Ka Nupepa Kuokoa, Volume XXXVII, Number 35, 2 September 1898 — Page 1
| This text was transcribed by: | Nadine "alohatita" Samorano |
| This work is dedicated to: | Harry Kaiana Pali, Sr. |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXXVII. HELU 35. HONOLULU, POALIMA, SAPATEMABA 2, 1898. NA HELU APAU 2718.
Hooloha Loio.
W. R. KAKELA.
Loio a he Kokua ma ke Kanawai.
HE LUNA HOOIAIO PALAAPLA.
@
LYLE A. DICKEY.
Loio a he Kokua ma ke Kanawai.
Notari no ka Lehulehu.
Kihi o Alanui Betela me Moi. Pahu Leta 286.
Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.
E hookoia na hana pili kanawai apau mai na Mokupuni mai.
O. A. F. Tavares, Kakauolelo, Maheleolelo a Notere no ka Lehulehu. 1yr.
-----
Hoolaha Kumau.
-----
Papa! Papa!
Aia ma kahi o
LEWERS & COOKE
(Lui Ma)
Ma ke Kahua Hema o na Alanui Papu me Moi.
E LOAA NO NA
Papa Nouaiki
O kela a me keia ano.
Na Pani Puka.... ---
Na Puka Aniani... ---
Na Olepelepe.... ---
Na Pou............. ---
--- Na O'a.............
--- Na Papa Hele...
--- Na Papa Ku.....
--- Na Papa Moe..
Na Pili Hale
O na Ano apau.
A me na
Wai Hoohinuhinu Nani
O Na Ano Apau.
Na Palaki o na Ano he Nui Wale.
Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka
Uku Haahaa Loa
E like me ka mea e holo ana mawaena e Laua a me ka Mea Kuai.
-----
E Hale Mai e Waa no Oukou Iho.
-----
He mea pono i kela a me keia ohana ke loaa ona laau lapaau mamau o na ma'i o ka opu. I laau lapaau puhili no ka "Moku ino loa o ka lepo" (Diarhea) Nahu, Umii Kolera ame na ma'i apau o ka opu, aole he laau lapaau oi aku o ka maikai aelike me ka PERRY DAVIS LAAU PENIKILA (Pain Killer). Ua lawelaweia keia laau no na makahiki he kanalima, a ke ka hana mau ia nei i kela ame keia la, ma na ina apau o ka honua nei. O ka Hui Kuai Laau Lapaau o Hollister ka Agena.
-----
THE SIEGE OF MANILA.
This picture shows the disposition of the defending and attacking troops at Manila. Brigadier General Anderson divided his forces into two brigades, Brigadier General Green being placed in command of the second.
KA LAWEPIOIA ANA O MANILA.
O ke kii maluna ae e hoike ana i ke kulana o na lawelawe kaua ana ma Manila. Ua mahele ae o Brigadier General Anderson i kona pualikoa i elua mahele, a ua hoonohoia o Brigadier General Greene ma ka lua o ka mahele, a pela iho la i lilopoio mai ai o Manila.
-----
KA MEA HUNA POHIHIHI
Unuhiia e Hooulumahiehie no "Ke Kilohaua Pookela o ka Lahui Hawaii."
MOKUNA XLIII.
Ka Luaui ame ka Ipo.
Ma ka mokuna i hala ae nei i ike ai kaua, e kuu makamaka heluhelu, i ka noho ana o Alamira ame kona wahi pokii kaikunane malalo o na kiai ana a Mrs. Biti, kana kane ame kahi kauwa a Adelo.
Nolaila, ehuli ae ana kaua a nana aku i keia wa no ka Haku Rosevena.
Ma ka manawa i haalele ai o Alamira ia Tereveliana Pa, ma ka po o keia ahiahi i huipu ai oia me Alamira, ma ka wa hoi ana i huli hoi mai ai mai ka home mai o na makua mai o Alamira, aole ia i hoomaopopo iki, ua haalele iho kana aloha, oia hoi o Alamira, ia Tereveliana a, a hoea wale i ke kakahiaka o kekahi la ae, ma ka wa ana i kipa hou aku ai i Tereveliana Hale, elike hoi me ka mea i hooholoia ai e ia ame kana aloha, ma ke ahiahi mamua iho.
