Ka Nupepa Kuokoa, Volume XXXV, Number 29, 17 July 1896 — Kuea no ka Mahele Aina o ke Awawa o Nuuanu. [ARTICLE]

Kuea no ka Mahele Aina o ke Awawa o Nuuanu.

Aole paha makou e hewa, mamuli o ko makou hoike ana aku imua o ka lehulehu, a o ka oi loa aku hoi, imua o na poo Aupuni, ma ka olelo ana aku, he hana ku i ka nani ame ka hanohano ka weheia ana ona Kuea eiike me Ema Kuea, ame Kamaki Kuea, ma kekahi wahi kaawale ma uka ae nei o ke oawa o Nuuanu. O kahi kupono loa a makou e manao nei i kahua no keia hana, oia no kela wahi aina ane-moku mawaena o ke kahawai o Waolani, oia hoi kela apana aina mawaena o ke kawa 0 Waikahalulu ame ke kawa o Puehuehu. Ma ka hoomaopopo ana, aia ka hapanui o na maka hanohano»o keia kulanakauhale ma na ko-a uka o ke Alanui Nuuanu, e hoomaka ana nae paha mai kai aku nei o ke Alanui Nuuanu. ma Alanui Kula a pii i uka a hoea i Maemae. Aole hoi oia wale no, aka, aia no mauka'o Maemae, Pauoa, Kunawai, ame na wahi e ae he nui o keia oawa kaulana o Oahu nei, he nui loa na kanaka Hawaii i kupono loa ke loaa ia lakou kahi e hiki ai ke hoohala i kekahi mau po mahina maikai, ma ka hoolohe ana i na leo mele maikai a ka Bana Hawaii o kakou nei. Ina e moku loa ana ke alanui Kuakini a hoea i ke Alanui Puowaina a hanaia hoi a maikai, me ka loaa ana he Kuea maikai a nani ma keia wahi a makou i hoike ae la, alaila, e oi aku ana ke ohohia ia o na hele hoohala manawa ana ma keia Kuea i ko na Kuea e ae. No ka pomaikai o keia poe ka makou e koi nei he mea pono loa ke loaa ona Kuea o keia ano ma kahi a makou i hoike ae la; a o ka hooliloia ana o kahi mau 'dala o ke Aupuni no ia hana, no keia pomaikai o ka lehulehu, aole ia he dala poho; aka, ia 1 lu ia no ka pono o ka lehulehu.