Ka Nupepa Kuokoa, Volume XXXV, Number 7, 14 February 1896 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ke Kihi o Kona Aahu.

Himeni Euanelio 267

1.  Ua pau ko Iesu aahu nani,

I kona manao malu,

E loaa ai ka hoola mana,

Ke ola kino hou.

           

Hui. E paa ko Iesu hoola,

A pau kou kuihe,

Mai on a mai ka mana hou,

E pau ka hewa ou.

 

2.  Ua nani kona hoopilihua,

Imua o Iesu,

Ua loaa nae ka hoola nona,

Ke ola kino hou.

 

3.  I mai la oia, mai kali oe,

Hoike nou iaʻu,

E ola hou kou uhane pu no,

Hoomaikai mau iaʻu."

            C.M.H.

 

Kula Sabati

 

I. 8. Feb. 23.  Ka hooikaika ana i ka manaoio, Luka 8:43-55. 

A he wahine hoi he umikumamalua makahiki o kona heekoko ana, ua pau @ona waiwai i na kahuna lapaau, aohe o lakou mea e ola ai ia.

44 Hele mai la ia ma hope, hoopa iho la i ke kihi o kona aahu;  paa koke iho la kona heekoko.

45 ninau mai la o Iesu, nawai la au i hoopa mai nei?  A pau lakou i ka hoole, i aku la o Petero a me ka poe me ia, e ke kumu, ua hooke aku ka ahakanaka ia oe, a ua pilikia oe, a ke ninau nei oe, nawai la au i hoopa mai nei?

46 A olelo mai la o Iesu, au hoopa mai no kekahi iaʻu, no ka mea, ua ike au i ka puka ana aku o ka mana mailoko aku oʻu.

47 A ike iho la ua wahine la aole ia i nalo, hele haalulu ae la ia a moe iho la imua ona, hoike ae la iaia imua o na kanaka a pau i kana mea i hoopa ai iaia ame kona ola koke ana iho.

48 I mai la Iesu iaia, e olioli oe, e ke kaikamahine, au ola oe i kou manaoio e hele hoi oe me ka pomaikai.

49 Iaia e olelo ana, hiki mai la kekahi mai ka hale mai o ua luna halehalawai la, i mai la iaia, au make kau kaikamahine; mai hoolu i oe i ke kumu.

50 A lohe ae la o Iesu, olelo mai la oia iaia, i mai la, mai makau oe, e manaoio wale no, a e hoolaia no ia no ia.

51 A hiki aku la oia i ka hale, aole mea e ae ana i ae mai ai e komo iloko, o Petero ame Iakobo, a me Ioane, ame ka makuakane ame ka makuahine wale no o ua kaikamahine ia.

52 Auwe iho la lakou apau me ke kanikau iaia.  I mai la iesu, mai uwe oukou, aole ia i make; aka e hiamoe ana no ia.

53 A hoomahuakaia aku la lakou iaia, no ka mea, ua ike io lakou ua make ia.

54  A hoihoi oia ia lakou a pau iwaho, lalau iho ia ia i kona lima, kahea iho la, i iho la, e ke kaikamahine, e ala.

55 A hoi mai la kona uhane, a ala koke mai la oia iluna; olelo iho la oia e haawi i ai nana.

Pauku Gula.  Luka 8:48.  Ua ola oe i kou manaoio e hele hoi oe me ka pomaikai.

Manao Nui.  E pono ke manaoio aku ia Iesu, nona mai ke ola hou no ka poe hewa. 

Olelo Hoakaka.  Ua hoi hou aku o Iesu i Kaperenauma mahope o kona kaapuni ana ia Galilaia.  no ka nui o na hana, ua manao oia e hoomaha iki, a ee aku i ka lokowai o Galilaia.  A pau no @a elua, ua hoi hou mai oia i Kaperenauma.  Ua malamaia he anaiua nona ma ka hale o Mataio.  Malaila ua halawai o Jairo me Iesu, e noi ana iaia e hele koke mai i kona hale no ka hoola ana i kana kaikamahine, e moe ana, me he la ua kokoke oia i ka make.  I ko Iesu ae ana aku i keia noi, oiai ua hele pu laua me Jairo, ua halawai kekahi wahine pilikia kino me ia.  O ko Iesu hoola ana i keia wahine, oia no ke kumuhana no keia haawina Baibala.

