Ka Nupepa Kuokoa, Volume XXXV, Number 22, 29 May 1896 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

HAAWINA

 

KULA SABATI

 

CCCCCC

 

II.  Iune 7.  Ko Iesu oleloao i kona poe haumana.  Luka 22:24-37

 

UA HOOPAAPAA e lakou ia lakou iho i ko lakou mea e manaoia ana he pookela.

            25  A olelo mai la oia ia lakou, ua hoalii na lii o na lahuikanaka maluna o lakou; a o ka poe i hookoikoi maluna o lakou, ua kapaia lakou he poe hana lokomaikai.

            26  Aka, mai mea oukou pela; o ke pookela nae iwaena o oukou, e like ia me ka mea uuku: a o ka luna e like ia me ka me ka mea lawelawe.

            27  Owai la ka mea nui, o ka mea e noho ana e ai a o ka mea lawelawe anei?  Aole anei o ka mea e noho ana e ai?  Aka ua like au me ka mea lawelawe iwaena o oukou.

            28  O oukou ka poe i noho pu mai me au iloko o kou popilikia ana.

            29  A ke haawi aku nei au ia oukou i ke aupuni, me kou makua i haawi mai ai iau.

            30  E ai oukou a e inu hoi ma kau papaaina iloko o kou aupuni, a e noho hoi ma na nohoalii e hoopono ana i na ohana he umikumamalua a Iseraela.

            31  Olelo mai la hoi ka Haku, E Simona, e Simona, ea, ua noi mai o Satana e loaa oukou iaia e kanana oia ia oukou e like me ka hua palaoa.

            32  Aka, ua pule au nou i pau ole kou manaoio: aia hoohuliia mai oe e hooikaika oe i kou poe hoahanau.

            33  I aku la hoi oia iaia, e ka Haku, ua makaukau au e hele pu me oe i ka halepaahao a i ka make.

            34.  I mai la hoi ia, ke olelo aku nei au ia oe, e Petero, aole e kaui ka moa i keia la mamua o kou hoole akolu ana i kou ike ana iau.

            35.  Alaila, olelo mai la oia ia lakou, i ka wa i hoouna aku ai au ia oukou me ka aa kala ole, a me ke kieke ai ole a me ke kamaa ole, i nele anei oukou i kekahi mea e pono ai?  Hai aku la hoi lakou, aole.

            36.  Alaila olelo mai la oia ia lakou, aka ano, o ka mea aa kala, e lawe ia, a pela hoi i ke kieke ai; a o ka mea nele i ka pahikaua, e kuai lilo aku i kona aahu, a e kuai lilo mai i ka pahikaua.

            37.  No ka mea, ke hai aku nei au ia oukou iau no e hookoia ai ka mea i palaplaia, na helu pu ia oia me ka poe hana hewa; no ka mea, e pau ananei na mea nou.

 

            Pauku Gula.  Pilipi 2:5.  I hookahi ka manao ana iloko o oukou me ia iloko o Kristo Iesu.

            Manao Nui.  E pono ke malama mau i ka manao haahaa; oia no ke anuu mua no ka pii ana iluna.

            Olelo Hoakaka.  Ua noho kaawale o Iesu ma Betania no na la elua.  Poakolu me Poaha.  Oiai ua kukakuka pu na luna Iudaio no ka hoopau ana i ko Iesu hoike ana aku iaia iho ma ke ano ka Mesia, ua kamailio o Iesu me kona poe haumana ma kahi kaawale a ao aku ia lakou e pili ana i ko lakou mau hana e pono ai.  Ua kii o Petero laua me Ioane i keena kupono no ko lalou ai pu ana i ka ahaaina moliaola.  Aole nae i hiki ia Iuda ke ike pono i keia kahi, a nolaila ua hiki ia lakou ke ai pu me ka hopohopo ole.  Ma ka hoomakaukau ana i ka ahaaina ua hoopaapaa na haumana e pili ana i ko lakou ano koikoi:  owai ka mea oi aku o ka hanohano?  Nolaila, ma keia oleloao a Iesu ua hoikeia ka hewa o keia paonioni ana.

