Ka Nupepa Kuokoa, Volume XXXVIII, Number 9, 3 March 1899 — Page 1
| This text was transcribed by: | Liisa Laurila |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXXVIII. HELU 9. HONOLULU, POALIMA, FEBERUARI (March?) 3, 1899. NA HELU APAU 2744
Hoolaha Kumau.
--------------------------------
W.C.Achi. Enoch Johnson.
ACHI & JOHNSON,
LOIO! LOIO! LOIO!
Keena Hana, Helu 10 aoao Komohana Alanui Moi.
--------------------------------
W. R. KAKELA
Loio a he Kokua ma ke Kanawai
HE LUNA HOOIAIO PALAAPLA.
2370
--------------------------------
LYLE A. DICKEY
Loio a he Kokua ma ke Kanawai.
Notari no ka Lehulehu.
E hookoia na hana pili kanawai apau mai na Mokupuni mai.
Kihi o alanui Betela me Moi. Pahu Leta 786. Telepona 806.
--------------------------------
Papa! Papa!
Aia ma kahi o
LEWERS&COOKE
(Lui Ma.)
Ma ke Kahua Hema o na Alanui Papu me Moi.
---
E LOAA NO NA
Papa Nouaiki
O kela a me keia ano.
---
Na Pani Puka.... ---
Na Puka Aniani... ---
Na Olepelepe..... ---
Na Pou........ ---
--- Na O'a......
--- Na Papa Hele......
--- Na Papa Ku......
--- Na Papa Moe......
---
Na Pili Hale
O na Ano apau.
A me na
Wai Hoohinuhinu Nani
O na Ano apau.
---
Na Palaki o na Ano he Nui Wale.
---
Ke haiia aku nei oukou e na makamaka a pau, na makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka
Uku Haahaa Loa
E like me ka mea e holo ana mawaena o
Laua a me ka Mea Kuai.
--------------------------------
E Hele Mai e Wae no Oukou Iho.
--------------------------------
--------------------------------
HE ANAINA IKE.
---
Ma ke ahiahi Poalua o keia pule iho la i hoea aku ai imua o Komisina Kenny o ka Oihana Kuhina Beritania, he puulu o na kanaka Pelekane i hiki aku paha ko lakou nui i ka haneri, malalo o ke alakai ana a Lunakanawai Stanley, ma kahi noho o ua Komisina la, ma "Muolaulani Hale," ma Kapalama ae nei. A malaila keia poe i hoike aku ai i na leo mahalo i ua Komisina la no kana mau hana maikai a kokua i ka Hui Honolulu Cricket Club.
E haalele iho ana ua keonimana la ia Honolulu nei, a no ia mea i alana aku ai kona mau hoa kanaka i na hoomaikai ana iaia.
--------------------------------
Ke Aloha o kuu Makuahine
---
KE ALOHA O KA'U MEA I ALOHA AI
---
Ka Mana o ke Aloha.
---
He Moolelo Walohia.
---
(Unuhiia e Hoolale-a-Ka-Ua-Kukalahale no "Ke Kilohana Pookela o ka Lahui Hawaii.")
---
MOKUNA XI.
---
"Ae; ua maikai iki hoi au. Ua hiki pono ia'u ke hanu, a ua ike au i ka pumehana o ko'u kino; eia nae, he ano opili pu ko'u mau lala."
"He ano molohai pu kena au e ike la. Pehea la; e hapai iki ae paha au i kou poo a kiekie?"
"Ae."
I kela wa lalau aku la o eGorge i ka uluna a hoomohalahala ae la me ka hana ana iho hoi a maikai; alaila, hoomoe iho la i ke poo o Alice maluna o ua uluna la.
Me ka mahiehie maikai o kona mau helehelena haawi mai la oia i kana mau hoomaikai ana, a ua hoopiha loa ia ko George uhane me ka hauoli.
"Ano, e kuu Alice aloha," wahi a George, "e pono oe e hiemoe a e hooluolu hoi, a mai noho oe a kamailio."
