Ka Nupepa Kuokoa, Volume XXXVI, Number 30, 23 July 1897 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

HAAWINA

KULA SABATI,

HAAWINA V. - AUGATE1.

Ko Paula hai euaneilo ana ma korineto.

Oihana 18:1-11.

 

            A mahope iho o keia mau mea, haalele iho ia o Paulo ia Atenai, a hele @ ia i Korineto.

            2 A loaa ia ia kekahi Iudaio, o Akula kona inoa, i hanauia ma Poneto, ia wa mua iho kona hiki ana mai, mai Italia mai, me kana wahine, o Perisekila, (no ka mea, ua kauoha aku ia Kelaudio i ka poe Iudaio a pau e, haalele ia Roma,) a hele mai ia ia io laua ia.

            3 A o ka like o kana oihana, noho ia me laua, a hana iho la: no ka mea, he poe humuhumu haleole lakou.

            4 Kamailio ae la ia maloko o ka halehalawai, i na la Sabati a pua, e hoohuli i na Iudaio a me na Helene.

            5 A hiki mai ia o Sila laua me Timeoteo, mai Makedonia mai, alaila ikaika loa o Paulo ma ka olelo, a hoike aku ia ia i na Iudaio ia Iesu, oia no ka Mesia.

            6 Kuee aku la lakou, olelo hoino mai la, alaila lulu iho la oia i kona kihei, i mai la ia lakou. Aia maluna o ko oukou poo iho ko oukou koko; ua maemae au; ma keia hope aku, e hele au i ko na aina e.

            7. Hele aku la ia mai ia wahi aku, a kipa aku la ma ka hale o kekahi kanaka, o Iouseto kona inoa, ua malama i ke Akua: ua pili no hoi kona hale ma ka halehalawai.

            8. A o Kerisepo ka luna o ka halehalawai, manaoio aku la ia i ka Haku me ko kona hale a pau.  A lohe ko Korineto he nui loa, a manaoio aku la, a bapetizoia iho la.

            9. Olelo mai ia ka Haku ia Paulo ma ka hihio i ka po, Mai makou oe, aka, e olelo aku, mai hoomumuie;

            10 No ka mea, owau pu kekahi me oe, aole hoi e lele kekahi ia oe e hana ino aku ia oe; noka mea, ua nui o'u poe kanaka maloko o keia kulanakauhale.

            11 Noho iho la ia malaila, hookahi makahiki a me na malama keu eono, e ao ana ia lakou ma ka olelo a ke Akua.

            PAUKU GULA.  1 Kor, 3:11.  Aole e hiki i ke kanaka ke hoonoho i kumu e ae, o ka mea i hoonohoia wale no; oi o Iesu Kristo.

            MANAO NUI.  E pono ke hoomanawanui ma ka imi ana e hoohuli mai i ka poe lehulehu ma ka manaoio.

            OLELO HOAKAKA.  A pau ko Paulo Iiuliu ana ma Atenai, ke kulanakauhale o ka poe akeakamai, ua hele aku la ia he mau mile 40 i Korineto, ke kulanakauhale o ka poe puni waiwai.  Ua kukuluia ia mawaena o kekahi aina puali mawaena o ke kaikuono o Kokrineto a me ka kai Aegeana.  He mau makaainana 4000,000 ia wa.  Ua nui na loaa o na mea kalepa, a nui na lilo no na hana lealea.  Ua lilo kona inoa i inoa kapakapa no na wahine hookamakama, a kaulana loa na pou i kalaiia malaila me kekahi mau poo nani; a pela no ka olnolino o ke keleawe olenalena i hanaia ma ua kulanakauhale la.  I ka wa a Paulo i noho ai ma Korineto, ua kakau oia i na leta elua i ko Tesaionike, oia no kona mau leta mua.  Ua noho hou oia ma Korineto, a kakau leta iko Galatia a me ko Roma.  A pau kona noho mua ana, ua noho ma Epeso, a mai laila mai ua kakau leta ike episetole mua i ko Korineto.

