Ka Nupepa Kuokoa, Volume XXXVII, Number 5, 4 February 1898 — Page 1

This text was transcribed by:	Kate Motoyama
This work is dedicated to:	sister sue wengrofsky

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVII. HELU 5. HONOLULU, POALIMA, FEBREUARI 4, 1898. NA HELU APAU 2688

Hoolaha Loio.

W. @ KAKELA,

@ Kokua ma ke Kanawai

@ LUNA HOOIAIO PALAAPLA.

@370

L @LE A. DICKEY.

Loio a he Kokua ma ke

Kanawai.

@ Kaahumanu, Helu 14, Tel. 682.

Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.

E hookoia na hana pili kanawai apau ma@ na Mokupuni mai.

A. F. Tavares, Kakauolelo, Mahe-@ a Notere no ka Lehulehu. 1yr.

Hoolaha Kumau.

Papa! Papa!

* * Aia ma kahi o * *

LEWERS & COOKE

(Lui Ma.)

Ma ke Kahua Hema o na Alanui

Papu me Moi.

E LOAA NO NA * *

Papa Nouaiki

O kela a me keia ano.

Na Pani Puka . . --

Na Puka Ani Ani . . --

Na Olepelepe . . --

Na pou . . --

-- Na O'a . .

-- Na Papa Hele . .

-- Na Papa Ku . .

-- Na Papa Moe . .

* Na Pili Hale

* O na Ano apau.

A me na * *

Wai Hoohinuhinu Nani

O Na Ano Apau.

Na Palaki o na Ano he Nei Wale.

Ke haiia aku nei oukou e na makamaka a pau, ua makaukau keia mau makamaka o oukou o hoolawa aku ma na @ a pau e pili ana ma ka laua Oihana no ka

Uku Haahaa Loa

@ like me ka mea e holo ana mawaena o

L@ a me ka Mea Kuai.

E Hele Mai e Wae no Oukou Iho.

I keia Poakahi ae e noho ai ka Aha @ o ke Kau Kaapuni o Oahu nei.

Ma ka auina la Poaono aku nei, ua @ama ae la o Mr. Goo Kim Fui, ke Kanikela o Kina ma Hawaii nei, he wahi paina komo hale mauka ae nei o @ui. Ua nui no na makamaka i loea aku ilaila ma ia la.

Ma ke kuai kudala ia ana o ka aina ame na hale o ka waiwai o Robikana (Kimo Pakaka) ma Waikiki ae nei, la ka Poakahi iho la, ua lilo ae la @ ia Maka (Mark) Robinson, no ka huina o $16,500. Ua koho o C. S. Desky a hoea i ka $13,000, a o Loio A. W. C@er a hoea i ka $16,000.

KA MEA HUNA POHIHIHI

Unuhiia e Hooulumahiehie no "Ke Kilohana Poo-

kela o ka Lahui Hawaii"

MOKUNA XXXIII.

Ku iho la laua me ke kali pihoihoi ana. Aole i liuliu lohe aku la lau ai ka nehe ana mai o na kapuai wawae o Megi. A ma ia wa hookahi nohoi, lohe aku la laua he mau keehina kapuai awiwi a mama. He mea maopopo, aole ia o na keehina kapuai o ka laua keiki muli loa, a no ia mea, ua ala nui ae la ke pihoihoi nui iloko o laua.

Manao loa iho ia ka Lede Beatirisia o Adelo ia e hoi hou mai ana no ka hooko ana i kona inaina maluna o kana kane aloha. I keia wa hoi, ua ku iho la o Geofere Tereveliana,ma ke kulana makaukau no ke pale ana laia iho, in a o kona enemi keia e hele mai ana. Aia hoi o Beatirisia ke paa a ke puliki mai la iaia ma kona a-i, me na waimaka e hiolo ana ma kona mau papalina.

Aole i liuliu hoea mai la o Megi me kekahi kanaka opio imua o laua. Ma na helehelena o keia kanaka opio a laua i ike aku ai, ua hoike mai ia, aole ia he enemi.

