Ka Nupepa Kuokoa, Volume XXXVIII, Number 3, 20 January 1899 — Page 1

Nupepa Kuokoa

Ke Kilohana Pookela no ka Lahui Hawaii

BUKE XXXVIII. HELU 3. HONOLULU. POALIMA, IANUARI 20, 1899.

 

@oolaha @uman.

 

W.C. Achi. Enoch Johnson.

ACHI & JOHNSON,

LOIO! LOIO! LOIO!

Keena Hana, Helu 10 aoao Komohana

Alanui Moi.

 

W.R. Kakela

Loio a he Kokua ma ke Kanowai

HE LUNA HOOIAIO PALAAPLA

2370

 

LYLE A. DICKEY

Loio a he Kokua ma ke Kanawai.

Notari no ka Lehulehu.

E hookoia na hana pili kanawai apau mai na Mokupuni mai.

Kihi o Alanui Betela me Moi. Pahu Leta 786. Telepona 806.

 

DR. T. MIKAMURA

427 Alanui Nuuanu.

NA HORA HANA: 8 a 12 m.; 6 a 7 p.m. Na La Sabati: 2 a 4 p.m.

2737-1m

 

Papa! Papa!

Aia ma kahi o

LEWERS & COOKE

(Lui Ma.)

Ma ke Kahua Hema o na Alanu@

Papu me Moi.

 

E LOAA NO NA

Papa Nouaiki

O kela a me keia ano.

Na Pani Puka

Na Puka Auiani

Na Olepelepe

Na Pou

Na O'a

Na Papa H@le

Na Papa Ku

Na Papa Moe

 

Na Pili Hale

O na Ano apau.

A me na

Wai Hoohinuhinu Nani

O Na Ano Apau

 

Na Palakiona Ano he N@i Wale

Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana me ka

Uku Haahaa Loa

@ @ke me ka @@@ e holo ana mawaena @ Laua a me ka Mea Kuai

E H@l@ Mai o Wae no Oukou I@@

Ina e hiki ole ia oe ke hiamoe no ka nui o ke kunu, alaila, e inu oe i ka Laau Kunu a Kamalena. E loaa mau ana ka oluolu.  He laau maikai loa keia no ke anu, oiai e kokua ana ia i ka hemo oluolu mai o ka male, hooluolu ae i na ake-mama, a pale ia aku hoi ka loaa ana mai i ka ma'i numonia. E kuaiia ana e na poe kuai laau lapaau apau. O Benson, Smith & Co. (Kaupalenaia) na Agena no Ko Hawaii Pae Aina.

 

HE MOOLELO KUPAIANAHA

:NO:

Ka Moku Kamahao

KA MALOLO

(The Flying Fish)

 

Lele i ka Poiniu o ka Lewa

Oni i ka Papaku o ka Moana

Hapapa i ka Ili o ka Honua

Hoea i ka Welau Akau

Ike i ke Kulanakauhale Kahiko o Opira

Haaheo ma na Mauna Himalaia

 

Kakauia e Henry Collingwood, a unnhiia e Hooulumahiehie no ke "Kilohana Pookela no ka Lahui Hawaii."

 

MOKUNA

 

E ko ana anei ka Hihio Moeuhane a ke Kanaka Akeakamai?

 

     I ke kani ana o ka hora 12 o ke awakea o kekahi la ae, ua komo aku la o Porofesa von Salakenbuga iloko o ka rumi hookipa o ka hale hui Kulukehau.

     I kona komo ana aku e noho mai ana hoi o Sir Reginald Elphinstone. Mahope iho o na panai aloha ana mawaena o laua, haalele iho la laua ia wahi, kau aku la laua maluna o kekahi kaa, a holo pololei aku la no ka hale banako.

     Malaila i lawelaweia ai na hana e pili ana i ka hoolilo ana mai o ka Barona Pelekane i kekahi huina dala Pelekane o loko o kana mau miliona dala lehulehu e waiho ana maloko o ka banako, ma ko inoa o Porofesa Heinarika von Salakenbuga, kekahi o na kanaka akeakamai o ka Hui Kulukehau.

