Ka Nupepa Kuokoa, Volume XXXVII, Number 28, 15 July 1898 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXVII.        HELU 28.       HONOLULU, POALIMA, IULAI 15, 1898.           NA HELU APAU 2711

 

HOOHUI AINA

 

Hoolaha Loio.

W. R. KAKELA.

Loio a he Kokua ma ke Kanawai

HE LUNA HOOIAIO PALAAPLA.

@

 

lyle a. dickey.

Loio a he Kokua ma ke Kanawai.

Notari no ka Lehulehu.

Alanui Kaahumanu, Helu 14. Tel.682.

            Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.

 

            E hookoia na hana pili kanawai apau mai na Mokupuni mai.

            O A. F. Tavares, Kakauolelo, Maheleolelo a Notere no ka Lehulehu.           1yr.

 

Hoolaha Humau.

 

Papa!  Papa!

Aia ma kahi o

LEWERS & COOKE

(Lui Ma.)

Ma ke Kahua Hema o na Alanui Papu me Moi.

E LOAA NO NA

Papa Nouaiki

O kela a me keia ano.

Na Pani Puka

Na Puka Aniani

Na Olepelepe

Na Pou

 

Na O'a

Na Papa Hele

Na Papa Ku

Na Papa Moe

 

Na Pili Hale

O na Ano apau.

 

A me na

Wai Hoohinuhinu Nani

O Na Ano Apau.

Na Palaki o na Ano he Nei Wale.

            Ke haiia aku nei oukou e na makamaka a pau, @a makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka

Uku Haahaa Loa

E like me ka mea @ holo ana mawaena o L@ a me ka Mea Kuai.

E @ W@ no Oukou Iho.

 

HUI HAWAII ME AMERIKA

Kani Kuakolu ka Moa!

KE HONE AE NEI I KE KUMU O KA HANA!!

O ke Olowalu koe o ka Moa!!!

OLINO KA MALAMALAMA IA HAWAII.

Welo no Kihei a ke Ae-loa!

"E ka Hae Hoku Nani,

Hoomalu ia Hawaii,

I PONO na Oiwi,

A Pono na malihini."

 

KA LA I KOHO IA AI KA OLELO HOOHOLO HOOHUI.

            Wasinetona, Iulai 6.—O keia ka la i pau ai ka hoopaapaaia ana o ka Olelo Hooholo Hui a Lunamakaainana Newlands, no ka hoohui ana mai ia Hawaii, a ua hooholo loa ia ua olelo hooholo la ma ke koho ana a 42 poe Senatoa ma ka aoao kokua, a he 21 Senatoa ma ka aoao kue.

            Eia iho na inoa o ka poe i koho ma na aoao elua:

            Poe ae a kokua i ka olelo hooholo:  Allison, Baker, Burrows, Cannon, Carter, Clarke, Cullom, Davis, Deboe, Elkins, Fairbanks, Foraker, Frye, Gallinger, Gorman, Hale, Hanna, Hansbrough, Hawley, Hoar, Kyle, Lodge, McBride, McLaurin, Money, Morgan, Nelson, Penrose, Perkins, Pettus, Platt o Connecticut, Pritchard, Proctor, Sewell, Shoup, Sullivan, Teller, Warren, Wellington, Wetmore, Wilson, Walcott—42.

            Poe kue i ka olelo hooholo:  Allen, Bacon, Bate, Derby, Caffery, Chilton, Gray, Daniel, Faulkner, Jones o Nevada, Lindsay, McEnery, Mallory, Mitchell, Morrill, Pasco, Pettigrew, Roach, Turley, Turpie, hite—21.

 

NA KOMISINA I MANAOIA NO KA HOOPONOPONO ANA I NA KANAWAI NO KE AUPUNI HOU.

            Ua manao wale ia, ela ana ke Komisina na lakou e hooponopono i na kanawai o ke Aupuni hou o Hawaii nei:

            W. O. Kamika, a i ole ia, o W. A. Kini o Honolulu nei, ame Keoni Likikini o Maui; M. M. Estee o Kaleponi, me N. W. McIvor, i noho Kanikela-Kenerala mua ai no Amerika Huiia ma Iapana, a e noho nei i keia wa ma Cedar Rapids.  A o ka elima o na hoa, ua manaoia e hele mai ana ia mai Makakuseta mai, a i ole, mai Minesota mai paha.

