Ka Nupepa Kuokoa, Volume XXXVI, Number 46, 12 November 1897 — Page 3

Page PDF (1.63 MB)

This text was transcribed by:  Uilani Paalua Campana
This work is dedicated to:  William H. and Ruth L. Paalua

Ka Nupepa Kuokoa

KE KILOHANA POOKELA NO KA LAHUI HAWAII.

 

KA HUI ALAHAO ME AINA O OAHU

MANAWA HOLO.

Mai a Mahope aku o Iulai 5, 1895

 

 

 

Wili o Ewa, kahuku ia, na la apau, kue ke Sabati.

Hiki i waianae, na la apau.

Hiki Wili o Ewa, na la apau.

Hiki Waianae, Ponono me Sabati wale no.

Hiki i Waianae, na la apau.

 

A.M.

A.M.

P.M.

P.M.

P.M.

Haalele ia Manana

7:40

9:59

2:23

2:28

5:53

Haalele i Wili o Ewa

8:10

10:19

2:19

2:49

6:14

Hiki i Waianae

 

10:54

 

3:24

6:49

 

 

 

 

Waianae na la a pau.  Wili o Ewa

Kaa Ukuna, Na la apau, Koo Sabati

Waianae na la a pau.

Wili o Ewa na la a pau.

Iki i Waianae na Pono.  no me Sabati

Haalele ia Waianae

6:14

 

1:32

 

4:16

Haalele Wili o Ewa

7:19

9:10

2:07

3:51

4:51

Haalele ia Manana

7:50

9:48

2:38

4:22

5:22

Hiki i Honolulu

8:23

10:30

3:11

4:55

5:55

 

E lawe ana na kaa ahi hali ukana i na kaa ohua o ka papa ekahi.  G. P. Denison, Luna.  F. C. Smith, Luna Kuai Palapala Holo

 

 

NU HOU HAWAII

A keia pule ae o Mea Huna Pohihi.

 

Mea ia mai ana, ma ka Poalua iho la i hala aku ai o Mr. R. W. Wilikoki no ka Mokupuni o Maui.

 

He nui ka ua o na Kona, a mamuli oia mau haule ku-a-ua, ua uliuli lipolipo maoli ka aina ke nana aku.

 

Ma ka mokuahi Kinau o ka Poalua nei i hoea mai ai o Mrs. J. Nawahi mai ka aina mai, nona ka ua kani i ka lehua.

 

Ua hala aku ka Maheleolelo John E. Bush ma ka Poalua nei, maluna aku o ka mokuahi “Malulani” no ke kau kiure o Kauai.

 

Ma ka mokuahi Australia o ka Poalua nei i huli hoi mai ai ka Mea Hanohano Wilimana, Mrs. Wilimana ame Miss Wilimaua, mai na aekai mai o Kaleponi.

 

Ma ka mokuahi “Malulani” o ka Poalua nei i kau aku ai ke Hope Loio Kuhina E. P. Dole ame na Loio S. M. Ballou ame A. Rosa no ka mokupuni o Kauai.

 

Ma ka hora 7 a oi iki o ke kakahiaka Poalua nei i ku mai ai ka mokuahi Australia mai Kapalakiko mai.  Ua lawe mai oia he 69 ohua “kabina,” me 49 ohua “oneki,” ame 30 eke leka.  Eono la, 16 hora me 30 minute.

 

Ma ka Poalua nei i hele aku ai he eonno poe Iapana e noi i ka Oihana Makai e lilo lakou i poe maka’i kau lio.  O keia poe Iapana he poe lakou no ka oihana kaua lio o Iapana.  Eu la! !

 

Ua loaa mai nei na Baibala nui a me na Baibala liilii ma ka olelo Hawaii, a pela nohoi me na Baibala ma ka olelo haole eia ma ke keena kuai buke o ka Papa Hawaii. ma ke kihi o Alanui Papu me Kalepa.

 

Ma ka Poaono nei i holo loa aku ai ka mokuahi Belgic no Kina, mahope iho o kona ka’ulua iki ana iho no onei mai Kapalakiko mai, a maluna aku ona he huina dala i hiki aku i 1.043,294.  He $951,549 ma ke dalaMekiko:  $90,000 ma ka “buliona;” a he $1,745 ma ke gula.

 

Ma ke ku ana mai o ka mokuahi Rio de Janeiro i Honolulu nei, mai Kina a mai Iapana mai, i hoea mai ai o Luna Senate Pettrigrew, ame Luna Senate (mua) B. F. Dubois, a ma ka Poakolu nei i lawe hoomakaikaiia aku ai laua e ka Loio Kuhina W. O. Kamika, ma na wahi ano nui o Honilulu nei.