            24.  Hoopaapaa. C no ka noho hanohano ana.  Aole paonioni lakou no ka oihana pookela, aka, no ke kiolea pookela: aole imi lakou i ka hana ano nui loa e pono ai ko lakou Haku, aka nae ua imi lakou no lakou iho pakahi i ka mahalo nui ia ana mamua o na hoa haumana e ae.  25.  Hooalii. C e ko ana me ka malama ole ana i na hana e pono ai ka poe lehulehu.  Kapukapu a kaawale loa na lii Hawaii:  aole hiki i na makaainana ke hookokoke ia lakou ma ko lakou moe ana paha, kaahele ana paha.  me he mea la ua haumia na kanaka.  26.  Mea, C lilo.  Pookela, C mamuli o ke kanawai paa o ko Iesu aupuni, o kela a me keia oihana oia no ka lawelawe ana no ka pono o hai, ke kokua nui ana, aole ke alii wale ana.  Ma ka luaahi ua makee na poe hewa in na mea a pau loa no lakou iho: ma ka lani ua noho kela mea keia mea e like me ka la, e hoolaha ana i ka pomaikai no na poe e ae.  27.  Like, C me ko Iesu ano hana, e pono i kana poe haumana lawelawelawe, aole hookiekie.  28.  Popilikia, C oiai hoi ua lilo ko Iesu mau popilikia i mau mea e pomaikai ai na kanaka a pau loa.  29.  Haawi, C ma ke ano he hooilina mahope o ko Iesu make ana.  30.  Ai, C e like me ka poe aialo o na alii Hawaii.  Aupuni, C aole nae he aupuni o keia ao.  31.  Kanananana, C me ka manao he poe nawaliwali na haumana a pau loa e like me Iuda.  32.  Noa, C ua pule o Simeona hookahi, no ka mea oia no kekahi haumana hou e kumakaia ai paha i kona Haku.  No keia pule ua hoole wale no o Simeona ia Iesu aole nae e haalele oia i ka Mesia oiaio.  Ua makemake o Satana i na haumana a pau loa: aole nae i lanakila.  Aole i pule o Iesu e hoowalewale ole ia ana o Simeona, aka nae e kupaa oia ma ka manaoio.  Ua okupe o Simeona, aole nae i hina, a hiki ole ke kupaa hou.  Ina paha ua hoowalewaleia kakou, a kuhao, oia kekahi hana e hookupaa ai ia hai.  33.  Wau. C ua keikei loa o Simeona ma kona hookiekie ana me he mea la aole e pono ai ko Iesu pule ana nona hookahi.  34.  Petero, C oia kona inoa hou no Iesu mai, he mea e hoomanao ai i kona wiwo ole ma ka hai lea ana aku i ko Iesu oihana Mesia.  Kani, C pukoko, ooo pakolou.  O ka lua oia no ka hora ekolu o ke kakahiaka.  35.  Hoouna, C Mat. 10:9-15, aole i hanaia kekahi hana koe nae ko Iesu hoolako ana i na mea e pono ai ka hana.  “Ina hoomakaukau kakou i ka maawe loloa, e hoolako ana ke Akua i ka maawe pokopoko,” mamuli o kekahi olelo noiau maa mau.  36.  Aa, C 1 Sam. 17-40, aa maa mau i ka poe hikina ke halihali i na moni dala ma ke kaei, a i ole paha ma na opi o ke kihei.  Pahikaua, C ma ka pauku 36 ua kamailio e o Iesu e pili ana i ko lakou mau lako i ka wa mamua, na aa dala, na keeke ai, na kamaa; ma keia pauku ua loaa ka pahikaua he panai no na kamaa, me he mea la aole i kipa lakou e like me mamua; aka nae e pono ai lakou ke paio aku a lanakila.  Pela no ka oiaio ma ka hooholo ana i ka hana a ka Haku i keia wa, ua nui na mea kue.  E pono ai kakou ke makaala ma ka hoomakaukau ana i na mea e pale aku ai, a me na mea e paio aku ai.  37.  Palapalaia, C Isaia 53:12, pela ko keia ao kapa ana ia Iesu ko kakou Haku e olai,  he mea lawehala, Luka 23-33, oiai ua kapa ko keia ao i ko lakou mau alii anuu, p. 25, na alii noho pono!