            1. Korineto,--o ke ano keia inoa oia no "nani:" a pela no kona kulana.  Eia nae ua pau loa kona nani i keia mau la.  He kahua helelei paumaelele wale no ma ia wahi.  2. Iudaio, --oia ko Paulo mea e imi mua ai e hai euanelio ma ko lakou halepule.  Akula, --he inoa Latina ma ke ano "aeto."  Perisekila,--he inoa Latina no hoi me ke ano "kahiko."  Ua loaa paha ia laua keia mau inoa i ka wa a laua i noho ai ma Roma.  Ua kipakuia na Iudaio a pau loa mai Roma aku i ka makahiki 12 o ke alii ana o Keiaudio, ka ha o ka emepra o Roma.  O ke ano hoohaunaele o ka poe Iudaio oia no ke kumu no keia hookuewa ana.  Ua hanauia o Akula ma Poneto, ka mokuaina ma ka aoao akau o ke panalaau nui o Asia Uuku ma kaha o ke kai Elele.  Oi aku ke akamai a me ka eleu o ko Akula wahine Perisekila, oiai hoi ua olelo pu ia na inoa elua, me he mea la he paa mare oho pono laua.  3. Oihana, --hanalima, no ka mea ua ao aku ka poe Rabi ke ole ke ka makua ao ana'ku i wahi hanalima i kana keiki, ma like keia kapulu me ke ao ana'ku i kana keiki e lilo i powa.  Halelole,--i uilana ia me na hulu o na kao.  4. Kamilio,--me ka poe noonoo, me ka wehwehe ana i ke ano o na olelo wanana, na mohai, na hoailona hoomana Iudaio.  5. Ikaika,--oiai i ka wa mamua iho, ua haiolelo oia me ka nawaliwali kino, me ka makau, a me ka haalulu nui, 1  Kor. 2:3.  Ua hoohoihoiia o Paulo ma ka lono maikai e pili ana i ka holopono ana o ka Euanelio ma Pilipi a me Tesaionike.  Ua loaa hou iaia he mau haawina manawalea no ko Pilipi mai, Pilipi 4:15.  6. Lulu, --he hoailona, Mar. 10:14, o kona waiho ana'ku i wahi kuleana ma ko lakou mau hana, oiai ua kuee lakou iaia ma ke ano he poe enemi hoouka kaua.  7. Iouseto,--he kanaka Roma, nona ka inoa "hoopono," i haalele ai i ka hoomanakii me ka hoomana ana ia Iehova.  Ma keia hale ua haiolelo o Paulo.  8. Kerisepo,--"apiipii," ke ano o keia inoa Latina, a nui na paele ma Amerika me keia inoa.  Bapetizoia,--mamuli o ko lakou hoike manaoio, i hoailonaia ma keia oihana laa.  9. Olelo,--e hooluolu ai ia Paulo, oiai ua paumako oia no ka ma'i kumau, ilihune, hana hook@anui, noho oa kuee, hooko ole.  10. Ino,--Aole pilikia maoli keia mau hakalia.  Ua hooko pono ia ka manao o ka Ha@, aole nona ka pupuahulu a me ke pioloke.

            I. Ka mea humuhumu h@, @ 3. A haalele o Paulo ia Atenai, ihea kona hele ana'ku?  Heaha hou olelo hoike e pili ana ia Korineto?  Me wai ko Paulo noho ana malaila?  Heaha ke laua oihana no ke ola kino?  Nohea mai laua? Heaha na kumu no ko Paulo liuliu ana ma Korineto?  Ua poho anei kona manao no ka lanakila ole ana o kona haiolelo ma Atenai?  Ua maikai anei ko Paulo hanalima ana no kona oia kino, 1 Kor. 9: 6-15?  Heaha kona kama pale no ka hoole ana i wahi uku makahiki mai ke anaina mai no kona oihana kahunapule? Ua kupono anei ka hookaa ana'ku i ka uku makahiki no ko kakou mau kahu ekalesia?

            II. Ka mea maiele, 4-6.  Heaha ko Paulo hana ma na la Sabati?  Ua kupono anei ka manaoio ke ole he mau kumu oiaio i ike pono ia? Ua lanakila oia ma ka hoohuli ana i na kanaka Iudaio uahoa?  Owai na hoa lawehana elua i a pau loa?  No keaha la ko lakou mau olelo hailiili?  Heaha ko Paulo hana i ka wa i maopopo ai ko lakou kuee a hooikaika ai iaia?  Nohea mai laua?  Heaha ko laua hailono e pili ana i ka hana a ka Haku ma Makedonia?  Heaha ana kumu no ko aulo hoolalelale ma kona hai euanelio ana?  Heaha na ano okoa o kona mau haio ma Atenai a me kona haiao ma Korineto?

