Ka Nupepa Kuokoa, Volume XXXVIII, Number 37, 14 September 1900 — NA ELELE O NA APANA KOHO BALOTA O KA AOAO REPUBALIKA. [ARTICLE]

NA ELELE O NA APANA KOHO BALOTA O KA AOAO REPUBALIKA.

E kulike ai me ke Kuahaua a ka Peresidena o ke Komite Waena o ka Aoao [R]epubalika no ka Halawai Elele Nui e malamaia ana ma Honolulu nei i ka Poakahi, Sepatemaba la 24, ua kohoia kela mau Elele malalo iho e na Elele Apana ma na la i hoikeia. Ua manao mua ia, e noho ana keia Aha Elele ma Hilo, aka, mamuli o ka lolelua o ke Komite Hooko—me he kamalii la, ua hoololiia ka lakou olelo hooholo lalau, a e noho no ma Honolulu nei. Ua hanaia keia mau hana malalo o na hookikina a ka poe alunu. Ua hiki! aia a hoea mai ka la, e ike no auanei ua 'kamalii.' APANA EKAHI. Ma ka Aha Elele o keia Apana i malamaia ma Hilo, Hawaii, ua kohoia keia mau inoa i mau elele no ka Aha Elele Nui e malamaia ana ma Honolulu, Oahu, ma ka la 24 ame 25 o keia mahina: C. R. Blacow, Jas. Gibb, W. G. Walker, Judge Keman, M. V. Holmes. Wm. Horner, W. H. Smith, A. B. Loebenstein, John G. Jones, J. U. Smith, Carl Smith. APANA ELUA. Ma ka Aha Elele i malaia [malamaia] ma Kailua, Hawaii, ma ka la 2 o Sepatemaba, 1900, ua kohoia keia mau inoa no ka Aha Elele Nui e malamaia ana ma Honolulu nei ma ka la 24 ame 25 o keia mahina: J. D. Paris, J. A. Maguire. Harry, T. Mills, G. P. Kamauoha. Thos. Aiu, C. Towt, H. L. Holstein, Samuel Parker, E. A. Fraser, S. K. Kekuewa, J. Waipuilani. APANA EKOLU. Ma ka Aha Elele i malamaia ma Wailuku, Maui, ma ka Poakahi iho nei, ua kohoia keia mau inoa i mau elele no ka Aha Elele Nui: Molokai: D. H. Kahaulelio, J. H. Mahoe, J. K. Kahinu. Lahaina: Matt McCann, D. Kahaulelio, R. C. Searle. Wailuku: A. N. Kepoikai, W. J. Lowrie, George Hons. Makawai [Makawao]: P. N. Kahokuoluna, H. P. Baldwin, W. O. Aiken, C. H. Dickey, A. F. Travores, J. Kaluna. Hana: J. K. Hanuwa, M. H. Reuter, E. M. Hanuna. APANA EHA. Ma ka halawai a na Elele o ka Apana Eha ma ka Hale Oihana Kalepa i ka Poalua iho nei, i kohoia ai na elele oia Apana no ka Aha Elele Nui e malama ia ana ma Honolulu nei ma na la 24 ame 25 o keia mahina. Eia iho ko lakou mau inoa: J. W. Jones, George McLeod, A. G. M. Robertson, Chas. B. Wilson, C. L. Wilcox, Clarence Crabbe, Andrew Brown, J. D. McVeigh, J. H. Boyd, A. V. Gear, W. H. Coney. Archie Gilfillan, Keiki, W. R. Farrington, Samuel Johnson. APANA ELIMA. Eia iho na Elele o ka Apana Elima: Frank Pahia, John McCabe, George Weight, W. W. Goodale, Andrew Cox, Mahelona, Judge Kekahuna, C. F. Renton, L. L. McCandless, Judge Hookano, James L. Holt, H. R. Hitchcock, W. C. Achi, C. F. Peterson. George R. Carter, W. J. Coelho, J. L. Kaulukou, Enoch Johnson. Mamuli o ka hiki ana mai nei o William Muach mai San Francisco mai, maluna mai o ka mokuahi Alameda, e hoomaka koke ia aku ana ke kukuluia ana o ka hale kalepa o Alexander ma ka aoao mauka o ke Alanui Moi.

UA HOOPUKA AE NEI KE KOMITE HOOKO O KA APANA ELIMA I KEIA MAU KAUOHA MALALO IHO NEI: NA HOOLAHA KOHO BALOTA. 1. E hoomaka koke aku kela ame keia Ahahui Mahele e helu i ka nui o na poe kupono no ke koho balota e noho ana iloko o kela ame keia Mahele Koho, i mea e maalahi ai na hana a pela hoi e loaa ai i ke Komite Hooko na mea apau e pili ana me ka hakalia ole, a ke manao nei ke Komite, he mea pono e haiia i hookahi a oi aku mau luna helu. 2. E hoolako koke mai i kope o ka Papa Inoa o na lala o ka Ahahui Mahele, e hoike ana i ka poe i kakauinoa ma ke ano Repubalika. He mea pono ke hoopaaia he mau hoailona mahope iho o ka inoa o ka poe i koho ma ke koho hope loa ana iho nei. 3. Mahope iho o ka loaa ana o kela mau mea ae la, ke ktuohaia [kauohaia] nei kela ame keia Elele Apana, e hele aku e hui kino me na poe kupono i ke koho balota apau i komo ole ma ka Aoao Repubalika, a e kono aku ia lakou e hui pu mai me ka Aoao Repubalika. Ma keia hana, e lilo ana na kokua ana a na makamaka ma na apana okoa aku i mea hooikaika ma ka hooholomua ana i keia hana, a ina e loaa mai ana keia mau inoa kanalua no ke komo mai ma ka Aoao Repubalika i ke Komite Hooko, alaila, e hoounaia aku no ona [oia?] mea a mau mea paha no ka hui kino ana me ia poe kanalua. 4. He mea pono loa no kela ame keia mea koho o ka Aoao Repubalika e hele e hoopaa inoa no ke koho balota, i mea e loaa ai ka pono koho ma ke Kau Koho o Novemaba ae nei, a e makaala aku hoi kela ame keia Ahahui Mahele i ka hooko pono ia ana o keia kauoha. E noho ana ka Papa Hoopaa Inoa a hiki i ka Poaono, Sepatemaba la 15, mal ka hora 6 a i ka hora 9 o ke kakahiaka, a mai ka hora 5 a i ka hora 8 o ke ahiahi. Nolaila, o ka makaala loa wale no ka pono.