Ka Nupepa Kuokoa, Volume XXXVI, Number 23, 4 June 1897 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVI.         HELU 23.       HONOULULU, POALIMA, IUNE 4. 1897.           NA HELU APAU 2653

 

Hoolaha Loio.

 

W. R. KAKELA,

Loio a he Kokua ma ke Kanawai.

HE LUNA HOOIAIO PALAPALA.

2370

--------

@ A. DICKEY.

            @ o ke Keena o ka Loio Kuhina @ a he Loio Hoopii ma ka Aha @ o Honolulu.

------

            E Hookoia na hana pili kanawai apau ma ka Mokupuni mai.

            O A.F. Tavares, Kakauolelo a Mah@o.                     1yr.

 

---------

Hoolaha Kumau.

 

PAPA! PAPA

 

AIA MA KAHI O

 

Lewers & Cooke

 

(LUI MA)

 

Ma ke kahua hema o Alanui Papu me Moi.

 

E LOAA NO NA

 

PAPA NOUAIKI

 

O kela a me keia ano.

 

Na Paai Puka, na Puka Anaiani,

na Olepelepe, na Pou, na O'a,

na Papa Hele, na Papu Ku,

me na Papa Moe he nui l a

 

NV PILI HALE O NA ANO A PAU

a me  na

 

WAI HOOHUNUHINU NANI

@ a pau loa.

 

Na Balaki o na Ano he Nui Wal.

            Ke hai ia aku nei oukou e na makamaka a pau, ua makaukau keia mau makamaka o oukou hoolawa aku ma na mea a pau ili ana ma ka laua oihana no ke

 

Uku Haahaa Loa.

 

E like me aka mea a hoio aua mawaen@

a me ka Mea Kuai

 

Hele Mai e Wae no Oukou iho

8896 q

--------

 

HE MOOLELO NANI

LUBIANA KASIMILA,

 

KA NAITA O KA

 

LIONA GULA O BOHEMIA.

 

A I OLE

 

Ka Hui Naita Eleele o ka Lima Ulaula.

 

MOKUNA IX.

 

            Oiai ua wahi lutanela nei o hoike ana i keia moolelo, ua ikea ka olino ana o na kukuna o ka hauoli ma na helehelena o Manafereda ame ka Naita Mamiona: a i ka pau ana o na kakahele ana a ua wahi lutanela nei, ua lalau aku la o Manafereda ia Lubiana a hoopili mai la i kona umauma a honi iho la iaia ma ka lae.

            O Mamiona nohoi kekahi i hoike mai i kona mau manao ohohia o ka hauoli no na hana hanohano a kilakila a kona hoahanau.

            O ka Lede Ariadane hoi, oiai hoi kona puuwai e kaohi ana i na oni kapalili ana a na hue koni ana a na manao ulumahiehie o ka mahalo no ka oiwi ana i aloha ai, aia ke hoike mai la kona mau papalina i ka pua aai ana mai a ka ui ohelohelo a ka nani, e hoike ana me ka maopopo, ua pehia eha ia oia e na hana hiwahiwa a ka Naita Lubiana.

            Mahope iho o ka pau ana o na hoike ana o na manao piha mahalo o ka luaui Manafereda, ua hoomau aku la o Lubiana i ka hai ana mai i kahi i koe aku o kana moolelo. Pela i hoohalaia ai na hora oia ahiahi a hiki i ka wa i hoi aku ai ka Lede Ariadane no kona wahi moe, no ka hooluolu ana i koena aku o ka po. A ma ka wa i hiamoe ai ua Lede nei i haalele iho ai o Lubiana ma ia loko o kahi pupupu-hale a hele aku la no waho, a noho iho la ma ka mauu.

-----

MOKUNA 10.

 

Ke Dake Nui Rupereto o ka Hale Kakela Eleele, ka Mana Huna Pohihihi. Ka Leo Kupianaha.

 

            E ka makamaka heluhelu, he mea pono ia kaua ke huli hope ae a nana aku i ke Duke Nui Rupereto o Frankenstein, ka mea nana i hoopaa pio i ka Lede Ariadane a kaua i ike ae nei, eia oia i keia wa malalo o ka malama ana o na Naita Eleele o ka Lima Ulaula.