 

LANAKILA LOA KA HOOHUI AUPUNI.

Opa Pu ia ka Hui Hoomaemae Kopaa o Kaleponi.

ELEELE AE LA O WHITE, A-ANA-LII KA ULU ANA O PETTIGREW.

            Honolulu, Oahu, Iulai 13, 1898, hora 3:30 o ke ahiahi Poakolu nei—Ua ikeia aku la ka mokuahi "Coptic" e kaalo mai ana i ke Kai o "Kaiwi," mawaho aku o na "limu lipoa" o Kalehuawehe, ua hele a luluu oia i na kahakahana hae mai mua aku o kona laau ihu a hoea i hope, e hoike mai ana ia ulumahiehie ana, ua hooholoia ka ninau a ke "Kilohana Pookela o ka Laliui Hawaii,, i paio hoomaha ole ai.

            Oiai ua mokuahi nei e kaalo mai ana i ka nuku o Mamala, ua haawi mai la oia i ka hoailona hoike i ko ke kulanakauhale nei ame ko uka nei nohoi o ka aina, ua hooholo loa ia ka Olelo Hooholo Hoohui Aupuni mawaena o Hawaii nei ame Amerika Huiia, e ka Aha Senate.

            Ua hukiia na hae iluna o na pahu hae o ka poe kakoo i keia kumuhana.

            Naholo aku la he kaikoo o na kanaka no na pipa uwapo, me ko na houpo piha pihoihoi.

            E holo-ke ana hoi na kanaka ma na alanui me ka pioo nui.

            Hora 4:15 ua kiia na pu he 100 mai ka batari kipu aku o Kakaako.

            Hora 4:20, ua olehala ke kani ana a na oeoe oloko nei o ke Kulanakauhale.

KE AUPUNI HAWAII I KEIA WA.

            Ua manao loa @a, e hoomau aku ana no ka Peresidena i ka noho ana o na Luna Aupuni e noho nei ma na Oihana Aupuni apau o Hawaii a hiki i ka wa e makaukau ai na kanawai hou.

            E noho nohoi lakou malalo o na Kanawai o Hawaii e ku nei i keia wa.

KA HOOLIULIU HOOMALU KOA IA HAWAII.

            Ua manao loa ia, e hoounaia mai ana no Hawaii nei, mai Kapalakiko mai, he regimana koa helewawae me elua mau mahele koa pukaa, i lako pono i na pu-kuniahi nunui a oolea kupono, no ka hoomalu ana ia Hawaii nei.

KE KIAAINA MUA LOA O KE AUPUNI HOU.

            Ua manaoia o Peresidena S. B. Dole i keia wa e noho nei, oia aku ana ke Kiaaina mua loa o ke Aupuni hou o Hawaii nei.

KA ELELE NANA E LAWE MAI I KA OLELO HOOHOLO HUI I HAWAII NEI.

            Ke manaoia nei e kekahi poe e kohoia ana o John W. Foster, kela Kuhina Nui o ka Aha Kuhina o Peresidena Harisona, oia ka Elele Aupuni Amerika nana e lawe mai ana i ka Olelo Hooholo Hoohui Aupuni mawaena o Hawaii ame Amerika Huiia, elike me ia i aponoia e ka Aha Senate, no Hawaii nei, maluna mai o ka mokukana Piledelepia.

HE KANAWAI E HOOMANA ANA I KA HUKIIA ANA O KA HAE AMERIKA MA HAWAII NEI.

            Mahope koke iho o ka holo ana o ka Olelo Hooholo Hoohui Aupuni, mawaena o Hawaii nei ame Amerika, e ka Aha Senate, ua hooholo koke ia kekahi kanawai e ka Ahaolelo e hoomana ana i ka hukiia ana o ka hae Amerika ma Hawaii nei, e kekahi Komisina Kuikawa.  ma kona wa e hukiia ae ai ma ka pahu hae Aupuni o Hawaii nei, oia ka wa e haawi aku ai ka mokukaua Piledelepia i na pu aloha.

 

KA MEA HUNA POHIHIHI

Unuhiia e Hoou@mahiehie no "Ke Kil@ha@a Pookela o ka Lahui Hawaii"

            I keia wa i lohe iho ai ua Beatirisia nei i ka leo o kana kane, a o kona wa nohoi ia i puliki iho ai iaia.

