Ka Nupepa Kuokoa, Volume XXXVI, Number 8, 19 February 1897 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVI. HELU 8. HON0LULU. POALIMA, FEBERUARI 19, 1897 NA HELU APAU 2638

 

Hoolaha Loio.

 

W.R. KAKELA, Loio a he Kokua ma ke Kanawai.

HE LUNA HOOIAIO PALAPALA.

1370

 

LYLE A. DICKEY.  Loio a he Kokua ma ke Kanawai.

Alanui Kaahumanu.  Helu 14.           Tel 682.

 

            Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.

            O. A. F. Tavares, Kakauolelo a Maheluolelo. 1yr.

 

Hoolaha Kumau.

WILDER & CO., (WAILA MA.)

            Mea Kuai Papa a me na Lako kukulu hale o na ano a pau, a me na mea e ae a pau e pono ai o ka hale.

Kihi o Alanui Moiwahine me Papu.

396-o

 

PAPA!                        PAPA!

AIA MA KAHI O

Lewers & Cooke

(LUI MA)

Ma ke kahua hema o Alanui Papu me Moi.

E LOAA NO NA

PAPA NOUAIKI

O kela a me keia ano

Na Pani Puka, na Puka Aniani,

na Olepelepe, na Pou, na O'a,

na Papa Hele, na Papu Ku,

me na Papa Moo he nui la

 

NA PILI HALE O NA ANO A PAU

A me na

WAI HOOHINUHINU NANI

O na ano a pau loa.

 

Na Balaki o na Ano he Nui Wai.

Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e ili ana ma ka laua oihana no ka

Uku Haahaa Loa.

            E Hele me ka mea e holo ana mawaena o Laua a me ka Mea Kuai

Hele Mai a Wae no Oukou iho

9896 o

 

KA MEA HUNA POHIHIHI

MOKUNA XVII.

 

Ka Alohi, ka Anapa a ke Daimana-

            Ka Ulumahiehie o ka Hale Mele-

            Ka Ui Beatirisia-Ka Makuahine

            ame ke Kaikamahine

 

            Oiai na sekona e hoopiha ana i na minute, a oia mau kikoni liilii hoi o ka manawa e hoopiha ana i na hora, a o na hora hoi e hooneenee koke aku ana i ka manawa no ko Alamira ame ko ka Haku Tereveliana hele ana aku no ka Hale Mele, aia ko Alamira houpo e hoopiha ulumahiehie ia ana e na manao wainohia o ka hauoli, ua kokoke loa mai ka manawa pomaikai, e halawai pu ai oia me kona makuahine, ka mea ana i manaoio loa ai e ike ana ma ke kahua hoikeike o ka hale mele.  Hakukoi hanupanupa ae la hoi ka manao hauoli iloko ona, e loaa ana iaia ka wa pono e hoolauna ai oia i kona mama imua o ke kanaka puuwai aloha i lawe ae iaia i moopuna hookama nana.  Ua lilo keia mau manao i mau mea hoohauoli loa mai iaia.

            A oiaio keia hauoli e opu-opu ae ana iloko ona, hapai wale ae la no ia i keia manao:

            "E Mama-e kuu Mama aloha!  Nani wale auanei kou hauoli ke ike mai oe ia'u i keia po.  E hauoli loa ana oe, ke lohe oe mai kau kaikamahine aku, no na haawina hoopomaikai i loaa i kau kamalei nei.  O!  E hoea mai ana ka la e hoomaha ai oe i kou luhi.  E loaa ana ia'u ka waiwai, a hiki no ia'u ke malama ia oe, e kuu mama; hike nohoi ia'u ke malama ia Papa ame o'u mau pokii kaikunane."

