Ka Nupepa Kuokoa, Volume XXXVIII, Number 46, 17 November 1899 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA. NOVEMABA 17, 1899.       3

 

KO MAKOU NOHO PAIPAI.

 

I kela wa koliuliu i hala aku la,

E kueoe ana ma ke alaloa he wahi kanaka:

Aia hoi iaia he elua puolo,

Hookahi, hookahi ma kela aoao ame keia aoao.

E lei ana hookahi ma kona alo,

A e haawe ana hookahi ma kona kua.

O kahi puolo uuku ma ke alo,

A o ka mea hihimanu ma kona kua.

Ua hoailonaia ka mua-"Ko ia la."

A o ka lua hoi, - "Ko'u iho."

Holo mai la he wahi Alopeka,

A kiei, halo mai la i na puolo elua;

A puana ae la me ka hoomakeaka,

"U-hu: He oiaio ka hoi ia-

Ko ia la, aia ma ke alo,

Ko ka oiwi hoi, kaa mahope;

Ke ike la oe i ko hai kee.

A ike ole oe i kou iho.

Akamai o na akamai.

Maalea o na maalea."

Wahi a ka Alopeka

I waha-a ae ai-

Ko ke kanaka ano no ia

I kela ia ame keia la.

I na wa apau o kona ola ana,

Ma ka ili o ka honua.

E hoihoi oe mamua ku,

I ka puolo iko o kou;

A o ko hai mahope ae

A ike oe i ka naauao ame ka ike.

            HOOLALEA KAUA KUKA LA HALE.

 

Hoike Hui o na Kula Ahahui Opiopio imipono Karistiano o Koolau, Kauai

 

            Malamaia keia hoike hui o na Kula Ahahui Opiopio ma ka Luakini o
Anehola, Novemaba 5, 1899, ma ka hoomalu ana a ke komite hoeueu J. K. Apolo.

            Hoomakaia na hana i ka hora 11.50 me ka himeni aoao 82, Lei Alii, me ka pule a ka Peresidena G. M. Huddy.  He mau olelo hoolaha mai ka Peresidena no ka Ahahui; na ke Kahu Kula Sabati Nui William Huddy, no ka hoike hui o na Kula Sabati ma Waioli i ka la 24 o Dekemaba, 1899; ua kokua nui ia mai keia ma ka paipai ana i na haumana e D. Trask ame J. K. Apolo.  Hoolaha Ekalesia mai a J. K. Apolo.  Mele ia ka aoao 75 Lei Alii, e alakaiia ana e ke Kela o Koolau.  Na lulu dala no ka waihona o ka Ahahui:  Kula o Anehola $2.05; Koolau $2.05; Kilauea $.75; na makaikai $2.00.  Mele hou ia ka aoao 107 Lei Alii.

            Na hana hoike Kula Ahahui:  Kula o Anehola, 32 haumana, 1 pepe, e alakai ia ana e William Meheula, manawa 15 minute.  Himeni hui, aoao 23 Lei Alii, na ke Kula o Kilauea i mele mai.  Ke Kula mai o Kilauea 9 haumana, e alakaiia ana e J. Makani, manawa 8 minute.  Himeni hui, aoao 56 Lei Alii, na ke Kula o Koolau i mele mai.  Kula o Koolau, 18 haumana, e alakaiia ana e J. Keani, manawa 12 minute.  Himeni hui aoao 144, Lei Alii, e mele ia ana e na makaikai.  Papa o na Makaikai, 8 haumana, e alakaiia ana e J. K. Apolo, manawa 3 minute.  Himeni hui aoao 12 Lei Alii, e mele ia ana e ka papa o na makaikai.  Mahope o na hana hoike, he mau olelo paipai mai ka Peresidena mai, J. Kaoni, Ekekela, D. Trask, J. K. Apolo.  Ka huipa haumana i akoakoa mai he 67 me 1 pepe; na alakai 3, na luna nui 5, makaikai 5; huina pau loa 81: dala $6.80, manawa i hana ia e na Kula 38 minute.

            Hoike a ke Kakauolelo, aponoia.  Noi mai C. J. Makani e hoomomoia keia moolelo Hoko o na nupepa Hawaii, hooholoia.  Hookuu ia na hana me ke mele ana ma ka aoao 12 Lei Alii, me ka puaku like ana i ka pule a ka Haku.

                        WILLIAM HUDDY, Kakauolelo.

            Kilauea, Kauai.  Nov. 10 1899.

 

HOIKE HUI O NA KULA SABATI.

