Ka Nupepa Kuokoa, Volume XXXVI, Number 37, 10 September 1897 — Page 3
| This text was transcribed by: | Erica Deguzman |
| This work is dedicated to: | Na Lei Hulu I Ka Wekiu |
Ka Nupepa Kuokoa
KE KILOHANA POOKELA NO KA LAHUI HAWAII.
KA HUI ALAHAO ME AINA O OAHU
MANAWA HOLO.
Mai a Mahope aku o lulai 5, 1895
Wili o Ewa, kaa ukanoa, na la apau, koe ko Sabati
Haalele lai Manana 7:40 A.M.
Haalele Wili o Ewa 8:10 A.M.
Hiki Waianae -
Hiki @ waianae, na la apau.
Haalele lai Manana 9:58 A.M.
Haalele Wili o Ewa 10:19 A.M.
Hiki Waianae 10:54 A.M.
Hiki Wili o Ewa, no la apau.
Haalele lai Manana 2:25 P.M.
Haalele Wili o Ewa 2:29 P.M.
Hiki Waianae -
Hiki Waianae, Ponono me Sabati wale no.
Haalele lai Manana 2:28 P.M.
Haalele Wili o Ewa 2:49 P.M.
Hiki Waianae 3:24 P.M.
Hiki i Waianae, na la apau.
Haalele lai Manana 5:53 P.M.
Haalele Wili o Ewa 6:14 P.M.
Hiki Waianae 6:49 P.M.
Walanae na la a pau.
Haalele ia Waianae 6:14 A.M.
Haalele Wili o Ewa 7:19 A.M.
Haalele ia Manana 7:50 A.M.
Hiki I Honolulu 8:23 A.M.
Wili o Ewa Kaa Ukana Na la a pau Koo Sabati.
Haalele ia Waianae -
Haalele Wili o Ewa 9:10 A.M.
Haalele ia Manana 9:48 A.M.
Hiki I Honolulu10:30 A.M.
Waianae na la a pau.
Haalele ia Waianae 1:32 P.M.
Haalele Wili o Ewa 2:07 P.M.
Haalele ia Manana 2:38 P.M.
Hiki I Honolulu 3:11 P.M.
Wili o Ewa na la a pau.
Haalele ia Waianae -
Haalele Wili o Ewa 3:51 P.M.
Haalele ia Manana 4:22 P.M.
Hiki I Honolulu 4:55 P.M.
Iki i walanao na Ponono me Sabati.
Haalele ia Waianae 4:16 P.M.
Haalele Wili o Ewa 4:51 P.M.
Haalele ia Manana 5:22 P.M.
Hiki I Honolulu 5:55 P.M.
E lawe ana na kaa ahi hali ukana i na kaa ohua o ka papa ekahi. G.P. DENISON, Luna. F.C. SMITH, Luna Kuai Palapala Holo
NU HOU HAWAII
--------
HOOHOLO LOA IA KE KUIKAHI.
---------
UA APONOIA KE KUIKAHI HOOHUI AUPUNI E KA AHA SENATE MA KA POAHA, SEPT, 9.
---------
Aloha "Naniwa" - ua hiki mai, Aloha "Naniwa" - ua hoi aku.
--------
He ia nui ulumahiehie no ke awa ae nei o Kou ka la 15 ae nei, Poakolu. He ia hi'u wai ia no na keiki heihei waapa.
--------
Ma ka hora 12 awakea o ka Poakolu nei i weheia ai ka Ahaolelo Senate Kuikawa o ke Aupuni Kumukanawai o Hawaii.
-------
He heihei waapa hookuku "moho lanakila," ke malamaia ana ma ka la apopo, Poaono, ma ke Awa o Puuloa, mawaena o na hui heihei waapa kaeaea o kakou nei.
-------
Ua hoopuka mai nei o Lunakanawai Perry i ka olelo hooholo a ka Aha Kaapuni e ae ana e loaa ka hae Hawaii i ka mokuahi "Kina" elike me ka hoopii a Mr. Makapolena.
-------
Ua kapii papa hou ia iho nei o luna ae o ko makou keena hoonoho hua i kela mau la, a ua pau ke olehaleha ana o na maka o na hua kepau uwila a kela mau ia.
-------
E liu liu! E makaukau! A e makaala mai e na Repubalika Hawaii no ka oukou wa e kaheaia aku ai no kekahi halawai makaainana nui e kaheaia aku ana ma keia mua koke iho.
------
Ua lohe mahui mai makou e kahea hou ana na Roialiti he Halawai Makaainana ma ke ahiahi (?) Poaono, la 18 o keia mahina, a he mau ili-keokeo koikoi na mae na laua e kahea ana i keia halawai.
-------
Ma ka mokuahi "Mauna Loa" o ka Poalua nei i holo aku ai no na Kona, i kau aku ai o Mr. W. C. Achi, kana wahine ame kona ohana no "Kona kai opua i ka lai, Opua hinano ua malie."
