi o ka opu eha, aka no na ano Kolera Asia awahua a pau. E kuai ia ma ka Halekuai Laau Lapaau o
BENSON, SMITH & Co.
2566-1m Honolulu.
Hoolaha Hou.
I LOKO O KA AHA HOOKOLOKOLO KAApuni Apana Ekahi o ko Hawaii Pae Aina Ma ka hana o ka waiwai o Kuanalewa (w)i make kauoha ole.
Ma ka heluhelu a me ka waiho ana mai o ka palapala noi a Namokueha (k) o Honolulu, e hooia ana ua make kauoha ole o Kuanalewa (w) o Honolulu ma keia kulanakauhale ma ka la 21 o Augate, M. H. 1863, a e noi ana e hoopuka ia na Palapala Hooponopono Waiwai ia A. G. M. Robertson.
Nolaila, ke kauohaia nei, o ka POALIMA, la 22 o NOEVEMABA, M. H. 1895, ma ka hora 10 kakahiaka, oia ka wa e hoolohe ia ai ka palapala noi ma ka hale Hookolokolo o keia Aha ma Honolulu, a ia wa, a ma ia wahi e hele mai ai na poe a pau e hoike ina he kumu kupono ka lakou o ae ole ia ai ua noi la.
Kakauia ma Honolulu, Okatoba 22, 1895.
Na ka Aha:
J. A. THOMPSON,
2569-3 Kakauolelo.
I LOKO O KA AHA KAAPUNI O KA APANA Ekahi o ka Mokupuni Hawaii. Ma ke Keena. Ma ka hana o ka Waiwai o Honuakaha (k) i make kauoha ole.
Ma ka heluhelu ana a me ka waiho ana mai o ka palapala noi a Kalehua (w) o Honolulu, e olelo ana, ua make kauoha ole o Honuakaha (k) o Honolulu, ma Honolulu nei ma ka la 27 o Iune, 1886, a e noi ana e hoopukaia, na Palapala Hooponopono Waiwai iaia.
Ke kauohaia nei o ka POAKAHI, la 25 o NOVEMABA, 1895, hora 10 a.m., maliala a ma ia wa e hooloheia ai ua palapala noi la imua o ka Aha o keia Hale Hookolokolo, a ia wa e akoaakoa ae ai na poe a pau e hoike ina he mau kumu kupono kekahi e ae ole ia ai kela palapala noi.
Kakauia ma Honolulu, Okatoba 22, 1895.
Na ka Aha:
J.A. THOMPSON,
Kakauolelo o ka Aha Kaapuni o ka Apana Kaapni Ekahi.
2569-3
I LOKO O KA AHA KAAPUNI O KA APANA Elima. Ma ke Keen. Ma ka hana o ka waiwai o MAHOE (w) i make kauoha ole. Imua o Lunakanawai Hardy.
KAUOHA O KA HOOLAHA O KA PALAPALA NOI I LUNAHOOPONOPONO WAIWAI.
Ma ka heluhelu a me ka waiho ana mai o ka Palapala noi a Haili (k) o Koloa, e hoike ana ua make kauoha ole o Mahoe (w) o Koloa ma ia wahi ma ka la 6 o Sepatemaba, 1894, a ua waiho iho he waiwai iloko o keia Pae Aina e kupono e hooponoponoia, a e noi ana e hoopukia ka palapala Hooponopono Waiwai ia J. K. Farley o Koloa.
Ke kauohaia nei, o ka POALUA, la 19 o NOVEMABA, 1895, hora 10 A.M., oia ka wa e hooloheia ai ua Palapala noi la ma ke Keena Hookolokolo o ia Aha ma Nawiliwili, a ma ia wa, a malaila, e hooloheia ai, ina ho mau kumu kupono e ae ole ia ai ka hoopuka ana o ua palapala noi la, a e hoolahaia keia kauoha iloko o ka KUOKOA ma Honolulu no ekolu pule.
Kakuia ma Lihue, Kauai, Okatoba 19, 1895, (Kakauianoaia)
JACOB HARDY,
Lunakanawai Kaapuni o ka Apana Elima, Ikea
R. W. T. PURVIS
Kakuolelo o ka Aha Kaapuni o ka Apana Elima. 2569-3
AHA HOOKOLOKOLO KAAPUNIIAPANA Ekahi o ko Hawaii Pae Aina. Ma ka Hooponopono Waiwai. Ma ka hana o ka waiwai o KEAKA (w) o Honolulu i make.
