Ka Nupepa Kuokoa, Volume XXXVII, Number 11, 18 March 1898 — Page 4
| This text was transcribed by: | Natalie I. Kealoha |
| This work is dedicated to: | Kona Ohana |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
KANAWAI 2.
HE KANAWAI E HOOLOLI AI I KA PAUKU 33 O KE KANAWAI I
KAPAIA “HE KANAWAI E HOOPONOPONO HOU AI I KA OIHANA
HOOKOLOKOLO” I APONOIA MA KA LA 25 O NOVEMABA, M.H.
1802. E PILI ANA I NA KAU O NA AHA KAAPUNI.
E Hooholoia e ka Ahaolelo o ka Repubalika o Hawaii:
PAUKU 1. O ka Pauku 33 o ke kanawai i kapaia “He Kanawai e hooponopono hou ai i ka Oihana Hookolokolo” i aponoia ma ka la 25 o Novemaba, M. H. 1892, e pili ana i na Kau o na Aha Kaapuni, ma keia ke hoololiia nei i heluheluia ai e like me keia mahope iho nei:
“Pauku 33. E hoomauia no na Kau o na Aha Hookolokolo Kaapuni a e malamaia mai ko lakou mau wehe pakahiia ana a hiki aku a e hoohui pu ana i ka iwakalua-kumamaha o na la mahope aku, koe na’e ka La Pule me na la kulaia. Eia no na’e hoi, ua hiki no e hoomauia aku kekahi Kau o ia ano e like me ka manao o ka Luhakanawai e noho hoomalu ana, no la aole e oi aku mamua o unikumamalua mahope iho o ka pau ana o na la he iwakalua-kumamaha i oleloia.” . Aponoia i keia la 12 o Maraki, M. H. 1898
SANFORD B.DOLE
Peresidena o ka Repubalika o Hawaii.
KANAWAI 3.
HE KANAWAI E HOOPAU AI I KA PAUKU 1139 O KE KANAWAI
KIVILA E PILI ANA I NA HOOLAHA HOOHALAHALA MAI NA
OLELO HOOHOLO O NA AHA HOOKOLOKOLO KAAPUNI.
E Hooholoia e ka Ahaolelo o ka Repubalika o Hawaii:
PAUKU 1. O ka Pauku 1139 o ke Kanawai Kivila ma keia
ke hoopau loa ia nei.
PAUKU 2. E lilo no keia i Kanawai mai a mahope o ka la
o kona hoolahaia ana.
Aponoia i keia la 12 o Maraki, M. H. 1808.
SANFORD B. DOLE
Peresidena o ka Repubalika o Hawaii
KANAWAI 4
HE KANAWAI E HOOLOLI AI I NA PAUKU 1480 A ME 1481, MOKUNA 35, O KE
KANAWAI KIVILA, E LIKE ME IA I HOOLOLUA AI MA KA LA 14 O MEI, 1868, A
ME KA PAUKU 1482 A ME 1483 O KE KANAWAI KIVILA E PILI ANA I KA
UKUPANEE O KE DALA.
E Hooholoia e ka Ahaolelo o ka Repubalika o Hawaii:
PAUKU 1. O ka Pauku 1480, o ke Kanawai Kivila, ke hoololiia nei a e heluhelu penei:
“Pauku 1480. Ina aole he aelike i hoakaka maoli ia ma ke kakau, e hoakaka ana i ka ukupanee okoa ae, alaila, e aeia no ka ukupanee he Eono pa-keneta no ka makahiki, no na dala a pau mahope aku o ka oo ana ma na Bona, na Bila, na Nota Aie, a mau palapala e a’e paha i kakauia, no ke dala i hoaieia, no na dala koena mamuli o ka hooponopono ana i na Helu, mai ka la mai i hoomaopopoia ai ke koena; a no na dala hoi i loaa mai no ka pono o hai, mai ka la mai i koiia ai.”
PAUKU 2. O ka Pauku 1481, ma keia ke hoololiia nei a e heluheluia penei:
“Pauku 1481. E heluia ka ukupanee ma ka Eono pa-keneta i ka makahiki, a aloe e oi aku, ma na Olelo Hooholo i loaa imua o ua Aha o keia Repubalika, ma na hihia waiwai a pau.”
