Ka Nupepa Kuokoa, Volume XXXVI, Number 7, 12 February 1897 — Page 2
| This text was transcribed by: | Dorinda Fuller |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
Hoola@a Mana Hooko
OLELO HOOLAHA
Ua hookohuia aku i keia la o MAX MATTSON, ESQ., i Luna Pa Aupuni no ka Pa Aupuni ma Huelo, Apana o Makawao, Mokupuni o Maui, ma kahi o D.M. Kalama, Esq., i waiho mai.
J.A. King,
Kuhina Kalaiaina
Keena Kalaiaina, Feberuari 9. 1897.
2637-3t
I keia la, ua hookohuia aku o K. KEKUENE, ESQ., i Luna Pa Aupuni no ka Pa Aupuni ma Makiki, Apana o Kona, Mokupuni o Oahu, ma kahi o H. Kualii i hoopauia.
J.A. King,
Kuhina Kalaiaina
Keena Kalaiaina, Feberuari 1. 1897.
2636-3t
I keia la i hookohuia aku ai o S.W. KEKUEWA, ESQ., i Agena Hoo@aio Palapala Aelike Hana no ka Apana o Kohala Akau, Mokupuni o Hawaii.
J.A. King,
Kuhina Kalaiaina
Keena Kalaiaina, Ianuari 23. 1897.
2635-3t
Ua hookohuia aku keia poe "Keonimana" ma keia la i poe Komisina Pa no ka Apana o Kona, Mokupuni o Oahu.
J.H. Boyd, Esq.,
A.B. Wood, Esq., ame
S.M. Kaaukai, Esq.
J.A. King,
Kuhina Kalaiaina
Keena Kalaiaina, Ianuari 25. 1897.
2635-3t
I keia la i hookohuia aku ai o SAMUEL M. KANEOLE, ESQ., i Agena Haawi Palapala Mare no ka Apana o Kawaihau, Mokupuni o Kauai.
J.A. King,
Kuhina Kalaiaina
Keena Kalaiaina, Ianuari 27. 1897.
2635-3t
I keia la i hookohuia aku ai o F.W. HARDY, ESQ., i Komisina Pa no ka Apana o Makawao, Mokupuni o Maui, ma kahi o A.F. Tavares, Esq., i waiho mai.
J.A. King,
Kuhina Kalaiaina
Keena Kalaiaina, Ianuari 26. 1897.
2635-3t
I keia la i hookohuia aku ai o WILLIAM HENRY RICE, JR., ESQ., i Luna Nana Hooko no na Holoholona no ka Mokupuni o Kauai, ma kahi o S.N. Hundley, Esq., i waiho mai.
J.A. King,
Kuhina Kalaiaina
Keena Kalaiaina, Ianuari 26. 1897.
2635-3t
KUAI O KA HOOLIMALIMA O KA APANA AINA AUPUNI MA KE ALANUI MOIWAHINE, HONOLULU, OAHU.
Ma ka Poalua, Maraki 2, 1897, hora 12 o ke awakea, ma ke alo iho o ka Hale Oihana Hooko, e kuai kudala akea ia aku ai ka Hoolimalima o kekahi Apana Aina Kulanakauhale, e waiho la ma Alanui Moiwahine, kokoke i ka Hale Makeke Kahiko, Honolulu, Oahu, maloko o laila, he 706 kapuai kuea, oi aku a emi mai paha.
Manawa:-5 makahiki hoolimalima
Uku Hoolimalima oi aku:-$100.00 no ka makahiki, e hookaa mua ia ana i kela ame keia hapalua makahiki.
J.A. King,
Kuhina Kalaiaina
Keena Kalaiaina, Ianuari 26. 1897.
2635-3t
KUAI O KA HOOLIMALIMA O KA APANA AINA AUPUNI MA KE ALANUI MOIWAHINE, HONOLULU, OAHU.
Ma ka Poalua, Maraki 2, 1897, hora 12 o ke awakea, ma ke alo iho o ka Hale Oihana Hooko, e kuai kudala akea ia aku ai ka Hoolimalima o kekahi Apana Aina Kulanakauhale e pili pu ana me ka Hale Hana Hao o Honolulu, ma Alanui Moiwahine, maloko o laila he 680 kapuai juea, oi aku a emi mai paha.
Manawa: -20 makahiki hoolimalima
Uku hoolimalima oi aku: - $100.00 no ka makahiki, e hookaa mua ia ana i kela ame keia hapalua makahiki.
