Ka Nupepa Kuokoa, Volume XXXV, Number 23, 5 June 1896 — Page 4

Ka Nupepa Kuokoa

KE KILOHANA POOKELA NO KA LAHUI HAWAII

 

HAAWINA

KULA. SABATI.

 

            II.  11. June 14, Ko Iesu kaulia ana ma ke kea.  Luka 23:33-46.

            A HIKI aku la lakou i ka wahi i kapaia o Kalevari, malaila lakou i kau aku ai iaia ma ke kea, a me na lawehala ma ka akau kekahi, a ma ka hema kekahi.

            34 Alaila olelo aku la o Iesu, e ka Makua e kala iho oe i ko lakou nei hewa, no ka mea, aole o lakou ike i ka lakou mea e hana nei.  Puunaue ae la lakou i kona mau kapa, hailona iho la.

            35 Ku iho la no hoi na kauaka e makaikai ana, a hoomaewaewa aku la me ko lakou mau alii, i aku la, ua hoola ka oia ia hai, a ina oia ka Mesia ka hiwahiwa a ke Akua, e hoola kela iaia iho.

            36 Hoomaewaewa aku la hoi na koa iaia, hele aku la lakou a haawi aku i ka venega iaia.

            37 A olelo aku la lakou, ina o oe ke alii o ka poe Iudaio, e hoola oe ia oe iho,

            38 He palapala hoi maluna ona, he Roma, a he Hebera ka olelo i kakauia'i ia, OIA NEI KE ALII O KA POE IUDAIO.

            39 A o kekahi o na lawehala i kau ia, hoino aku la oia iaia, i aku la, ina o oe ka Mesia, e hoola oe ia oe iho ame maua.

            40 A olelo ae la kekahi e ao ana iaia, i ae la, aole anei ou makau i ke Akua? maloko pu hoi oe o ia make hookahi.

            41 A ia kaua, he pono ia, no ka mea, ua loaa ia kaua ka uku pono o ka kaua hana ana; aka, oia nei, aole ia i hana hewa iki.

            42 Olelo aku la hoi oia ia Iesu, e hoomanao mai oe ia'u, e ka Haku, i ka wa e hiki ai oe i kou aupuni.

            43 I mai la hui o Iesu iaia, he oiaio ka'u e olelo aku nei ia oe, i keia la o oe pu kekahi me a'u iloko o ka paradaiso.

            44 A i ke ono o ka hora, he pouli maluna o ka honua a pau, a hiki i ka iwi o ka hora.

            45 Ua hoopouliia iho la ka la, a nahae iho la mawaenakonu ka paku o ka luakini.

            46 A kahea aku la o Iesu me ka leo nui, i aku la, e ka Makua, iloko o kou mau lima ke waiho aku nei au i ko'u uhane! A pau kana olelo ana ia, make iho la ia.

            Pauku Gula.  1 Korineto 15:3.  Ua make o Kristo no ko kakou hewa. elike me ka Palapala Hemolele.

            Manao Nui.  E pono ke hoomanao i ke alahele i ka pomaikai lani oia no ma ka malu o ko Iesu laau kea.

            Olelo Hoakaka.  Pau ko Iesu malama ana i ka ahaaina moliaola me kona poe haumana, ua hele aku oia me lakou a hiki i Getesemane.  Oia no he lala oliva ma ka aoao o ka mauna Oliveta, kahi a Iesu i hele pinepine aku ai me kona mau haumana no ka malama ana i ka wa maluhia, kaawale no ka pule mehameha.  Ua hopuia malaila e na makai, i alakaiia e Iuda Isekariota, i mea e paa ai oia a pio me ka hoohaunaele ole ana i na ahakanaka.  Ua hookolokolo ia e ka Ahakuka Iudaio a hoahewa ia ma ke ano he mea hoohiki ino.  Imua o ka Aha Roma, ua hoahewaia ma ke ano he kipi, e hoeueu ana i ka haunaele.  Ua makemake o Pilato e hookuu aku iaia, aka nae, ua lanakila na walaau o na Parisaio, e koikoi ana e kaulia o Iesu ma ke kea, a hookuuia o Baraba.  Alaila, ua kaiia aku o Iesu i ke ahua Karevari, a malaila ua kaulia oia ma ka laau kea ana i hali aku ai ma kona poohiwi mai ko Pilato halealii aku.