            Alaila, hoohaliu ae la ia i kona noonoo ma kekahi alahele okoa a'e, a oia keia ana i olelo ae ai:

            "E ike ana au i kela po i ka wahine nona ka ui a'u i lohe nui ai ma Ladana nei, oia hoi ka Lede Beatirisia o Hametona Kakela.  Ae-ina nohoi o ka ui o keia lede, a ua like aku ia me ka ui o ko'u luaui makuahine, alaila, ua ui io no keia wahine.  Aka o keia Lede Beatirisia nae, wahi a'u i heluhelu ai nona maloko o na nupepa, he ui ia i owiliia iloko o ka puanuanu: a o ko'u mama hoi, he ui kona i mohala ia e ka mahiehie.  He wahine keia a na nupepa i hoike mai ai, o kona luhiehu oia no na pohaku makamae e hoohiwahiwa ana i kona oiwi kino: aka, o ko'u makuahine hoi, he wahine ia i hoonani ole ia me na pohaku nani, aka, o ka olu waipahe, ka hiwahiwa o ka nani, oia na mea kahiko i kona kino.  Ua lohe hoi au ma Tereveliana Pa. oia ka wahine hoopalau a Mr. Geofere Tereveliana.  A i keia wa, ua hoopalau aku oia i ke kanaka i lilo i enemi no Geofere, oia hoi o Haku Adelo, ke kanaka a'u i hoowahawaha loa ai.  Ke olelo nei hoi na kanaka iaia, oia ke pookela o na wahine puuwai ole?  A!  Hookahi mea maopopo loa ia'u, ina paha e ike ana ka Haku Tereveliana i kuu makuahine, aole loa paha oia e keha hou ana i ka ui o ka Lede Beatirisia o Hametona.  Owai la ka wahine ui o Ladana nei elike me ko'u makuahine?"

            A i ke kokoke ana mai o ka manawa e hele aku ai ia me ka Haku Tereveliana no ka hale mele Maymarket, ua hoomakaukau iho la ia i ke komo ana i kona aahu.  Ua wehe mai la ia i kona aahu silika eleele.  Komo iho la ia i ua aahu la, a he mea oiaio, ua ku i ka nani ame ka maemae na hoohiwahiwa ana a ua aahu la i kona oiwi kino.  Ua owili ae la hoi ia he ribine silika keokeo mawaena o kona mau owili lauoho aeae, a hana ae la i no me ua lipine la maluna pono ae o kona lauoho.

            I kona makaukau pono ana, ua iho aku la ia no lalo, no ka rumi hookipa, kahi hoi a ka Haku Tereveliana e kali mai ana nona.

            I ka ike ana mai o ua Hake Tereveliana la iaia nei, ua haawi mai la oia i na mahalo ana, a liuliu kana nana ana mai iaia, pane mai la oia:

            "Nani ka lele hauoli ana o ko'u manao e pili aku ia oe.  Me he mea la ma ko'u hoomaopopo iho, o ka pili ana aku o ko'u noonoo nou, ua like no ia me ka pili ana aku o ko'u manao hauoli i ka hua ponoi noloko mai o ka puhaka o ke keiki a'u i aloha ai, oia o Geofere.  Ua loli ano e loa kou ano imua o'u i keia wa i ko ka wa i hala ae nei.  O kou kulana ame kou ano apau a'u e ike aku nei, ua like loa me ka mea i oleloia e na kanaka o kahi kauhale uuku o Tereveliana Pa oia hoi, aohe wahi lilo o ka ohana alii o Tereveliana ia oe.  He oiaio anei, no ka auwaha pili-koko hookahi no kaua, aka, he kaawale loa nae na kumu i hoohuiia ai kou ame ko'u koko?  He wahine Pelekane kou makuahine.  Makemake loa au e kamailio pu me ia no keia mea.  Makemake loa au e ike, heaha la ke kumu nui i mohala maoheohe ae ai ko'u manao makemake nou, a lilo ai au i mea makahehi ia oe, e kuu moopuna."

            "Nani nohoi ko'u hauoli, ina e hiki ana i kuu mama aloha, ke hoike aku ia oe, e kuu Haku, aia he wahi huna koko o ka ohana alii o Tereveliana iloko o ko'u mau aa koko nei," wahi a Alamira i pane aku ai imua o ka Haku Tereveliana.