            E maiamaia ana ka hoike hui o na Kula Sabati o Kauai Hikina, ma Waioli, Hanalei, ke hiki aku i ka la 24 o Dekemaba, 1899.

NA HAAWINA MA KA HOAHANA.

            Iulai, no Kapaa; Augate no Anehola; Sepatemaba no Koolau; Okatoba no Kilauea; Novemaba ame Dekemaba, no na Kula o Hanalei.  Na himeni hui ma ka Hoku Ao Nani wale no, aoao 277, 40, 62, 220, 19b, 232, 138, 23.

            E na haumana Kula Sabati o Kauai Hikina nei, oniu ia ae na mea kaua iluna, a omau pono ia iho i na puuwai aloha i ko kakou Haku Iesu Karisto.

            E ua Kahu Kula Sabati, paka ia na koa no ka la hoouka o ka hauoli.  E na makamaka, e naue mai i ike i ka nani o ka laula o Kapaa, i ke ahi o Kalalea i Anehola, i ke kukui lau nui o Koolau, i ke koa hihi o Kahilikolo i Kilauea i ka wai uina o Namolokama i Waioli, i ka wai hu'i o Wainiha, i na hala o Naue i ke kai i Haena.  E na puuwai hauoli i na hana a ka Haku, e hele mai apau.

                        WILLIAM HUDDY, Kahu K. S. Nui o Kauai Hikina.

            Kilauea, Novemaba 10, 1899.

 

HOIKE NUI O NA KULA SABATI O WAIKANE AME KANEOHE MA LUAKINI O KANEOHE, DEKEMABA 31, 1899.

            O ka haawina Kula Sabati ma Ka Hoahana, mai Okatoba a ka la 12 o Novemaba, na ke Kula Sabati o Kaneohe, a o ka haawina mai ka la 19 o Novemaba a hiki i ka la 31 o Dekemaba, na ke Kula Sabati o Waikane.

            E malamaia i elua papa e kela ame keia Kula.  Hookahi papa o no Makuakane ame na Makua-wahine i huiia; elua papa o na opio kane ame na opio wahine, pokii kane a pokii wahine i huiia.

            Na kela ame keia Kula e imi i mau himeni no laua iho.  E eleu ma ka hoike ana.  Hoomaka ka hoike ana ma ka hora 10 a. m.  E loaa ka Papa kuhikuhi hana o ka la ma ia la hoike ma Kaneohe.

                        Kahu K. S. o na Koolau

            Waiahole, Oahu, Novemaba 8, 1899.

 

HALAWAI AHA KUHINA.

            Ua noho ka halawai a ka Aha Kuhina ma ka Poaha o kela pule aku nei, o Peresidena Dole ma ka noho.

            Ua aiea o George Manson i Notari no ka Lehulehu-Hooleia ke noi a Otomana i laikini kuai wai-ona mama no Waikiki.  Aeia ke kukulu ana i oihana wai no Lahaina.  Waihoia ke noi a ko Waialae poe no ka hana ana i ko lakou alanui Aupuni na ka ahaolelo kuloko o nei mua aku e noonoo.

 

KEIA AO, KELA AO

HE KAMAHAO O NA KAMAHAO.

Unuhuia o Hoouluaahiehie no KE KILOHANA POOKELA NO KA LAHUI HAWAII.

 

            Ke lohe la maua i ke kani mai a ka hana puhi ohe i ke koena leo mele hula poniniu a maua i haalele aku ai.  I keia wa, eia maua ke hele nei me ka pane leo ole ana o kela ame keia o maua i kahi ame kahi.  Ke waiho mai la imua o maua ke kihapai nani o ka hotele, e auau ana ia i na kukuna malamalama o ka mahina piha oia po.  O ua po nei hoi, ua hele a kalae ka ponaha-lani.

            Ke lohe aku la au ia wa i ka owe nanahe mai o na lau laau, oiai lakou i hooluliia ae ai e ka malanai makani aheahe e pa ana ia wa; ke mapu mai la hoi ke ala o ka rose ia wa, a ke honi aku la au i ka moani aala mai o ka matala (myrtle).  Aole hoi i liuliu ka maua hele ana aku, aia hoi lohe aku la maua i ke kani mai a ka manu nightingale, ka mea i olelo ia, ka manu i ka pili o ke ao.   A hala kekahi wa o ka maua hele ana me ko maua pane leo ole ana i kahi ame kahi, aia hoi, ua huli ae la au a ninau ae la i ua hoahele nei o'u:

            "E Celini, heaha la ke ano o kela mea au i haawi mai ai ia'u iloko o ka waina a'u i inu ai i kakahiaka nei?"