            33 Kalevari - ma ka olelo Latina, ka iwi poo, puniu.  Ua kapaia ka Ahaluna ma keia inoa no ke ano like ma ka nanaina.  Kea-he laau keia he mau kapuai he umi ka loloa me ka laau pokole malalo o ka welau ma ke ano kea.  Ua hoopaaia na wawae a me na lima me na kui, alaila ua hookuia ka laau a paa ma ka lua i eliia nona.  He uku hoopai hooweliweli keia o ka lahui Roma, he hoopai ikaika loa hoi no na kanaka ino loa.  Ua mau ke ola a me ka eha no na la ekolu paha, 34 Aole o lakou ike - he kumu keia no ko Iesu aloha huikala, aole nae he kumu pale no ko lakou hewa.  puunaue - kona papale, kamaa, kaei, kihei.  Hailona na koa eha no kona palule lola.  35 Hoomaewaewa, - aole nae i hiki ke ku me ke eehia, a nolaila, ua hoomaka lakou i keia mau olelo hoohenehene.  36 Veniga - ka waina awaawa, ka mea inu maa mau no na kanaka ma na aina hikina.  Aole nae i hiki ia Iesu ke inu mamua o ko lakou kaili ana aku i ke kiaha mai kona mau lehelehe aku.  37 Alii, oiai he mea ilihune, nawaliwali, i haalele loa ia, o Iesu.  38 Palapala - e hoomoakaka ana i ke ano o kona hewa.  39 Lawehala - he mau powa i hoopai pu ia, oiai nae, ua hoohenehene laua i ko Iesu alii ana.  40 Akua - imua ona, ka mea hookolokolo mamuli o ka pono, nona e hoopomaikai ai no hoi i ka mea hewa ole.  41 Kaua - ua kaena laua no ko laua kipi ana aku i ke aupuni malihini, oiai ua ike pono laua aole pela ko Iesu manao a me kona hana.  42 Aupuni - ua noonoo oia ia Iesu ke alii o ka pono, a iini nui e noho pu me Iesu ma kona pomaikai hala ole.  43 Paradaiso - he huaolelo Peresia keia, ma ke ano he paka, e like me Toma Kuea ma Honolulu, he wahi malapua nunui a nani loa, he inoa hou no ka Edena hou a ka poe Iudaio i manaolana e komo ai mahope o ka make ana.  44 Ono- mai ke kakahiaka mai, oia ka hora awakea.  Pouli - aole keia ka pouli o ka la no ka mea he mahina hou ia mau la, aka nae, he pouli ano e keia, he hana kupaianaha, me he mea la ua palaimaka ka lani a me ka honua no keia hana hoomainoino aku i ka Haku.  45 Nahae - he hoailona keia o ka pau ana o na hana hoomana kahiko.  Ua pau na mea e pale aku ai i na kanaka, o hookokoke lakou i ke Akua.  O Iesu Emanuela, oia no ko kakou hoalauna, Heb.10:19-20.  46 Waiho - mamuli o kona maoli e make ai paha, e ola ai paha mamuli o kona makemake ponoi.  O ke kumu maoli o kona make ana, ola no, ua moku kona puuwai, Ioane 19:34.