            I.  Ka haanui i hoahewaia, 24-30.  I ka ahaaina hea ua hoopaapaa anei ko Iesu poe haumana e pili ana i ka mea kupono no ka noho hanohano?  Owai ka haumana i moe ai ma ka poli o Iesu?  No keaha la ko Iesu aloha nui loa ana ia Ioane?  Ua makaukau anei kekahi haumana e lawelawe no hai?  Owai ka mea nona keia oihana haahaa loa.  Ioane 13-14?  Ua alii anei na alii Hawaii no ka pono o na makaainana, a i ole paha paha no ko lakou walea walea wale no?  He poe hana lokomaikai anei lakou aole paha?  Ua manao anei na alii o ko lakou manao oia ka mea hookahi e pono ai aole na manao o na makaainana?  Heaha ko Iesu oleloao?  Ua like a like ke ano noho, ke kuleana o na kanaka a pau loa, a i ole paha ua like ole a okoa ko lakou ano noho pakahi?  E pono anei i kekahi Ekalesia ke hooikaika nona iho wale no, a i ole paha e hooikaika ai i na mea e ae e nui ai ko lakou ikaika pakahi?  Heaha ka manao paa o Iesu ma ka hooponopono ana i kona mau hana, Mat. 20:28?  A pau ko Iesu mau makahiki ekolu o ka lawelawe ana heaha kona uku mai na kanaka mai?  Heaha ko Iesu kulana i keia wa?  I ka wa hea e kohoia ai keia?  Owai ka Iseraela oiaio i keia wa?  Ua lanakila loa anei ko Iesu poe haumana ma ka hooponopono ana i ko keia ao?  Heaha ka mana hooponopono pookela ma ka honua i keia wa?

            II.  Ka ino o ka hoaano, 31-34.  Owai ka haumana eleu loa maloko o na haumana o Iesu?  Heaha kona nawaliwali a pehea i hoikeia ai.  Luka 22:61, 62?  Ua lilo loa aku anei o Simeona ke ole ko Iesu pule ana nona?  Heaha ko Iesu makemake no Simeona?  Heaha kona kauoha iaia?  Heaha ko Simeona olelo hoaano?  Heaha ko Iesu olelo menemene iaia?  Ua hoomaopopo anei o Simeona i kona ano nawaliwali, a me ka ikaika o ko Satana hoowalewale ana?  Ua hoowalewale anei o Satana i na kanaka ma ke ano like hookahi?  Heaha kou ano nawaliwali hiki ia Satana ke hanaku?  He mea kupono aeni no ka poe i hoowalewaleia ke hai lea aku i ke ano o ko lakou mau hewa?  Heaha ko Petero oleloao e pili ana ia Satana, 1 Pet. 5:8,9?  Hiki anei ia kakou ke kokua ia hai ina paha aole ike kakou i ke ano o ko lakou pilikia?  Owai ka mea i hoowalwaleia i mea e hooikaika ai i na kanaka a pau loa i ko lakou wa e hoowalewaleiai, Heb. 4:15?  Ua pule anei oe no ka pono o hai?  Ua kokua anei oe i kekahi mea popilikia?

            III.  Ka poino e hiki mai ana, 35-37.  Heaha ke kumu no ko Iesu hoouna ana aku i kona poe haumana, Mat. 10:5-8.  Pehea i loaa ai lakou ko lakou o, a me na lako e ae?  Heaha ke ano hana hou no lakou?  No keaha la ko lakou kuai ana i pahikana, aole i mau aahu?  Heaha ka olelo wanana o Isaia e pili ana i ka Mesia, a me kona hooheneheneia ana?  He hewa anei ke kana, aole paha?  Ua kupono anei o Iesu i ke kaua ana, Mat. 26:52?  He haawina hana okoa anei no na wa okoa?  Ua like anei na hana kupono ma keia pae aina no ka hooholo ana i ka hana a ka Haku i keia wa me na hana o ka makahiki A.D. 1837?  Ua pono anei ke pale aku i na keakea ma ka lanakila ana maluna o lakou me ka mana oi aku?

            Manao Pili.  1.  Heaha ke kulana koikoi ma ka Ekalesia o Iesu Kristo?  2.  Heaha kekahi manao e hoonawaliwali ai ia kakou?  3.  Hiki anei ia kakou ke lanakila ke ole ka makaala kumau?  4.  Ua lanakila anei o Iesu ma kona kaulia ana ma ke kea?  5.  Ua imi anei oe i ka noho alii pu ana me Iesu?

 

CCCCCCCC

Kuu Lei Daimana ua Hala.

CCCCCCCC

 

I ka Lunahooponopono o ke Kuokoa:

            Welina kaua:CE ahonui mai kou lokomaikai, e hookomo iho i keia wahi hunahuna, ma kahi kaawale o kau papa konane, no kela mau wahi hua e kau ae la maluna.  Ua haalele mai kuu lei kuu, kuu milimili i ka poli pumehana o maua na makua, na kupuna, ame ka ohana, a hala aku la ma kela aoao mau o ka honua, ka pahu hopu o keia ola ana, a penei ka moolelo o kuu lei daimana:

            He kaikamahine maikai, kulana hiehie ka mea nona keia moolelo, he aloha ia maua i na makua ame ka ohana he hoolohe i na kamailio ana a ka makua, he kulana oluolu, he aloha, he hoolohe, a he hookipa malihini, he makamaka ola, a he nui na hoaloha, a he holomua ma na mea i aoia aku iaia mai kona mau la opio mai, a hiki wale aku la no i kona hoi ana aku la ma kela ao ma o.

