Ka Nupepa Kuokoa, Volume XXXVII, Number 18, 6 May 1898 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

MA KE KAUOHA.

 

KANAWAI 22.

HE KANAWAI E HOOLOLI AI I NA PAUKU 75 A ME 79 O KA MOKUNA 51 O NA KANAWAI O KE KAU O 1896 E PILI ANA I NA AHA HOOPII AUHAU.

E Hooholoia e ka Ahaolelo o ka Repubalika o Hawaii:

            PAUKU 1. Ma keia ke hoololiia nei ka Pauku 75 o ka Mokuna 51 o na Kanawai o ke Kau o 1896 i heluheluia ai e like me keia mahope iho nei:

            "Pauku 75. E hookohuia he ekolu mau kanaka kupono e ka Peresidena o ka Repubalika o Hawaii no kela ame keia Apana Hookolokolo Kaapuni e noho ma ka oihana no hookahi makahiki a e lilo lakou i mau Aha Hoopii Auhau e hoolohe a e hooholo i na hoopii ame na hoohalahala a pau i lawe kupono ia malalo o keia Kanawai maloko o ko lakou mau Apana Kaapuni pakahi. Eia nae, aole e hoonohoia kekahi Luna Helu, a i ole ia, o kona Hope e noho ma ke ano he hoa no ia Aha Hoopii Auhau."

            PAUKU 2. Ma keia ke hoololiia nei ka Pauku 79 o ke Kanawai 51 o na Kanawai o ke Kau o 1896 i heluheluia ai e like me keia mahope iho nei:

            "Pauku 79. E malama no na Aha i oleloia i na noho ana iloko o kela ame keia Apana Hookolokolo Kaapuni mawaena o ka la ekahi o Augate ame ka la iwakalua o Augate o kela ame keia makahiki iloko o kela ame keia apana hookolokolo kaapuni iloko olaila i waiho ai ka waiwai, maluna o ka helu ana o ia waiwai i laweia ai kekahi hoopii ma na manawa i kohoia e ka luna e noho hoomalu ana ia aha, a ua hiki no e hoopanee mai kekahi manawa a hiki i kekahi manawa e like me ka mea e manaoia ana he pono."

            PAUKU 3. E mana keia Kanawai mai a mahope aku o kona hoolahaia ana.

            Ma keia ke hooia nei makou o ka Bila mamua ae nei i hooholo mua ia e ka Ahaolelo, ua waiho mua ia aku imua o ka Peresidena no kona kakauinoa me ka apono ana ma ka la 12 o Aperila, 1898, ame ka la 25 o Aperila, 1898, ua hala he umi la a oi aku mai ia waiho ana aku, ua hoihoi mai ka Peresidena o ka Repubalika o Hawaii i ua bila nei i ka Ahaolelo me k@ kakau inoa ole ia aole hoi i vitoia, aole hoi i hoopaneeia ka Ahaolelo me ka hoomaopopo ole i ka la mamua iho o ka pau ana o ia mau la he umi ka waihoia ana aku i oleloia.

            W. C. WILDER

            Peresidena o Senate.

Hoike:

            GEORGE MANSON.

            Kakauolelo o Senate.

            JOHN LOT KAULUKOU.

            Lunahoomalu o Hale o ka Poeikohoia.

Hoike:

            JAS. N. K. KEOLA.

            Kakauolelo o Hale o ka Poeikohoia.

 

KANAWAI 23.

HE KANAWAI E PILI ANA I NA LUNAKANAWAI KAAPUNI, A E HOOMAOPOPO ANA NO KA HOOKOHU ANA I KEKAHI MEA E LAWELAWE I NA HANA O KA OIHANA ILOKO O KA MANAWA KAAWALE AKU, A I OLE IA, HIKI OLE NO KA MANAWA O KEKAHI LUNAKANAWAI KAAPUNI, A E HOOLOLI ANA I NA PAUKU 30 A ME 34 O KA MOKUNA 72 O NA KANAWAI O 1892, I KAPAIA "HE KANAWAI E HOOPONOPONO HOU AI I KA OIHANA HOOKOLOKOLO."