            I. O Iesu ka mea lawehala i hoomaewaewaia, 33-38.  Mahea i kaulia ai o Iesu ma kea?

            Heaha ke ano o ka inoa Kalavari?  Ua ike ia anei keia puu mawaho o Ierusalema, ma ka aoao hea?  No keaha la kona kaulia ana ma ke kea, oiai aole keia he uku hoopai Iudaio?  Ehia mau hora no ko Iesu kaulia ana?  Ua oi aku anei ko Iesu eha ma ke kino paha, ma ka naau paha?  Heaha ke kumu no kona eha ma ka manao, oiai aole i hana hewa oia?  Ehia mau olelo, no Iesu mai ma ke kea?  Ina paha ua ike na kanaka lawelawe ike ano o ko lakou hana, ua hiki anei i ke Akua ke huikala ia lakou?  Ehia maukoa i puunaue mai ai i kona mau aahu?  Heaha ka wanana i ko ai, Halelu 22:18?  Heaha na hana o na luna Iudaio?  Nokeaha la i hoomaewai ewa ai lakou?  ua manaoio anelakou i kona alii ana ina paha ua iho mai oia mai ka laau kea mai?  Heaha ka vinega na na kou e hapai ai imua o kona waha?  Heaha ka palapala maluna o kona poo?  Ua oiaio anei ka olelo, Hoikeana 19:16?  Owai na mea i kaulia pu me ia ma na kea okoa?

            II.  O Iesu ke Akua Hoola, 39-43. 

            Heaha ka olelo hoohenehene o kekahi powa?  Heaha ka olelo ao aku o kekahi ?  Heaha kona noi aku ia Iesu?  Ua paulele anei oia ia Iesu kona Akua Hoola?  ua mihi anei oia i kona hewa?  Heaha na oiaio ana i ae aku ai ma keia noi?  Ua komo pu anei oia ia la hookahi i ka pomaikai lani?  Ua loaa anei iaia keia pomaikai mau loa no kekahi hana maikai?  Heaha na ku lana ino a ka powa hoohenehene i hoike mai ai?  Heaha ka olelo hoopomaikai i kela ame keia mea lawehala, Roma 10:13.

            III.  O Iesu ka Mohai Kalahala no na mea Hewa, 44-46.  Heaoa ka mea kupaianaha i ka wa a Iesu i kaulia ai ma ke kea?  he pouli o ka la anei e like me na pouli maa mau?  No keaha la?  I ka hora  hea make loa o Iesu?  Heaha ke hea make loa o Iesu?  Heaha ke kumu no kona make ana?  Ua make anei oia mamuli o kona makemake ponoi, Ioane 10:18?  Heaha ka hana mana oi aku o ke kamahao, ko Iesu iho ana mai ke kea mai, ko Iesu ala hou ana mai ka make mai?  Ke manaoio nei anei na kanaka ia Iesu no ke ano kamahao o kona mau hana mana, a i ole paha no kona kulana maoli?  Heaha ke kahi poino kupaianaha ma ka luakini?  Heaha ka mea i hoailonaia, 2 Kor. 3:14-16?  Heaha ko Iesu olelo hope loa?  Heaha ka olelo hoike o ka luna koa, Mataio 27:54?  Ua manaoio aku anei oe ia Iesu kou Akua hoola huikala? 

            Manao Pili.  1 Ina nui ke kumukuai o ko kakou hoola ia ana, heaha kau hana e pono ai ma ke kea o Iesu ko ke Akua aloha kalahala?  3 Heaha na manao ano nui nou i noonoo ai ma ka nana ana i ke kea o Iesu?  4 Ina kokoke paha oe i ke kea o Iesu e make mau loa anei oe?  5 Heaha ke noi hookahi e ola ai kou uhane?

 

            No kahi hapaha dala hookahi iloko o ka pakeke o ke kanaka, he lehulehu na pomaikai e loaa ana ma oia wahi hapaha 'la; a o ka hoohana ana i kela ame keia ano hana e wiwai io maoli ai ua wahi hapaha dala nei, oia ka ninau e huliia ai e kela ame keia.  Ma ko makou manao, aole paha he mea i oi aku ka waiwai mamua o ka pomaikai e loaa ana, mamuli o ke kuapo ana i ua wahi hapaha dala 'la, no kekahi omole LAAU HOOLA KOLERA A KAMALENA.  He laau keia i kupono e hoolako ia e kela ame keia ohana.  E kuai ia ana e na poe kuai ia ana e na poe kuai laau a pau.  O BENSON SMITH & CO. na Agena o ko Hawaii Pae Aina.

 

MEA HUNA POHIHIHI

 

MOKUNA IV.