43 Wahine aole i oleloia kona inoa ma kekahi kaao.  ua hoikeia kona inoa o Valanika, nana i holo oku i @ hou mai ko Iesu maka aku i kona wa a halihali ana i kona laau kea, a loaa ke kii o Iesu ma kona hainaka.  Wahi hauau, wa oia.  Ua pilikia oia no kekahi hee koko.  Aole hiki i na kahuna lapaau no na makahiki he 12 ke hoopau i kona pilikia.  4 Kihi i hanaia ma na aanu Iudaio, ma ke ano he ho@ na hoano, Nahelu 15:88;39.  O ke kihei Iudaio he apana lole loloa huinaha.  Ua owiliia a puni ke kino, alaila mai ke kua mai maluna o na poohiwi, a hookomoia na kihi malalo o ka apana lole ma ke alo a puka iwaho.  Ua hana ka poe Parisaio i na kihi loloa, a laula ae ka lipine i hookomoia e hoopaa ai i na Uhilihi lole, Mat. 9:20 ame 14:36.

45 Hooopa oiai ua hooke ae la ka ahakanaka ia iesu.  Ua hooholo ka wahiue i kona hana mamuli o kona manao p@ e loaa ai iaia ka pomaikai i iini ia.  46 Mana ua hana o Iesu i kaua hana mana mamuli o kona manao p@.  ua ninau oia e pili ana i ka m@ hoopa i mea e hooikaika ai i ka manaoio o ua wahine la.  47 Haalulu, no ka mea, ua manao ka poe Parisaio i ka hoopa ana o ka wahine @koko he mea ia e hoohaumia ai ia lakou.  48 Manaoio he manao kupono keia e pili ana ia Iesu, aole ia he manao ea wale, e like me na manao o na kanaka Hawaii e pili ana i ka manao o ko lakou mau kahuna.  Ua akamai na kahuna Hawaii ma ka hoopunipuni ana, aole ma ka lapaau ana.  49 Make pehea e hiki ai i ka makua ke paulele aku i ka mana o Iesu e ola hou ai ke kaikamahine?  50 Manaoio aole hiki i ko Iesu mana ke hoohokaia; aka nae ua hiki no i ko Jairo manaoio ke kuemi hope.  51 Aole ua papa loa o Iesu i ke komo wale ana o ka poe mahaoi e ikemaka wale ai i mau mea ano e.  52 Kanikau a nui ka walaau o ka poe i hoolimalimaiaia no ka paiauma, haehae aahu me ka kaniuhu ana.  53 hoomahuakaia akaaka hoohenehene lakou, me he mea la ua lawelawe o Iesu i wahi hana paoa.  54 Ala ma ka olelo lahui Suria, mamuli o ko Mareko moolelo, Talitha, kuni.  55 Hoi ua hookaawaleia ka uhane mai ke kino aku i ka wa make.  Koke aole he wa pohala, konekonea, konini.  Ai aole na Iesu i hoolako i na mea hiki ia kakou ke hana aku no kakou iho, ame ko kakou mau makamaka paha.

            I.  Ka manaoio malu, 43-46.  Aia mahea o Iesu i ka wa a Jairo i halawai ai me ia?  Heaha ko Jairo noi?  Pehea i moakaka lea ai ko Jairo manaoio?  Heaha ko Iesu hana i hana i mea e hoala ai i ko Jairo kaikamahine?  Heaha kekahi keakea i komo ai ma ko laua kaahele ana?  Heaha ka manaoio o kekahi wahine e pili ana i kona pilikia kino?  Ua kupono anei kona lawe ana mai i ke ola kino hou ma ke ano malu?  Pehea i pili ai kona ola hou i kona manaoio?  Ua pololei anei kona ano manaoio?  Heaha ko Iesu olelo kahaha?  Heaha ke ano okoa o ka hana o ka ahakanaka ame ka hana o ka wahine pilikia?  Pehea i hana ai o Iesu i kana mau hana mana, he hana wale anei ia, a i ole paha, he hana kumu?  Ua pilikia anei oe?  Owai ka mea hookahi e hiki ke lawe koke aku i kou pilikia?