 

Ua loaa mai he palapala hoopii mai kekahi poe mai o Molokai imua o ke Aupuni, e nonoi ana e hoemila iho ka hoopa’i o Noa, mai ka li ia ana ma ka amana a ka hoopaahao a pau ke ola.  Aohe kumu i hokakaia mai e ka poe noi. e hiki ai ke noonooia ke noi.  Ua lauaheala ae, aole i ae ka Peresidena ame kona mau hoa kuka i ke noi.

 

Mamuli o ka maau ana’ku o Mr. Jas. H. S. Kaleo no na Kona “kai opua i ka lai” ua loaa mai la la makou mai iaia mai. he mau wahi “opua hinalo” e hoikeana, ua hoea aku no ia mau kaiaulu ka Makai Nui, Mr. Andrews, no ka ninaninau hou ana i na olelo ike. no ka make ana o kekahi Iapana, ma Kona Hema.  Ua manaoia na kekahi mea i pepehi iaia a make.

 

Ma ke ku ana mai o ka mokuahi Rio de Janeiro no Honolulu nei, ma ka Poalua nei, mai Kina a mai Iapana mai i hoea mai ai kekahi puulu Iapana, me na medala hoohanohano e kau ana ma ko lakou mau umauma, a ua olelo mai lakou, he mau hoohiwahiwa ia i loaa ia lakou no ka lakou mau hana koa ma ke kaua mawaena o Kina ame Iapana iho nei.

 

Ma ka Poakahi ame ka Poalua nei i noho ai imua o ke “kiure” ka hoopii kipaku a Lonoaea Nakoa (k). o Wainiha. Halalei. Kauai. kue ia Neleolani (w) ame Loma. kana kane. no kekahi apana aina ma Kapalama-kai. Honolulu nei, ma ka inoa o Nakoa:  a o ka olelo hoololo. e hoihoi o Neleolani i ka aina i ka mea hoopii. O Mr. J. K. Kaulia ka loio o Neleolani.

 

Ke hoohanaia nei kekahi ohe hoonui ike i okoa loa kona ano mai ko ka ohe XRays mai. ma Honolulu nei i keia mau la, a ua hiki loa iaia ke ike aku i ka huina dala i loaa i keia wa i ka Hui Aloha Aina, no na lilo hoouna Komisina i Amerika Huiia. oia hoi he $800.  A i ke kukuluia ana o ua ohe ia ma ke kihi o na Alanui Kalepa me Kaahumanu, a hoohuliia i kai o ka uwapo ikeia aku la kahi mea ma ia aekai e “kokua,” a i ka huli ana ae o ka ohe i Waikiki, ua ikeia aku no ma ia huli he “kokua.”

 

E loohia mau ana kahi keiki ekolu makahiki a J. A. Johnson o Lynn Center, Ill., i ka ma’i kunu ho.  Ua olelo nae o Mr. Johnson, ua hauoli loa ia, mamuli o ka inu ana o ua keiki la, ma ka wa pono i ka LAAU KUNU A KAMALENA, oiai e kukonukonu ana ka umii ana o ka ma’i maluna ona, oia ke kumu o kona pakele ana.  Aia oia iloko o ka oihana kuai laau Iapaau, a he hoa oia no ka Hui o na Hoahanau Johnson ola wahi, a e lawelawe mau ana lakou i na laau lapaau i hana maoliia (patent) no na ma’i o ka puu ame ke akemama.  A mai waena mai o keia poe laau, i wae ai oia i kana laau i makemake ai, a he nui nohoi na kauka i makaukau mau e hooko aku i kana kauoha, eia nae ua wae ae la oia i keia laau no ka hanai ana mawaena o kona ohana ponoi iho, ma ka manawa i ku loa ai ke ola o kana keiki i ka pilikia, oia hoi ua like no ia, ua oi aku keia laau mamua o na laau e ae apau, a ua kaulana nohoi a puni ka aina no ke ola o ke kunu ho.  Ua olelo o Mr. Johnson o keia ka laau kunu holo loa a lakou ekuai ai, a ua hololea kana mau hoohana ana ma kela ame keia manawa.  E kuaiia ana e na poe kuai laau Lapaau apau.  Benson, Smith & Co., na Agena ma Ko Hawaii Pae Aina.

 

KA MOKUKAUA “BALTIMORE.”