E kuaiia aku ana keia hoolimalima elike me na kumu i hookomoia ma ke Kanawai 7 o na Kanawai o 1896; a o ka hale o kukuluia ana maluna o na apana aina la, he hale pale pau-ahi ia; o kukuluia ana me na aoao uinihapa me na Pou Hao, a me ke kaupoku laau oolea, i uhiia iho me ke pili hao, a e emi ole iho hoi ke kumu lilo malalo o $5,000.00
J.A. King,
Kuhina Kalaiaina
Keena Kalaiaina, Ianuari 26. 1897.
2635-3t
OLELO HOOLAHA HUI I HOOHUIIA
Ma ka hana o ka Hui Alahao Hawaii.
Oiai, a waiho mai ka Hui Alahao Hawaii, he Hui i hoohuia, i kukuluia a i ku hoi malalo o ka mana, o na Kanawai o Ko Hawaii Pae Aina, elike me ke Kanawai ma ia mea, ma keia Keena o ke Kuhina Kalaiaina, he Noi no ka hoopau ana i ua Hui la, me kekahi palapala hoike i hoopili pu ia aku me ia, elike me ke kauoha a ke Kanawai.
Nolaila, ke hoolahaia aku nei ma keia i kekahi mea a i ka poe apau i loaa na kuleana, ma kela ame keia ano, maloko o ua Hui la, e waihoia mai na kue ana no ka aeia ana o keia noi, maloko nei o ke Keena o ka mea @ona ka inoa malalo'iho nei, ma ka Poalua, la 9 o Maraki, 1897, a mamua ae paha o ia wa, a o kela ame keia mea i makemake e loheia kana hoakaka ma ia mea, e hele kino mai no ma ke keena o ka mea nona ka inoa malalo iho nei ma ka Hale Oihana Hooko, Honolulu ma ka hora 10 A.M. o ua la, 'la, e hoike mai i kumy e ae ole ia ai ua Noi la.
J.A. King,
Kuhina Kalaiaina
Keena Kalaiaina, Ianuari 4. 1897.
2632-9ts
-----
HOOLAHA HUI I HOOHUIIA
MA KA HANA NO KA HOOPAU ANA I KA HUI MAHIKO O PAUKAA
Oiai, ua waiho mai la ka Hui Mahiko o Paukaa, he Hui i Hoohuiia, i kukulu ia a e ku ana malalo a mamuli o ka mana o na Kanawai o Ko Hawaii Pae aine, elike me ke Kanawai e pili ana ia hana, he palapala noi, ma ke Keena o ke Kuhina Kalaiaina, no ka hoopau ana i ua hui la me kekahi palapala hoike i hoopili pu ia me ia, elike me ke koi a ke kanawai.
Nolaila, ke hoolahaia aku nei ma keia i kela kanaka ame keia kanaka, a i na kanaka nohoi apau loa, i loaa na kuleana, ma kela ame keia ano, iloko o ua hui la, he mea pono ke waihoia mai na olelo kue no ka aeia ana o ua noi la, maloko nei o ke keena o ka mea nona ka inoa malalo iho nei, ma ka Poakolu, la 14 o Aperila, A.D. 1897, a mamua ae paha oia la, a o kela ame keia mea e makemake ana e hooloheia ma ua hana la, e hele kino mai ia ma ke keena o ka mea nona ka inoa malalo iho nei ma ka Hale Oihana Hooko, Honolulu, ma ka hora 10 A.M. o ua la 'la, e hoike mai i kumu, nokeaha la e ae ole ia ai ia noi
JAMES A. KING,
Kuhina Kalaiina
Keena Kalaiaina, Feberuari 6, 1897.
2637-9t
-----
OLELO HOOLAHA AINA AUPUNI
Ke hoolahaia aku nei o ka Apana Helu 37, Palapala Aina 6 o na Apana Aina Hookuonoono Kahiko ma Kailua, Kona Akau, Hawaii, ua pakui pu ia aku ia i na Apana i weheia no ke noiia ana mai, ma ke ano he mau Apana Aina Kuai a Hoolimalima paha. E hiki no ke noiia mai ua mau Apana 'la, ma ka hora 9 a.m., Feberuari 15, 1897, a mahope aku, ma ke Keena o J. Kaelemakule, Kailua, Kona Akau.