            II.  Ka manaoio e olaʻi, 47, 48.  He aha ka hana a ka wahine i kona wa i hoomaopopo ai i ko Iesu pihoihoi?  Ua huhu anei o iesu no kona hana?  Ua ike ole anei o Iesu i kona hoola ana i ua wahine la?  Heaha kona kumu no ka ninaninau ana?  Ua kupono anei ka manao o kekahi poe e hiki ana ia lakou ke lawelawe i ke ano hana no ka poe manaoio ma ka malu?  Ua hoike anei oe i kou manaoio ma ke akea?  Ua kahea anei o Iesu i ka poe nana i hoola ai e hoike aku i kona mana hoola no ko lakou pono?  Ua loaa anei i ka wahine he pomaikai hou aku?  Heaha na kumu no ke koi ana aku i ka poe manaoio e hoike aku ma ke akea i ko lakou manaoio?  Pehea i hooliloia ai ka iini o keia wahine nona iho i aloha lanakila no iesu kona haku e ola ai? 

            III.  Ka manaoio lanakila, 49-55.  Heaha ka lono ino i loaa ia Jairo i kona wa i hele pu ai me Iesu ma ke alanui, a loaa ke keakea ma ka halawai ana me ka wahine heekoko?  Ua poho anei kona manaoio i ka lohe ana i ka lono e pili ana i kana kaikamahine i make ai?  Pehea i pili ai ke ola hou o ke kaikamahine i ko Jairo manaoio?  Pehea e hiki ai ia Iesu ke kali oiai au kokoke ke kaikamahine i ka make?  Heaha na hana ma ko Jairo hale i kona wa i hoi hou mai ai?  Ua make maoli anei ke kaikamahine?  Heaha ke kumu no ko Iesu kipaku ana i ka poe walaau?  Heaha ke kumu ko iesu lalau ana i ke kino kupapau ma ka lima?  heaha kona olelo kahea iaia?  Heaha ka pane ana?  No ke aha la kona kauoha e hanai iaia?  Heaha na hoailona o kona make a me kona ola hou?  Ehia mau mea make i loaa ia lakou ke ola hou mamuli o ko Iesu hana mana, Luka 7:14, 15; Ioane 11:43 44?

            Manao Pili.  1 Ua like pu anei ko Iesu kali ana me ka hoole ana?  2 Ia wai anei ko Iesu olelo paa e haawiia ana ke ola mau loa, Ioane 3:15?  3 Heaha na ano like o ka make me ka hiamoe?  4 pehea i pilipaa ai ka lanakila i ka manaoio?  5 Ua manaoio aku anei oe i ka pono o ka pule, ka lanakila o ka manaoio, ka mana o Iesu.

 

Hoike Hui.

            E hoike hui ana na Kula Sabati a pau o Hawaii Komohana, ke hiki aku i ka la 8 o Maraki, 1896, ma ka luakini o Pukaana ma Hookena, Kona Hema, Hawaii.

            Penei ka maheleia ana o na haawina kula Sabati:  Haawina o Okatoba, 1895, ia Punalau ame Waiohinu; Novemaba, ia Milolii ame Kaohe; Dek. ia Pukaana; Ianuari 1896, ia Kealakekua a me Konawaena; Feb. ia Helani me Kailua; o na Sabati mua o Maraki ia Kekaha.

Na Himeni Hui.

Himeni 109 o ka Euanelio; H.A. N. Aoao 153, 154, 164 me 277.

            Ke noi ia aku nei na Kula Sabati a pau i haiia maluna, a i loaa aku hoi na haawina ia lakou ame na himeni hui, hana mai oukou me ka eleu ame ka hoomiomio ana i na haawina.

            Mai lawe mai i na himeni haku i pili ole i ka haawina.  E eleu e Hawaii komohana, no kou la heihei lani a olino mai; he kukini lani ka oukou e na Kula Sabati ma ia la no ka lei e mau loa.

            Eia kakou e holo ana,

Ma ke kai kupikio,

I ka home ma o, maluna,

Holo, holo, holo mau.

Me ke aloha,

David Alawa,

K.K.SN. o H. K.

Holualoa, N. Kona, Hawaii, Februari 3, 1896.

 

Na Hoalohaloha.

Rev. S. Kapu,

Peresidena Ahahui Kula Sabati o Maui me Molokai.

