Ka Nupepa Kuokoa, Volume XXXVIII, Number 24, 16 June 1899 — Page 2
| This text was transcribed by: | Patrick Makuakane |
| This work is dedicated to: | Scott Galuteria |
Ka Nupepa Kuokoa
KE KILOHANA POOKELA NO KA LAHUI HAWAII.
HOOLAHA MANA HOOKO
HOOLAHA AINA AUPUNI
-----
Ma ka Poaono, Iulai 15, 1899, ma ka hora 12 awakea, ma ke Keena o W. O. Aiken, Paia, Maui, e kuai kudala ia aku ai he 6 mau Apana ma Nahiku, Koolau, Maui, penei:
Apana 17. - 88.74 Eka: Uku oi aku maluna o $2,218.50.
Apana 27. - 103.2 Eka: Uku oi aku maluna o $516.
Apana 35. - 118.2 Eka: Uku oi aku maluna o $2364.
Apana 43. - 36.76 Eka: Uku oi aku maluna o $919.
Apana 51. - 7 Eka: Uku oi aku maluna o $135.
Apana 53. - 26 Eka: Uku oi aku maluna o $650
He kuike ke dala, a ma ke dala gula o Amerika Huipuia.
No na mea i koe e ninau ma ke Keena o W. O. Aiken, Paia, Maui, a i ole ia, ma ke Keena Aina Aupuni ma Honolulu.
J.F. BROWN
Agena o na Aina Aupuni.
Honolulu, Iune 14, 1899. 2758-3t
----------
NA KOHOKOHO NO KE PAI AI A POI PAA PAHA
-----
Keena o ka Papa Ola,
Honolulu, H.I., Iune 5, 1899.
E waihoia mai na kohokoho ana no ka hoolako ana i ke kahua Mai Lepera ma Molokai, me ke Pai-ai, a Poi paa paha, ma keia keena a hiki i ka hora 12 awakea, Poakolu, Iulai 5, 1899.
O na puolo Pai-ai, a Poi paa paha, e hanaia me ia a-i hou no a ope pono ia iloko o ka laki, nona hoi ke kaumaha o ke pai hookahi, aole e emi malalo o iwakalua-kumamakahi (21) paona io, a e hooeleleia ana ma ke awa o Kalaupapa, elike ka nui me ka mea e kauohaia ana e ka luna nui, ma ka averika hoi mai ka 400 a 800 pai-ai no ka pule hookahi.
Ke kauohaia aku nei e waihoia mai no na koho kaawale no ka hoolako ana i ke pai-ai no ka manawa o hookahi makahiki, elua makahiki, ekolu makahki, a eha makahiki, mai ka la 20 aku o Augate, 1899.
E waiho mai hoi ka mea hoopaa aelike i bona me na hope i aponoia, no ka huina aole e emi iho malalo o $1000, mamuli o ke kumu hoopaa e hooko pono i na aelike.
E kakauia keia ame keia koho "Na Kohokoho no ke Pai-ai."
Aole ka Papa Pla i hoopaa iaia iho no ka ae ana i ke koho haahaa loa, a o kahi koho a ae paha.
Ma ke kauoha a ka Papa Ola.
HENRY E. COOPER,
Peresidena.
----------
I keia la i hookohuia aku ai o L.M. Baldwin, Esq., ame E.B. Carley, Esq., i mau Hoa no ka Papa Nana Holoholona no ke Awa o Kahului, Mokupuni o Maui. Eia No Hoa o ka Papa i keia wa.
J. L. M. ZUMWALT,
Luna Nui Hooko.
L. M. BALDWIN,
E. B. CARLEY.
S. M. DAMON,
Kuhina Kalaiaina no ka manawa.
Keena Kalaiaina, Mei 30. 1899
2756-3t
----------
NO KE AHA LA I ILIHUNE AI KEKAHI POE?