J.F. BROWN
Agena no na Aina Aupuni
2637-td
HOOLIMALIMA AINA AUPUNI
Ma ka Poaono, Maraki 6, ma ka hora 12 o ke awakea, ma ke alo iho o ka Hale Hookolokolo, Honolulu, e kuaiia aku ai ka hoolimalima o kekahi Apana Aina ma Pouhala, Waikele, Ewa, nona ka laula ma ke Alanui Aupuni he 75 kapuai, a nona ka hohonu he 100 kapuai makai o laila.
Manawa Hoolimalima: 15 makahiki Uku Hoolimalima oi aku maluna o $50.00 no ka makahiki hookahi, e hookaa mua ia ana i kela ame keia hapalua makahiki.
J.F. BROWN
Agena no na Aina Aupuni
2637-td
-----
KEENA O KA PAPA OLA
Honolulu, K.H.P.A., Feb. 10, 1897
Ma kekahi halawai ana o ka Papa i malamaia keia ia, ua kohoia o Henry E. Cooper, Esa., i Peresidena no ka Papa Ola, ma kahi o W.O. Kamika i waiho mai.
CHARLES WILCOX;
Kakauolelo o ka Papa.
2637-3t
-----
KA
Nupepa Kuokoa
No ka Makahiki-----$2.00
No Eono Mahina-----1.00
Kuike ka Rula
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HOOPUKAIA E KA
HAWAIIAN GAZETTE CO.
C.G. BALLENTYNE, Luna ui
JOSEPH M. POEPOE, Lunahooponopono
Honolulu, Oahu
-----
POALIMA : : FEBERUARI 12, 1897
-----
Ke A'o-Hoku.
Ma ko makou pepa o keia la e ikeia ai ka mahele mua no ke Aohoku, kekahi lala nui o ka ike e huli nui ia mai nei e na poe naauao o ka honua nei. Ke hoolaha aku nei makou i keia mahele hoonaauao no ka pomaikai o no kanaka Hawaii i akea ole a i palahalaha ole paha ko lakou mau hoonaauaoia ana, oia ko lakou mau la e hele ana i na kula. O Lahainaluna kahiko, oia ke kula ma ka Olelo Hawaii i aoia ai keia lala a mahele o ka ike, a mailoko aku hoi a ka Buke Kakaulima a Rev. S.E. Bihopa i loaa aku ai na haawina kula oia mahele ike; a mailoko mai oia buke e hoolaha aku nei makou i keia mau mahele me ka lana o ka manao e lilo ana keia hana ana i mea hoowaiwai aku i ka poe ake ike apau mawaena o ko makou poe heluhelu.
Oiai e hoomohala mai ana keia mau mahele-a'o hoopukaia aku nei no kekahi mau mea e pili ana i na mea kino i ka poiuiu o ka lani, ma ka olelo makuahine o ka aina, e loaa ana no ma ia wa hookahi me mau kokua waiwai nui no na haumana Hawaii maoli e hele ana i na Kula Oleleo Enelani, ma na mea e pili ana i kekahi mau huaoleolo Enelani i weheweheia a i hoakakaia ko lakou ano ma ka Olelo Hawaii.
He pomaikai nui keia a kekahi makua mikanele i hana ai no ke kulana hoonaauao iloko o keia lahui Hawaii. Mailoko mai o keia mahele ike i loaa ai ka noeau koikoi a hohonu i na kahunapule Hawaii kaulana o na la kahiko, elike me Rev. M Kuaea ame kekahi, poe lehulehu e ae.
Ua maopopo loa ia makou he kokua waiwai nui keia a makou e hoolaha aku nei i keia wa no na kahunapule Hawaii o keia wa, oia nae na poe i nele na hoonaauaoia ana ma keia mahele o ka ike. Mamuli auanei o ko lakou heluhelu akahele ana i keia mau mea, e loaa hou ai ia lakou he ike a he naauao, ka mea hoi i loaa ole ia lakou mamua. Pela nohoi me na Hawaii e ae he lehulehu i loaa ole na makaukau ma ka Olelo Enelani, e loaa ana no ia lakou he pomaikai ma keia mahele oiai e ike ana' lakou a e hookamaaina ana hoi ia lakou iho ma kekahi mau mahele e komo aku ai na kamailio ana a na nupepa Hawaii iloko o ka poai o na mea lani, a o ke kamaiina e ana o ke kanaka me kekahi mau mea e pili ana i ka ponaha-lani i ho-anapaia e na hoku olinolino ame na kahoaka lani e ae, elike me na mea a ke "Ao-hoku" e hoike aku nei, he pomaikai no ia, oiai mamuli oia ike e ana a kamaaina e ana o ke kanaka heluhelu nupepa me ia mau mahele, e hiki ai iaia ke inu i ka uhane naauao i ho-oia e ka mea kakau manao iloko o kana mea i kakau ai no na mea pili i na poepoe lani e kakaa hele ae nei ma ka "wa-lua" (space) o ka upoho lani.