PAUKU 3. O ka Pauku 1482 ma keia ke hoololiia nei a e heluheluia penei:
“Pauku 1482. Aole no e manaoia ma kekahi ano he ku ole i ke kauawai, ke hoakakaia ma kekahi aelike i kakauia, no kekahi ukupanee i oi ole aku mamua o Hookahi pa-keneta no ka Malama; ina nae o ka aelike ma ia ano ua kakauinoaia e ka aoao e kakiia aku ana ua aelike la.”
PAUKU 4. O ka Pauku 1483, ma keia ke hoololiia nei, a e heluheluia penei:
“Pauku 1483. Aole no e aeia kekahi ukupanee i oi aku mamua o Hookahi pa-keneta no ka Malama, maluna o kekahi aelike i hanaia iloko o keia Repubalika; aka nae, aole e manaoia ua paa keia Pauku maluna o na aelike no ke dala i hoaieia maluna o na Bona i hoopaaia maluna o ke kino o kekahi moku, a i oleia, maluna paha o na ulia ma ka moana, aole no hoi maluna o na aelike i hanaia mamua iho o ka hooholoia ana o keia Kanawai.”
PAUKU 5. E mana aku no keia Kanawai mai a mahope aku o kona hoolahaia ana.
Aponoia i keia ia 12 o Maraki, M. H. 1808
SANFORD B. DOLE
Peresidena o ka Repubelika o Hawaii.
FATHER AND SON RETIRED ADMIRALS
Rear Admiral Thomas o Selfridge, Jr., has just been retired-no remarkable occurrence in itself, but very notable from the circumstance that there are now two officers of the same name, both rear admirals, father and son, on the list. The elder admiral, the father, is 93 years old.
NA ADIMARALA SELFRIDGE
O keia mau kii maluna ae nei, oia ke kii o Adimarala Thomas O. Selfridge Jr. ame kona luaui makuakane ma ia inoa hookahi no. He mau Admarala no laua a i elua. Eia ka makua kane i keia wa i ke 93 makahiki. Ua pau ko laua lawelawe hana ana.
HAAWINA
KULA SABATI.
II. 1. Aperila 3. Ka wahine Kanaana. Mataio 15:21-31.
21 Hele aku la o Iesu mai ia wahi aku, a hiki aku la ma na mokuna o Turo a me Sidona.
22 Aia ilaila kekahi wahine Kanaana no ia aina i hele mai ai, kahea mai la ia ia, i mai la, e ka Haku, ka mamo a Davida, e aloha mai oe ia’u ua uluhia loa kuu kaikamahine e ke daimonio.
23 Aole ia i olelo iki aku ia ia. Hele aku la kana mau haumana a noi aku la ia ia, E hoihoi aku oe ia ia; no ka mea, ke walaau mai nei ia mahope o kakou.
24 Olelo mai la ia, i mai la, Ua hoounaia mai nei au i ka ohana hipa auwana o ka Iseraela wale no.
25 Hele mai la ua wahine la, moe iho la imua ona, i mai la, E ka Haku, e kokua mai oe ia’u.
26 Olelo aku la o Iesu, i aku la, Aole e pono ke lawe i ka ai a na kamalii, a hoolei aku na na ilio.
27 I mai la kela, He oiaio, e ka Haku; ua ai no nae na ilio i na hunahuna i helelei iho malalo o ka papaaina a ko lakou haku.
28 Alaila, olelo aku la o Iesu ia ia, i aku la, E ka wahine, nui kou manaoio; me kau makemake, pela e hana ia’ku ai nou. A ola iho la kana kaikamahine ia hora.
29 Hele aku la o Iesu ma ia wahi aku, a hiki aku la ma ke kae loko i Galilaia: pii aku la ia iluna i kekahi mauna, a noho iho la ilaila.
30 He nui ka poe kanaka i hele mai io na la, e halihali pu mai ana i na oopa, i na makapo, i na aa, i na mumuku, a me na mea e ae he nui wale, a waiho iho la ia lakou ma na wawae o Iesu; a hoola iho la oia ia lakou.
31 Mahalo aku la ua poe kanaka la i ko lakou ike ana i na aa e oleol ana, i na mumuku e ola ana, i na oopa e hele ana, a i na makapo e ike ana; a hoonani aku la lakou i ke Akua o ka Iseraela.
PAUKU GULA. Mataio 15:25. Hele mai la ua wahine la, moe iho la imua ona, i mai la. E ka Haku, e kokua mai oe ia’u.
MANAO NUI. E pono ke hoomau i ka pule me ke kuihe ole.
