Ka Nupepa Kuokoa, Volume XXXVII, Number 50, 16 December 1898 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Hui Alahao me Aina o Oahu

MA A MAHOPE AKU O IUNE 13, 1898

 

Manawa Holo

 

WAHI HOOLULU. (Mai Honolulu aku,)

 

Waianae, kaa huikau, na la apau koe-ke Sabati.

 

Waialua, kaa ohua, na la apau.

 

Waianae, kaa ohua, na la apau.

 

Wili o Ewa, kaa ohua na la apau.

 

                        A.M.    A.M.    P.M.    P.M.

Honolulu         7:10     9:15     3:10     5:10

Manana           8:07     9:48     3:43     5:50

Wili o Ewa      8:37     10:08   4:08     6:10

Waianae          9:27     10:53   4:43     -

Waialua                       12:00   5:38     -

 

WAHI HOOLULU. (Mai waho mai a i Honolulu.)

 

Wili o Ewa, kaa ohua, koe ke Sabati.

 

Waialua, kaa ohua, na la apau.

 

Waianae, kaa ohua, na la apau.

 

Waialua, ka aohua, na la apau.

 

Wili o Ewa, kaa ohua, Sabati wale no.

 

                        A.M     A.M.    A.M.    P.M.    P.M

Waialua           -          6:12     -           2:39     -          

Waianae          -           7:12     10:09   3:55     -

Wili o Ewa      5:50     7:47     10:59   4:32     12:45

Manana           6:15     8:07     11:34   4:52     1:10

Honolulu         6:50     8:40     12:15   5:26     1:45

 

G.P. DENISON,

            Luna. F.C. SMITH

            Luna Kuai Palapala Holo

 

NU HOU HAWAII

            E nana ae i ka moolelo e pili ana i ke Kau Kiure o Lahaina ma ko makou pepa o keia la

 

            Ke manaoio loa ia nei ma Honolulu nei e hoomoeia aku ana na uwea telepona o Honolulu nei malalo o ka lepo.

 

            E nana ae i ka makou mau mea hou mai ka Makani Apaapaa mai o Kohala Akau, ma ko makou pepa o keia la, malalo o ke poo "Na Leta."

 

            O ka manao hoalohaloha e pili ana ia Mr. Haole mai a Mrs. Haole Waiau mai, ua ka-ua iki ia a puka aku ma ko makou pepa o keia pule ae.

 

            E wehe ia ana he hoikeike nui o na kii kaua mawaena o Amerika ame Sepania iho nei, ma ke ahiahi o ka Poaono, Dek. 24, maloko o ka Hale Mele Hou.

 

            Eia ma ko makou pepa o keia la, he manao i hoounaia mai e Mr. T.K.R. Amalu o Hokena, Kona Hema, Hawaii, e pili ana i ka "Hoikeike o na mea Ulu ma Hilo."

 

            He keu a ka mea lapuwale nui wale, oia hoi, ka meeau ame ka maneo, e aai ana i ka ili. Ehoopau i keia mea poino. Ola i ka aila hamo o Doan. Loaa ma na halekuai laau lapaau apau.

 

            Eia ke noonoo nui nei ka Aha Kuhina ame ka Papa Kalepa o Honolulu nei no ka wehe aa i ke awa kumoku o Honolulu nei i awa kumoku nui loa ma Ko Hawaii nei Pae Aina.

 

            No ka piha e ana o ko makou pepa o keia pule me na manao i hoomakaukau mua ia e ko makou poe kakau manao like ole, nolaila, ua kaʻulua ia na manao o na makamaka i loaa mai ia makou a keia pule ae.

 

            Ua lohelohe wale ia i keia mau la iho la, o Chas. T. Wilder, ka mea i noho Kanikela Hawaii ma Kapalakiko mai ka M.H. 1893, oia kekahi moho e paonioni nei no ka Oihana Luna Dute Nui ma Hawaii nei.

 

            Ma ka Poalua nei i holo like aku ai na mokuahi Kinau ame Mauna Loa ma ko laua mau alahele hookahi no Lahaina. He keu keia o na moku hana hoopaipai, eia nae aohe maopopo o ka mea o laua i opaha pono ma nei hana.

 

            Ma ka po Poakolu nei i malama ae ai ka Pualikoa "G" o kakou iho nei he anaina hauoli maloko o ka hale paikau o ke Aupuni, no ka hoohialaai ana no na makana hoohiwahiwa i loaa mai ia lakou no na helu kiekie ma ke kipu ana.

