Ka Nupepa Kuokoa, Volume XXXVIII, Number 39, 29 September 1899 — Page 6
This text was transcribed by: | Keiko Sasaki |
This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
@oolaha Mana @ooko
Ma keia, ua hoopau loa ia ka Rula 24 o na Rula Hooponopono no na Kaa Lawe Ohua, i hoolahaia malalo o na olelo o ka Pauku 102 o ke Kanawai 64 o na Kanawai o 1896.
J. A. KING,
Kuhina Kalaiaina.
Keena Kalaiaina, Sept. 27, 1899.
2774-3t.
I keia la i hookohuia aku ai o H. Blake, Esq., i Luna Nui no ka Oihana Wai o Koloa, ma kahi o George Goodacre i waiho mai.
J. A. KING,
Kuhina Kalaiaina.
Keena Kalaiaina, Sept. 15, 1899.
2773-3t.
I keia la i hookohuia aku ai o E. E. Conant, Esq., i Lunahoomalu no ka Papa Alanui o Koloa, Mokupuni o Kauai, ma kahi o George Goodacre i waiho mai.
J. A. KING.
Kuhina Kalaiaina.
Keena Kalaiaina, Sept. 19, 1899.
2773-3t.
I keia la i hookohuia aku ai o Geo. H. Bailey, Esq., i Komisina no na Ala Liilii ame na Pono Wai no ka Apana o Makawao, Mokupuni o Maui, ma kahi o A. F. Tavares, i waiho mai.
J. A. KING,
Kuhina Kalaiaina.
Keena Kalaiaina, Sept. 12, 1899.
2772-3t.
HOOLAHA AINA AUPUNI. OLAA, PUNA, HAWAII.
Ma ka Poaono, Sepatemaba 2, ma ka hora 10 A. M., ma ka Hale Hookolokolo, Hilo, Hawaii, e kuaiia aku ai ma ke Kudala Akea, malalo o na kumu aelike, no na hale noho ame ka hoomaemae ana, a he oluolu hoi ka hookaa ana iloko o ka manawa o umi makahiki.
Aneane 360 mau Apana, he 50 eka no ka Apana hookahi, ma ka Apana Aina Hou o Olaa, i ana ia iho nei.
Ua hiki no i ka mea e lilo ai kekahi apana ke koho no ka apana elua e pili pu ana me ka apana mua, koe nae ma na apana ma ke alanui nui.
O ka mea e kuai ana i apana ma ke alanui nui, ua hiki no ke koho i apana kaawale aku, mai ke alanui aku.
E kuaiia aku ana na Apana no ke kumukuai oi aku maluna o $1.00 ame $2.00 no ka eka, elike me ke ano o ka aina ame kahi i waiho ai.
O na hookaa piha no na kumu aelike apau no ke kuai ana, e loaa no ma ke noi kino ana ae, a ma ka palapala paha i ke Keena Aina Aupuni, a i ole, i kekahi Keena Aina ma ia wahi.
J. F. BROWN.
Agena o na Aina Aupuni.
Iulai 3, 1899.
O ke kuai maluna ae, ma keia ua hoopaneeia a ka Poaono, Novemaba 4, 1899, ma ia wahi, a ma ia manawa hookahi no.
@a ke kauoha a na Komisina o na Aina Aupuni.
E. S. BOYD,
Augate 26, 1899. Kakauolelo.
2770-9t.
Hoike Kula Sabati.
He hoike Kula Sabati kai malamaia maloko o ka luakini o Kawaiahao ma ke Sabati i hala. Ma keia la i lohe hou ia ai ka puukani kaulana o Kauakuahine i na au kahiko i kaa hope ae nei, oia o Juliana Velenika. O Ahuimanu i Koolaupoko ae nei kona wahi i noho ai a kupa a kamaaina. E ke kaikuahine, hoomauia mai ka paa ana i ka pono. Mai haalele.
E hoomanao i ka ahaaina luau e haawiia ana ma ka pa luakini o Sana Anaru i ka hora 12 o ka la apopo.