     Mahope iho o ka pau ana o keia hana, ua hemo mai la laua a ku iho la mawaho o ka banako.

     Ma kela wa i nana pono mai ai ka Porofesa me na hiohiona i hoouluwehiwehiia e ka hauoli nui, me ka hoopuniia ana, ae o kona onohi maka e na pohina waimaka o ka uhane i piha ia mea he hauoli, aia hoi, pane mai la ia imua o ka Barona:

     "E kuu haku Barona, he hora keia i hanauia mai ai au mailoko mai o ka opu o ka olioli nui. Ke haawi aku nei au ia oe i ka'u mau hoomaikai ana ia oe no keia makana hiwahiwa au i alana mai ai ma ka heiau o ka Naauao. Nolaila, ma ka inoa o ia heiau laahia a ke Akua Hoano Loa i kukulu ai maloko o na Aupuni Materia apau i uhiia e Kona mana, ke haawi nei au i na hooia ana imua ou, e kuu haku Barona, e ko ana no na moeuhane a'u i lia ai no kekahi mau makahiki lehulehu loa i hala ae nei, na makahiki hoi no lakou na la ame na hora i kupeeia ai na aa lolo o ko'u puniu nei e hakoko me na ninau ame na nanehai pohihihi e hoopuni ana i na mea kino materia. E noii ana hoi au iloko o ka poiuiu ame ka hohonu o na kanawai e anapuni ana i keia mau mea kino.  Ua hakoko au me ka hoomanawanui iloko o na pohihihi i halawai aku ai ka'u mau huli ana iloko o keia mau pohai o kekahi mau aupuni materia, a ua hoea au i ke kiekiena a'u i hiki ai ke olelo iho ua noho mana ka Ike ame ka Naauao a ke Akua i haawi ai i kekahi o Kana mau kauwa haahaa loa, ma Kona keehina wawae ne, noho i haku a i mea mana e hooponopono ana i kekahi o keia mau aupuni materia. Ae-e kuu haku Barona, ua loaa na mea huna pohihihi elua e hiki ai ke lele ke kanaka maloko o ka lewa me he manu la, a e luu oia iloko o ke kai me he i'a la. He moeuhane keia na'u i moe mau i ka hapa nui loa o na po ame ke ao nohoi, iloko o kela ame keia makahiki i kaa hope ae nei. E ike ana au i ko'u lele ana maloko o ka poiuiu o ka lewa, e paio ana au i kekahi wa me na wiliau makani ma ka lewa, e lele ana au me he manu la ma o a maanei, elike me ko'u makemake, a i kekahi wa e heihei ana au me na kohola, ame na niuhi holo moana, maloko o ka opu o ka hohonu. Aka, i keia la, ke ku nei au maluna o kahi a ke kanaka akeakamai i olelo ai, o ke Dala oia ka Mana o ka Naauao, a o ka Naauao i hookele a i alakai pono ia, e hoohanau ana ia i Dala, ke kumu e hanau hou ai he Naauao. E kuu haku Baroona, eia kekahi loina a'u ihoomaopopo ai i kona oiaio:Aole hiki ka Naauao ke ole ke Dala, e poho ana ke Dala ke ole he Naauao pololei a hoopono. E hui ka Naauao pono, pololei a hoopono me ka ikaika hooulu o ke Dala, alaila, e kahe ana ka wai mai @aio aku o ke kumu o ka mauna a hoea i kona piko, e lele ana ke kanaka i ka lewa me ka maalahi, e haaheo pu ana oia me na i'a o ka moana, a e hoolohe ana ka hekili i kana kauoha, a o ka uwila i kana hookauwa ana.  Nolaila, e kuu haku Barona, o kuu moeuhane ke ku nei ia ma ka paepae o ka heiau hoano o kona hookoia ana."

