Ka Nupepa Kuokoa, Volume XXXVII, Number 9, 4 March 1898 — NA ANOAI O KONA. [ARTICLE]

NA ANOAI O KONA.

I ka Lunahooponopono: Aloha oe:— Ua loaa ia'u he hunahuna Daimana nau e hoikeike ae i ke akea i ike mai na kini o kaua mai ka la hiki nei a hiki aku i mano kalanipoo. Oia keia: ma keia kalepa mai nei aka Maunaloa ua hiki ole i kona waapa ke holo iuka o ke awa o Kailua oiai aole wahi lihi o ka uapo e uhi puia ana e na nalu nui mai Kahiki loa mai. O ka mea pilikia loa aole hookahi mea i hoolele ia aku iuka o ka aina, oiai ke kai e kuupau ana i kona huhu nui. Hookahi na'e a'u mea aka loa o na ili puakea o Kailua, ua iho "na keiki o kaunakakai." Hu ka aka. He mea ole ia loa i ka haulani a na lio me na kaa huila lua o Kailua noho ana i ke awa la'i o Keauhou. I ka hala ana aku o ua kupueu nei no na awa i koe ua lohe ia mai ua hoolei hapa ia na ukana, o na mea ai wale no. Ma ia la no, ua hoomaka mai ka pa ikaika loa ana o ka makani e paluku hala ole ana na nalu ina kumupali, e mokaki ana na kumu laau ma na kula, e uha'i ia ana na kumu niu. Ma ka Lapule ua ike ia aku kekahi waapa mawaho ae o Kahaluu. I ka holo ia ana aku e na keiki o Keauhou e kii, ua loaa aku ua kupueu la o ka moana ua owa o mua o ka ihu, ua hemo pu olalo, ua hookuu ia aku no oia e au ana i ka moana. O ka hopena oia ua hoi hou mai no ua kai malino nei a kona mau no i ke alo pali. Ua lawa kaua e kuu Lunahooponopono me ke aloha nui. LIHI KAI O HANAI'O.