----------
O ka hemahema o ka hana ana a kekahi poe, oia ke kumu e mahuahua ai ka nui o ka poe noho iloko o ka ilihune, a oia ke kumu nui mamua o na mea e ae. I mea e loaa ai ka nohona holomua, he mea pono i ke kanaka ke kiola aku i kana mau nana ana imua, a hoolala oia i ka hana e lawelawe aku ai oia mamua ae o ka hoea ana mai o ka wa pomaikai, a ma ka wa e hoea mai ai ia manawa pomaikai, ua makaukau ua kanaka ia e hoopomaikai iaia iho ma ia manawa. O kahi noonoo e ana i ola honua he mea ia e uuku ai kahi lilo, a hoopau wale ia hoi ka manawa waiwai nui. E malama ana ke kanaka noonoo akahele i omole o ka Laau Ola a Kamalena no ka Nahu, Kolera ame ka Hi iloko o ka hale; aka, o ke kanaka hoohemahema, e kali ono no ia a hoea mai ka pilikia, a o kona wa ia e hana ino ai i kona lio maikai, ma ka hono nui ana iaia, no ke kee ana i kauka, a he bila nui nohoi a ke kauka kekahi ana e uku ai. O ke kanaka mua, he 25 keneta wale no kana e lilo; a o ka lua hoi o ke kanaka he mau haneri dala kana e lilo ana, a haa'oha'o iho la ia i ke kumu i waiwai ai o ke kanaka mua, a noho mau nohoi oia iloko o ka ilihune. E kuaiia ana e BENSON SMITH & CO., na Agena Kuai Kukaa o ko Hawaii Pae Aina, ame na poe hana laau apau, a kuai laau nohoi.
-----------
He palapala ka Mr. Geo. W. Kalohai o Keanae, Maui, ia makou, e hai mai ana he nui ka hana e loaa ai kahi kenikeni, ma ko lakou mau kaiaulu, a puni loa o Maui. E loaa ana ka uku la mai ke 70 keneta a ka $1.00. "Laki o Hawaii Lahui," wahi a keia kamaaina kahiko o Kohala Akau, Hawaii, a i hoi ae la a noho ma "Ka wai kau o Keanae."
KA NUPEPA KUOKOA
No ka Makahiki - $2.00
No Eono Mahina - 1.00
Kuike Ka Rula.
PUKA ANA 1 PULE 2 PULE 3 PULE 1 MAL 2 MAL 3 MAL 4 MAK.
Iniha $1.50 $2.00 $2.50 $3.00 $5.00 $6.75 $12.00
2 Iniha 2.00 2.75 3.50 4.00 7.00 9.00 15.00
3 Iniha 2.50 3.00 4.50 5.00 9.00 12.00 15.00
4 Iniha 3.00 4.00 5.00 6.00 11.00 13.50 21.00
5 Iniha 3.50 4.75 6.00 7.00 12.00 15.00 24.00
6 Iniha 4.00 5.50 7.00 8.00 13.00 16.50 27.00
----------
O na Olelo hoolaha a pau e hoouna ia mai ana no ka Hoolaha maloko o keia Nupepa e hoouna pu mai me ka auhau, a ina aole, aohe hookomo ia.
----------
HOOPUKA KA HAWAIIAN GAZETTE CO.
A. W. PEARSON, Luna Nui.
JOSEPH M. POEPOE, Lunahooponopono.
Honolulu, Oahu.
----------
POALIMA, -- IUNE 16, 1899
----------
NA RULA O KA POE MAIKAI.
----------
E ike ana ko makou poe heluhelu ma kekahi wahi o ko makou pepa o keia la, i kekahi mau mea e pili ana i na Rula Keonimana, oia hoi na Rula i kapa mau ia o na Rula o ka poe maikai. Aole paha e lilo ana keia mau hoakaka ana a makou i mea waiwai no ka poe i ike i ka Olelo Beritania, oiai e hiki ana ia poe ke nana a ke huli aku iloko o na buke i hoolahaia ai na alakai ana no keia mau rula, a loaa no ia lakou na makaukau ma ia mahele waiwai nei. He mea waiwai nui loa keia no ka poe i hooneleia ko lakou hiki ana e maau aku na huli ana iloko o na buke i hoikeia ae la, mamuli paha o ka haiki mai o kahi waihona kenikeni, a mamuli paha o ka nele ana i ka ike olelo Beritania, a olelo Europa e ae paha.
Ua hoomaopopo makou, eia kakou ke nee aku nei iloko o na la e launa nui loa aku ai ka kakou mau kaana ana ma na anaina e pihaia mai ana e na malihini mai na aina e mai, oia nae paha hoi, na kanaka Amerika ame Beritania. O ka hapanui o keia poe malihini elike ae la me kela mau mahele lahui a makou i hoike ae la, he poe lakou i maamaalea loa i nei mea he Rula Hookeonimana, oiai nae ka hapanui loa o kakou o na Hawaii nei, he poe maoli no i ike ole i keia mau loina koe wale no ko kakou noho alii ana maluna o ko na lahui e ae, ma ko kakou ano, he Lahui Puuwai hamama kakou, ka mea hoi i lilo ai kakou i poe mahalo nui ia e ko na aina naauao apau.
