Ka Nupepa Kuokoa

KE KILOHANA POOKELA NO KA LAHUI HAWAII

 

Buke XXXVIII.  HELU 2.  HONOLULU.  POALIMA.  JANUARI 13, 1899.  NA HELU APAU 2737

 

Hoolaha Eumau.

 

W.C. Achi.  Enoch Johnson,

ACHI & JOHNSON,

LOIO! LOIO! LOIO!

Keena Hana, Helu 10 aoao Komohana Alanui Moi.

 

W. R. Kakela

Loio a he Kokua ma ke Kanawai

HE LUNA HOOIAIO PALAAPLA. 2370

 

LYLE A. DICKEY

Loio a he Kokua ma ke Kanawai.

Notari no ka Lehulehu.

E hookoia na hana pili kanawai apau mai na Mokupuni mai.

Kihi o Alanui Betela me Moi. Pahu Leta 786. Telepona 806.

 

DR. T. MIKAMURA.

427 Alanui Nuuanu.

NA HORA HANA: 8 a 12 m.; 6 a 7 p. m. Na La Sabati: 2 a 4 p. m.

2737-1m

 

Papa! Papa!

** Aia ma kahi o ** LEWERS & COOKE (Lui Ma.)

Ma ke Kahua Hemao o na Alanui Papu me Moi.

 

E LOAA NO NA ** Papa Nouaiki

O kela a me keia ano.

 

Na Pani Puka. Na Puka Aniani. Na Olepelepe. Na Pou.

Na O’a. Na Papa Holo. Na Papa Ku. Na Papa Moe.

 

* Na Pili Hale * O na Ano apau.

A me na ** Wai Hoohinuhinu Nani

O Na Ano Apau.

 

Na Palakio na Ano he Nei Wale.

 

                Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oiahana me ka Uku Haahaa Loa. E like me ka mea e holo ana mawaena o ka Luna a me ka Mea Kuai.

                E Hele Mai e Wae no Oukou Iho.

 

Ina e hiki ole ia oe ke hiamoe no ka nui o ke kunu, alaila, e inu oe i ka Laau Kunu a Kamalena. E loaa mau ana ka oluolu. He laau maikai loa keia no ke anu, oiai e kokua ana ia i ka hemo oluolu mai o ka male, hooluolu ae i na ake-mama, a pale ia aku hoi ka loaa ana mai i ka ma’i numonia. E kuaiia ana e na poe kuai laau lapaau apau. O Benson, Smith & Co. (Kaupalenaia) na Agena no Ko Hawaii Pae Aina.

 

 

HE MOOLELO KUPAIAANAHA

:NO:

Ka Moku Kamahao

 

KA MALOLO.

(The Flying Fish.)

 

Lele i ka Poiuiu o ka Lewa - Oni i ka Papaku o ka Moana – Hapapa i ka Ili o ka Honua – Hoea i ka Welau Akau - Ike i ke Kulanakauhale Kahiko o Opira – Haaheo ma na Mauna Himalaia. .

 

Kakauia e Henry Collingwood, a unnhiia e Hooulumahiehie no ke “Kilohana Pookela no ka Lahui Hawaii.”

 

            “Ea, e Mr. Porofesa,” i hooho ano hoomakeaka ae ai o Sir Reginald Elphinstone, ka Baroneta. “Ua kuhihewa loa paha oe i kou apo ana i ka oihana akeakamai o na mea huna pohihihi, elike me keia au i hoakaka mai nei ia makou, oiai o ka hana kupono a makou e manao nei, oia ka hana e pono ai oe ke lawelawe, oia no ka oihana haiolelo akea maloko o na halekeaka? Aka, e Mr. Porofesa, maikai, heaha la keia mau mea hou loa i loaa ia oe, au hoi e kamailio ulumahiehie mai nei me ke ohohia nui?”

            “O keia mau mea nou loa i loaa ia’u, he metala no ia o ke ano hou loa, a he mana ikaika hoonee hou nohoi,” i hooho ae ai ka Porofesa.