 

            Ma ka hora 12 a oi iki o ka Poalua nei ua hiolo iho la ka lanai piula o ka hale e ku nei ma ke kihi mauka o na Alanui Konia ame Moi, aoao ma Ewa, a waiho kapakahi ana ilalo. O ka lanai holookoa no ma ke alanui Moi. Aole nae he ola i poino.

 

            Ma ka Poaono i hala, ua haawi ae la ke Kuhina Waiwai Samuel Damon he hookipa hanohano a ulumahiehie ma Moanalua, no ka poe kaahele malihini mai na aina e mai i hoea mai nei ia nei maluna o ka mokuahi Garonne.

 

            Mai poina na makamaka i ka hoomaalo aku ma na hana hoike kula Sabati i keia Sabati e, a pela hoi ka hele wale ana aku e hoolohe i ka haiolelo a Lunakahiko Greene ma ka Ariona Hale i ka hora 11 o ke kakahiaka Sabati ae nei.

 

            Ua loaa mai nei ia Mr. Wray Taylor he palapala hoomaikai mai na kaikamahine mai o ka Home Bihopa ma Kalaupapa, Molokai, no ka loaa ana aku o ka piano i hoouna manawaleaia aku ai mai Honolulu aku nei, mamuli o na hooikaika ana a Mr. Taylor.

 

            Mai poina oe ia'u! Karikimaka.

 

            Mai poina oe i ka hele i Kaumakapili i ka la apopo.

 

            He la kuai kudala keia no na moena veleveta ma ka hale kudala o Mr. Morgan.

 

            Eia na nupepa Advertiser ame Bulletin ke aumeume nei no na moho Kiaaina no Hawaii nei.

 

            Hora 2 o ka auina la o ka la apopo weheia na hana o ka Fea ma Kaumakapili.

 

            I keia pule ae ka hauoli Mele Karikimaka. O kakou pu no ilaila i kahi wai o ke aliaalia.

 

            Ua hoopaneeia ka moolelo o ke Aloha o Kuu Makuahine a puka aku ma ko makou pepa o keia pule ae.

 

            Ua lohe mai makou e huli hoi mai ana o Mr. P.C. Jones no Hawaii nei ma ka mahina ae nei o Ianuari, 1899.

 

            Ke ulumahiehie mai nei no na kuai Karikimaka ana o na halekuai o Honolulu nei. O ka oi loa aku i keia pule ae.

 

            Ua lohe mai makou he poe "makai" kekahi e himeni pu ana ma ka Aha Mele e haawiia ana e Prof. Richards me kana poe himeni ma keia mua kokoke iho.

 

            Ua kaa malalo o na hooponopono ana a Rev. ame Mrs. O.H. Gulick na hana o ka fea o Kaumakapili e hoomaka ana ma ka hora 2 o ka auina la o ka la apopo.

 

            Ua hoea mai ma ko makou nei keena o Mr. Hanuna (makua) o Hana, Maui. He ano onawaliwali kona, aka, ua oluolu no nae. Aloha no na pukuniahi o na Kau Ahaolelo mua o kakou.

 

            Ua haawi ae o Mrs. A.F. Judd, Mrs. Chas. Atherton ame Miss Nellie Judd, i huipuia me Mr. Geo. P. Castle o ka Ekalesia o Kaukeano i na hooikaika ma na mea e pili ana i ka Fea o Kaumakapili.

 

            Eia no kahi moku-kuna Malolo ke poai hele mai nei i na ko'a i'a o kakou nei, aole nae i pae mai ka pihi. Hoea nae ia i na Kona, hookui i na makalae o Kohala, aole nae pihi. Mea ia mai ana, apopo pii mai ka pihi. Apopo, apopo, po a ao ae, apopo.

 

            E nana ae i ka nuhou mai Kohala Akau mai, a e ike no oukou i ka pepehiia o kekahi kane e kana wahine oiai e hiamoe ana. O ke kumu o ka hana, he hihio i ikeaia ma ka moeuhane. Nui ka naauao o na hoahanau o ka Hoomana Naauao.

 

            Ua lilo ka mokuahi Australia e ku mai ana no Honolulu nei i keia Poakolu ae i mokuahi kau nui ia e na ohohia ana o na poe he lehulehu. O ke kumu oia no ka hoike a ke Komisina Hooponopono Kanawai no Hawaii nei imua o ka Ahaolelo.

 

            E hiki mau ana ke hilinaiia ka Laau Ola a Kamalena no ke Nahu, Kolera ame ka Hi, a he maikai nohoi ka inu ana, a he palekana nohoi. E kuaiia ana e na poe kuai laau apau. O Benson Smith & Co., Agena no ko Hawaii Pae Aina.