            Ua hanauia o Miss Ella Kahaepalani ka mea nona keaia walohia, mai ka puhaka mai o Miss Zibora Kaaihue, ma Waikakalaua i ka la 29 o Dekemaba, 1880, a ma ka la 28 Maraki, 1896, i hookuu mai ai oia i keia ola ana, a hoi aku la i ka opu ana ole o ka honua.  O ka nui o kona mau mau makahiki o ka honi ana i na ea oluolu o keia ola ana he 15 me 3 malama, a haalele wale mai la no ia maua na makua ame ka ohana, a no ka nui o ko makou aloha paumako ame ka naau i hoopihaia me ka mokumokuahua nona, nolaila, ua haku iho la au i wahi kanikau aloha nona, a oia iho keia:

He uwe he kanikau he aloha keia

No Ella Kahaepalani i welo aku la

I pulelo aku la hoi ma ka welelau mamakani

Ke holo ala i ka moana kai uli kai lipolipo

Ke kau ala ka ihu no Parisa

No laila ka hae i welo aku la

E ike i ka Emepera Napoliona

Me ka Ui kaulana Iosepine

Emeperesi puuwai olu o Farani

No Farani ka lua i kii mai

Kulu aku la ke eo i a i ala

Oi ala moewaa i ka po nei

I ka po a ke aloha ole nele makou

Nele iho la makou i ka ike aku

I kona kina, na maka i ka noho mai

Ka maalo ana mai o ka la welawela

O ka la kikiki o Honouliuli

Uli hewa no hoi ka ili mala hewa iaia

Aloha no hoi ke kula o Hoaeae

O ia wahi kula hulili wela nopu i ka la

La nui haoaa kakou e hoholo ai

E luana ai i na la mea o ia luhi

Hala aku la no hoi ia me ke aloha

O ia aloha no hoi kau e lei nei

E kuewa nei i ke ala me ka waimaka

Akolu hoi au moewaa e ike nei

Aia aku la paha oukou i ka nahele o Hihiu

A hihiu no la hoi oukou o aha ina

Hele ia i ka la o ko oukou lealea

Aloha ino no hoi kuu lihi kuu lei

Aia la ke lei ia mai la e ka maukauka

Mahiehie wale au ke ike aku

Ko kupu ana mai a ohaoha

A ulu no a liko a pua a mohaha

Manao ae la hoi e kui a lawa a lei

A papahi la hoi i ka laula o Ewa nei

A lei ae la hoi au ia pua kehakeha

Eia ka oe he pua mae wale

He pua haule wale i ka lu ia e ka makani

E ka opu lokoino a ke aloha ole

Auwe no hoi kuu kaikamahine kuu luhi

Aloha ka uka anu e Ki-oea

Oia wahi a kaua i pili ai

Aloha Lihue paa i ka uhiwai

Aloha o Malamanui i ka mauu nene

Aloha ke kupukupu e Kanehoa

Aloha ke kula e Kanoenoe

Noe wale mai la no iau ko aloha

Aloha ke kai e Kapapapuhi

O ia wahi a oukou e hele ai

Aloha no hoi ka ia waha lepo o ka aina

Oia ia hoolaukanaka o ke kahakai

Hiaai wale ke ike aku

Na ui holoholo alanui hao

I kuhi no au o oe ia.  Nui, nui kuu aloha nou

Eia aku ka oe i ka aluka makani

I ka puaoa uluahewa i o a ianei

Ua hele a enaena na maka i ke ehukai

Nonono ula i ka la o Kaiona

Hu mai kou aloha no Waiawa

Me kou mau hoa imi naauao

Hoa holoholo o ka wa kamalii

Hoa alo i ka wela o ka la

I ke anu hoi a ka mea ua liilii

No ke kumu pu kekahi aloha

Aloha no oukou a nui loa

Eia o Ella Kahaepalani ua haalele mai

Ua wehe mai i ka pili hooko-o ia loko

Ua pau ke kani a ka manu i ka laau

Ke oloke wale la no i pua noni

E manao ana no paha ia KaupeCa

Me ke kanaka la ka wiliwili e oi nei

Ka hina wale i ke kula o Peekana

E uhai ana no paha ia KualakaCi

He alakai hewa nau e ka malie

Ua nui aku la no ke Kaiaulu

Mai houluulu mai oe i ko aloha

Ua hua ka nawao eia iloko