Ua hookohuia ae nei o Mary Kaleialii i kahu malama waiwai no ka waiwai o Mary Kaleialii, he kaikamahine oo ole.
Mai hoohala oukou e na Hawaii i ke kii ana ae e kuai i mau buke himeni o na mele Hawaii i hoomakaukauia e Mr. Chas. A. K. Hopkins. E loaa ma ka halekuai o Bergstrom. He $3.00 no ka buke.
Ua loaa mai nei na lono ia nei, ua ae mai nei ka Hui Lafeyette Post G. A. R. o Nu Ioka, e hoolaka mai i na h@e Amerika no na kula Aupuni o Hawaii nei, no ko lakou la hoohiwahiwa hae.
Ua hoopuohoia ae ka Oihana Kinai Ahi o Honolulu nei e kekahi wahi pauahi uuku ma kekahi wahi hale aina mahope mai o ka hale leta.
Aole e liulie a hoea hou mai ua poe imi dala mai na aina e mai. He hui keaka hou aku no ia a hoea mai.
Ua hoopau ia ka Rula 24 o na Rula Hooponopono i na kaa e ke Kuhina Kalaiaina. E nana ae i ka hoolaha Aupuni.
KEIA AO, KELA AO
KE KAMAHAO O NA KAMAHAO.
Unuhiia e Hooulumahiehie no KE KILOHANA POOKELA NO KA LAHUI HAWAII.
No ka ninau a Mrs. Everard i ninau aku ai i ke kanaka pena kii, ua mino aka mai la ua kanaka nei, a pane mai la me ka mahiehie:
“Aohe maopopo loa ia’u i keia wa, ka inoa a’u e manao nei e kapa aku ai i ua kii la e hanaia aku ai e a’u. Ma ko’u manao nae, he inoa kona elike me ko ia nei inoa no e heaia nei i keia wa, aka, o na hiohiona ame na helehelena nae, e oi aku ana ia i ko ia nei mau helehelena a kaua e ike nei i keia wa. E hai aku au ia oe, e kuu hoaloha maikai, o ko ia nei kii a’u e hana aku ai, he kii ia i hiki ke oni, ke hele, ke hana i na hana apau elike me ka ia nei hana e hana nei i keia wa. E hiki ana no iaia ke kamailio, ke akaaka, a ke hauoli hoi i ka olioli i oi aku i ko ia nei hauoli omaimai wale o keia wa ke hoohalike aku. A ma ka olelo pokole ana ae, e hana aku ana au i uhane a i hauoli kona hou no ia nei.”
He mau olelo pohihihi loa keia a ua kanaka pena kii nei i pane mai ai imua o kuu hoaloha ame a’u. Ua hoopiha loa ia ko maua mau naau i ke pahaohao no keia kanaka. I kela wa, huli mai la kuu hoaloha a nana mai la ia’u me ke ano e o kona mau ano apau, me he mea la e olelo okoa maoli mai ana no oia ia’u, he kanaka pupule io maoli no paha keia kanaka a maua e launa pu nei. Aka, ia wa no, pane mai la ua kanaka nei i kuu hoa:
“O Mrs. Everard, ua ike au i ka ohu pohina e poipu nei maluna o kou uhane i keia wa, ke manao nei oe, mamuli o ko’u hoopuka ana aku nei ia oe i kela mau olelo e pili ana i ke ano o ke kii ola uhane oia nei a’u e hana aku ai, ua ulaia ia ko’u noonoo e ka hehena, a o ko’u uhane hoi aia ia ma ke alahele o ka pupule. E hoomanao oe, e Mrs. Everard, o ke kani ana a ka piano e alakaiia ana e ke kanaka, a o ka wahine paha i hoopihaia kona uhane me ka ike mele o ka papa kiekie loa, e lilo ana ka leo mele ana e hookani ana i mea hoihoi ole i ka uhane o ka mea i haiki a i oolowi kona ike ma na mea kani, a kapa ae la ka uhane noonoo hapa ike o ua mea ola nei, he hupo ka loea ike mele e hookani ana i ka melodia i ku i ka noeau ame ka ike o na anela o ke Akua. Ua like loa keia ano noonoo i puka mai la mai a oe mai, me ka noonoo o ka poe i hoomaopopo ole he hiki i ke aloha o ke Akua ke hoola i ke kanaka kino nawaliwali, a e hoohamama i ka pepeiao o ka mea i make, a e kahea aku iloko o ka luakupapau, a e oili mai me ka hoolohe ka mea i hoomoeia malaila. Ua hana ke Akua kanaka i keia hana ma ka honua nei, a kapa aku la na uhane laiki o ka ike Iaia, he pupule a he hehena. Nani ke kaa ana o ko ke ao nei iloko o ke kiowai lepo o ka naaupo!”