Ua waiho ia mai he palapala i olelo ia oia no ka Palapala Kauoha hope loa o Keaka (w) o Honolulu i make ma ka la 14 o Okatoba A.D. 1895, imua o ua Aha hooponopono waiwai la, a me ka palapala e noi ana e hooiaio ia ua palapala kauoha la, a e hoopuka ia na palapala lunahooponopono waiwai ia Enoch Johnson i waiho ia mai e ua Enoch Johnson la.
Ke kauoha ia nei o ka POALIMA la 15 o Novemaba A. D. 1895 ma ka hora 10 A.M. o ia la, ma ke Keena Hookolokolo o ua Aha la ma Aliiolani Hale, oia kahi a me ka manawa i kohoia no ka hooiaio ana i ua palapala kauoha la a e hoolohe ai i ua noi la, a malaila a ma ia manawa e hele mai ai ka poe a pau i kuleana e kue i ua palapala kauoha la a me ka hoopuka ana i na palapala lunahooponopono waiwai.
Hanaia ma Honolulu, Okatoba 14, 1895.
Na ka Aha:
GEORGE LUCAS,
2568-3T Kakauolelo.
AHA HOOKOLOKOLO KAAPUNI APANA Ekahi o ko Hawaii Pae Aina. Ma ka Hooponopono Waiwai. Ma ka hana o ka Waiwai o JAMES KUKONA o Honolulu, Oahu i make kauoha ole.
Ma ka heluhelu a me ka waiho ia ana mai o ka palapala noi a Kahoohanohano (w) o Honolulu e hoike ana ua make kauoha ole o James Kukona no Honolulu ma Honolulu i ka la 1 o Ianuari M. H. 1895, a e noi ana e hoopuka ia ka Palapala Hookohu Luna Hooponopono Waiwai ia A. P. Haiola.
Ua kauohaia o ka POALIMA ka la 15 o Novemaba M. H. 1985, ma ka hora 10 kakahiaka, oia ka manawa i koho ia no ka hoolohe ana i ua noi la ma ka Hale Hookolokolo ma Honolulu, a ma ia manawa a ma ia wahi no, e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi la.
Kakauia ma Honolulu, Ko Hawaii Pae Aina, Okatoba 15, M. H. 1895.
Na ka Aha:
J. A. THOMPSON,
2568-3t
Hoolaha Hooko Moraki me Kuai.
KE HOOLAHA AKU NEI MAMULI O KA mana hooko kuai i hoakaka ia maloko o kekahi moraki i kakauia ma ka la 3 o Aperila, M. H. 1891, i hanaia mawaena o Georgo Trousseau o Honolulu, Mokupuni o Oahu, a me Alexander J. Cartwright, Kahu Waiwai o Adelia Cornwell o Honolulu i olelo ia, i kopeia ma ke Keena Kaku Kope o ke Aupuni ma na aoao 245-247 o ka Buke 129, o ka mea nona ka inoa malalo iho, ka ope o Alexander J Cartwright i oleloia, e manao ana oia e hooko aku i ua moraki la no ka hai ana o na kumu penei: Ka hookaa ole i ke kumup@a a me na ukupanee i hala ka manawa hookaa.
Ke hoike pu ia aku nei, o na waiwai a pau i paa malalo o ua moraki la me na mana a pau i pili ia mea, e kuai ia aku ana ma ke kuai kudala akea ma ke Keena Kudala o James F. Morgan, ma Alanui Moiwahine ma Honolulu i oleloia, ma ka POAONO, la 23 o NOVEMABA, M. H. 1895, ma ka hora 12 o ke awakea o ia la.
O ka waiwai i paa malalo o ua moraki la, oia kela poe apana aina a pau e waiho la ma Kapahulu, ma ka Apana o Kona o ka Mokupuni o Oahu i oleloia, nona ka ili a pau o umikumamakahi me 2-100 o ke eka, a oia no kekahi hapa o ka Apana 32 o na Aina i hoakakaia ma ke Komisina Haawi Aina 8358 B, a o na apana i helu ia 21, 22, a me 23 o na apana o Kapahulu e pili pu ana me Kapiolani Park, na apana aina i hooliloia i ka mea moraki, George Trourseau, e Chas M. Cooke, kahu waiwai o Anna H Bailey, ma ka palapala i hanaia ma ia la no me ka moraki.