            Ua pili malie iho la ke kane ame ka wahine i kahi ame kahi me ko laua pane leo ole ana ae.  A hala kekahi wa o ko laua ku ana ma ia ano, ia wa i hooho malie ae ai o Beatirisia:

            "E kuu aloha, e kuu aloha, pehea la oe i aa ai e hele mai i o'u nei i keia wa, ka wa hoi i hoopuniia ai kaua e na lona huhu ame ke aloha ole.

            Alaila, wehe ae la ua kumuao nei o na leo mele i ka makaaniani e kau ana ma kona mau maka, a ike maopopo loa aku la o Beatirisia i na onohi maka uliuli o kana aloha.

            He mea oiaio, aole keia he kanaka e ae, aka, o Geofere Tereveliana no ia, i komo i ka aahu hoanoe, a i hoanoe i nohoi i kona helehelena.

            I kela wa hoi, i hopu aku ai o Beatirisia i kana kane me ka hooho ana ae me ka leo aloha, oiai hoi na waimaka i hiolo iho ai ma kona mau papalina:

            "E kuu aloha, e kuu aloha.  Pehea la i hiki ai la oe ke hele mai ia nei iloko o ka lua o ka liona?

            Nolaila, e kuu makamaka heluhelu, ke ike ae la oe, eia ke kane ame kana wahine ke huipu nei i keia wa maloko o Hametona Kakela, a ua hiki nohoi ia ia oe ke hoomaopopo iho, aia maloko o na paia o Hametona Kakela i keia wa, ke akoakoa nei ka poe i pili ano nui loa iloko o keia moolelo, oia hoi ka Haku Tereveliana, ka Haku@ hametona, ka Makai Kiu, ame Beatirisia ma nohoi, o ka poe wale no i koe aku oia na keiki a Beatirisia ma, ka Haku Rosevena ame na kauwa lawelawe a lakou, me kela lapuwale nui nohi, oia o Adelo.

            @e oiaio, eia ke kane ame ka wahine ke hoomaha nei i ka ikiiki o ko laua mau manao aloha no kahi ame kahi, nokamea, eia laua i keia wa, a pela hoi me ka laua mau keiki iloko o k pilikia, elike nohoi me kau i ike ae nei e kuu makamaka heluhelu me ka hoohewahewa ole.

            O ke ano apau o Geofere i hele mai ai i Hametona Kakela, ma ke ano no ia, ua komo oia i ka aahu huna, a ua hunaia kona mau ano apau, a ma ia ano ua hiki ole i ka poe i kamaaina mua iaia ke ike aku oia no ia i komo mai ai iloko o Hametona Kakela.

            "E kuu Beatirisia," wahi a Geofere i pane mai ai i kana wahine mahope ino o kona wehe ana ae i kona mau maka aniani, a pela hoi me kona lauoho ku i, "e kuu aloha, ua hiki no ka ia oe ke ike mai ia'u me keia mau mea hoano e aa'u i hana ai?"

            E kuu Geofere, mai ike ole no au, ina aole au i ike mua mai nei i kou lima kakau maluna o kahi palapala i lawe ia ae nei ia'u.  He mea ioaio, ua nalo maoli kau huna ana ia oe iho, aka, aole nae ia he mea no'u e hoomamaia mai ai i ko'u hoomaopopo ana iho, eia oe ke noho nei iloko o ka hale a kaua i noho ai me ka hauoli i na wa i hala ae, ma ke ano he mea kino uhane oe i hoowahawaha loa ia e ko ke ao nei apau.  E kuu aloha, pehea ke keiki a kaua.  A i ole, e hai mai oe ia'u i ka moolelo e pili ana i ka olua huakai hele ma ka wa a olua i haalele iho ai ia Evergreen Home, ma kela po a ke aloha ole i hoea ae ai i o kaua la, me ka hilahila ole ame ka puuwai makona nohoi?"

            Ma kela wa, pane mai la o Geofere:  "E Beatirisia, ia maua i haalele iho ai ia oukou, ua hele aku la maua no ka home kuaaina o ka Haku Opio Rosevena, elike me kana i kuhikuhi mai ai.  Ua hoea aku la nohoi au ame Mirande no ia wahi.  He oiaio, he wahi maikai io maoli no ia.  He wahi maluhia.  Aka nae, ua hookoloia ae no au a loaa ilaila."