I ka hoea ana mai o ua kanaka opio nei a ku imua o laua, ua wehe ae la ia i kona papale, ame ka haahaa, kunou mai la ia imua o ke kane ame ka wahine i hoopiooia ko laua mau noonoo, a pane mai la:

"Ua loaa paha ia'u ka hanohano o ka halawai ana me ka Lede Beatirisia ame Seniora Arevalo?"

"O! O ka Haku Rosevana Keia!" i hooho ae ai i na helehelena o ke kanaka opio.. "O oe keia?" Nana aku la ua Lede nei o ke kakela o Hametona me na onohi maka pahaohao.

"Ae, e ka Lede Beatirisia. Owau no keia o Paulo Rosevana, kou hoaloha. Mai pihoihoi oe, no keia hoea kamahao ana mai la o'u, oiai ua maopopo ia'u na mea apau--"

Aole hoi i pau pono loa aku na huaolelo ope a ua Haku opio nei o ka Hale-o-ka-Maka-o-ka Aeto i ka pane mai, ua ninau e aku la ka Lede Beatirisia iaia:

"Ua ike oe i ka mea huna pohihihi e pili ana ia'u nei, kou hoaloha?"

"Ae; ua ike au ia mea," wahi a ua Haku Rosevena nei i pane mai ai, me ka hoomau ana mai hoi i ka olelo ana, "e ae mai oe, e hai aku au ia oe he wahine oe i mareia i ke kane, me ka paumaele ole o kou inoa maemae, a he makuahine hoi e noho ana iloko o ka aahu o ka nohona i ike ole ia e ko ke ao nei i manao ioa ai, aole oe i alana ia oe iho ma ke kuahu o ka materemonio. Ua ike nohoi au, o Seniora Arevalo nei, kau kane, aole ia he kanaka e ae, aka, o Geofere Tereveliana no ia, ke kanaka i hoopea wale ia kona inoa maikai, a i hoopoinoia hoi kona nohona oluolu ame ka palekana, a o ka mea hoi a'u i lawe ae ai he e ka mea hoi nona ka inoa a'u i lawe ae ai he hoohiki paa loa e haawi no au i ka'u mau hooikaika ana apau i mea e holoiia ae ai ka paumaele i hokae wale ia iho ai maluna oia inoa, e ka mea pakaha wale."

I keia wa, haawi mai ia oia i kona lima imua o Geofere Tereveliana, a lalau aku la nohoi ia me ka piha haohao loa o kona noonoo, no keia halawai malihini ana me kekahi o na kanaka opio koikoi loa o Pelekane iloko o na hora a ka popilikia e haale mai ana maluna on a.

Alaila, huli ae la ia a kamilio ae la i ka Lede Beatirisia:

"Ua ike nohoi au, ia nei iho nei ka Haku Adelo kahi i hoouka mai ai i kana mau olelo hooweliweli ia olua. A ke ole au e kuhihewa, o ka mea kekahi e pili ana i ka olua kaikamahine."

"Ae, ae," wahi a ka Lede Beatirisia i pane aku ai me ka piha pihoihoi nui, me ka puliki ana ae o kona mau lima, me ka olelo ana aku hoi: "Ae, o kuu Alamira aloha, he pio a he paahao oia na ka Haku Adelo i keia wa."

"Ua hoea mai la au ia nei, imua o olua, mamuli o kana kauoha," wahi a ka Haku Opio i pane mai ai, "no ka lawe ana mai imua o olua i ka hooia ana no kona palekana. Ua haalele aku

COLONEL HENRY CLARK CORBIN.

Colonel Corbin, who becomes adjutant general of the army in February, is an

officer of striking personal appearance and marked talent. He is 55 years of age and

a veteran of the civil war. He has served thirty-two years in the regular army.

He is not a West Pointer.

O Konela Henry Clark Corbin keia, kekahi on a Koa kaulana o Amerika

Huiia. He 55 on a mau makahiki.

nei au aia, me ka palekana me kona kupunakane. I keia hora, aole loa i ike iki ka Haku Adelo i ka hoopahua ia ana o kana mau hana lokoino i hana ai maluna o ka Lede Opio."

I keia wa i huli ae ai ka Lede Beatririsia a puliki ae la i ka a-i o kana kane aloha, a pane aku la:

"Ua aloha mai na Lani ia kaua, ua pakele ke kaikamahine a kaua."

