Ka Nupepa Kuokoa, Volume XXXVIII, Number 39, 29 September 1899 — HE MINAMINA. [ARTICLE]

HE MINAMINA.

Ua komohia kuhohonu ka minamina iloko o ko makou houpo i ko makou hoomaopopo ana, ke pau mai nei na Hawaii maoli i ka haalele mai na hana mai o loko o ka Home Hoohanau Keiki Kapiolani. Aole makou i ike i ke kumu o keia puhee ana mai o na Hawaii, mai loko mai o keia "halau hale" i hooulu ia a i kukuluia e ka lima alii o Kapiolani, i kokua pu ia hoi e na wahine Hawaii? Ina ae mai na wahine Hawaii kuonoono o loko nei o keia kulanakauhale, a he lehulehu loa ia poe a makou i ike, oia hoi, e hoala ae lakou i hale malama i na keiki makua ole o loko nei 0 keia kulanakauhale, a i hale lioi no ka malama ana i na kaikamahine opio Hawaii, e anwana mai nei, a hooikaika lakou Hawaii ponoi iho, e alakai i kela hana no ka pono o ka "Hooulu Lahui," alaila, e ku ana ka.hana na lakou ponoi iho, a n nee ana ia hana mamuli o ka lakou hooikaika ponoi ana. E kii aku ia Kauka Makalua e noho mai ia i Ladana i kauka no ka "Home o na Keiki Makua Ole," ame ka "Home o na wahine opio kane ole." Ke ku nei ke Kuokoa ma ka aoao o ka lahui oiwi o ka aina, a hoeueu aku 1 keia hana mawaena o na wahine Hawaii kuonoono a waiwai o keia kulanakauhale. Aole no'ko makou hoowahawaha i ka hana a na ilikeokeo, aole. Aka, no ko maleou manao ana, e ku na Hawaii e kuokoa no lakou iho, aole e kaukai, aia'ka pono ia mea, a ia mea. Aole. E hana no ke aloha iahui, oiai he kanakolu tausani wale no ko kakou nui i heluia.