            I kela wa, nanao iho la kona lima iloko o na pakeke o kona kuka, a unuhi mai la oia he wahi eke ili i hana maiau loa ia. Mailoko mai hoi o keia wahi eke ili, unuhi ae la ia he wahi mea palahalaha huinaha loa, i like kona ano apau, ma ka nana aku, me ke aiai hulali o kekahi apana dala i hoohinuhinu maikai ia. He elima iniha kona loihi, a he aha iniha kona laula, a he aneane hapaha iniha kona manoanoa. Alaila, kamailio mai la ia ia Sir Reginald.

            “Eia mai e Sir Reginald,” me ka haawai ana mai i ua apana lahilahi la ia Elphistone, a ninau mai la hoi, “E hai mai oe ia’u, heaha la kou manao no keia wahi mea?”

            Ma ka wa i lalau aku ai o Sir Reginald i ua wahi apana nei a ka Porofesa i haawi mai ai iaia, ua pane aku la ia, “He keu kena a kahi mea maikai nui wale?”

            A ma ka wa hoi i paa mai ai ua wahi apana lahilahi nei i kona lima, ua hooho ano e ae la ua Baroneta nei :

“Kahuhu! Heaha hoi keia wahi mea? Aole keia he apana kala!”

            Alaila, hookuakuai ae la kona mau manamana lima ma na aoao o ua wahi apana lahilahi nei, a pane ae ia :

“Aole keia he apana kala (Silver). He keu a ka mama launa ole mai! He like loa ko ia nei mama me ko ka hulu manu. E Mr. Porofesa, heaha keia mea?”

            “O kena hoi kuu metala hou a’u i hai aku nei ia oukou. Ua kapa au i ka inoa o keia ano metala he Eteriuma (ethereum) mamuli o kona mama. E nana paha oe.”

            Ma ia wa hoi lalau mai la ua Porofesa nei i ua wahi apana lahilahi nei a Sir Reginald e paa ana, a huli ae la ia kekahi kiaha wai aniani nui e ku ana maluna o kekahi pakaukau e pili kokoke mai ana iaia, alaila, ninini iho la oia i ka wai o loko o ke kiaha aniani iloko o kekahi ipu wai gula e pili pu ana me ke kiaha.

            Alaila, hoolana iho la ia i kahi apana lahilahi maluna o ka wai e lana ana iloko o ua ipu wai gula la.

            He mea oiaio, me ka piha kahaha loa hoi o na noonoo o na hoa o ua Porofesa nei, ua lana iho la ua apana Eteriuma nei maluna o ka wai, me ke kau maikai ana.

            Lalau iho la ka Porofesa i ua ipu wai nei a paa ae la ma kona mau lima elua a hoonioni ae la i ka wai. Ua oni ae la no ua Eteriuma nei maluna o na aleale wai, elike me ka nee ana ae a ka umoki huewai (cork).

            “Auwe!” wahi a ke Konela i hooho ae ai, “He pani-huewai maoli no ha kena i hoohinuhinu ia e oe me ka wai dala!”

            “Heaha hoi kau olelo ano kamalii e kuu hoaloha maikai,” wahi a ka Porofesa. “Ua oi aku ke kaumaha oia mea he pani-huewai mamua o keia. O keia iho la, ka matrla paa loa a i hoi kona mama mamua o na mea materia e ae apau i ikeia e ka noeau ame ka naauao o ke kanaka i keia wa. E nana mai oe.”

            Ia wa lalau iho la ua Porofesa nei i ka apana Eteriuma e lana ana maloko o ka ipu wai, hoomaloo iho la me kona hainaka silika, alaila, paa ae la ia ma kekahi poo o ua wahi apana lahilahi nei, mawaena o kona manamana-lima-nui ame ka manamanalima kuhi o kona lima akau, oiai hoi ia i hapai ae ai i kona lima a hala ae la maluna o ke kiekie o kona poo, a ia wa oia i hookuu iho ai i ua metala nei ilalo.