Aka, aole i lawa ko kakou nohna makaainana ana iloko o ka poai o keia noho lahui huikau ana, me keia haawina wale no o ka Puuwai Hamama, ke ole e hoohiwahiwa ko kakou noho ana, hele ana, kamailio ana, a pela wale aku, e na Rula Hookeonimana, oia hoi na Rula o ka poe maikai.
Ua ake loa makou e loaa nui keia ike i na opio Hawaii apau mai Hawaii a hoea aku i Niihau. E ao na kaikamahine, a e ao nohoi na keikikane i keia mau lina maikai. He naauao makamae loa keia i pono e hooikaika ia e na opio e hele ana i ke kula. O ka ike paa rula e loaa ana i ke keiki ma kona mau la opiopio, he ike ia e hele pili paa ana me ia i kona wa e nui ae ai, a ua lilo keia ike paa rula i lala ponoi no kona ola ana, a ma kona wa e hana ai i kekahi hana maloko paha o ka luakini, ma na anaina hanohano paha i konoia mai ai oia, a ma kela ame keia wahi paha a kona oiwi kino e maaloa aku ai, ina paha maluna o ka lio, a ma ke kaa paha, e hana ana oia me ka hiehie ame ka mahalo nui ia no kona ike paa rula, a e pakele ana oia me ka haaheo nui mailoko mai o na leo pahenehene e lu heleleiia ana e ka poe ike rula maluna on na oiwi kono o ka poe i ike ole ia mea he rula o ka poe maikai.
I ko makou hoomaopopo ana, aia iloko o keia mau Rula, ua pulamaia ka nene ilikapu o kela wahi i komo ai na nee ana a nei mea he kino kanaka. He rula maloko o ka halepule, he rula maloko o na aha hulahula, he rula maloko o ke anaina hoolaulea, he rula no ka hele ana i ka holo lio, pela hoi ka holo kaa ana, ka ike ana i ka mea make, ka ike ana i ka hoaloha, ke komo ana o ka aahu, ka hoopalau ana, ka hele holoholo ana me kakahi kokoolua-kane a wahine paha, he rula ma na aha mele, a pela aku. O ka paa maikai ana o keia mau rula apau i kekahi kanaka a wahine paha, he hanohano lua ole ia no ia kane a no ia wahine hoi i loaa keia ike.
Na keia manao i hapai mai ia makou e hoopuka aku i na rula o keia ano ma keia helu o ka makou pepa nei, a hoomau aku hoi a hiki i ka pau ana, elike hoi me ka mea hiki ia makou ke hana, no ka pomaikai o na opio Hawaii.
----------
AOLE ANEI KEIA HE HANA PONO?
Ua hoomaopopo makou, aia a hoea aku kakou i ka mahina ae nei o Augate loaa iho la ia kakou ka piha ana o ka makahiki hookahi o ko kakou nohona huiia me Amerika Huila, ka aina o ke kuokoa ame ka noho lanakila ana. Aole o makou kanalua iki e hoala ia mai ana no na noonoo ana o kekahi poe hoaloha o ke Aupuni e ku nei i keia wa, he mea pono ke malamaia kekahi mau hana hoohiwahiwa ma ka la i kaa pono aku ai ko Hawaii nei noho ana malalo o na eheu o ke Aupuni o Amerika. Manao no makou aole no ia he mau hana hewa, a kupono ole. O ko Hawaii la maoli ia i ku ai ma ke kulana kapekpeke ole o ke Aupuni o Amerika. Manao no makou aole no he he mau hana hewa, a kupono ole. O ko Hawaii la maoli ia i ku ai ma ke kulana kapekepeke ole o ke ku ana he aupuni e hooponopono kuloko ia ana, me ka hiki ole i kekahi mana aupuni kuwaho ke lele poipu mai maluna ona, oiai ua malu mai la na eheu o ke Aupuni o Amerika ma kona mau aoao apau.
Manao nae makou, mawaena o na hana pookela loa, e hanaia ai ma ia la, ma ka aoao mai o na kahu aupuni o kakou nei, oia no ka huikala ana a me ka hoihoi hou ana ae i na pono kivila apau o na poe i hoopaiia ma ke ano Karaima ma ka wa e ku ana ke Aupuni Moi.
Ke ole makou e kuhihewa; he lehulehu loa o keia poe i hooneleia i na pono koho baloto mamuli o ko lakou hoopaiia ana no na karaima a lakou i hana ai ma ia wa, a ke mihi nei no hoi ia poe no ke kau ana mai oia mau ailina maluna o lakou, a ke makemake nei lakou, ma ka hiaa nui o ko lakou mau noonoo, e loaa ia lakou na huikalaia ana mae e ka mana Aupuni i loaa ke kuleana pono e hana pela.
