Ka Nupepa Kuokoa, Volume XXXVI, Number 33, 13 August 1897 — Page 1
| This text was transcribed by: | Lianne Hee |
| This work is dedicated to: | Maxine Leinaala Porter Hee |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXXVI HELU 33 HONOLULU POALIMA,AUGATE 13,1897 NA HELUAPAU 2663
HOOLAHA LOIO
W. R. KAKELA
Loio a he Kokua ma ke Kanawai
HE LUNA HOOIAIO PALAPALA
2370
LYLE A. DICKEY.
Loio a he Kokua ma ke Kanawai.
Alanui Kaahumanu, Helu 14. Tel.682.
Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.
E hookoia na hana pili kanawai apau mai na Mokupuni mai.
O.A.F. Tavares, Kakauolelo a Maheleolelo. 1yr.
HOOLAHA KUMAU
PAPA! PAPA
AIA MA KAHI O
Lewers & Cooke
(LUI MA)
Ma ke kahua hema o Alanui Papu me Moi.
E LOAANO NA
PAPA NOUAIKI
O kela a me keia ano.
Na Pani Puka, na Puka Aniani,
na Olepelepe, na Pou, na O’a
na Papa Hele, na Papu Ku,
me na Papa Moe he nui loa
NV PILI HALE O NA ANO A PAU
A me na
WAI HOOHINUHINU NANI
O na ano a pau loa.
Na Balaki o na Ano he Nui Wai.
Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau ili ana ma ka laua oihana no ka
Uku Haahaa Loa,
E like me ka mea e holo ana mawaena o Laua a me ka Mea Kuai.
Hele Mai e Wae no Oukou iho
2396-q
Make ke Komisina Pelekane.
Na Hoohiwahiwa Pili Aupuni.
Ke Kaoo Manewanewa Hihimanu.
Mai ka ia mua mai o ka pae ame ka heni ana mai o kona mau kupuai ia Hawaii nei a hoea wale i ka wa ana i hookuu mai ia i kela oia ana ua ikeia oia he kanaka i piha a i laupai me na haawina maoheohe o ka oluolu ame ka lokomaikai. Ma kani ana i hookuene pono loa ai iaia iho, oia hoi o “Muolaulani Home,” ma Kapalama ae nei, e hoohamama mau ia na na ipuka oia hale no na poe apau e kipa aku ana ilaila, kanaka maoli a kanaka paha o ko na aina e. Aole ana mea hookae. Ma ka la hoomanao Iubile Daimana o kona Moiwahine, a o ka Moiwahine hoi o na kanaka Pelekane apau, ua hoike maoli ae oia i kona puuwai hamama a akea hoi. Ua apoia mai e ia ke kanaka ko’iko’i ame ka haahaa. Ua lilo oia he kanaka i alohaia e na kanaka Hawaii i ike a i launa pu me ia.
Ma kona kulana luna Aupuni, ua ku mau oia, ma ka aoao e kakoo ana i ke ku mau ana aku o ka nohona maluhia maluna o na hana a ke Aupuni Repubalika, aole loa oia i hoao iki e kiola i kekahi mau pohaku hoohihia ma ke alahele o na hana a ke Aupuni ona i hoonohoia mai ai i Komisina. A no ia kumu, ua haawi na luna Aupuni Hawaii i ka lakou mau hilinai ana ame ko lakou mau manao mahalo kiekie maluna ona.
No ka mea hoi e pili ana i kona ohana, aole no i maopopo loa. He kaikuahine kona, ua mareia, aia no i Enelani kahi e noho mai la, a he mau hoahanau “kaukini” nohoi kekahi ohana.