E hui pu ia ana na pono hookahekahe wai, na pauma, na paipu, a pela aku, maluna o ka aina i oleloia.
He kuike ke kuai. Na kamea kuai e uku na hoolilo o na palapala.
F. W, MACFARLANE,
Ka Hope o
ALEXANDER J. CARTWRIGHT,
Kahu waiwai o
ADELIA CORNWELL
25@@-@
UA NALOWALE.
MAI KE KIHI AKU O NA HUINA ALAHUI Judd a me Liliha kokoke elua ae nei malama i hala, he ilio keokeo alualu manu.
E haawiia ka uku makana he $25 i ka mea e loaa ai a hoihoi mai ma ka hale noho a i ole ma ka halekuai ma ke kihi o na huina alanui Papu a me Kalepa.
E. A. McINERY,
3468 3
Hoolaha Hou.
AHA HOOKOLOKOLO KAAPUNI APANA Eha o ko Hawaii Pae Aina. Ma ka Hooponopono Waiwai. Ma ka @ o ka waiwai o Kamaka k. o Kehena P@@@, Hawaii i make kauoha ole.
Ma ke heluhelu a me ka waiho ia ana mai o ka palapala noi @ @ Kekoa @ Hilo, Hawaii e olelo ana o Kamaka k o Kehena, Puna, Hawaii, ua make kauoha ole ma ka la @ @ @ A.D. 189@ me ka waiho iho he waiwai iloko o ko Hawaii Pae Aina, a e noi ana e @ @ na hoo@@@@.
Ke kauohaia nei o ka @ @ o Novemaba A D 189@, hora 10 kakahiaka o ia la, oia ka manawa i koho ia no ka hoolohe ana @ @ i mua o ua Lunakanawai @ ma ka @ hookolokolo o keia Aha ma Hilo, Hawaii a me @ manawa a ma ia wahi e @ mai ai ka poe a pau i kuleana e hoike mai @ @ lakou e ae ole ia ai ua hoi ia.
Hanaia ma Hilo, Hawaii, K. @. P. A. @ @, 1@9@.
Na ka Aha:
DANIEL PORTER,
Kakauolelo.
@@@@ 3
AHA HOOKOLOKOLO KAAPUNI APANA Eha. Ma ka Hooponopono Waiwai. Ma ka hana o ka waiwai o Manuhoa k., o Kamaee, Hilo, Hawaii i make.
Ma ka heluhelu a me ka waiho ana mai o ka Palapala Noi a me ka Papa Hoike Helu a G. W. A. Hapai, Lunahooponopono o ka waiwai o Manuhoa k., o Kamaee, Hilo, Hawaii, i make a maloko o laila, e noi mai ana oia e maheleia ka waiwai e waiho nei iloko o kona mau lima i ka poe i kuleana, a e hookuuia oia me kona mau @ope mai k a noho hooponopono ana.
Ke kauohaia nei, o ka POALIMA, la 5 o NOVEMABA, A.D. 18@@, hora 10 a.m. imua o @ lunakanawai ma ka hale hookolokolo ma Hilo, oia kahi a me ka mana i koho ia no ka hoolohe ana ia noi a me ka hoike helu waiwai, @ na poe a pau i kuleana, e hele @ malaila hoike ai ina he kumu kekahi e ae @ ia ai ke noi, a e waiho mai i na ike no ka poe kuleana i ka waiwai.
Kakauia ma Hilo, Okatoba 19, 18@@.
Na ka Aha:
DANIELL PORTER.
Kakauolelo.
@-3
ILOKO O KA AHA HOOKOLOKOLO KAApuni Apana Ekahi o ko Hawaii Paeaina. Ma ka hana o ka waiwai o ke 'Lii POOMAIKELANI (w), o Honolulu, Oahu, i make.
No ka mea, ua waihoia mai ma ka la 4 o Okatoba, 1895, imua o keia aha, he Palapala e olelo ia ana oia no ka Palapala Kauoha a Hoo@@@na Hope Loa o ua Poomaikelani la, i make aku la, me ka palapala hoopii e nonoi ana e hooiaio ia ua palapala kauoha ia a e hoopukaia aku ka palapala hookohu lunahooko ia Kapiolani, ka Moiwahine Kanemake i waihoia mai e ia.