            III. Ka mea paumako, 7-11.  A haalele o Paulo i ka halehalawai Iudaio, mahea kona haiao ana?  Ua kupono anei ka malama ana i na hana haipule ma ka halenoho?  Owai ke kanaka koikoi a Paulo i bapetizo ai, 1 Kor. 1-14?  Ua nui ae ka poe koikoi paha, ka poe haukae paha i hoohuliia i ka pono ma Korineto, 1 Kor. 6:9-11?  I ka wa a Paulo i paumako ai, nohea mai kekahi olelo hoohoihoi?  Heaha ko Iesu olelo hoolana?  Owai ko ka Haku poe ma Korineto?  A loaa ia Paulo ko Iesu olelo hoohoihoi, pehea oia?  Pehea i lilo ai keia mea nawaliwali i mea wikani, 2 Kor. 12:10?

            MANAO PILI            .  1. Ua hilahila anei oe e hanalima?  2. Ua hiki anei i na mea hanlima ke hooholo ola i ka hana a ka Hakku?  3. Ua noho anei o Iesu ma kkoku home?  4. Ua kupono anei i na wahine ke lawelawe pu me na kane i ka hana a ka Haku?  5. Ua hiki anei ia oe ke hoike aku i na kumu hooiaio onipaa no kou manaoio ana'ku ia Iesu, kou Akua Hoolapanai?

 

AHA EUANELIO

 

            E noho ana ka Aha Euanelio o ka Mokupuni o Hawaii ke hiki aku i ka Poaha, la 23 o Sepatemaba, 1897, ma ka luakini o Haili, Hilo, hora 10 a.m.

                                                                                    W. M. KALAIWAA

            Kailua, Kona, Iulai 13, 1897.

 

HALAWAI NUI MA KA LUAKINI O KALAUPAPA.

 

            Ma ka Poalua, la 13 o Iulai nei, ua akoakoa nui mai na hoahanau ma ka luakini no kekahi kumuhana ano nui i noho lunahoomaluia e Rev. D. Kaai, oia hoi keia: He $91.00 no ka luakini, aka nae ua pau i ka ai ia e Rev. S. K. Kamakahiki, kahunapule mua o Olowalu, Maui, ame J. A. Kamanu-lele-ole o Hilo.  O keia poe no ka poe kolohe o ka Ekalesia o Kalaupapa nei, o Iosia haole kekahi o keia, oiai he $13.70 o ka Ekalesia i pau iaia, a aole no hoi oia i hoihoi mai mamua o kona make ana.

                                    Me ka mahalo,

                                                WILLIE PUAHI.

            Kalaupapa, July, 15, 1897.

 

NA KUMU I LILO' AI KA LAAU OLA A KAMALENA I LAAU POOKELA NO KE NAHU, KOLERA MAE KA HI.

 

            1. E loaa hikiwawe loa ana ka oluolu ke eha ka opu, ke nahu a loohia paha i ke cholera morbus.

            2. Oia wale no ka laau lapaau puhili ole ma na ma'i hi-koko a hi maoli i hele a ikaika loa.

            3. Oia wale no ka laau e ola ai ka hi kau loihi.

            4. Oia wale no ka laau e ola ai ke nahu haoa.

            5. Oia wale no ka laau e ola ai ka hi-koko laulaha.

            6. Oia wale no ka laau hiki ke hilinaiia ma ka wa e loaa ai ke cholera infantum.

            7. Oia wale no ka laau puhili ole no na ma'i o ka opu.

            8. Aohe ulu mai na hopena ino mahope iho o kona imuia ana.

            9. He maikai a palekana nohio ka inu ana.

            10. He oi loa aku na ola i hoopakeleia e keia laau i kno kekahi laau e ae ma ke ao nei apau.  E kuaiia ana e na poe kuai laau lapaau apau.  O Bensom, Smith & Co., n Agena ma Ko Hawaii Pae Aina.

 

            Ma ke kakahiaka o ka Poanono o kela pule aku nei, "ahai" ia mai ana ka "lono" mai Kapahulu, Waikiki mai, ua hoopilikia ae kekahi kao hanaiahuhu a ko makou hoaloha Mr. S. K. Pua o ka "Ahai Lono o Hawaii," i ua makamaka ia no o makou, ma ka ohiu ana ae o na kiwi o ua kao la a ku ana ma kekahi wahi o kona kino.  Aole no nae i kukonukonu loa ka eha.

