Ka Nupepa Kuokoa, Volume XXXV, Number 31, 31 July 1896 — Untitled [ARTICLE]

Heaha la ke kumu e emi nei ka Lahui Kanaka Hawaii? O keia kekahi o na ninau i waihoia mai imua o makou, e kekahi Hawaii opio maoli, i loaa na iini nui ana iloko o kona houpo, e ike ia ka ulu ana ae o ka lahui ili ulaula maoli o Hawaii nei, ma kahi o ka emi mau 6 ikeia aku nei i keia wa. Ke manao nei makou he kumumanao maikai maoli keia i kupono ke hapa hou ia kona kalai-olelo akea ia ana e ka hanauna hou o, keia wa i loa na hoonaauaoia ana o keia wa e nee nei, a no ia mau manao, ke hooia aku nei makou ua noa na kolamu o ke. Kuokoa nei no ka hoopuka a hoolaha hou ana aku ia mau manao no ka pomaikai o ka lahui Hawaii. Ua ike no nae makou, he nanehai keia i hoao nui ia kona hoakakaia ana iloko o kekahi mau makahiki lehulehu i kaa hope ae nei, aka nae, aole no he hewa ka hoao hou ana o ko keia au hou e wehe ae i na hoakaka no ia mea. He mea waiwai nui kela no kakou i keia wa, ma ko kakou ano nohona lahui, oia hoi, ka lahui Hawaii ili ulaula.