            Nana mai la ia ia'u a pane mai la me ka leo oluolu:

            "He laau lapaau.  He laau kela i hanaia noloko mai o ka wai o na lau ame na aa o na laau, a he mea nohoi e pilikia ole ai oe."

            "Nokeaha la oe i haawi mai ai ia'u ia mea?  Aole anei ou manao, ua lawe ae oe, a auamo iho maluna ou i kekahi hana koikoi loa?"

            Ike aku la au i kona mino aka ana iho, a kamilio mai la ia:

            "Aole o'u manao pela.  Ina ua lilo kela laau lapaau a'u i haawi aku ai ia oe i mea e pilikia ai kou ola, alaila, ua hewa maoli io au; aka hoi, ina ua loaa iki i ke ola o kou kino, a pela pu hoi me ka hauoli ulumahiehie ana o kou uhane, he oluolu a he maikai, elike me ka'u e ike aku nei ia mau mea i keia wa, alaila, ua aie oe ia'u i hookahi wahi huaolelo hoomaikai."

            Ia wa ua haawi koke aku la au i ka'u mau hoomaikai ana iaia.  He oiaio, o ka hauoli a'u e haaheo ana ia wa, o ka ui ame ka nani a na poe he nui oia po i haawi mai ai no ko'u ano oia po, ua loaa mai no ia mailoko mai o kela apu laau a ua hoaloha nei o'u i haawi mai ai ma ke kakahiaka.  No keia mahalo a'u i haawi aku ai iaia, ua akaaka mai la ia ia'u:

            "E Mademoasela, owau kekahi o na mea kino i hiki ole ke hoomanawanui i na ehaeha ana mai a kekahi mea kino maluna o ka ili o ka honua.  He mea ole ke ano oia mea kino e hoehaehaia ai ko'u naau, ina ua loaa oia i kekahi pilikia.  He mea kolo liilii loa paha ia maloko o ka huna lepo o ka honua, he pulelehua paha ia e lele ana iloko o ka lwea, he manu paha ia, he pua paha, a he kino kanaka paha ia, a ina e loohia kekahi o keia mau mea i na haawina o ke ehaeha, aole loa e hiki i ko'u uhane ke hoomanawanui, a o ka ehaeha ana o kela mea kino a'u i ike aku ai, o ko'u ehaeha ana ia.  Ua makemake loa au e loaa i na mea ola apau ke ola kino maikai ana maluna o keia ili-honua.  I ka wa mua loa a'u i ike ai ia oe, hoomaopopo koke iho la au ia wa, ua akeakeaia oe i ke kaana ana i na haawina hauoli o keia ola ana mamuli o kekahi pilikia nui i loohia iho maluna o kou kino.  Ike pu aku la nohoi au ia wa, ua lawelawe lapaauia oe e na kauka, a ua pahua nae ko lakou ike ame ko lakou akamai i ka pilikia ma'i e paa ana i kou ola kino.  Ua imi, ua huli, a ua noii lakou i ke kumu o kou pilikia, oia hoi, ka ma'i e hoomailo ana i kou kino ia wa, aka, he ole nae ka loaa.  E Mademoasela, aole o'u hoole i na lawelawe ana a na kauka akamai, a manao nui maoli no ke ola ame ka palekana o ka poe nawaliwali i kaheaia aku ai ka lakou mau lawelawe lapaau ana.  He mea oiaio, he mau mea kekahi iloko o kela ame keia ma'i i kau iho maluna o ke kanaka, i hiki i ko lakou noeau ke hoopau ae; aka, he mau mea kekahi i hiki ole la i ko lakou noeau ame ko lakou makaukau ke hoopau aku.  Na keia mau mea e hoopuhili a e hoopahua i ko lakou ike kauka, a mamuli oia hiki ole ana ia lakou ke nawehe ae i keia pilikia, ua haule aku la ka mea popilikia iloko o ka make.  O keia make ana nae, aole ia mamuli o ke kii ana mai a ka Anela o ka make a lawe aku i ke ola o ua mea la i hoopopilikia ia, aka, mamuli no ia o ka pahu'a ana o ke akamai o ke kanaka ike lapaau.  I mea hoomaopopo aku ia oe i ke ano o ka'u mea e kamailio aku nei ia oe, e hoomaopopo kaua aia iloko o ke kino o ke kanaka, ke pookela loa o na mea paahana a ke Akua i hana ai, he mau aa-lolo, a ua kapaia keia, ka mikini paahana o ke aa-lolo.  He mau maawe nunui a liilii keia mau aa-lolo e mohala ana iloko o ke kino o ke kanaka.  O keia iho la no na uwea a-haiolelo iloko o ke kino o ke kanaka elike me na uwea uwila o ke telegarapa ame ka uwea telepona.  Ina e poino, a e hoopilikiaia paha kekahi o keia mau uwea liilii, mamuli o ka paa ana i kekahi mea hoohihia kuwaho, aole loa e hiki ana i ke akamai a i ka noeau o kekahi kauka lapaau ke wehe ae i kela hihia i paa ai ke aa-lolo.  He nui no na kumu e loaa ai keia hihia ana o ke aa-lolo, aka, ua maheleia nae keia mau kumu iloko o na mahele nui elua, oia hoi, na kumu kuloko ame na kumu kuwaho.  O kekahi mau pilikia i loaa ai i ke aa-lolo ma o na kumu kuloko la iloko o ke kino o ke kanaka, e hiki ana no i na laau lapaau a ke kauka ke hoola ae; aka, ma kekahi mau mea kumu kuloko e ae, aole hiki.  O na kumu kuwaho hoi e hoopilikia ana i keia mau uwea uwila o loko o ke kino kanaka, aole loa e hiki i ka laau lapaau ke hoopau ae.  I ko'u nana pono ana i kou mau ano apau ma ka la mua a'u i ike ai ia oe, ua ike iho la au, ua like loa kou pilikia me ko'u i kahi wa i hala ae nei; nolaila, hoao iho la au e haawi aku ia oe i kahi laau a'u i manao ai, he mea paha ia nou e pono ai, a he mea oiaio, ua ike io ia ka waiwai o ia hoao ana a'u.  Aka, e hai aku nae au ia oe, o keia oluolu ame keia hauoli i loaa ia oe, no ka manawa wale no ia.  Iloko o kanahakumamawalu hora mai keia wa aku, e hoi hau aku no oe iloko o kou mau ehaeha mua.  Aole hiki ia'u ke kaohi mai ia oe mai kou ka-lilo hou ia ana aku iloko o kela kulana mua i loaa ai ia oe."