 

KA MEA HUNA POHIHIHI

U@ Hoo@hiehie no "Ke Kilohana Pookela o ka Lahui Hawaii"

 

MOKUNA XXV.

Ka Enemi ma ke Alahele--Ke Kupaa me ka Naueue ole--Ikea ka Mea Huna Pohihihi.

 

            Ma ka mokuna i hala, i ike ai kaua.  e kuu makamaka heluhelu.  i na mea apau e pili ana i ka huakai hololio a ka Ui opio o Tereveliana Pa, ka hopena hoi oia huakai, ame ka huli hoi ana o alamira no ka hale; nolaila, e waiho ana kaua, e kuu hoa haihai olelo o keia nanea, i ke kamailio ana no Alamira i keia wa, a e huli aku ka kaua mau kamailio ana i keia wa no Adelo, ka mea a kaua i ike ai ka enemi nui o Geofere Tereveliana, a o ke kanaka hoi nona ka puuwai i hookaukolo hoohihihi aku, me ka eleele lipolipo o ke kuko, maluna o Beatirisia, ka Ui Hoopahaohao o Hametona Kakela.

            E kuu hoa hoinainau, ua ike kaua ma ka mokuna mamua aku o ka mokuna i hala aku la i ko Adelo holo ana me ka pupuahulu a komo iloko o kona rumi mahope iho o kona heluehlu ana i ka palapala a Alamira.

            Mamuli o kona ike ana i na mea i hoikeia maloko o keia palapala i hookupouli loa ia ai kona 'noonoo, me ke kupilikii nui.  A oiai oia e noho ana iloko o kona keena, ua like ka ikiiki pioloke e hana mao ole ana iloko o kona houpo me he mea la ua nele maoli o loko o ua keena la ona i na mapuna ea oluolu, nolaila, ua ku ae la oia iluna a haalele iho la i ua keena la ona.

            Iaia i iho aku ai ilalo, halawai aku la ia me Hasekina, kana kauwa, ma kekahi keena o ka hale o lalo.  Ia wa peahi aku la oia iaia e hahai aku mahope ona, oiai hoi i kamoe aku ai kona mau kapuai noloko o ke kihapai.  Hele aku la ia a hoea i ka hale aniani hooulu mea kanu, a malaila oia i noho iho ai.  aole hoi i liuliu mahope iho hoea mai la o Hasekina.

            I kona ike ana mai i ka helehelena ano e o kona haku, ua ninau koke mai la oia:

            "Heaha keia e kuu haku?  Ua like maoli kou helehelena me koka mea ua make, ka hele a hakea pu?"

            "Ua like io no au me he mea la ua make i keia wa a'u e noho nei," i pane aku ai o Adelo, me ka olelo ana'ku, "E noho iho oe ilalo, a e hoolohe mai oe i ka'u mea e hoike aku ai ia oe.  Ke ola nei no o Geofere Tereveliana i keia wa."

            Me ka puiwa launa ole, me ka helehelena hoi i haikea pu ia, lele ae la o Hasekina a ku iluna, a hooho ae la ia:

            "Pehea?  Ke ola nei no oia?  Aole ka oia i make?  Ua hoi mai anei oia i Ladana nei?  Eia anei oia ia nei?  Pehea ia, ua ikeia anei ka oiaio o ka mea huna pohohoho o kela po weliweli?"

            "Aole.  E noho hou iho oe ilalo.  Ke ola nei oia i keia wa ma Enelani nei; aole hoi oia i hele mai ma Tereveliana Pa nei.  Eia oia ke pee nei ma kekahi wahi, malalo o kekahi inoa okoa, oia hoi, he inoa kapakapa kona.  O ke kumu o keia pee ana ona, oia kona maka'u o hopuia oia e ka Haku Tereveliana."

            I kela wa noho hou iho la kahi kauwa maluna o kona noho, a ninau mai la i kona haku:

            "Pehea oe i ike ai i keia mea, e kuu haku?"