Alaila, huli hou ae la ia a kamailio aku la i ka Haku Rosevena: "Pehea la, ua ike paha oe iaia? Ua hai aku paha oia ia oe no maua nei? Aka, e hoi kakou iloko o ka rumi hookipa. E kala mai oe ia maua no komaua kono mua ole ana aku nei ia oe e komo iloko o ko maua home kuaaina nei, mahope iho o ka hala ana o kekahi wa loihi o kou hoomanawanui ana mai nei i keia huakai nana i hoomama nui mai i kekahi hapa o ko maua kaumaha ame ko maua luuluu e auamo nei maua i keia wa."

I nei wa i komo aku ai lakou apau no loko o ka rumi hookipa, a malaila lakou i noho iho ai.

No na ninau a ka Lede Beatirisia i ninau aku ai imua o ka Haku Opio Rosevena, ua pane mai la oia:

"No kau ninau e ka Lede Beatirisia i ninau mai nei ia'u, e pane aku au ia oe ame ka Haku Geofere Tereveliana. Ua ike au i ka Lede Opio, a ua halawai kamailio pu au me ia. He mea oiaio, ua lawe malu ia mai oia e ka Haku Adelo, mai kahi mai o kona kupunakane, a hoonohoia maloko o kekahi wahi hale ma ka lae kahakai. O kahi nohoi ia o kona kahu hanai. He wahi kokoke loa keia i ko makou lae kahakai, he anenae elua mile mai ko'u wahi aku. Ia'u i hele ai i ka holoholo waapa ma ia mau wahi ae, ua ike mai la o Alamira ia'u, a noke mai la oia i ka peahi mai ia'u. Ua ike nohoi au iaia mamua aku a ua hoomaopopo au iaia. I ko'u hoomaopopo ana mai i keia mea e peahi ae nei ia'u, ua hoohuli mai la au i kuu wahi waapa ma kahi e hoea mai ai i ua wahi hale nei, me ka manao ole nae oia kela e peahi ae nei. I ko'u hoea ana aku i ua wahi hale nei, ua ike aku la au ia Alamira. Mahope iho o ka hala ana o kekahi wa pokole o ko'u kamailio ana me na mea no laua ua hale la, ua hookuuia mai la oia, a hoihoi aku la au iaia i kona kupunakane."

"E hoomaikai mai no na lani ia oe," wahi a ka Lede Beatirisia i pane aku ai imua o ka Haku Opio, me ka ninau ana aku hoi:

"Ua hai aku anei oia ia oe no maua nei?"

"Ae; ua hoike mai oia i na mea apau e pili ana ia olua, me kona paulele ana hoi maluna o'u, e hiki ana ia'u ke malama ia mea me ka maalahi ame ka palekana, ma ke ano he waiwai makamae loa la ia nana i haawi mai ia'u. Ua makemake loa oia e hoea mai imua o olua nei, oia hoi, ua ake loa no oia e hoi mai, aka, mamuli o ko'u ike ana i ka loihi loa o ke alahele mai Terveliana Pa mai a hoea ia nei, ua hai aku @ iaia na'u e hele mai e hoike ia olua no kona palekana. A imua hoi o olua, ke makemake nei au e hai aku ia olua, e lawe aku olua ia'u i keiki au na olua, in a nae hoi he mea oluoluia ia e olua. A e hai aku au ia olua, i mea e hiki ai ko'u lilo ana i keiki na o@a, e alana no au ia'u iho ma ka han@ holoiia ae ai ka paumaele i hook@ hihi wale ia iho maluna o @@ Mr. Tereveliana nei. E ae mai olua, owau pu kekahi e kokua aku ia olua iloko o ko olua mau popilikia apau."

Me na onohi maka hoi i hoopiha loa ia me ke pahaohao, ninau aku ia o Geofere Tereveliana i ka Haku Opio:

"Aka, heaha la ke kumu nana i kono aku ia oe, e kuu Haku, e haawi mai oe i kau mau kokua ana ia maua nei, o ka oi loa aku nae hoi, ia'u nei, ke kanaka i manaoia e kona makuakane o ka ohana hookahi he kanaka au i paumaele me kekahi karaima kiekie loa? Heaha la ke kumu o kou manaoio ana ke ku nei au maloko o ka heiau o ka hala ole a hewa ole hoi? Heaha ia auanei ka waiwai e loaa ana ia oe ke hoihoi hou ia au iloko o ko'u mau pono apau, elike nohoi me kau e manaoio nei me ke kanalua ole, e hoea mai ana no ka la e hookoia ai ia manao ame ia upu ana ou?"

