Ka Nupepa Kuokoa, Volume XXXVIII, Number 39, 29 September 1899 — HOOKUUIA O DREYFUS. [ARTICLE]

HOOKUUIA O DREYFUS.

RENNES, Farani, Sept. 20.—Ma ka hora 3 o keia kakahiaka 1 haaiele iho ai o Dreyfus i ka halepaahao i hoopaaia ai oia mai ka la mai ona i hoihoiia mai ai, mai ka mokupuni Debolo mai, a hele aku la oia no Verne, a kau maluna o ke kaa-ahi e holo ana i Nantes. Aole i loheia a i hoomaopopo iki ia e na kanaka kona haalele ana iho i ka halepaahao. I ke aumoe loa o ka po, ua hoea mai la o M. Uigule, ke Poo o ka Oihana Makaikiu, ame M. Dureault i ka halepaahao, a ua lawe mai laua i ke kauoha a ke Kuhina Kaua e hookuu ia Dreyfus. Ua puka mai la ka paahao mai loko mai o ka halepaahao, a hele wawae aku la ia a hoea i Bouleward la Enne; malaila kau oia maluna o ke kaa, a holo aku la no kahi hoolulu kaaahi ma Verne, he wahi ia mawaho aku o ke kulanakauhale. Halawai pu aku la ia me Matthien Dreyfus, a kau aku la laua maluna o ke kaa-ahi, a holo aku la no Nantes. 0 ke kaa lio ana i kau mai ai, oia no ke kaa ana i kau ai ma ka wa ona i hoihoiia mai ai, mai ka mokupuni Debolo mai, a laweia ai oia no ka halepaahao. I ka hiki ana aku o ke kaa (lio) ana i kau aku ai mai ka halepaahao aku ma ka hale i noho ai o Lobari, kekahi o kona mau loio pale, mamua aku o ka hoaoia ana o kona ola e powa, he aneane si)o i-a mai ka hale mai, ua lele iho la ia mai luna aku o ke kaa, a hele wa,wae aku la, me kona nana ole ana ae i ka ua e hiolo iho ana, a hoea i kahi hoolulu kaa-ahi. Hoea nohoi ia i kahi hoolulu kaa, a hoea mai la no ke kaa-ahi e holo ana no Nantes. Ua noho iho la o Alfred ame Matthien Dreyfus maluna o ko laua mau noho, a haalele iho la ke kaa ia Rennes, me ka lawe ana aku ia Dreyfus, he kanaka lanakila. Oiai keia huakai hele kulu aumoe a i hoopilikiaia mai ka halepaahao aku, e hiolani ana ke kulanakauhale holookoa o Rennes iloko o ka hiamoe kulipolipo, a ike ole ae la i ka hemo ana mai o Dreyfus. Ua kakali no nae kekahi poe mawaho o ka halepaahao ia po, me ka manaoio ana no, e hookuuia mai ana no ia ma ia po, aka, no ka hele loa ana i ke aumoe, ua pau nui aku la lakou i ka hoi no ko lakou mau hale iho. 1 ke awakea o kekahi la ae, haalele iho la o Madame Dreyfus ia Rennes. Ua ukaliia oia e kona luaui makuakane ame kona poe hoaloha.