            I kela wa i nee ae ai ia, me he mea la e lana hele ana iloko o ka ea. E nee ana ma o a maanei, elike me ka oni kilepalepa ana a ka pepa i haule iho ma kekahi wahi i pohu ai ka ea. Pela, ua metala Eteriuma nei i haule iho ai a pa iluna o ka papahele.

            Ua lalau iho la hoi o Sir Reginald i ua apana metala Eteriuma nei a nana pono loa iho la ia, a pela nohoi me kona mau hoa.

“Aia na noonoo pahaohao loa ke holoke la iloko o lakou no ke ano o ua wahi apana metala nei a ka Porofesa i kapa ae he Eteriuma.

            E o’u poe hoaloha, ke ike iho la no oukou me ka maopopo loa i ka mama lua ole o keia metala. Aohe ona lua. O kona mama, ua ike iho la oukou ; aka, o kona paa, kona uaua ame kona oolea, aole oukou e ike ana ia mau waiwai io o keia metala, oiai aole au i hana i kino nui kupono e hiki ke ikeia kela mau waiwai io iloko ona. E hooia aku no nae au imua o oukou, elike me ka hoopahaohaoia ana o ko oukou mau noonoo no ke aiwaiwa kupaianaha o kona mama, pela no e hoopahaohaoia ai ko oukou mau noonoo no kona paa, kona uaua ame kona oolea. Ua hoao paha au i ka ikaika ume pipili o kona mau materia e hoopaa ana i kona kino Eteriuma, ua ike au, ua oi aku kona paa i ko kekahi hao kila paa loa. He pa-haneri ka oi aku o ko ia nei paa imua o ua hao kila la.”

            Me ke ano hoomakeaka hou ole ana, pane aku la ke Konela:

            “E Mr. Porofesa, he mea oiaio, mamuli o keia mea a makou i ike pono iho la me ko makou mau maka, ame ko makou paulele ana hoi i kau i hoike mai nei ia makou no ke kulana paa a oolea o keia materia mama loa, ua hiki ia’u, a i ole, o makou no paha apau ke olelo ae, ua loaa io ia oe ka haaheo mua loa, ma ke ao holokoa nei apau, no ka loaa ama o ka metala e hiki ai i kekahi kino moku lele poai lewa ke lana maloko o ka ea. Aole kanalua hou ma keia mahele o ka mea i huliia e kou ike hohonu loa ole, e Mr. Porofesa; aka, hookahi mea i koe au i olelo mai nei ia makou, oia hoi, ke kokoolua o na mea i loaa ia oe, oia ka mana a ikaika ano hou loa i loaa ia oe. Auhea hoi ia mea, e Mr. Porofesa?”

            Alaila, haha hou iho la ka Porofesa iloko o na pakeke o kona kuka, a unuhi ae la he wahi opeope pepa uuku. Alaila, wehewehe ae la ia i ua wahi opeope nei a hemo. Aia maloko o laila, he mau puupuu hulali hooluu omaomao, i like me ke ano o ka paakai.

            “Eia mai ua mea la au i ninau mai nei,” wahi a ua Porofesa nei i pane mai ai i ke Konela, me ka haawi ana mai ‘iaia i ua wahi puolo la.

            “Oiaio hoi!” i hooho ae ai ke Konela, oiai ia i hoohulihuli ae ai i ua mau puupuu ano paakai nei, me kona manamanalima.  “He mea ano hou loa io nohoi keia ia’u. Aole au i ike i kekahi mea elike me keia, koe wale no ka paakai pulukona (blue-stone) e malamaia nei e na kauka. Ea, heaha ka mana a ikaika hoonee e loaa ana mailoko mai o keia paakai blue-stone au?”