            Aloha oe:  Oiai, ma ka la 26 o Ianuari, 1896, ua kii palanehe mai la ka Peresidena nui ma ka lani i kou kokoolua aloha a makuahine o ka lehulehu Mrs. Lilia Kapu, a lawe akua la mai kou poli aku, a mai ka ekalesia makua aku o Wailuku, nolaila, ua ili iho maluna o makou na Kula Sabati o Makawao, ke kaumaha a me ka walohia, no kau wahine a makuahine no hoi no kakou a pau i minamina nui ia, me he la ua kahea ia mai oia e komo i ke Kula Sabati nani mao, e kela Peresidena nui e hea nei, "E hele aku i ona la," nolaila, e

            Hooholoia 1 O makou na luna nui o na Kula Sabati o Makawao Akau, ke komo pu nei me oe e kaana pu i na ehaeha a pau o ke kumakena ana aku, no kau wahine aloha.  2 Ke komo pu nei na haumana a pau o na Kula Sabati o Makawao Akau e uwe pu me oe no ia kauwa ahonui i hala e aku.  3 Ke noi nei makou i ke Akua e hoomama mai ia oe a me na keiki makua ole i waihoia mahope nei.  4 E hoounaia i kope i ka nupepa Kuokoa.  O makou iho no me na waimaka, ma ko makou kakauolelo ia,

J.P. Kapihe,

Kakauolelo o na Kula Sabati o Makawao.

Paia, Maui, Ianuari 31, 1896.

 

            Rev. S. Kapu,

            Me ka walohia Oiai, ma ka la 26 o Ianuari, 1896, ua oluolu i ka Mea Mana Loa ka lawe ana aku i kau wahine i aloha nui ia Mrs. Lilia Kapu, mai ka home malihini a olua i ae ai no ka hana a ke Akua ma ke kihapai o Wailuku, Maui.  Nolaila ua ili iho maluna o makou ka Ekalesia o Paia, ke koikoi o ke komo pu ana aku me oe e kanikau pu no ka makuahine aloha a mahalo nui ia, oiai no hoi, ua komo pu mai oe me kau Lilia aloha, a me ka olua mau ohana keiki he mau manawa lehulehu e kokua pu i keia ekalesia ma ka wehe ana he mau aha mele no ka aie o ka ekalesia, a ua holoiia ia mau kikokiko.  Ua hoole olua i keia kula loa, ka poeleele e aaki ana, ka hui o ka makani a me ke anu o ka ua, a me na inea he nui aku no ko makou mau pono.  ua haawi nui kau Lilia aloha i kona kino e hookauwa ana iaia iho no ka pono o keia ekalesia, ka hana hoi ana i pae malihini mai ai i keia mokupuni, aloha wale!  Ua hoopuni ae kona leo kani i ka betela ana i hoonani aku ai i ke Akua me ke eehia a me he hanehane la hoi e hawanawana ana ma kona mau paia laa, me ka minamina nui.  I kekahi aha mele ana, aneane no oia e himeni ole no ka paa o ka leo, aka, ua wehe mai no nae ke Akua i kona kileo, a ua hosana aku ia ia Iehova @e ka eehia nui, oiai kana keiki Abraham Pihi Kapu i wehe ai i kekahi aha mele no ko makou mau pono, aloha wale!  Aole no makou e lohe hou ana i kona leo maloko o ko makou betela nei.  Ua moe aku la i ka moe ana a ka poe pono, ua pau a ua nalo kana mau hana kokua mai a makou aku.  Owai la kekahi makuahine e ae e like me ia?  E ohi auanei oia i ka hua ohaha, o kona haawi ana i kona ikaika no ka ke Akua hana nui, no laila, e Hooholoia: 1 O makou o ka ekalesia o Paia, ke komo pu aku nei me oe i ke kanikau pu ana no kau wahine i aloha nui ia.  2 Ke haawi pu nei makou i ko makou aloha no na keiki i hoonele pu ia i ka makuahine ole.  Ke pule nei makou i ke Akua e hoomama mai ia oe me na keiki makua ole i keia mau manawa pilihua.  4 E hoouna i hookahi kope o keia olelo hoalohaloha i ka nupepa Kuokoa.  O makou pu me oe i na minute a pau o ka ehaeha, a na ke Akua e hoomama mai ia kakou a pau.  O makou no, me ke aloha, ma o P.N. KAHOKUOLUNA, Kakauolelo o ka Ekalesia.