 

            Ua loaa mai ia makou ka lono mai a Cecilia Poepoe mai, e hoike mai ana oia, ina e holopono na mea i hoolaiaia no kekahi aha mele e haawiia ana ma Kapalakiko ma ka pule hope paha o keia mahina, alaila, e hiki ana oia ma ia aha mele mai San Jose aku, oiai oia kekahi mea i poloaiia no na hana himeni.

 

            E malamaia ana ka Hoike Hapaha o na Kula Sabati o ka Ekalesia o Kaumakapili, ma ka hora 9:30 (kakahiaka) o keia Sabati ae, Dekemaba 18, maloko o ka luakini o Kaumakapili. He mau pupu kani oe mai ko uka o Pauoa, malia he mau kahuli leo lea mai ko uka o Maemae, he mau leo uwali nawali aheahe mai ko Kapalama, a pela nohoi ko na wahi e ae.

 

            Ma ka wa e hookomo aku ana ka mokuahi "Malulani" (W.G. Hall) no ke awa o Nawiliwili, ma ke kakahiaka Poakolu nei, ua haue aku ia kekahi o kona mau luina kanaka Hawaii maoli iloko o ke kai, a mahope iho o ka hala ana o na hora 2 a oi ae o kona huliia ana, ua pakele oia. Loaa aku nae, aia kahi hanu i ke ahe a ka makani. Aloha no!

 

            Ma ka wanaao Sabati iho nei, i hoao ia ae ai e puhi i ke ahi ka luakini Haole ae nei, e ole i ike e ia e Laimana Opio, oiai oia ma kona alahele no kana hana mau ia kakahiaka pakele ai, ina paha ua lilo i puu lehu. No ka nele paha i ka mea hana ole, hele wale ae la no ke kolohe e hana i kana hana ekaeka lapuwale. He mea pono e hookolo ia ka meheu o ke kolohe. Elike no paha me ka nee ana o ke au manawa, pela no na hana kolohe a ku i ka lapuwale e ike ia nei.-Ka Elele Hawaii.

 

NA LETA.

NA ITAMU O KE "AHE APAAPAA."

            E ke Kuokoa e; me ka mahiehie:-Eia hou mai no ua ono a kaua o keia mau la huihui a ka Makani Kona e pa lauwili mai nei.

KEPANI HOEHAIA

            Ma ka po o ka la 3 iho nei, ua hoeha ia kekahi Kepani a eha loa, e kekahi mau hoa Kepani no o lakou mauka o Halaula. A ma ke kakahiaka ae la 4, ua hiki aku ka Hope  Makai Nui Chas. H. Pulaa ame na makai malaila, a ma ka noli ana aku me ka waip-he iloko oia aluka Kepani, ua loaa pono aku la, he elua Kepani nana i hana ia hoeha; a ua ae mai laua: "Na laua io no i hoeha i ko laua hoa Kepani."

            A ma ke akahele no o ka nowelo ana, ua maopopo ke kumu i ulu mai ai oia hoeha, oia no ka piliwaiwai.

            A eia ua mau Kepani la ke paa mai nei iloko o "Kulina Eleele," no ke kali ana, a ola pono ae ka mea i eha.

            He pu-a Kepani hou no keia o ka hiki ana mai nei. Alua no mahina, no Kohala Sugar Co., he poe kepa.

WAHINE HOEHA KANE.

            Ma ka po iho la o ka la 6 o keia mahina, ua hoeha aku la o Kamaka (w) i kana kane mare ia Rev. E. Palea o ka "Hoomana Naauao." O ke kui, o ka peku, o ke nahu, he uli ia la o ka ili.

            Ma ka la 7 ae, ua hoopii aku la ke kane i ka Hope Makai Nui, e hopuia kana wahine no ka hoeha, a ua hooko ia aku ia noi, a ua hopuia. A ma ka la 8 ae, ua noho ka Aha Apana no la hihia. A penei ka hoike ano nui ma na aoao elua, wahi ake kane:-

            "Ua hiamoe loa ia au, a i ala au i ka noke ia i ka hehi, ke kui, ke nahu, ame ka huki ia ana o kahi kapa moe, a oni wale iho la no kuu wahi kapa moe, a oni wale iho la no kuu wahi pauku kino. Ia wa, ninau ae la au i kuu wahine: Heaha hoi keia? Pane aku la ka wahine, ʻHeaha hoi keia. Kai no hoi, ike aku nei no au iloko o ka'u haawina moeuhane, i ko hana hewa mai nei no me kuu wahine a'u i enemi ino loa ai. Lapuwale maoli no oe e keia wahi kanaka.' I ole au e holo malu, ina ua make loa au."