-------
Ua loheia mai ua hanau mai la na ka wahine a Mr. Charles Kahai, kekahi makai o Kohala Akau, Hawaii, he mau keiki "pu-kolu," oia hoi, he ekolu kaikamahine i hanau mai i ke kauna hanau hookahi ana.
------
Ua manaoia e make ana ka nupepa "Ka Ahailono" i keia pule iho la; aka mamuli o ke ahonui o kakahi Hawaii, oia o Mr. D. Kalauokalani, Peresidena o ka Hui Kalaiaina, ua hoomauia no kona ola ana.
------
Ma ka Poakahi iho nei, Sept. 6, i hamama hou ae ai na "helau hoonaauao" o loko nei o ke Aupuni, a ua nui maoli na keiki hele kula i ikeia aku e naholo ae ana me na helehelena hoihoi no ko lakou mau halekula like ole.
-------
Ua huli hoi aku o Kauka Kobiasi, kekahi o na kauka Iapana akamai loa i noho ma Hawaii nei, no Iapana, ma ka mokuahi Coptic o ka Poaha nei. Ua ioheia mai, e holo ai i ka oihana iapaau ma ke oki ana.
--------
Ma ka oluolu o Mr. C. G. Ballentyne, Luna Nui o ko makou Halepa'i nei, ua haawi makana mai la ia i ka Lunahooponopono o keia pepa i kekahi kope o ka buke helu 10 o na Olelo Hooholo Aha Kiekie ma ka Olelo Beritania. Mahalo nui.
-------
Ma ka huli hoi ana aku a ka mokukaua Naniwa no Iapana ma ka Poalua nei, us hoi aku kekahi mau keonimana kakau nupepa Iapana maluna ona, oia o Mr. Suzuki o ka nupepa Yorodzu Choho; Mr. Saki o ka nupepa Moi Nichi Shinbum, ame Mr. Nishi o ka nupepa Jugi Shimpo.
--------
He eluna no mau moho Lunamakaainana i maopopo loa no ka mokupuni o Kauai, oia o Paul Isenberg Opio ame S. K. Kaeo: a o ke kolu o lakou i manaoia, oia o Robert Waialeale, us haule hope loa kana noi o ka hoea ana ae i ke Keena Kalaiaina, a ua hool@ia e ke Kuhina Kaaliaina.
-------
Ma ka hora 6 o ke kakahiaka Poalua nei. Sept. 7, i haalele mai ai ka mokukaua "Naniwa" ia Honolulu nei a huli hoi aku la no Iapana. Aka, iaia nae i hoopuka kau ai ma ka nuku aku o ke awa, aole ke Pailata Aupuni maluna ona, ua hookui hele ae ia la ma kala ame keia kualo o ke awa ae nei, a mahope iho o ka hala ana ke mau minute loihi oia hapapa hele ana ua puka aku la ia iwaho, a pakele mai kau iluna o ka papa akoakoa. Aloha Naniwa.
Ma ka Poaono o kela puie aku nei i kii aku ai o Mr. Enoka Johnson, hoa o ka Papa Loio Hawaii a Kakauolelo o ka Hui "Aloha Aina." i laikini mai ka Loio Kuhina mai, e aeia lakou e halawai, me na lako kaua ole, ma ke Kuea Halealii, ma ke ahiahi Poakahi iho nei. Ua loaa mai, a ua honaia.
-------
E noho ana ka Ahahui Ekalesia o ka Mokupuni o Kauai ma ka luakini o Anahola ke hiki aku i ka Poakolu elua o Okatoba, A.D. 1897, hora 10 a.m, Nolaila, e makaala ae e na lala o ka Ana no ka manawa i hoikeia ae la, a e makaukau pu oukou me ka oukou haawina heluhelu imua o ka Aha. G. L. KOPA, Kakauolelo.
--------
Ua hoea mai ka "Makualii" (Patriarch) J. Kanui ma ke kakahiaka Poakolu nei, ma ko makou nei keena lunahooponopono nupepa, a olelo mai ana, " mai hauaia ka na hokua o ka Peresidena o ka Hui Kalaiaina, no ko laua lomaloma loa ana i ke kahea i ka halawai makaainana kue kuikahi hoohui aina, a kau ka puaa i ka nuku."
-------
Ua hoi mai ka'u kaiki mai ke kula mai i kekahi la me kona lima i hele a mokumoku inoino a e kahe ana ke koko, me ka uwe ana hoi i ka eha," wahi a Mr. E. J. Schall, e noho nei me Mayer Bros. Drug Co., St. Louis, Mo. "Ua hoomaemae iho la au i na palapu, a hamo aku la hoi i ka Laau Ola a Kamalena. Ua pau ae la ka eha. A iloko o ka wa pokole loa ua ola ae la me ka linalina ole. No na eha palapu, na ma-ui, pahu ame ka rumatika, aole au i ike i kekahi laau elike me keia. Manao au he laau kupono loa keia no ka home. E kuaiia ana e na poe kuai laau apau. O Benson, Smith & Co., na Agena no ko Hawaii pae Aina.