Ma ka hora 10 o ke kakahiaka la Sabati aku nei i ku mai ai no Honolulu nei, ka mokukaua “Baltimore,” iloko o na la holo he 7 ame 22 hora mai Kapalakiko mai.  Aole paha i loaa iaia ka holo o ka mokukaua Piledelepia; aka, he oi aku nae keia o ka uahoa ma ke kulana o ke oolea ame ka ikaika.

 

Ua haalele aku keia moku ia Kapalakiko ma ka la 30 o Okatoba aku nei.  Ma ka la 21 aku i loaa ai kona komisina, a ma ka la 20, haalele oia ea Mea Ailana a holo ae no Kapalakiko.

 

MOKUKAUA BALTIMORE.

Ala maluna ona he 4 pu o 8 iniha ke anawaena o ka waha, a he 2 mikini hou e lawe ana 6 pu mitimetera (pu wili), e hiki ke luai aku he 600 poka iloko o ka minute hokoahi.  Aia nohoi maluna ona he 6 pu, o 6 iniha anawaena, a he lehulehu loa na pu kani pinai ame na pu wili.  Ua lako oia me na pu o ke ano hou loa.  He mau pu raifela oolea kekahi o ke ano hou loa.  O na eleu oia mau pu, ua like me na nahi puhaka.  Na ka ikaika uwila e lawelawe ka hapanui o na hana hapai i na mea paahana kaua.  He 361 ka nui o kona poe kanaka.

                               

KE ANO E OLA AI KE NAHU LENA.

He mau pule ko’u loohia ana i ke nahu ame ka eha ma kuu opu, mamuli o ka nui loa o ke au, a no ia mea ua inu laau mau au, a hiki wale i ko’u wa i inu ai i ka Laau Ola a Kamalena no ke Nahu, Kolera ame ka Hi, a o ko’u ola no ia.  Mai ia wa mai, ua koi aku au i kekahi poe e inu i ua laau nei.  Mrs. F. Butler, Fairhaven, Conn.  O ka poe i loohia i keia nahu lena. e loaa ana wa palekana ke inu i keia laau ma ka wa mua loa e ikeia ai ka hiohiona mua.  E kuaiia ana e na poe kuai laau lapaau apau.  O Benson, Smith & Co., na Agena ma Ko Hawaii Pae Aina.

 

HEAHA NA KUMU PILIKIA KE HUI HAWAII ME AMERIKA?

“He oiaio anei i na e hui ana o Hawaii nei me Amerika, e pilikia ana anei kakou?”

 

He nui na wa olelo ana iwaena o na Roialiti iloko o keia au e nee nei, mamuli o ke “Kumuhana Hoohui ia Hawaii nei me Amerika,” wahi a lakou, i na hui Hawaii nei me Amerika, pilikia, ilihune, nele, pololi, nui mai na powa, a kipaku ia hoi na kanaka ma na kuahiwi e noho ai, e like me ke kiapaku ia ana o na Ilikini o Amerika ma na kuahiwi. a nui wale aku ko lakou mau olelo ana, pela kou mea kakau i kukulu iho ai i keia ninau.  “He oiaio anei, ina e hui ana o Hawaii nei me Amerika, e pilikoa io ana anei kakou?”  Ke pane nei kou mea kakau, aole kakou e pilikia, ilihune, nele, poloi ana, ina hui Hawaii nei me Amerika, a aole nohoi kakou e kipaku ia ana ma na kuahiwi e like me na ilikini.  Aole loa. Pela io paha, he nui io na lono pilikia iwaena o ka hapanui o na kanaka e noho ana ma ka kapikala o Honolulu, a mamuli oia pilikia, nele, a pela aku ke pau nei kekahi poe i ka naholo ma na kuaaina, no ka manao ana. malaila e loaa ai kahi pono o ka noho ana a hala ae na la maka poniuniu a ka pololi.  Eia ka ninau,  “I pilikia, a pololi auanei oukou ia wai?”  Ia Amerika anei?  I ka Hoohui aina anei?  Aole, aole loa no, aka, ua pilikia no oukou ia oukou iho no. mamuli o ko oukou hoomamao ana mai ke ki’o wai aku, oiai ka wai e aleale ana, mai manao iho, o ka wai ke hele mai io oukou ‘la, aole loa pela, aole o ka wai ke hele ana i kahi o ka bipi, aka, o ka bipi ke hele i kahi o ka wai; pela no, o ke ki’o wai ame kona wai e aleale ana o ka hoohiki inoa i kukulu ia i ka A. D. 1893, e ke Aupuni Kuikawa, a i wehe hamama ia hoi ua ki’o wai la no oukou a no ko oukou hele aku aole no kona hele mai io oukou ‘oa, aka, mau no nae ko oukou hoomanao kuhiwea ana mai ua ko’o wai ‘la o ka hoohiki inoa.  A e like auanei me ko oukou hoomamao kuhihewa mau ana mai ua ki’o wai la mai, pela no auanei e mamao mau aku ai ua mau pono nui ‘la i loaa i ka poho o ko oukou mau lima i loko o na wa i hala aku, a hiki i ka hulihia ana o keia honua.  A o ka oukou e olelo nei no ko kakou pilikia ke hui Hawaii nei ma Amerika, ke hoole aku nei au ia oikou, aole.