Ke manaoio loa nei makou, aole he makana hiwahiwa e ae a na kahu aupuni o keia wa e nee nei, e hana mai ai ma ia wa, elike me keia hana lua ole o ka nani ame ka maikai, no ka pono o kela poe Hawaii i hoohana kuhaikii ko lakou mau pono kivila.
A ina paha e oleloia mai, ua kalaia no na hewa o kela poe i hoopaiia ma ke ano a makou i hoomaikeike ae la, mamuli o keia hui ana iho nei o Hawaii me Amerika, alaila, ke manao nei makou, aole no ia he mea e loaa ai ia lakou ko lakou mau pono kivila i hooneleia mamuli o ke kauoha kanawai e mana ana mamua aku o ka wa i holo ai keia hui ana o na Aupuni elua. O ka nele ana o ke kanaka i ka pono koho balota, mamuli o ka hoonele ana a ke kanawai o ka aina nei, mamua aku o keia hoohuiia ana iho nei o Hawaii Aupuni ame Amerika Aupuni, e hoomau ia ana no ia nele i ka pono kivila koho balota, ke ole e hoihoi hou ia mai ia pono i ke kanaka i hooueleia ma ia ano, e ka Mana Nui nana e paa ana ka Mana Hoihoi Poni Kivila i ke kanaka, ina no paha he Aupuni Monakia ia, a aupuni paha elike me ia e ku nei i keia wa.
Aole paha he hana pookela e ae a ke Aupuni e hana mai ai elike me keia. He haawi hou ana keia i ke ola kivila i kela poe oiwi ponoi o ka aina, a he mea nohoi ia e kipapaia ai ka manao maikai o ia poe no ke Aupuni e ku nei, oiai paha he poe kekahi o lakou i hoihoi ole i na ano o ka nee ana o ke Aupuni i keia wa.
---------
KA AHA KIEKIE MA KA BANAKO
-----
Ua ikeia ma ka papa hoonohonoho o na hihia i hoea aku imua o ka Aha Kiekie ma ka Banako, he lehulehu no ia mau hihia. E noho ana keia Aha ma keia Poakahi ae. Mawaena o na hihia ano nui loa, oia ka hihia e pili ana i ka Palapala Kauoha a Kauka Ruka, a maloko oia hihia i komo ai ka Halema'i Moiwahine. O kekahi hihia ano nui nohoi o keia noho ana o ka Banako, oia no ka hoopii hoopau laikini loio Kuhina e noho nei i keia wa. Aia nohoi ma keia noho ana a ka Aha na keia kau, e hooloheia ai ka hoopii a C. S. Desky i ke Kuhina Kalaiaina no ka mea e pili ana i ka laikini o ka hale keaka Orpheum.
----------
KA LUNA DUTE NUI HOU.
-----
Ma ka noho ana a ka Aha Kuka a na Kuhina ma ke kakahiaka Poalua aku nei, ua waiho aku la o Kuhina Daimana imua o kona mau hoa i ka inoa o Rikeke Ivers i mea nana e hoopiha i ka hakahaka o ka Oihana Dute, it waiho hakahakaia, mamuli o ka haalele ana mai o Mr. F. B. McStocker. Ua apono lokahiia hoi keia inoa.
Aka, mamua nae o ka noonooia ana o keia inoa, ua waiho mua ia aku keia oihana ia Mr. Stratemeyer, kekahi hoa kahiko o loko o ka Oihana Dute, aka, ua hoole mai nae ia keonimana.
O keia Luna Dute hou, oia no ke kaikunane o Mrs. William G. Irwin. I loko o na makahiki ewalu i kaahope ae nei, ua lilo nui ka hapa nui o kona manawa ma ka malama ana ame ka huli i na buke o na hui mahiko he lehulehu o loko nei o ka Pae Aina, a he kanaka makaukau hoi oia ma ia hana. Ua kamaaina no oia ia Hawaii nei, a he nui na poe o ka Pae Aina nei i kamaaina me ia.
NA RULA O KA POE MAIKAI
----------
Eia makou ke hoolaha aku nei ma keia wahi o ka makou pepa i kekahi "Mau Loina no ka poe maikai," i ka paia i kekahi wa "He Mau Rula Hookeonimana a Malama Kulana Lede hoi."
1. E haawai mau aku ke kane (keonimana) i noho i ka wahine (lede), e wehe mai oia i ka puka o ka hale i ka wa a ka lede e komo mai ai, a ma kona wa e haalele iho ai i ka hale, a e lalau iho nohoi oia i keia ame keia mea i haule mai ka lima iho o ka wahine, ina no he kamaaina ia wahine ia oe, a he malihini paha oia.