OLELO HOAKAKA. Mahope o ka make ana o Ioane Bapetite, ua hoomau o Iesu i kona haieuanelio ana ma Galilaia. La manawa ua hanai oia i na tausani elima, a hele wawae maluna o ka iliwai. Ua hoomahuahua ke kue ana iaia, a nalaila ua haalele o Iesu i ka aina Iudaio a komo i na apana aina o Turo a me Sidona, ma ka aoao aku o Galilaia.
21. Hele,-me ka manao e haalele i kona aina hanau no ka manawa pokole, no ka hoomaau ana o ka poe Parisaio, Ioane 7:1. Aole nae i hiki mai ka wa kupono no ko Iesu ae ana’ku i ka manao o kona poe enemi. Ua imi oia i kahi e mehameha ai, Mareko 7:24. Turo ame Sidona,-na kulanakauhale kalepa waiwai nui loa ma ka aekai hikina o ke Kai Waenahonua. Ua kaawale o Turo he mau mile 35, o Sidona 55, mai ka lokowai o Galilaia aku. 22. Kanaana,-ua kapaia keia wahine no Suro-Poinikia mai ma Mareko7:26, oiai he Poinikia na Aferika, he panaiaau no Poinikia ma Suria. Kahea,-oiai ua makemake o Iesu e huna ia maloko o ka hale, Mareko 7:24: eia nae ua kaulana loa kona inoa ma ua aina ia ma ke ano he mea hana mana. Davida,-a kaulana no hoi ko Iesu inoa ma kona oihana Mesia, he mamo ua Davida. Aloha,-like a like ka poino o kana kaikamahime me kona poino maoli. Kaikamahime,-kamaiki, ma ka oleol o Helene. Uluhia,-me he mea ia no kekahi akua hoonoho ino mai kona pilikia kino. Oia ka manao o ka poe eehia wale ma keia aina keia aina. Ua lanakila na kauka lapaau ma kekahi mau hana ku i keia manao. 23. Aole,-me he mea la ua kanalua o Iesu e pili ana i ka hana e pono ai ke hana, oiai ua kauoha oia i kana poe haumana, “Mai launa pu oukou me ko na aina e,” Mataio 10:5, 6. Eia nae he wahine popilikia, me ka iini hooikaika, me ka manaoio wiwo ole, kuoo ma kona imi ana i ke kokua mai ia Iesu mai. Ua hoea mai kona aloha hoopakele iaia, oiai no kona mau haumana he aloha ino wale no me ka manao e loaa ai ia lakou ka maluhia ma ka hookaawale ana aku i ua wahine makilo la o pilikia ae lakou. 24. Iseraela,-ua kaupalenaia kona oihana. He Mesia oia no ka lahui Iudaio wale no, aka ma ona la he hoola no ko keia ao holookoa. Ma keia kaupalena ana i na hana pono, ua nui ae ko lakou lanakila, aole ma ka hoolaha wale ana i ha haawina manao akea. Ina paha ua hele aku o Iesu i ka wa mua i ko na aina e aole i hookoia na wanana, aole i loaa hoi iaia kona lahui ponoi. Oiai ua kaupalinaia na haawina manao akea, aole i paa lakou ma ke ano paahao. Ua kauoha o Iesu i kona poe haieuanelio e hoomaka mua ma Ierusalema, aole nae e noho paa ia malaila. 25. Moe,-mamuli o ke ano kahiko o ka lahui Hawaii imua o ko lakou mau alii. 26. Ilio,-he inoa maa mau no ko na aina e ma na aina hikina. Aka hoi o ka huaoleol kupono no na ilio ma ka home, na ilio hanaiahuhu, Mareko 7:27. 27. Oiaio,-ua ae aku ka wahine i ko Iesu kumupale, aka hoi ua hoolilo oia i ua olelo la i kumu hooikaika i kona noi. Ina paha he mau ilio ko na aina no lakou hoi ke kuleana o na ilio, na hunahuna ai no na kamalii i makemake ole ai. 28. Manaoio,-nui a kupaianaha no hoi kona paulele ana i ko Iesu mana hoopakele. Nui kona aloha no kana kaikamahine, nui kona iini e loaa ai ka palekana nona, nui kona paulele ana i ka lono e pili ana i ko Iesu mana lokomaikai, nui kona lanakila ma ka hoohaahaa ana iaia iho, nui kona hooikaika ma ka hoowahawaha ana i na mea kue, nui kona makaukau me ka ikemaka ole ana, nui ka uku no kona manaoio palena ole. 29. Hele,-me ke kali ole ana ma ka hooko ana i kona oihana. 30. Hoonani,-Ka hua maikai o na hana maikai apau loa, na mahalo, paulele, hoolohe aku i ko kakou Akua.