Kunou malie mai la ko Alice poo, a haule aku la ia hiamoe, oiai hoi, o George i noho iho ai ma ka aoao o ka moe.
Mahope iho o ka hala ana o kekahi mau minute o ko George noho ana me ka nana malie ana aku nohoi ia Alice, ike aku la ia i ko Alice oni ana ae a hapai ae la ia i kona lima a paa ae la i kona umauma, a ua lilo hoi keia i mea no George e puiwa ai.
"Aohe pilikia," wahi a Alice i pane mai ai, "ua pololi ia paha au. Ua hele ko'u opu a aneane pu. Ina paha e komo wahi mea ai aku ana, alaila, maikai loa."
Hoomaopopo iho la o George, ua makemake kana mea i aloha ai i wahi mea ai; a o ka mea pilikia nae, aole oia i ike i kahi e loaa ai ia mea. Ua nui loa kona kaumaha, a me ia kaumaha e loloku ana iloko ona, pane mai la ia:
"E kuu Alice aloha, ua aneane e ao, a ma ka wa e hoi mai ai ka mea nona keia wahi hale a kaua e noho nei, e hoouna aku no au iaia e kuai i wahi mea ai mau."
I keia wa nohoi, ua huli ae la ia a nana aku la ia ma o a maanei o loko o kahi rumi, a kie aku la ia i ke poho kopaa ma ka paepae o ka puka aniani.
Hele aku la ia a loaa ua poho kopaa la, a i kona nana ana iho iloko, ike iho la ia i kekahi mau wahi puupuu kopaa. Ike aku la hoi ia i ka pahu waiho mea ai a kahi kanaka, hele aku la ia a wehe mai la i ke pani. Ike aku la ia he wahi omole wai aiai. Hoao iho la ia i ka wai o ua omole la, a hoomaopopo iho la ia, he waina aiai. Nolaila, hoi mai la ia a ma ka aoao o ka moe noho iho la.
Alaila, haawi aku la ia ia Alice i kekahi puupuu kopaa, a ninini iho la i ka waina iloko o kekahi kiaha. Ma ka wa hoi a Alice i omo aku ai i kahi puupuu kopaa a pau, ua ano konini ae la ka ikaika o kona wahi houpo, a ano kahanai iki mai la hoi ka lapa ana a ka pololi iloko ona.
Pela mau ka George hanai ana iaia (Alice) i ke kopaa, me ka hoohainu ana hoi i ka waina a hki wale i ka hoi ana mai o kahi kanaka nona ka hale.
"Pehea?" wahi a ua wahi kanaka la i ninau mai ai ia George.
Kuhikuhi aku la ko George manamanalima ia Alice, me kona pane leo ole ana ae hoi.
"Auwe no ka hoi ka pomaikai nui wale o kaua! Aka, malia o ke ola kai loaa iaia, a ua lilo aku kona noonoo maikai mai iaia aku? Pehea, he hoomanao no nae paha ia?"
"Ae," wahi a George.
"Ina pela, ua palekana ia."
"Ke lana loa nei ko'u manao e loaa mai iaia ia haawina pomaikai."
"Ea, e nana mai oe i keia mau mea i loaa ia'u iloko o ka pahu kupapau," wahi a kahi kanaka i pane mai ai, me ka hoikeike ana mai hoi i kona poho lima akau i hele a piha i na pohaku momi.
"Pehea, ua hoonalowale aku nei mae paha oe i na moali apau o na mea a kaua i hana aku nei maloko o ka pa ilina?"
"Oia ke kumu nui o ko'u haalele ana iho nei ia oe. A eia kekahi mau mea i loaa mai nei ia'u," a hoikeike mai la ia i kekahi mau kui hao nunui eha.
"Oiaio ka hoi," wahi a George i hooho ae ai, me ke ano hikilele, "ua poina loa ia maoli au i ka hai ana aku ia oe no keia mau kui."