E hooholoia e ka Ahaolelo o ka Repubalika o Hawaii:

            PAUKU 1. Ina ua hiki ole no ka manawa, a i ole ia, na kaawale aku mai keia aina kekahi Lunakanawai Kaapuni, ua hiki no e hookohuia kekahi mea e ae e ka Peresidena e hooko i na hana o ka oihana oiai e mau ana ia hiki ole, a i ole ia, ia kaawale ana.

            Ua hiki no e hoopauia ka palapala hookohu o kekahi mea i hookohuia pela i kela manawa keia manawa e ka Peresidena elike me kona manao he pono.

            PAUKU 2. Aole e manaoia na hoakaka ana o keia Kanawai ua kue me na hoakaka ana o ka Pauku 45 o ka Mokuna 57 o na Kanawai o 1892, i kapaia "He Kanawai e hooponopono hou ai i ka Oihana Hookolokolo," mamuli olaila i hiki ai i ka Lunakanawai o kekahi Apana Hookolokolo e ae e noho hoomalu ma ka hookolokolo ana i kekahi hihia, a i ole ia, ma kekahi kau o ka Aha Hookolokolo Kaapuni ina ua kauohaia e hana pela e ka Lunakanawai Kiekie.

            PAUKU 3. E mana keia Kanawai mai kona la e hoolahaia ai.

            Aponoia i keia la 3 o Mei, M. H. 1898.

            SANFORD B. DOLE.

            Peresidena o ka Repubalika o Hawaii.

 

KANAWAI 24.

HE KANAWAI E PILI ANA I KE KANAWAI HOOPAI KARAIMA A ME NA KANAWAI KARAIMA O KA REPUBALIKA O HAWAII.

E Hooholoia e ka Ahaolelo o ka Repubalika o Hawaii:

            PAUKU 1. Ua lawa no ma kekahi hoopii a palapala hoopii paha ma kekahi hana hookolokolo e lawe mai, a i ole ia, e kuhikuhi i kekahi Pauku a Mokuna paha o ka hoakoakoa ana o na Kanawai Karaima i hanaia e Sydney Miller Ballou, Esquire, o ka papa loio Hawaii, a i ikeia ma ke ano "Na Kanawai Karaima o ko Hawaii Paeaina, 1897," ma ke ano "Pauku (a i ole ia, Mokuna) ... o na Kanawai Karaima" me ka hoike ole i ka pauku, a i ole ia, mokuna paha o ke Kanawai Karaima, na kanawai o kekahi kau, a i ole ia, kanawai paha oia ke kanawai kumu o ka pauku o ke Kanawai Karaima i hoikeia, ma na hihia a pau kahi i hoakaka pololei ai ka pauku, a i ole ia, mokuna paha i hoikeia i ke kanawai i hooholo mua ia.

            PAUKU 2. Aole e manaoia ma kekahi mea ma keia Kanawai ua hoopauia, a i ole ia, hoanoeia paha kekahi kanawai e ku nei e hoakaka ana i kekahi hewa, a i oleia, e kau ana i kekahi hoopai a ano e ae paha i komo ole iloko o ia hoakoakoa ana.

            PAUKU 3. E mana keia Kanawai mai a mahope aku o kona hoolahaia ana.

            Aponoia i keia la 3 o Mei, M. H. 1898.

            SANFORD B. DOLE.

            Peresidena o ka Repubalika o Hawaii.

 

HAAWINA

KULA SABATI.

HAAWINA VIII. - MEI 22.

            Ka La Hookolokolo. Mat. 25:31-46.

            31 Aia hiki mai ke Keiki a ke kanaka me kona nani, a o na anela a pau pu me ia; alaila, e noho iho ia maluna o kona nohoalii nani:

            32 A e hoakoakoaia mai na lahuikanaka a pau loa imua o kona alo; a e hookaawale ae oia ia lakou i kekahi poe mai kekahi poe ae, e like me ke kahuhipa i hookaawale aku i na hipa a me na kao.