I kona hoea ana aku i Tereveliana Hale a halawai pu iho la me ka Haku Tereveliana, ua ike aku la ia he mau helehelena ano e loa ko ua elemakule la.
Hoomaopopo iho la keia i ke kumu nui o ke ano e ana o na helehelena o ua elemakule la, mamuli o na mea ana i hoike mai ai imua ona, oia hoi, ko Alamira haalele ana mai iaia.
Ua noke hoi oia i ka huli e loaa kana hanai ma na wahi apau e kokoke mai ana i Tereveliana a, aole nae he wahi mea a loaa, a ua manao wale iho ia, uah oi aku ua moopuna hanai la ana i aloha loa ai me kona naau apau i Ladana, kahi o kona luaui makuahine.
A mamua nae o ka hooki ana iho o ua Haku Tereveliana nei i kana olelo ana mai i ka Haku Opio Rosevena, ua pane mai la ia:
"Ua maopopo nae ia'u, aia pu me ia o Mrs. Pumetona, a na ia mea i hoomama mai i ko'u noonoo kaumaha, aole ia i komo iloko o na lima o kekahi kanaka puuwai lokoino; a nolaila, ua palekana oia. E imi aku ana au iaia, a ina aole oia e loaa ia'u, alaila, e hoolimalima aku ana au i makai-kiu akamai loa e huli aku iaia. E haalele iho ana au ia Tereveliana Pa nei, a e holo aku ana au i Ladana."
Aole hoi ka Haku Rosevena i hoike aku i kona manao imua o ka Haku Tereveliana, aka, ua loaa iho la ia wa he mea nana e noonoo nui ai no kahi a Alamira i hele aku ai, me kaukali ia ana e Mrs. Pumetona.
A mamuli hoi o kana mea i hoomaopopo ai, a @ ke maoli ai no ke kulana oiaio e pili ana i na makua o ua mea la ana ialoha ai, ua maopopo iho la no iaia, aole oia (Alamira) i hele aku i Ladana.
Ua hai aku nohoi oia ia Alamira, ma ke ahiahi mamua iho, ua haalele kona mau makua ia Evergreen Home, nolaila, ke ike la no ia ma ia wa, aole no o Alamira i hele aku ilaila.
A i kona hoomaopopo ana iho hoi, ua hele pu aku o Mrs. Pumetona me ia, manao iho la ia, ua ahai loa ia oia e Mrs. Pumetona i kekahi wahi mehameha, i kupono no ka noho ana no kekahi wa, a .... i ka loaa ana ia Alamira he manawa maikai no ka huipu hou ana me kona mau makua, a no ia mea hooholo iho la ia, he mea pono iaia ke ike a e huipu me Mrs. Pumetona i loaa ai iaia ka ike no ko Alamira wahi i laweia aku ai e ia.
"Makemake loa au," wahi a ka Haku Tereveliana i pane hou mai ai imua o Rosevena, me ka leo ano haalulu, "e hoike mai nohoi oe ia'u ke lohe oe i kahi mea e pili ana iaia. He mea maopopo loa, aole he mea i koe mawaena ona ame oe. Aole loa oe e mare ana me ke kaikamahine a Geofere Tereveliana."
"E kuu Haku," wahi a Rosevena i pane aku ai me ka ninau ana aku, "Heaha hoi ke kumu nui e hiki ole ai ia'u ke mare me ia? E hai aku au ia oe i ka mea oiaio, ua aloha au iaia, a ua loha nohoi oia ia'u. Ua paa ko maua aloha i kahi ame kekahi. No ka mea hoi e pili ana i kona makuakane, e nai aku au ia oe, e kuu Haku, oia kekahi o na kanaka hanohano a maemae loa o Ladana nei, a he kanaka hoi ia i imihalaia, ma ke ana kiekie loa. E hiki mai ana ka la e ike ai oe i ka mea oiaio loa, a oia hoi ka la nana e hoike mai ia oe, ua hana aku oe i kekahi hana hewa loa i kekahi o na mea ola uhane maemae loa i hanaia e ke Akua. Ea, e kuu Haku, he hora weliweli lua ole nou, ka hora e hoea mai ai ka wa e ike ai oe i ka oiaio maoli."