-------
HE LEO ALAHA I NA KONA, KOHALA A ME KAU.
-------
I o'u Hoa Makaainana,
Aloha Oukou: -
E like me ka'u i ae ai e lilo i Moho Lunamakaainana no oukou, ua ae aku au aole ma ke ano kamalii wale, aka, me ke kuio o ke kanaka makua; a oiai au ma ia alahele, ka aa nei au e ku a paio aku, aole no ka pono o ke kanaka hookahi o na mea a pau. E hoao ana no hoi au e nana i na lawelawe hana ana o na Luna o ke Aupuni ma na oihana a pau, a e kokua ana ia lakou ma na mae i lawelaeia e lakou i ku i ke kanawai; aka hoi, e kue ana au me ka ikaika a pau ma na mea i ikaia aohe i ku ka lakou mau hana ana e like me na kakawai o ka aina, a malaila e hoomaopopo ai oukou o kuu kahua he kulana Kuokoa Oiaio, Aloha Lahui a Aloha Aina Oiaio. I ka hoomaopopo ana i ke kulana o ke Aupuni e ku nei i keia wa, he hiki no ke hoomaopopo aku, aole loa e paa a ku mau aku keia noho hooponopono aupuni ana ma Hawaii nei no ka manawa loihi, oiai, o ke Kumukanawai e ku nei, aole ia i ohohiaia e ka lehulehu, a ua ike ia ma na aina naauao a pau o ke ao nei, i ka wa i kue ai na manao o ka lehulehu i ke ano o ko lakou hoomalu ia ana; he wa no a hiki mai e lilo ana ia kulana hooponopono aupuni i mea ole. A ua ike ia no hoi, i ka wa i uluku mai ai ka noho ana iloko o kekahi ua lilo ia i mea hookuemi hope i na hana holomua o ka aina; nolaila, ke manao nei au, o ke Kau Ahaolelo o ka M. H. 1898, he wa maikai loa ia e hanaia ai kekahi mau hoololi o ke Kumukanawai i meaa e iliwai like ai na manao o ka lehulehu. Aoiai eia kakou iloko o na hoopaapaa pili aupuni ikaika me lapana, nolaila, he wa pono loa keia na oukou e koho ai i mau wahaolelo makaukau a loea e nana i ko oukou mau pono. E hoao ana no hoi au e kauia i mau kanawai kupono e hiki ai e hooholomua ia na hana mikiala iloko o ka ain, e iaa ka mahi ko a me na mea kanu e ae, ke hoao nui ia nei e hoohuihui na kope o Kona me na kope o na wahi e ae, malalo o ka inoa :Kope o Kona," nolaila, he mea pono no e hanaia i kanawai e makepono ai na kope o keia a me kaia apana, a ma ia ano, ho mea ia i emi ole ai ke kumukuai o na :kope hoohia-a maka o Kona," ke ike nai kakou ke hookomoia mai nei no ka waina mai na aina e mai, a ke hoolilo aku nei hoi kakou i mau puu dala mahuahua i na aina e no ka uku ana aku no ua waina la; oiai nae o na lepo o Kona a me kekahi mau wahi e ae iloko nei o ka aina, ua lawa loa ia no ka hooulu ana i ka waina e hiki ai ke hoolawa i na poe a pau iloko o ko Hawaii Pae Aina, aka, o ka pilikia i keia wa, aole i oluolu maikai na kanawai e pili ana i ke kanu ana i ka wainaa. E hooikaika ana no hoi au e loaa i na apana o Kohala, na Kona o me Kau i ekolu Lunamakaainana malalo o kekahi hoololi Kumukanawai. E hooikaika ana no hoi au e hoomahuahua ia na haawina o na makai a puni ka Pae Aina, a e hoemi ia ka haawina o na koa. E kokua nui ana no hoi au ma na ano a pau, e haawiia na hana o ke Aupuni, mai na kumukula a pii aku, i na kamaaina mamua o ka nana ana aku i na malihini mai na aina e mai.E kokua nui ana no hoi au ma na ano a pau e loaa ai i na poe Home ole a wahi mahi ole paha i mau Home a wahi mahi no lakou; a ina ua nele ke Aupuni i na aina kupono ma kekahi mau wahi e like me Kona a me na e ae, alaila, he mea pono no e kuai ke Aupuni i na aina nui e like ma Kahaluu a me Keauhou ma Kona Akau, Honaunau a me Keei ma Kona Hema, a me kekahi mau wahi e ae, a mahelehele aku ma na apana liilii i oi ole aku mamua o elima eka, i mea e lawa pono ai na poe nele a pau; a ua ike no au me ka maopopo, ina e hanaia ma ia ano, aneane hiki i na Kona