            33 A e hooku aku oia i ka poe hipa ma kona lima akau, a i ka poe kao ma kona lima hema.

            34 Alaila, e olelo aku ke alii i ka poe ma kona lima akau, E hele mai oukou, e ka poe i hoomaikaiia e ko'u Makua, e komo oukou i ke aupuni i hoomakaukauia no oukou mai ka hookumu ana mai o ka honua.

            35 No ka mea, pololi iho la au, a haawi mai la oukou i ai na'u; makewai au, a hoinu mai la oukou ia'u; he malihini au, a hookipa oukou ia'u;

            36 He kapa ole ko'u, a hoaahu mai la oukou ia'u; mai iho la au, a ike mai la oukou ia'u; maloko hoi o ka halepaahao, a hele mai la oukou ia'u.

            37 Alaila, e olelo mai ka poe pono ia ia, e i mai, E ka Haku, inahea i ike ai makou ia oe ua pololi, a haawi aku i ai nau? a ua makewai, a hoinu makou ia oe?

            38 Inahea hoi i ike ai makou ia oe he malihini, a hookipa makou ia oe? a me ke kapa ole, a hoaahu makou ia oe?

            39 Inahea hoi i ike ai makou ia oe, he mai, a iloko o ka halepaahao, a hele aku makou iou la?

            40 A e olelo aku ke alii ia lakou, me ka i aku, He oiaio ka'u e olelo aku nei ia oukou, i ka oukou hana ana pela i kekahi mea liilii loa o keia poe hoahanau o'u, ua hana mai oukou pela ia'u.

            41 Alaila, e olelo ae ia i ka poe ma ka lima hema, E ka poe i ahewaia, haele oukou pela mai o'u aku nei iloko o ke ahi mau loa, i hoomakaukauia no ka diabolo a me kona poe anela.

            42 No ka mea, a pololi au, aole no oukou i haawi mai i ai na'u; a makewai ou, aole hoi oukou i hoinu mai ia'u;

            43 He malihini au, aole no oukou i hookipa ia'u; he kapa ole ko'u, aole hoi oukou i hoaahu mai ia'u; he mai ko'u, a iloko hoi o ka halepaahao, aole hoi oukou i hoaahu mai ia'u; he ma@ hoi oukou i ike mai ia'u.

            44 Alaila, e olelo mai lakou, me ka i mai, E ka Haku, inahea i ike ai makou ia oe, ua pololi, a ua makewai, a he malihini, a he kapa ole, a he mai, a iloko o ka halepaahao paha, a malama ole makou ia oe?

            45 Alaila e olelo aku oia ia lakou, me ka i aku, He oiaio ka'u e olelo aku nei ia oukou, i ka oukou hana ole ana pela i kekahi mea liilii loa o keia poe, ua hana ole mai hoi oukou pela ia'u.

            46 A o keia poe la, e hele aku lakou i kahi make mau loa; aka, o ka poe maikai iloko o ke ola mau loa.

            PAUKU GULA. Mataio 16:27. E uku aku ia i kela kanaka keia kanaka e like me kana hana ana.

            MANAO NUI. E pono ke noonoo i ko ke Akua hookolokolo ana i na kanaka i ka la nui.

            OLELO HOAKAKA. He hapa keia o ko Iesu kamailio me kona poe haumana ma ka Mauna Oliveta, ma ke auina la, mahope o kona haiolelo ma ka luakini. He olelo ao keia, aole he olelo nane. Ua nui loa na pauku Baibala e ae e olelo ana i kekahi la nui, ka la hookolokolo no ko kela ao a pau. He mau olelo nane no hoi e pili ana i ka pomaikai a me na poino o keia ao, e paipai ana i ka makaukau.