Ma ka wa a ua kanaka nei i kamailio mai ai ia maua, ua olino ae la he malamalama ano e ma kona helehelena, a o kana olelo, ma ka’u hoomaopopo aku, he ku i ka mana, e hoopili pu ana i ko maua noonoo. Ua ike iho la maua i ka oiaio o kana mau mea i hoopuka mai ai imua o maua. Me he mea la e hoonaauao mai ana oia ia maua, he mea pono ia maua ke ike iho, o na olelo ana i olelo mai ai ia maua, aia no ia maluna o ke kahua poiuiu o ka akeakamai i lawa ole hoi ko maua mau noonoo no ka hoomaopopo ana, elike me ka hiki ole i ka mea noonoo haiki no nei mea he ike mele, ke hoomaopopo i ka ui, ka maemae ame ka hoano o na melodia e hookaniia ana e ke kanaka papa ekahi o ka ike mele, elike me Mozart ame kekahi poe loea ike mele e ae. He mea oiaio, ua hana o Iesu i na hana mana ma ka honua: a ua kapaia aku oia e na Iudaio he pupule, a ua piha hoi oia i ke diabolo.
Ua hoopauia ko maua mau manao kuhihewa apau no ko maua hoaloha maikai. Aka, ma ia wa hookahi no nae, aia iloko o’u ke pahaohao nui no ke ano o kana mau olelo i kamailio mai ai no ke ano o ko’u kii ana e hana aku ai. He kii ia o ko’u ano apau, wahi ana, a e hiki ana ia kii o’u ke kamailio a ke hauoli elike me ka hiki ia’u ke kamailio a ke hauoli. E oni ana, e hele ana, a ma ka olelo pokole ana ae, he kii ia me ka uhane. A noonoo iho la au iloko o’u, pehea ana la e hiki ai iaia ke hana i kii ola uhane?
Oiai i puka ae ai keia hoohuoi ana iloko o’u, aia hoi, nana mai la ua kanaka nei ia’u, me ke kuoo lua ole o kona mau maka, a pane mai la:
“Hana iho la ke Akua ihiihi i kii kanaka noloko mai o ka lepo, a haawi iho la Oia i kumu ola iloko ona, a ola ae la ia, oni, hele a hana aku la elike me ke alakai ana a na kanawai i hoopaaia iloko ona e kona mea nana i hana. .O Iehova, ke Akua, oia ke kumua’o a na kanaka pena, a kalai kii apau o ke ao nei. Aka, e o’u mau hoaloha, o ka ike maka ka mea nana e hoopau i ko olua kanalua. Aka, i ka hoea ana mai o ke keiki a ke Akua i ka honua nei, a kanu ia kona kino materia iloko o ka honua materia i loaa mai ai kona kino, moe kela kii iloko o ka opu o ka honua, a i ke 3 o ka la, hoala hou ia keia kii hoano mai ka opu mai o ka honua, wawahi ia na kaulahao o ka make, a ikea hou ia kela kii iloko o kona nani apau, e oni ana, e hele ana, e ai ana, a e kamailio ana; a ma ka wa i hoikeia aku ai keia ala hou ana mai o ua keiki la e ke Akua mai ka make mai, imua o kekahi o kona mau hoapili, hoahele, hoa-ai-pu, a ma kahi olelo ana hoi, he haumana hoi ia nana, aia hoi, olelo mai la ka uhane haiki iloko ona, aole oia e manao, ua ala mai ke kii i make mailoko mai o ka hale-paahao o ka luakupapau. Aka, aia kona manaoio ia mea, ma ka ike maka. Ke ahewa nei kakou ia Toma no kona kuihe a kanalua ana, aka, ua like no ia me na hana a ka hapa nui o ke ao nei e hana nei. Nolaila, e hoonee aku ana au ia olua maluna o ka ike maka.”