elua ke hoolawa i na poe Home ole a pau o Hawaii nei iwaena o na Hawaii Ponoi, imau Home no lakou; e kuai ia aku hoi keia mau apana ma ke ano emi loa, ina no paha i elima Dala no ka eka a emi mai ua hiki no, no ka mea e loaa ana no i ke Aupuni ka pomaikai malalo o na auhau, a ma ko'u ano maa loa i ke kuai mai a kuai aku i na aina, ua ike no au aole no e poho ana ke Aupuni ma ia hana ana. E kokua nui ana no hoi au ma ke ano i loaa i na apana o Kohala an Kona a me Kau i mau puu dala kupono no ka malama maikai ana i na alanui, a mau alanui oki hou mai na awa aku o Kona a i ke alanui mauka a i mau hale waiho ukana hoi ma na uwapo. E kokua ana no hoi au ma ke ano i kokua no ka hoomoe ana i ka uwea telapone mai Kona, kohala ame Kau. Auhea oukou e na kupa o ua mau aina ia. E hai aku au, o Kohala kuu aina hanau, Kona mau puu haelelua o Pili a me Kalahikiola, ua lehia ia'u; o kona mau ululaau, na kahawai, na kualono, na kamaaina au ia lakou, a o kona mau lae kahakai a me na kuahiwi malaila au i holoholoai i kuu mau la opio: o kuu mau kupuna a me kuu mama aloha aia ke waiho la na iwi malalo o na lepo ou e Kohala. "Kuu Aina hanau e- Nou au e noi nei.' Eia au he kama ponoi nau e Kohaia, e nana maka naei oe i kau mamo? E aia e Kohala nui e Kohala iki, e Kohala makani Apaapaa, e Kohala Ua Leikokoula, e Kohala loko, eia au kau hilalo, e Kohala waho, e Pili me Kalahikiola, na puu Haelelua e, mawaena o olua au i ike mua ai i ke ao nei, e ku mai a hele imua. Pehea oe e ka ua Kipuupuu, i ou la au i kekahi mau makahiki o kuu mau la kamalii, eia iho no o Mr. Mahuka ia kumu aloha a'u o ia mau la, e ku e ku ae a alakai iaia a me na kini e ae i ka pahu balota. Pehea hoi oe e ke kai hawanawana, owai kua e koho ai? E ala e Kilohi a me Kamai kuu mau hoa inea o Kauakanilehua, i loaa ona mau wahi balota no ko olua hoa inea. E na Kona e, ka aina hanau o na kupuna o kuu mama aloha, ka aina hanau hoi o kuu iwi aoao, ka aina hoi e luakaha la kuu mau hoaloha lehulehu wale; pehea olua? Na olua au i kahea mai, e ku anei olua a nana maka mai? O ko olua mau lae kahakai, na puu, na oawa, na ululaau, na kualono uli, na awapae, na alanui, na kauhale, a me na wahi no a pau, ua lehia ia'u. Ua ai aina au iloko o olua, a e hooikaika no auanei au no ko olua pono ma na ano a pau. Pehea oe e "Kiekie Kau Hanohano i ka Makani! He ipukai Pohina ia na Keaeloa? Auhea na olohe o ka wai Nauke-poo? E ke kawa lele opu o Kaumaea, owai kau e koho ai? Aohe a'u olelo nui nou e Naalehu me Honuapo a Hiona-a, aia i o oukou la na "Ipukukui pio ole i ka makani Kauaula," nana e hoomalamalama mai i ko oukou alahele. Pehea oe e Punaluu a Pahala? E ala e Kumauna, ua ao. Auhea la o Ikaaka, ka apowai o Ko'akohala, ke waiho nei au ia oe pole nau no ia e oni na Hawaii na ka moku nui. Auhea la na manu hulu like o Kaukaweli, kela ulu kukui hoi a ke anoano i noho ai, ke kaukai aku pei kekahi pono ia oukou. Ina eia oukou ma na apana o Kohala, na Kona a me Kau, e lele like mai oulou me na balota ponoi e hookolo aku i ka nui manu, na ohana, na hoaloha a me na aikane pu hoi. Nolaila la, he kamaaina au ia oukou, ko oukou mau apana a me ko oukou mau hemahema a pau. E hele imua a lanakila. Owau no me ka haahaa, WILLIAM CHARLES ACHI, Mea Holo Balota. Honolulu, Sept. 6, 1897.
-------
He mea pono i kela ame keia ohana ke loaa ona laau lapaau mama no na ma'i apau o ka maikai elike me ka PERRY DAVIS LAAU PENIKILA (Pain Killer.). Ua lawelawaia keia laau no na aina apau o ka @onua nei. O ka Hui Kuai Laau Lapaau o Hollister, ka Agena.