 

Aole no kakou e kipaku ia ma na kuahiwi e like me na Ilikini ke hui Hawaii nei me Amerika, aole loa.  Mamuli o keia kumu, o ka lahui kanaka o Hawaii nei, aole loa ia i like aku me ke kulana ahiu o na Ilikini, oiai, ke nana aku i ka moolelo e pili ana no ia lahui kanaka, ua olelo ia, he lahui kanaka ia i piha me na ano ino apau, ahiu, hakaka, hookahe koko, a puni kaua nohoi, a mamuli no o ko lakou ake kaua, ua aa aku no lakou e kaua ia Amerika, a o ka hopena oia hana ana a lakou oia no ko lakou hoopuehu liilii ia ana, a naholo aku ma na kuahiwi no ka imi ana i wahi no lakou e pakele ai mai na maiuu ooi aku o ka Aeko, no’u iho, ke apono nei au i ko lakou hana ia ana pela, oiai, na lakou no ia hoala mua mai ia mau hana ino, A

I hewa no i ka lele mua,

I ka hooulu i ka la ino.

 

Pele anei ka lahui kanaka Hawaii?  He lahui kanaka ahiu anei kakou?  He lahui kanaka hakaka anei kakou?  He lahui kanaka hookahe koko anei kakou?  A he lahui kanaka puni kaua anei kakou e like me na Ilikini?  Aole, aole loa no, a ina aole i like ko kakou kulana me ko na Ilikini ahiu, oia iho la anei ko kakou mea e kipaku ia ai ma na kuahiwi e like me na wa olelo ana o keia au e nee nei?  Aole no.

 

Nolaila, o na wa olelo ana no ko kakou pilikia, a kipaku ia paha, ke hui Hawaii nei me Amerika. ke hoike aku nei au me ka oiaio.  Aole!  Aole!! Aole loa no!!!  Oiai, o ka manao nui wale no o ko Amerika lalau mai ia kakou lahui Hawaii e hoohui aku me lakou, oia no ka manao aloha oiaio no keia lahui, oiai na omalu a ka poino e aneane nei e poipu iho maluna o kakou, a mamua o ka hiki ana mai oia mau poino, oia ka Amerika e lalau e mai nei ia kakou a hoopakele a’e mamua o ka hiki io ana mai oia mau haawina popilikia, “e ike ia keia ma ka pane a Senatoa Mogana i ka palapala hamama a Kaulia”  I hoike ia ma ka Nupepa “Kuokoa” o ka la 22 o Oct., 1897. buke 36. helu 43. aoao1.

 

A ina oia iho la ke kumu o ko Amerika manao ana e hoohui aku ia kakou malalo o kona malu, alaila, he hana anei ia e hoopilikia mai ai ia kakou?  He hana hollihune anei ia ia kakou?  He hana hoopololi anei ia ia kakou?  A he hana anei ia e kipaku ana ia kakou mana kuahiwi?  O ka’u pane mua no, aole.  Eia kekahi kumu o ko kakou pilikia. o ka ai pakela me ka uhauha nui ana, oiai, ma ke kulanakauhale o Honolulu, a i waena nohoi o na Hawaii ponoi. ka oi loa aku o ka pakela ai, a pakela inu nohoi. o na dala i noho hana hoomanawanui ia ai no na la 6 i pono no ka noho ana o ka ohana. ka wahine me na keiki pu. e puehu ana ia me ka ike ole mai o kahi mama. a o ka mea loaa aku i ka mama. oia no ka uwe ana i ka pilikia a ka pololi, eia ka ninau. na Amerika anei ia pilikia o kakou?  O ka’u no, aole.  Aka, na kakou.  Pehea ananei o Amerika e hoopilikia wale mai ai la kakou. oiai. o Amerika i ka makuakane ame ka makuahine o keia lahui kanaka, nana i huki ae mailoko mai o ke konouli lipolipo o ka naaupo, a i ke ana iliwai like me na aupuni nui o ka honua nei, ma ka naauao.  Ina hui Hawaii nei me Amerika, pomaikai nui kakou, noho ka lahui kanaka me ka maluhia, a komo nui mai na hana hou iloko nei o ko kakou aina, a i ke komo nui ana mai o na hana hou e ola’i ka aina, a me ka lahui kanaka pu, a aia oukou no auanei ka hiki mua o ka hawahawa o na lima no ka ohi ana i na pomaikai mai laila mai.