"O ke kumu nui i loaa mai nei ia'u o keia mau kui, oia ko'u pahaohao loa ana no ka hiki ana ia oe ke a'e aku iluna o ka pa; nolaila, hele aku nei au ma kahi au i pii aku ai iluna o ka pa. Ia'u i hiki aku ai malaila, ike iho la au i keia mau kui, a hoomaopopo iho la au, pela iho la i kau ai oe iluna o ka pa. Ua wehe mai hoi au i keia mau kui a hana aku la nohoi i na mea e nalowale ai na moali o kou mau kapuai ma ia wahi. Mamua o ke kani ana o ka aina awakea o keia la, e paa loa ai i ka palaina puna ia ka luakupapau, a he mea maopopo hoi, aohe kanaka hookahi mawaho aku ou ame a'u, ua hemo mai ke kino o ke kaunawahine nei mailoko mai o ka pahu kupapau."
Kaomi aku la o George i ka lima o kahi kanaka.
"Ea, ke manao loa nei au, ua puhipuhi laau aloha ia paha au e oe, oiai, aole o'u manao iki, he kanaka e ae kekahi mawaho ae ou, i hiki ke hana mai imua o'u i na hana e poina ai au i ka'u hana."
"Auhea oe, e kuu makamaka maikai," wahi a George, "i wa okoa aku e hoike aku ai au i ka'u mau hoomaikai ana ia oe. O kau hana i keia wa, e hele oe e kuai i wahi kai pipi maikai loa, me ona wahi moa i omaia, i waina Bordeaux ame na mea ai maikai no apau e loaa ana ia oe, a mai nana oe i ka nui o ke kumukuai o iaamau mea."
"Ua kakahiaka nui loa paha. Aole paha e nui ana na wahi mea ai maikai e loaa ana ia'u i keia wa."
"E kauoha aku oe e hanaia na mea a'u i hoike aku la ia oe, o ke dala paha ka mea e hiki ai na mea apau, a e loaa ai hoi ia mau mea ia oe. Mai nana oe i ke dala. Eia mai he bila dala o 500 hapaha farani," a haawi mai la o eGorge i ua wahi kanaka la i ka bila dala i ua wahi kanaka la.
I kela wa, haalele iho la ua wahi kanaka la i ka hale, a hele aku la e hooko i na mea a George i kauoha aku ai.
---
MOKUNA XII.
Oiai o Robata de Malatere e huli ana ia George Lamabereta ma kahi i kapaia Bois de Boulogne, pela hoi ma na kapa o ka muliwai Seine, aia no o George Lamabereta e noho ana maloko o kahi pupupu hale o Petero Rikeke, ma kekahi pakaukau poepoe, a e kamailio aku ana ia ia Alice no ke ano o kona pakele puaianaha ana mailoko mai o ka luakupapau i kanu ola ia ai oia.
Ua pau ae ka laua paina ana i ko laua aina kakahiaka, a e ikeaia aku ana nohoi ke koena o na mea ai ono maluna o ke pakaukau; a o kahi kanaka hoi, oia o Petero Rikeke, ua pauhia loa ia oia i ka hiamoe maluna o kekahi wahi noho ma ke kihi o ka hale.
"Ae; he kupaianaha maoli io no keia ola i loaa ia'u. He hana mana maoli no keia i loaa mai ia'u mai ke Akua aloha mai," wahi a Alice, ma ka wa i pau ai ka George hai ana aku iaia i kana moolelo. "Ma ka wa i ala ae ai au mai kela hiamoe kulipolipo mai a'u i hiamoe ai, me he mea la ua make maoli no au, ike iho la au ua kanu ola ia au. Aole i kana mai ko'u makau ame ka weliweli lua ole. Ua okala koke ae la ko'u lauoho a kunahihi ae, a ia wa i uwe kapalili ae ai au me kuu ikaika apau.