Me ke ano pahaohao loa, ninau mai la ua elemakule nei ia Rosevena:
"Alaila, aole ka paha oe e kala i ike ai i na mea e pili ana i na makua o Almira? Aole ka paha ia he mea hou ia oe i keia kakahiaka?"
@ane aku la hoi o Rosevena ma ka hooia ana, aole ia he mea hou iaia, oiai ua lohe mua no oia ia mea mai a Alamira mai.
"Ua hoike mua mai o Alamira i ka moolelo piha e pili ana i kona mau makua, ma kela po a'u i hoopakele ai iaia, mai loko mai o kela hale ma ka lae kahakai, he mau mile wale no ka mamao mai ko'u wahi-aku. Ua hai mai nohoi oia ia'u aole loa oia i ike o Geofere Tereveliana kona makuakane, a hiki wale i ka wa i hoea ai olua i Ladana. Aole no i ike i kona mau makua i kona hele ana mai ia nei, aka, mamuli o kona aloha i kona makuahine, no kona lohe ana, aia oia maloko o ka hale opera kahi i himeni ai i mea e loaa ai ke ola ia lakou, nolaila, ua manao oia e imi i hana nana ponoi iho i mea e hiki ai iaia ke malama iaia iho ame kona mau kaikunane, a hoomamala ae hoi kona makuahine. Na ka lima lokomaikai o na lani i alakai mai iaia i ou nei."
Ma ia wa i ike aku ai ka Haku Rosevena i ka haloi ana ae o na waimaka ma na maka o ua Haku Tereveliana nei, alaila, pane ae la:
"Nani ka maemae o kona uhane."
Me kahi leo hawanawana uuku, pane ae la ia:
"Ua maopopo no ia'u he aloha no ko Alamira ia'u nei, kona kupunakane."
"E kuu Haku, e hai aku au ia oe, aole hooki iki o Alamira i ka mahalo ana ia oe. E hoike mau mai ana oia @ a nui o kona aloha ia oe. He oiaio maoli kona alohja ia oe. A o kona kipakuia ana mai keia wahi aku, manao au, oia kekahi hana lua oie o ka hewa i hanaia aku maluna ona.
"O! E kuu Haku, e hoomanawanui mai oe ia'u. Ae na'u ponoi no i kipaku aku iaia aka, iloko o ka ulupuni i ka huhu i hana aku ai au ia hana. O! O! Ua mihi au ia hana hehena a'u i hana ai. Aka, e kuu Haku, ua ike anei oe ia Geofere?"
"Ae; ua ike au iaia."
Alaila, huli aku la ua elemakule me nei i kahi e, a noho iho la me ka pane leo ole no kekahi wa, a mahope kulou iho la kona poo moluna o kona mau lima e paa ana i ke kumu o kona kookoo.
A ha'a he mau minute; alaila, aea hou ae la ia iluna, huli aku la no kona mau maka i kahi e, a ninau mai la ia ia Rosevena:
"ehea la kona ano?"
Alaila, hoomaha iho la ia no kekahi mau sekona a ninau hou mai la:
"Heaha la kana olelo no'u?"
Pane aku la hoi o Rosevena:
"O kona mau helehelena, ua ano aoo iho ia i keia wal O kela ano opiopio ui ona o kona mau la opio, i mahalo nui ia ai e makou, he kanaka ia o ke kulana kuoo a nanaina hiehie i keia wa. O kona mau ano apau, e hoike ana no ia, he kanaka oia i maemae kona lunaikehala. Aohe ana mau huaolelo maikai ole nou nei."
Ua hanu kaumaha iho la ua elemakule nei.
"Aole paha o Alamira kana keiki hookahi wale no me kana wahine?" i ninau mai ai ua elemakule nei.
"Aole, Aka, he mau keiki e ae no kana. He mau keikikane laua. O kahi keika muli, he wahi keiki nanaina kohu kaikamahine ia ke nana aku, me he mea la, e lilo ana ia, ma keia mau mua aku, he kanaka haku-mele."
"A pehea hoi ke kaikuaana?"