            “Eeia hou no oe, e kuu hoaloha, ke ninau mai nei i ninau maikai i owiliia iloko o ka manao hoomakeaka a hoopauha wale. Aole keia he blue-stone, i kapaia i kekahi wa he blue vitriol, o ke ano paha au i manao ai e olelo mai mamuli o ka hooluu omaomao o kena materia au e paa la, oia ke green vitriol, i kapaia he heu paakai, kupono no ka mai aai o ka ili. He keu no oe a kahi kanaka hoopauha nui wale. Aka, e hai aku au i na ano elua e pili paa loa ana i keia materia. Ke hoohanaia keia ma kona mahele mua o kona mana ame kona ikaika hoonee, e lilo ana ia he uwila; a ke hoohanaia hoi ia ma kona mahele elua, e lilo ana ia i ikaika hoopahu elike me ka pauda, a i ole, elike me ka pahu ana o ka mahu.”

            “Pehea; e pahu ae paha auanei keia mau paakai kupaianaha i keia wa?” i ninau ae ai ke Konela.

            “Aole lakou e pahu i keia wa, a ma ko lakou ano hoi e ku nei i nei wa. Ina e kiolaia aku keia mau huna paakai apau iloko o ke ahi, aole loa lakou e pahu ana; aka, ina nae oe e kui iho ana i keia mau mea a aeae, a hoowali pu iho me ka wai asida zeradeina (zerdain acid) e lilo auanei ka mea au e paa nei i mea hoopahu ikaika loa, a ua lawa hoi kona ikaika, e hoolilo i keia hale i mau mea materia liilii loa.”

            Huli like aku la na maka o na mea apau e hoolohe ana i na olelo a ua Porofesa nei a hekau pololei aku la hoi maluna ona.

            A ia wa nohoi i pane hou mai ai oia imua o lakou :

            “O ka’u i hai aku la ia oukou, oia no ka mea oiaio loa e pili ana i ka ikaika hoohana o keia materia.”

            “Alaila;  ke ole au e kuhihewa ma ka’u hoomaopopo ana aku nei i kau mau olelo hoakaka, e lilo ana ka metala kupaianaha a makou i ike iho nei i mea e hiki ai ke kapiliia ke kino o ka moku lele poai lewa au i olelo mai nei, a o keia materia kamahao nohoi, oia ka uhane ola nana e hoonee i ua moku la ma na wahi apau i makemakeia ai ia e nee aku?”

            “Ae; oia maoli no ka mea oiaio. Ina he kanaka waiwai au, eia me au he mau tausani dala, alaila, e hiki no ia’u ke hana i moku lele iloko o ka lewa me ka metala a’u i hoike aku nei ia oukou; a hooneeia hoi ia e ka ikaiak o keia materia. Aka, o ka pilikia nui; he kanaka akeakamai wale no au, e haha ana iloko o na poai o na mea kino kumu (elements) i hoomakaukau mua ia e ke Akua, a hoolilo ae ia lakou i mea kino i hiki ke hoohanaia no ka pomaikai o ke kanaka. Ma ka waiwai e holo pono ai na mea i hoouluia e ko’u ike, ua nele au – he ilihune maopopo au. Aka, ke laua nei no nae kuu manao, ma ka wa pono e loaa ana no ia’u kekahi kanaka waiwai e ae ana e kokua mai ia’u me ke dala i mea e ikea ai ka pomaikai o ka mea i huliia e ka naauao o ke kanaka.”

            “Ehia dala e lilo a paa he moku elike me kau e makemake nei e hana, e Mr. Porofesa?” i ninau aku ai o Barona Elphinstone.

            “Aole no i maopopo loa ia’u. Manao no nae hoi au, aole no e nui loa, me he mea la he hookahi haneri tausani paona paha.”

            “Kahuhu!” wahi a ka Barona i pane ae ai me ka hokio ana ae, a olelo ae ‘a, “olelo ka poe Amerika, e puehu ana ka hupo ame kana dala. Aka, e Mr. Porofesa, ina manaoio loa oe e hiki hololea ana ia oe ke hana i moku elike me kau mea i hoolala ai, alaila, na’u no e hoolawa aku ia oe me ke dala au i makemake ai.”