Ma ka malama o Dekemaba, 1859, ua komo oia iloko o ka Oihana Kaua Moana, haalele aku ia oihana ma Feberuari, 1869. Komo ma ka Oihana Koa o Iapana, ma Ianuari 1, 1871, a i Ianuari
31, 1884, a loaa iaia ke kea hanohano Papa Ekolu o “Ka La Hiki.” Ma Ianuari 16, 1885, hoo-kohuia oia i Kanikela Pelekane no na panalaau o na Moi ame na lii Aferika, ma na apana aina e pili kokoke ana i ka Loko Nyassa. Ua lawelawe i ka Oihana Komisina Kuikawa ma Zaziba mai Dekemaba 30, 1888 a hiki i ka la 15 o Iune, 1889, a lawelawe maoli i ka Oihana Kanikela malaila, mai Aperila 4 mai a ka la 29, 1889. Ma ka la 1 o Okatoba, 1889, kohoia oia i Kanikela no Tahiti. Ma ka malama hoi o Augate, 1894, hoea mai oia i Hawaii nei, no ke pani ana i ka hakahaka o Kuhina Wodehouse. Ua oleloia ua make oia i ke 54 o kona mau makahiki.
O ka manao hoi o kekahi poe aole i hoolalelale hikiwawe ia kona hoea ana aku i kona hopena ma keia ola ana, mamuli wale no kela mai “Kuapuhi” i loaa iaia, aka, mamuli o na palapu ame na niua oolea i loaa iaia, ma o kona mau hina pinapinai ana iluna o ka mokuahi Kinau ma kona wa e “rola ana,” mawaho ae o na kakai pali o Hilo.
I ka hoea ana mai o kona “kinowailua” i Honolulu nei, ua lilo ka lawelaweia ana o na hana no ka hoomakaukau ana i na mea e pono ai kona huakai no ka “home honua” ia E.A. Williams.
Ma ka Poalua nei ua malamala ke anaina haipule hope maluna o kona kino maloko o ka luakini Enelani. Ma ka hora 9 kakahiaka, ua hoea aku he 100 poe luina mailuna mai o ka mokukaua Penguina ma kahi i waiho ai ke “kinowailua.” A ma ka hora 9:30 minute, komo aku la na poe hapai pahu, oia hoi: Sir Robert Cotton, J.O. Carter, Clive Davies, George Harris, Dr. George Herbert, W.H. Baird ame T. May. A na lakou i aualo mai i ke kino a kau iluna o ke kaa. Mai laila mai, moe kaoo no ka luakini o Sana Anaru i hele a piha pono kona mau noho apau me kekahi anaina ku i ke anoano ilihia, oiai e haiamu ana me ka pili-kaumaha na hiohiona o ke kumakena ame ke kanikau maluna o lakou apau, nokamea, he kanaka oia i alohaia e na mea apau. Oiai ke kaoo e nee mai ana mai “Muolaulani Home”mai, ma ke Alanui Moi no ka luakini o Sana Anaru, aia na poe makaikai he nui e hoolehau ana ma na aoao o ke alahele, e ku ana me na helehelena i kiheaheaia e ke kaumaha ame ka minamina, me ko lakou haawi ana i na wehe papale aloha ana no ka mea i hala aku ma keia aoao o keia ola ana.
He aneane he hapaha hora mamua ae o ka hora 10, ua kani mai la ka bele hoolewa o Sana Anaru, a e ke ana ia i kela ame keia 20 sekona a hoea wale i ka hora 10. Hoea ke kino noloko o ka “heiau laahia” o Sana Anaru, ua hele nohoi a ha-ale na kanaka ma na paia o ka luakini. Malaila ae ka Peresidena o ke Aupuni ame kona mau ukali, na Kuhina, na Lunakanawai, na Komisina o na Aupuni e, na Kanikela, na lii koa kiekie o na mokukaua Beritania, Amerika ame Iapana ame na maka hanohano e ae he nui.
Mahope iho o ka pau ana o na hana haipule i lawelaweia me ke anoanoa ilihia e Rev. Vice Dean Usborne ame Rev. Alex Mackintosh, oiai hoi na waimaka o na mea apau e hiolo ana, ua “aualo” hou ia ke kino noluna o ke kaa, no ke kaualupe ana aku iaia no kona home hope loa.
He nui na makana pua i haawiia no ka hoolumahiehie ana i na manao manewanewa aloha no ka mea i hala aku.