"Ia wa, ua hu mai la ko'u hoomanao walohia ana nou, e George. Aole i kana mai ko'u aloha ia oe. O oe wale mai la no apau imua o ko'u mau maka, me he mea la nohoi e noho mai ana no oe ma kuu aoao. Ia wa au i nalu iho ai iloko o'u. 'Eia no paha oe maanei, e kuu George, a ina pela, e hiki ana no ia oe ke hoopakele ia'u.' He oiaio, e George, aole au i kuhihewa ma keia manao ana. Ua lohe oe i kuu uwe ana, a ua hoopakele io mai oe ia'u. E George, he anela oe mai ke Akua mai."
"Pela no. Ua haawi hou mai ke Akua ia oe iloko o na kipona o kuu aloha, a hoihoi mai la hoi i ka pomaikai ame ka hauoli i aihueia mai a'u aku."
"He mea oiaio loa kau e olelo mai nei e George."
"O ka mea oiaio a'u e manao nei, e kuu Alice aloha, oia no ke aloha mawaena o kaua, a oia ka mea i lanakila maluna o ka make ame ka luakupapau. Ke nana aku nei au i ka hora hauoli e hookokoke mai nei nou ame a'u, ka hora hoi o kuu hauoli mau."
"E George, aloha ino no ka hoi oe. Ke hookaukolo mai nei no kau mau olelo nou no ame a'u; aka, ua poino paha oe i ka hoomanao ana iho, ua mareia au i ke kane?"
"E kuu aloha," wahi a George i pane aku ai, "ua mokumokuia ke kaulahao nana i nakiikii a hoopaaia oe me ke kanaka au i aloha ole ai, e ka anela o ka make. E hoomaopopo oe, aia mawaena ou ame Kauna Berene, ka waha o ka luakupapau ame ke pani pohaku mabala o ka holowaa i waihoia iho ai oe. Na'u ponoi hoi oe i lawe mai mai loko mai o ka pahu kupapau puanuanu, a mai na lima koou huihui mai hoi o ka anela o ka make, a nolaila, e kuu Alice, na'u oe, a na'uu wale no. Aole loa au e haawi, a e hoihoi hou aku hoi ia oe i kau kane."
"Aka, e eGorge, pehea la e pau ai ke kanawai o ka aina? Mamuli oia mea, e hiki ana no i ke Kauna ke kii mai ia'u, a nele oe, e kuu aloha."
Ike aku la o George i ka haloi ana ae o na waimaka ma na maka o Alice, aka, ua huli ae la nae kona (Alice) poo ma kekahi aoao. A na Alice hoi i uwe, ua uwe pu iho la nohoi me George a liuliu wale pane aku la ia:
"Ua make hoi ke Kaunawahine Berene! He elua wale no mau kanaka ma ke ao nei apau i ike, eia ke ola nei ua Kauna wahine la. Owau ame kela wahi kanaka opu lokomaikai e moe mai la ma kela noho, ka mea hoi nona keia wahi pupupu hale a kaua e noho nei. Me ke dala, e hiki ai ia'u ke pani aku i kona waha, a hiki ole hoi iaia ke kamailio ae no ka mea e pili ana i ke ola hou ana o ke Kauna wahine Berene."
"E George," wahi a Alice i pane mai ai, me ka nana pono ana mai o kona mau maka maluna o George, me ka ninau ana mai hoi. "Heaha la kou manao?"
"Makemake au e haalele iho ia Parisa nei, oia hoi, e haalele ia Farani nei, ma kou wa e ikaika ae ai, i hiki ai hoi ia oe ke hele pu me a'u ma keia huakai a'u e makemake nei e hele aku. Ia kaua e hele aku ai, ma na inoa okoa loa no kaua e hele aku ai."
"Ea, e George, ua noonoo uluahewaia paha oe? E manao anei hoi oe, e haalele au i kuu ohana?"
"E haalele kaua i na mea apau i keia wa, a e imi aku kaua i wahi no kaua e malu ai, a hiki i ka wa e ikea ai ka pono mawaena ou ame a'u, e lani ana iluna a e honua ana ilalo nei, alaila, noonoo mai kaua ia hope nei."