-------
Hoolaha Mana Hooko
-------
I keia la i hookohuia aku ai o REV. SAMUEL KAPU i Komisina Ala Liilii ame Pono Wai no ka Apana o Wailuku, Mokupuni o Maui. J. A. KING Kuhina Kalaiaina. Keena Kalaiaina, Sept. 6, 1897. 2667-3t
-------
POAONO, SEPATEMABA 18, 1987, he la Kiulaia Aupuni ia, e paniia ana na Keena Aupuni apau o ka Repubalika o Hawaii ma ia la. J. A. KING, Kuhina Kalaiaina. Keena Kalaiaina, Augate 31, 1897. 266-2t
-------
I keia la i hookohuia aku ai o JOHN W. NEAL, ESQ., i Notere no ka Lehulehu no ka Mahele Kaapuni Elima o ko Hawaaii Pae Aina. J. A. KING, Kuhina Kalaiaina. Keena Kalaiaina, Augate 31, 1897. 266-3t
-------
I keia la i hookohuia aku ai o JOHN BUSH, ESQ., i Agena Hooiaio Aelike Paahana no ka Apana o Hanalei, Mokupuni o Kauai. J. A. KING, Kuhina Kalaiaina, Keena Kalaiaina, Aug. 23, 1897. 2665-3t
-------
I keia la i hookohuia aku ai o MR HENELI PEELUA I Agena Haawi Palapala Mare no ka Apana o Molokai, Mokupuni o Molokai. J. A. KING, Kuhina Kalaiaina. Keena Kalaiaina, Aug. 24, 1897. 2665-3t
KUAI O KA HOOLIMALIMA O KA
APANA AINA MA KE KIHI HIKINA
O NA ALANUI VINEYARD
AME EMMA. HONOLULU.
-------
Ma ka Poakolu, Sepatemaba 2. 1897, ma ke alo iho o ka hale Oihana Hooko ma ka hora 12 awakea, e kuai kudala ia aku ai ka Hoolimalima o ka Apana Aina e waiho la ma ke Kihi Hikina o na Alanui Vineyard ame Emma, Honolulu, Oahu, nona ka laula ma ke alo, ma ke Alanui Emma, he 16.9 kapuai, a ma ke Alanui Vineyard he 53.0 kapuai. Manawa: - 1 makahiki. Uku Hoolimalima oi aku - $60 no ka makahiki, e hookaa mau ia ana i kela ame kaia mahina. E aelikeia ana nae, e pau no ua hoolimalima la ma ka make ana i Keaweamahi, ka mea nona ke kuleana wa ola e hooliloia mai i ke Aupuni. J. A. KING, Kuhina Kalaiaina. Keena kalaiaina, Augate 21, 1897. 2665-3t
-------
HOOLAHA NO NA AINA AUPUNI.
--------
Ma ka Poakahi, Sepatemaba 20, 1897, ma ka hora 10 A.M., ma ke Keena o E. D. Baldwin, Hilo, Hawaii, e kuai kudala ia aku ai malalo i na aelike kuikawa (me ka hale noho ole) : Apana 1 - Kupahua, 102 eka. Kumukuai oi aku maluna o $153.00. Apana 2 - Kupahua, 117 eka. Kumukuai oi aku maluna o $175. No ke kii ame na olelo hoakaka aku i koe e ninau ia E. D. Baldwin, Hilo, Hawaii, a i ole, ma ke Keena Aina Aupuni, Honolulu. J. F. BROWN. Agena o na Aina Aupuni Hanaia Augate 31 1897. 2666 - 3t
--------
HOOLAHA NO NA AINA AUPUNI.
--------
Ma ka Poaha, Sepeteaba 23, 1897, ma ka hora 10 a.m., ma ke Keena o E. D. Baldwin, Hilo, Hawaii, e weheia ai no ke noiia ana mai malalo o na olelo o ke Kanawai Aina no ka Pono Kuai, Hoolimalima a Dala Kuike paha, a malalo phah o na kumu aelike kuikawa no ka mahi ana ame ka hoomaemae ana, me ke kukulu ole i hale noho. 14 Apana Aina ma Olaa, Puna, Hawaii, (Alanui Luaopele, mile 11 a i ka mile 13 e kokoke ana i kahi o Peter Lee). mai ka 10 a ke 60 eka ka nui o ka Apana hookahi, no ka waiwai io i kohia he $20 no ka eka. No ke kii ame olelo hoakaka hou aku i koe e ninau ia E. D. Baldwin, Hilo, Hawaii, a i ole ma ke Keena Aina Aupuni, Honolulu. J.F. BROWN, Agena no na Aina Aupuni. Hanaia Augate 31, 1897. 2666-3t
-------
KOHO I SILAIA.