Na Mr. me Mrs. W.M. Giffard, he hinai pua Poni Moi; na Mr. ame Mrs. T. May, Mrs. Campbell, Mr. me Mrs. Baird, he mau papahi lei; na Mr. me Mrs. Holmes, he papahi pua ke’a;
na Mr. Gay, he Pua Poni Moi; na Miss Gay, he Poni Moi Keokeo; na Adimarala me Mrs. Beardslee, he bo-ke Pua Poni Moi: na Mrs. John McGrew, he huihui pua “Stephanotis” (i oleloia e keahi poe he ihu oolea): na na keiki a ka Lunakanawai Kiekie, he pua Melekula: na Carl Widemann, he pua veleveta pihi (panies): na Mrs. S.F. Bishop, he uluna pua Melekule; na Mrs. John Walker, he lei “Stephanotis:” mokukaua Iapana, he heleuma pua Poni Moi; Hui Hana Hao o Honolulu, he papahi pua o ke poo o ka hae Pelekane; Olive Davies, he huila pua Poni Moi; na Mr. me Mrs. W.F. Allen, Mr. J.B. Spencer, Mr. W. Haywood, Miss Ladd, Mrs. Neumann, he mau papahi lei; na Mr. L.B. Kerr, he ke’a o na pua “Koniaka” (aster) na Mr. ame Mrs. S.M. Damon, he papahi lei Poni Moi: na Mrs. W.L. Wilcox, ka hua palapala “H” i hanaia noloko mai o na pua nani; na Mr. ame Mrs. F. Waterhouse, he hinai pua veleveta pihi (pansies) ame pala-palai: na Mr. ame Mrs. Lillie, he puolo pua “gadinia:” na ka poe kiai puka ame na luna o ka ekalesia he kea o na lei ilima; Mrs. Mist, he uluna pua “mariguerites;” pela nohoi ka Mrs. P. Jones; he rose me ka “marquerites” ka Mrs. J.B. Atherton; he lei ka Mr. me Mrs. W. O. Kamika; he lei pua ulaula ka Miss Parker; he lei lilia ka Mrs. Samuel Parker; he lei pua pepa (ever-
lastings) ka Miss Eva Parker; he pua Poni Moi Keokeo ka Mrs. K. Vida; he hinai pua Poni Moi Keokeo, ka Mr. ame Miss Cornwell; he kalaunu pua Poni Moi ka ke “Alii” Kapiolani; he lei pua kulina ka Mr. ame Mrs. J.O. Carter; he hinai pua koniaka (aster) keokeo ka Mrs. J.B. Atherton; he kea o ka “verbenas” ulaula ka Mr. ame Mrs. J.M. Dowsett; he heleuma o ka “verbenas” keokeo ka Mrs. J.M. Monsarrat; he dalia ko ke Keena o ko na Aina E; he pua laniuma (geran- iums) keokeo ka Kuhina Kupa; he papahi pua kia hoomanao ka na Keiki o Sana Geoki; he heleuma ka Kapena Field i hanaia mailoko mai o na pua laniuma (geraniums) keokeo ame ka iwaiwa.
Hora 11, ua kai ka huakai hoolewa no uka o ka Pa Ilina o Nuuanu, a malaila i malamaia ai ke anaina haipule hope a “hoi aku la ka lepo i ka lepo.”
KA PAPA HOONOHONOHO HOOLEWA
Poe Makai Kau Lio.
Bana Puhi Ohe Hawaii.
Bataliona mua o na Koa Kumau.
Na Poe Ki-pu he 60 o ka Penguin.
Kahunapule.
Na hapai pahu. Kaa kupapau. Na hapai pahu.
@Ver.me jfl,o: 99599N. ke g. Le II-I Ewalu poe luina Pelekane hapai pahu. Kapena Field o ke Aumokukaua Rofala, me ke Kanikela Pelekane T. R. Walker.
Komisina Farani Voisson.
Kuhina Iapana Shimamura ame Kakauolelo
Kuhina Amerika Sewall ame Kakauolelo
Kuhina o ko na Aina E. Kupa ame Kakauolelo
Bana Puhi Ohe Piledelepia.