            Me ka hauoli nui, hooho ae la ua Porofesa nei:

            “O! O! He mea oiaio loa, e hiki ana me ka holo lea loa e hanaia he moku oia ano. Aole kanalua ma ia mea. E hai aku au ia oe, e kuu haku Barona, elike me ka hiki holo lea ana e hanaia he moku no ka holo ana maluna o ka moana, pela no ka hiki maalahi ana e hanaia he moku lele i ka lewa. Ua noonoo nui loa au no ka mea e pili ana i keia kumuhana, ma kona mau anuu apau, a ua ike au, aohe ona wahi hemahema i koe. E haawi mai oe ia’u i kou lima kokua, e kuu haku Barona, a e lawe aku no au ia oe i ka welau akau, e hiki no ia’u ke lawe aku ia oe iluna o Mauna Ararata no ka imi ana i ka hale-lana o Noa, e pii no kaua a kau i ka wekiu o Mauna Evereta, a e hiki ana ia oe ame a’u maluna o keia kupaianaha o na kupaianaha a’u e hana aku ai ke ihome oe a haha i na papaku o ka hohonu.”

            “Ua pono.” i pane ae ai ka Barona. Ua paa iho la ka kaua aelike. I ke awakea o ka la apopo e halawai hou ai kaua maanei, a mai ia nei aku e hele aku ai kaua i ka hale banako, a malaila au e hoolilo ae ai i hookahi haneri tausani paona (Dala Pelekane) ma kou inoa, i hiki ai ia oe, e Mr. Porofesa, ke hana aku i ka mea au e noonoo nui nei.”

            “Alaila, huli ae la ua Barona nei a kamailio ae la i na hoa e ae elua o laua me ka Porofesa:

            “E heaha ka olua pane e na keonimana, ma ka wa e paa ai keia moku kupaianaha a ko kakou hoaloha akeakamai nei e hana aku ana; aole anei hoi olua e ae mai ana, o olua pu kekahi e hui pu mai me ka Porofesa nei ame a’u nohoi no ka hele ana aku ma ka makaikai honua a puni ke ao nei?”

            “Makemake loa au e loaa ia pomaikai mai ko olua puuwai hamama mai,” i pane mai ai ke Konela. A oia ano pane hookahi nohoi ka ka luanela i pane mai ai. Nolaila, ua hooholoia iho la ia aelike e lakou.

            Maanei i ku iho ai ka Barona me ka noonoo ana no kekahi manawa a liuliu aea ae la kona poo a pane ae la me ka mino aka ana iho o kona mau papalina :

            “Ano, e Mr. Porofesa. E ae mai oe ia’u e hai aku au ia oe i ko’u manao maoli, a oia keia. Ina e holo pono ole ana kau mau hoolala ana mamuli o na ulia i ike mua ole ia e kakou i keia wa, alaila, ua loaa no ia’u ka manao maikai o ka hoomaopopo ana ae, ua hoowaiwaiia na dala a’u e haawi aku nei ia oe , mamuli o ko kakou lilo ana he mea kokua aku i na poe paahana i nele i ka hana i keia wa.”

            No keia mau olelo a ka Barona, ua haka pono mai la na maka o ka Porofesa iaia, a ninau mai la :

            “O ka poe paahana hea kau e kamailio mai nei?”

            “O ka poe paahana Pelekane nohoi paha. O lakou ka’u poe i makemake ai e hoowaiwai ia me keia mau dala a’u e hookaawale ana no keia hana.”

            “Alaila, e manao anei hoi au, e lilo ana na paahana Pelekane au, e kuu haku Barona, e kamailio mai nei, i kumua hoopaa iloko o keia aelike a kaua i hana iho ia, no ke dala a kou lokomaikai e haawi mai ana ia’u me kou ae ole ana e kii aku i mau paahana emi mai o ka uku, a i oi aku hoi ko lakou kupono ma ka lawelawe ana i keia hana mamua o na kanaka paahana Pelekane au e paulele nei, e kuu haku Barona?”