 

Nolaila, e ka iwi, ka i’o, ke koko, ame ke ewe o kuu lahui Hawaii, ke nonoi nui aku nei au i ko oukou oluolu, e hoopau loa ia mau manao kuhihewa ana pela, a o ka’u e kono nui aku nei ia oukou i lokahi kakou apau malalo o ka malumalu o keia hooponopono aupuni hou o kakou, ke aupuni hoi i oleloia he aupuni makaainana, a nokamea, hoi me nui, a he lehulehu wale o na hana hooholomua o ka aina a keia aupuni hou o kakou e hana nei no ka pono o na makaainana, ka mea aole i hanaia mai mua mai, i ka wa o ke aupuni Moi o kakou  Nolaila. he pono nui keia o kakou, a e oi loa aku ana na pono e loaa mai ia kakou, i ka wa e hui’pono aku ai o Hawaii nei me Amerika.

Me ka mahalo,  G. W. S. Kona, Hawaii, Nov. 1, 1897.  (Ma ke noi a ka mea kakau, ua kapaeia ka inoa piha.  He mau manao waiwai nui keia.  Hoouna hou mai. L. H. )

 

KO KOHALA MAU HUNAHUNA.

E oluolu mai e Mr. Lunahooponopono, ina he wahi kaawale o kau elele iawe kauoha e hookomo iho inei mau wahi hunahuna mea hou, o “Ka Aina Haaheo.”  Hoku lele pahaohao – Ma ke ahiahi o ka Poakolu la 27 o Okatoba, o keia makahiki, ua ike aku la au i kekahi mea kupanaha loa a’i i ike ole ai, mei ko’u mau ia opio a hiki iho la i ua po kamahao la.  O ka mea elike me ka olapa ana a ka uwila, ke poha ana no kekahi mau sekona eha a elima paha, a hoomaka mai la,  elele, a ike aku la au he hoku ka.  E hoomaka ana mai kukulu komohana a i ka hikina.  Me he mea ala i ko’u homaopopo iho, maluna pono ae o Ihuanu.  Ke ano o ka lele, ua like na ia me ka hele ana o ka mahina ame ka la, ko’u ike maopopo aku no i ka wa e lele ai a komo iloko o ke ao, a iko ia aku ana no ka nee ae, a puka aku i kahi malaelae, a pela ekolu a’u ike maopopo ana, a nalo loa akula i ke kolu hoi iloko o na ao polohiwa me he mea ala iluna pono ae o Awini ma.  Na ulia mahope iho o keia mea pahaohao – Ma ke Sabati ua kii ia mai a lawe ia aku la e na lima menemene ole o ka make o Akiao Pake o Halawa, he mea i kamaaina i ke kalewa puaa.  Ua lawe ia oia i Honolulu i kekahi mau mahina i hala aku nei e kaha ia ka opu. a ua loaa mai kahi oluolu no kekahi mau malama a hiki iho ia i kona haalele ana mai la i kana wahine me na keiki o ka la 31 o Okatoba.

 

Ma ka Poakolu, Okatoba 27, ma keia haawina hookahi i nalohia aku ai kekahi kamaiki a ko makou makamaka C. K. Kunane. ka lua hoi keia o na mea i haule aku mailoko mai o kela hanau ana ai o na apo kukolu.  I hoolaha mua ia aku ai.  Poakahi, Nov. 1. ua kii hou ia mai la ke kolu o na kamaiki, a o ka pau loa ana keia o na hua hou o ko laua mau kihapai a ua nui ka minamina ia.  Aka, aole ia kakou ia, aia no i ka mea nana i hana.  Poalua, Nov. 2, ua loaa aku ia kekahi Paniolo ua kaawe iho, ma ke kahawai o Honomakau, iluna o ke kumu kukui, me ke kaula ilihau oia i hana ai i keia hana weliweli.  Ua ike ia mamuli o ka pili ana o kekeahi makamaka e huli lio.  A me ka nanea oia i piiai a hiki i kona ike ana, a elike me ka makani puahiohio o ke kuluaumoi. pela oia i hoi mai ai. ke ku o ka huelo pio mahope liolio nohoi i kahi kaula makinikela.  Me he mea, la ua loaa i ka mai wakaha ka hiki ole ke huli i hope.  Pupuu hoolei loa noho ana ka Hope Makai Nui C. H. Pulaa me na jiure koronero. a liu iki. puka ka huaolelo. ua make mamuli o kona kaawe ana iaia iho meke kaula ilihau.  Pau a ana koe, hoi i ka opu o ka honua.  O ke kumu na ulu mai ma ke poho ana iho nei o kana hana i hooulu ai me kekahi hoa-lahui. oiai. ua nui no ka lilo, he waapa lawaia, loaa i ka ino a kau i kula aia i kai o Pahipa Kamaaino o Pahoa. ua nahaha a pela wle i koho ia ai.  Ua haalele iho he wahine me ma keiki ame ka ohana. 