 

Ka Peresidena Dole ma N. Kona, Hawaii.

            Aloha oe e Mr. L. H. Ua hiki mai nei o Peresidena Dole ma ka W. G. Hall o ka la 8 iho nei, a noho ma ka hale noho o Miss A. M. Paris i ukaliia e Mrs. dole, C. P. Iaukea, Henry Waterhouse a me Capt. Brown.

            Ma ka hora 9 a.m. ua kipa ike ae he helana nui o na kanaka Hawaii ia Mr. Dole me na lulu lima aloha ana, a hookahi no leo i ka waha o na kanaka, i ka oluolu a me ka waipahe a ua kupono no i Moi no Hawaii Huro!  Ala hou o Hawaii!!  Hora 2 p.m. Halawai Makaainana ma ka hale hookolokolo.  Ua haiolelo mai ka Peresidena, a o ke ano nui, e mahalo mai ana no kona hui mua loa ana me na kanaka o N. Kona nei.  Eia no ka hoi la he poe oluolu, i na wahi nupepa wahakole hoi, he huhu na kanaka o Kona, a ua hai pu mai oia no na aina home liilii; e makaala na poe home ole e lawe i mau home no lakou, paipai ia, a na J. K. Nahale i pane mai ma ka aoao o na makaainana, a he ku no i ka hanohano; mahope iho, ia C.P. Iaukea a ia H. Waterhouse, a hookuuia ka halawai me ka maluhia, iloko o na puili ana a ke aloha, a ma ke kie@ aku a kou kiu, ohohia na kanaka ia Mr. Dole.

            Ianuari 9, haalele ia Kailua, hora 8:30, hiki ma Kohanaiki, hui me ko laila poe, a ma Puukala, halawai me ko laila mau kamaaina, a he wa ia o na kuka aloha ana, hora 12 awakea, paina ma kahi o Geo. Clark, me na puili pumehana a Mrs. Clark, haalele ia laila, hora 2:30 p.m., hui me na komite hookipa a na haole, W. G. Wait, Henry Greenwall, F. W. Bartell a me M. F. Scott a kamoe aku la ka huakai a hiki ma kahi o Dr. McWayne; a hiki ma Holualoa School House, halawai me na haole a noonoo no na alanui o Kona, a waihoia na Peresidena Dole a noonoo.  Hiki ma ka hale, hora 5:30 p.m.

            Ianuari 10, hora 8:30 a.m. haalele ia Kailua, hiki ma kahi o Paris, hora 11:30 a.m. a paina malaila me na mea ai ono mikololohua i wae maiau ia e Mrs. Paris.  Nani no!  Haalele ia laila, a hiki ma Honaunau, haalele ia Hale o Keawe, ka puuhonua o ka wa kahiko, a ike ia Heouakuohoula, kela kanaka loihi e oleloia nei, he 12 kapuai ka loa, moe iho ua kaaka la me he ia la no Kakaauki.  Haalele ia laila, a hiki ma Hookena, a halawai me na keiki kula a Robert Amalu, e huro ana, he haneri paha a oi na kamalii na lakou i alakai a hiki ka Peresidena a noho ma ka hale o Lazaro.  Hora 8:30, halawai ma ka halepule, a ua nui no na poe i akoakoa ae, a hookuuia na hana me ka maikai, ma ka hora 4:30 a.m. o ka wanaao o ka la 11, haalele ia Hookena, a he nui na poe i ukali aku ma keia huakai, oia keia:  Lunakanawai T. H. Wright, J. K. Nahale, Lazaro, D. P. Namauu, A. J. Kauhaihao, Sam. Haanio, John Kama, a i ka hiki ana ma Opihali, wehe ae la na pili me ka Peresidena, hora 8 a.m. ia, a haawi na aloha hope loa, a hele lakou a hoi makou me na puili lima ana.  A.J. KAUHAIHAO.  N. Kona, Hawaii, Ian. 20, 1896.

 

Ka Levi i Levi oleia a me ke Aupuni o Hawaii.

 

"Pau aku La."

 

Mana la o keia poe alii, e kukulu mai ai ke Akua o ka lani i Aupuni mau loa, aole hoi e hoohiolo ia ia Aupuni, aole nae ia e lilo no ka lahuikanaka e."  Daniela, mookuna 2, pauku 44.

