Ka Nupepa Kuokoa, Volume XXXVI, Number 43, 22 October 1897 — UA HALA. [ARTICLE]

UA HALA.

I ka Nupepa Kuokoa,— Aloha oe: E oluolu oe, ma kahi kaawale o kou mau kolamu, e hoolaha aku ma ke akea, oia hoi keia:

Ma ka hora 10 a. m. o ka la Sabati, Oct, 10, ua oluolu i ka Makua Lani ka lawe ana aku i ka hanu hope loa o kuu mama i aloha nui ia, Elizabeth Kaholo Kaelele, a ua haalele mai oia i kana kane, D, K. Kaelele, ia'u, kana kaikamahine hookahi, ka ohana ame na makamaka he nui e kanikau aku nona ma keia aoao. He ma'i kona ma ka puuwai, a ua hiki oie i ke akamai o na kanka ke hoopakele ae iaia mai ia ma'i mai, a na ia mai i hoomailo i kona kino no kekahi mau mahina loihi i hala ae nei a hiki wale i kona hala ana aku ma na aoao o ka honua. Ua hanauia oia ma Kohala i ka makahiki 1844, a ua hlki aku kona mau la ma keia ao mauleule i ke 53 makahiki. Ua haalele aku oia i ka aina hanau i kona mau la kamalii, a ua noho paa ma Honolulu i ka hapa nui o kona mau la, a ua kamaaina i ko Honolulu poe. He hoahanau oia no ka Ekalesia o Kaumakapili. He lala oia no ka "Ahahui Heluhelu Baibala a Kinai Hoomanamana" i kukuluia ai e Rev. J. Bikanele, a ma Kapuukolo ko lakou kahua hana. a mamuli oia Ahahui. ua lawelawe oia me kona mau hoa ma ka hana komo kauhale. launa pu me na me na makamaka a haipule pu me lakou. Mamuli o ka loaa ana iaia o keia ma'i, ame ka nele i ka manaolana mai na kauka mai no ka lanakila, ua hoi mai oia i Kona nei ma ka mahina o Maraki aku nei, a noho pu makou no ke kali ana i kona hora hope o keia ola ana. A iloko o kela mau mahina ehiku kona hoomailoia ana e ka ma'i me ka ehaeha ame ka hoomanawanui a hala wale aku I. Aloha no! Ua hala oia, ua pio kona leo,. ua nalo, ua pau ka hana, ua kuu ka luhi. a na ka hana ana i hana ai ma keia ao e hookipa iaia i kahi i hookaawaieia a i kupono nona. He lokomaikai oia, he heahea, he kokua i ka poe nawaliwali, a he aloha keiki; a na ke aloha keiki, e alo mau ana oia i ko kakou mau kai kaulana i na manawa apau ana e lohe aku ai no ko makou ma pilikia nawaliwali.

Ua hala oia me ke aloha nui, a e hoomaikaiia ka Makua Mana Loa. Nana no i haawi mai a Nana no i lawe aku. Owau iho no me ka haahaa, ELIZABETH K. AMALU.