Kanikau aloha keia no Kahaepalani

Kuu kaikamahine mai ka hale malu i ka leo

Oia home a kuu lei e nanea ai

Auwe kuu kaikamahine kuu minamina pau oleCa

Kuu kaikamahine mai ka olu kohai o ka manako

E walea ana i ke onaona moani o ka pua alani

Oia wahi a kaua e luana ai

Auwe kuu leCi e, kuu aloha pau oleCa

Kuu kaikamahine mai ka malu o ka lau o ka wi

Ia wahi a kuu lei e haulani ai

Kuu hiapo mai ka makani kupa he Moae

Oia makani kaulana o ka aina e pa nei

O ka pa hoi a ka Waikoloa he anu

A ka Waikoloa makani o LihueCe

Hue mapuna haloi ka waimaka hanini i ou nei

O ke aloha kai kipa mai i ou nei

Homai ke aloha e wa-hi a paa

A hoi ae au he Inuwai mahope.

            E aloha auanei.

GEORGE R. KEOMAKA

Honouliuli, Ewa, Oahu

May 7, 1896

CCCCCCCCCC

He Kanikau no J. G. Hoapili.

CCCCCCCCCC

“Ua lupe opea o Kona e ka lai.

Ua hinua e ka lai ke kai a Ehu,

Ua ka-ia e ka waimaka o ka opua,

Ua hanini mauka o Alanapo,

Po ae la i ka ua naulu a weliCa”

Ia Mrs. R. A. Hoapili, Koehana wale:

            O makou iho, na palala-ui o kau kane alii, e noho ana ma Kona Akau, Hawaii, na hoa kulolia pu hoi o ua lani alii la, mai Puuanahulu a Puuohau, i ke kihi o ka okana.

            A no ka mea hoi, ma Honolulu, Oahu, ma ka la 1 o Mei, M.H. 1896, ua oluolu i ke Akua mana loa ka lawe ana aku i ua lani alii la au, a waiho iho ia oe e u hookahi aku nona, a ia makou hoi e paiauma pu aku me oe.  Ua hala kekahi wohi o ka hale o Keawe me Umi!  Ua hala i ka pea kapu o Kane i kukulu o Kahiki!

            “Aloha ka pohu o Kona,

            Aloha na ao hookiikii i ke kai,

            Aloha ka nalu owili o Kalapu,

            Aloha o Kona kai opua i ka lai,

            Opua hinano ua maile, a na waa e huli lua nei ka pea i ka makani,

            Kani ka-ea hoe waa ke aloalo la ina ma ka lae o ua aina la.

            Aloha!  Aloha pau ole!!”

Nolaila, e hooholoia:

            Akahi:  Me na naau i hele a mokumokuahua, me na maka i upehupehu, me na kuli i hele a maopaopa i ke aloha, ke komo pu aku nei makou e u pu me oe no kau kane lani alii i hala;

            Hooholoia:

            Elua:   Ke pule nei makou i na lani e hooloihi hou ia kou mau la ma ka aina, a na ke Akua e kokua mai ia oe.

            J. K. NAHALE

            J. KAELEMAKULE

            J. H. WAIPUILANI,

            W. M. KALAIWAA,

            W. D. KAEA

            W. MULLER

            ALEX. BURGESS

                        Na Komite.

North Kona, Hawaii, Mei 18, 1896.

CCCCCCCC

Ua Hala Ma-o

CCCCCCCC

E Mr. Lunahooponopono:

            Aloha oe:CE oluolu oe e hookomo iho ma kahi kaawale o kau nupepa e noho hookele nei, ke “Kuokoa,” i keia puolo waimaka i ike mai aia na makamaka ame na hoaloa mai Hawaii a ka mole o Lehua, a oia iho keia:

            Ma ke alanui Ema, ua haalele mai la i keia ola ana o Mrs. Kamealoha M. Kamakani i ka hora 6 a. m. o ka la 30 o Aperila, M. H. 1896.  He fiva ka mai i make ai; he ekolu pule wale no o ka hoomailo ana o keia mai maluna o kona kino a pauaho mai la i keia ao mauleule.  Ua kiiia no ke kaua, aka, aole no i loaa mai ka oluolu a hala wale aku la no.