I kela wa, puka mai la maua, me ka hoohauoli nui ia o ko maua mau noonoo no na olelo akamai a noeau a ua hoaloha pena kii nei a maua. No’u iho, o ka’u kanaka mua loa keia i lohe ai, e olelo ana o ke Akua, Nana i hana na mea apau, Oia ka paterona (kumu alakai) a ka poe pena kii a kalai kii o ke ao nei.
Alakai mai la ia ia maua a hiki ma ka puka, ia wa oia i pane mai ai ia maua:
“Au revoir, madame! A demain, Mademoiselle!” (Aloha oe, e madame, Apopo, e Miss!)
Ia maua i hoi mai ai, olelo mai la ko’u hoa ia’u:
“Ea, aole anei ou manao, he keu kela a ke keonimana opio kupaianaha? He ano anela kekahi ano ona ma ka’u nana aku, a he ano eepa paha hoi kekahi; a i ole, ua awiliwili like no keia mau mea elua iloko ona.”
“Manao au,” wahi a’u i pane aku ai i ko’u hoa, “he kanaka opio kupaianaha keia. O keia ke ano kanaka i kapaia e na holona, he poe kamehai, ma ka wa e hiki ole ai i na kanaka ke hoomaopopo i ke ano nanenane o na olelo ana a keia poe. Oiai, e ohi ana keia poe i ka lakou mau huaolelo e kamailio mai ai, mailoko mai o na hookaau ana a ka mea haku mele, a mailoko mai hoi o na moolelo Baibala. He mea oiaio nae, aole ia i like me na kanaka e ae a kaua i ike ai.”
“Ae,” wahi a ko’u hoa i pane mai ai, “O kekahi mea hoi a’u i pahaohao loa ai, oia kona hiki ana e ike mai i ka mea a ko’u noonoo e upu ana. Ke hoomaopopo la no paha oe i kela wa a’u i nana mai ai ia oe?”
“Ae,” wahi a’u i pane aku ai i ua hoa nei o’u.
“Ae. E noonoo ana au ia wa me ka hoohuoi nui ana no ka hoaloha pena kii o kaua. E manao ana no au iaia, he pupule a he hehena no ke ano o kana mau olelo i kamailio mai ai no kana mau olelo i kamailio mai ai no ka hana i kou kii, a ola, a hele, a ai i ka ai, akaaka elike me ke kanaka, a pela wale aku. He lapuwale haalele loa kela mau ano olelo ia’u. He pupule ka hoa elike ai. Eia nae, ua ike mai la ia i ka’u noonoo ana pela, a kamailio mai ai oia no ke Akua a no Iesu nohoi. O kekahi, aole o’u makemake na keia kanaka e pena i ko’u kii, ina no oia e nonoi mai ia’u e hana wale oia ia mea me ka uku ole.”
“Kai no paha he hoaloha oia nou ame Mr. Everard?”
“He hoaloha io nohoi paha oia no maua, a nou nohoi; aka, ua ano e mai la ko’u noonoo no ke ano e loa o kana mau kamailio. He mea maopopo loa, ua olalauia ka noonoo o ka hoaloha pena kii o kakou. O kekahi olelo a’u i hoohuoi nui ai i kana pane ana mai, oia keia: “Aia ma kou helehelena, ke ike aku nei au i kekahi uhane e kiei mai ana me ka ulumahiehie.” Ea, he kupanaha, he mea ikeia no ka ka uhane? O keia paha ke ano kanaka a’u i lohe wale ai, he poe ninau uhane. Me he mea la o ka lua iho la keia o na kanaka a’u i lohe ai e kamailio ana ma na mea pili i ka uhane o ke kanaka.”