Ke Alanui Kuakini ame ka Oihana Kinai Ahi o Honolulu
Ua hapaiia mai ko makou noonoo, he mea pono loa ia makou ke kamailio aku ma keia wahi, no ke mea e pili ana i ke Alanui Kuakini, he "@ookoi" o na alanui ulikalika o Honolulu nei, a ka Luna Alani i kunana wale ai a haawi ole ae i na hana e hoopauia ae ai keia "pulakaumaka" o kela alanui. He lehulehu wale na manawa a makou i kahoahoa aku ai imua o ke akea, no ke kupono loa ke hana ke Aupuni i keia alanui a oi ae kona kulana i ke ano e waiho nei i keia wa, aka, aole nae i maliu iki ia mai ia mau lea uwalo, eia nae o ka hopena hikimua loa i ikeia oia ka hoopupuia ana o na kaa kinai ahi o ka holo ana ae ma ka wanaao Sabati aku nei, no ka haawi ana i na kokua kinai i ke ahi e holapu ana i kekahi hale ma Ewa aku o ke Alanui Liliha.
O ke ahiahi Poaono a komo mai i ka po ana a hoea i ka wanaao ana ae, he wa ia i lelehune iho ai kekahi mau omaka wai ua, na ia mau kilihune i hoowali iho i ka lepo ulikalika o ua alanui la a lilo i mea poho-poho; a o na kamaaina oia wahi, ua ike lakou, mamuli o ko lakou maa, he wa ia o ua alanui la e heluia ai ma ka helu o na alanui lapuwale loa o Honolulu nei, a o na kaa e holo ana ma ia wahi, ma ia wa o ka ukele i alii ai, e loaa ana ia lakou he hana nui. He ekolu ka nui o na "kaawai" i holo ae ma keia alanui i kela wanaao, a ua hele mai lakou me ka hoomanawanui o ka huki ana o ko lakou mau lio, a e loheia aku ana na leo hookikina o na "kalaiwa" ame na pohapoha paapaaina o na uwepa maluna o na hokua o na lio. Hookahi o keia mau kaa i ike maoli ia aku e ku lomaloma ana ma ke alo o ka pa-hale o ka Lunahooponopono o keia pepa, oiai ka lepo ulikalika o ua wahi nei e puliki ana i na huila o ke kaa, me he puliki ana la a na aweawe o ka hee. He elua a ekolu paha manawa i ka'ulua ai ua kaa la, a hoea oia i kela aoao o ke Alanui Liliha, oiai kekahi mau kaa e ae i hekau aku ai no ia wahi me ke aumeume nui.
Nolaila, ke ku hou nei makou ma ka awai hoeueu no ka pono o ka lehulehu, he mea pono loa i ka Luna Alanui o Honolulu nei ke hoopau koke i keia hemahema nui. Ua hai mai hoi kekahi haole kuonoono e noho ana ma kahi kokoke ia "Kuakini Alanui", he mea pono ke waihoia aku kekahi palapala noi i ke Kuhina Kalaiaina e hahau papaakea ia ua alanui la; aka, ma ko makou manao, o na papalina "ulikalika" o ua alanui la ka palapala hoopii oi loa aku imua o ke Kuhina, e hiki ole ai iaia ke alo ae, a hui pu me ka lehulehu o na hale kulana maemae e ku nei ma ia wahi, na mea hoomahuahua i ka ikaika o keia koi ana.
-----
Kuhina Kamika no na Aine E.
Ma ka mokuahi "Australia i holo aku la no Kapalakiko mai Honolulu aku nei i kau aku ai o Kuhina Kamika no ke alahele i Wasinetona ma kekahi misiona pili Aupuni. E lawelawe hana pu ana oia me Kuhina Haki ma kona wa e hoea aku ai ilaila. Ke ole makou e kuhihewa, ua pili no kana huakai no ke humuhana "Hoohui Aupuni" mawaena o Hawaii nei ame Amerika Huiia.
