Ka Nupepa Kuokoa, Volume XL, Number 5, 31 January 1902 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, IANUARI 31, 1902

 

AIHUE I KE KALA A KONA HAKU

Ua lawe ae kekahi Kaikamahine hapa Pake

he $150.

Hoailona ia ke Keia a Loaa Aka Keia Kaia i Hoailonaia Hoko o Kana Eke

Kaia i Kona Haku Hana.

  I ka Poalima o ka pule i hala ua loaa aku ia kekahi kaikamahine i lawe ae i ke kala a kona Haku hana me ka ike ole ia.  No kekahi manawa i hala aku nei ua lawe mau ia ke kaia mai keia wahi aku. a ua haohao mau ka Haku nona keia wahi i ka nalowale mau o ke kala.  Ua huli mau oia i keia kalohe aka aole loa i loaa iaia.  I kekahi la ua hoailona ia kekahi hapaha a waiho ia ma kekahi wahi e ike ia ai e na kaikamahine e hana nei ma kela hale hana.  Ua nana pono oia i ka mea nana e kii ana keia hapaha, aka ole i ike ia.  Mahope o kona hele ana a hoi mai ua ike iho la oia ua lawe ia aku keia hapaha.  I keia manawa i maopopo iho ai iaia aole he mea okoa aku ka mea nana e hana nei keia hana aka na kekahi no o kana mau kaikamahine hana.  Ua hoike aku la oia i keia mea i kekahi o kona mau kaikamahine hana a mai ia lakou aku ua hoike loa ia aku la i ka mea nana e lawe mau nei na kenikeni a ka poe e hele ana i keia hale aina e ai ai.  I ka lohe ana o keia kaikamahine i keia mea ua hoomaka koke iho la oia maka i kekahi kala a waiho iho la ma kekahi wahi e ike ia ai.  I ka pau ana o kana hana ua hele aku la oia ma kekahi wahi kaawale i loaa ai ka manawa maikai na keia kaikamahine e hana ai i kana hana kalohe.  Aole i loihi loa aku kona hele ana ua hoi mai la oia a i ka nana ana iho ka hana aole keia kala ma kana wahi i waiho iho ai.  ua hoohuoi mua ia kela wahi kaikamahine hapa-pake a nolaila ua hele koke la aku ia e ninau iaia ina nana i hana keia hana.  Ua hoole loa mai ia oia me ka olelo pu ana mai i kona hele ana mai i ka hana i ke kakahiaka he 65 keneka kana o loko o kana eke kala.  Ua noi koke ia aku la oia e hoike mai i kana eke kala a i ka wehe ana mai ua nana koke ia aku la kana mau kala o loko.  Ua loaa aku keia hapalua i hoailona ia me kekahi mau kenikeni okoa aku a piha ka huina ana i hoike mua aku ai.  I ka hoike ana ia aku o keia hoailona iaia ua hoopaakiki mai la no oia aole keia kala no keia hale hana aka nana ponoi no keia kala. aka ua nui loa ka poe i ike i ka hoailona ana ia a ua maopopo loa ka maka maluna o keia hapalua.  I kona ike ana ua loaa pono kana mau hana kalohe ua hoike piha mai la oia ola no ka mea nana e hana nei keia hana. a ua piha hoi ka $150.  i lawe aihue ia aku eia mai keia hale aina aku.

  He pake waiwai ka makuakane o keia kaikamahine, a ua manao ia e uku mai ana oia i kela huina kala i pakele ai kana kaikamahine mai ka Halepaahao mai.  Ua  noi aku  keia kaikamahine aole oia e lawe ia i ka halewai a e uku mai no oia he $50.00 i ka Poalima o ka pule i hala a he $50.  I ka Poaono mai. a he $50.  mahope aku. Mamuli o keia aole oia i lawe ia aku i ka Halewai.

  Ua loihi ka noho hana ana o keia kaikamahine ma ka "New England Bakery," ka Hale Kuai kanake o Horner mamua.  He $4.00 no kona uku hana o ka pule aka me keia mau kala uuku ua ike mau ia oia e hele mau ana i ka Ofluma me na hoaloha, e kuai mau ana hoi oia i na lole naikai, a ua ike mau ia kona uhauha i ke kala. ua maopopo ole kahi i loaa ai iaia o keia mau dala no kana hana uhaai.

  I keia manawa hookahi no e lilo mau ana mai ka $10. a oi aku o ka ia mai keia hale kuai aku.  I kekahi manawa ua papalua aku ka huina i lawe ia a aole no nae he ike ia o ka mea nana e hana nei koia hana.  Ina aole i hoailona ia keia mau kenikeni me nei aole loa e loaa ke kalohe a mau no hoi kana hana ana i keia hana kalohe.