            31. Keiki, - he inoa keia no ka Mesia ma Daniela 7:13. Ua hoopili o Iesu i keia inoa ia ia iho. Nani, - no ka mea, ua waiho aku o Iesu i kona nani ma ka lilo ana i kanaka. He kanaka ilihune no oia, i hoowahawahaia, i kaulia ma ke kea. I kona wa e hoi hou mai ai, e hoikeia ana kona nani maloko o ka huakai kaahele nui loa, na anela olinolino eleu loa. Nohoalii, - he moi lanakila oia, aole he paahao a Pilato i kukaihu. Aole i hoikeia mai kahi e ku ai keia nohoalii keokeo, Hoikeana 20:11. 32. Lahuikanaka, - oia hoi ko keia ao holookoa, ka poe ola, a me ka poe make, Hoikeana 20:12, 13. Hookaawale, - ma na papa elua wale no, aole he mau papa e ae: kekahi poe, no lakou ke aloha aku i ka Akua; kekahi poe, aole pela. Hipa, Kao, - ua hanaiia lakou ma ka pu-a hookahi. Ua maa mau i ke kahuhipa ke hoa aku i na hipa ma kekahi aoao a me na hipa ma kekahi aoao o ke awawa, kahi a lakou e ai ai. 33. Hipa, - mamuli o ko lakou ano maemae, akahai, hoolohe. Kao, - mamuli o ko lakou ano pilau, hakaka, hoohaunaele. 34. Akau, - oia no ka poe ano like me na hipa. Ua ku ka poe i ahewaia ma ka lima hema o ka lunakanawai Iudaio. Komo, - ma ka olelo Helene, loaa ia oukou ka hooilina mai ka makua mai. Aupuni, - a noho alii maluna o na ikaika malalo o ke ano kanaka. Hoomakaukauia, - he manao keia e hoohauoli ai; no ke aloha mai o ke Akua ka pomaikai lani mamuli o kona manao hooholo mai kinohi mai. 35. Pololi, - o ke kokua ana i ka poe nele oia no ka hana ku i ka pono Karistiano, aole kue ka manaoio euanelio i keia mau hana maikai; aka nae ua imi mau ka poe manaoio e hana pela. Oiai aole i hapaiia keia mau hana ma ke ano ke kumu o ko lakou hoaponoia. 36. Malihini, - o na hana ekolu ma p. 35 oia no na haawina hana ku i ke ano kanaka: o na hana ekolu ma keia pauku, ua ku lakou i ke kanaka lokomaikai, e haawi pu ana@ku i wahi hapa ona iho. 37. Inahea, - ua kaha@a lakou i ka uku nui no ko lakou haawina manawalea uuku. 38. Oe, - ua hana aku lakou i na mea nele: aole i manao e lakou o keia ka hana ana@ku i ka Moi o ka lani. 39. Halepaahao, - ua waiho wale ia na paahao ke ole he mau kokua mai ko lakou mau makamaka mai. 40. Liilii, - aole i hanaia ko lakou mau hana maikai i mea e loaa ai kekahi uku; ina pela ua pau e ko lakou ano maikai. Ina paha ua manao kakou he hana ano nui keia, aia ka manao e hoike aku ai i ka hemahema o ko kakou hana, me he mea la ua ku ole i ke ano maa mau o na manao. Ina maalahi ka hana maikai, he hoailona ia o kona ano ku i na manao maa mau. 41. Hoole, - no ko lakou ano okoa, ua hookaawaleia lakou mai ke Akua aku. Ahi, - he olelo hoohalike keia. He hoopai hooweliweli i ka uhane e like me ke ahi i ke kino. Hoomakaukauia, - aole no na kanaka, aka nae no na uhane ino. Ua hookomoia na kanaka i ahewaia no ko lakou ano kulike. 42. Aole, - o ko lakou hewa, oia no ka hana ole ana i na hana maikai. O ke kumu pale makehewa oia no ka olelo, Heaha ka hana ino au i hana'i? 43. Aole, - pehea e hiki ai ke hooholo i na hana maikai aole i hanaia? Ua pau loa ka wa hana. 44. Inahea, - ike ole lakou i ke ano ino o ko lakou hana ole ana i na hana maikai. 45. Liilii, - ua hoowahawaha lakou i na poino o hai, me ka olelo, aole pili keia ia'u. 46. Make, - kupaianaha keia olelo hooweliweli ma ka waha mai o ke Akua Hoola Lokomaikai, ka mea makaukau e waiho aku i kona ola kino no ka pono a na mea hewa. Ola, - ua hookukuia keia mau ano noho elua. Ina mau loa kekahi, ina mau loa kekahi.