      Alaila, me ka mino aka, ninau aku la ka Porofesa:

      "E hookoia ana anei ia moeuhane au, e Mr. Porofesa?"

      "Ae-ae-O-o-e ko ana!" wahi a ua Porofesa nei i pane aku ai me ka eleu ame ka piha hoihoi.

      "Mr. Porofesa," wahi a ka Barona i ninau aku ai i ua Porofesa nei, "Pehea la ka loihi o wa manawa e hala ana ia oe ma ka hana ana i keia kupaianaha a kou noonoo kamahao i noonoo ai, a hoea aku oe i kona paa ana?"

      "Manao au e hala ana paha ia'u hookahi makahiki okoa a oi, alaila, lilo ia i mea kino maopopo e hiki ana ke hoopaia ka lima a ikeia e ka maka o ke kanaka. Aka, e kuu haku Barona, nokeaha la oe i apahu pu ai i kau ninau ma ka mea wale no e pili ana i ka lilo ana ae o kuu moeuhane punahele i mea kino maoli a koe kona waiwai io, oia hoi, o kona oni ana, lele ana, e holo ana, elike me ka'u i moeuhane mau ai nona? Ua Manao anei oe e kuu haku Barona, aole e hiki ana i keia moku ke lele, ke holo a ke oni iloko o ka moana? No, no my lord baron, ma ka olelo a ka Haku Moneka Karisto, 'Wait and Hope.' (E kali a e Manaolana)"

      I keia wa haawi ae la laua i na lulu lima aloha ana, a huli ae la o Sir Reginald Elphinstone, a hoi aku la no kona home, oiai hoi ka Porofesa i huli mai ai a hoi aku la no kona hale, kahi ana i hoohala ai he mau la ma ke kaha ana i kekahi mau kii ame ka hoolala ana i kekahi mau mea, ana i manao ai he mau mea ia e hoolawa loa ai i ka hololea o na hana ana e lawelawe aku ai no ka hoohua ana mai ame ka hanau ana mai hoi o na tausani Dala a ka Barona i haawi mai ai iaia i ka mea kino i hapaiia e kona naauao, a o ua mea kino la, oia ka moku Eteriuma, e lele ana ma ka lewa, e holo ana ma ka ili kai, a e oni ana maloko o ka opu o ka moana, mamuli o ka ikaika hoonee o ka uwila.

      Elua paha pule i hala i ua Porofesa nei ma keia hana, a hiki i kona makaukau ana me na keehina mua o ka hana.

      I kekahi la, haalele iho la ia i kona rumi a hele holoholo aku la ia no ka uwapo i kapaia London Bridge. O ka hora 10 paha ia o ke kakahiaka oia la, alaila, kau iho la ia maluna o kekahi waapa, a holo aku la i kai o ua muliwai la, ma ke ano holo hoohala manawa wale no, aka, aia nae iloko o ua Porofesa la he manao hooko hana no.  

      Oiai ia e holo ana, aia kona mau maka ke nana 'la ma kela ame keia aoao o ka muliwai. A mamua o kona hiki ana aku i kahi i kapaia o Blackwall ike ae la ia i kekahi olelo hoolaha e kau mai ana ma kekahi papa.

      O keia wahi ana i ike aku ai i ka olelo hoolaha he pa kapili moku, a o ka olelo hoolaha ana i ike aku ai, e hoike ana ia, he pa kapili moku ia no ke kuai lilo loa, a i ole, no ka hoolimalima paha.

      Nolaila, pae aku la ia ma keia wahi. Hele aku la ia a loaa ke kanaka nana e kiai a e malama ana i ua pa kapili moku la. Alaila, hele makaikai aku la keia malalo o ke alakai ana a ke kanaka kiai, ia loko o ua pa la.