I. Ka mumule o Iesu, 21-24. Ua hele aku o Iesu i ha? He aina Iudaio anei keia, he aina e paha? Heaha ke kumu no kona haalele ana i kona aina hanau? Heaha ke ano o kona noho ana malaila, ma ke akea paha, ma ka hunakele paha? Ua hiki anei iaia kenoho mehameha me ka maluhia? Owai ka mea kahea aku iaia? Heaha ke kumu no kona leo walaau? He wahine Iudaio anei oia, he malihini paha, he kamaaina paha? Ua ike pono anei oia i ko Iesu oihana, Mareko 3:8; Luka 6; 17? Heaha ke noi a ua wahine la? Heaha ko Iesu hana i hana aku ai iaia? Heaha ke kumu no ko Iesu mumule? Heaha ka oleol uwao o kona poe haumana? Ua aloha maoli anei lakou iaia, a i ole paha ua imi anei lakou i maluhia no lakou iho? Heaha ko Iesu olelo pane i kona poe haumana?
II. Ke kudo o ka wahine, 25-27. Heaha ka hana a ka wahine i hana aku ai ia Iesu? No keaha la kona moe ana? Ua kapa anei oia ia Iesu he mamo na Davida? He kaikamahine no Aberahama mai anei oia? Ua hoole anei o Iesu i ke noi a ka wahime ma kona olelo pane? Ua makaukau anei ka poe Iudaio e mahalo I ko na aina e? Heaha ka mea ano ka palena no ko Iesu oihana, ka palekana no ka mea pilikia?
III. Ka lanakila o ka manaoio. 28-31. Heaha ke ano o ka wahine Poinikia, hookiekie paha, hoohaahaa paha? Hike anei i ke Akua ke kokua i ka poe hookiekie? Ua lilo anei ka manao hoohaahaa i kumu no ko Iesu kokua ana i ua wahine la? Heaha ka uku palua na kona manaoio haahaa? Heaha ke kumu no kona lanakila ana. No keaha la ko Iesu hele ana aku? No keaha la i hele aku ai oia i ke kuaaina? Ua loaa anei iaia ka maluhia i makemakeia? Owai ka poe i huli ai iaia? Heaha kona hana no ko lakou pomaikai? Heaha ka hua maikai i kona mau hana mana, ka hookiekie ana iaia paha, a i ole paha ka hoonani ana i ke Akua Hoola?
MANAO PILI. 1. Ua imi anei oe e alakai i ka poe hewa ia Iesu ke Akua Huikala? 2. Pehea i hoike ai kela wahine i na ano kupono o ka mea imi pono? 3. Ua paulele anei oe ia Iesu ma kona mumule i kou mau pule, a i ole paha ua eleu anei oe e hoole ia Iesu ame kona mana hoola no ka hoopau koke ole ana kahi wahi pilikia ou? 4. Ua ioaa anei ia oe ko Iesu mana kokua ma ka hoopau ane i kou kulana hewa? 5. Ua makaukau anei oe e pule, e hooikaika, e hoomanawanui?
KA AHAOLELO
SENATE
La Hana 14. Poaha. Maraki 3.
Lilo nui ka noonoo ana o ka Hale ma ka Bila Haawina, ame kekahi mau Bile Kanawail O kekahi mau haawina maloko o ka Bila Haawina no na koi i hookaa ole ia, ua haawila i na Komke like ole.
Hooholoia ka Bila Kanawai Helu i o ka Hale o na Lunamakaainana ma ka heluhelu mua: a o ka Bila Kanawai Helu 2 hoi o ka Hale, holo ma ka heluhelu elua ana. Peia ka bila kanawai Aha Senate pili i kekahi mau alanui o Honolulu nei, ame ke kanawai pili i ke alahao o Oahu.
HALE O NA LUNAMAKAAINANA
La Hana 14. Poaha, Maraki 3.
O ka pane a ke Kuhina o ko na Aina E no ka ninau a Mr. Atkinson, e pili ana i ka hoopaapaa mawaena o Hawaii nei me Iapana, ua kuhikuhi mai ia e nana iloko o kana hoike imua o keia Kau Ahaolelo.