HOOMAKA O ADELO I KANA HOOKOLO ANA I KA MEHEU O KA MEA HUNA POHIHIHI- HE PALAPALA HOOHIKILELE-KA MAKAI KIU-OWAI O NEGWINA?

 

            E kuu makamaka heluhelu, eia no kaua i keia wa ke nana nei no ka Haku Adelo.

            Oiai no na onou ku-a-ua e haule hoomaha ole ana, elike no me kau e ka mea heluhelu i ike ae nei ma na mokuna i hala, pela no ia e nee nei i keia wa, a ma ia manawa hoi aia o Adelo ke huli hoi la no kona hale, oiai hoi ke kapa vaniki ame ka mamalu e pale ae ana i na hoopulu elo ana iho a na kulu paka-ua maluna ona.

            Oiai hoi oia e hele ana, ua ka-lilo loa ia kona noonoo apau no na mea ana i ike ai me ke pahaohao nui ma Hametona Kakela i na hora kokoke mamua iho.  Iaia nohoi e nanea ana i ka hele, a aneane he mau minute liuliu ke kowa o ka manawa kona mamao mai ka hale mai o Hametona, ua ku iho la ia me ka hikiwawe loa, a lele koke ae la kona lima akau a paa i kona lae, oiai e paa ana kona lima hema i ka mamalu.  Aole hoi i liuliu pane ae la ia:

            "Ae-oia ka'u e hana ai.  Iloko auanei o hookahi pule mai keia la aku, e noho haku no au maluna o na mea huna pohihihi a keia wahine hookalakupua e hunakele nei.  Ho! Ho!  E hoouna aku ana au i kekahi ilio hanu mea huna pohihihi ma kona meheu.  Beatirisia - ha, ha- e hoouna aku ana au i makai kiu ma kou meheu."

            I kela wa i olino ae ai ka hauoli ma kona mau onohi maka, a ia wa i hoomau aku ai oia i ka hoi ana no kona hotele, kahi aha i olelo ai oia kona home no ka manawa.

            Iaia i hoea aku ai no kona rumi, hookani iho la ia i ka bele kahea, a wehe ae la hoi i kona mau kaoa hele-ua.  A iaia nohoi a noho iho maluna o kona noho, ia wa i komo mai ai ke kuene elike me kana i kahea aku ai ma ka leo o ka bele, a e paa mai ana hoi ua kuene la i kekahi palapala ma kona lima.

            "He leta keia nau, e kuu haku," wahi a ua kuene la i pane mai ai, me ka hoomau ana mai hoi i ka olelo ana, "Na kekahi kanaka i lawe mai nei i keia palapala, mahope iho o kou haalele ana i ka hotele nei, a ua olelo mai oia e hoi hou mai ana no oia ianei i keia ahiahi."

            "Ua pono," wahi a Adelo i pane aku ai i ke kuene, oiai hoi oia i kakau iho ai ma ke kua o kekahi pepa inoa ponoi ona a hookomo iho la iloko o kekahi wa-hi leta, me kona uwepa ana ae a paa.  Alaila, olelo aku la ia i ua kuene la:

            "Makemake au e hoouna koke ia aku keia palapala.  O ke kanaka e hoea mai ana mahope aku o keia wa e makemake ana e ike ia'u e hoouna loa mai iaia i ko'u rumi nei."

            Alaila, kakau iho la oia i ka inoa ma ke kua o ka wa hi leta, oia hoi, MR. JAMES RUSH, MAKAI KIU KUIKAWA, alaila, haawi aku la oia i ua palapala la i ke kuene, me kona haawi pu ana aku hoi iaia i mau wahi apana dala i mea hoohoihoi i ua wahi kuene la, a olelo aku la, he mea pono ke hoouna awiwi ia kela palapala i kona wahi i makemakeia ai.

            Haalele mai la ke kuene ia loko o ka rumi, a noho pono iho la ua Haku opio Adelo nei maluna o kona noho a olelo wale iho la no oia iaia iho:

            "Aole auanei e liuliu a wehewehe pono ia na aoao apau o keia nanehai.  O Rush, oia ka makai kiu helu ekahi o Ladana nei - ae - ua like loa ia me ka ilio hahai holoholona akamai.  Oia auanei ke kila pao nana e wawahi aku na paia paa o na mea huna a Beatirisia."