 

Poakolu. Nov. 3. i haule ai ma keia haawina hookahi kekahi makuahine o makou oia o Mrs. Kaohua Manu.  Ma Haiaula i loaa ai keia haawina pilikia ma kahi o kekahi o kana mau kama.  Ua loaa ma ke kakahiaka i keia mai kuhewa i kamaaina he kauhola a aole he huaolelo a hiki wale i kona aho hope loa i ka hora 10 p.m. o ka po.  Ke noho nei ke kane. na keiki. na moopuna ame ka ohana pu me ka naau luuluu a kaumaha.  A pela pu na hoaloha ame na makamaka.  Aloha ia makuahine o na Makapala ame Niulii a hala loa aku i Kohala waho.

 

Ke hoi mai nei ka ua o ua aina nei o makou. o ke ola iho la no ia.  A he malihini nohoi ka lohe hou ia ana o ka hekili.  ame na alelo manamana o ka uwila.

 

Ke hooki nei au me ke aloha a nui i ka Luna hooponopono, ame na limahana o kou keena.

 

Owau iho no me ka haahaa o ka malihini hanu mea hou.

 

Ke Duke o Uhalu. ka Upa oki mauu o Honopueo a o ka Lima Kui o Maudelana.

 

Kohala, Novemaba 8, 1897.  (Mahalo ia oe.  Mea hou ia mai ua hooheno o ka aina hanau o kaua.  Aloha.  L. H.)

 

HOOLAHA MANA HOOKIOKOOLO.

ILOKO O KA AHA KAAPUNI APANA

Hookolokolo Ekahi o ko Hawaii Pae Aina.  ERMINA QUITIGUA kue ia VICENTE QUITIGUA.

Ka Repubalika o Hawaii.  I ka Ilamuku o ke Aupuni. a i ole. i kona Hope:  Me ka mahalo.

 

Ke kauohala aku nei oe e kii ia Vicente Quitigua, mea hoopilia, ina e waiho mai ana oia i kana pane i kakauia iloko o na la he iwakkalua mahope iho o ka hookoia ana o keia, e hele mai imua o ka Aha Kaapuni i hoikeia ae nei ma ke Kau o Novemaba o ua Aha la, e malamaia ana ma Honolulu. Mokupuni o Oahu. ma ka POAKAHI, la 1 o NOVEMABA ae nei. ma ka hora 10 kakahiaka, e hoike mai hoi i ke kumu e ae ole ia ai ke koi a Ermina Quitigua, ka mea hoopii, e like me ka mea i hoakakaia iloko o kana palapala hoopii i pakulia me keia.

 

A e hoihoi mai i ka palapala kii me ka hoike piha o kau mau hana no ia mea.

 

Ikea ka Mea Hanohano A. W. Carter, Lunakanawai Ekahi o (Sila) ka Aha Kaapuni Apana Hookolokolo Ekahi, Honolulu, Oahu, i keia la 1 o Okatoba, 1897.  (Inoa)  GEORGE LUCAS.  Kakauolelo.

 

 

Ke hoike  aku nei au o ka mea maluna ae he kope oiaio ia o ka Palapala Kii ma ia hihia, a ua kauohaia ua Aha la e hoolahaia ia mea a e hoopaneeia ka hihia a ke Kau o Feberuari, 1898, e hiki mai ana o keia Aha.

P. D. KELLETT, JR.  Kakauolelo.  Honolulu, Novemaba 2, 1897.  2675-6t

 

ILOKO O KA AHA KAAPUNI O KA

Apana Hookolokolo Ekahi o ko Hawaii Pae Aina.  Ma ka hana o ka waiwai o Mary Puaokaleikula Apoe (w), he keiki oo ole.