Aole au i pane aku i kuu hoaloha, no keia mau huaolelo ana i kamailio mai ai ia’u.
Ma ia po iho, he keu ko’u hauoli. He po nani ia a pomaikai i loaa ia’u. Aohe au i ike wahi eha iki maluna o ko’u kino. Ua pau loa ka eha mai a’u aku. Maikai ko’u hiamoe ana ia po, a ao. A o ke ano nui o ka moeuhane i loaa ia’u, oia ko’u ike ana aku ia Celleni, ke kanaka pena kii kamahao, ame ke kii o ka “Anela o ke Ola.” Me he mea la ma ka’u ike aku i ua “Anela la o ke Ola,” e aka maoli mai ana no ia ia’u, a ua piha loa ia ko’u noonoo i ka hauoli.
Ke hele aku la e wela ka hao. I keia pule ae, ikeia ka “Apu Laau Kupaianaha” i hoohainuia ai ka lede opio e ke kanaka pena kii.
(Aole i pau.)
Ma ka Poalua nei, i ka holo ana aku o kekahi kaa hapaumi ma ka ihona aku o Kaopuona, ua pakele kekahi kaa-pio Pake mai weluwelu liilii i ke kaa hapaumi, i ole wale no ke kalaiwa o ke kaa hapaumi e kaohi koke i kona kaa me ka hikiwawe loa. E holo mai ana ke kaa Pake mauka mai, a makai aku nei hoi ke kaa hapaumi.
Ua kahea mai nei ka Aha Kuhina e akoakoa na poe o ka Papa Kalepa o Honolulu nei no ka noonoo ana no ka Hawaii nei mea e hoouna ai i Parisa no ko laila hoikeike nui i keia makahiki ae.
Hookui Elua Kaa a make he Kanaka.
Ma ka hora 8 a oi o ka Poalua nei, ua ulia ae la ka make weliweli makai ae nei o ka uwapo, e kokoke ana ma ka uwapo o Poka Ma, a oia ka ulia i komohia aku ai kekahi kanaka Hawaii, o Kekione Anakolio kona inoa iloko o ka make weliweli.
He kanaka kalaiwa kaa lanahu keia no ka Hui o Peck Ma. Ma ka wa i loaa ai keia poino maluna ona, e kalaiwa aku ana ia i kana kaa i maa mau ai i ka hana, ua hele a piha i ka lanahu. I kona hele ana aku, aia kekahi kaa kikane i piha i ka lepo hoomomona, e kalaiwaia ana e kekahi Pukiki, ke hele ae la ma ia alahele hookahi no. Ua hookui aku la keia kaa lanahu me ke kaa o ke Pukiki, a haule aku la o Kekione Anakolio ilalo. A pii aku la na huila o ke kaa no ana i kalaiwa ai maluna ona. Ua pii aku la ka huila ma ka wawae hema a hoea i ka maha akau o kona poo. Ua nahoahoa pu ke poo, a hiki ole ke hoomaopopoia iho ke ano.
O ka inoa o ke Pukiki e kalaiwa ana i ke kaa i hookui pu aku ai ke kaa o Kekione, oia o Jacintho Miguel.
Ua ka’ika’iia aku ke kino make o Kekione a maloko o ka hale lanai o ka Hui Mokuahi o Poka Ma, waihoia iho la. E mau ana no kona hanu ana. A mamua ae o ka hoea ana aku o ke kauka ma ia wahi, a ma ka wa hoi i hiki iho ai o Hope Ilamuku Chillingworth, i ukaliia e Lutanela Opunui, ua lele loa ae la kona aho.
Ua haawi ae la ka Hope Ilamuku e hopuia o Jacintho Miguel. Aole nae oia ma ia wahi ia wa, oiai ua hoomau aku la no ia i ka hele ana me kona kaa.