      I ka pau ana o ka ia nei nana ana i ua wahi la, ua 'hooholo koke iho la keia, he wahi kupono loa ia no ka hana i manao nui ia ai e ia. Ia wa ninau aku la keia i ke kanaka kiai o ua wahi la i ka inoa o ka mea nona ua wahi la. Ua haiia mai la nohoi iaia. Aka, ike iho la keia, he lehulehu loa ka poe i kuleana i ua wahi la, aka, aia nae lakou apau malalo o kekahi hui. He hui loio keia, a oia poe no lakou keia hui, o lakou no na ona o keia pa kapili moku. O ke keena oihana nae o na luna nui o keia hui, aia maloko o ka hale nona ka inoa o Lincoln's Inn.

      Nolaila, haalele keia i ka pa kapili moku a hele pololei aku la keia no Lincoln's Inn. I kona hoea ana aku ma ke keena o na luna nui, hoike koke aku la ia i kona makemake. Mahope iho o ka hala ana o kekahi wa o kona kamailio a kuka pu ana me ua mau luna nui la o ka hui, ua lilo mai la iaia ka hoolimalima o ua pa kapili moku la. Hanaia mai la ka palapala hoolimalima iaia nei no ka manawa o elua makahiki, a ma ka uku hoolimalima hoi i kupono i ko ia nei makemake.

      Ma ka wa i lilo ai o ua pa kapili moku la iaia nei (Porofesa) ua hoomaka koke aku la keia i ka hana ana i ua pa la ma ke kulana e holo pono ai na hana e pili ana i ke kapili ame ka hanaia ana o ka moku. Ua kukuluia he mau hale hana nunui, na wahi e hanaia ai ka Eteriuma ame ka uwila, ame na mea paahana e ae he nui.

      I ka paa ana o keia mau hale ame ke ku ana o ua pa nei ma ke, kulana hololea loa elike me ka ia nei i hoolala ai, aia hoi, ua hoomaka aku la keia e hoolaha no na paahana. I keia wa i hoomaka ai kekahi hana koikoi loa, e hoopilikia nui ia ai ka noonoo o ua Porofesa la.

      Mamuli o keia olelo hoolaha, ua nui na kanaka Pelekane i hele mai imua oia nei no ke noi hana; aka, ma ka wa i kamailio ia ai ka uku hana, ua kaki mai la na poe paahana i na uku, aole i ka@a mai ka nunui ame ke kiekie, oiai hoi keia i haawi aku ai i ua poe la i na uku maa mau e ukuia ana e na hale hana e ae. Aka, ua hoole loa keia poe kanaka, oiai nae he poe lakou i nele i na hana, a o ka hapa nui loa hoi o lakou he mau wahine a he mau keiki ka lakou e noho ana ma na hale i nele maoli i kahi huna palaoa @@@e kahi hauna paakai. Me ka ike no o keia poe i ka nele o ko lakou poe ohana i ka ai ame ka i'a, aole ae iki lakou e lawe i ka uku maikai a ka Porofesa i haawi aku ai ia lakou. Ua hoole loa mai lakou me ka hoopuka pu mai hoi i na huaolelo ha@@i a ku i ka hoonaukiuki.

      Olelo okoa mai kekahi poe o lakou: Ua oi aku ka pono e inu ka lakou mau wahine ame na keiki a lakou i ka makani, a e aahu hoi lakou i ke anu ame ke koekoe, mamua o ko lakou ae ana e hana no hookahi dala Pelekane, no elua dala a hoea i ka elua me hapalua dala o ka la.

      Ua koi mai lakou, i elua dala ka haahaa no ka la a pii aku elike me ke ano o ka ike ame ka makaukau i loaa i kela ame keia kanaka. No keia hana pookoi a keia poe paahana Pelekane i ua Porofesa nei, aole i kana  mai kona hoonaukiuki, a me ka inaina ame ka huhu, kipaku aku la oia i ua poe la, me ka olelo ana:

      "E hele oukou a e hanai i ka oukou mau wahine me na keiki a oukou i ka makani, a e hoaahu hoi ia lakou i ke anu ame ke koekoe, mamuli o ko oukou palaualelo. Aka, aole loa e loaa i ko oukou kanaka Pelekane ana hookahi keneta o ke Dala Pelekane a kuu haku Barona maikai, ke kanaka Pelekane i makemake e haawi i na kokua aloha ana i na kanaka paahana Pelekane, i makemake maoli e hana no ka uku kupono elike me ko na paahana e ae o Ladana nei, ma o ke Dala Pelekane la ana i waiho lokomaikai mai ai malalo o ka'u hoohana ana. E hele oukou - e hele pela!"