            Ua hanauia o Mrs. M. Kamakani mai ka puhaka mai o Mr. Uku ame Mrs. Haui i ka la 19 o Sept., M. H. 1871, a make i ka la 30 o Aperial, M. H. 1896, a ua piha iaia na makahiki he 24 me 7 malama ame 11 la o ka hanu ana i na ea huihui o keia ao mauleule.  Ua hoonaauaoia oia e Mrs. Akeneki, a ua holomua no ma na mea i aoia ai ame ka ike hanalima e pili ana i na mea lihilihi, a pela aku.  Ua mare oia i ke kane ia Mr. M. Kamakani i ka la 1 o Ianuari, M. H. 1888, a ua hanau ma he 4 a laua mau keiki, elua i hala e aku mamua ona a he elua e ola nei.

            He wahine oluolu oia, a he heahea i ka mea i kipa aku i ko laua home.  He wahine malama pono i ka maemae o ka berita mare a hala wale aku la ma kela home nani ma o.  Aia maluna o ke kane i hooneleia i ka wahine ame na keiki i hooneleia i ka makuahine ke kaumaha ame ka luuluu, a nolaila, ke komo pu aku nei na makamaka, na hoaloha me oukou ma ka u pu ana.  Nolaila, e hoomaikaiia ka inoa o Iehova Sabaota nana i haawi mai a nana no i lawe aku.

            Owai iho no me ka luuluu,

                        J.W. MAHELONA.

Honolulu Iron Works, Mei 2, 1896.

CCCCCCC

HE HOALOHALOHA.

CCCCCCC

Ia Mr. M. Kamakani ame na keiki:

            O makou o na lala o ka Hui Hookuonoono Puuwai Lokahi o Honolulu, a ma ka inoa o ka Hui au e noho kakauolelo nei:

            Oiai, ua ili iho maluna ou ame na keiki i hooneleia i ka makua ke kaumaha nui makolukolu, me ka ehaeha ame ka waiohia;

            Oiai, oluolu i ka Makua Mana Loa, iloko o kona mana kupaianaha ka lawe ana aku i ke ola o kau wahine i aloha nui ia, a makuahine hoi o na keiki i hooneleia i ka makua;

            A no ka mea, o Mrs. Kamealoha M. Kamakani i hala aku la ma ke ala mau o na mea a pau, a ua hoomaha oia i kona luhi, a o kana mau hana maikai e lilo ana ia i kia hoomanao na ko ke ao nei e nana aku ai:

            Ke hooiaio aku nei makou i kona kulana ano maemae io me ke aloha, oiai kana mau hana maikai e waiho nei iwaena o ko olua home; nolaila, e

            Hooholoia:  Ke komo pu aku nei makou, ka Hui Hookuonoono Puuwai Lokahi o Honolulu, me oe iloko o ke kumakena ame ke kanikau pu ana me ke aloha ame na keiki pu hoi i hooneleia i ka makua:

            E hooholo hou ia:  Ke pule nei makou i ke Akua Kahikolu Hemolelo Loa e hoomama mai k kou kaumaha ame na ehaeha o keia mau la ame na keiki i hooneleia i ka makua, “no ka mea, o kakou ke hele aku ana imua ona la, aole ia e hoi hou mai ana!”

            E hooholo hou ia:  E hookomoia keia mau olelo hooholo ma ka nupepa Makaainanana ame ka nupepa Kuokoa.

            O makou iho no me ka walohia, ma o ko makou komite la.

                        JOHN W. MAHELONA,

                        JOHN NAWAI,

 

                        N. NIEHU,

                        J. W. HINAI,

                        W. B. OPULAUOHO.

                                    Na Komite.

Honolulu Iron Works, Mei 2, 1896.

 

NUHOU KUWAHO

CCCCCCCCC

MAKEMAKE KA PAPA O ROMA E HOOPONOPONO AHA

UWAO IA KA NINAU O CUBA.

 

Nu Ioka.  Mei 4.CUa loa mai he lono mai Maderida mai, ia i ka nupepa Herald, e olelo ana:  Oiai e nui ana no leo hoole mawaena o ka poai o na luna Aupuni no ka oiaio o ka lono e pili ana i ko ka Pope koi ana, ma o kona elele la maanei, ia Sepania e ae oia i ka Amerika noi no ka hooponoponoia ana o ka ninau o Cuba ma ka Aha Uwao, ua manaoio loa ia nae ka oiaio o ua lauahea la mawaena o na kanaka o ka oihana koa ame na luna Aupuni cub.