            "Ua ikeia e a'u keia maloko o kekahi palapala i manao ole ia na ko'u mau maka e ike," wahi a Adelo, me ka hoomau ana'ku, "O keia kaikamahine e noho nei ia nei i keia wa, oia hoi o Miss Arevalo, ka mea hoi a kuu makuakane i hookama ai i moopuna hookama oia nana, a o ka mea hoi nana i hookahuli loa ae nei i ke ano o ka Haku Tereveliana mai kona kulana maa mau mai o na wa i hala ae nei a ke ano hou loa i keia a, o ke kaikamahine no ia a Geofere Tereveliana."

            I keia wa i oili mai ai he mau kulu hou puanuanu ma ka lae o kahi kauwa, a ma ia manawa no hoi i hooho ae ai oia:

            "Oia io anei ke kaikamahine a geofere Tereveliana?  Ae--pela no ko'u manao.  Akahi no au a hoopaopopo i ka like loa o na onohimaka o keia kaikamahine me ko Geofere!  Heae kana hana o onei, e kuu haku?"

            "Ua hele mai nei oia ia nei no ka imi i ka mea huna phhihihi o kela po welweli au i olelo mai nei, i mea oe holoiia ai ka eleele e poipu nei maluna o ka inoa o kona makuakane.  A o kekahi hohoi, e imi ana oia i mea nona e alohaia aku ai e ka Haku Tereveliana a ma ia ano e loaa ai iaia ka haswina dala mai keia elemkule hupo aku.  A mawaho ae o keia mau mea, aole o'u kanalua iki, eia oia ia neir no ka hookolo ana ma na meheu o na enemi o kona makuakane, i hiki ai iaia ke hookau mai i kekahi hoopai weliweli maluna oia poe!"

            Ua ikeia aku la ka haikea pu ana ae o na helehelena o ua wahi kauwa la.

            Ninau mai ia hoi oia ia Adelo me ka leo ano haalulu:

            "E kuu haku, heaha ia kau e hana ai."  E hele ana anei oe imua o ka Haku Tereveliana a hoike aku imua ona o keia lede opio oia no ke kaikamahine a Geofere Tereveliana?  A i ole, e kipaku aku ana anei oe iaia mailoko aku o keia hale?"

            "Aole pela, e Hasekina," wahi a Adelo i pane aku ai, "ua kuhihewa loa kou noonoo.  Aole loa au e hana i kekahi oia mau ano; aka, e mare ana au i keia kaikamahine."

            E mare ana oe iaia?  I nanau mai ai kahi kauwa me ka piha pahaohao.

 

(Picture of gunboat)

THE GUNBOAT HELENA.

                        The new gunboat, Helena, which is now receiving her battery at the Brookly navy yard, is one of serveral small cruisers designed fo ruse when shallow harbors must be entered orrivers ascended, says the New York Times.  She is 200 feet long and has a speed of 13.8 knots and carries 150 men.

 

 O ka mokuakaua.  Helena keia o Amerika.  He moku hou.  Aia oia ma ka pa kapili moku kahi i kali ai no kona mau pu.  He 200 kapuai kona loa.  He 15 mile a oi kona holo i ka hora.  He 150 ka nui o kona poe kanaka.

 

            "O ko'u manao maoli no ia, oiai, ke ike nei au me ka oiaio i na mea apau e pili ana i ka waiwai nui a'u e upu mau nei e loaa la'u.  Ke manao nei o Geofere, mamuli o kela lono oiaio ole i loaa mai ai ia kakou no kona make ana ma Berazila, eia au i ka poeleele i keia wa no ka mea e pili ana iaia.  Nolaila, eia oia ke kali nei a make ae ka Haku Tereveliana, oia kona wa e oili mai ai mailoko mai o kona wahi e pee nei a kaili aku oia i ka waiwai apau o ka ohana Tereveliana.  Ke ike mai la oe, o keia ka hoomaka ana o keia alahele o na hana pohihihi apau a kaua i hana ai, na hana hoi au ame a'u i ike ai, o kaua wale iho nei, aole hoi o kahi mea e ae kekahi.  Ua ike nohoi oe, e Hasekina, o ka loaa ana ia'u o keia waiwai oia wale no ka mea e hoopauia ai ko'u  mau pilikia, a lilo nohoi au i kanaka waiwai a kuonoono no Pelekane nei; a no ia mea, ua paa kuu manao e uhai-a-holo mahope o keia waiwai, me ko'u waele ana ae i na mea hoohihia apau o kela ame keia ano e alailai mai ana ia'u a hiki i ka wa e paa pono ai keia waiwai iloko o ko'u lima."

