Ka Nupepa Kuokoa, Volume XL, Number 13, 28 March 1902 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Huro na Kanaka no Kiaaina Dole ma ka Uapo

(Mai ka aoao i mai.)

 

mahele.  Aole ma ka uwapo wale ko lakou hookani ana, aka ua kau ae lakou maluna o ka moku kolomoku a holo aku me ka moku e lawe ana i ke Kiaaina e hoike ana i ko lakou leo aloha no ke Kiaaina e au ana i ke kai.  Iluna o keia maku ua uhai pu aku la kekahi poe e haawi ana i ko lakou aloha hope, no ka manawa, i ke Kiaaina a lakou i hilinai ai, a i aloha ai hoi.  Mamua o ko lakou hoi ana mai ua haawi hou aku la lakou i na leo huro o ke aloha, a mele ae la ka bana i kela mele Hawaii kaulana poina ole, "Aloha Oe, Aloha Oe."

            O kekahi mea a na kanaka e nune nui ana makai o ka uwapo oia ka mea i hoikeia ma kekahi mau nupepa e pili ana i ka hele o Lunakanawai Gia maluna o keia moku hookahi no me ke Kiaaina no Wasinetona.  I ka ike ana ia o ke Kiaaina ua ninau ae la kekahi poe, "Aia ka hoi i hea o Lunakanawa Gia?"  Ua paa ka inoa o keia lunakanawai ma ka pepa inoa o na ohua e holo ana, ua hoike ia ae kona makaukau maoli no ka hele, aka aole oia i ike ia makai o ka uwapo.  Ua manao kekahi poe e hele mai ana oia ma ke ano hoonalonalo, iloko o ka holoku a i ole o kekahi mau aahu hoonalonalo e ae oia ano, aka aole oia i puka iki mai a nalo wale no ka moku.  Ua nana pono ia kela ame keia kino momona i puka mai iloko o ka holoku aka aole lakou i like me ke kino o ka Lunakanawai, nolaila ua hoi mai ka lehulehu me ka maopopo loa aole i holo aku ka Lunakanawai e like me ka mea i hoikeia ma na pepa mamua aku.

            No ke Kiaaina ma kana huakai Moana, ke noi nei makou i na Manalani e kiai mai iaia a pae maalahi i ka ai na malihini, a e hoihoi mai iaia eia wali aloha nei me ke ola kino maikai, ame ke aloha ame ka hilinai o ka Peresidena Roosevelt iaia.  na noho Kiaaina ana, huro!

 

LIEUTENANT GENERAL LORD METHUEN

(PICTURE)

 

            O keia maluna ae ke kii o Kenelala Metheun, ke Kenelala Pelekane i paapio aku malalo o na Bua i alakai ia e Kenelala Delarey.  Ma na hoike hope mai nei ua hoike mai keia kenelala, nona keia kii maluna ae, i kona malama maikai ia e ke Kenelala o na Bua.  Mahope o kona paapio ana ua kauoha koke keia Kenelala Bua e lawe loa ia aku oia e lapaau la e na kauka Bua akamai loa.  ua ku oia i ka pu a na Bua e like me ka makou i hoike mua aku ai.  Ma kana hoike ua hoopuni ia ola me kekahi o kona mau koa kakaikahi e na Bua a mahope o ke kaua ana me ka ikaika i loaa ia lakou no ekolu hora, ua  ike iho la oia i ka hiki ole ke ku hou aku no ka mea ua nui na koa Pelekano i ku i ka pu, a e aneane aku ana e pau ka lakou mau  poka pu.  Mamuli o kela ua haawipio aku lakou i ka hora 9:30 o ke kakahiaka mai.  O kekahi kumu i hiki ole ai ia lakou ke paio me ka ikaika oia no ka maopopo ole o ko lakou mau koa mai na koa Bua mai, no ka mea ua komo na koa Bua i na lole o na koa Pelekane i make a i loaa ia lakou.  Ua make ka lio o ke Kenelala maluna ae malalo ona, a ua ku kona uha i ka pu a na Bua.  He ohana waiwai loa kona ma Enelani, a nui ko lakou kaumaha i ka lohe ana i keia nu hou.

 

Ma na Luakini i keia Sabati.