2. Aole he ano maikai, a ku hoi i ka rula o ka poe maikai, ke kiei ana aku ma na poohiwi o kekahi mea e kakau palapala ana, a e heluhelu buke ana paha.
3. I ka wa e kamailio ai kahi kane me kahi wahine, mawaena o ke anaina maikai, e kapae loa ia mai ko laua mau lehelehe aku na huaolelo koaka, na huaolelo maemae ole, na huaolelo pilikino no kekahi mea e ae. A o na kamailio hoomakeaka ana e ehaeha ai ka naau, a o ka manao o kekahi mea o loko o ke anaina, e kapae loa ia ae no ia.
4. Ma ka wa a kekahi kane e hele ae ai a maalo ma ka aoao o kekahi wahine, e ku ana ma kekahi wahi i konoia ai ua kane la, a o ua wahine la paha, hoaui ae i kona kino, i loaa ai he kowa e hiki ai i ke kane ke kaalo ae, alaila, e wehe ae kela kane i kona papale, a kunou mai hoi kona poo imua.
5. A o ka hana hoi a ka wahine e hana ai ma ia wa, oia kona kunou ana aku imua o ke keonimana.
6. Ma ka wa e kaana ai i ke kamailio ana mawaena o ke anaina o ka poe maikai, mai noho a haanui wale i ka olelo ana, mai noho a haanui wale i ka olelo ana, o haule auanei oe iloko o ke kamailio ana i na mea oiaio ole. O ka hoike @kou manao me ka oiaio, he mea ia e palekana ai oe mai ka aea ana aku iloko o ka wahahee.
7. O kou manao ana, o oe ke pookela maluna o kou poe hoa apau, ma ka ike, ma ka naauao ame ke akamai paha, a ano e ae paha, oia kekahi o na manao moowini hupo loa i hoopunanaia iloko o ka noonoo o kou puniu poo; a e ike wale ia mai ana oe, he kanaka, a he wahine noonoo papa'u oe. Nolaila, e kapae ae i na kamailio pai ia oe iho, a mahalo nohoi ia oe iho.
8. He kulana lede ole no ka wahine ke ku oia ma kona mau lima i olekea ia ae ma kona alo, a i ole ia, e opea kua ana paha.
9. He ku ole i ka rula maikai ka mili wale ana iho no o kekahi kane i kona mau lima, a e hoopanapana ai paha i kona mau manamanalima; e milimili wale ai no i kana kaula wati, e kiloiloi wale ae hoi i kona mau mikini lima, e hookomo ae i ke ku-au o ke kookoo, a o ka mamalu (pahu) iloko o ka waha, a e mili ae hoi i ka aikala a lei ai paha, ke ole he kumu kupuno no ka hana ana pela. O ke oolea ioena o ke kino ma ka noho ana, ma ka hele ana, a me ke kamailio ana, oia kekahi mea hoike mai, he paa rula keonimana ole oe.
10. O ka onioni ana o na kuli, a o ka hooka'i lewa ana paha i ka wawae, oiai e kau ana maluna o kahi wawae, ma ka wa e noho ana maluna o ka noho, oia kekahi hana kue i ka rula hookeonimana. O ka hookakani ana i na manamanalima maluna o ke pakaukau, ao ka puka aniani paha, he kue no ia i ka rula o ka poe maikai.
11. I ke kamailio ana no kekahi poe i kamaaina nui ole me oe, mai hoopuka oe i ko lakou mau inoa. A ina hoi he poe lakou i kamaaina ia oe, alaila, mai poina i ka hoopili ana aku i ka hoailona "Mr." no ke kane, o "Mrs" hoi no ka wahine, o "Master" no ke keikikane, a o "Miss" no ke kaikamahine i mare kane ole. E like me keia: "I lohe mai au mai a Mr. Leimamo mai." "Na Mrs Kanoelani au i hai mai."
"Pela mai nohoi o Miss Cecelia i kamailio mai ai ia'u." "Owau ame Master Kanoe kai hele aku i ka ahaaina."
12. Ina hoi he kauka, he kahunapule, a he lunakanawai ka mea nona ke kamailioia ana, alaila, mai poina i ka hoopili ana aku ia "Rev."
no ke kahunapule, a i ole ia "Lunakahiko" paha, "Makua" paha no na kahuna Katoliko; a o "Epikopo" a "Bihopa" hoi no ka poe elike me
"Epikopo Gulekana," "Bihopa Willis," a o "Kauka" (oia ke Dr.) no ke kauka lapaau, a kahunapule paha i heaia na ia kulana, elike me "Kauka Hai," "Kauka Bihopa," "Kauka Binamu;" a o Lunakanawai nohoi no kekahi mea e noho luakanawai ana, a i noho lunakanawai mua paha, elike me "Lunakanawai Kiekie Alapaki." Pela no me ka Peresidena, ke Kuhina a Kiaaina paha (aole nae i keia wa): E laa o Peresidena Dole, Kuhina Daimana, Kiaaina -- owai la?