 

            E na Hoahanau, na inu hoano o ko ke Akua hoopomaikai ana ma ke kino a ma ka uhane.  O ke aloha hiwahiwa o ke akua ka Makua, o Iesu kana keiki a me uhana Hemolele maluna iho la o oukou a pau.  He wai loihi i hala ae nei, mai ka wa hope loa aʻu i ku aku ai imua o oukou no ka wanana ana no na hopena e kau mai ana maluna o Hawaii nei, oia no hoi ke Aupuni Repubalika e ku nei i keia wa a me kekahi mau loli ano nui ma ka aina e ikeia nei no i ke@a wa.  Ua haawi ia aku na oleloao i na Poo Lahui ia wa, e malama nui i ka PONO, e ike i ke kanaka nui a me ke kanaka iki, ke kanaka waiwai a me ke kanaka ilihune, aka, ua kapaeia ka oleloao, a malamaia, me ka mamina nui, i ka hookuli a me ke pale olelo, ke pale kauoha a me ke pale leo mai ka poiuiu mai o ka lani, a no ia mea, ua like ke Aupuni o Hawaii, oia hoi ke Aupuni o ka Lani Kamehameha, ka Lani Lunalilo, ka Lani Liliuokalani me ke "Aupuni o ka lani," i hoikeia ma ka pauku 12 o ka Mokuna 11 o Mataio:  "Mai ka wa ia Ioane Bapetite mai a hiki ia nei, ua imi ikaika ia ke Aupuni o ka lani, a ua laweia e ka poe ikaika no lakou."

            Ae e na hoahanu, ua lawe ka poe ikaika a ua lilo no lakou iho ke Aupuni o na Lani Kamehameha a me na lani e ae he nui o Hawaii nei, a ke ike nei kakou ia mea me ka hoohewahewa ole.

            Ma ka makahiki 1888 a ma ka makahiki 1891, ua hoike nui aku au i na hoikeana kamahao no ke kulana o ko Hawaii nei Aupuni, a hai maopopo ana no ka hookahuli Aupuni ano nui e kokoke ana ma ka paepae kapu o ka Nohoalii o Hawaii a me ka halii nuʻa moena o ko ka lahui nohona.  Oiai mamuli o ka lele awiwi ana o na ao kaalelewa ma ka poiuiu o ka lani, ua ikea na hiona a me na ouli hookala kupua e kahoahoa ana i ko ka honua no keia loli ana.  Aka, aole i hoolohe ia na aʻo ana ia wa, ua mau ka aaki ana o ka pouli maluna o ka aha alii, puloʻuloʻu alii, a me ka aha makaainana o ka aina, e lehau ana mai ka haaleale kai a ka nuʻanuʻa nahele o uku.  Ua ko nae ka olelo ua makia ia ka oiaio, a ke ku nei ia maluna o Hawaii, aohe maka i ike ole, aohe pepeiao i lohe ole, aole hoi he houpo i loloku ole ia.  A ke hea nei ke keiki a ke Akua ma ka laau kea o ka hoomaewaewaia ana o kana olelo, "Pau aku la."  Ae pau ke Aupuni Alii, ua hala, aole loa ia e hoi hou mai ana; a hookahi wale no Aupuni e hoea mai ana ma Hawaii nei a ma ka honua a pau oia ke Aupuni Alii o ke Keikihipa a ke Akua.

            He kulana keia i wanana e ia mai e ke Kaula e Daniela i ka i ana mai:  "Ma na la o keia poe Alii e kukulu mai ai ke Akua o ka lani i Aupuni mau loa, aole hoi e hoohioloia ia Aupuni; aole nae ia e lilo no ka lahuikanaka e."

            O keia olelo wanana a Daniela, ua pili ia i ke Aupuni Alii o Nebukaneza o Babulona.  E hoike ana i ke ano, ke kulana a me na nee ana oia Aupuni a hoea i kona nahaha liilii ana.

            Eia ka hoakaka a ke Kaula o ke Akua, oia o Daniela, no ua moe la a ke Alii.  "O oe no, e ke alii, he alii oe o na lii; a ua haawi mai ke Akua o ka lani ia oe i ke Aupuni, a me ka mana a me ka ikaika a me ka hanohano.  O oe no ua poo gula la.  "A mahope o kou e hookuia ana he Aupuni e, ua emi mai ia mahope o kou.