            "Aka, e kuu haku," wahi a kahi kauwa i pane mai ai, "ina ua loaa ia Geofere he kaikamahine, alaila, ua loaa nohoi iaia he poe keikikane?"

            "He elua ana mau keikikane i keia wa?"

            "Alaila, heaha ka mea e loaa mai ana ia oe, e kuu haku, mamuli o keia mare ana ou me ke kaikuahine o kela mau keiki?"

            "A e hoolohe mai oe i ka'u mea e hoike aku ana ia oe, oiai o oe ka mea i komohia pu me a'u ma keia hana.  Ke ike nei au i ka nui hewahewa o na waiwai o ka ohana alii Tereveliana e waiho nei i keia wa. o ka loaa o keia mau waiwai apau ia'u oia wale no ka iini nui o ko'u manao.  Aka, i keia wa ke ike nei au aia mawaena o'u ame ua waiwai ia he ekolu mau mea e hookaulua mai ana ia'u mai ka loaa koke ana aku o keia waiwai ia'u, oia o Geofere ame kana mau keikikane elua.  Nolaila, i mea e hoea koke aku ai au i kahi o ka waiwai e hoao no au ma na ano pau e hana ina hana e hooneeia aku ai keia poe ekoulu a kaawale mai a kihi eha aku o Enelani nei.  Ke ike mai la anei oe i ke ano o ka'u mau olelo?"

            Me ka leo hawanawana, pane mai la kahi kauwa me ka helehelena hu'hu'lu'pii a kunahihi:

            "Ae; e kuu haku."

            "Ea;" wahi a Adelo i pane aku ai. "ano e maoli hoi kou helehelena e nana mai nei ia'u; ua hele oe a okala kunahihi, me ka piha maka'u a hophopo o kou nanaina.  Auhea oe, aole paha i hoomaopopo keia mau keiki i ko laua mau kulana maoli i keia wa.  Aole paha laua i moeuhane iki, o laua na hooilina kokoke loa o ka ohana Tereveliana.  Aole anei ou manao he hana hiki wale no ka hooili ana i keia mau wahi keiki maluna o kekahi moku e holo ana i kekahi aina mamao loa mai Enelani aku nei, a mailaila laua e kiola ia aku ai.  A no ko laua makuakane hoi oia o Geofere, aole anei he hana maalahi wale no na kaua e hana ai i mea nona e lohe houk ole ia aku ai ma keia hope aku.  Nolaila, ke holopono keia mau mea apau, aole auanei e nele ka maalahi o na hana e ae mahope aku oia wa no ka mea e pili ana i ka waiwai a'u e kau nui loa nei.

            I keia wa i mohala hou ae ai he hiohiona hauoli ma na helehelena o kahi kauwa, a ia wa oia i pane mai ai:

            "He hoolala maikai loa ana keia au, e kuu haku.  E komo pu ana au me oe, e kuu haku, ma na hana apau e ko ai kou makemake, ke ole nae he hana kekahi e komohia aku ai au iloko o ka lilo ana he puuwai eleele maoli."

            Aka, o na huaolelo hope a ua wahi kauwa la i pane mai ai imua o Adelo, ua lilo ia mau mea nana e akaaka malu ai iloko iho ona, oiai ua ike no ia ina oia e hoikeike aku ana i mau apana gula hulalilali imua o ua wahi kauwa nei ana, aole e nele kona hana aku i na hana apau e kauohaia aku ana iaia, ina paha he keokeo a he eleele paha ia hana; a oiai hoi-he lehulehu wale no na hana eleele i komo pu ai laua a kuilima pu.

            I kela wa pane aku la ua Adelo nei:

            "Alaila, ua holo ka'kaua aelike, e kokua mai ana oe ia'u ma na hana apau e pulumiia aku ai na mea alalai ma ke alahele e loaa aku ai ia'u ka waiwai?  No ia mea, ke ike oe ua lilo au i haku alii no keia wahi, e hai mai oe ia'u i ka nui o ka uku a'u e haawi aku ai ia oe no kou kokua ana ia'u, a na'u no e haawi aku ia oe me ka hakalia ole."

            Ua lilo keia mau olelo a Adelo i mea no ua wahi kauwa la e hauoli loa ai, a haawi mai la oia i kana mau hooia ana no knoa haawi ana iaia iho, kona kino ame kona uhane a lilo malalo o na hoounauna ana a Adelo.