13. Ina he wahine oe, alaila, i kou kamailio ana i ka inoa o kekahi kane, mai poina oe i ka hoopili aku i ka inoa "Mr." a inoa hoohanohano e ae ma ka inoa ponoi o ke keonimana, nona ua inoa la au e kamailio ae ana. He ano koaka ke olelo ae oe, "Holmes," aka,
e olelo oe "Mr. Holmes," "Kauka (Dr.) Warren."
14. Ina hoi, ua paloaiia oe ma kekahi ahaaina, alaila, mai noho oe a nema i ka mea inu e haawiia mai ana ia oe, ina paha he mea inu maikai ia. A he mea inu maikai ole paha ia. Eia ka moolelo paa rula o kekahi kanaka Farani i hoea i Enelani. Ma ka wa e kaua kipi kuloko ana ke Aupuni o Farani, ua hoea aku la i Enelani ke Duke de Grammont, ma ke ano i kipakuia aku oia mai Farani aku. Oiai ia malaila, ua haawi iho la ke Duke o Bedefoda he ahaaina hoohanohano nona (ke Duke Farani). O kekahi keia o na ahaaina nani loa o na alii Pelekani e haawi ai me ka ulumahiehie nui. Ua lako ke pakaukau i na mea ai one o na ano apau. Ma ka wa i hoea aku ai ka nee ana o na kaanaia ana o ua papa ahaaina nei, ma ka wa no ka inu waina ana, ua laweia mai la kekahi omole waina i kapaia he Constantia, a o keia ka waina lua ole o ka maikai ma Farani. He waina ala keia, a he maikai kona inu ia ana. I ka nana ana aku i ka wai o keia omole i lawe ia mai la, ua huaolelo ae la ia elike me ka hooluu nan@ o ke gula. Ia wa i ninini iho ai ua Duke Bedefoda nei i ka wai o ua omoe la iloko o ke kiaha, a haawi mai ia i kana malihini kipa, oia ke Duke de Grammont. Lalau mai la ia i ua kiaha la a inu ae la, a pau ka inu ana, olelo ae la ua Duke Farani nei. he keu ia a ka waina maikai loa. I kela wa hoi, makemake iho la ke Duke Bedefoda e hoao i ka maikai io o ka waina a kana malihini i haawi mai ai i ka mahalo ana. I kona ninini ana i kona kiaha, a kaikai ae la e inu, aia hoi, honi e iho la ia i ka hohono aila hoonaha (Castor Oil) a ia wa i ano e ae ai kona helehelena, a ninau ae la ia i ke kuene nui: "Heaha keia mea?"
Lalau aku la ua kuene nei i ka omole a ke Duke e paa ana, a honi iho la, ame ke ano e loa ana ae nohoi o kona ano, hoike ae la ia, he aila hoonaha (Castor Oil) ua omole la. Aole i kana mai ka pono ole o ka noonoo o ke Duke Berefoda. Aka, o ke Duke Farani nae, ua inu oia i kela aila hoonaha, me kona pane leo ole ana ae, ame ke ano e ole hoi o kona helehelena. Ua ike no oia he aila hoonaha kana i inu ai, eia nae aole oia i pane ae i kekahi huaolelo. Ua noho hamau loa iho la ia.
(Aole i pau.)
-----------
HE LEO ALOHA NA J. K. NAHALE OPIO.
----------
(Hoomania.)
I ko makou hoa paahana pu, ia Jos. K. Nahale, Esq., a i kau alii wahine, Mrs. N. Nahale, i kau hiapo hanau mua ame na Pokii hoi i hooneleia mai la i ka hanau mua ole:
Aloha oukou. Me ka puuwai kaumaha a luuluu, walohia wale ka naau, kapalili eha ka haupo, hiolo na waimaka--e, he aloha la. Mamuli o ka lono i hoea mai, aia hoi, ua oluolu i ka Mea Mana Loa, ka hiipoi aloha ana'ku i ka hanu hoe loa o Master Joe Hoolana Nahale, Jr., mai keia noho inea ana a i Kona poli pumehana ma ka Edena nani maluna, ma ka la 23 o Mei, A. D. 1899 hora - p. m.,
ma ke kulanakauhale o Honolulu, Oahu, o ko Hawaii Pae Aina.
