Ka Nupepa Kuokoa, Volume XXXVIII, Number 44, 3 November 1899 — KA INO MA KAUAI." [ARTICLE]

KA INO MA KAUAI."

Ua hai mai kekahi luina o ka mokukuna "Blanche & Ella" i noho ona ia e Mr. Julius Dudoit o Honolulu nei, a i noho kapena ia hoi e Kapena Kaaina, he nui ka ino ma na awa pae apau o ka Mokupuni o Kauai. Iloko no o keia ino i huli hoi mai ai keia moku no Honolulu nei. mai ke awa mal o Hanalei, ma ke ahiahi Poalua nei, a ku mai la ia nei i ka hora 10 o ke kakahiaka Poaha nei. Iloko no o ka ino e poipu ana i ke awa o Hanalei. i onou mai ai o Kapena Kaaina i kona moku e huli hoi mai i Honolulu nei. a he mea oiaio, mamuli o kana paio ana me na ale huli lua a poipua ke kaikoo e hulei lua ana i ke awa o Hanalei, ua oili pulelo mai la kona moku me he ahi lele la no Makana. Aia maluna ona, he 250 eke laiki, a ua hoea maalahi mai la keia waiwai no Honolulu nei. E hoi nou aku ana no ia i keia ahiahi no Kauai. 0 kona mau hoa moku e ae o ke ku ana i Hanalei, oia na moku-kuna "Waialua" ame "Ada," aia no paha laua ke lolii la i ke kai o Milolii, no ka nui o ke kaikoo. Malia nae paha o ku mai kahi o ia mau moku i keia po.