            Ua loaa nae kekahi lono kuikawa i ka nupepa Herald mai Roma mai:

            Aole mea i ike ia maanei ma ke Keena Oihana Kuhina Sepania no ka mea e pili i ka hooponopono Aha Uwao i mano ia na ka Pope e lawelawe ma ka ninau o Cuba.

 

MALUHIA O NIKARAGUA.

            Managua.  Mei 4.CUa hoouna aku ka Peresidena o ka poe kipi, oia o Kenerala Baca, i komite o na kanaka kalepa mai na aina e mai maloko o Leona ia Peresidena Zelaya ame ke Kuhina Amerika, Lewis Baker a na laua i hooponopono a i hoolala i na olelo o ke kuikahi.  Ua koi o Peresidena Zelaya e haawi pio holookoa mai na kipi, me ka nana ole i mau aelike.  Ua ae ia keia e ka aoao kipi.  A i keia la me na hae e welo ana i komo mai ai na koa Aupuni iloko o ke kulanakauhale o Leone, a lawe pio ae a ua haawi pio mai la lakou i ka lakou mau lako kaua.  Ua haalele iho na alakai o ka poe kipi, ka lakou Peresidena ame na hoa o ko lakou Aha Kuhina i ka aina, i pakele ai ko lakou mau ola.  Ua hoike pili Aupuni aku o Kunia Gomeza i ke Kuhina Amerika Baker ua pau ke kaua a ua hoonipaa hou ia ka maluhia.  He mau la pokole wale no koe a weheia ke awa o Corinto me ka oihana kalepa.  Ua manao ia e haalele koke iho ana ia nei ka mokukaua Alert no ka Akau.

 

MAKE KE ALII AIMOKU O PERESIA.

            Wasinetona, Mei 1.  Ua loaa mai he lono telegarama ia Kuhina Olney ma ka hora 2 a oi o keia auwina la mai a Kuhina McDonald mai, ma Teherana, Peresia:  “Oiai ke Sa (Moi o Peresia) i hele aku ai ma ke kahua hoomana ma kahi kokoke i ke kulanakauhale nei i keia la, a iaia i komo aku ai i ke keena hoano o loko, ua ku mai la oia i ka pu a kekahi kanaka i hoaahuia me ka lole wahine.  Ua komo mai ka poka ma kahi kokoke i ka puuwai.  Iloko o elua minute la lele loa ae la kona hanu.  Nui ke kaumaha, aka, maluhia no nae.”

            Mahope iho o @ loaa ana mai o ka lono o ka pepehiia ana o ke Sa, ua hoouna telegarama aku o Kuhina Olney i ke Kuhina Amerika McDonald ma Teherena, e kauoha ana iaia e lawe aku i na hoalohaloha ana a ka Peresidena o Amerika i ke Kuhina Nui o Peresia.  Ua hopuia ke kanaka limakoko mahope koke iho o kona hooko ana i ka hana a kona puuwai eleele i kuko ai.

 

KE KUMU O KEIA PEPEHIIA ANA O KE SA O PERESIA.

 

            Teherana, Mei 4.CUa hoomaopopo loa ia o ke kanaka puuwai eleele nana i pepehi i ke Sa o Peresia, nona ka inoa o Nazra-ed Din, oia o Mollah Reza, he kanaka pili paa mahope o Sheikh Jem Alledin, ka niuhi hoalala kipi ma Peresia, a i kipakuia ai ma ka makahiki 1894, mahope iho o kona hoopaiia ana no ka hewa kipi.  Ua hoike maoli ae keia lima-koko o kona hana ana a hooko ana hoi i keia hana, mamuli ia o kekahi ohumu kipi i hanaia e kekahi poe, a mamuli o ka haule ana o ka hoailona maluna ona, ua lilo iaia ka hooko ana o ua hana la.  Ua hoomaopopo koke ia ae la ma ke kulanakauhale o Konekakina, Tureke, i hoopunanaia ai keia hana.  Ua hoike pu ae nohoi ua lima-koko la, he lehulehu loa no na manawa ana i koke ai i ke Sa i na wa i hala ae, aole nae he wa i oi loa aku ai kona kokoke loa iaia elike me ko keia wa.

 

KA AHA KUHINA O CANADA.