A na keia lono hookaumaha puuwai i hoohanini mai i na kulu waimaka o ka oukou mau hoa paahana pu. Nolaila, o makou o ka Aha Luna o na Ekalesia Huiia o Kailua ame Helani, ma Kona Akau, Hawaii a ma o ko makou komite la, ke komo pu aku nei makou me oukou me ke aloha oiaio.
1.-- Hooholoia, o makou o na hoahanau o na Ekalesia Huiia o Kailua ame Helani, a ma o ko makou komite la, ke hui a ke komo pu aku nei makou apau me oe e Jos. K. Nahale a kanikau kumakena pu me ka walohia no Master Joe Hoolana Nahale, Jr., kekahi o kau mau keiki aloha i lawe palanehe ia aku la e kona mea nana i hana. E like me Kana i i mai ai: "Nana no i haawi mai, a nana no e lawe aku." E hoomaikaiia ka inoa o Iehova.
A no ka mea hoi, o oe ame ia kamalei i hala aku la, he mau hoa pili paa iloko o keia mau Ekalesia Huiia; o ka eha ia oe, e ae mai ia makou e auamo pu aku ia eha lima ole a ke aloha. e lalawe ana i ka puuwai. Auwe! minamina wale!
2.-- Hooholoia, o makou o na hoahanau o na Ekalesia Huiia o Kailua ame Helani, a ma o ko makou komite la, ke hui a ke komo pu aku nei makou apau me oe e Mrs. Nahinu Nahale, ka mama hoi i hooneleia mai la ia pua hoonani a kou home, e uwe paiauma aku ma keia aoao o keia oia ana no Master Joe Hoolana Nahale, Jr., he kama i aloha nui ia e oe ame makou hoi, kou mau hoa paa hana o na Ekalesia Huiia, a no ka mea hoi, o oe ame kau lei aloha i hala e aku ia, he mau hoa uhaiaholo pu no iloko o na hana pili ekalesia e mau ai ka ea o ka aina i ka pono. Auwe! Aloha no.
3.--Hooholoia, ke komo pu aku nei makou apau me oe e David K. Nahale, e waimaka a e ehaeha pu me oe me ka hanau mua i kou pokii i hele aku ia no ke ala hoi ole mai, a e paiauma aku me ka puuwai kapalili no Master Joe Hoolana Nahale, Jr., kou muli aloha i hoi e aku la i kahi e maha mau loa ana. A no ka mea hoi, o oe ame kou pokii aloha i pulelo aku la i ke ala huna a Kane, he mau hiialo olua no keia mau Ekalesia Huiia. A no kakou pu no ia haawina kaumaha. W@lohia wale.
4.--Hooholoia. ke komo pa@ makou apa me oukou e na pokii @ no master Joe Hoolana Nahale, Jr., hooneleia mai la i ka hanau@ e paiauma pu i na kihene @ eloelo o ke laoh hanau mua, @ mea hoi, o oukou ame ko oukou @ mua i hele lani aku la, @ iki punahele ia na keia @ Huiia, a he mau pulapula no @ naolana no ka hoonee ana'ku @ na maikai apau e hauoli ai ko @ mau luaui no ka pono e mau @ ana. E u me ka minamina @
5.--Hooholoia. ke komo pu @ makou apau me ka naau pepe @ pu aku me oukou apau, a waiho @ na alana ana imua o ka Mea @ Loa, e lawe ae i na haawe kau@ me na luuluu apau mai ia kakou @ e haawi mai i ka naau mama, @ olu ame ke aloha, a ma Ona la @ apau e maha ai, elike me Kana i @ aloha mai : "E hele mai oukou @ poe luhi ame ka poe kaumaha io'u @ a na'u oukou e hoomaha aku." A @ luna ae o na mea apau, o ka @ noi keia.
E mau ke aloha o ko kakou @ me oukou apau.
Me ka walohia
DANIEL. P. NAMAUU.
W. M. KALAIWAA,
SAM. W. KAWEWEHI,
DAVID ALAWA,
JOHN KAELEMAKULE,
JOS. ADAMS.
Na Komite.
Kailua, N. Kona, Hawaii, Mei 31 18@
----------
KUU KA LUHI.
----------
E Mr. Lunahooponopono e,
Anoai wale: -- E oluolu mai kou a@ nui e hookomo iho ma kahi kaawale o kau hiwahiwa i keia wahi poomanao @ kau ae la maluna i ike mai ai na kini makamaka o kaua mai Hawaii a Keawe a Kauai o Mano, oiai, ma ka auina la o ka Poalima nei, Mei 19, ua apo palanehe mai la ka ilima, ka anela o ka make, i ka hanu ola makamae o Moses Kapihe, a hoi aku la ka uhane me ka mea nana ia i hana, a o ke kino hoi i ka lepo e like me ka mea i hoakakaia ma ka Buke Nui.