            Ma ke kakahiaka o ka la mahope iho o ka la i haalele aku ai o Ariadane i na paia koou o ke Kakela Eleele, ka Home Kaukaweli o ke Duke Rupereto, ua ike iho la ua Duke nei, ua nalowale aku ka Lede opio mailoko aku o kona hale kakela.

            ua ala ae la oia i ke kakahiaka nui wale o keia la, oiai he le keia ana i manao ai e hele aku i ka uhai holoholona me kana malihini, oia hoi o Kauna Gaspard o Valesebuga. ua hoouna aku oia i kekahi mea e kii aku i ka Lede Ariadane no ka hele pu ana ma ia kakahiaka ma ka huakai uhai holoholona, aka, i ka huli hoi ana mai nae o ka elele ona, ua hoike mai la ia, aole ka Lede Ariadane maloko o kona rumi.

            No keia lono i loaa mai i ua Duke Nui nei, ua haawila ae la na kauoha i na kanaka e hele aku e huli ma na wahi apau o loko o ka hale kakela, a e nana pu hoi i na e loaa ana he mau moali a he mau meheu kekahi e hoike mai ana no kahi i nalowale aku ai ka Lede Ariadane.

            He mea oiaio ua loaa aku la i keia poe i hoounaia aku ai he mau meheu kapuai wawae wahine e kamoe ana mai ka hale kakela aku a hoea i ka pa pohaku e hoopuni ana i ka hale kakela, a mai laila aku ka moali ana o ua mau kapuai wawae la a hoea i ka uwapo papa e moe ana maluna o ka auwaha eli e hoopuni ana mawaho mai o ka pa o ka hale kakela.

            I ka hoikeia ana mai o keia mea i ua Duke Rupereto nei, ua nui launa ole kona inaina ame kona huhu. Ike iho la ia, ua hoohaahaa ino loa ia kona mana ame kana mau kauoha e keia kaikamahine.

            Hooholo pu iho la nohoi ua Duke puuwai eleele nei, ua kokua ia keia holo mahuka ana o ua kaikamahine la e kekahi kanaka a poe kanaka paha o loko o ka hale kakela. Oiai aole hiki ia Ariadane ke pii aku maluna o ka pa ke ole kekahi alapii i kukuluia aku ma ua pa la, a o keia alapii hoi me he mea la na kekahi kanaka a mau kanaka ponoi no ia o loko o ka hale kakela i kukulu aku ma ia wahi, a loaa ai he alahele no ua kaikamahine e puka ai mailoko aku o ka pa.

            Me ka piha inaina laua ole o ua Duke Rupereto nei, kauoha aku la ia e laweia mai imua ona ka lunapaahao oia hoi o Winifereda.

            I ka hoea ana'ku o ua lunapaahao la imua o ua Duke Nui la, ua ninaninau ia mai la ia:

            "E Winifereda, ua maopopo no anei ia oe ua mahuka aku ka Lede Ariadane mailoko aku nei o ka hale kakela ma ka po nei?"

            No keia ninau i waihoia mai imua o ua lunapaahao la, ua ano e ae la kona mau helehelena me ka piha pahaohao launa ole, a hoike aku la oia imua o ua Duke nei i kona ike ole ana ia mea, a he nuhou pahaohao nohoi ia imua ona ma ia kakahiaka: aka, ua hooiaio mai la nae ke Duke imua ona, ua nalowale io no ka Lede Ariadane mailoko aku o ka hale kakela.

            "A ina pela," wahi a ua luna paahao nei i pane aku ai, "ua loaa na kokua ana i ua lede opio la mai waho mai, aole hoi mai kahi mea aku o loko nei o ka hale kakela.

            "Pehea e hiki ai?" i ninau mai ai ke Duke.

            "E kuu haku, aole au i ike i ke ano e hiki ai ke hookoia ia mea; aka, e hai aku nae au ia oe, ua lohe wale au no kekahi mana kupaianaha loa e hana nei me ke pahaohao loa iloko nei o ka aina," wahi a Winifereda i pane aku ai imua ke Duke.

            Ua ikeia aku la hoi ka hiakea pu anan ae o na helehelena o ua Duke nei, eia nae aole oia i pane mai ia wa. Ua hapai aku la hoi ka lunapaahao i kekahi ninau:

            "Ua lohe anei oe, e kuu haku, i kahi mea e pili ana ia Ludovika ame Jubala?"