He mau palapala hoopii noi dala kekahi i waihoia mai e Mr. Aohi mai na Kona mai ame Kau. Na Mr.Parisa he noi dala no ke alanui. Na Mr. McCandless i dala no kekahi paipu wai ma Ewa iho o ke Kula Kiekiekane o Kamehameha.
He mau bila kanawai ka Mr.Gear ame Mr. Loebenstein i hoolaha mai ai e lawe mai ana laua.
Ma ka hapaiia ana o ka noonoo o ka Hale no ka pane a ka Loio Kuhina no ka ninau a Mr. Gear, no ka hoopukaia ana o na palapala hopu e na Lunakanawai Apana, ke apono mai ka Ilamuku a o kona hope paha, ua lawe mai la o Mr. Lobikana he olelo hooholo e kauoha ana i ka Loio Kuhina e hoopau loa ia kela ano hana, a e kauoha oia i kona poe hope aole e lawelawe hou ia ano hana, a ua ulu mai la he paio hahana mawaena o ka Loio Kuhina, ma kekahi aoao, ame Mr. Robikana ma kekahi aoao.
Ma ka hoike a ka Loio Kuhina, o ka hoopuka ana o ka Lunakanawai Apana i kekahi palapala hopu mahope iho o ke aponoia ana e ka Ilamuku a o kona hope paha he hana ia i hookumuia ma ka wa e noho Loio Kuhina ana o Mr. Preston (Loio Pelekane). Ua manao ka Loio Kuhina he hana waiwai nui no keia i lawelaweia ai no ka pono o ka hooko ana i ke kanawai o ka aina. Ua hoopaneeia nae ma ka noonooia ana o ka olelo hooholo a hoea i ka Poakahi.
Mahope iho o kekahi mau noi dala no kekahi alanui mai kahi aku o ka Luna Alanui o Honolulu nei, ma uka ae nei o Kalihi-waena, a hoea i uka o Kilohana, ame kekahi mau noi dala e ae, a pela pu hoi me kekahi mau ninau i waihoia aku e Mr. Pogue i ka Loio Kuhina, no na alanui Aupuni i hanaia aku maluna o ka aina o na kanaka, ua hoopanee ka Hale me ka hora 3 p.m., mahope iho o kona noho ana ma ka hora 1 a oi oia la, no ka lua o ka manawa.
SENATE
La Hana 15, Poalima, Maraki 4.
O ka hapanui o ka hana a keia Hale ma keia la, oia ka Bila Haawina. Ma kekahi mau haawina e pili ana i ka Oihana Makai, ua ikeia keia mau hoololi: Uku o ka Hope Ilamuku, e mau no ia I ka $3,600, aole e hoopii ae a ka $4,000; na uku o na kakauolelo a ka Makai Nui o Hawaii ame Maui, $1,400, aole i $1,800; uku o ke kakauolelo a ka Makai Nui o Kauai ua panee ae mai ka $600 a ka $800; ka uku o ka Hope Makai Nui o Kohala Hema i $1,080 ma kahi o $1,440; Hope Makai o Hilo Akau i $1,440 ma kahi o $1,920; Hope Makai o Kona Akau I $1,800 ma kahi o $2,400; Hope Makai Nui o Kona Hema i $1,440 ma kahi o $1,920; Hope Makai Nui o Puna i $1,200 ma kahi o $1,920; Hope Makai Nui o Kauai, pii ae la mai ka $2,400 a ka $3,000; Hope Makai Nui o Kawaihau i $1,200 ma kahi o $1,560; Hope Makai Nui o Ewa i $1,440 ma kahi o $2,400.
Hoopanee ka Hale a noho hou ma ka Poakahi.
HALE O NA LUNAMAKAAINANA.
La Hana 15, Poalima, Maraki 4.
Waihoia mai he mau pane mai ke Kuhina Kalaiaina mai no kekahi mau ninau i waihoia aku imua ona e pii ana i na alanui.
Hoolaha mae o Mr. Achi he mau hoololi Kumukanawai kana e lawe mai ana. Mahope iho o ka noonooia ana o ka bila kanawai e kapae e kaohi ana i ka hoopai, ma na Aha Apana, ua hoopanee ka Hale e noho hou ma ka auina la.
O ka mea ano nui ma ka noho ana o ka Hale ma ka auina la, oia na ninau “kila-pao” a Mr. Robikana i ka Loio Kuhina, e hoike mai i ka nui o na hihia i kaohiia na hoopai ma ka Aha Apana o Honolulu nei, iloko o na makahiki elua i hala ae nei; ehia mau hihia oia ano i kauia aku ai na hoopai mahope mai; a pela aku.