            Mino aka iho la ua Hake Tereveliana nei, ku ae la ia iluna a hele aku la ia ma kekahi punee, a maluna iho o ua punee la i waiho ai keahi puolo.  Lalau iho la ia i ua puolo nei, a paa ae la.  Huli mai la ia imua o Alamira a pane mai la:

            "E Miss Arevalo ina owau kou kupunakane, a e hoomaka ana hoi ia kuleana o'u mai keia ahiahi aku, alaila, he mea pono ke ae mai oe, e Miss Arevalo, e hana aku au nou, i na hana i maa mau i na kupunakane maikai apau.  Ua maopopo no ia'u, aole paha i lawa loa kou wahi paiki ili me na hoohiwahiwa e kini-kohu maikai loa ai kou komo kapa ana, nolaila, eia kau mau wahi mea e maamaama iki ae ai kou aahu eleele i komo mai nei, a ke ole au e kuhihewa e lilo ana keia i mea e hooiia ae ai ka lamalama maikai o kou helehelena."

            Alaila, wehe ae la oia i ke kaula i hoopaaia iho ai ka puolo, a paa ae la i kekahi koloka kasimia ano hooluu keokeo i hoonaniia me ka maiau loa, a hookau mai la maluna o Alamira, me ka olelo ana mai:

            "Ma kou wa e komo kapa ana, ua hele aku la au e kuai i keia koloka opera nou."

            Mailoko mai hoi o ka pakeke o kona kuka, unuhi mai la ia i kekahi wahi pahu vleveia.

            I ka hemo ana ae o kona pani, laiau iho la ua Haku Tereveliana nei a unuhi ae la i kekahi lei momi nani loa, a haawi mai la ia Alamira.

            "Ua ike au, aohe ou komo pepeiao gula; nolaila, aole au i lawe mai nei i paa pepeiao gula nou elike me keia lei a'u e haawi aku nei ia oe.  E lei iho oe i keia lei.  He mea maopopo loa ma ka wa a kela Ui Beatirisia puuwai ole e ike mai ai ia oe, me keia lei e kahiko ana iluna ou, e komo iho ana ka hoohuoi iloko ona nou.  He mea oiaio, aole oe e lilo ana i hoa paonioni nona, i keia po, iloko o ka hale mele, ma (heartless beauty) o Hametona Kakela."

            Me na waimaka o ka hauoli e haloi ana ma ko Alamira mau maka, aia hoi lalau aku la ia i ua lei momi nei, a lei ae la.

            I ka pau ana o kana hooponopono ana i keia mau makana hoohiwahiwa hou i loaa mai iaia, ua hoea koke mai la o Wigby a hoike mai la, e kali ana ke kaa no laua.

            Nolaila, me ke kui-ee ana ae o ka Haku Tereveliana i ka Lede Alamira opio, iho aku la laua ma ke alapii pohaku a hoea aku la i kahi e ku ana ke kaa.

            Oiai hoi ke kaa e lawe ana ia laua no ka hale keaka Haymarket, kamailio hou ae la ka Haku aoo o Tereveliana Hale ia Alamira:

            "Aole o'u kaualua iki na ka mana lani no i hoouna mai ia oe i o'u nei.  Ua like oe imua o'u me kekahi anela ka wehiwehi, ka hihiu ame ka hiwahiwa o na mea hoonani daimana, momi ame ke gula: aka, ma ka mea e pili oni pohihihi no ua Ui puuwai ole la ana i ka ui ame ka nani o ko olua mau helehelena, ua maopopo, o kou ano opiopio kou mea e lilo ai i hoa paonio ka olelo hoopomaikai ame ka hooluolu.  He uhane kou i kina'una'u ole ia e kekahi ponalo o ka maemae ole.  A no'u nei hoi, ua olelo na kanaka, he uhane ko'u i like ke kuanea ame ka maloo haha me ko kekahi kula waoakua one i hele a panoa: aka, e Miss Arevalo, o oe nae ka hoike oiaio, aia ma keia kula waoakua panoa i hoohalikeia ai ko'u uhane e na kanaka, he punawai huihui i halana pono ia e ka wai aiai maikai a huihui hoi.  E Miss Arevalo, makemake loa au e ike i kou mau makua, i hiki ai ia'u ke olelo aku imua o laua, e ae mai laua e lilo oe i moopuna na'u."