I keia wa i palulu ae ai o Alice i kona mau lima i kona mau maka, uwe iho la, a me ia uwe nohoi, pane mai la ia ia George:
"Aole! Aole! Aole hiki ia'u ke hana pela. He mea oiaio, i ko'u kanu ola ia ana iloko o ka luakupapau, ua manao ko ke ao nei apau, ua make au, a ua kaawale loa aku ka uhane ola mai a'u aku. Oiai e mau ana no ka a ana o ke kukui o ke ola iloko o'u, pela no ka mau ana o ke kuleana o ke Kauna Berene maluna o'u, mamuli o kona mare ana ia'u, elike me ke kanawai o ka aina ame ke kanawai nohoi o ke Akua. Aohe hiki ia'u ke makaala ae i keia aelike laahia i hanaia me ia. Oiai hoi e aneane ana e pio iho ke ola iloko o'u kahi i kuleana ai o ka materemonio mawaena o'u ame Kauna Berene, aia hoi, ua hoopakele mai la oe ia'u mai ka lilo ana aku iloko o ma make. Ua a hou ke kukui, ka lama o ke ola iloko me ka ikaika; a ma ia mea ua hoopaa ikaika hou ia ke kaula materemonio mawaena o'u ame ke Kauna Berene, a ua mahuahua hou kona ikaika e paa hou nei maluna o'u. He keiki ka'u, e George, aole hiki ia'u ke haalele iaia."
"Aole anei e hiki ia'u ke kaili malu mai iaia mai kona makuakane mai, a hiki nohoi ia kaua ke lawe aku iaia."
"E George, he hana menemene maoli keia au e manao nei."
"E hoomanao hoi paha oe, ua oi maoli aku ko'u aloha ia oe mamua o na mea e ae apau, aole hiki ia'u ke ola ke ole oe. O ko'u makemake wale no o kou lilo loa ia'u, a na'u mau loa hoi oe. E hoolohe mai oe, e Alice, me ka hoomanawanui. Ma kou wa e waiho ana iloko o ka luakupapau, ua makemake loa au e pepehi ia'u iho, a ina e hoi hou aku ana oe me kau kane, alaila, e hooko ana no au i keia manao o'u. Eia no me a'u he wahi pu panapana, a he pahi; a ma ka wa mua loa au e olelo mai ai, aohe ou aloha ia'u, a e hoi hou aku nohoi oe me kau kane, alaila, e hoohana no au i keia mau mea paahana maluna iho o'u imua ponoi no ou."
"Alaila, e kuu George, e aho hoi ha, o ko'u ola nei kau e lawe mua aku."
A ia wa i huli mai ai ia a apo mai la i ka a-i o George me ka hiolo ana iho o kona mau waimaka.
"Aole; aole au i hoopakele ia oe mailoko mai o ka luakupapau, a mai na lima mai hoi o ka make no ko'u manao ana e lilo aku kou ola mai a oe aku, a i ole ia, e kaawale aku paha oe mai a'u aku nei; aka, ua hoopakele au ia oe, i mea nou e hauoli ai. Ua ike no oe, e mau ana no keia aloha o'u nou a hoea i ke kaawale loa ana aku o ke ola mai kou kino aku. Heaha auanei kou mea e makau ai a e hopohopo ai hoi? Aole ou kumu e makau aku ai i ke Kauna, oiai eia au maanei kahi i kiai ai ia'oe."