            “Aole pela ko’u manao, e Mr. Porofesa, aole o’u makemake e kau aku maluna ou i mau kumu hoopaa – aole loa. Aka, e hoomanao oe, e Mr. Porofesa, he kanaka Pelekane au, a he dala Pelekane hoi ka’u e haawi aku nei ia oe, alaila, ina he hana kekahi e hiki ana ke lawelawela e ke kanaka Pelekane, he mea pono ke haawiia aku na kokua ana ame na hoowaiwai ana a na dala Pelekane i ua poe kanaka Pelekane la mamua o ka lilo ana aku oia mea i mea kokua i kekahi kanaka e aku. Aole paha he mea maikai no’u ke haawi holookoa aku i na hoopomaikai ana a ke dala Pelekane i kekahi poe malihini ina he mea hiki i na limahana Pelekana ke hana. Aka, aia no nae ia i kou noonoo ana, e Mr. Porofesa.”

            Ua hoakaka mai la hoi ka Porofesa i kona manao he mea pono no i ka Barona ke waiho aku ma kona lima i ka noonoo ana no nei mea he poe paahana, oiai he lehulehu wale na kumumanao e pono ai ke noonooia ma ke ano o ka wae ana i na limahana, me ka makaala pu ia ana hoi o na hana olohani pupuahulu a na paahana i waeia uoloko mai o na hui limhana i kukuiuia ae mawaena o kekahi poe limahana kamaaina o loko o Pelekane ponoi iho.

            Mamuli o keia mau hoakaka a ka Porofesa, ua hoopau ae la ka Barona i kona manao hoopaakiki, a ua waiho aku la i ka wae ana o nei mea he paahana i ka noonoo maikai o ka Porofesa.  (Aole i pau)

 

 

KE KULANA AUPUNI

no ka Panalaau o Hawaii.

 

NA KANAWAI I HOOPAUIA

Na Poe Koho Balota no ke Kau Koho ma Novemaba 1899 ae nei.

 

KA WA AHAOLELO MUA MA KE KAU MAU.

Hoopauia ke Kiure hui.

 

HOONOAIA NA KAI LAWAIA.

O ka Poe Ike i ka Olelo Beritania ke Noho i mau Hoa Ahaolelo.

(Hoomaula.

 

OIHANA HOOKOLOKOLO.

 

Pauku 84.  Ua haawiia ka mana hookolokolo o ka Panalaau iloko o ka Aha Kikie ame na aha haahaa elike me ka hoonoho ana a ka Ahaolelo.

Pauku 85. Aia iloko o ka Aha Kiekie he Lunakanawai Nui ame elua mau hoa lunakanawai.

Pauku 86. O na Kanawai e pili ana i na lawelawe hihia ana ma ke ano kivila a karaima hoi e mau no ia. O na kanawai e pili ana i na kiure kanaka maoli ame na haole ua hoopauia. Aole e loaa ka pono hookolokolo i kekahi mea hoopii a hoopiiia paha iloko o kekahi hana maloko o kekahi aha e hookolokoloia e ke kiure i wae kaokoa wale ia mai no mai na kanaka mai o kekahi ano lahui hookahi.

Pauku 87. Na mea e kupono ole ai kekahi lunakanawai a kiure paha e noho ma kekahi hihia.

Pauku 88. O ka hookolokolo hoopii luna nui aia no ia imua o ka Aha Senate.

Pauku 89. E kohoia ana ka Elele Lunamakaainana i ka Hale o na Lunamakaainana o Amerika Huipuia, no ka lawelawe ana i kela ame keia wa e noho ai ka Ahaolelo Nui e na poe koho i kupono e koho i na lunamakaainana.

Pauku 90. E hoonoho ana i apana hookolokolo no Amerika Huipuia ma ka Panalaau o Hawaii e ikeia o ka apana hookolokolo kaapuni eiwa o Amerika Huipuia. Ma Honolulu e noho ai na kau mau oia aha ma ka Poakahi elua iloko o Aperila ame Okatoba, a ma Hilo ma ka Poakolu hope iloko o Ianuari o kela ame keia makahiki.