            I. Ka aha nui, 31-33. Heaha ka la nui a Iesu i kamailio ai i kona poe haumana? Heaha ke ano noho o Iesu ia la nui? Ma ke ano hea ko Iesu hookolokolo ana i ko ke ao holookoa, Ioane 5:22, 27; Oihana 17:31? Ua pili anei keia la hookolokolo i na kanaka a pau loa, a i ole paha i na lahui, aole i ka Ekalesia? Pehea i hookaawaleia ai ka poe pono a me na mea hewa, ma kekahi wae wale ana, paha, mamuli o ko lakou mau hana paha? Ua noonooia anei na hana hoomana aku i ke Akua? Owai ka poe i hoohalikeia i na hipa? Owai ka poe i hoohalikeia i na kao? Heaha na ano maikai o na hipa? Heaha kekahi mau ano ino o na kao? Owai ka poe ma ka aoao akau?

            II. Ka poe ma ka lima akau, 34-40. Ia wai i olelo mua ai ka Moi? Heaha ka olelo ia lakou? Heaha kona olelo kono? Heaha na kumu no ko lakou hoomaikaiia? Heaha ka ninau kahaha o keia poe? Heaha ka olelo pane o ka Moi? Heaha ke kumu no keia olelo, Na Solomona 19:17? Heaha ke kumu no ka ho@pono ana ia lakou, kekahi mau hana paha, a i ole paha kekahi kulana i hoikeia ma na hana?

            III. Ka poe ma ka lima hema. 41-46. Heaha ka olelo a ka Moi i ka poe ma kona lima hema? Heaha na kumu no ko lakou ahewaia? Heaha ka lakou olelo pane? Heaha ka ka Moi olelo hou aku? Ua hoikeia anei ko lakou hana ana i na hana maikai? Ia wai ko lakou hewa aku? Ua ahewaia anei lakou e ke Akua paha, a i ole paha e ko lakou ano hana?

            MANAO PILI. 1. Ua hoomakaukauia anei oe no kahi i hoomakaukauia nou? 2. Ua hooholo anei oe i na hana maikai e like me ka hiki ia oe? 3. Mahea kou wahi i ka la hookolokolo, i ka lima akau paha, i ka lima hema paha? 4. Pehea i pili ai ka manaoio e ola'i i na hana maikai? 5. Ua mau loa anei ka make, ke ahi, ka poino o ka poe i ahewaia?

 

(Mai ka aoao 1 mai)

MOOLELO O LUBIANA.

lua - Ma ko'u manaoio, eia no ke Duke Manafereda o Aledenahaima ke ola nei i keia wa, ke kanaka i kauia kona weli e ko Bohemia nei a pau."

            I keia wa i ala mai ai na hoomanao ana iloko o Rupereto no ka elemakule poohina ame kekahi kanaka opio ana i hopuia ai a paa i kekahi wa i hala ae mamua, ame ko laua pakele ana mailoko aku o ka halepouli i hoopaaia ai laua. A ua ikeia aku la hoi na kulu hou puanuanu e hekau mai ana ma ka lae o ua Duke nei.