            Olino ae la ma kona mau onohi maka na hiohiona o ka hauoli, me he mea ia e nopu hulili ana ka hoihoi iloko o kona houpo, no kona manao ana, aole e mamao loa ka la mai ia hora aku a kau no oia i kaupoku o Hanalei, a lilo oia i haku hanohano loa no ka Hale Kakela o Hametona, a o ka Ui hoi o ua hale kakela la i aliiwahine hanohaweo ia nana. 

            Iaia e lana hakukoi ulumahiehie ana me keia mau manao, aia hoi, hekau aku la ka ikena a kona mau onohi maka maluna o ka palapala a ke kuene i lawe mai ai i na sekona mamua iho, a ia wa i lalau aku ai oia i ua wahi palapala la, me ka ninau ana ae:  "Nawai la hoi keia palapala?"

            Aka, iaia i nana iho ai ma ka inoa mawaho o ka wa-hi leta, ike iho la ia i ke ano o ke kakaulima, a o ka wa ia i puia koke ae ai ka haikea ma kona mau papalina, a liuliu hoi, aaki iho la kona mau ku'i.

            "He keu!  Na Negewiua keia palapala," wahi ana i pane ae ai.  "Nana ponoi no i lawe mai nei i keia palapala!  Heaha la ke kumu o kona hoi hou ana mai nei i Enelani nei i keia wa?  Kuhi au, ua make oia."

            I kela wa i hahae ae ai ia i ka wahi leta me na manamana-lima haalulu.  Lalau iho la ia i ka palapala o loko o ua wa-hi leta la a heluhelu iho la.  He oiaio, e hoike maopopo ae ana na huaolelo a me na hopunaolelo i hoopaaia iho maloko o ua wahi palapala la, he kanaka naaupo ka mea nana i kakau.  Penei na olelo o ua palapala nei:

(Aole i pau.)

 

Olelo Hooholo a ka Halawai Makaaianana.

I ka nupepa "Kuokoa:"

            Aloha oe:  -O keia malalo iho nei oia ka Olelo Hooholo a kekahi Halawai Makaaianana o ka Apana o Kona Akau i malamaia ma Keauhou, May 28th, 1896, a i hooholo lokahi ia:

            OLELO HOOHOLO, HOOHOLOIA:

            O makou o kekahi o na makaaianana o ka Apana o Kona Akau, Mokupuni o Hawaii, i akoakoa mai ma kekahi Halawai Makaaianana akea, i malamaia ma ka Halekula o Keauhou, ke ae nei makou e hele aku e kakau a e hoopaa i ko makou mau inoa imua o ko makou Luna Ohi Auhau me ke kuni ana i ko makou mau manamanalima nui mamua ae o ka la 1 o Augate, 1896, a e lilo o Naniani Kanealii i Komite no ka hai ana aku i na makaainana i koe mawaho aku o keia halawai no ia mea, a e hoounaia keia Olelo Hooholo i ka nupepa "Kuokoa."

HENRY L. KAWEWEHI, Kakauolelo o ka Halawai.  Keauhou, May 28, 1896.

 

            He mea pono i kela ame keia ohana ke loaa ona laau lapaau mama no na ma'i o ka opu.  I laau lapaau puhili ole no ka "Moku ino loa o lepo" (Diarhea) Nahu, Umii, Kolera ame na ma'i apau o ka opu, aole he laau lapaau oi aku o ka maikai, elike me ka PERRY DAVIS LAAU PENIKILA (Pain Killer).  Ua lawelaweia keia laau no na makahiki he kanalima, a ke hana mau ia nei i kela ame keia la, ma na aina apau o ka honua nei.  O ka Hui Kua Laau Lapaau o Holister, ka Agena.

 

EBINE LANOKA.

 

MOKUNA IV.

            "He nui a lehulehu na kanaka i hele mai imua o'u e nonoi mai e ae aku au e kii aku lakou e hoomainoino ia oe, aka, ua kaomi aku au ia lakou me ko'u hoomalimali ana ia lakou.  Nolaila, mai pale oe i keia leo o kau kauwa haahaa.