            "Ludovika ame Jubala?" i kupinai mai ai ua Duke Nui nei, oiai hoi i li-o ae ai kona mau onohi maka me ka hoomau ana mai nohoi i ke kamailio ana. "Ua hoouna aku au ia laua ma ke alahele e hoea aku ai i Kempen, no ka hoomakaikiu ana i kekahi kanaka hololio mai Keilberg mai. Manao au ua huli hoi mai nei paha laua, a eia laua iloko nei o ka o ka hale kakela i keia wa."

            "E kuu haku," wahi a Winifereda. "aole loa laua e hoi hou mai ana e noho kauwa nau."

            "E Winifereda, heaha ke ano o kau olelo?"

            "E kuu haku, e hoolohe mai oe, Ua loaa ko laua mau kino make e lewalewa ana maluna o kekahi kumulauu iloko o na ululaau, a e paa ana ma ko laua mau kino he mau pahi puhaka me na apana ili hipa i kakauia na huaolelo KA LIMA ULAULA."

            Ua pii ino loa ae la ka helehelena inoino ma no hiohiona o ua Duke Nui, okala ae la kona mau lauoho, a he nanaiana kunahihi maoli kona ke ikeia aku.

            "E Winifereda. he oiaio anei keia mea au i hai mai nei?"

            "Ae e kuu haku, Ke noonoo ae au no ia mea, aole i kana mai ka o punanuanu o ka hopohopo ame ka maka'u iloko o'u. A e kuu haku, heahea la ke ano o keia mea e ikeia nei ma kela mau apana ili hipa weliweli KA LIMA UA ULA? Mai hea mai hoi ka mana o keia Lima wehiwehi i hiki ole ai ia ke anai ia?"

-------

 

            Mahope iho o ka hala ana o na makahiki ekolu o ka loohia ehaeha ana o Mr. Isasska Horner. ka ona o ka Hale Burton. ma Burton. W.V.. a he kanaka hoi i kamaaina nui i ma keia mokuaina. me ka ma'i rumatika. aia hoi ua hoolaia oia. Olelo oia: "Aohe i lawa ia'u na huaolelo e hiki ai ia'u ke hoike aku i ka nui o ko'u ehaeha. ua hai mai ko'u mau kauka. aohe a lakou mea e hana mai ai no'u: a ua ike pono nohoi ko'u poe hoaloha. aohe io no he mea kupono e loaa ai ia'u ka maha, aka, o ka make wale no. Iloko o Iune. 1894. ua olelo aku la o Mr. Evans, e noho lawelawe kuai ana ma ka Hui Kuai Laau Lapaau o Wheeling. e hoao au i ka LAAU HAMO A KAMALENA. I keia wa, ua pehu ae la kuu wawae ame kuu lima a kohu opeope nunui. me he mea la ia ka'u hoomaopopo iho e pahu maoli ae ana kuu wawae, aka. mahope koke  iho o kuu hamo ana me ak Laau Hamo, emi iho la ka pehu, pau ka eha ame ka hu'i a i keia wa ke manaoio loa nei au ua ola loa au. E kuaiia ana e na poe kuai laau lapaau apau. O BENSON, SMITH & CO., na Agena no Ko Hawaii Pae Aina.

 

KA MEA HUNA POHIHIHI

---------

 

Uhuhiaa e Hoolumakiekei no "Ke Kilohana Pookela o ka lahui Hawaii."

----------

 

MOKUNA XXII.

 

Ua Palekana Anei?

           

            A hala kekahi wa. pane mai la ua elemakule Tereveliana nei:

            "I ke awakea o keia la e hoi aku ai kaua, a haalele iho hoi kaua ia Ladana nei. He la maikai keia, a manao au e maikai a e oluolu ana no ka kaua huakai. Ae-e kuu hanai, he mea pono loa ia kaua ke hoi aku no Tereveliana Pa, oiai ke ike aku nei au i ke ano e o kou helehelena."

            "E kuu haku, hauoli loa au ke hoi aku kaua no Tereveliana Pa," wahi a Alamira i pane mai ai.

