Ka Nupepa Kuokoa, Volume XXXIX, Number 19, 8 November 1901 — Haalele mai o Kapena Kalepe. He Hawaii i Kamaaina ma na Uapo- a he Kapena kaulana hoi maluna o na moku. [ARTICLE]

Haalele mai o Kapena Kalepe.

He Hawaii i Kamaaina ma na Uapo- a he Kapena kaulana hoi maluna o na moku.

I ke ahiahi Poaha o ka pule i hala i haalele mai ai o Kapena Kalepe i keia ola ana, a waiho mai la hoi i kana wahine ame ka laua mau keiki e kumakena aku no kona haalele ana mai. Ua kaulana oia no kona ike hookele moku a ua olelo ia aole hookahi Kapena Hawaii i like aku ka ike hookele moku me kona. He umi makahiki i hala ae nei ua hoo maka oia i ka hooholo ana i kekahi mo ku kuna mai Ewa a hiki i Honolulu nei. Mai keia manawa mai kona ike ia ana he Kapena kamaaina i ka hookele ana o ka moku ma ia mau wahi, a oi loa aku ma Puuloa. Ua olelo ia ua hiki loa iaia ke hookomo i ka moku iloko o Puuloa i kekahi po pouli me ka loaa ole o kekahi mau uila popilikia. No ko na kamaaina loa i keia awa o Puuloa ua kono ia oia ma ke ano he pailaka iluna o ka moku Bennington oiai keia moku e ana ana i keia awa. Ke hoomanao nei no na kela i maa ma ko kakou mau uapo i kekahi hana a keia kanaka e hoike mai ana i kona ike hookele no na makahiki i hala ae nei. E pa ana kekahi makani Kona ikaika a ua inoino loa ke awa e komo mai ai, a no ka hiki ole i na moku ke aa mai e komo ua ku aku lakou he mau mile ka mamao mai ke awa aku. Oiai ka Alameda, Mariposa, Kinau ame ka Lehua e ku ana ua ike aku la lakou i kekahi wahi moku kuna i ka pii ana mai. Oia hele no keia wahi moku kuna a hookomo loa no iloko o ke awa iloko o keia ino me ka makani Kona e pa ana me kona ikaika nui. Ua paa ae la na Kapena o keia mau moku i ko lakou mau hanu, oiai ua manao loa lakou ua pupule ia keia Kapena i kona aa ana e komo aku iloko o ke awa me ka ike aku no i ka nui maoli o ka ino, aka, ua pahaohao loa lakou i ka ike ana aku i keia wahi moku kuna e pili mai ana i ka uapo me ka loaa ole iaia hookahi wahi pilikia. O kela iho la na mea e hoike mai ana he Hawaii kaulana oia ma ka hookele moku. a minamina kona haalele ana mai.

Maluna o ka mokuahi China o keia pule e haaiele mai ai ka Moiwahine Liliuokaiani no Amerika. Lohe mai makou e holo ana oia no Bosetena.