  He kaikamahine maikai keia ke nana aku, a o ka hiki ana iaia ke hana i keia ano hana?  Ua hoomaka ka nalowale mau o na kenikeni he mau pule wale no mai kona hoomaka ana e hana ma keia hale aina. Pakele oia i kona paa ole ana ma Kawa. a ke manaolana nei hoi makou he haawina mai kai kela e a'o mai ana i na kaikamahine ame na keiki opiopio aole e lawelawe i na kenikeni a ko lakou mau Haku Hana.

 

Nui na Filipino i make

I KA LIMA O NA FILIPINO I KUPAA MAHOPE O KA

LANAKILA O KO LAKOU AINA.

  He lehulehu o na Filipino i huli mahope o Amerika e make nei i ka lima o na Filipino i kupaa mahope o ka noho'na kuokoa o ka aina a lakou i aloha ai.  i ka manawa e loaa ai o keia mau Filipino i haawipio mahope o Amerika ina Filipino e kaua nei no mahope o ka mea a lakou i hooholo ai ua hana koke ia kekahi mau hana weliweli maluna o lakou e hoike ana hoi i ko lakou lili a hoowahawaha i ko lakou mau kaikaina i haawipio.

  He lehulehu o kela mau hana i hoike ia mai i na alii koa Amerika a ke huli nui ia nei na enemi a i ka manawa e loaa ai ua ii koke la ma ka amana ii kanaka i mea e hooweliweli aku ai i na koa Filipino i koe aku a waiho malie lakou i ka poe i huli mai mahope o Amerika.  I kekahi manawa i hala aku nei ua loaa he ekolu koa Filipino e hele ana mai kekahi wahi aku no kekahi wahi i kauoha la.  Ua hopu koke ia keia mau Filipino, pepehi ia. a hoolei ia iloko o kekahi punawai nui.  I ko lakou pau ana iloko ua hoopiha ia keia punawai me ka lepo.  He hookahi o kela mau koa Filipino i loaa aku a ua li la oia no kela hana a lakou.

  Mahope mai o keia manawa ua loaa aku ia kekahi makai Filipino e lana ana iloko o ka muliwai.  Ua loaa oia i na koa Filipino a ua mouo  la iloko o ka muliwai.  He mau pukahu nunui kei hanakii ia ma kona a'i.  Kekahi loaa aku ua lele ke poo mai ke kino mai.  Lehulehu o na koa Filipino e ii ia nei no keia ano hana a ke ano pau iki mai nei ka hana mau ana ia.

  He mau pule i hala aku nei ua kii ia kekahi mau mea he kane a he wahine. e na koa Filipino. ame ko laua hewa ole. ua pepehi ia a make.  I ka loaa ana o kekahi o na koa nana i hana keia hana ua hoike mai ia oia he mau ohana ponoi loa keia nona, aka no ko laua hohewale ua pepehi aku eia ia laua i pakele ai kona oia iho.  Hoopai ia oia he 20 makahiki ma ka hana oolea.

 

Aihue ia he mau Pine Daimana

UA HIKI KO LAKOU MAU WAIWAI I KE

$50,000.

 

  NU IOKA, Dec. 29.-Ua lawe aihue ia mai ia Mr. ame Mrs. Paulo Theband o keia kulanakauhale he mau pine daimana ame kekahi mau mea hoonani e ae no lakou ka huina waiwai i hiki aku i ke $50,000.  He hookahi o kela mau opuu daimana i hiki aku ke kumukuai i ke $20,000.  O kekahi mea waiwai loa lia kekahi opuu momi nui nona ka waiwai i hiki aku i ka $15,000.  O keia iho la na mea kumukuai nui loa. aka mawaho ae o lakou he mau waiwai he nui aku kekahi i lawe aihue ia a hiki i ka piha ana o ka huina nui hoike ia ae la maluna.

  Ua manao o Mr. Theband ua lawe ia keia mau waiwai e kekahi o ko laua mau kanaka hana.  Ua hoike aku oia i keia mau mea i na makai kiu a eia lakou mahope ona i keia manawa.  O ke kumu i maopopo loa ai na keia keiki hana o laua i lawe keia mau mea oia kona nalowale honua ana mahope koke o ka ike ana ia ua nalowale keia mau mea hoonani kumukuai nui.

  Ua kono ia mai o Mr. ame Mrs. Theband e kekahi o ko laua mau hoa'loha e hele aku e hoohala i kekahi mau ia ma ko laua wahi me kekahi mau hoa'loha e ae i kono ia.  Ua ae aku laua a i ko laua hele ana no keia wahi ua hele pu me keia kanawa hana a laua.  I ka lapule ae ua hele like aku la lakou no ka halepule a ia lakou ilaila oia iho la ka manawa i hana ia ai o kela hana i ka hoi ana mai ike iho la laua ua lilo kela mau waiwai, a ua nalowale noi keia kanaka.  He ekolu hora mahope mai ua loaa aku la kekahi kaa o kela mau hoa'loha o laua i ka hale hoolulu o na kaa-ahi e ku ana aohe kanaka.  Aole i maopopo kana wahi i hele ai, aka ua manao wale ia no ua kau oia maluna o na moku-ahi no Europa. a i ole maluna o ke kaaahi no Kapalakiko a holo loa mai ma Hawaii nei.