-------
E laweiaa mai no ia ma ke Keena o ke Kuhina Kalaiaina a hoea i ka hora 12 awakea o ka hana ana i ke alanui o Waimea, Hawaii. Aia no na Kii ame na Hoakaka ma ke Keena o ka Luna Nui o na Hana Aupuni, ma ka Hale Leta o Kohala. Aole i hoopaa ke Kuhina iaia iho e lawe mai i ke koho haahaa loa, a o kahi koho e ae paha. J. A. KING, Kuhina Kalaiaina. Keena Kalaiaina, Aug. 25, 1897. 2665-3t
-------
I kulike ai me ke kuhikuhi o ka Mahele 4, o ka Pauku 103 o ke Kumukanawai: MA KEIA KE HOOLAHAIA aku nei o ka hoololi i manaoia malalo nei i hooholoia ai kona heluhelu ekolu ia ana e ka Hale o na Lunamakaainana i ka ia 12 o Mei, 1896, penei: HE HOOLOLI I MANAOIA I KA PAUKU 63 'O KA REPUBALIKA O HAWAII, E LIKE ME KA PAUKU 103 O IA KUMUKANAWAI. O ka Pauku 63 o ke Kumukanawai o ka Repubalika o Hawaii, ma keia ke hoololiia nei i heluheluia ai elike me keia mahope iho nei: PAUKU 63 - NA POO O NA KANAWAI. "I hookahi no manao ma keia ame keia Kanawai, a e hoakakaia ma kona poo." J. A. KING, Kuhina Kalaiaina. Keena Kalaiaina, Iulai 1, 1897. 2657-12t
-------
OLELO HOOLAHA AINA AUPUNI.
-------
HOOLIMALIMA AME KUAI I NA
AINA AUPUNI MA PUNA AME
KONA HEMA, HAWAII.
-------
Ma ka Poakahi, Sepatemaba, 20, 1897, ma ke alo iho o ka Hale Oihana Hookolokolo, hora 12 awakea, e kuai kudala ia aku ai Elua Apana Aina ma Kehena, Puna, maloko o laila he 64 3-10 Eka ame 6 9-10 Eka o kekahi ame kekahi. Kumukuai oi aku maluna o $ 192.90 ame $20.70. Na Dala Kuike maloko o ke Dala Gula o Amerika Hulia. A ma ia manawa a ma ia wahi e kuaila aku ai ka hoolimalima o ke Ahupuaa o Kaulanamauna. Kona Hema, maloko o iaila 3.400 eka, oi a emi mai paha. Manawa: - 21 makahiki. Uku hoolimalima oi aku: - Maluna o $50 no ka makahiki, hookaa mua ia ana i kela ame keia makahiki. E hookoeia ana no no ke Aupuni ke kuleana o ka lawe hou ana ae i kekahi mau wahi o keia aina no ka hooko ana i ke Kanawai Aina, me ka hoemi ole ia o ka uku hoolimalima. No na mea i koe, e ninau ma ke Keena Aina Aupuni, a i ole, ia E. D. Baldwin, Hilo. J. F. BROWN, Hanaia Augate 23, 1897. 2665-td.
-------
Ma ka Poaono, Sepatemabe 11, 1897, ma ka Hale Hookolokolo, Kohala Akau, e kuaiia aku ai malalo o na kumu aelike kuikawa no ka mahi ana ame ka hana hou ana, he umi mau apana aina ma Awini, Kohala Akau, mai ka iwakalua a kanaiwa eka ka nui o kela ame keia apana. A ma ia manawa a wahi hookahi no hoi i kuaiia aku ai no ke Dala Kuike ka Apana Helu 80, no Puukapu, Waimea. Kumukuai oi aku maluna o $20. No na mea i koe, e ninau ia Chas. Williams, Honokaa, Hamakua, a i ole, ma ke Keena o na Aina Aupuni, Honolulu. J. F. BROWN, Agena o na Aina Aupuni. Augate 9, 1897. 2665-td
-------
Hoolaha Mana Hooklokoolo.