Hale Pauahi ma Alanui Liliha.
Ma ka wanaao o ka po Sabati aku nei, ua hoohikileleia ae la ko ke kulanakauhale nei i ka "umo" ana ae a ke oeoe hooho pauahi. O ke ahi i ikela, aia ma ka huli ma Ewa aku o ke Alanui Liliha, no ka hale noho o kekahi haole hana o loko o ka Hui Kuai Huaai Kaleponi, nona ka inoa o George Centumanos. Ma ka oleloia, ua aneane paha elua pule o ka waiho ana o keia haole iloko o ka ma'i; a ma ke ahiahi o ka Poaono, ua loaa iki iaia he wahi maha. Ua moe oia ma ia po, a ma ka hora 1:15 o ka wanaao, ua hoohikileleia oia mamuli o ka hoala pihoihoi ana o kana wahine iaia, oiai na alelo o ke ahi e holapu ana i ka hale. Me ka hoomanawanui i kolo mai ai oia mai luna mai o ka moe, a no ka nui loa o ka nawaliwali ua hina-pe iho la ia ma papahele, oiai hoi he ahi e pahola loa ae ana i ka laula o ka hale. Me ka hoomanawanui hou nohoi i kolo aku ai oia, oiai kana wahine e kaualupe ana iaia, a e hii ana nohoi ka wahine i ke keiki, a hoea i waho, a hele aku la no kekahi hale makamaka.
Ua haule hope loa ke hoea ana aku o na kaa kinai ahi no ke kahua poino. He ekolu o keia poe "kaawai" i holo ae ma ke alanui "ulikalika" o Kuakini. O keia alanui kekahi kumu i hoohakalia loa ia ai ka holo ana o na "kaawai," oiai ma ia po ua loaa iho la ua wahi alanui la i na kilihune ua, a ua lilo i mea poho, a pupu ka holo ana o na huila o ke kaa. Ua ike pono ia ke ku malie ana o na lio o kekahi "kaawai" ma ua wanaao la ma kahi hoopiina ma keia aoao o ka uapo helu elua e hele ana i ke Alanui Liliha. O keia pilikia, aia no ia maluna o ke Kuhina Kalaiaina, a i ole, maluna paha o ka Luna Alanui. E kala makou i hoike aku ai no keia pilikia mamuli o ka hahau "papaakea" ole ia ana o keia alanui, a eia ka pilikia ke puka-a-maka mai nei.
Hopuia no ka Hewa Aihue i ka Waiwai i haawiia e malama.
Ma ka auina la Poakahi nei, i pahola ae ai ka lono hoohikilele a hoonawaliwali manao mawena o ke kulanakauhale nei, ua hopuia o Wm. J. Cuelho, ke Kakauolelo Opio o ka Aha Apana o Honolulu nei, a hoopaaia aku la ma "Kalakaua Hale" no ka hewa "Aihue i ka waiwai i haawiia e malama. Ma ka palapala hopu, ua hoiekeia he $150 ka huina nui o na dala i manaoia ua laweia ma ia ano, aka, ua hoike ae nae ka mea kakau nupepa o loko o keia kulanakauhale, ma kona manao ua oi aku mamua o ka $500, aole hoi he $1,000 elike me ka mea i lohe wale ia.
Eia kana mau olelo imua o ka mea kakau nupepa:
"O na kanaka o loko nei o ka Halewai ke kumu nui o ko'u haulehia ana. O na hoaloha ke kumu o keia. E hele mai ana lakou ia'u e aie ai aole hoi i loaa ia'u he puuwai ma-ua e hoole aku ai i ka lakou noi. Ua haawi aku hoi au i ka'u mau wahi dala ponoi, a ma ka wa i pau ai ia, ua haawi aku la au ia lakou i na dala o ke Aupuni, a'u e malama ana, meka manao ana e hoihoi mai ana la hoi lakou. Aka, ua ike no au, he hewa keia. Ke ike nei au i keia wa, a ina i malama kuu poe hoaloha i ka oiaio o ka lakou mau olelo, ina no la ua pono au i keia wa."
