Ka Nupepa Kuokoa, Volume XXXVIII, Number 39, 29 September 1899 — ENELANI AME TRANSVAAL AA NO KA LAHUI BUA E WELA KA HAO. Ikaika na Hooliuliu Kaua ana a na Aoao Elua. [ARTICLE]

ENELANI AME TRANSVAAL

AA NO KA LAHUI BUA E WELA KA HAO.

Ikaika na Hooliuliu Kaua ana a na Aoao Elua.

LADANA, Sept. 20.—Ke oia mau nei no ke kulana uahoa o na aoao elua — Enelani ame Transvaal —aohe i ikeia he hiona o ka alualu mai. Ma ka halawai a ka Aha Kuhina o keia Poalima ae, e ikea maopopoia ai ka ke Aupuni mea e hana ai. E hiki ana paha i ka poe Bua ke kali hoomanawanui a hoea ia wa, he mea maopopo ole ia. E hoike ana ka nupepa "Pou Kakahiaka" i kekahi lono mai Pletermaritzburg, Natal, i hoounaia mai ma ka la 19 o Sepatemaba, oia hoi: Aohe wa e ae i ikeia ai ka- uahoa maoli o ke kulana hooupuupu kaua e ikeia nei i keia wa. Eia na poe Bua ke kali nei o ka haule ku-a-ua mai iloko o elua la ma na aina papu, o ko lakou wa ia e hoomaka koke ai i ka hoehu ana i ke kaua. Ua aa loa keia poe i ke kaua, a ua makaukau lakou e komo aku iloko o ka hakoko ana. Ua ikaika a paa maoli na papu pale, ame na walii pale i hoomakaukauia e na Bua ma na kaiaulu kuwaho o ka aina. Ua ala mai nei ke Aupuni Alani (Orange Free State) e kokua i na Bua, a ke ku makaukau nei na 'liikoa o ua Aupuni la e lawe pio mai i kekahi mau kulanakauhale Pelekane, ma ka wa e hoea mai ai ka pane hope loa a Enelani. LADANA, Sept. 19.—Aia na pualikoa pukaa o ka poe Bua ma na kiekiena e kiei mai ana ia Laings Neek. He mau mahele koa Bua ke ku kiai la ma*luna o ka muliwai Bufalo. LADANA, Sept. 19.—Ma ka auwina la o nehinei i hoea mai ai o Mr. Chamberlain i Ladana nei mai Birmingham mai, a hoohala ae la ia i ke āhiahi ma ke Keena Oihana o na Panalaau. Oiai oia malaila, loaa mai la iaia he palapala mai a Haku Salisebure mai. Ua ! kukaiia na launa palapala ana mawaena o laua, eia nae aole i kaheaia ka Aha Kuhina. Ua hoounaia he mau palapala nunui i ke Alii Kiaaina o Inia, oia o Haku Curzon, ame ke Komisina Kiekie o Beritania ma Aferika Hema, oia o Sir Alfred Milner. Ma nehinei i huli hoi mai ai o Kenerala Sir Garnet Wolseley, ka Ilamuku a Alihikaua Kiekie o na koa, i Ladana nei, a hele koke aku la no i ke Keena Kaua, a malaila ia i paahana ai i ka hapa* nui loa o ka manawa. E hoike ana ke Daily Chronicle i kekahi lono mai Cape Town mai, ua hopohopo loa ke Kanikela Beritania ma Pretoria, o hoopahuia ka hale o kā Oihana Kanikela malaila 'i na mea hoopahu dainamita.