-------
I KA AHA KAAPUNI, MAHELE KAAPUNI Ekolu, Repubalika o Hawaii. Ma ka Hooponopono Waiwai. Ma ka Hana o ke Noi a James Bright o Waimea, Kohala Hema, Hawaii, no ka hookohu ana i kahu no na keiki oo ole, Maukaa (w), Liwai (k) ame John (k), a i Palapala Ae no ke kuai i ka aina. Oiai ua waihoia mai ke noi e James Bright, e nonoi ana e hoonohoia oia e kahu no na keiki oo ole i hokeia ao la maluna, a e aeia oia e kuai aku i kekahi waieai paa o lakou. Nolaila, ke hoolahaia aku nei ma keia, o ka Poalima, la 8 o Okatoba , A. D. 1897, ma ka hora 10 A.M., ma ka Hale Hookolokolo, Kohala Akau, oia ka manawa ame kahi e hooloheia ai ua noi la, a ma ia ka poe apau i kuleana ma ia hana, a hoike mai i ke kumu, ina he kumu ka lakou, nokeaha la e ae ole iaai ke noi. Hilo, Sepatemaba 3, A. D. 1897. Na ka Aha: DANIEL PORTER, Kakauolelo. 2667-3t
-------
AHA KAAPUNI O KA MAHELE HOOKOLOKOLO Kaapuni III. o ko Hawaii Pai Aina. Ma ka Hooponopono Waiwai. Ma ka Hana o ka Waiwai o Edward Nahina o Napoopoo, Kona Hema, Hawaii, i make kauoha ole. Ma ka heluhelu ana ame ka waihoia ana mai o ke Noi a Kamai Nahina (w) ua make kauoha ole o Edward Nahina o Napoopoo, Kona Hema, ma Kona Hema, Hawaii, ma ka la 18 o Mei, A.D. 1897, a e nonoi ana e hoopukaia ka Palapala Luna Hooponopono Waiwai ia Kamai Nahina (w). Ua kauohaia o ka POAONO, la 9 o Okatoba, A. D. 1897, oia ka wa e hooloheia ai ia Noi imua o ka Lunakanawai Kaapuni, maloko o ke Keena Hookolokolo o keia Aha, ma Kona Akau, Hawii, ma ia manawa a ma ia wahi e hele mai ai na poe apau i kueana ma ia hana, a hoike mai i kumu, ina he kumu ka lakou, nokeaha ia e ae ole ia ai ia Noi. Hanaia Hilo, August 21, A. D. 1897. Na ka Aha: DANIEL PORTER, Kakauolelo. 2666-3t
-------
ILOKO O KA AHA KAAPUNI APANA Hookolokolo Ekahi o ko Hawaii Pae Aina. Ma ka hana o ka waiwai o Elia Helekunihi o Makawao, Maui, i make. No ka mea, ua waihoia mai he palapala hoopii e ka Lunahooponopono Waiwai, S. K. Kane, e nonoi ana e kuai kudala ia ka aina o ka mea i make e waiho la ma ka R. P. 1656 (grant) ia Maui, i mea e hookaa ai i ka aie o ka mea i make. Nolaila, ma keia ke haiia aku nei ka lono i na poe apau i kuleana, o ka POALIMA, la 1 o OKATOBA, 1897, ma ka hora 10 kakahiaka, ma Aliiolani Hale, Honolulu, Oahu, oia kahi ame ka manawa e hooloheia ai o ua palapala hoopii la, a e hoike mai lakou no ke aha la e ae ole ia ai ke noi a ka Lunahooponopono Waiwae. Honolulu, Sepatemaba 1, 1897. Na ka Aha: P. D. KELLETT, JR. Kakauolelo. 266-3t
-------
AHA KAAPUNI. MAHELE EKOLU O ko Hawaii Pae Aina. Ma ka hooponopono Waiwai. Ma ka Hana o ka Waiwai o Keanini (k), o Kau, Hawaii mamua, a i make. Oiai, ua waihoia mai ke Noi ame ka hoike Waiwai a ka Lunahooponopono Waiwai o ka Waiwai o ka mea i make i oleloia, maloko o laila i nonoi mai ai oia e nanaia kana koike waiwai a e aponoia a e hoopukaia hoi i kauoha hope loa na ka mahelehele ana i ka waiwai e waiho ana ma kona lima i ka poe e kuleana ia waiwai, a e hookuu ana iaia mai na ko'iko'i mai apauu oia noho lunahooponopono ana. Ua kauohaia o ka Poaono, ia 9 o Okatoba, A. D. 1897, ma ka hora 10 A. M. ma ka Hale Hookolokolo ma Kohala Akau, oia ka wa ame kahi no ka hoolohe ana e ua Noi la ame ka Hoike Helu, a o na poe apaau i kuleana ma ua waiwai ia e hele mai malaila, a ma ia wa e hoike mai i kumu, ina he kumu ka lakou, nokeaha ia e ae ole ia ai ke noi. Hilo, Hawaii, Augate 19, 1897. Na ka Aha: DANIEL PORTER. Kakauolelo. 2665-3t
-------
Hela ame Keia.
-------
OLELO HOOLAHA I NA POE AIE.
-------
Oiai, ua hookohu pono ia ka mea nona ka inoa malalo i ho nei i Lunahooko Kauoha o ka Palapala Kauoha a Hon. S. L. Austin o Hilo, Hawaii, ma keia ke hoolaha aku nei i na poe apau he mau koi ka lakou maluna o ka waiwai o ka mae i make, e waiho mai ia mau mea, me ka hooiaio pono ia, ma ke Keena o ka Luna Helu, ma Hilo, Hawaii, iloko o eono mahina mai keia la aku, a i ole, e hoole mau lao ia aku lakou, A o ka poe hoi apau he ale ko lakou. A o ka poe hoi apau he aie ko lakou i ua waiwai ia, ke kauohaia aku nei e hookaa koke ae ia
MRS. S. L. AUSTIN.