Maanei hoomaha iki iho la o George, a liuliu pane hou mai la ia; oiai no o Alice e puliki ana i kona a-i:
"Ina paha o ke kumu o kou kanalua ana, no kou ae ana e hele pu me a'u, elike me ka'u i hoike aku nei ia oe, mamuli ia o kou aloha i kou mau makua ame kau keiki, ka hua mua o kou puhaka, alaila, he kumu kupono io ia ma kou aoao, a'u e olelo aku ai, owau pu kekahi e komohia pu aku me oe ma ia manao walohia. O ka oi aku o ka pono au e hana ai, pela ko'u manao, oia kou hoike ole ana ae ia oe iho i keia wa, a elike auanei me ka loihi o kou noho hamau a honalowale loa ana ia oe iho mai na maka mai o ke ao nei, pela auanei e mau aku ai ka manaoioia ana, aia no oe ke waiho la iloko o ka luakupapau puanuanau. Aia hoi a hoea mai ka wa pono a'u e ike ana, e hoihoi hou mai no au ia oe i Parisa nei, a haawi aku hoi ia oe ma poli o kou makuahine aloha. E Alice, o keia ke alahele a'u i hoolala ai nou ame a'u; aka, ina he alahele hoi kau i oi aku ka maikai ame ka maalahi mamua o keia, alaila, e oluolu no oe e hai mai ia'u, a e hoolohe aku hoi au. He mea hiki no ia kaua ke noonoo a ke kukakuka no keia mea."
Alaila, hookuu ae la o Alice i kona apo ana i ka a-i o George, oi pono aku la kona poo a kuene pono iho la maluna o ka uluna, a ia wa nana mai la ia maluna o George me na maka i piha i ke aloha, aka, no kona pane ole ana mai, ia wa i kamailio aku ai o George:
"Aka, e kuu Alice, ina hoi ua oi aku ka ikaika o ka hana au i olelo mai nei he hana ia'i paa ai oe maluna o ka hua o kou opu, ame kou lilo ana i wahine na Kauna Berene, mamuli o ke kanawai o ka aina, mamua hoi o ka ikaika o ke aloha iloko ou no'u nei, alaila, e aho e lilo kuu kino nei i moe puu na ke aloha kuhihewa a'u i kaili ai mailoko mai o ka luakupapau."
"Aole!" i hooho kapalili ae ai o Alice. "Aole, e George, e pono no oe e ola, a o kou ola ana hoi no'u nei ia, a na'u hoi."
I keia wa i olino ae ai ka hauoli ma na helehelena o George, lamalama maikai ae la hoi ka oluolu wainohia ma kona mau maka, a hawanawana ae ia ia:
"Na'u oe a nau hoi au. Na'u no auanei e kiai i kou maluhia, e kuu Alice aloha."
I nei wa, ku ae la o George iluna, hele aku ia ia a hoala aku ia ia Rikeke, me ka olelo ana aku:
"E, e ala ae oe. E hoi hou aku ana au i ke kulanakauhale, a e hala ana paha ia'u he mau hora malaila. E kiai makaala loa oe i ka luhi a kaua i hoomanawanui ai, e mai ae oe i kekahi kanaka e komo mai iloko nei."
"Mai hopohopo oe no ia mea, e kuu haku," wahi a kahi Rikeke i pane mai ai.
Ia wa haalele iho la o George i kahi pupupu hale a kana aloha e waiho ana me ke ola kino ohaha. Aia maluna on a na hiona apau o ka hauoli. A ma ka nana ana aku iaia, he kanaka hou oia i keia w. O kela ano nananakea, inoino a maikai ole i hekau iho maluna ona i na wa apau mamua ae, ua nalohia aku la ia mau mea mai a iaia aku.
I kona heea ana aku i ke alanui, kau aku la ia maluna o kekahi kaa, a kauoha aku la i ke kalaiwa e holo pololei i kahi o kekahi tela hana lole o na wahine.
I kona hoea ana aku i ka hale tela, a i kona halawai ana hoi me ka wahine o ua hale la, kamailio aku la ia:
"Makemake au i ekolu lole, a e pono e hana koke ia keia mau lole a pau."
Me ka mino aka, pane mai la ka wahine tela:
"E haawi mai paha oe i manawa no makou e hana ai i keia mau olelo a paa."
"Pela no. Manao au i eha, a i ole, i elima la e hana ai oe i keia mau lole."
"Ina pela, ua pono. Heaha la ke ano o keia mau lole?"