            "Agastine. 

            Hale Kakela Mauna Hoomaha." 

            I ka loaa ana aku o keia leta i ka Moi, ua heluhelu iho la oia me ka maka'u nui, oiai oia iho la no ke ano o ka poe ino a hoomainoino oiai oia e noho ana iloko o ka mana a me ka ikaika, aka, i ko lakou wa nae e haule ai a nele i na kakoo, o lakou ka poe oi loa o ka maka'u wale a me ka hopepe ino loa.  I ka hoomaopopo pono ana o ua Moi la ua nele io oia me na kakoo, ua uwe iho la oia me he kamalii la a kau ae la oia maluna o kona lio me ka hoanoe ana iaia iho, a holo pu aku la oia me na elele a ke Kauna Agastine no kahi noho o ke Kauna.

            He mea e ke kahaha o ke Kauna a me kona ohana no keia hoea kino ana aku o ua Moi la, oiai iloko o na la o kona hanohano a me kona mana, aole loa ona kipa ike aku, a hoomaopopo iki aku i ke Kauna a me kona ohana, aka, i kona wa nae i haule ae a nele i na kakoo, ua hoomaka koke oia e holo io ke Kauna la, me kona manao e maluhia oia malalo o kana malama ana, no ka mea, ua maopopo no iaia, he kanaka ke Kauna a ka lehulehu i hilinai nui loa ai, a ua lilo hoi kona leo i mea hooloheia e lakou.

            No ia mea, ua hoomaopopo iho n oua Moi la, aole loa e pakele ana ina oia e holo ana i kahi e aku, oiai o kona poe koa ponoi no kona poe e poino mua loa ai, no ka mea, ua hoopiha mau ia ko lakou mau naau me ka hoonaukiuki nona no na hana ino a ua Moi la maluna o lakou i na wa i hala.  I ka la i loaa aku ai ka lono i ke aloalii ua pio ka hui powa, ua ike koke ia no ke ano e o na koa, a ua haalele koke ke ano hopepe mai ko lakou mau ano ae, a ua ikeia ko lakou hoomakaukau koke ana i ka lakou mau mea kaua mai ka loaa mua ole ak o na mea kaua mai na aliiko aku.  Mai kela hora mai ua nohoalii iho la ka maka'u a me ka weliweli nui iloko o ka naau o ua Moi hookan la, a ua ike no oia he hoowahawaha nui loa na makaainana laia mamuli o kana mau hana lokoino o hoomainoino, a ua maopopo no hoi iaia aole e nele ke ala like mai okela poe a hana mai maluna ona i kekahi mea i kulike ai me kana i hana ai maluna o lakou i na la i hala ae.  He mea e kona hauoli i ka loaa ana mai iaia he palapala mai ke Kau@ mai, no ka mea, ua ike iho la oia eia no ka ke aloha iloko o ka puuwai o kela kanaka aloho alii oiaio ke Kauna Agastine mai kona mau la opio mai, he ohana malama alii kela mai ka po mai, oiai mai kona mau kupuna mai, oia ko lakou kulana he poe makua a he poe alakai no na Moi kahiko o Europa.  Ua kaulana ka inoa o Agastine ma ke ano he kuhikuhi puuone no na Moi o na nohoalii o Europa, a he poe aloha alii hoi mai kahiko mai.  Nolaila, iloko o na makahiki o ka haalele ana i na ao maikai a Agastine, nolaila, ua komo mau ka ehaeha iloko o ko ke Kauna naau, oiai ua minamina nui oia no ka punihei o ka Moi i na alakai hewa a ka poe lapuwale.  Aole ona huhu maoli no ka Moi, aka, he minamina kona nona, a ua maopopo no iaia e hoea mai ana no he la no ua Moi la e mihi ai no kana mau hana hewa, a e hoea mai ana no he la no ua Moi la e holo aku ai imua ona no ka hoopakeleia mai, a eia ua la 'la.

(Aole i pau.)

Hoolaha Loio.