            "A o ke kolu o ke Aupuni (e hookuia mai) he keleawe ia;  oia ka mea e alii ana maluna o ka honua a pau.

            "A o ka ha o ke Aupuni, elike auanei kona ikaika me he hao la;  no ka mea, o ka hao ka mea e weluwelu ai a e okaoka loa ai na mea a pau;  a elike me ka hao i hooweluwelu liilii ai i neia mau mea a pau, pela no oia e okaoka loa ia.

            "A i kou ike ana i na kapuai a me na manamana wawae he palolo a he potera kekahi, a he hao kahi, e maheleia ana ke Aupni; aka o ka ikaika o ka hao kekahi mea iloko on a, elike me kou ike ana i ka hao i huipuia me ka palolo.

            "Elike me ua mau manamana wawae la he HAO kekahi a he PALOLO kekahi, pela keia Aupuni, he IKAIKA kekahi a he NAWALIWALI kekahi.

            "A ma kou ike ana i ka HAO i huipuia me ka PALOLO, pela lakou i huipuia ai me ka hua o kanaka, aole nae e pili pono kekahi i kekahi, elike me ka HAO, aole pili pono i ka PALOLO."  A laila, wanana mai la o Daniela, ke Kaula, imua o Nebukaneza i ka i ana:

            "Ma na la o keia poe Alii, e kukulu mai ai ke Akua o ka lani i AUPUNI MAU LOA, aole hoi e hoohioloia ia AUPUNI; aole nae ia e lilo no ka lahuikanaka e."

 

Hooʻana Kumau.

            Aole loa e maikai a oluolu ke ola ana o kekahi mea kino uhana ola ina he aaiole kona akepaa a hiki ole ke lawelawe i kana mau hana me ka hololea.  E hahai ana ka nalulu a me na nawaliwali e @e u@ ka moali o ke ake p@lo.  He mea oiaio keia i hooiaio ia ma na wahi o na poai oluolu akau iloko o ka hapaha keneturia, o na

HUALE A AYERS,

oia wale no ka laau hoola ake maikai loa i ikeia.  e hoola ana i ka lepopaa, ka nalulu eha, na maʻi oloko o ka opu, a ma ke ano LAAU OHANA aohe ona luae like ai.  O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kino o ke o ka ili, e hoopau ana i na maluhilukanaka.  e pepehi a @lupa ana i na PUHA, e hoola ana i na pohapoha hi o ke ola ana a e kipaku loa ai i na ano maʻi a pau.  O ka poe maʻi no ka wali pono ole o ka ai, ka nawaliwali mau a ano maʻi e ae i ulu ae mai ke koko ino mai, he mea pono e inu i ka laau SASAPARILA A AYER S.  He laau e hooikaika ai i ka nawaliwali, a e hoopuipui mai ai i ke kino.  Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

            O ka Ayers Cherry Pectoral laau, aohe lua ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na maʻi pili i ke ake me ka hikiwawe loa.  O na Huaale A Ayers, na Sasaparila a me ka Ayers Cherry Pectoral, aia kahi e loaa ai ma ka Halekuai o ka Hollister Drug Co. Lt.  Na agena ma ka Paeaina Hawaii.  2514

 

KAKELA ME KUKE

Ka Halekuai Nui

o na Waiwai like ole

Na Mea Hana Kamana apau

Na lako pili hao kukulu hale,

Na kopa,

Na lei ilio,

Na kauiahao ilio,

Na Pahi,

Na Upa,

Na kope hulu,

Na pulupulu

PALAU LIO

Na mea mahiai,

Na au ho,

Na au koi,

Na kua bipi,

Na lei bipi,

Na kaulahao bipi,

Na uwea p@,

Na kaa palala

Na mea piula,

Na ipuhao

Makau me Aho Lawaia

Na iliwai,

Na kaula,

Na hulu pena,

Na pulumi,

Na pena, me ka aila

Na kopa,

Na aila mahu

Na pekeke

Na pekeke hao,

Na kapu hao,

Na panda,

Na kukaepele,

Na awiki a me

Na ipukukui.

Mikini Humuhumu Kaulana

Wilcox, & Gibb Hookahi Lopi

ka Remington, Elua Lopi.

A me na akana he nui loa, kela ano me keia ano.

 

Kakela Me Kuke.