 

Uha Hemo Maneo

(Mai ka Melbourne Age mai.)

  He maneo anei ko ka ili?  He nui loa na ano maneo a ua lawe ka mea hookahi o lakou e uluhua ai.  O ka homoroida he ino ia no ka po; aohe maha e loaa ana i ka mea poino.  Pela nohoi ka Eczema o ka meeau maoli aohe no he nui loa o kona pilikia. aka ua lawe no nae ia e nui ai ka pilikia. aka ua lawa no nae ia e nui ai ka pilikia.  O ka aila hamo a Doan, he helu ekahi ia no na ma'i oia ano.  Aohe ma'i o ka ili i hiki ke pale mai i kona mana hoola.  He nui na kanaka o Honolulu nei i ike i keia mea.  O Mr. H. Rugall, o Helu 11, alani Grosvernor, South Yarra, he kanaka kahiko loa ia no Melbourne.  Olelo mai oia:

  "No kekahi manawa loihi ua loohia au i kekahi ma'i inoino loa i kapa ia he uha hemo maneo.  I kekahi manawa aole kana mai o ka maneo, o ka oi aku no nae i ka po ame ka wa wela.  Ua kau wau i ka laau hamo a Doan a ua hauoli wau i ka olelo aku ua loaa mai la'u ka oluolu."

  He lua ole ka laau hamo a Doan no na ma'i o ka ili e laa ka maneo, uha hemo, meeau. nahu kanapi, a pela wale aku.  He maikai loa keia laau.  Aole e loihi ke kau ana ia o keia laau o ka loaa mai la no ia o ka oluolu.

  E kui ia ana ka laau hamo a Doan e ka poe kawili laau a pau ame ka poe kuai laau.  He 50 keneka no ke poho.  O Hollister Drug Co. na agena ma Hawaii.

  Ka Ma'i Garipa.  He ola keia ma'i ke inu ia ka Laau Penikila i Hookahi puna liilii iloko o ka wai wela i hoomomona ia. a i ole mawaho iho no e hamo  ai e like me ka kuhikuhi ma kela ame keia omole.  He mea maikai e malama i omole o keia laau aole no ka Garipa wale no, aka, no ke anu. kunu ame na ma'i e ae.  Ka Perry Davis ka pololei.  He 25 ame 50 keneka.

 

Hoounaia no Minesota

HE MAU LAAU KOA NO KA HALE HOIKEIKE O NA

MEA O KA WA KAHIKO.

 

  Maluna o ka Moku Kalepa S.N. Castle i lawe la aku nei kekahi mau kumu koa mai na Kona mai no ka hana ana i mau ume ame kekahi mau hoonani a ae no ka hale Hoikeike no na mea o ka wa Kahiko e ku nei ma ke Kula o Kamehameha.  E lawe ia ana keia mau kumu koa no Kapalakiko a malaila aku e lawe loa ia ana maluna o na kaa-ahi a hiki i Minesota a ilaila e hoolilo la mai ai i mau ume aniani nani. a i ole i mau alapii nani paha no ka pakui hou e manao ia nei no ka Hale Hoikeike o na me o ka wa kahiko.

  Ua wae ia mai keia mau kumu koa mai kekahi mau wahi mai o na Kona o Hawaii a i ko lakou manawa e hooponopono ia mai ai e loaa ana kekahi mau hoonani maikai.  I ka manawa e noonoo ia ana ka hana hou ana i pakui. ua ike ia ka nele i ke koa. oiai ua makemake ia i mau laau Hawaii wale no ko loko.  Ua hoouna koke ia kekahi mea i na Kona no ka huli ana i na kumu laau koa kupono no na hana i makemake ia. a i ka loaa ana ua hoouna ia mai ia i Honolulu nei.  Ke hoohuihui ia keia mau laau ua loaa he 26,000 kapuai.  Ua hiki aku ko lakou kaumaha i ka ehiku iona. Oiai ua haawi la ka hana ana o keia mau papa i kekahi hui ma Minesota. ua hoouna loa ia aku keia mau koa nolaila. a malaila mai e hoi hou mai ai no Hawaii nei.

 

  Ke hoomakaukau nei ke Kiaaina no ke Kuahaua ana i koho balota Kuikawa no ka hoopiha ana i ka wahi o Lunamakaainana Gilihiana i hala.

 

KA MOKUKAUA PALANI "PROTET" E KU NEI MA KE AWA O HONOLULU.

 

He lei Daimana ma Koni a'i

He wahi bebe makuaole i ke alo o na 'Lii.