            Wahi a ka wahine:-"Ma ko'u wa e moe ana, uoaa aku la ia'u kekahi moeuhane, a ike aku la au i kuu kane nei, e hoopiopio ana me ka wahine a'u e enemi ino loa nei, oia no ka wahine manuahi aia nei e noho kolohe nei, a i loaa pono aku no ia'u i kekahi wa. Ua hoeha io no au i kuu kane. No ka nui no o kuu aloha iaia." O keia ae la ke ano nui e keia hoeha kane: "No ka ike ana ma ka moeuhane, i ke kolohe o ke kane me ka wahine ana i enemi aoli ai i ke ao."

            O ka olelo hooholo o ka Aha ma keia hihia: "Ua hoopaiia he 10 la ma ka hana oolea ma ka Hale Paahao me na Koina."

            He hu no ka aka o keia wahi hoeha. O kane hoi ka mea ihe ia i ka hoopiiia e na wahine i ka hoeha, o keia ae nei hoi, he wahine ka mea hoopiiia.

            "Ahu no kupanaha ia Kohala la."

            He minamina nae, a he kaumaha no keia mokuahana o keia mau makua o kekahi Hoomana e ku nei i keia mau la hope o ke ao nei. Oia nae hoi: "Ma kahi o ka pono, ka aala, ka maemae, aia pu no malaila de Diabolo e paahana ai me ka wale pakelo."

            A ma ka lohe mai, ua olelo ae ua Rev. E. Palea la, aole oia e ae, e pili hou he kane a he wahine no ka manawa pau ole.

            Ea! kapeke paha auanei ka pili a ka nihoniho i ka Oihana Levi? Pela no la hoi i hele kuewa mai ai kela mau makua kahiko, mai ka nani mai o ka Home Edena, no ua wahi Eva la no.

            "Auwe, e ka eha konikoni e,

            O Adamu me Eva."

NO HOME HOOKUONOONO.

            Eia o Mr. Lobenstein ke mahelehele mai nei he elima haneri eka a oi o ka Aina Aupuni o Kaauhuhu, mai ka pa umi a kanalima eka o ka apana. A iloko paha o elua pule e makaukau ai no ka hookomo ina kohokoho ana a ka poe makemake i mau home o keia nohona aku.

            Nolaila, e na Hawaii, eia ka wa e loaa ai o na home, mai ku a nana wale ma keia aoao o Ioredane.

            He mau aina maikai no ke taro, uwala, kapiki, kulina. Aole no e nele ka ohi i na hua gula oia mau lepo momona, a he mau aina kiekie a kau iluna, a he nani ka nanaina ia kai o Kohala.

PALAPALA KAHEA KAHU.

            Ma keia mau la ke kalewa hele ia ae nei, he palapala poo ole o ka "Hoomana Aloha Aina," e kekahi luna oia aoao, oia o Luau ai ole ia  a maneo, no ke kakau inoa mai o kekahi poe hoahanau, no ke kahea ana ia J. Kaimana, e poni ia i kahunapule no ua hoomana la. Aia a lawa ke 50 inoa, alaila, hoouna aku ia E. Kekoa o Hilo e holo mai, ehoonoho a poni ia J. Kaimana i kahunapule.

            O ka mea hilu nae, pau o ka hoahanau Moremona, Katolika ame ke poe hoahanau ole i ke kakau inoa ma ua Episetore la a Luau ai ole ia, me ka manao nae oia poe, "He palapala la, e like me ke ano mau, no na hana kokua, a pela ia mau hoahanau o na aoao e ae i kakau a ii ko lakou mau inoa, eia ka, he palapala kahea kahunapule keia." A ua kulou ia poe, me ka olelo ana: "Ka! He kahunapule no ko makou, aka, ma ke aloha i ka aina, ua hui like, a hapai like, kai no la, oia no keia palapala, eia ka he palapala kahea kahu, a ua kue ae ia i ko makou manao ponoi."

            Nolaila, pehea ana la, malia paha, ua hala aku ua palapala la ia E. Kekoa i Levi ia, a hoopauia.

            I keia mau la hope, ke loaa a ke piikoi loa ae nei kahi poe, o ke kau o ka hoailona Rev. me ka noonoo mua ole, aia no he mau ale ko ke ao nei, e pai alewa ana, a hookui ina pukoa, e nahaha ai ka manaoio.

            Ea! eia ka himeni pono e hoopaanaau ai na poe oia ano:

            "Mai pii aku oe i ka nehe,

            I ka lole ku i ka lilelile."