Hoopanee ka Hale a noho hou ma ka Poakahi, Maraki 7.
NA KANAWAI O 1898.
Kanawai 2. He 24 ka nui o na la e noho ai ke kau hookolokolo kaapuni, ma kela ame keia Apana Hookoiokolo Kaapuni, aka, ua hiki no nae i ka lunakanawai o ka Aha he hooloihi aky i manawa no 12 ia hou aku.
Kanawai 3. Hoopauia ka Pauku 1139 o ke Kanawai Kivila, e pili ana i na hoopii hou mai na olelo hooholo mai a na Aha Kaapuni.
Kanawai 4. He 6 kene@a ka ukupanee kanawai no ke dala i keta wa, ke ole nae e aelikeia ma kekahi ano e ae.
Hoolaha Kumau
Koko Maemae
OIA KE KUMU O KE OLA KINO MAIKAI….
KA AYER SASAPARILA
Ka mea e maemae ai ke koko, ikaika na aa-lolo, ono ka ai, pau ka poluluhi, a maikai maoli ke ola. He mau @ausani o na kanaka i hoike no ke ola o ka Laau Sasaparila a Ayer. Ke hoea mau mai nei ka lakou mau palapaia ma keia ame keia eke le@a. Aohe keia he laau no ka hoao wale ana. Ke hooia mai nei keia poe ie@a apau, “Ua ola au i ka Laau Sasaparila a Ayer.” O kekahi
WAHINE NAWALIWALI
i hele a pili mau ka ili i ka @ela mae, i loohia i ka ma’I papalahu ai ili. I hele hoi a wiwi, a peia hoi me ka ma’i i loohia mau ai lakou na wahine, kakau mai la oia no kona ola loa ana. Ina makemake oe e hoopomaikaiia oe e ka pomaikai i ikeia e kela poe, a loaa ia oe ke ola kino maikai a ikaika, alaila, e inu oe I ka laau hoomaemae koko a hooikaika kino hoi.
Ka Laau Sasaparila a Ayer.
E makaaia loa no na laau hoohalikelike kumukuai emi. Ka inoa o keia laau, oia ka AYER SARESAPARILA. E ikeia ana keia inoa mawaho o ka wa-hi, a malako nohoi o ke kino o keia ame keia omole.
NA HUAALE A AYER
I uhiia me ke ko, he ono ka ai ana
No Keaha
I HOOKAWELEWELE LOA AKU AI OE I KELA
ANU, KUNU AME PUU EHA?
Ua kaulana loa ka LAAU KUNU A AYER (Ayer;s Cherry Pectoral) iloko o na makahiki he aneane 60, ma ka hoola ana i na Ma’I o ka Puu ame ke Akemama, ke Anu, ke kunu, ka Ma’I La Grippe, ame ka Ma’i Mala o ka pale Akemama. He ono keia laau ma ka inu ana, a he oiaio ke ola.
AYER’S CHERRY PECTORAL
Na Medala Gula mai na Hoikeike Nui o ke Ao
Mai lawe i na Laau Emi i Hoohalikeia me kaia
Hollister Drug Co. Lt,
Na Agena ma ka Paeaina Hawaii
Kakela ME Kuke. Ka Halekuai Nui
O NA
Waiwai Like Ole
O na Mea
HANA KAMANA A PAU.
Na Lako Pihi Hao Kukulu Hale,
Na Kepa bele,
Na Lei Ibio,
Na Kaulahao Ilio,
Na Pahi,
Na Upa,
Na Kope Hulu,
Na Pulupulu.
Na Palau Lio
Na
Mea Mahiai,
Na Au Ho. Na Au Koi,
Na kua bipi, Na lei bipi, Na kalahao bipi,
Na uwea pa, Na kaa palala,
Na mea piula, Na
Ipuhao.
Makau ME Aho Lawaia
Na Ihiwai Na Pakeke
Na Kula Na Pakeke Hao
Na Huiu Pena Na Kapu Hao
Na Pulumi Na Panda
Na Pena me Aila Na Kukaepele
Na Kopa Na Uwiki, a me
Na Aila Mahu Na Ipukukui
Mikini Humuhumu Kaulana a
Wilcox & Gibbs
Hookahi Lopi,
KA REMINGTON, Elua Lopi.
A me na ukana he nui waie o ioeia a me ioeia a@o.
Kakela me Kuke.