HAALELE I KA HOME ALOHA A MAKUA A IKE I NA

EHAEHA O KEIA OLA ANA.

  Nana mai la o Jaspa a ike mai la ua lilo loa kona hoa i ka noonoo, a aole oia i pane mai.  E noonoo ana nohoi oia i kana hana e hana aku ai ma keia mua aku.  Ua maopopo loa iaia e loaa ana i keia kaikamahine na ehaeha he nui, a ua manao hoi oia e poina ana oia ia Rafela ma keia mua koke aku. a e huli mai ana hoi iaia e kokua aku iaia.  Aia a hiki mai ia manawa, aia a ike oia i ka mehameha ame ka pilikia o keia noho ana, aia a pau iki aekona aloha no ka Haku Opio, alaila oia no hou aku iaia e lilo mai i wahine nana.  Ua ike iho ia oia e lanakila ana kona kaikuahine ma kana hana, e lilo ana iaia ka Haku Opio no ka mea ua kaawale mai la o Amber ka mea nana e keakea ia laua.

  Oiai ua hele o Amber a luhi, ua nawaliwali oia mamuli o ka ai pono ole i ka ai mai kona lohe ana ua make kona makuakane a hiki wale no i keia manawa, ua haule aku ia oia hiamoe iluna o ke kaa me kona poo e kau mai ana iluna o ka umauma o Jaspa.  Ia Jaspa i nana iho ai i kela helehelena nani, iaia i nana iho ai i kela mau lehelehe ulaula maikai e waiho iho ana imua o kona mau maka.  i kela mau papalina nani e pili ana i kona puuwai, ua puana malu ae la oia i keia mau mapuna olelo: "Ina nohoi oe na'u olu pono keia puuwai."

  Wehe ae la oia i kona kuka mahana a hoouhi iho la ia Amber, a hoonee pono mai la hoi i kona poo a komo pono iloko o kona poli pumahana.  Haule aku la oia hiamoe, a ua like laua me kekahi mau wahi bebe hala ole e moe ana mahope o ka holoholo ana i ka la.  Nana mai la ka ohi likiki i keia mau opio e moe like ana a manao o wale ae la no oia he mau paa mare hou laua, a e holo hoomaha ana ma ke kulanakauhale i na la mua o ko laua noho mare ana.

  O Amber no ke ala mua o laua, a i kona ala ana ae ike iho la oia ua hiamoe oia iluna o ka umauma o Jaspa. ike iho la oia ua uhi ia oia me ke kuka mahana o Jaspa, a komo mai la ke aloha iloko ona no na hana maikai i hanaia mai maluna ona.  Ua hoole aku oia i ke aloha o keia kanaka opiopio, aka he hoike mai nei no oia i kona aloha.

  Aole i loihi ua ala mai la o Jaspa, a i kona nana ana iho i kana uaki ike iho la oia ua kokoke loa lakou e hiki aku i ke kulanakauhale ni o Ladana.  Ua kokoke loa lakou e hiki aku i ka wahi a laua i makemake ai.  Hoomakaukau ae ia laua nei i ko laua mau wahi paiki, a aole i loihi ku ana ke kaa.  Lele aku ia laua nei a hoihoi aku la o Jaspa ia Amber a hiki i kekahi Hokele maikai loa.  Aole hiki ia kaua ke noho pu malaila oiai aole he makemake o Amber e hana pela.  aole oia i makemake e loaa ka mea e olelo ia ai o laua me Jaspa ke hele pu ana mai a hoi like no iloko o keia Holele e moe ai.  Ua hoi aku la o Jaspa he Hokele okoa a hoi aku la hoi o Amber no kona lumi.  Mamua nae o ka haalele ana mai o Jaspa ua noi mai la oia e ae ia aku oia e hele mai e ike ia Amber i kekahi la mai, a ua ae aku la o Amber i kana noi.

  Ia Jaspa i hala aku ai, ua noonoo ae la o Amber i ka nui o kana mau hana maikai i hana mai ai.  Ina paha aole keia kanaka i hele pu mai me ia i hea la oia e hele ai?  Ua hele mau mai no oia iloko o ke kulanakauhale o Ladana me kona makuakane, aka ua hoi mau aku laua e noho oia home iaia, a ua hiki ole ke hoi aku ilaila.  Ina makahiki i hala aku ua loaa ka mea nana oia e malama mai a e hooko mai hoi kona mau makemake apau loa. aka i keia makahiki aole loa i loaa iaia hookahi, a nana ponoi no e malama iaia iho.  Nolaila ua nui loa kona mahalo i na hana maikai i hana ia mai e Jaspa, a he mau hana hoi ia nana e hoomanao mau ai.

