Ka Nupepa Kuokoa, Volume XXXVIII, Number 39, 29 September 1899 — HOOKUUIA ANA O DREYFUS E HUIKALA ANA KA AHA KUHINA O FARANI IAIA. [ARTICLE]

HOOKUUIA ANA O DREYFUS

E HUIKALA ANA KA AHA KUHINA O FARANI IAIA.

LADANA, Sept. 14.—Ua hoike mai ka mea kakau o ka nupepa Daily Telegraph mai Parisa mai, he mea oiaio loa e hookuuia ana o Kapena Dreyfus. 0 ka ninau wale'no e noonooia nei, oia ke ano e huikala aka ai iaia. NU lOKA, Sept. 14. —E hoike ana kekahi lono telegarama mai Parisa mai Ika nupepa "Sun: M I keia la i loaa mai ai i ka Lunakanawai Koa o ka Aha Hooponopono, ka olelo hoike a ka aha mai lalo mai. Ua manaoia, iloko 0 elua pule e hoopuka ai ka Aha i kana olelo hooholo, a oia ka wa i manaoia ai, wahi a ka wawa olelo, e lioopuka ai ke Aupuni i kekahi olelo kuahaua akea e huikala ana i ka poe apau i pili me Dreyfus, e komo pu ana malaila o Dreyfus, Picquart, Zola ame Mercier. Ua hala aku o Mercier i Eviana, no ka hooluolu ana. Ua hoole mai ia i ke koi ana aku a kona mau hoaloha e hoolaha oia i ka moolelo oiaio maoli e pili ana i ka hihia o Dreyfus, oiai, wahi ana i manao ai, aole i nalowale ka ulaula o ka lepo i nei wa. "Aole au i hoopuka i ko'u manao hope loa ma keia hana. Ke hopohopo nei nae au, aole paha e loihi na la mai keia la aku, a kaheaia mai no au e kamailio no'u iho." Aia nohoi o Esterhazy ke noho nei i keia wa ma ka hotele ma ka mokupuni o Jersey. Aole oia i haalele iki i kona rumi i ke ao, mai ka wa mai i puka ai ka olelo hooholo a ka Aha Hookolokolo Koa i noho ai ma Rennes. 1 ka po oia e hele holoholo aku ai ma ke alanui, a, aole nohoi oia i hoopilikiaia e na kaßaka, oiai no nae, ua kue loa ko ka lehulehu noonoo i ka olelo hooholo a ka Aha. LADANA, Sept. 14—Ua malamaia ka La Huikala o na ludaio maanei nei i keia la, me na hana hoikeike hoohiwahiwa. Ua ka-i huakai ae lakou me kekahi hae, "Dreyfus—ka Maratire. Ke koi nei ko ke Ao apau e hookuu koke ia oia." Ma ka haiolelo ana a ka Rabi Nui, oia hoi. o Addler, ua olelo ae la ia: "O ka la i ahewaia ai o Dreyfus, "he la ia i oi aku ai ko Farani poino mamua o ka la kaua o Watalu, a, i hoohaahaaia (ai, a oi aku i ko ka la i pio ai o Sedana." PARISA, Sept. 15—I keia kakahiaka i hooia ae ai ka nupepa "Matiii," ua ae ka Aha Kuhina e huikala aku ia Dreyfus, a, e kakauinoaia ana ka olelta hooholo huikala a ka Aha ma ka la 19 o Sepatemaba. Lehulehu loa na nupepa e koi ana e huikalaia o Dreyfus. Ua hoike ae nohoi ka nupepa "Figaro" e noi nei, e huikalaia ua aliikoa la. LADANA, Sept. 16—Ua kakau mai la o M. de Blowitz, ka mea kakau o ka nupepa Times ma Parisa: "Ua hoomaopopoia mai au e wehe hou mai ana 0 Kapena Dreyfus i kana hoopii hoohalahala, no ka noonoo hou ia ana o ka olelo hooholo a ka Aha ma Rennes, a mamuli auanei oia hana ana, ua waiho molaelae ia ke alahele e hiki ai 1 ke Aupuni ke huikala iaia. 0 keia huikalaia ana nae ona, aole ia he mea e hoi hou ai iloko o ka Oihana Koa. "Aole nae mea nana e akeakea mai iaia mai kona nonoi ana aku i ka Aha Hoopii hou e noonoo hou ia kona hihia, ma ka wa e loaa ai he mau mea hoike hou. I kona wa e hookuuia ai e noho ana ia ma ka Hema o Farani, oiai, aole makemake kona ohana iaia e lilo ia i mea na ka lehulehu o ko ke ao nei e hoonuanua aku ai me na olelo hoike aloha, malia o lilo ia mau hana i mea e imi hala hou ia ai oia."