Elua Haneri me Kanalima poe “Manua” aohe pu o Juna o Naniwa me Hiyei.
Elua Haneri ame Kanalima poe “Manua,” aole pu o luna o ka Piledelepia me Mariona.
Na ‘Liikoa o ka Penguin
Na ‘Liikoa Puali Kiai o Hawaii.
Na ‘Liikoa o ka Naniwa me Hiyei.
Na ‘Liikoa o ka Piledelepia me Marion.
Adimarala Beardslee me Ukali.
Na Kanikela.
Lunakanawai Kiekie ame na Lunakanawai o ka Aha Kiekie.
Na Kuhina o ke Aupuni-Kalaiaina, Waiwai me Loio Kuhina.
Peresidena Dole me na Ukali. Na Keiki Puhi Ohe Bana Lahui.
Hui Aloha Aina. Na Keiki o Sana Keoki.
Na Makai Kau Lio.
PUHILI NA KAUA LAPAAU.
Ka pilikia o Prof. Bowman o ke Kulanui o Hartsville.
Olelo hoike i hoohikiia no kona hoolaia ana e na Huaale Ulaula a Dr. Williams mahope o ka pahu’a ana o ka ike o na Kauka.
He kanaka o Prof. R.S. Bowman, i ike nui la, ma ke ano he kumuao makaukau ma ka akea-
kamai o na mea i ikeia ma ke kulanui kaulana o Hatsville. (Ind.) a he loea nohoi ia ma ka oihana a’o, a ua ikeia nohoi oia ma ke ano he kahunapule no ka Euanelio. I kahi wa i hala ae nei, ua loohia iho la ia i kekahi ma’i ikaika loa, a i hoolaia hoi me ke kamahao loa. I ka lohe ana o kekahi mea kakau nupepa i keia mea, ua hele aku la oia e halawai me ia, a e ninaninau iaia i kana
mea i ike ai no ka mea e pili ana i ka laau. Ma ka wa i hoea aku ai ka kakau nupepa, e lilo nui ana ia i ka hana, aka, ua ae mai no nae ia me ka hauoli e kamailio pu me ia.
“He makahiki i hala ae nei,” wahi a ka Professor i pane mai ai, “ua loohia iho la au me ka nawaliwali nui o na aalolo, a hiki ole ia’u ke hana aku i ka’u mau hana me ka pono. Ua hoao au i na kauka he nui, aohe nae loaa o ka oluolu, a pela nohoi me na laau lapaau he nui, aole no he ola, oiai nae he kanalima dala ko’u lilo no keia mau laau lapaau. Ua hele na puu paa (kidneys) o’u a maikai ole na paahana ana, a nawaliwali hoi ko’u opu hoowaii ai. He kupilikii maoli ko’u.
“Na kekahi kahunapule ma kekahi halawai ekalesia i ike i ko’u ano, i hahai mai ia’u e hoao au i na Huale Ulaula a Dr. Williams. Ua kuai au he ekolu mau poho huaale, a ai iho la au ia mau huale elike me na kuhikuhi. Ma ka wa nohoi i aneane ai e pau ke poho hope loa, ua aneane au e oluolu loa, a ua loaa nae ia’u ke ola kino oi aku o ka maikai i ko kekahi mau makahiki i hala ae mamua. Ua hoomau aku ia nohoi au i ka ai ana i na huale no kekahi wa, a ua ola loa au. Me ka hauoli au e haawi aku nei i ka’u mau hooia ana no na Huale Ulaula a Dr. Williams:
O keia ka Prof. Bowman moolelo, a ua hooiaia hoi e keia afidevita.
Hartsville, Ind. Maraki 16 1897.
Ke hooia nei au ua kulike loa na mea i hoikeia ae la me na mea i pili i ko’u pilikia (ma’i).
R.S. Bowman
Kakauinoaia a hoohikiia imua o’o i keia la 16 o Maraki 1897.