Ua hoike mai ia, he aneane eono mahina o kona hana ana elike me ia, a o kana mau huaolelo hope i hai mai ai imua o ka mea kakau nupepa oia keia:
"Ua ola ko'u luaui makuakane, a make oia no kona poe hoaloha, a o ka'u alanui hookahi no ia e hele aku nei. E hai aku oe i o'u poe hoaloha, ua hana au me ke kuhihewa, aka, aole nae au i hana me ka naau manao aihue."
Ma ka auina la Poalua nei, ua lawe ia oia imu o ka Aha, a heluheluia aku la imua ona ka hoopii a ke Aupuni, a ua waihoia kana pane a keia la, (Poalima, Feb. 12). O Lunakanawai Wilikoki ke "Kahu o ka Aha." Ua noi o Mr. C. Creighton i ka Aha e aeia ka mea hoopiiia e belaia. Ua pane ka lunakanawai aohe mana i loaa iaia e kau ai i ka huina o ka bela, nolaila, ua ninauia o Lunakanawai Kaapuni Carter, a ua ae oia i ka bela o $2,000. Mahope koke iho no, ua hoea kino ae keia poe keonimana e bela, oia o J. Sylvano, Keoki Hapakela, Akoni Rosa ame Samuel Dwight, a ua hookuuia ka mea hoopiiia.
O kekahi opio Hawaii kulana holomua loa keia, oia ke Alakai o ka Hui Himeni i ikeia ma ka inoa Hawaiian Glee Club.
-----
Ke Ola ame ka Palekana o ka Lahui Hawaii.
ALOHA:
Ano, i keia la ke ku ke kanaka noonoo maikai a nana aku imua no na mea e pili ana i ke kulana o ka Lahui Hawaii oluolu i alohaia e komo mai no auanei iloko o kona puuwai na maeele ana o ke aloha i kona Lahui kanaka ponoi.
Ke nana i keia wa, o ke ola ana o ka Lahui Hawaii ma na mea e oluolu ai ke kino; ua kau nui ka hapa nui o ka Lahui Hawaii ma'na hana e loaa ana i na Poo Ohana; a o ka hapa nui loa o lakou ke loaa nei ke ola mamuli o ka hana ana aku malalo o ua poe waiwai.
Ke ike nei nae makou ano, oia kulana o ke ola ana ke aneane aku nei e kaili ia mai ka Lahui Hawaii ae; a ke olelo nei makou; eia aku a hoea mai he "Kaiakahinalii" hou maluna o na lepo aloha o Hawaii.
Malia paha e pahaohao ana ka Lahui i keia mea a makou e olelo nei he "Kaiakahinalii" hou e hiki mai ana maluna ou e Hawaii; nolaila, e haliu a hoolono mai.
Mamuli o ke Kuikahi i hanaia i ka M. H. 188.. mawaena o ke Aupuni o Iapana ame ke Aupuni Moi o Hawaii; a mamuli hoi o ke Kumukanawai o ka Repubalika o Hawaii, ame ka olelo hooholo hope loa a ka Lunakanawai Kiekie A.F. Judd (Alapaki Kauka) e pili ana i ke kuleana o ke komo ana mai o na Iapana iloko o Hawaii nei; ua akaka loa; aohe mana i ke Aupuni a aole hoi ia kakou e papa aku a hooki aku paha, ke komo makolukolu ana mai o na lapana iloko o Hawaii nei; a elike ana ko lakou komo ana mai ma Hawaii nei elike me ke komo ana o na Rana ma ka aina o Aigupita i ka wa o ka Lahui o ka Iseraela. Wahi a kekahi Iapana kalepa o keia kulanakauhale i hai ae ai imua o kekahi mea kakau nupepa. i ka wa i ninau ia aku ai oia no ka ninau e pili ana i ke komo ana mai o na Iapana iloko o keia aina.
Ke olelo nei kela:
"E mau aku ana ke komo ana mai o na Iapana iloko o keia aina a hiki aku i ka wa e emi ai na uku hana ma Hawaii nei a like me ia ma Iapana."
Heaha ia uku hana ma Iapana? He elua a ekolu Dala i ka malama hookahi no na kanaka hana lima; a nele no nae kekahi poe i ka hana ole.
Ina oia ana ka uku hana ma Hawaii nei: auwe! Me-e ka poino! A me-e ka pololi! ame ka pilikia e loaa ana i ka Lahui Hawaii.
Aole keia he mau olelo haku wale; aole hoi he mau olelo o ke aloha ole; aka, he mau olelo oiaio; a he kahoahoa ana hoi no ke ola ame ka palekana o ka Lahui Hawaii.
