Ka Nupepa Kuokoa, Volume XXXVI, Number 14, 2 April 1897 — UA HALA-UA PIO KE KUKUI O KONA HALE. [ARTICLE]

UA HALA-UA PIO KE KUKUI O KONA HALE.

Ma ke ahiahi Poakahi nei, e aneane ana paha i ka hora 5, ua loohia iho la o Lum Chee Aehi, ka luaui o Mr. W. C. Aehi, i kekahi poino manaonao. laia i huli hoi aku ai, mai kai aku nei o Honolulu a hoea i Kapaiama, maluna o ke kaa hapaumi. ua lele iho la ia mailuna iho o ua kaa la, oiai no nae e holo ana ke kaa. Ua hina iho la oia ilalo, a pii ia mai la kona mau wawae e na huila o ke kaa hapaumi, a loohia iho la he poino nui. Ua hoea ma kahi i poino ai oia, he elua kanaka oia o Wayson ame Sioggett. A malalo o ka laua mau kauoha ua hoihoi ia oia no ka halemai o na Pake, mauka o Kapalama. Malaila, ua okiia na wawae i poino e ke kauka, me ka manaoia oia ka mea e loaa ai ka palekana. Aka, i ka hoea ana i ka hora 9:30 o ka po ana iho. ua haalele mai la ka hanu ola iaia, a hoi aku la oia ma kela aoao, me ka haalele ana iho i kana keiki, hunona ame ka moopuna. Ma ka noho ana o ka Aha Koronero ma ka hora 10 o ke kakahiaka Poakolu nei, ma ke Keena o ka Hope liamuku, ua hoohoio lakou, ua make oia mamuli o ka ulia wale. Ma ka auina la Poalua mai, ua manole ia aku kona kino wailua no ka Pa Ilina o na Pake ma Pauoa. Ua ukaliia aku kona huakai hoolewa e kana keiki hookahi, Mr. W. C. Aehi, ka mea nana oia i malama iho nei me ke aloha ame ka pauaho ole a hala wale aku la, kana hunona, kana moopuna. ka ohana o kana keiki, na hoaloha o kana keiki. He kamaaina kahiko loa keia no Kohala Akau, Hawaii. Maanei i loaa ai mai kona puhaka mai o Mr. W. C. Aehi, kana keiki. O ka oihana hale inu ki kana hana i lawelawe nui ai malaila. A ua kamaaina oia i na poe o Kohala Akau. He kanaka kokua nui oia i na hana pono malaila. He nohona maluhia no kona ame ka maemae. Aloha no!