LYMAN J. SCUDDER
Notere no ka Lehulehu
Aia maloko o na Huale Ulaula a Dr. Williams na huna laau waiwai nui e loaa ai ona ola hou a loaa pu ke koko maikai, a hooikaika hou ia na aa lolo. E kuaiia ana e na poe kuai laau lapeau apau, a e ka Hui Kuai Laau o Hollister me ka Hui Kuai Laau o Hobron; o laua na Agena ma ke kuai nui no ko Hawaii Pae Aina.
KA MEA HUNA POHIHIHI
Unuhiia e Hooulumahiehie no “Ke Kilohana Pookela o ka Lahui Hawaii”
MOKUNA XXVI
“E kuu kupunakane i aloha nui ai ka Haku Tereveliana-Aloha, aloha oe me kuu waimaka e hanini nei ma kuu mau papalina.
“Ia oe e heluhelu iho ai i keia palapala, e hoomaopopo iho ana oe, aia au ma kahi mamao loa mai ia oe mai. Ae, ua haalele au ia oe, e kuu kupunakane i alohaia, mamuli o kekahi mau kumu i hoea mai me ka maopopo mua ole ia’u, a mamuli hoi o ka ulia wale. No keia mea, aole hiki ia’u ke hu’ipu me oe, a haawi aku hoi ia oe i kuu aloha hope, a i ole ia, hoakaka aku paha imua ou i na mea apau e pili ana no’u nei. E hoomanao oe, e kuu kupunakane, o kuu aloha nou, aole ia e pau; aia no ia mea ma ka papa hoomanao o ko’u puuwai. Ke haawi aku nei au ia oe i ka’u mau hoomaikai ana maluna ou no kau mau hana aloha a pau i hana mai ai maluna o’u; a no ka mea hoi e pili ana i keia palapala hooilina au i hana ai no’u, ke nonoi aku nei au ia oe, e haehae oe ia mea, a e hoopau loa hoi. A ke nonoi aku nei nohoi au ia oe me ka haahaa, ke lohe oe ia na mea he nui e olelo ia aku ana imua ou no’u nei ma keia hope aku, e ke kanaka i lilo i enemi nou ame a’u nei, aole oe e hoolohe ia mau mea. Aka, e hai aku au ia oe, mamua o ko’u haalele ana aku i ko’u home a hele malu mai la au a hoea i Tereveliana Pa nei, aole loa au i ike a i hoomaopopo, he koko pili loa au ia oe, aole nohoi au i hiki mai ia nei no ka manao ana e waele au i ke alahele e loaa mai ai ia’u ke alohaia e oe, a loaa hoi ia’u mai ia oe mai he haawina waiwai-aole, aole. Ano, i kuu hooki ana i keia wahi palapala pokole ia oe, e kuu kupunakane ma ka iwi a ma ke koko, a ma ke aloha nohoi, ke haawi nei au ia oe i kuu aloha oiaio, a o kuu mau waimaka i hoopuluia ma keia kanana na hoike oiaio o kuu aloha nou. Ke haalele nei au ia oe me ka ehaeha launa ole o kuu puuwai, a ke hoomanao ae au, e auamo hou aku ana oe i na kaumaha ame na ehaeha o na la i hala mua aku. E hoomanao o ka Haku Adelo, ka enemi hookahi nana i hoopoino i kou mau la o ke ola ana. Ke kali nei oia o kou haule aku iloko o ka luakupapau koou a puanuanu o kona wa ia e hauoli ai me ka haaheo no kona manao ana e lilo ana oia i haku a i alii no na waiwai apau o ka ohana alii Tereveliana; aka, aia no he Akua oiaio a hoopono ma ka lani, a Nana no auanei e hoihoi aku i keia waiwai apau i ko lakou hooilina oiaio: a na ia mana hookahi nohoi e hoohauoli mai i ke koena aku o kou mau la. Ano-Good-bye, my dear uncle-ae-ke kahea nei au ia oe ma ia inoa. O! Dear uncle-aloha! E ka home o kuu makuakane! Ke hele nei au, haalele ia oe! Ae-ke haalele nei au ia oe me kuu uhane i kakikepaia e ke kaumaha ame ka ehaeha. Again-my dear uncle-Good-bye!