"He kanaka kulana hanohano ia, e kuu Haku. He umikumamalima paha ona mau makahiki i keia wa. He kanaka kino loihi maikai. He mau onohi maka eleele kona elike no me kou, pela no me ka lauoho, he eleele nohoi e like me kou."
"Alaila, e olelo mai ana oe ia'u, e kuu Haku, ua like loa kona ano me ko'u. He keu no ka hoi a ke kupaianaha! Owai la kona inoa. O kona inoa Sepania a'u i lohe ai o Mirande; aka, ua hai mai nae o Geofere ia'u, ua kahea oia iaia o Walter Rupert."
"Auwe!" i namunamu ae ai ua elemakule nei. "o kuu inoa no ia. Ua kahea ka laua i keia keiki i kuu inoa Walter Rupert."
"Ae. He mea ia e hoike mai ana, aole i pau ke aloha o Geogere Tereveliana i ka mea nana oia i malama i kona wa makua ole. E hoike mai ana nohoi ia i kona lawehala ole ana i ke kino nona ka inoa ana i hea aku ai maluna o kana keiki. Ina paha oia i hana hewa ia maoli maluna o kou kino, e kuu Haku, elike me kau i hooholo kuhihewa ai, e aa ana no anei kona uhane e hea i kou inoa maluna o kana keiki i lilo ai kela ame keia hoopukaia ana e oia inoa, i mea e hoalaia mai ai na hoomanao poina ole ana o ke karaima ana i hana ai ma kela po weliweli i loohia ai oe, e kuu Haku, i ka poino, a i aneane loa ai hoi kou ola e kailiia mai a oe aku? E kuu Haku, e hai aku au ia oe, me ka oiaio loa, ame ka hookamani ole nohoi, ua alakai hewa loa ia kou noonoo, a o ke kanaka i alakai hewa i kou noonoo, a hoohuli ai oe i kou inaina e kau aku maluna o Geofere, oia no o Adelo. O keia maoli ka mea oiaio, ma ka'u hoomaopopo ana."
Aka, ua luliluli ae la ke poo o ua elemakule nei, a pane mai la ia:
"Ua loaa ia Geofere he kakou ikaika ma ou la, e kuu Haku. Ua alakai hewa loa oia i kou noonoo: aka, aole hiki iaia ke alakai hewa aku i ko'u noonoo. O ka'u wale no e olelo ae, ina e hoi mai o Alamira me a'u, alaila, aole loa ae e hoopii aku iaia imua o na Aha Kanawai no ka hana ana i hana mai ai maluna o'u. Aohe mea hou aku i koe a'u e hana ai nona. O ke kala ana'ku iaia he mea hiki ole loa ia ia'u ke hana."
Aole i hooloihi loa iho ua Haku Opio Rosevena nei i kana noho ana me Tereveliana Hale. Ua haalele iho la ia ia laila, a hooholo iho la ia, aole ia e hoomaka koke i kana huli ana no kana mea i aloha ai.
Nolaila, o kana hana mua, mahope iho o kona ninaninau ana i kekahi o na kauwa o Tereveliana a, no kona kamaaina i ka ohana o Mrs. Pumetona, oia kona holo pololei loa ana'ku no kahi o ua ohana la o Pumetona, eia nae aole hiki ia lakou ke hai mai i kahi mea e pili ana iaia.
Ma ke ahiahi o ua la @la, huli hoi aku la ia i ka Hale-o-ka-maka o ka Aeto, me ka manao e loaa ana iaia he palapala mai a Alamira mai, aka, i kona hoea ana'ku i ka hale, aole i loaa ka me n@i makemke ai."
Ia po a hoea i ka wanaao, ua kau hou aku la ia maluna o ka hokua o kona lio.
E hoomanao oe, e kuu makamaka heluhelu, o keia no ke kakahiaka o ka la i halawai pu ai ka Haku Adelo me Mrs. Pumetona, iaia e huli hoi mai ana mai Daletona mai, a ma ke ahiahi no hoi o keia la i ike ai kaua, e ka makamaka heluhelu, i ka paa pio hou ana o Alamira ame kona wahi pokii kaikunane ia Adelo, a laweia ai laua i kela hale kanaka ole, e kokoke ana i kahi kulanakauhale o Karedifa.