Ma ka auwina la ae, hora 2:30, ua malamaia he Aha Koronero ma “Kalakaua Hale,” no ka nieniele ana i ke kumu i make ai o Kekione. O na “Kiure” i waeia, oia o John Kuaana, G. W. Kualaku, Chas. Clark, C. B. Maile, B. Kauinalu ame Joe Kalana.
Ma ka noho ana a keia Aha, me he mea la he eono poe hoike i ninaninau ia, a o ke ano nui o ka lakou olelo ike, oia keia, e loaa ana he kanakolu kapuai ke akea o ke alanui ma ka aoao makai o kahi a Miguel i hele mai ai me kana kaa; a ma ka aoao hoi o Kekione, he umi kapuai wale no ke akea. E hele ana no o Kekione me kana kaa ma ka aoao ku i ke kanawai e hele ai oia ma ke alanui.
Ua hooia ae la o Dr. Cooper i ka palapala hooia no ka make ana o Kekione. Wahi ana, o ke kumu o ka make, oia ka naha ana o ka iwi puniu poo. I ka hala ana hoi o ekolu hora o ka noho ana a ke Kiure Koronero, ua hoopuka mai la lakou i ka lakou olelo hooholo:
“Ua make ka mea i make ma Honolulu, ko Hawaii Pae Aina, ma ka la 26 o Sepatemaba, 1899, mamuli o ka naha ana o ka puniu poo, mamuli o ka pii ana o ka huila o ke kaa lawe lanahu ma kona kino ame ke poo, oiai hoi i haule ai ua mea la i make ai, mailuna mai o ke kaa ana e kalaiwa ana, ma ka hookui pu ana me kekahi kaa e kalaiwaia ana e kekahi Pukiki.”
Ua hopuia o Miguela, a ua hoopiiia oia no ka lawe ola ma ke degree mua. Ua bela ia oia no ka huina dala o $1000.
Papa Hoike Manawa.
Poalima, Sept. 22. --- Hora 2 o ka wanaao, ua ala ae la he hakaka kuikui lima mawaena o kekahi mau luina o na moku “Coalinga” ame “Brewer.”
Poaono, Sept. 23. --- Hora 2 o ka auwina la, holo heihei aku la na moku “Gladys” ame “La Paloma” mai Honolulu aku nei a i Lahaina, a hoi hou i Honolulu nei.
Poakahi, Sept. 25. --- Haiolelo mua loa he kanaka Nu Kilani, ma ka Olelo Enelani, maloko o ka hale Hui Opiopio o Honolulu nei, ma keia ahiahi imua o kekahi anaina kanaka nui. O Wherahiko Rawei, B. A., kona inoa.
Poalua, Sept. 27. --- Hookui he kaa lawe lanahu me kekahi kaa lawe lepo hoomomona, makai ae nei o ka uwapo, ma ke poo o Alanui Papu, a make loa he kanaka Hawaii, o Kekione ka inoa. He Pukiki ke kalaiwa o kekahi kaa.
Ola Kupaianaha Ka Hi.
He Lunahooponopono Nupepa no Viri-
ginia i aneane e poho ka manaolana
no ke Ola, eia nae, ua loaa hoi ke
ola kino maikai iaia mamuli o
kona inu ana i ka Laau Ola
a Kamalena no ke Nahu,
ke Kolera ame ka Hi.
E heluhelu i kona manao hoakaka.
Mai ka nupepa Times mai, Hillstile,
Va.
Ua loohia au i ka ma’i hi no kekahi wa loihi loa, a manao iho la au, ua hala loa ka wa pono e ola ai au. Ua nui ka wa i lilo ma ka imi ana i ke ola, nui nohoi ke dala lilo, a nui pu mai no me ka pilikia, ua aneane loa au e hooholo i ko’u manao, ua pau loa ka loaa ana aku no i ka hopena, eia nae, ike iho la au i ka hoolaha o ka Laau Ola a Kamalena no ke Nahu, ke Kolera a me ka Hi, a pela pu hoi me kekahi mau palapala hoike no kekahi mau ma’i i hoola kupaianaha loa ia e keia laau, nolaila, hooholo iho la au e hoao. Mahope iho o ko’u inu ana no kekahi wa i ua laau la, ua oia ae la au, a ke hoike aku nei au imua o kou mau hoa i loohia i ka ehaeha, he kanaka ola au i keia wa, a ua loaa hou ia’u ka ikaika o ke kino i keia la, a ua like no ko’u ola i keia wa, me ko ka wa i loaa ole ai au i ka ma’i. --- O. R. Moore. E kuaiia ana e na poe kuai laau apau. O Benson Smith & Co., Kaupalenaia, na agena no ko Hawaii Pae Aina.