“Me kuu waimaka walohia,
“ALAMIRA AREVALO
I ka pau ana o kana kakau ana i keia palapala; ka mea hoi ana i kakau iho ai me ka lima haalulu a i hookikokohuia me na kulu waimaka, ua opiopi ae la ia a hookomo iho la iloko o kekahi wa-hi leta, sila iho la a paa, me ke kakau ana iho i ka inoa o ka Haku Tereveliana mawaho, a waiho iho la maluna o ka pahu palapala.
Ua ikaika loa mai la ka halii ana mai o na eheu o ka pouli. Ia wa i pii mai ai kahi kaikamahine lawelawe me na ihoiho kukui noloko o ko ia nei rumi, a mahope iho o kona hooponopono ana ae i ke ahi o ke kapuahi, ame ka hoomaholahola pono ana ae i ka paku o ka moe, ua huli hoi aku la oia no lalo, me ka haalele ana iho ia Alamira e noho hookahi.
A hala he hapalua hora mahope iho o ka hoi ana aku o kahi kauwa wahine, oia ka wa i ku ae ai o Alamira a hoomakaukau pono hou iho la iaia. Aahu ae la ia i kona koloka, papale ae la nohoi i kona papale, me ka hoopaa ana ae i kona mau maka me ka uhi maka, a o kona kihei huluhulu poi-ee ae la ia ma kona paiki ili. Alaila, huli aku la ia a nana aku la i kona moe, a hiolo hou iho la kona mau waimaka, no ka hoomanao ana ae, aole ia e moe hou ana maluna ona, a o na haawina oluolu a maikai i loaa iaia iloko o na wa apau ana i haawi iho ai i na hooluolu ana a kona kino maluna ona, aole ia e ike hou ana ia mau mea. Alaila, huli ae la ia a hele aku ia a ma kahi e kau ana ke kii o kona luaui makuakane, ku hou iho la ia me ka uwe walohia ana, me he mea la e ike hou aku ana no oia i kona papa aloha.
“E ke kinowailua o kuu papa,” wahi ana i puana ae ai, “eia au ke huli hoi aku nei ma ke alahele a’u i haalele aku ai i kou kino maoli ma keia ola ana: aka, e hui hou ana anei kaua, e kuu papa aloha, he maka no a he maka, he alo nohoi a he alo? E Papa! E Papa! Aole paha oe i moeuhane mua eia au ke hoi aku nei i ou la i keia po?”
Ia wa i huli ae ai ia a hele aku la me ka malie loa, a iho aku la ma ke alapii, a hoea ilalo; mai laila aku hele aku la ia a puka aku la ma ka aoao o ka hale e pili ana me ke kihapai pua.
He malie kalae maikai ua po la; a mamuli hoi o ke kalae a waiho wale o ka ponaha lani i ka polulu oluna, ua mohala maikai mai la na omaka hoku kinikini e hoonenehiwa olinolino aiai ana i ka polulu o ka lani.
Hele aku la o Alamira a hoea ma ke alo ponoi o ka hale, a malalo o kekahi opu “honey suckle” (ala-aumoe) ku iho la ia a nana mai la i ka rumi hookipa.
Ike mai la ia i ka a-a aku a na ihoiho kukui, a e noho ana ka Haku Adelo maluna o kekahi noho paipai, me kekahi buke ma kona lima, a he hiohiona hoomakakiu nae ke pahola ana ma kona mau maka. Aia hoi ka Haku Tereveliana e noho ana ma ke alo mai o ke kapuahi hoepume-hana, me na helehelena kaumaha a maikai ole.
Nana aku la o Alamira iaia me ka walohia ehaeha o kona puuwai, a uumi iho la oia i ka uwe ana. A o ka wa ia i ala mai ai na halialia manao aloha iloko ona no ua kupunakane nei ona, me he mea la e aua maoli mai ana no iaia e noho, aka, pane ae la nae ia, me ka leo mama:
“Aole-aole-aole au e noho. He kuewa au i hele mai ai a hoea i ou nei, e kuu Haku, a ma ia ano no au e haalele iho ai ia oe: E hui hou ana no kaua, e kuu uncle aloha, iloko o ke aloha ame ka hauoli. Good-bye!”
