Ka Nupepa Kuokoa, Volume XXXV, Number 27, 3 July 1896 — Hoike Kula Haole ma Manoa. [ARTICLE]

Hoike Kula Haole ma Manoa.

Ma ka Poalima Iune 26, 1896. he hoike kula Aupuni ma Manoa ma ka olelo Beritania. Ua hoomaka na hana ma ka hora 10 a. m. Ua pili ka mahalo ina haumana mamuli o ka loaa ana o kekahi mau huaolelo pohihihi. Ona mea helu hoi, ua ku no i ka eleu ma na wahi a ke kumu i ao ai ia lakou, mai ka papa mua a i ka papa hope loa. ua ao like ia lakou i na mea helu hoonui, puunaue. hoolawe ame houluulu hakina. Ma keia haawina o ka ike, ke haawi aku nei makou i ko makou mahalo i ke kumukula Miss Rose Davidson. He 42 ka nui o na haumana o keia kula. He nani a maikai na mea apau i hoikeia mai e na haumana. Ma ka hora 12 o ke awakea ua hookuuia na hana. He paina na na haumana me ke kumukula mahope iho, a ua hoolawa pu ia hoi me na makua ame na makaikai. Ua noke iho i ke kupopou a haalele i ka puaa, piha e kahi waa. Makou no me ka mahalo, J. PANIANI, J. W. KAHALEWAI, W. N. KEAMA. Na Komite.