            He mau la pa puhea keia a ke Kona, ame ka hoohanini ina huna wai, mai Kulanihakoi mai.

            Adiu kaua la e ke hoa, and we will meet akain.

            PUALANIALII.

            N. Kohala, Hawaii, Dec. 9, 1898

 

NUHOU O NA AINA E

NA MOKUKAUA OREGONA ME IOWA.

            Wasinetona, Nov. 30.-Ua kauohaia na mokukaua Oregona ame ka Iowa e holo aku i Montevideo, a mai laila aku holo pololei no Valparaiso.

MAKE I NA HOKU HELELEI.

            Wichia, Kan., Nov. 18.-E hoike ana kekahi lono mai Perry, Ok., mai, ua make iho la he elua mau keiki liilii o loko o kekahi ohana i ikeia ma ka inoa o Henderson, mamuli o ka hauleia ana iho e na hoku helelei. He eono ka nui o keia mau hoku helelei i haule iho maloko o ka hale a mawaho nohoi o ka hale. Hookahi i haule pono iho maluna o kaupoku o ka hale, a hinee iho la kaupoku, a hoopoinoia kekahi poe o loko oia ohana. O ke kaumaha o ka pohaku hookahi o keia ano hoku helelei i olelo mau ia ai, aole no ia i emi iho malalo o 500 paona. E mau ana no ko lakou wela me he a ana la na ke ahi. Lehulehu loa o lakou i haule iho ma na wahi i ulu nui ia e ka manu, a ua pau ia wahi i ka a ia e ke ahi. Ua haule maoli iho kekahi o keia mau kaiki liilii a make loa laua. Ua loheia hoi ka hihio o ka lele ana o keia mau pohaku hoku iloko o ka lewa.

KE KOI KAMAHAO O AGUINALDO.

            Maderida, Nov. 30.-Ua loaa mai nei i ke Aupuni he lono ano nui loa mai Pilepine mai e hoike ana, ua koi mai o Aguinaldo, ke alakai o na poe kipi malaila, e uku aku ke Aupuni i $1,500,000 i mea e hookuuia mai ai e ia na kahunapule (Katolika) i hoopaa pio ia e ia.

PUU WAIWAI NUI.

            Cambridge, Mass., Nov. 30.-Ua haawi makana aku o Jas. Stillman o Nu Ioka, he $350,000 i ke Kulanui o Harvard, no ke kuai ana i kekahi aina ame ke kukuluia ana o kekahi hale ma'i e hea ia ana ma ka inoa o ka mea nana ke dala. Mawaho ae o keia puu dala, e haawi ana o Jas. Stillman he $2,500 i kela ame keia makahiki a pau na makahiki eha.

AOLE E HOOHUI NA HUI HOOMAEMAE KOPAA.

            Nu Ioka, Nov. 30.-Ua hoike ae o Peresidena H.O. Havemeyer, Peresidena o ka Hui Hoomaemae Kopaa Amerika, i keia la, aohe aiaio o ka lono e hoike ana, e hoohui ana ka Hui Hoomaemae Kopaa Amerika me na hui hoomaemae kopaa Amerika me na hui hoomaemae kopaa e ae, elike me ka Hui Arbuckle, Doscher ame ka Hui Glucose o Kikako.

AOLE I UHALU IHO SEPANIA.

            Ladana, Nov. 30.-E hoike ana ka mea kakau o ka nupepa Daily Mail ma Maderida, ua hooia aku ke Kuhina Nui Sepania Sagasta ina e koi hoopaakiki ana o Amerika Huipuia e uku o Sepania i kona mau aie ma Cuba a ma na Mokupuni Pilepine, e ae ana no o Sepania e hooko aku ia hana, elike me ka nui o kona waiwai e ku nei i keia wa, a, aole no e hoole ana o Sepania i ka lawe ana mai i keia ukana koikoi a auamo ae maluna iho ona.

POLUKUIA NA KIPI MA ILOILO.

            Maderida, Nov. 30.-E hoike ana kekahi lono Aupuni mai a Kenerala Rios mai, ke Kiaaina o na Mokupuni Vizcaya, ua hoouka aku na koa Aupuni i kekahi hoouka kaua holo lea loa maluna o na poe kipi, a ua nui ka poino i loaa maluna o lakou.

            Ua laulaha ae nohoi kekahi lono, ua ulu ikaika ae na hana a na kipi i keia wa, aole no ke kue ana aku i ke Aupuni o Sepania, aka, no ke kue aku i na Amerika.

DREYFUS.