      Pane mai la hoi kekahi poe ma ka hoino pilikino maoli ana mai iaia nei, no kona ano Geremania, me ka olelo pu ana mai, na ia ano ona i hana aku i ka hana kaulike ole me lakou.

      Aka, ma ia wa nohoi, o ka poe i ae i na uku a ua Porofesa nei i hoike aku ai, ua komo ae la lakou i ka hana, a na keia poe i hai mai i ua Porofesa nei, o ka poe ana i kipaku ai, he poe lakou noloko o kekahi Hui Paahana a Ladana. Ia wa i ike iho ai ia, ua pololei loa kana mea i hoike mua aku ai i ka Barona, a ua ike pu iho la ia, ua hoopakele kona makaala ana i ka pono o kana hana, no kona ae ole ana i ke koi poo-ko'i a kela poe paahana. O ka poe hoi i lilo mai i poe lima hana, he poe Pelekane no lakou, aole nae lakou i kono iloko o ka Hui Limahana, aka, he poe lakou i makaukau mau e hana ma na hana apau i kupono i ko lakou ike, no ka uku e hoonele ole ia ai ko lakou mau home me na wahi mea ai, e ola ai ka ohana.

      O ka nui o na limahana i makemake ai ua Porofesa nei, he 200 no ia, aka, iloko o hookahi mahina a ko ia nei hoao ikaika ana e loaa ona poe limahana Pelekane, ua loaa iho la iaia mailoko mai o kela ame keia kanalima kanaka i noi mai iaia i hana, he hookahi kanaka hana, nolaila, i ka pau ana o hookahi mahina okoa o kona imi ana i poe limahana i kupono me ka papa hoonohonoho o na limahana o kela ame keia mahele hana i kupono no kana hana, he iwakalua wale no poe paahana i loaa iaia.

      Nolaila, i kona ike ana, aole lawa ka huina o na limahana i make make ia e ia, ua hoouna loa aku la ia i poe limahana i Geremania. Hookahi mahina o kona ohi ana i na limahana i kupono i kona makemake mai Geremania mai, ua lawa iho la na limahana i makemakeia e ia. Ua like me ewalu mahina mai ka la i hoomaka mua ai ke kamailioia ana no ka moku lele a ka Porofesa maloko o ka rumi hookipa o ka hale o ka Hui Akeakamai Kulukehau, a hoea iho la ua Porofesa nei i ke kiekiena o kona hoolawaia ana me na makaukau apau e lawelawe aku ai ia i kana hana kupaianaha.

      Maalo ae la na la, mahuahua ae la na hebedoma, e hoopuipui ana i na heluna malama, aia na limahana o kela ame keia apana hana ke hana la i ka lakou mau hana.

      Ikeia aku la na kaa e lawe mai ana i na pohaku minerala iloko o na hale hana o ua Porofesa nei. E pu-a ana ka uwahi o na hale hana. E loheia ana ka nu ame ka nakeke ana o na enegini mahu-ka halulu o na mea paahana. He mea oiaio, ua hanaia ka hana e loaa ai na mea paahana e ku ai ke kino o ka moku kupaianaha a Porofesa Salakenabuga.

      He mea oiaio hoi i ka hala ana he mau heluna malama lehulehu iki, ua ikeia aku la ka pii ana ae o kekahi mea kino hulali hinuhinu i ano like loa kona kulana me kekahi mea kino poepoe i hoomiomioia kona mau welau.