He mau Ninau Baibala
1. Heaha ka inoa o ka laau nona ka hua i aiia ai e Adamu ame Ewa. a kipakuia ai laua mai ka mahinaai mai Edena?
2. Heaha ka hoailona a ke Akua i kau ai maluna o Kaina i ole ai ia e pepehiia?
3. Ma keaha i like ai o Adamu me Mose?
4. Nokeaha la i ae ai o Adamu e ai i ka hua o ka laau i papaia mai ai ia ame, Ewa, kana wahine, aole e ai i ka hua o ua laau la, oiai na Ewa ponoi no i haawi mai iaia e ai?
5. Pehea la i maopopo ai ia Kaina ko ke Akua apono ana i ka mohai a Abela?
6. Heaha ka holoholona nona ka inoa Hawaii i like me ka inoa o ke Akua; a malaila i hoikeia ai keia mau huaolelo, “Iesu Karisto ke Keiki a ke Akua?”
O ka mea ike e hai mai.
PUNI BAIBALA.
Honolulu, Sepatemaba 27, 1899.
He Kumumanao Ano Nui
Nou, a no kela ame keia mea --- Ua lawe
ae nei o Honolulu nei ia mea --- Ke
hoike ae nei no na Olelo Ho-
ike Kuloko no ia mea.
Ke hana ikaika oe, heaha ka mea e
ikeia ana? E luhi ana oe, aole anei?
E kulou ana oe i ka wa e hana ai.
E eha ana oe ke hapai i kekahi mea.
E hele ana oe ma kahi loihi, a holo ana ma kahi loihi.
Kapa iho la oe i keia, he hana luhi.
Aole hiki ia oe ke hiamoe ke hoea mai ka po?
Eha mai la ke kua, nalulu mai la ke poo, a he mea mau e eha mau ana ke kino a puni.
Pinepine ana kau olelo ana, ua kaea ia au.
Aka, aole keia o ka mea pololei.
O ke kumu o keia pilikia, oia ka pilikia ana o kou mau puupaa.
E hiki wale ana no ia lakou ke paahana elike me kahi ikaika i loaa ia lakou, a o ke kaikai ana, kulou ana, a hoopololei ana, oia ka mea e kaohi ana i ka lakou paahana ana.
Ua oi loa aku ka hikiwawe o ka hoolele ana o ka puuwai i ke koko ma ka upa ana, iloko o na puupaa, a ua lohi hoi ka lakou kanana ana.
Ua paapu ae la ke kanana, a pau ae la ke kanana.
O na eha e ikeia ana, oia na leo kahea o ua mau puupaa la, a e kahea ana lakou e loaa na kokuaia ana aku.
Aohe mea e ae i hikiwawe e hoohana koke i na puupaa elike me na Huaale a Doan no ke Kikala Hanenenee ame na Puupaa.
Oia ka makou olelo, a ke kakoo mai nei na kanaka o Honolulu nei i ka makou olelo.
Penei ka olelo a Mrs. Sara Vieira o Alanui Moi, o keia kulanakauhale: “No ekolu a eha makahiki, ua loohia iho la au i ka eha ma ke kua. O ka nui o ka ehaeha i loaa ia’u, ua oi aku ia mamua o ka mea i hiki e hoakaka maoli ia aku. He elua a’u mau keiki, a ua hiki ole ia’u ke nana aku ia laua, oiai keia eha e anee ana maluna o’u. O ka mea i loaa ai ia’u ka oluolu, oia ko’u ai ana i na Huaale a Doan no ke Kikala Hanenenee ame na Puupaa, i kuaiia e a’u ma ka halekuai o Hollister Drug Co. Ua nui ka pomaikai i loaa mai ia’u mai a lakou mai, a oia ka’u e hoike aku nei. Ke hoike aku nei au i keia laau no ka poe Kikala Hanenenee a ano ma’i e ae paha o ka puupaa, e ai i na Huaale a Doan no ke Kikala Hanenenee ame na Puupaa.”