            Ladana, Dek. 1.-E hoike ana ka mea kakau o ka nupepa Daily News mai Parisa mai, ua wanana ae o Mrs. Emily Crawford e kukala ana ka Aha Hookolokolo Hooponopono o Farani, ua hewa ka hookolokoloia ana o Dreyfus, a ua hala ole hoi ia.

            (E ikeia ana ke Kii o keia kanaka ma kekahi wahi o ko makou pepa o keia la. L.H.

            He aha mele ke weheia ana ma ka luakini o Mokuaikaua, Kailua, Kona Akau, Hawaii, ma ka po o ka la 26 o Dekemaba nei. Ma ia aha mele e lohe ko "Kona Kai Opua i ka lai," i ke kahuli leo lea o ka Makani Kaiaulu o Waianae, Mrs. Maryann Kaleikau.

 

            Ua loaa mai ka lono ia makou, ua paa i ka hopuia he elua mau oiwi Hawaii ma Hilo i ka pule i hala, ma ke ano, ua manaoia na laua i puhi kolohe me ka manao ino ka halepule "Haole" o Hilo ma ka wanaao Sabati, Dek. 4. Aole nae i maopopo loa, na laua io paha, na kekahi mea e ae paha.

 

Kela ame Keia.

HOOLAHA I NA POE AIE.

            Oiai, ua hookohu pono ia mai ka mea nona ka inoa malalo iho nei i Lunahooponopono Waiwai no ka Waiwai o Henry Cooper, keiki oo ole, o Makawao, Maui, i make, ke hoolahaia aku nei ma keia i ka poe apau he mau koi ka lakou maluna o ua waiwai ia, e waiho mai i ka lakou mau koi i hooiaio pono ia me na mea hooia kupono, ina he mau mea kekahi oia ano, ma kuu keena oihana, ma Wailuku, Maui, iloko o eono mahina mai ka la aku o kela hoolaha, a i ole la, e hoole mau loa la aku no lakou. A o na poe apau i aie i ua waiwai ia ke kauohaia aku nei ma keia, e hookaa koke mai ia mau aie i ka mea nona ka inoa malalo iho nei.

            S. KAPU.

            Lunahooponopono o ka Waiwai o Henry Cooper.

            Hanaia, Wailuku, Maui, Dekemaba 8, 1898. 2733-4t

 

HOOLAHA A KA LUNA HOOPONOPONO WAIWAI.

            No ka mea ua koho pohoia mai ka mea nona ka inoa malalo iho e ka Honorable J.W. Kalua, ka Lunakanawai o ka Aha Hookolokolo Kaapuni o ka Apana Elua o ko Hawaii Pae Aina, ma ka la 30 o Novemaba, M.H. 1898, i Lunahooponopono no ka Waiwai o S.D. Kapono opio (k) o Keoneoio, Honuaula, Maui, i make kauoha ole, nolaila, ke hai ia kau nei ka lohe i na mea apau loa he mau koi ka lakou i ua Waiwai nei, e waiho koke mai i ka lakou koi i hooiaio ponoia i ka mea nona ka inoa malalo iho iloko o na mahina eono mai ka la aku o keia hoolaha ana, a i ole pela, e hoole loa la aku no la mau koi. A o ka poe hoi apau loa i aie mai i ua Waiwai nei, ke kauoha ia kau nei lakou e hookaa koke mai ia'u ma kuu wahi noho ma Keoneoio no i oleloiaʻe la.

            J.D. KEAMO.

            Lunahooponopono Waiwai o ka Waiwai o S.D. Kapono opio (k) i make kauoha ole i oleloia.

            Keoneoio, Dek. 3, 1898. 2732-4ts

 

Hoolaha Hooko Moraki

 

HOOLAHA MANAO HOOKO MORAKI

A KUAI AKU A KA MEA PAA

MORAKI.

            I kulike ai me ka mana kuai ame kekahi mau olelo a mau kumu aelike e ae i paa maloko o kekahi palapala moraki i hanaia Augate 1, A.K. 1895, mai a Dick Chew mai o Kapaa, Kauai, ia Kealia Store, ma o George H. Fairchild la o Kealia, Kauai, eia hoi, ka Makee Sugar Company, he hui i hoohuiia a e lawelawe hana ana malalo o na kanawai o ko Hawaii Pae Aina, a ua kopeia ua moraki la maloko o ke Keena Kope Palapala ma Honolulu, Mokupuni o Oahu, maloko o ka Buke 180, ma na aoao 485 a hoea i ka 487.