I keia wa i hoholo ae ai ka ula ohelohelo ma na papalina o ka Haku Opio, hoike mai ia hoi kona mau onohi maka i na hiohiona o ke aloha. I ka hala ana o kekahi wa pokole loa o kana hookaulana ana, pane mai la oia:

"Nani hoi ia, ua ninau mai la oe, e ka Haku Geofere Terevaliana, i ke kumu nui nana au i kono mai e haawi ia'u iho iloko o na hana e loaa ai ia oe ka maha, a pela pu hoi me kou ohana, nolaila, ke hai aku nei au ia oe i ka oiaio apau, a oia keia: Mamuli o ko'u hoomaopopo ana i na haawina makamae a maemae hoi iloko o ka olua kaikamahine, oia o Alamira, ua hiki ole ia'u ke au'a iho ia'u mai ke komohia ana aku iloko o nei mea he aloha ana iaia me kuu puuwai apau. A e hai aku nohoi au ia olua, aole owau wale no kai owiliia iloko o keia haawina a ke kamahao nui wale, aka, o ka Lede Alamira no kekahi--oia ame a'u, ua hipuuia maua iloko o ke apo hookahi o nei mea he aloha. A e ka Lede Beatirisia," wahi a ua Haku Opio nei i huli ae ai imua o Beatirisia, "ua kamaaina oe ia'u mai ko'u wa kamalii mai. Aka, aole paha keia o ka wa pono a'u e hai aku ai ia oe i na mea i hoopulakaumakaia e a'u no kekahi wa i hala ae nei. O ka'u wale no e noi aku nei ia oe, e ae mai oe e kokua ana au ia oe, a mamuli auanei o kou ae ana mai i ka'u noi, he hoike maopopo ia o kou manao ole ana e hookaawale aku ia Alamira mai a'u aku nei."

"E kuu keiki," wahi a ka Lede Beatirisia i pane aku ai imua o ka Haku Opio nei, "he oiaio, aole io no keia he manawa e kamailio ai no ia mea. Ke Rosevana, ae nei au, me ka hauoli nui o kuu puuwai, e haawi mai oe i kau mau kokua ana ia maua. Ua ike no na lani, he mea pono ke loaa ia maua kekahi kokua mai kekahi mea mai i hiki ia maua ke hilinai. Nolaila, i kou kokua ana mai ia maua ma ke inoa o ia o Alamira, a no kona pono ame kona palekana nohoi."

No keia mau olelo a ka Lede Beatirisia, ua hoike mai la na helehelena o ua Haku Opio nei i ka hauoli. Lalau mai ia ia i ka lima o ka Lede Beatirisia a honi iho la. Ia wa hookahi no hoi i pane mai ai o Geofere Tereveliana:

"E kuu Haku--ae--o Paulo, ke haawi aku nei au ia oe i ka'u mau hoomaikai ana no kou haawi ana mai ia oe iho i mea kokua ia maua. Ua makemake loa maua i na kokua ana a kekahi mea i loaa na noonoo maikai a molaelae, i owiliia hoi me ka puuwai o ka oiaio. Ke hoike mai nei kou mau helehelena, aia he uhane iloko ou i hiki ke hilinaiia. Oia hoi, ua apo aku nei ka Lede Beatirisia i kau mau kokua ana, aohe a'u mea e ae e hoike aku ai ia oe. O kana mea i haawi aku ai i ka paulele ana, o ka'u nohoi ia e paulele aku ai."

E kuu makamaka heluhelu, ke ike nei oe, eia ka Haku Opio o ka Maka-o-ka Aeto ke hui pu nei me Beatirisia ma. Mamuli hoi o na mea a kaua i ike ae la, ua aela ke noi a ua Haku Opio la e na makua o ka oiwi i hiipoi nai ia e ia.