W.R. KAKELA,

Loio a he Kokua ma ke Kanawai. 

HE LUNA HOOIAIO PALAPALA.

 

Hoolaha Kumau.

WILDER & CO., (WAILA MA.

Mea Kuai Papa a me na Lako kukulu hale o na ano a pau, a me na mea e ae a pau e pono ai e ka hale.

Kihi o Alanui Moiwahine me Papu.                396-9

 

PAPA! PAPA

AIA MA KAHI O

Lewers & Cooke (LUI MA)

Ma ke kahua hema o Alanui Papu me Moi.

E LOAA NO NA PAPA NOUAIKI

O kela a me keia ano.

NA Pani Puka, na Puka Aniani, na Olepelepe, na Pou, na O'a, na Papa Hele, na Papu Ku, me na Papa Moe he nui lo

NV. PILI HALE O NA ANO A PAU

A me na

WAI HOOHINUHINU NANI

O na ano a pau loa.

Na Balaki o na Ano he Nui Wale

            Ke hai ia aku nei oukou e na makamaka a pau, ua makaukau keia mau makamaka o oukou hoolawe aku ma na mea a pau ili ana ma ka laua oihana no ka Uku Haahaa Loa, e like me ka mea e holo ana mawaena o Laua a me ka Mea Kuai.

Hele Mai e Wae no Oukou iho.

 

Hoolaha Kumau.

            Aole loa e maikai a oluolu ke ola ana o kekahi mea kino uhane ola ina he aaiole kona akepaa a hiki ole ke lawelawe i kana mau hana me ka hololea.  E hahai ana ka nalulu a me na nawaliwali e ae ma ka moali o ke ake ponalo.  He mea oiaio keia i hooiaio ia ma na wahi o na poai oluolu akau iloko o ka hapaha keneturia, o na HUALE A AYERS, oia wale no ka LAAU HOOLA AKE maikai loa i ikeia.  E hoola ana i ka lepopaa, ka nalulu eha, na ma'i oloko o ka opu, a ma ke ano LAAU OHANA aohe ona lua'e like ai.

            O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kino o ke o ka ili, e hoopau ana i na maluhilukanaka.  E pepehi a ulupa ana i na PUHA, e hoola ana i na pohapoha hi o ke ola ana a e kipaku loa ai i na ano ma'i a pau.  O ka poe ma'i no ka wali pono ole o ka ai, ka nawaliwali mau a ano ma'i e ae i ulu ae mai ke koko ino mai, he mea pono e inu i ka laau SASAPARILA A AYERS.  He laau e hooikaika ai i ka nawaliwali, a e hoopuipui mai ai i ke kino.  Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

            O ka Ayers Cherry Pectoral laau, aohe lua ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na ma'i pili i ke aku me ka hikiwawe loa.

            O na Huaale a Ayers, na Sasaparila a me ka Ayers Cherry Pectoral, aia kahi e loaa ai ma ka Halekuai o ka Hollister Drug Co. Lt.  Na Agena me @ Paeaina Hawaii.  2514.

 

KAKELA ME KUKE

Ka Halekuai Nui o na WAIWAI LIKE OLE NA MEA HANAKAMANA APAU

Na lako pili hao kukulu hale, Na kepa, Na lei ilio, Na kaulahao ilio, Na Pahi, Na Upa, Na kope hulu, Na Pulupulu.

PALAU LIO

Na mea mahiai, Na au @, Na au koi, Na kua bipi, Na loi bipi, Na kaulahao bipi, Na uwea pa, Na kaa palaia, Na mea piula, Na ipuhao.

Makau me Aho Lawaia

Na Iliwai, Na kaula, Na huiu pena, Na pulumi, Na pena, me ka aila. Na kopa, Na aila mahu, Na pakeke, Na pakeke hao, Na kapu hao, Na pauda, Na kukaepele, Na uwiki, a me, Na ipukukui.

Mikini Humuhumu a ulena

Wilcox, & Gibbs Hookahi Lopi ka Remington, Elua Lopi.

            A me na ukana he nui @ keia ano me keia ano.

Kakela me Kuke.