      I ka nee hele ana o ka hana a hiki i ke aneane ana e pau ka hapa nui okoa o na mea i makemakeia no ka hooalwa pono loa ia ana o ke kino o ka moku a pela nohoi me na mea o loko o ua moku la, e laa na keena hooluolu, na rumi o na enegini hoonee i ua moku la, ame kekahi mau mea he nui o loko o ua moku la, ua pau aku la ka nui o na paahana i ka hookuuia e ia, a koe kakaikahi mai la kekahi poe. Pela ka hele liilii ana o ka hoopauia ana o na lima hana, elike me ka panaiki ana mai o ka hana, a hiki wale i ke koe ana iho o ka poe pena a hoonani ia loko o na rumi o ka moku.

      A mahope, ua hiki mai la ka la hope loa e hookuuia ai na poe paahana a pau. Ua hookuuia aku la ia poe, me na olelo mahalo mai ka Porofesa aku.

      He mea mau i ua Porofesa la, ka olelo ana imua o na kanaka paahana na lakou i hana i ke kino o ka moku, e hana ana oia i ua moku la i mea hoikeike nana me ka wa hoikeike nui o Ladana ma ia hope mai. No ia mea, ua lilo keia hana ana i keia moku kupaianaha i mea i kamailio nui ole ia ai e ua poe kanaka la, oiai, he hana maa mau no ia i hanaia e na poe akeakamai a puni ke ao nei.

      Ua olelo hoi kekahi o ua poe paahana la, he hana hoopau dala wale no keia me ka waiwai ole. Aka, ua paa ka moku, a ua pau na hemahema apau. He kino nani ame ka maikai kona, a ua nui kona mahaloia e ka poe apau i lawelawe i na hana i hanaia ai maluna iho ona.

      Aka nae, mamua o ko ua Porofesa nei hookuu pau loa ana i na kamana, ua kauoha ae la oia ia lakou e hana i pa papa paa loa e hoopuni ana i kahi i ku ai ka moku, oiai hoi, ka halau hale i hanaia ai ua moku la i wawahiia ae ai.

      Ua hanaia keia pa ma ke ano akea a nui laula nohoi, elike me ka ua Porofesa nei i manao ai he pono. I ka paa ana o ua pa la, ua lilo iho la ua moku la i waiwai kapu a makamae loa. A ua makaukau hoi ia no ka hoohanaia ama aku ma na alahele e kauohaia ai ka ikaika hoonee iloko ona e hana aku, elike me ke alakai ana a ke noeau ame ke akamai o ka Porofesa i hoopaaia ma na ki hoohana o kona enegini hoonee.

      Ma ka po o ka la i pau ai ka hana hope loa i hanaia e na poe pena me hoonani o ua moku la, oia ka po i hele makaikai ai ua Porofesa nei i na wahi apau o ua moku la, me ka noii ana ame ka nana pono ana i na mea paahana i pili i ka enegini hoonee, na puka hoomaha uwila, hoomaha @a, hookuu ea, a pela aku, a pela aku. A ua hooholo iho la oia me ka hauoli nui u@ pono na mea apau. Puana ae la no nae ia:

      "E kali a e manaoiana." (Wait and Hope)

(Aole i pau)

 

HOIKE AHAHUI OPIOPIO

 

      Ma ka luakini o Anehola, Kauai, ua malama ia he Hoike Ahahui Opiopio, makahiki hou i ka la 1 o Ianuari, 1899.

      Ma keia hoike ua hoowehiwehi ia ka luakini me na wehi like ole o ke kuahiwi, ke nana aku, me he mea la aia i ka waokele, kahi i akoakoa ai keia anaina nui me ka hauoli makahiki hou, o na hana Karistiano.