Mahope iho o kekahi mau kamailio pokole ana mawaena o lakou, ma na mea e pili ana ia Alamira, ua hoohuli ia ae la ka lakou mau kamailio ana no ka hana pono e hana koke ia ma ia manawa.

"Manao au," wahi a ka Haku Opio i pane mai ai, "he mea pono loa ia olua ke haalele iho ia a nei. Oiai, aole maopopo ia kakou ka wa e pelu hou mai ai o Adelo i hope nei me na makai no ka hopu ana ia oe, e kuu Haku."

"He oiaio no ia," wahi a Geofere i pane mai ai imua o ka Haku Opio. "Ua makaukau loa maua e haalele iho ia anei i keia manawa; aka, o ka'u mea wale no e kunana nei, oia kela: I hea la maua e hele aku ai?"

"Ua noonoo nohoi au no ia mea," wahi a Rosevena i pane aku ai. "He ekolu o'u mau wahi noho o kuaaina aku nei, a ma ko'u manao, ua palekana loa oe ma kekahi o neia mau wahi, elike me kou palekana ke noho oe ma na aina e. A he mea pono ia'u ke haawi aku ia oe i palapala i ke kanaka nana e malama nei ia wahi, a ke ole au e kuhihewa, ua paa no ia'u i ke kakauia ua palapala ia, a eia no ia ia'u i keia wa. A penei nae ko'u manao: O oe o olua ke hele aku no ia wahi, oiai no Ladana, no ke kiai ana i ka Haku Adelo."

Ua lilo keia manao a ka Haku Rosevena i hoike aku ai i mea maikai i na noonoo ana o Geofere Tereveliana a me kana wahine.

Ua pane mai la nae ka Lede Beatirisia: "Pehea la auanei kuu keiki? My poor Jose?"

Ma ke ano pahaohao i nana mai ai ka Haku Rosevena imua o ka Lede Beatirisia, a ia wa nohoi i hoike aku ai oia imua on a i na mea apau e pili ana i ka nalowale ana o ua wahi keiki nei. I ka maopopo ana i ua Haku Opio nei ia mea, ua haawi mai la oia i kana hooia ana, nana no e huli a loaa o Jose.

I keia wa i hoomakaukau iho ai o Geofere Tereveliana no kaua huakai hele, a ma kona wa i makaukau pono ai no ka hele aku, ia wa i hoea mai ai ke kahu kaa, ka mea hoi ana i hoouna aku ai e hele i kahi hoolulu kaa. Hoike mai ia ia, no kona hiki ana i kahi on a i hoounaia aku ai, a mamuli o na mea i hoikeia mai iaia e ke kanaka haawi palapala o ke kaa, ua ike oia i kekahi wahi keiki uuku e hele pu ana me Adelo a kau pu no me ia iluna o ke kaa, a hoomaopopo iho la ia, aohe ia he keiki okoa e ae, aka, o Jose no ia.

"My poor boy," wahi a ka Lede Beatirisia i pane ae ai me ka puuwai kaumaha nui.

Ma ia wa hoi, paa mai la o Geofere Tereveliana i kana wahine, me na helehelena i hoopihaia me ka walohia Honi iho la ia i ka papalina o kane wahine, a huli aku la nana i ka Haku Opio Rosevena, ame na waimaka e haloi ana ma kona mau maka, pane aku ia hoi ia:

"E kuu Haku," wahi ana i pane aku ai imua o ka Haku Opio, me ka leo haalulu, "ke ike mai la no oe i ko'u kulana e ku nei i keia hora. Aole loa e hiki ia'u ke nee aku ma ke alahele no ia hoopakele ana i ka hanau muli o ka maua mau keiki i kailiia aku mai o maua aku. Aole nohoi o'u manawa e hookaulua iho ai no ka hoonana ana i ka naau kaumaha o ka'u wahine nei. Nolaila, mamua o ko'u haalele ana iho i ka home a'u i noho hoomanawanui ai me na keiki a maua ame kuu aloha nei nohoi, i hookahi a'u noi ia oe, e kuu Haku, a oia keia: Mamuli o ko'u ike ana i kou kulana i piha i ke aloha no Alamira, ka maua hiapo, nolaila, ke haawi aku nei au iloko o kou poho lima i ka malama ana ame ke kiai ana o kuu ohana. E hana oe, e kuu Haku, i na hana apau e loaa ai kuu keiki. A ma kona wa e loaa ai ia oe, alaila, e hoihoi ae oe i kona luaui makuahine nei. E lilo oe i mea nana e kiai ka makuahine nei o Alamira, ka mea au i aloha ai. No Alamira hoi, aole a'u olelo ana nona, oiai ua manao au aia no kau mau kiai ana maluna on a. E kuu Haku, ua nonoi aku nei anei au ia oe a oi mamua o ka mea kupono? Aole paha?