 

            Ottawa, Mei 1,CMa keia auwina la, waihoia aku la keia Aha Kuhina e Sir Charles Tupper e ke Kiaaina, a ua pau loa na hoa o ua Aha Kuhina la i ka hoohikiia e ka Haku Aberdeen, koe wale no o Lutanela Konela Pisdale:

            Presidena o ka Aha KukaCA. R. Angers.

            Luna Leta NuiCL. O. Tailon.

            Kuhina Kai LawaiaCJohn Castigan

            Kuhina Alanui haoCJohn G. Hoggart.

            Kuhina WaiwaiCGeorge E. Foster.

            Kuhina o na Hana AupuniCA. Desgarbus

            Kuhina KanawaiCA. R. Dickey

            Kuhina KoaCLutanela Konela Tisdale

            Kuhina MahiaiCW. H. Montague

            Kuhina KalaiainaCHugh John MacDonald.

            Kakauolelo AupuniCSir Chas. Tupper

            Kuhina KalepaCW. B. Ives.

            Loio KuhinaCSir C. H. Tupper

            Luna D Luna DuteCJ. F.

            Luna o na Loaa KulokoCLutanela Konela E. G. Prior.

            Na poe e aeCSir Frank Smith, Hon. Donald Ferguson, Hon. J. J. Ross (Lunahoomalu mua o ka Hale o na Senate).

 

CCCCCCC

            Ua malamaia ae e na hoahanau Katolika Pukiki o loko o keia kulanakauhale maloko o ka pa halepule o Maiie-o-ka-Malu, mai ka po Poaono mai o kela pule aku nei a hoea mai i ka la Sabati, he ahaaina hoomanao no ka la hoano o ka Uhane Hemolele.  Ma ka la Sabati mai i hohoiaia mai ai he papa ahaaina o na ano mea ai apau.

 

Hooaha Kumau.

 

            Aole loa e maikai a oluolu ke ola ana o kekahi mea kino uhane ola oia ina he aaiole kona akepaa a hiki ole ke lawelawe i kana mau hana me ka hololea.  E hahai ana ka nalulu a me na nawaliwali e ae ma ka m@ali o ke ake ponalo.  He mea oiaio keia i hooiaio ia ma na wahi o na poai oluolu akau iloko o ka hapaha keneturia, o na HUALE A AYERS, oia wale no ka LAAU HOOLA AKE ana i ka lepopaa, ka nalulu eha, na mai oloko o ka opu, a ma ke ano LAAU OHANA aohe onal lua@ like ai.

            O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kina o ko o ka ili, e hoopau ana i na maluhiluhi kanaka.  E pepehi a ulupa ana i na PUHA, e hoola ana i na pohapohahi o ke ola ana a e kipaku loa ai i na ano mai a pau.  O ka poe mai no ka wali pono ole o ka ai, ka nawaliwali mau a ano mai e ae i ulu ae mai ke koko ino mai, he mea poho e inu i ka laau SASAPARILA A AYERS.  He laau e hooikaika ai i ka nawaliwali, a e hoopuipui mai ai i ke kino.  Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

            O ka Ayers Cherry Pectoral laau, aohe lua ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na mai pili i ke ake me ka hikiwawe loa.

            O na Huaale a Ayers, na Sasaparila a me ka Ayers Chery Pectoral, aia kahi e loaa ai ma ka Halekuai o ka

Hollister Drug Co. Lt.

@ @ @ @ Paeaina Hawaii.

2514

 

KAKELA ME KUKE

 

Ka Halekua Nui

CO NaC

WAIWAI LIKE OLE

NA MEA

HANA KAMANA A PAU

Na lako pili hao kukulu hale,

Na kepa,

Na lei ilio,

Na kaulahao ilio,

Na Pahi,

Na Upa,

Na kope hulu,

Na Pulupulu.

 

PALAU LIO

            Na mea mahiai

            Na au @

            Na au koi,

            Na kua bipi,

            Na lei bipi,

            Na kaulahoa bipi,

            Na uwea pa,

            Na kaa palala,

            Na mea piula,

            Na ipuhao.

 

Makau me Aho Lawaia

            Na Iliwai

            Na hulu pena,

            Na pulumi

            Na pena, me ka aila,

            Na kopa

            Na aila mahu

            Na pakeke

Na pakeke hao,

Na kapu hao,

Na peuda,

Na kukaepele,

Na uwiki, a me

Na ipukukui.

 

Mikini Humuhumu aulara

 

Wilcox, & Gibbs Hookahi Lopi

ka Remingon, Elua Lopi.

            A me na ukana he nui loa kela ai o me keia ano.

Kakela me Kuke