      Na kula i akoakoa mai: Anehola. Koolau ame Kilauea. Ua malama ia na hana me ka hoomalu ana a ke Komite Hoeueu, J.K. Apolo: me ka himeni aoao 165 Hokuao, me ka pule a Rev. S.K. Kaulili, me ke mele hou ana i ka himeni aoao 186 Hokuao. He mau olelo hoolaha mai ke Komite Hoeueu mai, ka Peresidena Geo. W. Huddy, ke kahu Rev. S.K. Kaulili ame ke Kahu Kula Sabati Apana Geo. W. Mahikoa. Ua mele hou ia mai ka himeni 44 euanelio, malama i ka lulu dala, huina i loaa mai $10.25.

      Kahea ia ke Kula o Koolau, ma keia kula ua ike ia aku ko lakou ohohia i ka hana a ka Haku, he nani na mele, a he mikioi na haawina Baibala, ka haule ana o Akamu ma i ka hewa nie ka olelo hoopai a ke Akua, he ku i ka eehia na mea i hana ia mai e lakou. Huina haumana he 30. Manawa he 22 minute.

      Ke kula o Anehola, he nani okoa nohoi keia, he wai meli na himeni, na haawina he oi aku ka paanaau o na pauku Baibala i puana ia mai e lakou nani no. Huina haumana he 32. Manawa 12 minute.

      Ke kula mai o Kilauea, ma keia kula ua kapa ia aku ia ma keia la, na hoku hele o Kauai Hikina, ma ka haawina ua hoike ia mai e lakou na kaula ame ka lakou hana i ka wa o Karisto a mamua aku ona, ame ke ano o ko lakou mau inoa, na himeni ua mele ia mai me he kuaua la no ka hooilo ka owe i ke alo pali o Kalalea. Huina haumana he 22. Manawa 14 minute.

      Himeni hui aoao 93 Lei Alii, ma ka pau ana o keia mele, ua kuu ia mai he mau olelo paipai mai ke kahu mai, Rev. S.K. Kaulili, Mr. Ekekela ame ka Peresidena Geo. M. Huddy, na lakou i uwehe mai ka nani o na mea i hana ia i keia la, me he wai mapuna la e pipii ana i ke ola mau loa.

      Ka huina i akoakoa mai i keia la mai na haumana, makaikai, na luna o keia hana ame ke kahu, he 101. Ua hookuu ia na hana me ka himeni aoao 13 Lei Alii, me ka pule a ka Peresidena.

      A ua hoi aku ke anaina ma kahi i hoomakaukau ia ai na mea ai, ua ai a lawa i na kohi kelekele a ka puukolu.

      Aloha Hape Nuiia kakou apau loa.

      WILLIAM HUDDY

      Kilauea, Kauai, Ian. 6, 1899.

 

I Kou Wa e loaa ai i ke Anu Ino

 

      He mea pono ke loaa ia oe ka laau maikai loa, a oia no ka Laau Kunu a Kamalena.

      He mea pono ke loaa ia oe kekahi laau e hoola hikiwawe ana ia oe, aole hoi oia wale no, aka, e mau ana ke ola. He mea pono ke loaa ia oe ka laau e oluolu ai na ake mama, a oluolu hoi ka puka ana mai o ka male.

      He mea pono ke loaa ia oe ka laau e kaupale aku ana i kou loohia ana i ka ma'i numonia.

      He mea pono ke loaa ia oe ka laau maikai a palekana o ka inu ana.

      O ka Laau Kunu a Kamalena (Chamberlain's Cough Remedy) ka laau hookahi i hiki ke loaa na mea i hoakakaia ae la. Ua kaulana loa keia laau no ke ola ana o na kunu ino loa a puni o Amerika Huipuia, a ma na aina e aku nohoi he nui. He lehulehu loa no nae na laau e paonioni pu  nei me keia laau, aka, ma ka hikiwawe loa o ke ola o ke anu ino, aohe lua o keia laau, he hia-pa'i-ole keia, a ua mahalo loa ia keia laau ma na wahi apau. E kua@ia ana e na poe kuai laau lapaau apau. O Benson, Smith & Co. (Kaupalenaia) na Agena no Ko Hawaii Pae Aina.