Mai ka wanaao aku o keia la, ka noke ana o ua Haku Opio nei i ka huli no kahi e loaa ai o Alamira ame kona wahi pokii, a i ole ia, o kekahi paha o laua, a hiki wale i ke ahiahi, aole i loaa iki iaia. Nolaila, huli hoi aku la ia i ka hale me ka naau kaumaha a luuluu hoi.
I ke kolu mai o ke kakahiaka, oia hoi ke kakahiaka i hoea aku ai o Adelo ma no kahi hale kanaka ole, a oia nohoi ke kakahiaka i loaa mai ai i ka Lede Beatirisia k palapala mai a Alamira mai, oia ke kakahiaka i hoea mai ai ka Haku Rosevena i Tereveliana Pa.
Ua holo mai oia i laila no ka hoomaopopo ana, ma ke ano hoomaoe, ina paha ua lohe ka Haku Tereveliana, a i ole ia, o ka Haku Adelo paha i kahi mea e pili ana ia Alamira.
Ua hai mai la nae ke kanaka a-i puupuu nui o ka Hale, ua hala ka Haku Tereveliana i Ladana, aole hoi i ikeia aku ka Hake Adelo ilaila mai ka po i nalowale ai o Alamira, aka, he elua nae ana manawa i ike ai i ka hoea ana 'ku o Wigebi, kona kanaka, ilaila.
Aole hoi o Mrs. Pumetona i hoea mai i ka hale ia wa, oiai, ua hoi mai la oia a hiamoe mai la i ka hale makamaka, i ka po mamua iho o ka la a ka Haku Rosevena i hoea hou aku ai i Tereveliana Hale. Aka, hookahi hora mahope iho o ka haalele ana iho a ka Haku Adelo ia Tereveliana Hale, hiki mai la o Mrs. Pumetona i laila.
Ma keia la, ua noke hou nohoi ka Haku Rosevena i ka hele huli ana no ka mea i aloha ai, a hoea i ke ahiahi, aole no he loaa iaia. Ua hoi aku la ia i ka hale, me ka nui o ka pono ole o kona noonoo, e hakoko ana iloko o kona umauma.
I kona hoea ana'ku i ka hale, hoi aku la ia a maloko o ka rumi a kana aloha i hiamoe ae, ma ka po ana i hoopakele ai iaia mei ka hale mai o Mrs. Bite, noho iho la ia, a olelo iho la ia iaia iho:
"Me he mea ia, ua loaa hou paha oia ia Adelo; nokamea, ina paha aole ia i paa iaia, ina no ua loaa palapala mai au nana."
I ka hala ana o kekahi wa o kona noho ana maloko o ua keena la, ua hoi mai la oia no ka rumi hookipa, ma ka puka aniani opuu o ua keena ia, noho iho la ia. Nana aku la ia iwaho, a ninau ae la:
"Auhea la oe, e kuu aloha? Aole anei hoi e loaa mai ia'u mai a oe mai, i mea e hoike mai ana i kou wahi e loaa ai ia'u?"
I keia wa no i komo mai ai ka wahine malama hale, a he palapala kana o ka lawe ana mai.
"E kuu Haku, i kakahiaka nei ka hoea ana mai o keia palapala, mahope koke iho no o kou hala ana 'ku."
(Aole i pau.)
-----
MAI KE ALAHELE MOANA MAI A NA KOMISINA.
Ua loaa mai ia makou ka lohe, ua hui a ua kuka kamailio pu iho la o Komisina Mogana me Keoni Likikini. J. M. Kaneakua ame D. Kalanokalani, na Elele Hui Aloha Aina ame Hui Kalaiaina, ma ke alahele moana, mawaena o Oahu nei ame Lahaina, maluna o ka oneki o ka mokuahi Clau@@@e. A ma ia kuka kamailio pu ana, ua hoike aku o Mogana i na Hawaii, o kekahi hana nui a na Komisina oia ko lakou makemake ana e lohe i ka leo o na kanaka Hawaii i mnea e hiki ai lakou ke hookomo iho maloko o ka lakou hoike a waiho aku imua o ka Ahaolelo Nui o Amerika Huiia. Ua hooia pu aku hoi oia imua o na Elele Hawaii, aia ma ka wa a ke Komisina e hoea hou ai i Honolulu nei, e haawi mai ana lakou he wa pono e loheia ai ko na Hawaii mau leo imua o lakou, no na mea a lakou i makemake ai e waiho aku imua o lakou.