 

No ka mea, ua waihoia mai he Palapala Hoopii e ke Kahu Malama Waiwai Nicholas Peterson, e nonoi ana e kuai kudala ia na aina o ke keiki oo ole e waiho la ma Waiaula, Hanalei, Kauai, no ke kumu penei:  e hoomahuahuaia na loaa makahiki no ka pomaikai o ke keiki oo ole.

 

Nolaila, ma keia, ke haiia aku nei ka lono i na poe apau i kuleana, o ka POALIMA, la 26 o NOVEMABA, 1897, hora 10 kakahiaka, ma Alilolani Hale, Honolulu, Oahu, oia kahi ame ka manawa e hooioheia ai o ua palapala hoopii la, a e hoike mai lakou no ke aha la e ae ole ia ai ke noi a ke Kahu Malama Waiwai. 

 

Honolulu, Okatoba 27, 1897.  Na ka Aha:  P. D. KELLETT, JR.  Kakauolelo.  2674-2t

 

HOOLAHA HOOKO MORAKI.

KA MANAO HOOKO MORAKI A KA MEA PAA MORAKI.

Ke hoolahala aku nei ma keia, mamuli o ka mana kuai i haawila mai ia’u maloko o kekahi moraki i hahaia e Antonio Joe, o Honolulu, Mokupuni o Oahu, ia S. N. Emerson, o Honolulu i oleloia, i hanaia ma Mei 20, 1897, i kopeia maloko o ke Keena Kope Palapala, maloko o ka Buke 139, aoao 87 ame 88, a i hooliloia ia Chang Kini ma ka la 15 o Okatoba. 1897, ua makemake ka mea i lilo mai ai ua moraki la e hooko i ua moraki la no ka uhakiia ana o ke kumu hoopaa i paa maloko o ua moraki la. oia hoi. ka uku ole la o ke kumupaa ame ka ukupanee.

 

Ke hoolahala aku nei ma kela, e kuai kudala akea ia aku ana na aina, ame na mea apau i pili maluna iho o ua aina la, i hoikeia maloko o ua moraki la, ma ke keena kudala o James F. Morgan, ma Alanui Moiwahine, ma Honolulu i oleloia, ma ka Poaono, la 4 o Dekemaba, 1897, ma ka hora 12 o ke awakea.

 

O ka aina i paa ma ua moraki la, ola kela apana aina apau e waiho la ma Kalihi, Apana o Kona, Mokupuni o Oahu. oia hoi kekahi hapa i hoikela maloko o ka Palapala Sila Nui Helo 1204, Kuleana Helu 681, maloko o laila he Hookahi ame 40 -100 Eka, oi aku a emi mai paha. a oia ka aina i hooliloia mai ai i ka Mea Hana Moraki ma ka palapala kuai a W. H. Cummings, i hanaia Iune 22, 1891.  I kopeia ma ke Keena Kope Palapala i oleloia ae la, ma ka Buke 133. ma na aoao 94-5.

 

Kuike ke Dala.  O na lilo palapala ma ka aoao o ka mea a poe paha e lilo ai ka aina.

 

CHARLES F. PETERSON, Loio no ka Waihona (Assignee) o ka Mea Paa Moraki.  Hanaia Honolulu, Novemaba 4, 1897.  2575-4:

 

KELA AME KEIA

HOOLAHA I NA POE AIE.

Ua hookohu pono ia mai ka mea nona ka inoa malalo iho nei i Luna Hooko Kauoha no ka Palapala Kauoha Hope a Kaleipua Kanoa, e Honolulu iho nei.  Mokupuni o Oahu i make.  Ke hoolahala aku nei ma keia i na poe apau e waiho mai i ka lakou mau koi no ka Waiwai o na Kaleipua Kanoa nei. i make, me ke aponoia, ina paha nma ka moraki a ano e ae paha, i ka mea nona ka inoa malalo iho nei. ma kona keena ma Alanui Kalepa. ma Honolulu. Oahu. Hoko o eono mahina mai keia ia aku. a i ole ia. e hoole mau i ale i ua Waiwai la, ma kela ke kauohaia aku nei lakou e hookaa koke mai i ka mea nona ka ino malalo iho nei. 

 

CECIL BRROWN.  Honolulu, Nobv. 10, 1897.  2676 – 41s

 

HOOLAHA I KA POE AIE.