E kuaiia ana na Huaale a Doan no ke Kikala Hanenenee ame na Puupaa e na poe kuai laau apau. Kumukuai he 50 keneta no ke poho, 6 poho no $2.50. E hoounaia aku no ma ke Eke Leta e Hollister Drug Co., Honolulu, na Agena kuai nui no ko Hawaii Pae Aina, ke loaa mai ke kumukuai.
Ua haalele aku nei ka Hui o Hanale Walakahauki ma i ka noho agena ana no ka laina mokuahi Benitania-Amerika. E hoomaka ana ka mana o keia haalele ana ma ka la 1 o Okatoba ae nei.
HOOLAHA KUMAU.
DR. T. MITAMURA
Keena Oihana, 427 Alanui Nuuanu Pahu Leta 842; Telepona 132: @ noho 542 Alanui Nuuanu. Hora @ 12 a. m. ame hora 7 a 9 p.m. Na @ Sabati, 2 a 6 p. m.
DR. I. MORI,
Keena Oihana, helu 427 Alanui Nuuanu, Pahu Leta 842. Telepona @@ Hale Noho 524 Alanui Nuuanu Halemai, 530 Alanui Nuuanu. N@ hora: 9 a 12 a. m., a mai ka @@ 6 a 8 p. m. Na la Sabati. hora @ 6 p. m. 2756-@
W. C. Achi. Enoch Johnson
ACHI & JOHNSON,
LOIO! LOIO! LOIO!
Keena Hana, Helu 10 aoao Komoh@@@ Alanui Moi.
W. R. KAKELA
Loio a he Kokua ma ke Kanawai.
HE LUNA HOOIAIO PALAAP@@.
@@70
LYLE A. DICKEY
Loio a he Kokua ma ke Kanawai.
Notari no ka Lehulehu.
E hookoia na hana pili kanawai a pa@ mai na Mokupuni mai.
Kihi o Alanui Betela me Moi. Pah@ Leta 786. Telepona 806.
Papa! Papa!
Aia ma kahi @
LEWERS & COOKE
(Lui Ma.)
Ma ke Kahua Hema o na Alanu@ Papu me Moi.
E LOAA NO NA
Papa Nouaiki
O kela a me keia ana.
Na Pani Puka ---
Na Puka Aniani ---
Na Olepelepe ---
Na Pou ---
--- Na O’a
--- Na Papa Hale
--- Na Papa Ku
--- Na Papa Moe
Na Pili Hale
O na Ano apau.
A me na
Wai Hoohinuhinu Nan
O Na A@@ Apa@.
Palaki o na Ano he Nei Wal@.
Ke haiia aku n@i @@@@@ @ na makemake a p@e, @@ mak@@@@ @@@ @@@ @@@@@ @ @@@@ @ hool@@@ aka @@ @@ @@@ a p@@ @ ;ili @@@ @@ k@ l@@@ O@@@@ @@ ka
Uku Haahaa Loa
@@ @@@ @@ ka @@@ @ @@@ @@@ @@@@@@ @ @@@@ @ @@ @@ @@@ @@@
@ @@@ @@ @ Wa@ @@ O@@@ @@
S. E. LUCAS, Ka Mea Lapaau Mak@ mai Pariaa mai.
Ke lawelawe nei au i na Maka Aniani kaulana i kapaia “Isometropes Lenses.”
Mai Parisa pololei mai ka’u mau waiwai apau.
E nana wale ia ana na maka me ke Kaki ole ia.
NA HORA HANA --- 9 - 12 A. M.
2 - 5 P. M.
LA PULE --- 8 a 10.
2738-t@