Ka Nupepa Kuokoa, Volume XXXVIII, Number 40, 5 October 1900 — KA OLELO O KA AHAOLELO. [ARTICLE]

KA OLELO O KA AHAOLELO.

Mamuli o kekahi mau lono oiaio ole i laulahaia ae e na alakai o ka Aoao Home Rula, e pili ana i ka hooia ana o ke Kiaaina, oia o Dole, i ke hiki no ke lawelaweia na hana o ka Ahaolelo ma ka olelo Hawaii, a ua olelo ae keia poe na Dole no i kamailio maoli aku i keia mea ia lakou. I ka loheia ana o keia mea e ko oukou alakai nei, ua hoouna koke ia aku kekahi mea e hui me ke Kiaaina, a eia na olelo i pi-a-paia e ke kiu ame ia: "He oiaio anei keia mau lono e laulahaia mai nei e na alakai o ka Aoao Home Rula e pili ana i kou hooia ana aku i ka hiki no ke lawelaweia na hana o ka Ahaolelo ma ka olelo Hawaii elike me na kau i hala?" wahi a ke kiu o ke Kuokoa nei i ninau aku ai. "No; aole loa au i hana pela. Ua hele mai kekahi mea e ninau ia'u no ka hiki ia mea ke hanaia iloko o ka Ahaolelo ma na olelo elua. A, ua pane au ia wa, elike me ka'u e pani nei i keia wa, —he mea hiki ole loa ia. Eia no ka Pauku 44 o ke Kanawai Kumu e Hoonoho ana i Aupuni Panalaau no Hawaii," wahi a ke Kiaaina i pane mai ai, me ka wehe ana i ka Buke Kanawai: "Eia ka heluhelu ana o ua Pauku nei," wahi a ke Kiaaina: "E lawelaweia na hana Ahaolelo a pau ma ka olelo Beritania, (aoao 16), a ma ko'u manao a me ko'u ike kanawai, ua paa moakaka loa keia Pauku. "Aole loa loa e hiki ia elua hapakolu hapa-umi ke hoololi i keia pauku. Na ka Ahaolelo nui i hooholo, a na ia Ahaolelo wale no e hoololi." Ma keia wahi ua ike iho la ke kiu i ka oiaio o ke alakai a ke Kilohana nei e hoakaka ai ma kona mau kolamu nei i kela mau ninau ano nui a pau o ke kanawai, a na oukou e kaana iho.