            "Mai kapa hou mai oe ia'u he haku," i pane aku ai ka Haku Tereveliana. me ka hoomau hoi i ka olelo ana'ku. "E hoomanao oe e ka Lede Alamira. aole oe he kaakauolelo na'u i keia wa. ala. o ka'u moopuna hanai oe. Nolaila. ke ike nei oe i ko kaua mau kulana i kahi ame kekahi. Ua makemake loa hoi au a kahea mai oe ia'u o kupuna."

            Me na helehelena e olinoia ana e ka hauoli, ame ka houpo i hoohiwahiwaia me na haawina maemae o ka oluolu i pane mai ai o Alamira i ka olelo ana:

            "Me kuu puuwai i hoopihaia me ka hauoli, ke kahea aku nei au ia oe ma ka inoa au i hoike mai nei ia'u. Nolaila. e kupuna, ina manao oe aohe a'u hana nui e hookaulua hou iho ai me oe i keia wa. alaila. e hele ae au e hoomakaumaku no ko kaua huli hoi ana'ku, oiai hookahi no hora i koe a hoea aku i ka wa au i hooholo ai no ko kaua huli hoi ana'ku."

            I keia wa i ku ae ai ua Lede Alamira nei iluna, a haawi iho la oia i muki anan ma ka lae o kona kupunakane hookama, alaila, haalele iho la oi ia loko o ke keena hookipa.

            Hele aku la ua Lede opio nei me ka naau hauoli a hoomakaukau iho la i ko laua mau wahi puolo. Alaila, paina iho la laua i ko laua paina awakea maloko o ke keena hookipa: a mahope iho o ka pau ana o ka ai ana, ua hoea mai la ke kaa. Aole hoi i liuliu mahope iho, ua haalele iho la ka Haku Tereveliana ame ka Lede Alamira i ka Hotele Wiletona a holo aku la no kahi hoolulu kaa-ahi. He mau minute wale nohoi mahope iho o ko laua hoea ana aku no laila, ua kau aku la laua no luna o ke kaa-ahi a no Tereveliana Pa ka pahu hopu.

            I ka hele ana hoi a hoea i ke ahiahi ua hiki aku la laua i kahi hoolulu kaa ma Tereveliana Pa. a mai laila aku hoi loa aku la laua no Tereveliana Hale.

            e kuu makamaka heluhelu, maanei a e mai oe ia'u e huli aku ka kaua nana ana i keia wa mawaho a maloko o Tereveliana Hale, a e hooka'ulua iki kaua i ke kamailio ana no ka Haku Tereveliana ame ka Lede Alamira.

            I keia ahiahi a kaua e ike nei, ua hoolumahiehie ae la na hiohiona o Tereveliana Hale, maloko iho ona a mawaho hoi ona. ua ho-aia ae la na ipukukui he lehulehu loa o loko o na keena like ole me he mau hoku la i ka poiuiu o ka lani. Aia na uluwehiwehi lipolipo o ka waokele ke hooiwahiwa la ia loko o ua mau keena la me ka nani nui. O na pala keia o kela ame keia rumi, ua hanaia me ka maiau loa. E kuuwlu ana hoi na paku ame na uhi lole nani ma na pukaaniani ame na puka komo o ka hapa nui o na puka o ua hale la. He mau kauwa lehulehu hoi e ikeia aku ana e holoholo mai na maloko o ua Hale Tereveliana nei. O keia mau hiohiona ulumaheihei apau e ikeia aku nei, i piha i ka hauoli ame ka nani, he mau mea hou loa ia i ikeia ma ua Tereveliana Hale nei, a ua kue loa hoi keia mau nanaina i ko na mea maa mau i ikeia ma ua hale ia i na wa i hala ae.

            Nolaila, me keia hiohiona hoi a kaua e kuu makamka heluhelu e ike ae la ia Tereveliana Hale, e huli hope ae ai kaua a nana aku i ka Haku Tereveliana ame ka Lede Alamira.

            I ka hala ana ae o na kualono ame na ha-alu o ke alahele e kamoe ana mai kahi hoolulu kaa-ahi mai a hoea i Tereveliana Hale, aia hoi ua hiki mai la ua mau kamahele nei a kaua e kuu makamaka heluhelu ma ke alahele e kamoe pono ana maloko o ka uluaau a keea aku ai i Tereveliana Pa Hale.   