            "Manao au e ike ana kaua ia Mama i keia po."  wahi a Alamira i pane mai ai imua o ka Haku Tereveliana, me ka hoomau ana mai nohoi:  "E kuu Haku, he wahine u'i ko'u makuahine, a o kona mau helehelena apau ua piha i ka oluolu, ka waipahe ame ke aloha.  A ma kekahi olelo ana ae, he anela mai ka lani mai kona hoa like.  Makemake loa nohoi au e ike oe iaia, e kuu Haku."

            I keia wa i hoea aku ai ke kaa no ka hale mele.  Lele iho la laua mai luna iho o ke kaa, a komo aku la no loko o ka hale mele.

            Alakai aku la ka Haku Hametona i ka Lede Alamira a hoea ma kona noho i hoomakauakau ia.  He wahi maikai loa ia.  Ua hiki ke ike pono ia aku ke kahua hoikeike holookoa o loko o ua hale mele la.

            Noho iho la ka Haku Hametona maluna o kekahi noho i ano kokoke lao i ko Alamira noho.

            I kela wa aole i hukiia ae ka paku i luna, a ua piha pono nae o loko o ka hale i na poe makaikai.

            He hiohiona hou keia i loaa mai i na kii onohi o alamira, he hiohiona i ike ole ia e ia ma kona mau kaiaulu kuaaina.  Ua kuhi ia, o kahi anaina haipule ana i ike ai, maloko o kahi halepule o ke kulanakauhale pananaiki o Tereveliana Pa, oia la ke pookela o ke anaina kanaka hihimanu ana i ike ai, eia ka auanei he anaina makalii ano ole wale no ia i ko keia uluwehiwehi ana e ike aku nei, iloko o na ano nani apau.

            Aka, aole nae i lilo keia nani hihimanu o ke anaina kanaka ana (Alamira) e ike aku ana, a pela pu hoi me ka "ui maemae" o loko o ua hale nei, i mea hoopioloke a hoopioo mai i kona noonoo, oiai ua noho iho la ia me ka hiehie nui, i kakooia hoi e ka ui lamalama maikai e mohala ana ma kona helehelena.

            Ae-he nani okoa nohoi kana e kiohana iloko o na onohi maka o na mea apau e nana mai ana iaia-na kane ame na wahine, na opio ame na aoo.  Ua lilo hoi kona ui i mea kamailio nui ia e na poe makaikai oia po, a ua lohe ia ka olelo ana ae o kekahi poe.  "He Ui kela, me ka puuwai i lamalamaia me ka hauoli."  "Ua upoi iho na eheu nani o kela ui maluna o ka Ui puuwai ole o Hametona Kakela."  "Aka, ua aneane like loa na helehelena o keia Lede opio me ko ka Lede Beatirisia o Hametona."  "Heaha la ka pili o kahi ame kekahi."

            I keia wa i kamailio aku ai ka Haku Tereveliana i Alamira.

            "E Miss Arevalo, o kela rumi e kupono mai la ma kela aoao o kahi a kaua e noho nei, oia ka rumi o ka ohana Hametona: a ke ike aku la nohoi eo aohe o loko oia rumi i keia wa, malia nae paha e hoea mai ana no ka wa e lehauia mai ai ia wahi e ka poe i kuleana ma ia rumi."

            Mamua hoi o ka hiki ana ia Alamira ke pane mai imua o ka Haku Tereveliana, ua pii ae la ka paku o ke kahua hoikeike a o ka hoomaka ia mai la nohoi ia o na hana mua loa.

            Aia hoi ko Alamira mau maka ke nana la me ka maiaai nui ma ke kahua hoikeike, me ke ake loa ana e ike aku i kona makuahine, aka, ua hoohoka loa ia nae oia, a me na helehelena pili kaumaha, huli ae la ia a olelo mai la i ka Haku Tereveliana:

            "Ea, e kuu Haku, aole o Mama, mawaena o kela poe."

            A noho mumule iho la ia.