            "Pehea," wahi a Beatirisia i hooho ae ai me ke pihoihoi nui, "ua hookoloia aku no @e a hoea ilaila?"

            "Ae.  Ua ike au i ke@a kanaka—a ke manao loa nei no au, o ka Makai Kiu ia a Adelo—a e kiai ana ia i ka hale me ka hakilo pono loa ana.  Nolaila, na haalele aku la au i ka hale, me ka malu loa, a hele mai la i Ladana nei i ka po nei.  O Mirande no kekahi.  I ko'u hiki ana mai ia nei, ua komo iho la au i keia aahu au e ike mai nei ia'u, a hele koke mai nei no au e ike la oe.  Ua manao nohoi au e kakau palapala mai ia oe, aka, aole nae e hiki, oiai, he nui loa ka'u mau mea i makemake ai e hoike aku ia oe, a nolaila, hookahi wale no a'u hana kupono i manao ai e hana oia ka hele ana mai e hui a e halawai kino me oe, a e kamailio pu kaua no kaua iho ame na keiki a kaua."

            Ma keia wa, ua kulou iho la ko Beatirisia poo ilalo, a me he mea la e noonoo ana oia i kekahi mea ano nui, @a wa nohoi, ua haikea ae la kona helehelena.

            Ua ulu mai la keia noonoo ana iloko o ua Lede Beatirisia nei ua lohe ia i ka olelo ana mai a ka Makai Kiu ua pau kona noho hana ana malalo o Adelo, alaila, ke hana nei ka paha kela Makai Kiu ma ke ano imi dala nona ponoi iho, oia ke kumu o kona hele huli ana i kahi e loaa ai kana kane ame kekahi o ka laua mau keiki.  Ike iho la o Beatirisia me ka maopopo loa, o keia ke kumu nui o ko ua Makai Kiu nei hookolo loa ana mahope o ka meheu o kana kane.

            A oiai hoi o Beatirisia e noonoo ana, ia wa i pane mai ai o Geofere i kana wahine:

            "E Beatirisia, ke ike aku nei au ma kou mau helehelena, he nanaina piha hopohopo ame ka maka'u.  E hai aku au ia oe, e kuu aloha, no keia wa, aohe hopohopo ana, oiai, he wahi maikai ko maua e noho nei.  Eia maua i keia wa maloko o kekahi mau rumi elua maluna ae o kekahi halekuai o na mea kani, a ua kau au ma ia wahi i ko'u papa inoa e hoike ana he kumu a'o au no na hua mele, a nolaila, ke manaolana loa nei au, aole au e ikeia ana.

            I kela wa huli aku la o Beatirisia a nana pono aku la i kana kane, me ka haloi ana ae o na waimaka ma kona mau maka, pane aku la:

            "Pehea la o Mirande?  Heaha la kona manao no keia mau hana, oia ko kaua haalele pupuahulu ana i ko kakou home—ae—ka home hoi i pili aloha ia ai e kaua—pehea la kona noonoo no keia mau hana huna ana o kaua iho me na aahu ano e, a heaha la hoi kona noonoo no'u nei no kona makuahine, ma keia wa a ka popilikia i kau mai ai maluna ou ame @a, i kona nana ana iho aole au ma kou aoao e auamo pu ana me oe i na ehaeha apau?"

            Ma ia wa hoi, paa mai la o Geofere i ka lima o kana wahine a pane mai la:

            "E kuu Beatirisia aloha, mai pihoihoi kou noonoo no ia mea, aka, e hai aku nae au ia oe, he mea oiaio, ua nui launa ole ke kaumaha i kau iho maluna o kela keiki uhane maemae nou, a no'u nei nohoi, a pela me kona kaikuahine ame kona wahi pokii kaikaina.  Ma ka po nei he uwe wale no kana hana.  I keia wa nohoi, ua hele kona helehelena a ano e, he kohu ma'i ke nana aku.  I keia kakahiana nae, ua ike aku au e mohala mai ana maluna ona he hiohiona o ke kuoo, a ua nalohia mai iaia aku kona ano kamalii.  Aole nae oia i kamailio mai i kekahi huaolelo ia'u.  Aole oia i ninau mai nou.  Ua maopoop loa ia'u i keia wa, ua komohia iloko ona kekahi noonoo ana, aia no he m@ huna

 

(E nana ma ka aoao elua.)