            "Nolaila," wahi a Gasepa i hooho ae ai, oiai hoi oia i ku ae ai iluna, me ke kui ana iho i ke pakaukau," e hoomaopopo kaua i keia wa i ko kaua kulana e ku nei. Ua hemo mailoko aku o kau paa ana o Ludowigo o Drosendorf - he kanaka ola ia i keia wa, a ke manaoio loa nei nohoi au, eia oia he hoaloha no keia kanaka, e oleloia nei, he Lima Ulaula. A, eia nohoi ke ola nei i keia wa kela Duke o Adelenaheima, a ke manaoio nei no au aia pu no oia iloko o ka poai o keia poe Naita o ka Lima Ulaula. Aole anei e hiki ia oe ke ike@ iho, ua loaa no he wa no Ludowigo e halawai pu ai me kana kaikamahine. Nolaila, ma ko'u manao, aole he palekana no kaua ke hookaulua hou iho maanei."

            Ua kulou iho la hoi ke poo o Rupereto ilalo, me ka pahola ana ae o haikea keokeo ma kona helehelena apau, a liuliu aea ae le ia iluna, a pane mai la:

            "Alaila, e kuu hoaloha, heaha la ka kaua mea pono e hana ai? Ke ike aku nei au i ka oiaio o kau mau olelo. Nolaila, aole anei hoi oe i ike i kekahi mea pono a kaua e hana aku ai?"

            "O ka'u mea wale no e manao nei," wahi a Gasepa i pane aku ai i kona hoa, oia keia, "E lawe aku kaua i keia lede opio i ke kulanakauhale o Parague, kahi a ko kakou Moi e noho mai la, oia hoi o Oto. Ua maopopo loa, i ke komo ana o keia lede opio, iloko o ke kulanakauhale alii, a noho hoi ma ke aloalii ponoi o ka Moi, aohe enemi puuwai eleele nana e kaili iaia mai laila mai. A ua maopopo nohoi ia'u, e apo aloha mai ana no ka Moi ia kaua, oiai, o oe ame a'u he mau iwikuamoo ponoi nona."

            "Ina pela ua pono, oiai, he makemake loa nohoi au e ike i ka Moi. Nani wale kahi manao maikai o kou, e kuu hoaloha oiaio," wahi a Rupereto.

            "Ae. O ka kaua hana pono wale no keia e hana ai. A penei kaua e hana ai i ka lede opio. Ma ke kakahiaka o ka la apopo e hele aku oe a halawai pu me ia, a koi aku oe iaia e hele olua i ka hololio. O ke alahele a olua e hele aku ai, oia no ke alanui e hoea aku ai i Moldan. Aia hoi a liuliu wale ka olua hala ana'ku, o ko'u wa @a e ukali aku ai mahope o olua, me kekahi o ko'u poe kanaka koa. E wae ana au i ka poe wiwo ole a makaukau o ko'u poe kanaka, oiai aole i ikeia aku ko kaua poi-po ia ana e ko kaua mau enemi."

            Ua holo keia mau hoolala ana mawaena o laua. A pani iho la laua i ka laua mau olelo, ma ka inu ana ae i mau oolapu waina.

            Nolaila, e kuu makamaka, e nana aku kaua i na hana o kekahi la ae, ka la i upuia ai o Ariadane, e laweia aku imua o ke alo o ka Moi Oto o Bohemia, ke Alii hoi nona ka nohoalii e kue nui ia ana e na Naita o ka Lima Ulaula.

            I ke kakahiaka nui wale o kekahi la ae, ua hoea aku la o Rupereto imua o ka Lede Ariadane, me na helehelena hoomahiehie maikai, ame na olelo oluolu waipahe, hoakaka aku la ia i ke kumu nui o kona hoea ana aku imua ona, oia hoi i kii aku oia iaia, e ae mai oia e hele laua i ka hololio, oiai hoi he kakahiaka maikai a oluolu ia no ia hana.

            Ua ano kanalua o Ariadane i kinohi, aka, i kona manao ana iho i ka ikiiki launa ole o kona hoopaaia ana maloko o ka rumi, a he mea pono hoi iaia ke loaa ona ea makamaka a oluolu, nolaila, ua lana ae la kona manao, he mea pono no iaia ke ae aku i ke noi a Rupereto; aka, ninau aku la nae ia: "Pehea; o kaua wale no nae paha ke hele aku ana ma keia huakai?"