            Oiai laua e nee aku ana ma keia alahele, ua ike aku la o Alamira me ke pihoihoi nui i ka aa mai o na kukui maloko o Tereveliana Hale. Ua hoike mai la hoi na hiohiona apau ana e ike aku ana i kekahi nanaina ano hou loa. a ua keala mai ia hoi ia nanaina ano hoi o ua hale la iloko o kona houpo i na hipuu manao o ka hauoli.

            Ma keia wa i huli mai ai ka Makuisa Tereveliana a pane mai la ia Alamira:

            "E Mis Arevalo, he nanaina ohohia ka kela mau ipukukui e hoike mai la imua o kaua. O! Nani ko'u olioli i ko kaua hoi ana mai nei ia nei, a haalele aku la kaua i ka puku'iku'i piha uahi o Ladana. Aohe mea e ae a ke kanaka e honi ai maloko o kela kulanakauhale, aka, o kela mau punohu uwahi wale no e oili ana mai na hale-paahana mai he lehulehu loa a puni ke kulanahauhale. Aka, e Miss Arevalo, kuu moopuna, ma Tereveliana Home nei, e loaa mau ana ia oe na mapuna ea huihui ame ka oluolu, e honi ana oe i na hanu aala o na mea ulu maemae, i hapala ole ia hoi e na pohina uwahi hohono elike me ko Ladana."

            Aole nohoi i liuliu, ua hoea aku la ke kaa i ka hale. A ma ia wa i ike aku ai o Alamira, ua aahuia na kauwa kane me na aahu omaomao i hookinohinohi ia me ua pihi wai gula, a o na wahine lawelawe hoi me na aahu ano keokeo, me na pale keokeo ma ke alo ame na papale muouou keokeo ma ko lakou mau poo. Aia ma ko lakou mau helehelena na hoike ana a ka hauoli. E ku ana hoi mamua mai o lakou o Pumetona, ke kauwa wahine kahiko loa a ka Haku Tereveliana.

            Ma ka wa hoi a ka ahku Terveliana ame Alamira i lele iho ai mai luna iho o ke kaa, a pii aku la laua a hoea i ka lanai ua hele mai la na kauwa apau a haawi mai la i ko lakou aloha ia laua.

            Ma ka wa i aloha aku ai ka Haku Tereveliana i kekahi o na kauwa kane, ua pane aku la ia:

            "Hauoli loa au i kou hoi hou ana mai nei e Keoki me a'u. Pela nohoi me na kauwa akhio o Tereveliana Hale nei. E hana aku oukou elike me na mea i maa mau ia oukouoiai oukou e noho ana me a'u i kekahi mau makahiki loihi i kaa hope ae nei. Aka, maluna ae o na mea apau e hoolohe loa oukou i na kauoha mai kuu moopuna mai, oia hoi keia Lede opio. O Miss Alamira Arevalo keia, ke kaikamahine a Kauna Arevalo me kana wahine, oia ka Lede Kauna Arevalo. O keia ka haku-wahine o Tereveliana Hale nei."

            I keia wa i hooaunaia mai ai na kauwa apau i ua Lede opio Alamira nei, alaila, komo loa aku la ka Haku Tereveliana ame kana hanai opio no loko o ke keena hookipa.

            He nanaina a he mau hiehiona hauoli ke hoike ana maluna o na helehelena o ka Haku Tereveliana, oiai ia i noho iho ai maluna o kekahi noho mamua pono o ke kapuahi hoopumehana.

            A iaia nae i huli mai ai a nana mai la ma ka puka komo, aia hoi ike mai la oia i na helehelena o Wighy, kana kauwa, ua hele a piha pahaohao, a ia wa i pane ae ai oia:

            "A-he! Heaha la ka makemake o kela wahi kauwa i kiei mai nei iloko nei me kona mau onohi maka nei iloko nei me kona mau onohi maka piha pahaohao a ano e hoi? He mea oiaio, he kulana ano hou loa keia o Tereveliana Hale nei i kana ike ana. Ua like loa no keia wahi kanaka me kona haku me Adelo. Aka, he uuku wale no nae keia wahi mea hoike o keia po ana e ike nei, a lilo ai hoi i mea nona e piha hoohuoi loa ai. E hoea mai ana ka wa e hooi loa ia aku ai ko lakou piha pahaohao, oiai i keia wa he hoomaka wale ana no keia o ka'u mau hoopalahalaha ana'ku i na haawina hooulu hauoli maluna o ka'u moopuna aloha."