  Hooluolu aku ia oia a i ka wanaao ua ala ae la oia.  Nana aku ia oia mawaho aku o kona puka aniani a ike aku ia oia i kekahi mau kanaka kakaikahi e hele ana i ka hana.  Ike aku la oia i ko lakou mau lole lepo.  ike aku ia la lakou e hele awiwi ana me he mea aia e alualu ia mai ana. a noonoo wale ae la no oia pela aku ana paha ola e hana ai.  Mamua aku o keia manawa ua hiki loa iaia ke hiamoe a ala ae i kana manawa e makemake ai. aka ma keia hope aku aole loa pela. e aia ana oia i ke kakahiaka nui. e komo ana hoi i kona lole hana a hele aku e hana i ka hana e kauoha ia ana iaia.

  I ka hiki ana mai o ka manawa no ka aina kakahiaka ua komo mai la kekahi kuene iloko o kona rumi a ninau mai la ina ua makemake oia i kana mea ai e lawe ia mai iloko o kona lumi.  Ae koke aku la o Amber me ke noi pu ana aku e lawe ia mai ka nupepa oia kakahiaka.  Aole i loihi ua hoi hou mai la ke kuene me kana mea ai ame ka nupepa.  Ai iho ia oia i kona aina kakahiaka a i ma kau ana ua hoomaka iho la oia e nana i ka nupepa.  O ka ia nei mea nui wale no e nana ana oia na hoolaha a ka poe i makemake i kaikamahine hana.  Ua loaa aku ia iaia nei he eiwa poe i makemake i mau kaikamahine hana na lakou.  He ekolu o lakou i makemake i wahine kumu-kula no ka lakou mau keiki.  Oiai ua hoonaauao maikai ia o Amber ua manao iho la oia he wahi hana maikai loa keia nana.

  Komo iho la oia i kona lole maikai a hoomaka aku la e hele no ka hale mua loa ma kana apana pepa.  I ka hiki ana aku i keia hale hoike ia mai la iaia o ke kaikamahine ana e a'o aku ai he pupule i kekahi manawa.  Oia noho maikai iho la no ia a ke hiki mai kona ma'i o ka pupule mai ia no ia.  Aole i lilo keia wahi a ua hiki hoi ke loaa ia Amber aka no kela pupule ua maka'u loa ne la o Amber, a hoole aku ia oia aole ona makemake i keia wahi.

  Hoi aku la oia i ka hale a kali aku la o ka-hiki mai o Jaspa.  I ka hora ekolu ponoi ua hiki ma la o Jaspa a o ka mea mua loa ana i ninau mai ai ina ua loaa ia Amber kekahi  hana maikai.  Hoike aku la o Amber i kana huakai huli hana, ame ka mea i loaa iaia.  Ua akaaka mai la o Jaspa i ka lohe ana he kaikamahine pupule kekahi i makemake ia na Amber e a'o.  Ua hauoli loa nae hoi oia i ka loaa oie ana ia Amber o kekahi hana.  O kana wale no e pule ana e hoonele loa ia o Amber i ka hana a hiki ole ke malama iaia iho a oia auanei ka manawa ana e hele hou mai ai e noi iaia i wahine nana.

   "Ua kaumaha loa wau i ka loaa ole ana ia oe o kekahi hana maikai," wahi a Jaspa.

  "Aole wai i paupauaho.  He mau wahi kenikeni no ka'u i koe a e like me ka loihi o ka hiki ia'u ke malama ia'u iho me ka'u mau wahi kenikeni aole loa wau e maka'u ana.  Ke manaolana nei wau e hiki mai ana no ka la e loaa ai ia'u o kekahi hana maikai."

  Ua olelo mai la o Jaspa e huli pu ana oia i hana maikai na Amber a ina nohoi e loaa ana iaia maikai loa a ina nohoi aole e loaa ana iaia oia iho la nohoi.  Pela ko laua nanea ana ia la a ahiahi akahi no a hoi o Jaspa.  I kekahi la ae no ua hele hou aku la o Amber i ke kakahiaka e hoao ina e loaa ana iaia kekahi wahi e hana ai aole no he loaa.  E hele mau mai ana o Jaspa i kela ame keia la, a pela ka nee ana o ka manawa imua.  Ua aneane e piha hookahi pule o ka noho wale ana o Amber a ke pau o ka noho wale ana o Amber a ke pau loa aku nei hoi kana mau wahi kenikeni.  I kela ame keia la e loaa ole ai iaia ka hana ua hoi mai la oia a hoomaka e humuhumu i kekahi mau lole kupono no kana hana e makemake nei.  Iloko o keia pule hookahi ua loaa iaia kekahi mau wahi lole kupono.  Ua hoolimalima oia i mikini nana, ame kona mau lima noeau ua lawa kona mau pilikia.

  I ka pau ana o hookahi pule holookoa me ka loaa ole iaia o kekahi hana e loaa ai kahi pono o keia oia ana ua ike iho la o Amber i ka pilikia mamua ona.