            Ae mai la hoi o Rupereto.

            (Aole i pau.)

 

Hoolaha Kumau.

 

Koko Maemae

OIA KE KUMU O KE OLA KINO MAIKAI . . . .

KA AYER SASAPARILA

            Ka mea e maemae ai ke koko, ikaika na aa-lolo, ono ka ai, pau ka poluluhi, a maikai maoli ke ola. He mau tausani o na kanaka i hoike no ke ola o ka Laau Sasaparila a Ayer. Ke hoea mau mai nei ka lakou mau palapala ma kela ame keia eke leta. Aohe keia he laau no ka hoao wale ana. Ke hooia mai nei kela poe leta apau, Ua ola au i ka Laau Sasaparila a Ayer." O kekahi

WAHINE NAWALIWALI

i hele a pili mau ka ili i ka @e@a moe, i loohia i ka ma'i papalahu ai ili, @ hele hoi a wiwi, a pela hoi me ka ma'i i loohia mau ai lakou na wahine, kakau mai la o@a no kona ola loa ana. Ina makemake oe e hoopomaikaiia oe e ka pomaikai i ikeia e kela poe, a loaa ia oe ke ola kino maikai a ikaika, alaila, e inu oe i ka laau hoomaemae koko a hooikaika kino hoi.

Ka Laau Sasaparila a Ayer.

            E makaala loa no na laau hoohalikelike kumukuai emi. Ka inoa o keia laau, oia ka AYER SARESAPARILA. E ikeia ana keia inoa mawaho o ka wa-hi, a maloko nohoi o ke kino o kela ame keia omole.

@A HUAALE A AYER i uhiia me ke ko, he ono ka ai ana.

 

No Keaha I HOOKAWELEWELE LOA AKU AI OE I KELA

ANU, KUNU

AME PUU EHA?

            Ua kaulana loa ka LAAU KUNU A AYER (Ayer's Cherry Pectoral) iloko o na makahiki he aneane 60, ma ka hoola ana i na Ma'i o ka Puu ame ke Akemama, ke Anu, ke Kunu, ka Ma'i La Grippe, ame ka Ma'i Mala o ka pale Akemama. He ono ke@a laau ma ka inu ana, a he oiaio ke ola.

AYER'S CHERRY PECTORAL

Na Medala Gula mai na Hoikeike Nui o ke A@

Mai lawe i na Laau Emi i Hoohalikeia me ke@a

Hollister Drug Co. Lt.

Na Agena ma ka Paeaina Hawaii.

 

Kakela ME Kuke.

Ka Halekuai Nui

O NA

Waiwai Like Ole

O na Mea

HANA KAMANA A PAU

Na Lako Pili Hao Kukulu Hale,

Na Kepa be@

Na Lei Ilio,

Na Kaulahao Ilio,

Na Pahi,

Na Upa,

Na Kope Hulu,

Na Pulupulu.

Na Palau Lio

Na

Mea Mahiai,

Na Au Ho, Na Au Koi,

Na kua bipi, Na lei bipi, Na kalahao bipi,

Na uwea pa, Na kaa palala,

Na mea piula, Na

Ipuhao.

Makau ME Aho Lawaia

Na Iliwai..       Na Pakeke..

Na Kula..         Na Pakeke Hao..

Na Hulu Pena..            Na Kapu Hao..

Na Pulumi..     Na Pauda..

Na Pena me Aila..       Na Kukaepele..

Na Kopa..        Na Uwiki, a me..

Na Aila Mahu..           Na Ipukukui..

Mikini Humuhumu Kaulana a

Wilcox & Gibbs

Hookahi Lopi,

KA REMINGTON, Elua Lopi.

A me na ukana he nui wale @ kela a me keia ano.

Kakela me Kuke.