            I kona hoopuka ana mai i keia mau huaolelo hope, aole i kana mai ka nui o ko'u kaumaha.  Me he mea la, e uwe kanikau ana au iloko iho o'u, oiai ua kau mai la ka weli o na ehaeha ana he nui a'u i auamo hoomanawanui ai i na wa i kaa hope ae.  I keia wa, me ka leo kaumaha kamailio aku la au iaia:

            "E haawi mai nohoi oe i kela apu laau au i haawi mai ai ia'u i kakahiaka nei?"

            Me ka leo kaumaha a kuoo, pane mai la ia:

            "E Mademoasela, aole hiki ia'u ke haawi hou aku ia oe i ua laau la, ke ole e loaa mai ia'u he mau kuhikuhi hou ana."

            "Mai awai mai hoi keia mau kuhikuhi ana au e olelo mai nei?" wahi a'u i ninau aku ai iaia.

            "Ke kali nei au o ka loaa mai o keia kuhikuhi a'u i hai aku nei ia oe mai ko'u hoaloha mai, ka mea nohoi nana i hoola i ko'u popilikia elike me kou nei.  Oia wale no ka mea hookahi e hiki ke hoike mai, ua pololei paha ka'u mau manao-koho no ke ano o kou ma'i, aole paha.  A ma kekahi olelo ana hoi, ua pololei paha ka'u e ike nei no kou ano maoli mai kou hanauia ana mai,"

            "A heaha keia mau manao-koho au i hoomaopopo wale ai no ko'u ano?" i ninau aku ai au iaia.

            Aole oia i pane mai ia'u, a hala kekahi mau minute, me he mea la e nalu ana paha ia iloko iho ona.  A mahope kamailio mai la oia imua o'u me ka leo kuoo, a piha eehia nohoi:

            "E Mademoasela, ma keia ao, aole he elua mau mea kino kanaka i like i kahi ame kahi; aka, o kela ame keia mea kino nae i hoea mai i keia ao, ua hali pu mai la ia iloko iho ona i kau wahi lihi o ko ke Akua ano, oia hoi ka mea i kapaia e kakou he Uhane.  O nei mea he Uhane, he wahi mea ia i like me ka huna ahi e aa ana iloko o ka popo lepo, i kapaia he kanaka.  Aia iloko o keia huna ahi ka mea i kapaia ka MAKEMAKE, a ua like keia mea me ka anoano hooulu.  Ina makemake kakou e ulu ae keia mea he MAKEMAKE a he IINI, he MANAOIO-HANA, e noho ana iloko a ka Uhane, alaila, he mea pono ia kakou ke hoopulapula ae i keia mea a hiki i kona ikaika ana, a lilo hoi i mea nui, a ina e mahuahua loa ana kona nui ana ae, a pela hoi me kona ikaika, e lilo auanei ia i mea mana.  E nana oe i ke kamaiki opio, ma ka wa e o mai ai na kukuna o ka maamaalea ame ka ike ikoko ona, oia wa a ka makua e hooponopono aku ai i ka olino ana mai a keia mau kukuna maikai, i loaa ai he ka'i lalani like ana o ia mau kukuna ma ke ano o ko lakou mohala ana, a i ole ai nohoi, e lilo ua mau kukuna la i mau mea hoopoino i ke ano hoopono o ua kamaiki opio la.  O ka hooulu pono ia ana o keia mau kukuna malamalama iloko o ua keiki la, he mea ia e mahuahua ae ai ua mau kukuna malamalama 'la iloko ona, a e hoea mai auanei ka la e hehi ai keia keiki ma ke anuu o ke kapaia ana he kanaka naauao.  Pela iho la no ke ano o nei mea he Uhane iloko o ke kanaka.  O keia mea nae he Uhane, he mea ku ole ia i ka make, oia hoi, e ola mau loa ana ia.  Aia mawaho o keia uhane ola mau loa, he mea i kapaia he puolo lepo, a i ole, he wa-hi, he aa pulu nui pana, a pela aku.  Me he mea la, o ka hapalua o na kanaka apau e pipili nei ma ka ili hualala o ka poepoe honua, elike me na pioeoe e pipili ana ma ka pohaku, aole lakou i hoomaopopo iki i keia kulana hana e pono ai ka hooulu ana i ka Uhane ikoko o ke kanaka.  O ka lakou mea i ike, oia ka hoohinuhinu ana i ka puolo e ope ana i ua uhane la.  O ka mea i hanauia na ka Uhane, na ka uhane ia; a o ka mea hoi hanauia na ke kino, na ke kino no ia.  Ua lilo loa ko ke ao nei i ka hana ana ma na mea o ke kino, a ua mahaloia lakou no ka hana ana i na mea e nani ai ke kino, a e hanohano ai hoi.  Ma ka wa hoi e lawelawe ai kekahi poe i na mea e nani ai ka uhane, e hiipoi mai lani ia ai oia, e loaa ai na haawina hiwahiwa iaia, e kapaia ana keia poe, he poe hoomanamana, he poe pupule, he poe hehena, a he poe diabolo.  Ano, e kuu hoaloha, o keia momi waiwai nui a ke Akua i hoonoho ai iloko o ke kino o ke kanaka, oia ka'u mea i makemake ai e kamailio aku ia oe.  O ka poe i ohohia hauoli ko lakou mau naau i ka ulu ana ae o nei mea he uhane iloko o ke kanaka a hiki i kona ikaika ana o lakou no ka poe i haawi, a e alana ana hoi i ko lakou mau ola ana, ka lakou mau hooikaika ana i mea e ku ai kela uhane ma ke kiekie na o ka nani nui.  E ai ke kino materia o ke kanaka i na mea materia o ke ao materia i loaa ai ka ikaika iaia; e ai hoi ka uhane i ka ai uhane i hoouluia ma ke ao uhane i mea e loaa ai iaia kona ikaika ana.  I mea hoi e holo lea ai ke ola o ka uhane, ua oi aku ka pono ke kaohi ke kino i na hialaai hihimanu ana o kona makemake.  Oiai, e kaawale ana ke kino uhane mai ke kino materia mai o ke kanaka, a i uhiia nae ke kino uhane e ke kino materia o ke kanaka, ua lilo i kekahi wa na aa-lolo iloko o ke kino materia o ke kanaka i mea e pilikia ai ua kino la, mamuli o ka hooikaika kuloko ana o ka uhane iloko o ua kino nei e noho alii oia ma ka hooponopono ana i ka hooheleia ana o na hana a ke aa-lolo i ku i ka makemake o ka uhane, oiai hoi ua uhane la e peahiia aku ana e kekahi kino uhane okoa mawaho aku nei o kona kino.  Noalila, o keia hana a ka uhane iloko o ke kino, he mea ia i kapaia ma ka akeakamai a Paulo, he paonioni ana, he hakoko ana, he paio ana.  E kue mau ana ke kino materia i keia hana a ka uhane, a no ia mea olelo iho la o Paulo i uluhiaia e ka Uhane o ke Akua ua paio a ua hakoko kahi mea iloko ona me na mea i makemakeia e kona kino.  Ua ake kona uhane e hana i ka mea i makemakeia e ia, eia nae, aole ae kona kino.  He kakaikahi wale na poe i loaa keia ano.  O oe ua haawi holookoa oe ia oe iho, oia hoi o kou kino ma na hana e hauoli a e oluolu ai kou uhane, aka, ma ia hana ana nae au, ua kipi ae la kou kono apau, a ulu ae la he hakoko mawaena o kou uhane ame kau kino, a no ia kumu ua hoopilikia ia iho la kou mau aa-lolo e na hehi kue ana a kou uhane i na makemake o kou kino e hoounaunaia ana ma ia mau uwea uwila o loko o kou kino, a ulu mai la he ma'i iloko o'u, he eheeha, he kaumaha he uwe ana.  Nolaila, he mea pono ke lanakila kou uhane maluna o kou kino, oia ka lanakila ana o ke ola maluna o ka nawaliwali.  Oia ka rula ana o ka makemake uhane i ka makemake kino.  A elike me ka loaa ana he ola i ke kino lepo ma o ka uhane la, pela e loaa ai he ola i ka makemake kino ma o ka makemake uhane la.  E ola ana kela ame keia kuio iloko ou, me ka mohaha ame ka maikai.  E lokahi ana laua i kahi ame kahi, a ua like loa laua me na mahoe, ka like loa o ko laua mau maka ame na helehelena.  Eia oe ma keia ao, a he pio hoi oe na ko keia ao.  O kakou apau e noho nei ma keia ao, he poe pio kakou na keia ao, oiai he mea pono ia kakou ke hoolohe a ke hooko aku i ua kanawai o keia honua, elike me ka hoolohe ame ka malama ana a ka paahao i na kanawai ame na rula o loko o ka halepaahao i hoopaaia ai oia.  Pehea la na ehaeha e loaa mai ana ia oe ma o keia hoolohe ana i kea mau kanawai, aole hiki ia oe ke pale ae ia mea.  Aka, ina nae o ka uhane iloko ou, a eia oia ma kona kulana o na makahiki lehulehu i hala hope ae, a pela hoi me ko keia mau makahiki ma keia hope aku, alaila, e ku mau ana no kou uhane iloko o ka hauoli ame ka oluolu; aka, no keia wa la, he mea pono ia oe ke hoolohe i na alakai ana ame na kauoha ana a kou mau luna paahao, oia noi ka poe i kupaia-na Haku o ke Ola ame ka Make.  He hana nui kau ma ka honua nei a aole hoi e hiki ia oe ke hana, ke ole e loaa ke ola kino maikai ia oe.