            Pane aku la hoi ka Haku Tereveliana iaia:

            "Alaila, ua kuhihewa ko kaua hele ana mai nei ia nei.  O keia ka mahele hana mua loa e ikeia ai na wahine koikoi o loko o kela puali aha mele e lawelawe ana i na hana o keia po.  Aka e Miss Arevalo, e hoomanawanui kaua.  Ua nele kaua i ka ike ana i kou makuahine i keia po, aka, i ka po paha o ka la apopo kaua e ike ai iaia ma kekahi hale mele okoa aku, a ke nele kaua ia wahi, e hele aku no kaua i wahi okoa, a pela kaua e hele huli ai i kou makuahine, a hiki i kona loaa ana ia kaua.  E hoomanawanui oe a hiki i kou ike maka ana i ka Lede Beatirisia o Hametona."

 

PRINCESS CHIMAY AND THE CHATEAU DE CHIMAY.

 

            Princess Chimay who has won world wide notoriety by eloping with Rigo, a Hungarian gypsy fiddler, is a daughter of Captain Eber Ward, of Michigan.  In 1890, when only 17, she married Prince Chimay of Belgium.

            Ke kii keia o ke Kamaliiwahine Chimay, ka wahine i holo mahuka me kekahi kanaka hookani pila "vaiolina" mai Hunegaria mai, nona ka inoa o Rigo.  He kaikamahine Amerika keia, a o Kapena Eber Ward o Mikigana, kona makuakane.  Ma ka makahiki 1890 i mare ai keia kaikamahine i ke Keikialii Chimay o Belegiuma.  O ke kii hale e ku mai la mahope aku, oia o ka Hale Kakela De Chimay, a home noho e ua lede nei me kana kane: aka, o ka inoa alii, ka hanohano ame ke kuonoono, ua lilo i mea ole, i ka 'ne hone a ka pila "vaiolina."

           

KA A'O-HOKU.

(Hoomauia.)

            7.  Heaha na Asteroids?

            He poe Hokuhele liilii keia, ua like ka nui o na kino, me ko na mahina.  Ua hele poai puni no nae lakou i ka La, elike me na Hokuhele.  He poe lehulehu lao lakou.  Ala no ko lakou mau alo-poai mawaena o ko Iupita alapoai ame ko Mars.  He 150 a oi ka nui o ia poe i ikeaia me na ohenana.

            8.  Heaha na Hokuwelowelo (Comets)?

            He mau mea kino lahilahi loa keia me na "welo-welo" nunui e poaipuni ana i ka La ma na alapoai Ellipse (poepoe) loloa.

            9.  Mahea ka like ole o na Hokuhele ame na Hokupaa, ma ko lakou nanaina?

            Penei:  Ua mau ka noho like o keia Hokupaa keia Hokupaa me kona poe hoa, aohe nauei aka, o na Hokuhele, e naue mau ana, me he poe kuewa la, aole noho ma kahi hookahi.  Eia nohoi kekahi like ole.  I ka hoonui ana o ka Hokuhele me ka ohenana, ua mohala ae kona poepoe, me he kino nui la, elike me ka mahina.  Aka, i ka hoonui ana i na Hokupaa, oia mau ke ano kiko makalii, mahuahua loa nae ke alohilohi, aole mohala iki ae ka palahalaha.

 

MOKUNA II

NA ALAPOAI-ORBITS.

            Heaha na Alapoai o na Hokuhele?  Ua poai puna mau kela ame keia Hokuhele i ka la ma kekahi alapoai poepoe.  Mai ke komohana a i ka hikina, ka hele puni ana o na hokuhele apau.

            O keia alahele a ka Hokuhele i kaa aku ai, ua kapaia he Alapoai (Orbit).

            2.  He kaulike anei na Alapoai o na Hokuhele kekahi i kekahi?

            Aole no lakou i kaulike loa.  Ua hi-o iki ka ili-laumania o kekahi alapoai i ka ili-laumania o kekahi.  Aia no ka la mawaena konu.