Eia ka wa maikai e hoakoakoa ai na Hawaii ia lakou iho, a noonoo pono i na mea e waiho aku ai imua o na Komisina.
-----
KA MOOLELO A KE KANAKA AMARA.
No kona nawaliwali loa, ua aneane hiki ole iaia ke hana - Ua hu'i kona kino holookoa i ka eha.
(Mai ka Bridgewater Enterprise mai.)
He kanaka ku'i amara kamaaina loa o Mr.
Austin Fancy e noho ana ma Baker Settlement, he wahi kauhale he aneane umi mile mai Bridgewater. N. S. aku. He kanaka kamaaina loa ia o Mr. Fancy ma na kaiaulu o kahi ana i noho ai. Oia kekahi i komo iloko o ka heluna ligiona o na poe i loaa hou ke ola mamuli io na Huaale Akala a Dr. Williams, a loaa hou hoi kona kaulana. Ua hoike mai o Mr. Fancy i ka moolelo o kona ma'i ana ame ka loaa hou ana o ke ola iaia i ka mea kakau o ka Enterprise, penei: "Iloko aku nei o ke kau hooilo, mamuli o ka hana nui loa ame ke koko inoino, ua hoowiwi loa ia ko'u kino, a loohiaia iho la au i ka eha ma na wahi apau o kuu kino. E malohi mau ana nohoi ke kino i na wa apau, ono ole ka ai, a pinepine loa ka mamake mau ana o ko'u noonoo, a manao iho la au, he mea pono ia'u ke hele aku ma kela aoao. I kekahi wa, ua kono ikaika loa ia au e hana i wahi hana iloko o ka hale amara a mahope iho hoi o ka hana ana i kahi hana, e moe ana au ilalo, me he mea la e maule aku ana au. Ua oleloia mai la au e hoao i na Huaale Akala a Dr. Williams, a mahope iho o ko'u ai ana i na huaale o kekahi mau poho, ua ike iho la au i ko'u oluolu. Emi mai la ka hu'i nui ana o ka eha, a maikai hou mai la ko'u ola, a lana ae la ka manao me ka hauoli. Ma ka wa i pau ai ia'u na huaale o na poho eono, ua ola loa au, a hiki ke hana me ka ikaika i ka ia holookoa, ma ke @kapuahi hao me ka luhi ole, a o ka poe i kamaaina i ka hana a nei mea he amara, e ike ana lakou i ke ano o ka'u mea e olelo nei. O ka poe i loohia i ka ma'i, he mea pono ia lakou ke imi i oia no lakou iloko o na Huaale Akale a Dr. Williams.
E hooia ana na Huaale Akala a Dr. Williams i ke kumu i loaa mai ai ka ma'i. E hooikaika hou ana lakou i ke koko, a hooikaika i na aa loio, a pela e kipakuia aku ai ka ma'i mailoko aku @o ke kino. Mai lawe i na huaale i hoohalikelike wale ia me keia, ma ke koi ana: o kela ame keia poho ua owiliia maloko o kekahi wahi i paa i keia mau huaolelo, "Dr. Williams' Pink Pills for Pale People."
-----
Ua hoohana mau makou i ka Laau Kunu a Kamalena maloko o ko makou hale, no na makahiki he lehulehu, a ke hoike aku nei me ka hauoli no kona waiwai io ma ke ano he laau kupono loa ia no ka ohana. No ke kunu ame ke anu, ua ike makou i kona kupono, a no ke kunu no ame ke kunu kalea o na keiki liilii, manao makou aohe ona lua. - H. P. Ritler, 4127 Fairax Ave., Sana Lui, Mo. E kuaiia ana e na poe Kawili a Kuai Laau Lapaau apau. O Benson Smith & Co., na Agena no ko Hawaii Pae Aina.