            I ka pau ana hoi o kana olelo ana mai ia'u, ia wa i ninau aku ai au iaia:

            "Pehea oe i ike ai o ko' uano iho la keia, oia hoi, he uhane ko'u e ake ana e lanakila maluna o na makemake o ko'u kino, i mea e hiki ai ia'u ke hana aku, a ke lawelawe aku i kekahi hana nui ma ke ao nei?"

            "Aole hiki ia'u ke hai aku ia oe, ia mea e Mademoasela: he koho wale no keia a'u e hoike aku nei ia oe.  Hookahi wale no kanaka a'u i manao ai, ola wale no ke kanaka hiki ke koho pololei mai i kou ano maoli.  O keia kanaka nae, he oi aku ka nui o kona mau makahiki mamua o ko'u, a o ka mea hoi nona ke ola ana i hoopuni holookoaia e ka malamalama olinolino o ka uhane maemae, ka mea hoi nona ka naauao i like kona hohonu me ko ka moana, a o ka poiuiu o kona noeau ua hoea aku no ia i ka poiuiu o ka lewa.  He mea pono ia'u ke ike mua iaia, a kamailio pu me ia, mamua o ko'u hoao hou ana i kekahi mau laau.  Aole nae na'u ponoi iho keia mau laau, aka, nana mai no.  Aka, e Mademoasela, ua loihi loa paha kaua e noho nei i waho nei, a ina aole au mea hou e kamailio mai ai ia'u, alaila, e uhoi kaua i ke keena hulahula," a ma ia wa i anehe ae ai ia e huli ae no ka hoi ana aku i ke keena hula.

            Aka, ia wa i komo koke mai ai kekahi manao iloko o'u, a makemake iho la au e ninau aku iaia.  Nolaila, paa aku la ko'u lima i kona lima, nana aku la au iaia, a kamailio aku la au iaia me ka malie loa ame ka moakaka loa hoi:

            "O keia hoaloha au i olelo mai nei ia'u, aole anei o HELIOBAS kona inoa?"