            3.  Pehea ka nui o ka hi-o ana o na Alapoai o na Hokuhele i ko ka Honua?

Ko Mercury....7 deg. 0 min. 4 sec. 5

Ko Venus....3 deg. 23 min. 29 sec 5

Ko Mars....1 deg. 51 min. 6 sec. 2

Ko Jupiter....1 deg. 18 min. 51 sec. 3

Ko Saturn....2 deg. 29 min. 35 sec 7

Ko Uranus....0 deg. 46 min. 28 sec 0

Ko Neptune....1 deg. 47 min. 1 sec. 7

Ko Pallas (Asteroid) 34 deg. 42 min. 30 sec

            He poepoe loloa anei na Alapoai?

            Aole he poepoe kupono loa.  Ua oi iki kekahi anawaena o ke Alapoai i kekahi anawaena.  Ua oi iki ke kaawale o ka Hokuhele i ka La ma kekahi @.  Nolaila, he mau Poai Ellipse na Alapoai o na Hokuhele apau, he aneane kupono nae i ka poai maoli.  Aia no ka La ma kekahi o na kikowaena elua o ka Ellipse.

            5.  Heaha la ke kumu o ka hele puai ana o na Hokuhele i ka La?

            O ka ume kaumaha ke kumu.  E hoomamao kakou i ke kanawai o ka Ume kaumaha; ua @@ mau na mea kino apau, kekahi i kekahi na Hailo like ka ikaika o ka un@ aha ma ka nui o ka Materia, a ua me@io kuu ka Ikaika o ka Ume ana i ko kuea (@uara) o ke kaawale.  Ua hoikeia ma ka Ako akamai (Natural Philosophy), ke kumu o ka Motio Paoi; penei:  Elua ikaika e hoo-motio ana i na mea kino holo poai. (a) ka Ikaika Imi Kikowaena.  E huki mau ana ia Ikaika i ka mea kino i ke kikowaena: (e) ka Ikaika Haalele kikowaena.  E hoolele aku ana ia ikaika i ka mea kino ma ke kahapili o kona alapoai.  A ua akaka ma keia wehewehe ana, o ka Motio hui o na Ikaika elua, oia no ka hele-poai ana o ka Mea-Kino a puni kona kikowaena.

            O ka La ke kikowaena o na hokuhele apau.  Ua ume mau oia ia lakou me ka Ume kaumaha Ikaika loa, no ka pa 700 o kona Materia i ka huina o ko lakou (mau) materia apau.  Na ke Akua nohoi i hoolawa aku ia lakou pakahi i ka ikaika haalele kikowaena kupono.  Nolaila, ua hele poai mau lakou.

            6.  Heaha ke kumu o ka hele poai Ellipse ana o na Hokuhele?

            No ke kohu (ku Iike) ole o ka Ikaika haalele kikowaena i ka Ume kaumaha o ka La.  Penei:  I ka wa e kokoke ai ka hokuhele i ka La, pakela ae la kona Ikaikla haalele kikowaena, a holo ino aku ia ma kona ala-poai, a hoomanao aku la.  Aka, ma ia holo loa ana, peleleu iho ia na huina a na kaha-pili i na hanai, a hiki mai ia ka Ume kaumaha, me ka hoemi ana i keia Ikaika haalele; emi iho la kela ikaika a nawaliwali, a hoomaka iho la ka hokulele e poai hookokoke mai i ka La Lilo ae la na huina oi, me ke kokua ana o ka Ume kaumaha i ka Ikaika haalele kikowaena.  Hookokoke mai la ka Hokuhele, a mahuahua loa kona velocity (nee ana) a lanakila hou ka Ikaika haalele (kikowaena) maluna o ka Ume kaumaha, a hoomamao hou aku.  A pela e kike mau ai ka hoomamao ana ame ka hookokoke ana, a lilo ka poai i Ellipse.

 

 

            He paikau hoomaamaa ka na luina o ka mokukaua Beritania "Icarus" ma uka nei o ka aina i ke kakahiaka Poaha o keia pule aku nei.  O ka wa mualoa keia o ko na "manua" Pelekane paikau aina ana, no na makahiki ekolu i hala ae nei.