  I ka Poakahi mai o kekahi pule ua hoomaka hou aku la no oia i ka huli ana i ka hana.  Ua loaa iho la iaia he ekolu poe e hoolaha ana ua makemake ia i kumu-kula ohana na ka lakou mau keiki.  Ua hele koke aku la oia i kahi o ka inoa mua loa a i kona hiki ana aku hoike ia mai la iaia aole i ala mai ka lede o ka hale mai kona hiamoe mai a he mea maikai iaia e kali.  Aka aole i makemake o Amber e kali malia paha o loaa iaia ka hana ma kekahi mau wahi okoa aku.  Ua manao iho la oia e hele mua oia e hoao ina wahi i koe iho a ina aole e loaa ana iaia ka hana ma keia mau wahi alaila oia hoi hou mai i keia wahi.

  I ko ia nei hiki ana aku i ka lua o ka hale ua puka mai ia kekahi wahine nui.  Nana aku la o Amber i keia wahine, a i iho la oia iloko ona ina paha wau e hana ana me keia wahine a huhu keia wahine ia'u e pepehi ia ana wau.  Ua like loa oia me kekahi pilikua nui i ka ia nei nana aku.

  "Heaha kou makemake i hiki mai nei?"  wahi a ua pilikua nei i ninau mai ai.

  "I hele mai nei wau mamuli o ko'u ike ana ua makemake oe i wahine kumu-kula ohana no kau mau keki." wahi a Amber me ka maka'u.

  "Ihea oe kahi i hoonaauao ia ai?  Ua a'o mua no oe mamua aku o keia manawa?  E hiki ana no ia oe ke a'o i keia mau keiki a'u?" a i keia manawa ua kahea koke aku la oia i kana mau kaikamahine e hele mai.

  Nana aku ia o Amber a ike aku ia oia ua oi ae ka nui o kekahi o keia mau kaikamahine mamua ona a ina paha oia e a'o ana ia laua a hoihoi ole laua i kana mea e a'o aku ana ia laua e pepehi ia ana oia e keia mau kaikamahine.  Ua hoolalau koke ae la o Amber.  Ua pau aku ia kona makemake e a'o ia laua.  Hoike aku ia oia ua nui loa keia mau kaikamahine a malia paha ua like no ko laua ike me kona.

  "Ike no ka hoi oe aohe ou ike hele mai nei keia maanei.  E pepehi ia aku auanei paha oe e makou.  E hookaa wale koke oe mai keia wahi aku." a me keia mau olelo ua haalele aku ia o Amber ia lakou a holo aku ia no ke kolu o ka hale.

  I kona hiki ana aku i kela wahi ike aku ia oia he hale nani keia. a maopopo ae la hoi iaia he ohana waiwai ke noho ana iloko.  I ko la nei hookani ana aku i ka bele ua puka koke mai he elua mau kanaka me ko laua mau aahu maikai a kunou maikai mai la ia ia nei.  Haawi aku la o Amber i kona pepa inoa me ka hoike pu ana aku ua hele mai nei oia e ike i ka Haku wahine o ka hale no ka hana ana i hoolaha ai ua makemake oia i kekahi wahine kumu-kula ohana.

  Ua hele aku la na kauwa e hoike i ko lakou hakuwahine a aole i loihi ua kii ia mai la oia nei a lawe ia aku ua ninaninau ia mai la oia nei, ina ua lawa oia ma ka oihana ama e makemake nei e hana.  Ua hoike aku la o Amber aole oia i noho kumukula mua, aka ua a'o maikai ia oia ma ka home o kona mau makua hanai.

  I ka ninau ana ia mai owai la kona mau makua hanai ua hoike aku la oia o ka Haku ame ka Hakuwahine o Kotene.

  "Alaila ooe ka paha ka laua kaikamahine e mai mau mai ana ia'u mamua o ko laua make ana?  Oia ua lohe mai maua i ka make ana o ka Haku Kotene iloko o ka lima o na powa, aka ua lohe hou mai hoi maua aole oia kei make aka o kona kaikaina kei make, a aia no ka Haku Kotene iloko o ka lima o na powa.  Ina pela e hoao ana maua ia oe.  Ina ooe i'o ka laua kaikamahine hanai ia hoi iloko o kekahi ohana hanohano.  Heaha la ko laua mea i waiho ole mai ai i kekahi haawina kala nau?"

  Aole i pane aku o Amber, aka e hoao ana oia e paa mai i ka waimaka e holo ae ana i kona mau maka aloha.

  "Alaila i ka manawa hea oe i makemake ai ia'u e hoomaka i ka'u hana?" wahi hou a Amber i ninau aku ai.

