Ka Nupepa Kuokoa, Volume XXXVIII, Number 38, 21 September 1900 — Ua Hala. [ARTICLE]

Ua Hala.

Ma ke ahiahi Poalima o kela pule aku nei, ma Moanalua, ua haalele mai la i keia ola ana o Kanewahine, he kupa a he kamaaina kahiko hoi no ia wahi, a hoi aku la ma ke alahele mau a na mea hanu ola apau e kali aku nei o ka hiki mai o kona manawa e hele aku ai. Ua waiho iho oia mahope nei e kumakena aku nona he mau keiki, na moopuna, na hoa'loha ame ka lehulehu no hoi o na poe i kamaaina iaia. Ua hiki ka nui o kona mau makahiki o ke ola ana ma keia ao mauleule ma kahi o ke kanahiku a oi aku. Ua haalele pu iho no hoi oia i kana mea aloha he wahine mahope e paiauma aku ai i kona aloha iaia, a nona hoi na makahiki i aneane aku i ke keneturia. Aloha wale!