            I nei wa i komo mai ai o Pumetona. ke kauwa wahine. a hoike mai la ua kokoke e makaukau ka paina. a ua makemake hoi'oia e ukali aku ia Alamira no kona rumi kommo kapa, i hiki ai iaia ke hoomakaukau iaia iho no ka hele ana mai i ka papa ahaaina.

            Ia wa i hoi aku ai o Alamira me ke kauwa wahine no kona rumi. I ko laua hoea ana'ku e noho mai ana kahi kaikamahine lawelawe, ua puolo o kona haku wahine. Alaila, olelo mai la o Pumetona ia Alamira:

            "Owau ke lawelawe aku nou, e kuu haku opio, a e hookuu aku oe i kahi kaikamahine. Na'u no e kokua aku ia oe i ke komo ana i kou mau aahu."

            Ike iho la o Alamira, mamuli o keia mau olelo a Pumetona, ua makemake ia e kamailio pu me ia ma ke ano malu, nolaila, kauoha mai la oia i ke kaikamahine kauwa e haalele mai ia laua.

            "E Miss Arevalo, ua ike anei oe i kekahi loli ano e nui loa elike me keia au e ike nei i keia po ma Tereveliana Hale nei?" wahi a ua kauwa wahine la i ninau mai ai ia Alamira, mahope iho o ka haalele ana iho o kahi kaikamahine kauwa, me ka hoomau ana nohoi i ke kamailio ana mai. "He eono mau kauwa hou o ka hale nei me ka aipuupuu, ke kahu lio, ame ke kuke. Ke ike nei hoi oe, ua ola na mea apau maloko nei o Tereveliana Hale. Aole hoi elike me na la pamaloo a kaua i ike pu iho ai, mamua o ko olua holo ana'ku nei no Ladana. A e Miss Arevalo, e hoomanao oe ma kahi e ulu lipolipo ana na mea ulu, e mohala ana na pua me ka nani a e mapuhea ana ko @ me ke onaona. he wahi ia i akipu'u mau @ me na mapuna wai hui@ a i ka wa e loaa ole aina hooma-u ana a keia mau mapuna wai. e panoa aea@ ka waina a maloohaha me ke kuanea. Nolaila, e Miss Arevalo, mamuli o kau mau hooikaika ana e hoohauoli i na noonoo kuanea o kuu haku aia hou ua huai mai la na waipuna nani o kona mau manao maikai a oia keia a kaua e ike nei."

            "Ae." i hoomau hou mai ai na kauwa wahine la i ke kamailio ana "Ma ka la i nehinei, palapala mai la ka Haku Tereveliana la'u a hoike mai ana hoi ia'u, ua poa kou noho kakauolelo ana nona, aka, i keia wa ke hooilina oe no na waiwai i hiki iaia ke lawe mai a Adelo mai. Ua hai mai nohoi oia ia'u he moopuna oe nana. Ua hoea mai keia haawina pomaikai maluna ou, e kuu haku opio, mamuli o ka like loa o kou mau helehelena ma helehelena ame na onohi maka o kekahi mea o loko o ka ohana alii Tereveliana. A e Miss Arevalo e kuu haku opio, mai poina ike oe i ka hooikaika ana imua o ka Haku Tereveliana no Geofere Tereveliana, ka mea nona na helehelena poina ole a'u e ike nei maluna ou."

            "E kuu mama maikai ae ke kahea aku nei au ia oe i mama oe no'u no keia wahi. Aole loa au e poina o ka hooko ana aku ia hana. E hooikaika ana au ma na ano apau elike me ka hiki ia'u, e hoopalupalu aku i ka naau o ua Haku nei o kaua ma ka mea e pili ana i kana keiki hoahanau: aka,

he hana pohihihi no nae keia."