"Mr. Tereveliana," wahi a Rosevena i pane mai ai, "mai keia hora aku e hoolilo ai au ia'u iho no ka hooko ana aku i na kauoha au i haawi mai nei na'u e hana aku. Mai keia manawa aku nohoi, e lilo kou pilikia i mea na'u e hooikaika ai me ka pauoho ole e loaa ia oe ka lanakila ana. E lilo ana ka Lede Beatirisia nei ame kana kaikamahine, a pela hoi me ka olua keiki muli loa i mau mea na'u e kiai ai me he mea la he io a he koko ponoi loa lakou no'u. E ku ana au, e paio no lakou me ka ikaika a hiki i ka huna hope loa o ko'u ola ana. Aole loa hoi au e ike ia mea he nohona hauoli, aia wale no a ike aku au ia oe ame kou ohana apau e noho ana oukou iloko o ka maha, ka hauoli ame ka lanakila."

"E kuu keiki," wahi a Geofere i pane hou aku ai imua o ka Haku Rosevena,"eia au ke hele nei, a ke waiho nei au i ka Lede Beatirisia i makuahine ia malalo o kau malama ana. Owau hoi ame ka pokii o ka mea au i aloha ai, ke hele aku ma ke alahele e pakele ai paha au mai na hana aloha ole mai a kuu hoahanau. E kuu Haku, aloha, aloha. A ike hou aku oe ia Alamira, e haawi aku iaia i ke aloha o kona luaui popilikia, aka, e hoike aku iaia, e hekau aku i na manolana iluna i ka Makua Mana Loa."

Alaila, huli iho la ia a honi iho la i kana wahine. I keia wa i ninau ae ai o Mirande iaia:

"E Papa, i hea kaua e hele ai? E haalele anei kaua la mama? O! Ea, e Papa, e hele pu no o mama me kaua."

"E kuu keiki! E hoomanawanui oe. Mahope ae nei no o mama e hele ae ai. O kaua ka mua e hele aku ai a loaa ko kaua wahi e noho aku ai, alaila, kauoha mai au iaia ame Jose ame Alamira e imi ae ia kaua," i pane aku ai o Geofere i kana keiki.

"Go, my child," wahi a ka Lede Beatirisia i pane aku ai i kana keiki. "E hele oe me Papa, a na'u no au e hele aku. No keia wa, he mea pono ia'u nei ke hele me keia keonimana maikai."

Alaila, huli ae la ua Lede Beatirisia nei me na waimaka ma kona mau papalina a pane ae ia i kana kane:

"E kuu aloha, e Geofere Tereveliana hoomanawanui, e hele. E hele oe ma ka inoa okoa. Oia hoi, e kapa oe ia oe iho o Vere. E malama loa oe la Mirande. Mai ae oe iaia e hele hookahi oia wale no. Ano, e kuu kane, e aloha auanei."

Honi ae la ia i kana kane, a pau lalau iho la i kana keiki, a uwe iho la, me ka olelo ana iho:

"Be good to your father. Aole liuliu a halawai hou aku kou mama me oe. God bless you, my dear."

I lawa no a pau keia mau huaolelo i ka hoopukaia ae e ua Lede Beatirisia nei, ua haule maule aku la ia ilalo. Holo mai la ka Haku Opio Rosevena a hapai ae la iaia iluna, oiai hoi o Geofere ame kana keiki i puka aku ai, me ka naau ehaeha, a o Mirande hoi e paa ana kekahi lima on a i kona mau maka, oiai e hanini ana kona mau waimaka no ke aloha i kona luaui makuahine. (Arole i pau.)