            I keia Sabati ke Sabati Easter ma ka namu o na haole a he Pakoa ma ka kakou olelo ana.  He lapule hoomanao keia no ke ala hou ana mai e ka Haku Iesu mai ka Make mai, a oiai ua aneane loa e kau keia la ma ka la e hoomanao ia ai ka la Pakoa i ke au kahike, ua hoohui ia ka hoomanao ana o keia mau la elua no kekahi manawa a hiki wale no i ka hoololi ana ia i ke Sabati mahope mai o ke ala ana o ka Haku.  He pohihi loa ka huli ana o ka loaa ka Lapule Pakoa, no ka mea o ka hui ana a loaa keia la eia no ke hoomau nei ma ka helu o ka manawa e ola ana ka Haku ma ka Honua nei, aka aole he manawa i hala aku ai mawaho o na Sabati e komo ana mawaena o ka la 21 o Maraki ame ka la 25 o Aperila o keia ame keia makahiki.  O kekahi o na hana ma mawaena o na haole oia ka makana ana i na hoaloha i na hua moa, a ano hua okoa ae paha i pena ia me na pena nani.  Aohe paha hoomana i nele i ka hoomanao ana i keia la.

MA NA LUAKINI.

            O ka Luakini Kakolika paha ka luakini piha loa ma keia la ma keia kulanakauhale.  He eehia na hana hoomano e hana ia ana ma keia luakini a he maikai hoi na mele e mele ia mai ana.  O kekahi mea maikai loa e loheia ana malaila oia ka himeni aolo a Miss Alice Campbell, kekahi o na kaikamahine Hawaii leo kani.  He maikai a eehia kana mele e mele mai ana i keia Sabati.  Aole oia wale aka e lilo ana ka hookani ana o ka Ogana nani o keia luakini na ke Kama'liiwahine Kawananakoa.  Ua lawe oia ma keia hana a o ka lohe ana i kana hookani ana he pomaikai ia no na pepeiao hoolohe.

            KAWAIAHAO  -E malamaia ana na hana ma ke kula Sabati ame ke anaina pule i kuilke ai me ka la e hoomanao la ana.  E a'o ia ana na haumana kula Sabati i ka manao oia la, ke aia hou ana mai o ka Haku mai ka make mai a lanakila oia maluna o ka make, ame na haawina i kupono i ka la.  Ma ke anaina pule e haawi ia mai ana kekahi mau manao naauao e hoike ana i ke ano o ka la e hoomanao ia ana ame kekahi mau manao alakai kupono no ka hoomanao ana la la.  E naue ae e ike i na hana oia la hauoli.

            Mamuli o ke kaa ana o ka la Hoomanao no ke aia ana o ka Haku mai ka make mai ma ke Sabati, la 30 o keia mahina, a oiai e malamaia ana ia la e ka Ekalesia o Kawaiahao e like me ka mea maa mau, nolaila ke hoolaha ia aku nei, ua hoopaneeia ka Hoike Kula Sabati o Kawaiahao, a e malamaia ana ma ka la 6 o Aperila aole hoi e like me ia i hoolaha mua ia aku ai. 

            KAUMAKAPILI.  -E malamaia ana na hana Hoike Hapaha o na Kula Sabati o Kaumakapili ma keia Sabati e hiki mai ana.  E hoomaka ana na hana i ka hora umi o ke kakahiaka, ina nae aole e mau ana keia ino, a ina e mau ana keia ino o kakou a hiki ia la e hoopanee ia ana na hana no ke Sabati aku mahope, oia hoi ke Sabati mua o Aperila.  E hoomaka ana na hana i ka hora umi o ke kakahiaka, a ina he maile maikai keia la, ua makemake ia na haumana kula Sabati e hiki ae mamua o keia manawa.

            KAMEHAMEHA.  -E malamaia ana ka hoike hui o na Kula Sabati o ke kula Kaikamahine o Kamehameha.  Kalihi, Moanalua, Kalihiuka, ame ke Kula Sabati o Kalihikai ma ka Hale paani nui o na Keiki o ke Kula Keikikane o Kamehameha, mahope aku o ka Hale Hoikeike o na Mea o ka Wa Kahiko ma ka aoao Mauka.  E haiolelo pokole ana o Moke Nakuina, ke Kahu kula Sabati nui o keia mau apana, ame kekahi mau keonimana e ae mahope o ka pau ana o na hoike.  Ua hookuu akea ia keia halawai i ka lehulehu koe wale no he uuku ka hale a o ka poe lohi e ku ana iwaho, koe na haumana kula Sabati e hoike ana.

            MOREMONA.  -Ma ko lakou Luakini nui ma Puowaina e hoomanao ana na Moremona i keia la.  Aole i loaa mai nei ia makou ua hana e hana ia ana ma ia Luakini nui ka na elele o keia hoomana i ka Poaono e hiki mai ana a he halawai nui hoi i ke Sabati.  He lohe wale no nae keia.