I kela wa i ike aku ai au i ka ona ana ae o kona kino; hoholo ae la ka ula ohelohelo ma kona mau papalina, a, emoole hoi, nalowale ae la ia ula ohelohelo mai kona mau papalina aku.  Ike aku la au i ke ano pioo o kona mau onohi maka, a ike pu iho la au i ka haalulu ana ae o kona lima.  Aole nae i liuliu, a hoi mai la kona ano apau elike me mamua, alaila, nana pono mai la ia ia'u.  Ike aku la hoi @ i ka pahola ana mai o kekahi helehelena oluolu loa maluna ona,

            "E Mademoasela," wahi ani i pane mai ai ia'u, "ke ike nei au, he mea pono ia oe ke ike i na mea apau.  Ua weheia ka ipuka o na mea huna pohihihi o kela ao imua ou.  Nolaila apopo, hele hou mai oe i kuu keena hana, a ma ia wa au e hoike aku ai i na mea apau i pono e haiia aku ia oe.  A mahope aku o ia wa, e kaa no ke alakaiia ana o kou ola e kou mau lima ponoi.  I keia wa mai ninau hou mai ai ia'u no kekahi mea.  Ua lawa kaua i keia po."

            I kela wa, hoihoi aku la ia ia'u no ka rumi hulahula.  Aka, i ko maua hoea ana aku ilaila, ua pau mai la ko'u hoihoi no na lealea o ia po.  I ko'u huipu hou ana aku me kuu hoaloha, me Mrs. Everard, ua hai aku la au iaia, ua "kaea" ia au, a e hoi ana au e hiamoe.  Ua hoihoi mai la nohoi o Celini ia'u, a i ka hiki ana i ka puka, ua huli ae la au a olelo mai la iaia:

            "Aloha oe.  I ka awakea o ka la apopo e hoea aku ai au ilaila."

            Alaila, pane mai la oia:

            "Aloha oe, e Mademoasela!  I ke awakea o ka la apopo e makaukau no au e hookipa mai ia oe."

            Ia wa haawi mai la oia i kona aloha ia'u me ka hiehie nui, a hoi hou aku la ia iloko o ka rumi hulahula.  Owau hoi, ua pii aku la au noluna no ko'u rumi.  I ko'u hoea ana aku i ua keena nei o'u, ike iho la au e mau ana no ke omamaka o na pua lilia a Celini i haawi mai ai ia'u.   Wehewehe ae la au i ua mau pua la mai ko'u lole ae, a hookomo iho la ia mau mea me ke akahele loa iloko o ke kiaha wai, alaila, mahope iho o ko'u aahu ana iho i ko'u aahu moe po, ua haule aku ia au hiamoe.

            Oiai nae e hiaa ana no ko'u mau maka, ua hookaihele ae la ka'u mau noonoo ana no na hana oia po.  Aole i liuliu, aia hoi ua lulumi mai la ka hiamoe maluna o'u, a hala aku la au no ka aina moeuhane.            (Aole i pau.)

 

HALA AKU O REV. DR. SAUTON NO KE KAHUA MA'I LEPERA O MOLOKAI.

            Ma ka Poalima o kela pule aku nei, maluna aku o ka mokuahi Lehua o ka Hui o Waila Ma, i hala aku ai o Rev. Dr. Sauton, kela kauka huli ano ma'i lepera mai Parisa mai nei, no ke kahua ma'i lepera o Molokai.  Ua ukaliia aku ia e Luna Hooko Reynolds o ka Papa Ola Hawaii ame Dr. Walter Hoffman, kauka "bateriologia" (huli anoano ma'i aai) o ke Aupuni Hawaii.

 

G. DIETZ

He Mea Hana Wati Akamai a piha Noeau Loa.

Alanui Nuuanu, Helu 417.

            Aia ma ke Alanui Nuuanu, maka iho o ka Halekuai Pipi "Central Meat Market."

 

KAKELA ME KUKE

(Kaupalenaia.)

Poe Kalepa ma ke Komisina,

A HE

Poe Lawelawe Kopaa.

AGENA.

2736-tf

            Mai poina i ka nana ae i ke Kaa Hehihehi Wawae lua ole o ka paa, ka maikai ma ka holo ana, i ikeia ma na wahi kuai kaa apau.

 

Kalivilana (Cleveland.)

HONOLULU BICYCLE COMPANY.

209 Alanui Hotele.      Telepona 909.

2753-1m

 

HOOLAHA KUMAU.