Pauku 91. E lilo ka Panalaau o Hawaii i apana ohi auhau kuloko no Amerika Huipuia, a o ka Luna Ohi, ma Honolulu e ku ai kona keena, a o na hope luna ohi hoi ma na apana e ae ma kela ame keia mokupuni elike me ke kuhikuhi ana a ke Kuhina Waiwai.

Pauku 92. E lilo ka Panalaau o Hawaii i apana ohi dute no Amerika Huipuia, nona na awa komo a hoolele ukana o na moku ma Honolulu, Hilo ame Kahului.

Pauku 93. E mau no na uwapo, na awa-pae, a pela aku, malalo o ka mana o Hawaii, a nana no e ohi i na pomaikai apau oia mau mea. Aole nae e kauia na auhau maluna o na moku Amerika.

Pauku 94. Aole e kuai hou ia na poo leta Hawaii, a pela aku, aka, e holoi a e hoopau loa ia ia mau poo malalo o na kauoha ana a ka Luna Leta Nui o Amerika Huipuia.

Pauku 95. E mau no na waiwai aupuni i panaiia mai mamuli o ka olelo hooholo hui ma ka malama ana a ke Aupuni Hawii, malalo hoi o kona mau lilo ponoi iho a hiki i ka wa Amerika Huipuia e lawe ae ai.

Pauku 96. O ka uku makahiki o ke Kiaaina he $5,000, Kuhina Nui o ka Panalaau $3,000, Ilamuku $2,000, Loio Kuhina $2,000. E loaa ana nohoi he $500 i ke Kiaaina no na lilo no na lako kakau, a pela aku, ame na lilo kaahele, a he $2000 no kana kakauolelo.

Pauku 97. O na waiwai komo mai mai Hawaii mai a i Amerika Huipuia i ku i ke dute ia, aole hoi ia he mau waiwai Hawaii ponoi. a peia hoi na waiwai i laweia i Hawaii mahope mai o Iulai 7, 1898, a mamua ae hoi o ka mana ana o keia Kanawai, e uku no i na dute elike me ko na waiai i komo mai ka aina e mai.

Pauku 98. Hoomanaia ke Komisina o na I’a ame na Kai Lawaia o Amerika Huipuia e huli a e noil pono i ke kumuhana holookoa e pili ana i na kai lawaia ame na kanawai e pili ana i na pono lawaia iloko o ka Panalaau o Hawaii a hoike i ka Peresidena no ka mea e pili ana ia mea.

Pauku 99. O na kanawai apau o ka Repubalika o Hawaii i haawi i na pono lawaia kaokoa i kekahi kanaka a poe kanaka paha ma keia ua hoopauia, a o na kai lawaia apau ma na kai o ka Panalaau o Hawaii, i komo ole hoi iloko o na loko, a mau wahi i pa ia a paa, ua noa ia mau kai i na kupa (citizens) apau o Amerika Huipuia, me ka nanaia ana no nae o na pono konohiki no lakou ia mau kai; aka, aole e mana hou aku ua pono konohiki la mahope aku o ekolu makahiki mai ka la aku e mana a e paa ai keia Kanawai, aia wale no a hoopaaia ua pono konohiki la elike me ka mea i hoakakaia mahope ae nei.

Pauku 100. O kela ame keia mea he mau koi kana no kekahi o ua mau kai lawaia la, e waiho oia i kana hoopii imua o kekahi Aha Kaapuni o ka Panalaau o Hawaii, iloko o elua makahiki mahope iho o ka mana ana o keia Kanawai, me ka hoakaka ana hoi i kana koi no ua pono lawaia la, a e hookoia ua palapala hoopii la maluna o ka Loio Kuhina, ka mea nana e lawelawe i ua hihia la ma ka aoao o ka Panalaau, a e lawelaweia hoi ua hihia la elike me ka hihia kivila maoli ma ke kanawai.