            Ke hoolahaia aku nei ma keia, ke makemake nei hoi ka mea paa moraki (Mortgagee) malalo o ua moraki la, e hooko aku i ua moraki la, no ka uhaki ia ana o na kumu, oia hoi; ka uku ole ia ana o ka ukupanee ame ke kumupaa ma ka wa e hookaa ai.

            Ke hoolahaia aku nei nohoi ma keia, e kuaiia aku ana na aina apau, na pono ame na mea apau maluna iho a e pili ana la lakou, ame na waiwai apau i paa a i hoakakaia maloko o na moraki nei, a i hoikeia nohoi mahope ae nei, ma ke kuai kudala akea ma ka Hale Hookolokolo ma Kapaa, Kauai, ma ka Poaono, ka la 17 o Dekemaba, A.D. 1898, ma ka hora 12 o ke awakea o ua la 'la.

            No na mea i koe e ninau ia Kinney & Ballou, na loio o ka mea nona ka inoa malalo iho nei.

            Hanaia Honolulu, K.H.P.A. Novemaba 10, 1898.

THE KEALIA STORE.

            Na George H. Farichild o Kealia, Kauai, The Makee Sugar Company.

HOAKAKA O KA WAIWAI E KUAI IA AKU ANA.

            O kela aina apau ma Kapaa, Kauai, malalo o ka hoolimalima ma ka la mua o Augate, A.Dh. 1895, ia Tuck Chew Company, me ka wili raiki, ame na mikini ame na mea paahana i pili i ua wili raiki nei, ame na hale apau maluna iho o ua aina 'la i hoolimalimaia aku, elike me ia i hoikeia ae nei, mai ka Makee Sugar Company mai, oia ka aina apau i paa ma kekahi hoolimalima i hanaia ma ka la mua o Iulai, A.D. 1894, mawaena o ka Makee Sugar Company, Kealia, Kauai, ma o kona Luna Nui la, o William Blaisdell, ame ka Tuck Chew Company o Kealia, Kauai, ma o kona Luna Nui la, Tuck Chew, a penei i hoikeia ai na palena maloko o ua palapala hoolimalima la:

            Kela apana aina apau e waiho ia ma Kealia, Kauai, maloko o laila aneane Kanaono-kumamalua (62) Eka, oi aku a emi mai paha, a i ikeia hoi, ka Aina Naku o Kapaa (Kapaa Swamp), 28 eka aina o ua kuleana hoolimalima la, i ikeia Mahele 1, a he 34 eka o loko o laila i ikeia he Mahele II.

            2728-td

 

Hoolaha Mana Hoo@

ILOKO O KA AHA KAAPUNI APANA

            Hookolokolo Ekahi o ko Hawaii Pae Aina. Ma ka Hooponopono Waiwai. Ma ka hana o ka Waiwai o Naneo (w) o Honolulu, Oahu, i make kauoha ole.

            No ka mea, ua waihoia mai e Kale Kupau, ke kanewahinemake, he palapala noi no ka Hookohu Lunahooponopono Waiwai no ka waiwai i oleloia, a e hoopukaia aku ia palapala iaia, nolaila, ma keia, ke hoolahaia aku nei i na poe a pau i kuleana ma ua waiwai la, o ka Poakahi, Ianuari 16, 1899, ma Aliiolani Hale, Honolulu, hora 10 o ke kakahiaka oia kahi ame ka manawa e hele mai ai lakou, a e hoike mai i na kumu, i ua he kumu ka lakou e ae ole ia ai ke noi.

            Honolulu, Dekemaba 15, 1898.

            Na ka Aha,

            GEORGE LUCAS.

2733-3T KAKAUOLELO.

 

ILOKO O KA AHA KAAPUNI APANA

            Hookolokolo Ekahi o ko Hawaii Pae Aina. Ma ka hana o ka Waiwai o Kahalekai (w), o Honolulu, Oahu, i make.

            No ka mea, ua waiho ia mai he palapala hoopii e ka Lunahooponopono Waiwai, Cecil Brown, a nonoi ana e kuai kudala ia ka aina o ka mea i make e waiho la ma Kamakela, Honolu, Oahu, i mea e hookaa ai i ka aie o ka mea i make.

            Nolaila, me keia ke haiia aku nei ka lono i na poe apau i kuleana o ka Poakahi, Ianuari 16, 1899, hora 10 kakahiaka, ma Aliiolani Hale, Honolulu, Oahu, oia kahi ame ka manawa e hooloheia ai o ua palapala hoopii ia, a e hoike mai lakou no ke aha la e ae ole ia ai ke noi a ka Lunahooponopono Waiwai.

            Honolulu, Dekemaba 15, 1898.

            Na ka Aha,

            GEORGE LUCAS,

2733-3t Kakauolelo.