Ka Hu Ai hao me Aina o Oahu

MAI A MAHOPE AKU O IUNE 13, 1898

Manawa Holo

WAHI HOOLULU.  Mai Honolulu aku.

 

Waianae, kaa huikau na la apau koe ko Sabati.

Waialua, kaa ohua, na la apau.

Waialua, kaa ohua, na la apau

Wili o Ewa, na la apau

                        A.M.    A.M.    P.M.    P.M.

Honolulu........7:10      9:15     3:00     5:18

Manana.........  8:07     9:48     3:43     5:30

Wili o Ewa....  8:37     10:08   4:00     6:10

Waianae...       9:27     10:53   4:43     ....

Waialua...        ....        12:00   5:25     ....       

           

 

WAHI HOOLULU.  Mai waho mai a i Honolulu.

 

Wili o Ewa, kaa ohua, koe ko Sabati.

Waialua, kaa ohua, na la apau.

Waianae, kaa huikau, na la apau, koe ko Sabati

Waialua, kaa ohua, na la apau.

Wili o Ewa, kaa ohua, Sabati wale no.

 

                        A.M.    A.M.    A.M.    P.M.    P.M.

Waialua.......    ....        6:12     ....        2:30     ....

Waianae......    ....        7:12     10:09   3:55     ....

Wili o Ewa..    5:50     7:47     10:59   4:32     12:45

Manana.......    6:15     8:07     11:04   4:52     1:10

Honolulu.....    6:50     8:40     12:15   5:26     1:45    

@. P. DENISON. Luna,

F. C. SMITH.  Luna Kuai Palapala Holo

 

Metropolitan Meat Co

(Hui Kuai Pipi Metropolitan.)

G. J. WALLER. (Wala) – Luna Nui

108 Alanui Moi.

 

Poe Kuai a Hoolako i na Moku

ME

Na Io Pipi, Hipa a pela'ku.

 

E loaa mau ana na Manu ame na Kamano io hoohu'ihu'iia iloko o ka Hau

            Makepono ke Kuai i na I'o Pipi maanei.

TELEPONA HELU   -           -

 

Ola Nawaliwali

MAMULI O KE

KOKO INO.

 

            E heluhelu iho i ka mea i hanaia e ka Ayer Laau Sarasaparila no ka Rev. Z. P. Wilds, he misionari kamaaina loa maloko o ke kulanakauhale o Nu Ioka a hoahanau nohoi o Lunakanawai Wilds i make, he kanaka kauiana:

            "No na makahiki lehulehu he luahi au na ka ma'i pa-palahu ame ne ma'i aai e ae, i puka noloko mai o ke koko ino.  Ono ole mai la ka'u ai, a nawaliwali mai ko'u nui kino apau.  Mamuli o ko'u ike ana i ke ola ana o kekahi poe e ae no ko lakou inu ana i ka Laau Sarasaparila a Ayer, ua hoomaka iho la au e inu i ua laau la. A ua

ONO AE LA KA'U AI

mai ko'u inu mua loa ana mai no i ua laau la; alaila, hoomaka mai la ka maikai o ko'u ola.  He haneri pa-kenata ka oi o ko'u ikaika ae i keia wa, a ua loa mai kela mai ka LAAU SARASAPARILA MAI A AYER, ka laau hoi a'u e hoike aku nei me ka oiaio, oia ke pookela loa o na laau hoomaemae koko i ikeia."

            No na ma'i apau i loaa noloko me o ke koko ino e lawe i Ka Ayer Laau Sarsaparilla.

 

KA AYER HUAALE Ka Laau Hoola no ka Ma'i A waawahia o ka Opu

 

Ke pookela o na laau no ka malama ana, ka hooulu ana me ka hoonani ana i ka lauoho, oia ka Ayer Laau Hooulu Lauoho.

            Aole e kepia ke poo, ola na ma'i puupuu, aole hoi helelei ka lauoho.  Ina maloohaha mai ka lauoho, hinawenawe a ano hina mai, alaila, na keia laau e hoo'iho'i hou ae a kona ano mua, a hooulu lupalupa ae la i ka lauoho.  Ma na wahi apau, o keia Laau Hooulu Lauoho a Ayer ke pookela, a ua lilo ia i punahele a i hoapili no na lede ame na keonimana.

Ayer's Hair Vigor

I homakaukauia o DR. J. C. AYER, Lowell, Mass., U.S. A.

Na Medala Gula mai na Hoikeike Nui o ke Aa

Hollister Drug Co. Lt.

Na Agena ma ka Paeaina Hawaii.