Ka Nupepa Kuokoa, Volume XXXVIII, Number 2, 12 January 1900 — KE KAU PALE KOHO BALOTA MA KE ANA WAIWAI AME KA LOAA MAKAHIKI. [ARTICLE]

KE KAU PALE KOHO BALOTA MA KE ANA WAIWAI AME KA LOAA MAKAHIKI.

Manao no makou, he mea maikai ke kaupaleia ana o ka loaa ana o ka pono koho balota i na poe e makemake ana ia pono ma Hawaii nei, mamuli o ke ana waiwai ame ka loaa makahiki. Mamuli o keia kumu e kolia ai ke kanaka waiwai ole e hooikaika oia e loaa ona waiwai nona i mea e hiki ai ke loaa iaia ka pono koho balota; a i ole hoi ia, e hoao ana ia e hooikaika e

loaa iaia he $600 i ka makahiki hookahi. I mea hoi e loaa ai iaia keia pono, ina aohe ona waiwai paa. O keia pahu hopu, eia ia [la?] ke alualu like ia ana e ke kanaka naauao makemake koho balota ame ke kanaka nui ole o ka ike, e ake ana no hoi ia pono hookahi. O ka loaa ana i kela ame keia o laua o kekahi o keia mau kulana i hoikeia ae nei, he waiwai paa paha, a i ole, he loaa makahiki paha i hiki aku i ka $600, oia ka loaa ana o kekahi o na mea hookupono i ke kanaka e komo aku oia i loko o ka poai no ke koho balota. E loaa ana i ke kanaka ma keia ano keia mau mea elua: 1 He aina; 2 He pono koho balota, a i ole: 1 He loaa makahiki o $600; 2 he pono koho balota. O ke kanaka naauao uhauha a hoomaunauna wale i kana mau dala loaa o kela ame keia la, pule a mahina paha, a loaa ole he wahi aina nona, a waihona paha nona, he kanaka ia i kupono ole ke aeia e komo ma ka poai o na hooponopono ana i na kanawai o ka aina, koe wale no, kahi pono koho lunamakaainana e loaa ana iaia, elike me ke kulana o ka Bila Kanawai Hawaii e ku nei i keia wa maloko o ka Ahaolelo Nui.