  "Ina no i ka la apopo ua hiki no.  E haalele mai ana ke kumu mua a ka'u mau kaikamahine i keia pule oiai e mare ia ana oia, a ua makemake wau ia oe e hiki mai i kona manawa e noho ana i hoikeike mai oia ia oe i kekahi mau mea e pili ana i kau hana.  He wahine naauao loa oia a ua nui hoa loi ko maua minamina i kona haalele ana mai.  Ina e hiki ana ia oe ke hoi mai i ka la apopo maikai loa.  E haawi ana wau i hookahi lumi ma kai loa nou, e ai pu ana oe me ka'u mau kaikamahine a hoikeike aku ia laua i ke ano o ka ai maikai ana. e lilo ana oe i iaia no keia ohana a ua hiki loa ia oe ke hoounauna i na kauwa elike me ka hiki ia makou.  Ma na ano apau e hoohalike ia oe me ka'u mau kaikamahine.  O na hana i hiki ia laua ke hana oia kei hiki ia oe.  E uku ana wau ia oe he kanalima kala no ka mahina a hiki i ko'u ike ana i ka maikai o kau hana.  Ua holo anei kela ia oe?"

  Ua hauoli loa o Amber i kona lohe aua aku i keia mau mea apau.  Ua maopopo loa iaia e loaa ana iaia kekahi home maikai.  Ua pau ae la kona pilikia i keia manawa oiai ua loaa iaia kekahi home maikai.  Ua pau ae la kona pilikia i keia manawa oiai ua loaa iaia ka home maikai e noho ai.

  I ka hiki ana mai o Jaspa ia ahiahi ua pane aku la o Amber,"  "E pau ana ko'u noho wale ana.  ua loaa ka'u hana i keia manawa."

  "Ua loaa kau hana?  Aia i hea keia hana au?" wahi a Jaspa.

(Aole i pau.)

 

MAKEMAKE I MAU HAWAII IKE I KA AU

AME KA LUU.

  Ua loaa mai nei he leka ia C.L. Clement o keia keena mai a Kapena Paul Boyton mai, ke kanaka holo moana ma luna o kekahi waa i hana ia mai ka ili daba mai, a ona hoi o Liona Kai Paka. Kone Ailana, Nu Ioka, e ninau mai ana iaia ina paha ua ike ola i kekahi mau Hawaii akamai loa i ka au ana a pela hoi me ka luu ana iloko o ke kai. e makemake ana e hele no Kone Ailana a hoikeike i ko lakou ike au a luu paha malalo o Mr. Boyton no kekahi mau mahina.  E hoike piha aku no makou ina mea i koe i ka mea a mau mea paha e makemake ana i keia hana.

  He poe akamai na Hawaii i ka au ame ka luu ana iloko o ke kai a he lehulehu wale o lakou e noho mai nei ma na makalae ame na lae aukai o Hawaii.  Nolaila, o na poe ike au a luu paha e makemake ana e hookaulana ia ko lakou mau inoa ma kela aina puni ole a iloko hoi o na wai o ka moana Atelanika ano ka wa e ku ai a kokua i ka hana no ka ina o kou aina kulaiwi nei ame kou inoa pu.  He mau keiki Hawaii no kekahi e noho mai nei a i hoolilo i na wai o Hawaii nei i home a i ipo aloha na lakou, a ua ike a kamaaina kakou ia mea.  A i ulu ae ka manao e ike ia Nu Ioka o ka wa kupono keia. - "Elele Hawaii."

 

Ka Moolelo apau iloko o hookahi hua olelo e

pili ana no ka laau,

            PAIN KILLER

(Laau Penikila)

  Mai ia Capt, F. Loye, Keena Makai Helu 5, ma Montreal: - "He lawe amu makou i ka laau Pain Killer a Perry Davis no na eha o ka opu rumakika. anuanu, ame na ma'i a ae o loaa nei i na kanaka malalo o ka makou hoomalu ana.  Ua hiki loa ia'u ke olelo ae o ka laau maikai loa keia e malama ai ma ka hale."

  Hiki ke inu maloko a hamo mawaho.

  Elua ano 26 Keneka ame 50 Keneta.

Hookahi no laau Penikila ka Perry Davis

 

KAKELA ME KUKE

(KAUPALENAIA.)

Poe Kalepa ma ke Komisina

A HE

Poe Lawelawe Kopaa

AGENA.

 

E Hoolohe Mai.

E o'u mau hoa o ka ua Kukalahale.

owau o

WILLIAM RNGER,

ua wehe ae nei au he Hale Kuai, KIKA, KIKKILIKI, PAKA NAU o na ano apau, pela me na ano KINI MEA AI like ole o na ano apau, pela hoi me na OPALU MALOO ono o na Kona, e e loaa pu ana me na PAKA HAWAII ona o na Kona.  E kipa mai ma ko'u hale Kuai, he oluolu na kuka kamailio ana.  E loaa no wau ma Alanui Muliwai kokoke ia Alanui Kukui.  Ua hiki ke hoolawa ia na kauoha mai na kuaaina mai i na mea i makemake ia.