A pehea e ka Lahui Hawaii, e ku anei kakou a nana aku? a kali aku a hoea mai keia "Kaiakahinalii" hou maluna o ko kakou aina aloha? Ina pela, elike ana ko kakou hopena me kela poe'i hoolohe ole i na wanana ana a Noa i kona mau la. E papapau ana kakou he a-a ko ka hale.
Ke olelo nei makou ame na poe noonoo maikai a pua iwaena o na Hawaii; he hiki no ia kakou ka Lahui Hawaii ke noho a ola me ka maikai iwaena o na haole Amerika, Pelekane, Fareani, Geremania, Pukiki, ame na haole Europa; aka. he mea paakiki loa no kakou ke ola ana me ka maikai, ina e piha-a ana kakou i na Kepani, oiai, na hiki loa i ke Kepani ke ola no ke kenikeni wale no o ka la; oiai ke kanaka Hawaii, aole e ola kupono no ka emi mai maloko o ka hapalua no ka la hookahi.
Nolaila, o keia ninau o ke komo ana mai o na Kepani iloko o keia aina; oia kekahi o na ninau koikoi loa a na kanaka Hawaii e noonoo ai; a maluna oia ninau he mea pono ia kakou ke hana koke i kekahi mea. Aole nae keia kamailio ana me ka manao hoino ia ano lahui e noho aloha pu nei iwaena o kakou.
A ke hai aku nei makou me ke akaka a hookamani ole, aohe ala e ae e pakele ai ka Lahui Hawaii i keia poino; hookahi wale no e hoohui ia Hawaii me Amerika Huipuia; aole makou e kamailio ana i keia me ke aloha ole i ka aina; aole hoi me ke kuai ia o ko makou mau manao maikai; aole loa no ko @kou ake hanohano; aka, ke kamailio nei makou me ka manao kuio; me ka manoa kanaka makua; ame ke aloha nui no makou iho; ka Lahui Hawaii ame na mamo a kakou mahope aku nei.
Ke ku nei kakou i keia la ma ke kulana imi waiwai me he la, aia maluna o kekahi pali kiekie, oiai, o ke kulana o ke Kuikahi Panailike mawaena o Amerika Huipuia; ka mea nana i kii aku i ke Dala a lu mai iloko o ka aina; ke kulanalana nei oia; mamuli o ka hooulu nui ia ana o ka Uala (Beet) Kopaa ma na Mokuaina ma ke Komohana o Amerika Huipuia; oiai, i na kau Ahaolelo mamua aku nei ua lilo na Hoa Hanohano o ka Ahaolelo mai na Mokuaina mai o ke Komohana i poe kokua nui i na pono o Hawaii nei mamuli o kela Kuikahi; aka, i keia wa ke'ikeia aku nei, ke huli aku nei lakou e kokua i na poe kue i ko kakou Kuikahi.
Ina e hiki io mai ana ka la e pau ai ke Kuikahi Panailike mawaena o Hawaii nei ame Amerika Huipuia; alaila, ua akaka loa e pau ana na Mahiko ame na Mahi Raiki i ke poho; e poho pu ana me na Hui Mokuahi; na Hale Kalepa ame na poe imi waiwai no a pua; a e emi loa auanei ka waiwai io o na aina a pua; a o ka hopena oia mau mea a pau e nele like ana na mea a pau i ka hana; a e hiki mai no auanei ka pololi ame ka ilihune ma na ipuka o ko kakou mau hale.
A owai iwaena a ka Lahui Hawaii e makemake nei e hiki mai ia mau hopena?
O na Lunahooponopono Nupepa anei a kalahea nei he mea ino ka Hoohui Aina? Ina o lakou, alaila, ke olelo nei makou: ke alakai lalau loa nei lakou i ka Lahui Hawaii; me ka maopopo no ia lakou he mau alakai ana kela o ka poino.
Nolaila, ke kauleo nei makou me ka haahaa i ka Lahui Hawaii; e maliu mai, e hoolono, e noonoo a hooholo iho; o ke ola ame ka Palekana o ka Lahui Hawaii, oia no e Hoohui o Hawaii me Amerika Huipuia.
O makou no me ka haahaa,
WILLIAM C. ACHI,
C.L. HOPKINS,
JOHN LOT KAULUKOU
JOSEPH M. POEPOE
Honolulu, Ianuari 22, 1897.