Nolaila, ua kauohaia o ka POALIMA, ka la 13 o NOVEMABA, 1895, hora 10 kakahiaka o ia la, ma ka rumi hookolokolo o ia aha, ma Aliiolani Hale, (Hale hookolokolo) ma Honolulu, Oahu, oia kahi a me ka manawa e noho ai ka aha e noonoo i ua noi la, a oia no hoi kahi e hele mai ai o na poe a pau i kuleana e hoike mai no k@ aha la e hooiaio ole ia ai ua palapala kauoha hope loa la a me ka hoopuka ana i ka palapala hookohu lunahooko.
Na ka Aha:
HENRY SMITH,
Kakauolelo.
@ 3
ILOKO O KA AHA HOOKOLOKOLO KAAPUni Aapana Ekahi o ko Hawaii Paeaina. Ma ka hana o ka waiwai o ONO IUKO i make.
Ma ka heluhelu a me ka waiho ana mai o ka palapala noi a Kealoha Iuko, ka lunahooko kauoha wahine o ka waiwai o Ono Iuko i make, e noi ana e hoopukaia ona kauoha e kuai i kekahi aina o ka mea i make. oia ka aian ma Kawa, Honolulu, Oahu, a e hoike ana i kekahi mau kumu e kuai ia ai, oia: aole i lawa ka waiwai lewa o ka mea make no ka uku ana i na aie.
Nolaila, ke kauohaia nei na hooilina o ka mea i make, a me ka poe a pau i kuleana i ua waiwai la, e hele mai imua o keia aha ma ka POAHLIMA, la 8 o Novemaba, A.D. 1895, hora 10 a.m. ma ke Keena Hookolokolo o keia aha ma Honolulu, a malaila a ma ia wahi e hele mai ai ka poe a pau e hoike ina he kumu ka lakou e ae ole ia ai ua noi la e kuai i ua aina la.
Hanaia ma Hanolulu, Okatoba 5, 1895.
Na ka Aha:
GEO. LUCAS,
Kakauolelo,
2567-3
OLELO HOOLAHA.
Hui Mokuahi o Waila Ma,
(KAUPALENAIA.)
NA HOOLOLI O NA WA HOLO.
E holo ana ka Mokuahi "KINAU" i ka hora 10 kakahiaka, aole hoi i ka hora 2 auina la, e like me mamua. Aole e lawe ia na ukana e hiki ae ana i ka uapo mahope iho o ka hora 8 a. m. o ka la holo.
E komo ana ka mokuahi "Kalaudine" ma Lahaina i na wa a pau ma keia mua aku, ma ka pii ana aku a me ka huli hoi ana mai.
Hui Mokuahi o Waila Ma. KAUPALENAIA.
2569-2
HOOLAHA AKEA.
E IKE auanei na kanaka a pau ke nana mai i keia. O maua o Mrs. M. Kaapu w. a me Solomon Eli k. na keiki ponoi a Henry Laudaus o Waioli, Hanalei, Mokupuni o Kauai mamua.
Ke hoolaha aku nei maua ma ke akea, o ko maua mau waiwai paa a pau, e waiho la ma waioli, Hanalei, Mokupuni o Kauai, a i hanaia ma ka Palapala Hoolimalima a mau Palapala Hoolimalima e ae paha, e ko maua mau kahu malama waiwai i oi aku na makahiki hoolimalima ma mua o ko maua oo ana.
Ke hoopau a ke hoole loa aku nei maua @a koena makahiki a mau koena makahiki hoolimalima i oi aku mamua o ko maua oo ana a no ke kumu ua oo maua ma ke kanawai. O maua ka mana e hoolimalima i ko maua mau aina a pau loa a i ole ia, o ko maua hope i hookohuia e maua, oia o Edward Kuapuhi, o Hanalie, Mokupuni o Kauai.
MRS. MARAEA KAAPU w.
MR. SOLOMON ELI k,
Punaluu, Koolauloa, Oahu, Sept. 26, 1895.
2568 2
Hoolaha Hookapu.