 

AHA KAAPUNI APANA KAAPUNI

            Elua Ko Hawaii Pae Aina. Ma ke Keena. Ma ka Hooponopono Waiwai. Ma ka Hana o ka Waiwai o Nahalehau (k) o Wailuku, Maui, i make Kauoha ole. Imua o Lunakanawai John W. Kalua. He Kauoha no ka Hoolaha i ke Noi e Hooponopono.

            Ma ka heluhelu ana ame ka waihoia ana mai o ke Noi a Kealoha (w) o Wailuku, Maui, wahinekanemake a @ Nahalehau, e olelo ana ua make kauoha ole o Nahalehau (k) ma Wailuku, Maui, ma ka la 25 o Iune, A.D. 1896, me ka waiho ana i kekahi waiwai ma Ko Hawaii Pae Aina i kupono e hooponoponoia, a e nonoi mai ana e hoopukaia ka Palapala Lunahooponopono Waiwai ia Kealoha (w).

            Ua kauohaia, o ka Poaha, la 29 o Dekemaba, A.D. 1898, ma ka hora 10 a.m. oia ka manawa i hoonohoia no ka hoolohe ana i na Noi ia ma ke Keena Hookolokolo o kela Aha ma Wailuku, Maui, a ma ia manawa a ma ia wahi e hele ae ai ka poe apau i pili i ua waiwai la, a e hoike mai i kumu i na @ kumu ka lakou, nokeaha la e ae ola ia ai ua Noi la, a e hoolahaia aku hoi keia Kauoha maloko o ke "Kuokoa" no ekolu pule ka'i like.

            Hanaia Wailuku, Maui, K.H.P.A. Novemaba 26, A.D. 1898.

(Sila)

            Na ka Aha.

            JAS. N.K. KEOLA.

2731-3t Kakauolelo.

 

ILOKO O KA AHA KAAPUNI APANA

            Hookolokolo Ekahi o ko Hawaii Pae Aina.

Henri Claessens kue ia Elliesie Claessens, inoa hanau Elliesie Godeke. (Poo Aupuni).

Ka Repubalika o Hawaii.

            I ka Ilamuku o ke Aupuni a i ole, i kona Hope: Me ka mahalo.

            Ke kauohaia aku nei oe e kii ia Elliesie Claessens, inoa hanau Elliesie Godeke, mea hoopiiia, ina e waiho mai ana oia i kana pane i kakauia iloko o na la he iwakalu mahope iho o ka hookoia ana o keia, e hele mai imua o ka Aha Kaapuni i hoikeia ae nei ma ke Kau o Novemaba o ua Aha la, e malamaia ana ma Honolulu, Mokupuni o Oahu, ma ka Poakahi, la 7 o Nobemaba ae nei, ma ka hora 10 kakahiaka, e hoike mai hoi i ke kumu e ae ole ia ai ke koi a Henri Claessens, ka mea hoopii, e like me ka mea i hoakakaia iloko o kana palapala hoopii oki mare i pakuiia me keia.

            A e hoihoi mai i ka palapala kii me ka hoike piha o kau mau hana no ia mea.

            Ikea ka Mea Hanohano Antonio Perry, Lunakanawai Ekahi o ka Aha Kaapuni Apana Hookolokolo Ekahi, ma Honolulu, Oahu, i keia la 11 o Okatoba, 1898.

(SILA)

(Kakauinoaia)

            P. DANSON KELLETT JR.

            Kakauolelo.

 

            Ke hoike aku nei au o ka mea maluna ae he hope aoiaio o ka Palapala Kii ma ia hihia, a ua kauohaia ua Aha la e hoolahaia ia mea a e hoopaneeia ka hihia a ke Kau o Feberuari, 1899, e hiki mai ana o keia Aha.

            Honolulu, Novemaba 11, 1898.

            P. DANSON KELLETT JR.

2729-6t Kakauolelo.

 

CURES WHILE YOU SLEEP         

 Vapo-Cresolene

            MAMULI o ka haawiia ana o ka laau CRESOLENE ma ka hanu ana, oia ke keehina hana palekana loa no ka lawelawe ana i na Ohe Makani o ka puu. He kamahao launa ole ka holo pono o kana hoola ana i ke Kunu-Kalea ame ke Kunu Po. He laau maikai loa ia no ke pale ana aku i na ma'i lele, a pe a aku. E loaa no na buke hoakaka me ke kumukuai ole, i huipu me na palapala hoomaikai. Kuaiia e na poe kuai laau a pau.

            HOLLISTER DRUG CO.

            Honolulu, H.I., Agents.