Ua hookohu pono ia mai ka mea nona ka inoa malalo iho nei i Luna Hooko Kauoha no ka Palapala Kauoha Hope a Manuel A. Barete o Honolulu iho nei.  Mokupuni o Oahu, i make.  Ke hoolahala aku nei ma keia i na poe apau e waiho mai i ka lakou mau koi kue i ka Waiwai o ua Manuel A. Barete nei. i make. i hoolalo pono ia. ina paha ma ka moraki. a ano e ae paha. i ka mea nona ka inoa malalo iho nei. ma ke keena o Cecil Brown, ma Alanui Kalepa, honolulu. Oahu.  Iloko w eono mahina mai keia la aku, a i ole, e hoole mau loa ia aku no lakou:  a o ka poe apau i aie i ua Waiwai la. ke kauohaia ahu nei e hookaa koke mai i ka mea nona ka inoa malalo nei. 

 

Hanaia, Honolulu, Nov. 10, 1897.  RICHARD ANTONE.  2676-4ts

 

HOOLAHA KUDALA.

Mamuli o ke kauoha a ka Hon. E. G. Hitchcock, Lunakanawai Kaapuni, Aha Kaapuni Apana Ekolu o ko Hawaii Pae Aina, e kuai aku ana au ma ke kudala akea ma ka Poalua Novemab la 30, M. H. 1897, ma ka hora 12 awakea ma Kau, Hawaii:

 

Hookahi apana aina ame ka hale laau pu; oia no kekahi hapa o ka apana ainai hoakakaia kona mau palena ma ka Palapala Sila Nui Helu 1941, e waiho la ma Kau, Hawaii, maloko o keia apana he 73-100 eka a i kope ia ma ka Buke Aupuni 133 ma ka aoao 302 ame 303.

 

Uku koho $100.00.  No na mea i koe e ninau la C. MEINECKE. Lunahooponopono o ka Waiwai o D. N. Heleloa. Waiohinu, Kau, Nov. 2, 1897.

 

HOOPAU HUI.

O ka Hui i ku ai mamua aku nei, malalo o ka inoa J. E. Gamalielson & Co., e lawelawe hana ana ma Kaumana, ma ka Apana o Hilo, Mokupuni o Hwaii, ame ka Repubalika o Hawaii, ma keia la ua hoopauia mamuli o ka aelike ana, a ua kuaiia e Mr. J. E. Gamalielson ke kulana holookoa apau o ua halekuai ia, a ua ili maluna ona na koikoi apau o ua Hui ia. 

 

(Kakauinoaia) G. E. Gamalielson.  (Kakauinoaia)  E. L. Hutchinson.

Hanaia ma Hilo, Hawaii, i keia la 15 o Okatoba, A. D. 1897.  2675-2t

 

HOOLAHA HOOPONOPONO WAIWAI.

Ua hookohula ka mea nona ka inoa malalo iho, he lunahooponopono no ka waiwai o Alexander Moore, i make me ke kauoha ole, nalaila, ke hoolahaia aku nei ma ke akea. ina ke koina ka kela me keia mea, e pono e waiho mai mamua o ka pau ana o na malama eono mai keia la aku, o hoole loa ia.

 

DAVID DAYTON, Lunahooponopono o ka waiwai o Alex. Moore.  Honolulu, October 18, 1897.  2673-5t

 

THEO. P. SEVERIN

(KAPOLEMA MA).

He Mea Pa’i Kii Hooleleaka.

 

E hana ana oia i na kii nani loa ma Honolulu nei no ka uku haahaa loa.  E palia ana na Kii Ahaaina, Mare, Hoolewa, na Hale Noho, a pela aku.

 

E hoonuiia ae ana na kii mai na kii liilii mai.

 

Alanui Nuuanu, ma keia aoao aku o ke Alanui Pauahi.  Ala iluna.  2664-12ms.

VAPO CRESOLENE

Mamuli o ka haawiia aua o ka laau Cresolene ma ka hanu aua. ola ka keehina hana palekana loa no ka lawelawe ana i na Ohe Makani o ka puu.  He kamahao launa ole ka holo pono o kana hoola ana ia ke Kunu-Kalea ame ke Kunu Ho.  He laau maikai loa ia no ke pale ana aku i na ma’i lele, a pela kuai ole, i huipu me na palapala hoomaikai.  Kuaiia e na poe kuai laau a pau.

 

HOLLISTER DRUG CO., Honolulu, H. I. Agents.

 

KENERALA BARA TOLOMIO MASSO.

O keia ke kii o ka Peresidena hou o ka Repubalika o Cuba.  He kaeaea keia no na kahua kaua lehulehu wale iloko o 10 makahiki e nee nei. no ke kuokoa o Cuba.