            "Ae - e Miss Arevalo, he hana pohihihi io no ia au e hooikaika aku ai, oiai ke ike nei no au, la oe e ninini ana i ka uhane o ka hoomalielie ana i na manao huhu o ka Haku Tereveliana no kana keiki, no Geofere, aia hoi o Adelo ma kekahi aoao ke hooulu mau mai la i na manao inaina iloko o ua Haku la. Aka, e kuu lede opio, e hoomanao oe, ina e huli hoi mai ana o Geofere a loaa hoi kona oluolu ia e kona makuakane hoahanau nei, alaila, aole loa e loaa ia Adelo he wahi lihilihi o keia waiwai. O ka'u mea e hai aku ai ia oe ma keia wahi, oia keia, e makaala loa oe no Adelo, he kanaka ino loa ia."

            I keia wa, ua makaukau loa ae la o Alamira ma na mea apau ua paa pono loa ae la kona aahu ame na kahiko hoohiwahiwa e ae. Ia wa hoi i haalele mai ai ke kauwa-wahine iaia a iho aku la oia no ka rumi hookipa.

            Oiai hoi o Alamira e ku hookahi ana iloko o kona keena, ua hapai wale ae la no ia i na manao elike me keia.

            "Eia au i keia wa iloko ponoi o ka hale o ko'u  mau kupana. O@ no ka io o ko lakou mau ia ka iwi hoi o ka lakou mau iwi a o ke koko hoi o ka lakou koko. Eia au ke ku nei iloko o keia hale ma ko'u kuleana ponoi. Ae no'u io no keia wahi a he kuleana oiaio hoi ko'u maanei. Aole loa ka Haku Tereveliana i hoomaupopo i keia mea. Ua kapa mai oia ia'u he moopuna a owau hoi ua kapa aku au iaia he kupunakane oia no'u. Na hoolilo mai oia ia'u  he hoolina ma na waiwai ponoi iho ona, koe aku hoi na waiwai i pili i ka ohana alii Tereveliana na waiwai hoi e ili ana maluna o kuu papa aloha, ke loaa iaia ka lanakila mamuli o ka'u mau hooikaika ana. Ua hoolilo mai hoi kuu kupunakane oiaio ma ke koko i Lede hookipa malihini au no Tereveliana nei. O! Nani ke mea kupaianaha! Aia kuu mama aloha ke noho la ma Hametona Kakela imua o kona luaui makuakane ma ke ano oia ka Lede hookipa hiwahiwa o ka hale kakela a oiai hoi kuu mama aloha e lawelawe ana ia oihana me ka hiehie nui, e paa pu ana oia me ia iho i ka mea huna pohihihi o kona mau ia o hoea nohoi i keia wa. A eia hoi au, kana kaikamahine, ma Tereveliana Hale nei, ua loaa mai la ia'u ia haawina hana hookahi. Owau ka Lede hookipa o keia hale a eia pu hoi me a'u ka lei pahaohao o ka mea huna pohihihi o ko'u hanauia ana. Auwe no ka hoi ka mea aloha. He mea huna pohihihi ma Hametona Kakela a he mea huna pohihihi ma Tereveliana hale -- Aloha Wale! A! He mea oiaio, ke hoomoamoa nei kuu kupunakane la'u me ke aloha ame ka hoomakamae ana., me ka maopopo ole nae owau io maoli ko kana moopuna ma ka io ame ke koko. A ma ka hora mua loa ana e ike ai i ko'u ano oiaio e kipakuia  auanei au mai kona alo mai. He mea pono loa ia'u ke hunakele loa ia'u mai iaia mai. O ko'u ikeia ana e ia oia ka haule ana mai o ka hilahila ame ka make maluna o'u, ko'u mau makua ame kuu mau pokii. Ua ike no au ua hoomaopopo o Papa i keia wa i ko'u wahi e noho nei. He mea kauolua ole, aia ke apoapo mai la kona olii pihoihoi no'u nei. Oh! Poor Papa!! Ina hoi e holopono ole ana ka'u mau hooikaika ana, aole i kana mai ka pilikia! Aka, e Alamira, e ke kaikamahine a Beatrisia me Geofere Tereveliana, e koa oe, mai hopohopo a mai kanalua, aole hoi e kuemi hope, aka e nee aku oe imua ma keia hana au i hoohiki ai, oia hoi, e loaa ke kuikahi aloha mawaena o kou kupunakane ame kou makuakane, a na ke Akua lokomaikai auanei e kokua i kau mau hooikaika ana."

            I keia wa, hele mai la ia a wehe ae la i ka puka o kona keena a iho aku la no ka rumi hookipa.

                                                (Aole i pau.)