Ua hanauia o Moses Kapihe ma Pauwela, Maui mai ka puhaka mai o Joseph Puhihale Kapihe ame Mrs. Hana Kapihe, a mamuli o ka loaa ana i na haawina o ka ma'i lepera, ua haalele aku la oia i ka aina hanau ame ka ohana i ka hapa hope o ka M. H. 1898. no ka Panalaau nei.
Ua hiki mai oia ia nei i ka malama o Okatoba, he oluolu kupono no koa@ ola kino, a i ka malama mai nei o Pepeluali o ka M. H. 1899, hoomaka mai la kona onawaliwali, a mailaila mai ka hoomaka ana o ka pili ikaika loa ana o ka nawaliwali a hiki wale i kona hala ana aku ia. Ua nui na hooikaika ana no kona palekana @ he mea ole nae ia. He kanaka haipule oia, a e hoike no kona ano haipule oia, a e hoike no kona ano haipule oia keia: I ke kokoke ana paha e pau @ o kona hanu ola, ua pane aku la oia kona hoa. E haipule kaua. Ae aku @ kona hoa. Apau ka laua haipule @ i hou aku nei no oia i ka hoa e kii aka oe i kahi paa lole o'u. kii aku la no kona hoa, hookomo aku nei a paa, a o koiala niau aku la no ia i ke ala hoi ole mai. Auwe, minamina wale! @ ka lae o Wewehi ua poina loa @ oe ia Moses Kapihe. Ae, ua pahemo mai la oia ia oe, a ua kueo hou aku la no no kela ipuka gula. E ka ua ulalena e. ua pau kou lohe ana aku eia no o Moses I Baldwin Home nei. oiai ua hala, ua nalo, ua pouli ke kukui o kona ua kuu mai la oia i keia ao malamalama. a hoi aku la oia ma kela ao @ ke kali ana i ka wa a ka anela e hokani mai ai i kana pu.
Ua piha ia Moses Kapihe na makahiki he 25 a oi aku o kona ola ana @ hala wale aku la no, a hoonoho iho la he mau makua a he mau pokii e @ paiauma aku ana nona. A ke komo pu nei ka mea kakau e auamo pu i @ ehaeha o ka ohana o ka mea i hala m@ ke noi pu ana i ka lokomaikai o ka Makua Lani e hoomama mai i na ehaeha ame na kaumaha o ka ohana @ o a o.
Ke hooki nei au me ka mahalo @ Mr. Lunahooponopono ame kau @ keiki.
kou oiaio,
ADAM P. KAIPA
Kalawao, Mei 24, 1899
----------
(Mamuli o ka loaa ole ana ia makou he kowa kaawale ma ka makou nei pepa, ma ka wa i hala ae nei, e hiki ai ia makou ke hoolaha aku i keia manao nolaila, ua hookaulua loa ia, akahi no a hoopukaia. --L. H.)
-----------
NA HUA PIAPA O KEKAHI MAI OLELO A KANAKA
----------
Aia maloko o ka Olelo Beritania he 26 ka nui o na hua palapala, ma ka Olelo Farani, he 26; ma ka Olelo @lia, he 20; ma ka Olelo Sepania, he 27 ma ka Olelo Geremania, he 26; ma ka Olelo Sakaloviana, he 27: ma ka Olelo Rukini, he 41; ma ka Olelo Latina he 22; ma ka Olelo Helene, he 24; ma ka Olelo Hebera, he 22: ma ka Olelo Arabia, he 28: ma ka Olelo Parasia, he 32; ma ka Olelo Tureke, he 33; ma ka Olelo Sanesacarita, he 50; a ma ka
----------
HULI HOI KA MOKUKAUA PIL@ DELEPIA NO KA HOME.
----------
Ma ka hora 7 o ke kakahiaka Sabati nei i haalele mai ai ka mokukaua "P@lepelepia" ia Honolulu nei, a nee aku la ma kona alahele, e hoea aku ai i ka mokuaina o ka "Ipuka Gula." Ma ka Poaono aku, he la ia i hooliloia no ka hoomaemae ana i ua moku la. Ma kona wa e hoea aku ai i Kapalakiko, ma laila oia e kau ia aku ai maluna o ko laila ala huki-moku no ka hoomaemae ana iaia, mai na pioeoe mai o na ka@ hema. mai kona iwikaele aku.