KE PAPA A KE HOOKAPU LOA IA AKU nei ka hele a me ke komohewa ana o na holoholona ma ka aina e waiho nei mawaena o Waikalua a me Punaluu, Kaneohe, Koolaupoko Oahu. O ka mea holoholona e kue ana i keia e hoopilia no e like me ke kanawai.
J. A> KAMANU,
Kaneohe, Koolaupoko, Oahu, Okatoba 18, 18@5
2568-2
Hoolaha Lunahooponopono Waiwai.
UA HOOKOHU PONO IA MAI KA MEA nona ka inoa malalo iho i Luna Hooponopono Waiwai no ka waiwai o Mileka Kealahula w. i make, ke hoolaha aku nei i ka poe a pau he mau koina ka lakou i ka waiwai o ka mea i make, e waiho koke mai iaia ma Waimea, Kauai, maloko mai o na malama eono, a i ole ia e hoole mau loa ia aku no. A o ka poe a pau i aie i ua waiwai la o Mileka Kealahula, ke kauohaia nei lakou e hookaa koke mai i ka mea nona ka inoa malalo iho.
EDWIN OMSTED,
Lunahooponopono Waiwai o ka WAiwai o Mileka Kealahula.
Waimea, Kauai, Oct. 1, 1895.
@ 4
Ed. A. Williams C.E. Williams
C. E. WILLIAMS & SON.
Hookahi Wale no o Laua Halekuai.
Aole laua i pili iki me kekahi Hale Hoolako hale a me Hale Hana Pahu Kupapau e ae, aia ma ka Hale Helu 611 Alanui Moi, mauka mai o ka Pa Kuai Papa o Lui me Kuke.
Hana Pahu a me laioa Kupapau,
Na pahu kupapau mai ka $3.00 a pii aku iluna.
Kaa kupapau pakahi lio oi o ka maikai ma ke Kaona iho, he $3.00.
Kaa kupapau palua lio oi o ka maikai ma ke Kaona iho, he $5.00. 2562
Ka Hawaiian Gazette
He Nupepa Namu Elua
Puka ana o ka Hebedo-
ma, ma na
PALUA a me POALIMA
e hoopuka ia nei e ka Hui HAWAIIAN GAZETTE COMPANY.
O ka Nupepa Kuloko Alakai keia ma ka Olelo Beritania e hoolahaia nei maloko o ka Paeaina a hala loa aku i na Aina E a ke heluhelu ia nei e na mea a pau ma na oihana na Halekula a komo loa iloko o na ohana.
Ka Uku Pepa Laulaha.
No ka Malama $ 50
No ka Makahiki Kuloko 5.00
" " Kuwaho 6.00
Keena Hana Helu 318.
Alanui Kalepa.
Pahuleta O. Honolulu Oahu
2531-tf
Na Hua Kuni Inoa
Eia ka Hui Hawaiian Gazetta Co., ke hana paka maoli nei i na Hua Kuni Inoa o kela a me keia ano, nui a liilii e like me ka iini a ka manao.
O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.
He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha. Aka he oluolu ka uku a he waipahe ua kuka ana.
E kipa kino mai e nana i ike kumaka, a i ole ia e hoouna mai i na kauoha me ke
Keena Hana--Maka Halepai: HAWAIIAN GAZETTE, Helu 318 Alanui Kalepa, Honolulu
2531-tf
Halepai Hawaiian Gazette.
O keia ka Halepai Nupepa Alakai o ke Kulanakauhale o Honolulu nei. Ua lako i na Hua Kepau o na ano a pau a a makemake e ui ae ai.
Eia ma keia Halepai e pai ia nei ka Nupepa KUOKOA, a me Nupepa HAWAIIAN GAZETE PACIFIC COMMERCIAL ADVERSTISER CHURCH CHRONICLE a me PLANTER'S MONTHLY.
Ua hiki loa i keia Halepai ke pai aku i na pepa nunui hoolaha alanui, na buke, na bila kikoo, na bila hookaa, na palapala polai ahaaina a me na hana e ae a pau o ka oihana pai.
Eia maloko o keia Halepai he Keena Humuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala. He luolu ke kuka ana a he emi kupono na auhau.
Keena Hana, Helu 318 Alanui Kalepa, Honolulu ka Hale iluna.
2531-tf