"Elua lole silika, hookahi nae oia mau lole, he eleele. A o ke kolu o ka lole, he kasimia. E hana nohoi oe a maikai elike me kau e ike ana he maikai."
"Pehea; ua paa mai nei nae paha oe i ke ana?
"Aole."
"Alaila, e hiki ole ana ia'u ke hooko aku i kou makemake."
Ua ku ano hoka a hoaa iho la o George ia wa. Alaila, pane mai la ka wahine tela:
"Ina aole kela lede nona keia mau lole au e kauoha mai nei, iloko nei o Parisa, alaila, e palapala aku paha oe iaia i loaa mai ai ke ana, a hiki maikai ia'u ke hana aku.
"Alaila, e hala hou ana he manawa, a ua makemake loa au e paa keia mau lole iloko o ka wa a'u i hai aku nei ia'oe."
"Minamina loa au, aole hiki ia'u ke hooko aku i kau kauoha. He hana pohihihi loa ia'u ke hana i kekahi hana ke ole e loaa he wahi kumu hoohalike e hana aku ai."
I kela wa i olapa koke ae ai kekahi noonoo iloko o George, a ninau aku la ia i ka wahine tela:
"Pehea, malia paha he nui nohoi kou poe wahine humuhumu o loko nei?"
"He kanakolu paha ko lakou nui e noho hana nei ma a'u."
"Alaila, aole o'u kanalua iki e loaa ana no mawaena o lakou kekahi wahine i like ka oiwi kino me ko ka lede nona keia mau lole a'u i makemake ai e hana oe."
Ia wa alakai aku la ua wahine la ia George iloko o ka rumi humuhumu lole, a kauoha aku la i na wahine humuhumu e ku iluna. I ka nana ana o George i keia poe apau, ike aku la oia i kekahi wahine oiwi maikai i like loa me ko Alice ke ano, a manao iho la ia, o ka lole e ku ana ia wahine e ku ana no ia ia Alice. Alaila, pane ae la ia i ka wahine nona ka hale tela:
"E lawe oe i ke ana o kela wahine opio, ua like loa kona oiwi me ko ka lede nona keia mau lole. E ae mai hoi oe, e imi aku oe i elua papale i like loa ko laua ano me ko na hooluu o na lole silika elua a'u i kauoha aku nei ia oe."
Wehe ae la ia i kana buke pakeke a haawi aku la i ka wahine tela he bila dala nona ka huina o $1000 hapaha farani.
"I hea au e hooouna aku ai i keia mau mea?" wahi a ua wahine la i ninau ae ai ia George.
"I ka lima o ka la mai keia la aku, na'u ponoi no e kii mai i keia mau mea." (Aole i pau.)
---
HANINI KULANIHAKOI, UUINA POHAKU A KANE.
---
He wai hoehaa nohoi ko ka po Poalima a ao ae Poaono, i keia pule aku nei. Ua ikea ia aku ka uhi paa ana mai a ke ao opua kii-wai ma ka pea kuahiwi o Oahu nei, mai ka pea mai o Waialua, a hoea i Honolulu nei, i ka mano makaha ponoi o ka nuku o Nuuanu. I ke ao okoa no keia. O ka hele ia a hoea i ka po ana, oia ka wa i a ai ke ahi, a uina mai la na pohaku a Kanehekili. Kulukulu a hiolo iho la na kulu o na maka wai o kulanihakoi. I ka hoea ana hoi i ka hora 11 a oi o ke aumoe, ua hele na hene o na kahawai a hookeia e ka ua mea o ka nui o ka wai. Ua wailana hou ia aku la na hale o Makaaho ae nei ame Kamanuwai.
Ua lilo keia waikahe hoehaa i mea kamailio nui ia e na kanaka, oiai aia no ka ua i uka kahi i kipu ai, he huena nae na ka wai i ka nei. I ke ao ana ae, a i ke kualiilii ana o ka wai, ua ku-ka-halelo ke a o kahawai. E ke Kiai, he ko ka Po?