P. O. Box 483 .

 

HOAHU - HOAHU - HOAHU

  He Hui hoohana like ma ka hoahu. hoolala, imi dala, a me ka imi a hookahua i na home.  Ma keia mua aku, e hookaawale oe i kau mau wahi dala i malama ai a e hiki ana paha ia oe ke malama iloko o na huina hoahu liilii ma ka mahina, a e hookomo aku iloko o ka waihona o kekahi hui i kukuluia malao o ke Kanawai. me ka lawelawe ole i na hana apuka, a he oihana kupaa e loaa ai ka pomaikai a e loaa ana he home i ka hopena.

E MALAMA I KE DALA.

  Aole makou e kono aku ana e uhaai i ka oukou dala, ke noi nei makou o hoahu mai oe i wahi huina uuku me makou i kela a me keia mahina no ka manawa o 75 mahina.  E hana ana oe i keia e like me kau mea e hana ai ina e hoahu ana oe i kela dala iloko o ka puni.  He oi aku nae hoi ka huina ukupanee o keia mamua o ka mea e loaa Banako a i ole kuai paha i na bona aupuni.  He oi aku nae hoi ka huina ukupanee o keia mamua o ka mea e loaa ana ia oe iloko o na banako, no ka mea, na ka poe paa palapala hoola e Kukaawale ka mea hoola i ka holopono a me ka maalahi maopopo o ka ohi ka ukupanee.  O ka Waihona Dala mea hoahu.  Na keia kahua e wehe ha mama aku imua o ko makou poe hoahu i ke alanui e loaa ai ia lakou ka ukupanee oi o ka mahuahua.

  No kela mea, aole oihana, hoopukapuka i ikeia ka oi aku o ka pomaikai mamua o keia.  E kakau mai a e kauoha mai i na hoakaka piha.  E hauoli mau ana ka Hui e hoike a e hoakaka piha aku i na mea a pau a me na lawelawe ana ke makemake ia, ke kakau ia mai ma ka leta a ke ninau kino ia mai.

  McIntyre hale kihi o na Alanui Papu a me Moi.  Rumi 3 a me 4.

 

 

 

UA PAU KA WELI I KA NOHO HUKI NIHO.

 

  HE HIKI KE HUKI A HOOPIHAIA NA NIHO POPO ME KA EHA OLE malalo o na paahana ana o keia au naauao e kapiliia ai i ka io o ka papa niho.  Aohe hanaia i ka laau hoohiamoe.

  O keia wale no kahi huki a hana niho ma Honolulu nei i loaa na PAAHANA I HOOPAAIA me na mea e ae e hiki ai ke huki, hoopiha a hoopaa i poo gula a puna paha e hiki ole ai ke ikeia ke ano e mai ka niho maoli ae, a e paa no ia no umi makahiki malalo o ka hoopaa ana, me ka LOAA OLE O KEKAHI HUNAHUNA O KA EHA.  He POE WALE NO I HOONAAUAO A HOOKUU MAIKAI IA na poe lawelawe, he poe i lawelawe mua ma keia oihana mai ka 12 a i ka 20 makahiki, a he loaa ma ke poo o na mahele like ole o keia oihana.  E kipa mai lo makou nui. a e ike no auanei oukou i ka oiaio o ka makou e hoolaha nei.  E hoike mua aku no makou ia oukou i ka nui o ko oukou lilo i ka wa e NANA MUA AI ME KA UKU OLE.

            PAA NIHO KU'I................................................................$5.00

            NIHO GULA....................................................................... 5.00

            HOOHIPA IA A NA ME KE GULA.................................. 1.00

  Ua lawa ko makou inoa i ka hoola ana i ka maikai o na hana a pau.

            NEW YORK DENTAL PARLORS.

            Room 4, Elite Building,  Alanui Hotele.

            HE MAU WAHINE NO KAHI NO KA WAHINE.

8 a.m.                                                                                                         @ p.m.

 

  "I kekahi manawa i hala aku nei ua loaa ia ka'u kaikamahine i kekahi anu inoino.  Ua hoike mau mai oia i ka eha iloko o kona umauma ame kona kumu mau ana.  Ua haawi aku la wau iaia i ka laau kunu a Chamberlain a iloko o ekolu wale no la ua loaa iaia ka oluolu maikai a hiki loa ke hele i ke kuia.  Ua malama wau i keia laau iloko o ko'u ohana no ehiku makahiki a aole loa wau i ike i ke oia ole o ke kunu iaia,"  wahi Kimo Pamawahe he kalepa ma Annelo Bay, Jamaica, West India Ailana.   O kela eha iloko o ka umauma e hoike ana ia i ka hiki ana mai o ka ma'i numonia, aka ua pale e ia aku o ka Laau Kui. a Chamberlain.  O ka laau keia nana e pale aku na ma'i e loaa aku ai o ka numonia.  E loaa no ma ka Hale Kuai Laau o Benson Smith & Co., na Agena.