            Ikeaia kuu mea huna--halawai o Adelo me Alamira--ke kupaa me ka naueue ole.  I keia pule ae.

                                                                                                (Aole i pau.)

 

(Mai ka aoao i mai)

Mamuli o ko Kuhina Kupa hoole palua ana i ke koi i Iapana, ua lilo i mea nui na ka poai o na luna Aupuni Kuwaho ame ke Keena Kuhina Nui nohoi e hookaukolo aku i ka lakou mau hakilo ana no ke keehina hana e hanaia mai ana.  Ua manao laulaha loa ia maanei i keia wa e waihoia aku ana imua o ke Keena Kuhina Nui keia kumuhana, a e koi ikaika ia aku ana hoi e ae keia Aupuni i na koi a Iapana.  Ua manao loa ia nae mawaena o na hoa o ka Aha Kuhina, he mea pono i keia Aupuni ke hooponopono mua me Iapana no ka ninau e pili ana i ka hoopae limahana mawaena o Hawaii ame Iapana, ina paha e apono a apono ole paha ke Senate i ke kuikahi iloko o keia kau Ahaolelo e hele nei.

AMERIKA AME IAPANA.

            Wasinetona, Iulai 10.--Ma ka auina la o nei la iho la i hoouna aku ai o Mr. Hoshi, ke Kuhina Iapana, i kana pane ia Kuhina Nui Sherman no ka palapala a ua Kuhina la i kakau ai, ma ke ano he pane no ka palapala kue a Iapana no ke kuikahi hoohui Aupuni o Hawaii.

            Ua pane nee papa ia e ke Kuhina Iapana na kumu kue apau a ke Kuhina Nui, a ma kekahi mau wahi o ua pane la ua hoaoia na hoopilipili kumu ana ae no ke kakoo ana i ke kulana o Iapana i kue ai i ke kuikahi.  ua hoouna ia aku keia palapala mahope iaho o ka loaa ana i ke Kuhian na kukai olelo ana me ke Aupuni makua.  He mea kanalua ole, e hoounaia aku ana keia palapala imua o ke Komite o ko na Aina E me na palapala e ae.  I keia wa ke paa nei ke Keena Kuhina Nui i keia palapala ma ke ano he waiwai malu ia no ia keena.  Eia nae, ua loaa mai ka lono lauahea, aole keia he palapala i miloia me na manao oluolu elike ia hoi me ka mea i manao wale ia.

            O keia pane a ke Aupuni o Iapana ame na na nee ana a na aumokukaua o Iapana, ua lilo i mau mea e hoohuoi nui loa ia ai, a ua koho maoli ia ka manao o nei mau hana a Iapana e poipo ana oia ia Honolulu.  Ua hoomaopopoia i keia wa, ma keia pane mai nei, ke hoopaakiki nei na Iapana ua like no ko lakou mau pono ame na kuleana ma Hawaii me ko Amerika Huiia, a o ka hoao ana o Amerika Huiia e hoohui aku ia Hawaii me ke kuku mua  ole me Iapana, he wawahi wale ana ia i ka manao maikai mawaena o na Aupuni elua.

            Hookahi mea maopopo loa, me ka nana ole ia o kahi e oili aku ai o keia mau kukakuka ana mawaena o na Aupuni elua, oia hoi, aole loa ka Aha Kuhina e hoopilikia ia ana ke lele kimopo ia mai e ke Aupuni o Iapana, mamuli o ka noho nanea pu wale ana.  Ina e hoike ae ana o Iapana i kona ikaika mokukaua ma Honolulu, a i ole ia, me ka hoike mua ole ana'ku hoi o Iapana i kona makemake e koi maoli i ke Aupuni Hawaii e uku aku i kana koi poho elike me ia i waihoia aku ai i ke Aupuni i kahi wa i hala ae nei, e hana aku ana no keia Aupuni ia hana hookahi.  Aohe mea e lele ai ka oili in e ikeia ana na aumokukaua o Amerika ame Iapana e hoomakuekue ana ko lakou mau lae hao i kahi ame kahi ma ke awa o Honolulu iloko o keia mau pule aku elua.  Aole loa i upu iki kekahi hoa o ka Aha Kuhina Amerika i kamaaina pono i keia mau mea maopopo nae o ka houluuluia ana o na aumokukaua ma Honolulu, ua lawa ia no ke kahoahoa ana mai i ke kupilikii o ke kulana.  I keia wa e hele nei, aole i kana mai ka piha inaina o na alii o na mokukaua Iapana ia Amerika Huiia, a o ka lakou hana pupuahulu auanei he mea ia e onou poo ia aku ai na Aupuni elua a komo poo iloko o kekahi pilikia nui.