Lunahooko Kauoha o ka Palapala Kauoha a Hon. S. L. Austin, i make. Hanaia ma Hilo, Hawaii, August 25, A. D. 1897. 266-3t
--------
OLELO HOOLAHA I NA POE KOHO
BALOTA O KA APANA ELIMA,
MAHELE 9, O KA MOKUPUNI
O OAHU.
-------
Ke nonoiia aku nei me ka haahaa ka poe koho balota apau i loaa ka pono koho malalo o na kanawai koho balota e ku nei i keia wa, e noho ana maloko o ka Mahele 9, Apana Elima, o ka Mokupuni o Aahu nei, oia hoi, " kela hapa apau o Honolulu, a i ole ia o Kona, e moe ana mawaena o ka Mahele Ewalu ame Alanui Nuuanu, a mauka o ka laina e holo ana ma Alanui Kula, ke kahawai o Nuuana ame Alanui Beritania. Wahi Koho: Halekula o Kauluweia," e hele ae e hoopaa i ko lakou mau inoa maloko o ka buke hoopaa inoa o ka "Hui Amerika Uniona," ma ka lima o ka Komite malalo ihi nei. E hamama mau ana keia buke i na la apau, koe na la Sabati, ma ke Keena Oihana o Mr. Henry Waterhouse Jr. ma Alanui Moiwahine. Ma ke kauoha a
JOS. M. POEPOE, lunahoomalu;
W. W. HALL,
H. WATERHOUSE, JR.
Komite Kakauinoa. Honolulu, Sept. 2, 1897. 2666-3t
-------
OLELO HOOLAHA.
--------
Ke hoikeia aku nei ka lohe, o keia Palapala Hookohu Hope i hanaia e maua, e hoomana ana ia Mrs. Lulia Kalaukoa e hoolimalima aku i ko maua kuleana hapalua i mahele ole ia iloko o keia aina e waiho la ma Kohala Akau, Mokupuni o Hawaii, i ikeai ma ka inoa "Kaihooa," nona ka ili he 126 eka a oi aku a emi mai paha, i hoakakaia ma ka Palapala Sila Nui Helu - , ma keia ua hoopauia. Ke hoike pu ia aku nei ka lohe, ma keia ke hookohu aku nei maua ia Kalua Malo (k), e noho ana ma Kohala i oleloia, i Luna nana e malama i ua kuleana la i oleloia a me no holoholona o maua. Hanaia ma Honolulu, H. I., August 30, 1897. JULIA KALAKIELA, J. S. KALAKIELA. 2666-3t
-------
OLELO HOOLAHA WAI.
-------
Ua waihoia mai imua o'u he Noi kupono na Mary E. Foster, ma o E. H. Wodehouse, kona Hope, no ka hooponopono ana ame ka mahelehele ana i kona Pono Wai mamuli o ke Kanawai iloko o ka Auwai o Auwaiolimu, Honolulu, Oahu. Ke kauohaia aku nei ma keia, elike me no olelo o ka Mokuna 26 o na Kanawai o ka makahiki 1888, e hele mai na poe apau i kuleana i ka wai o ua Auwai la i oleloia, imua o'u ma Aliiolani Hale, ma Honolulu, Oahu, ma ka hora 10 A. M. o ka Poakahi, la 13 o Sepatemaba, A. D. 1897, no ke kue ana a ano e ae paha i ua Palapala Hoopii ia, a i ole ia e haawiia aku no he Olelo Hooholo ex parte (hookahi wale no aoao) no ko lakou hiki ole mai. (Sig.) EMMA M. NAKUINA. Komisina o na Ala Liiiii ame na Pono Wai o ka Apana o Honolulu, Mokupuni o Oahu. Honolulu, Aug. 23rd, 1897. 2665-3t
-------
OLELO HOOLAHA.
-------
E ike auanei na kanaka a pau ma keia, owau o J. W. Makanani, e noho ana ma Makaiawena, Apana o Kona Akau, Hawaii, aole loa au e hookaa i kekahi aie a mau aie paha i hoaieia ma ko'u inoa ke ole he hooia a mau hooia paha mai a'u aku.
Owau no me ka oiaio,
J. W. MAKANANI.
Makalawena, N. Kona, Hawaii, July 22d, 1897. 2661
-------
Vapo-Cresolene
He Laau Hoola Oiai no Oe e Hiamoe ana no k
Kunu Kalea, ka Hano, Kunu Ho, ka Nalulu Kau, ke Anu
ma ka wa e hoopunohuia ai ka @ wahi o ke CRESOLENE ma loko o ke keena o ka mea ma'i e ioaa koke no ka oluolu. He ka mahao kona ikaika hoola, a ma ia wa hookahi nohoi e kaohila aku no ka pahoia ana mai o na ma'i lele, ma o kona lilo ana he iaau ki@ai ma'i, a he laau pilikia ole nohoi no na keiki. Ekualia ana e na poe hana laau. E haawi wale ia no ka buke hoakaka. HOLLISTER DRUG CO., Honolulu, H. I. na Agena.