Alaila, huli ae la ia a hele aku la, me ka piha kaumaha launa ole mai o kona noonoo, oiai aole i hookoia ka hopena o ka hana nui ana i makemake ai e noho ma Tereveliana Pa, oiai hoi, ka imi
ana i ka hoolauleaia ana o kona luaui makuakane ame kona kupunakane. He mea oiaio, o kona uhane ana e hele ana ia wa, e haawe ana la i ka naauaua ame ka manaolana poho.
He oiaio, ke haalele nei oia i ka home oiwi o kona makuakane. Aole hiki iaia ke hoi hou mai ilaila, oiai a ola ana ka Haku Terevelian. Ike iho la ia, aole loa e loaa hou ana he manawa maikai e hiki ai iaia ke hookuikahi hou ma ka nohona hoolaulea i na uhane elua i hoomaka-e ia i kahi ame kahi-oia hoi, ka Haku Tereveliana ame Geofere Tereveliana. Hookahi ana mea i ake loa ai e hooko la e ia iho, oia kona huli hoi ana aku i ka home a hoike aku i kona luaui makuakane no ka poino e kau mai ana maluna o lakou apau.
Aia oia ke hele la me na kapuai awiwi launa ole, aole i emo ua hala hope loa ae la o Tereveliana Hale, aole nohoi i liuliu iho hoea aku la ia i ka puka nui o ka pa e hoopuni ana i ka Paka o Tereveliana Hale. Maanei ku hou iho la ia, a huli ae la i hope, a nana aku la ia Tereveliana Hale no ka wa hope loa, alaila, huli ae la ia a hele aku la ma ke alanui e hoea aku ai i kahi kauhale o Tereveliana.
Aia ke ano mehameha o ka po ke halii la ma o a maanei ona-aia na welau aheahe a ke kiu ke koaniani palanehe la i kona mau papalina-a iwaena o keia polikua hoanoano apau e poipu ana iaia, aia no ia ke kuoe hookahi la me ka noonoo ole ae nona iho, aka, hookahi mea nui a kona noonoo e hana ana me ka ikaika iloko iho ona, oia kona mauna ana i kona wahi kino ma ke alahele e hoea aku ai imua o kona mau makua ame kona mau pokii kaikunane, a hoike aku ia lakou i ka popilikia e hoea mai ana maluna o lakou apau, mai ka puuwai eleele aku o ka Haku Adelo.
Iaia e hele ana, aole oia i halawai me kekahi kino kanaka. Kamailio hou ae la oia iaia iho:
“Ua maopopo la’u aole ka Haku Tereveliana e manao ana i keia po, ua haalele aku au iaia, a mamua auanei o ka o ana mai o na kukuna olinolino o ka malamalama o ka la apopo, e hoea aku no au i kuu home aloha, a ike au i na maka o kuu mau makua aloha, a pela hoi me o’u pokii; ke hoea aku au i kahi hoolulu kaa, e kuai no au i tikiki no’u, i kau koke ai au ma ke kaa a holo aku no Evergreen Home.”
Hale ae la ekolu mile okoa i ka hele ia e la, ia wa i ike iho ai ola i kona maluhiluhi, nolaila, haule iho la ia ilalo a noho iho la maluna o kekahi pohaku ma kapa alanui, a hoomaha iho la. A hala he mau minute o kona noho ana, ike iho la ia i kona ano maha a oluolu, a manao iho la ia e ku ae a e hoomau aku ma kana huakai hele; eia nae, me ka hikilele nui, lohe ae la ia i ka halulu ana mai o kekahi kaa mahope mai o ke alahele ana i hele mai ai.
Ia wa ku ae la ia a nee aku la hoi a komo pono loa aku la hoi malalo o ka malu o kekahi opu laau, me ke kali pihoihoi ana no ka maalo ae o ke kaa e holo mai ana.
(Aole i pau.)