Pauku 100. A ina hoi e hookoia ua kuleana pono lawaia la, e lawelawe aku no ke Kiaaina o Hawaii, ma ke ano i hoakakaia ma ke kanawai no ka hoolilo ana i na waiwai no ka pomaikai o ka lehulehu, oia hoi, e hoolilo i ua pono lawaia la no ka pomaikai o na kupa o Amerika Huipuia mamuli o ka ukuia ana aku o ia pono ma ke dala, a e ukuia ana hoi ia mau dala mailoko aku o na dala maloko o ka Waihona Waiwai o ka Panalaau o Hawaii, ina he mau dala ia i hookaawale ole ia no kekahi hana e ae.

Pauku 101. E hoonoho ana i ua kahua hoomalu o na Eemoku malalo o ke kauoha ame ke kuhikuhi ana a ke Kauka Oki Nui o ka Oihana Halemai Marina o Amerika Huipuia, e kaa ana hoi ia mau wahi malalo o na hooponopono ana a Amerika Huipuia. E hoihoi ana i ke kahua hoomalu o na eemoku ame ka aina ma ke awa o Honolulu malalo o ke Aupuni o Amerika Huipuia. O na kanawai kuloko hoi pili i ke ola o ka lehulehu e mau no lakou malalo o ka hooponopono ana a ke Aupuni kuloko, a e lilo hoi na Amerika Huipuia e uku i ka hapalua o na lilo o ka malama ana i ka kahua hoomalu mai lepera.

Pauku 102. Pili keia no ke kakau hoopaa ana i na moku Hawaii i poe moku Amerika.

Pauku 103. O kela mahele aina o ka lehulehu i ikeia mamua aku nei ma ke ano he Aina Leialii ma keia ke kukalaia nei, he waiwai no ia no ke Aupuni Hawaii, ma ka wa i hooliloia ai Mana Poo Aupuni o Hawaii ia Amerika Huipuia, a e pau hoi na kuleana apau o kela ame keia ano e paa ana i ua mau aina la, ina he mau kuleana kahu a ohi waiwai wale no ia mamuli o ka haawi ana a ke Kanawai (elike me ka pono trust.) E hiki no i kela mau aina ke hooliloia aku elike me na hoakaka ana a ke kanawai. O na hoolimalima ku nae i ke kanawai no kekahi mau wahi o ua mau aina ia e paa nei no i keia wa ma keia ua hoopaa loa ia ia mau hoolimalima.

Pauku 104. No na hana e pili ana no ka hookupa ana malalo o na kanawai o Amerika Huipuia, he mea pono no elike ka loihi o ka noho ana ma Ko Hawaii Pae Aina mamua ae o ka wa e mana ai keia Kanawai me ka loihi o ka noho ana ma Amerika Huipuia, a o ka hoike mua ana hoi i ka manao haalele i na pono malalo o kekahi mana aupuni e ae, aole ia e pili i ka poe i noho ma na mokupuni no na makahiki he elima, ka helu haahaa loa, mamua o ka mana ana o keia Kanawai.

Pauku 105. O na Pake ma Hawaii, ma ka wa e mana ai keia Kanawai, e hiki no ia lakou ke loaa na palapala hooia o ka noho ana (elike me ka mea i kauohaia ma na kanawai o Amerika Huipuia) a ke pau ia makahiki hookahi, alaila, aole e manaoia ua ku i ke kanawai ka noho ana ma Amerika Huipuia, ina e loaa a e ikeia ana ia poe malaila me ka nele i na palapala hooia.

Pauku 106, 107. E hiki no i ka Ahaolelo o ka Repubalika o Hawaii ke kau i na kanawai e kue ole ana i na olelo o keia Kanawai mamua o kona mana ana. E mana no keia kanawai ma Iulai 4, 1899.

 

Eia mai kau hoolaha e Kealoha, Lunahooponopono o ka waiwai o Nahalehau (k) o Wailuku, i make kauoha ole. E makaala ae hoi ka poe apau i kuleana ma ia waiwai no ka wa e noho ai ka Aha. E nana ae i ka hoolaha e puka aku nei ma ko makou pepa o keia la.