 

Alu ka uwea i ka hoihoi Aupuni Moi.

 

Hoolaha Kumau.

Ka Ayer Laau

Hoomaemae Koko.     (SARSAPARILLA.)

 

            E hoomaemae oe ikou koko me ka Ayer Laau Hoomaemae Koko (Sarsaparilla), o keia ka laau pahu'a ole o kona ikaika hooia.  Kupono maoli keia laau no ka ma'i Alaala. ma'i Hehe, Puha, ma'i Aai, ma'i Kuapuhi, ma'i Puupuu oolohu, ma'i Kane pohaka, ame na ma'i no apau e ulu mai ana mailoko mai o ke koko ino.  He kupono loa nohoi keia LAAU HOOMAEMAE KOKO A AYER no ka ma'i nalulu (catar@h), runatika ame ka rumatika pehu.

            Ma ke ano he laau hooikaika kinoia, aohe ona lua.  E kokua ana ia i na mea paahana o ka opu ma ka hoowali ana i ka ai, hooikaika i ka hana ana a ke ake-paa nawaliwali, hooikaika hoi i na aa-lolo a hooikaika pu hoi i ke kino i hele a nawaliwali mamuli  o ka luhi ame ka hoomailo ana a ka ma'i  Ua ike na kauka lapaau ma na wahi apau, he Laau maikai loa keia Laau Hoomaemae Koko a Ayer.  He laau keia i loaa no loko mai o ka pa'ipa'i ame ke kawili a hoohuihui naauao ia ana o na laau hoomaemae koko a hooikaika kino ikaika loa.  Aohe laau hoomaemae koko elike me keia, a i makemake nui ia nohio elike me keia.

Ka Ayer Sarsaparilla

Hoomakukauia e DR. J. C. AYER & CO.,

Lowell, Mass. U.S.A.

Ola ka Ma'i Awa- awahia o ka Opu ia @a                 Huaale a Ayer

 

No Keaha                    I HOOKAWELEWELE LOA AKU AI OE I KELA

 

ANU, KUNU AME PUU EHA?

 

            Ua kaulana loa ka LAAU KUNU A AYER (Ayer's Cherry Pectoral) iloko o na makahiki he aneane 60, ma ka hoola ana i na Ma'i o ka Puu ame ke Akemama, ke Anu, ke Kunu, ka Ma'i La Grippe, ame ka Ma'i Mala o ka pale Akemama.  He ono keia laau ma ka inu ana, a he oiaio ke ola.

 

AYER'S CHERRY PECTORAL

Me Medala Gula mai na Holikeike Nui o ke Ao

Mai lawe i na Laau Emi i Hoohalikeia me keia

Hollister Drug Co. Lt.

Na Agena ma ka Paeaina Hawaii.

 

KAKELA

ME

KUKE

Ka Halekuai Nui

O NA

WAIWAI LIKE OLE

NA MEA

HANA KAMANA APUA

 

Na lako pili hao kukulu hale,

Na kepa,

Na lei ilio,

Na kaulahao ilio.

Na Pahi,

Na upa,

Na kope hulu,

Na Pulupulu.

PALAU LIO

Na mea mahiai,

Na au h@

Na au koi@

Na kua bipi,

Na uwea pa,

Na kaa palala,

Na mea pin@a,

Na ipuhao.

 

Makau me Aho Lawaia

 

Na iliwai

Na kaula,

Na hulu pena,

Na pulumi,

Na pena, me ka sila.

Na kopa,

Na aila mahu

Na pakeke

 

Na pakeke hao,

Na kapa hao,

Na pauda,

Na kukaepele,

Na uwiki, a me

Naipukuka@.

 

Mikini Humuhumu aulana

 

Wilcox, & Gibbs Hoo@i lop@

ka Remington, Elua Lopi.

A me na ukana he nei loa o keia ano a me keia ano.

 

Kakela me Kuke