 

PAA KA PAELE PAAHAO WOOD

(Mai ka aoao i mai.)

            I ko lakou nei hiki ana ma ke alanui e hoopuni ala i keia puu ma ka aoao ma Ewa o keia puu ua ike ia aku la kekahi mau hoaliona moakaka loa o ka lakou paahao.  Ua ikeia kona maa wawae iluna o ka lepo, ua ike ia hoi kekahi mau lala lanatana ana i ukahi ai, a ma keia mau hoailona ua maopopo i na makai ua hele aku ola iloko o ka lanatana e pee ai no ka mea e hoike ana na maa wawae i kana wahi i hele ai.

            Aole i loihi ua loaa aku la i ka maka ike o ka Hope Makai kona meheu iloko o keia lanatana, a mahope o ka hele ana aku no kekahi mau kapuai ua loaa aku la iaia ke ope pepa paani i hoike mua la ae nei.  Ma ka manao wale ia aku no ua haule mai kona pakeke mai i kona manawa i holo ai mahope hoi o ko laua paio ana me Kaulua.  Me keia mau hoailona moakaka loa ua hoomau aku la ka Hope Makai me kona mau makai i ka huli ana.

            Mahope o ka hele ana no kanalima paha i-a ua ku iho la ka Hope Makai a huli mai la e nana i kona mau hoa ina eia no lakou ke uhai aku nei mahope ona.  Iaia i huli mai ai i hope ua puiwa loa ia oia i ka lohe ana aku i ke kani o kekahi pu panapana i ku ia he umi wale no anana mai kahi ana e ku ana.  Ua pouli omua o na i ka uahi o keia pu i kona huli ana aku e nana.  Ua maopopo ae la no nae iaia ua loaa ka mea a lakou e huli ana ia manawa.  I ka mao ana ae o ka uahi ua ike aku la ka Hope Makai ka lele ana aku o ua Paele nei iloko o ka lanatana me ka manao e holo aku a nalowale mai ka maka aku o ka Hope Makai, aka mamua o ka hiki ana iaia ke hana i keia hana ana i makemake ai e hana ua kani aku la ka pu panapana a ka Hope Makai a hina ana, ua Paele nei i lalo.  Ua manao ae la ka Hope Makai he hana maalea keia na keia Paele a e kali ana oia o ke kokoke aku o ka Hope Makai iaia a oia kona manawa e ki mai ai me kana pu panapana, a no keia noonoo maikai ona ua neenee aku oia a ku mahope o kekahi kumu laau e ku kokoke mai ana.  Ma keia wahi oia i kali ai a hiki mai o Kapena Kanae.

            I ka ike ana mai o keia Paela i ka Hope Makai ame ka hiki ana mai o Kapena Kanae ua ike iho la oia ina oia e kali ana e ikaika loa mai ana ka aoao o ka poe e ukali nei iaia a nolaila ua ala ae la oia mai kana wahi e moe hoopunipuni ana a hoomaka aku la e holo hou.  Ua ki ia aku la oia e ka Hope Makai i ka pu a ua ki mai la hoi oia i ka Hope Makai me kona hoa.  Ua hoomau lakou i ke ki aku kekahi i kekahi a hiki wale no i ka u-a ana mai a ua Paele nei, "E haawipio no wau ina oe e hoopau i ke ki ana mai ia'u!"  Ua pane koke aku la ka Hope makai iaia me ka eleu,  "E hoolei i kau pu panapana i lalo alaila aole makou e ki hou aku ia oe."

            I ka lohe ana o keia Paele i keia kauoha ua hoolei koke iho la oia i kana pu panapana malalo koke iho no o kona mau wawae.  No ka nui makaala o na makae aole loa i nee aku ka Hope Makai he hookahi kapuai a hiki i kona ike ana ke nana pono ia nei keia Paele e kekahi o kona mau makai.  Ua pii ae o Kapena Kanae iluna o kekahi kumu laau i hiki ai iaia ke ike pono aku i keia paele ame kana hana, a i kona makaukau ana ua hoomaka aku la ka Hope Makai e nee imua e hopu i kana paahao.  Aole i loihi loa aku kana hele ana ua ike aku la o Kapena Kanae i ke alu ana iho o keia Paele e lalau i kana pu panapana me ka manao paha e ki mai i ka Hope Makai, a me ka hikiwawe loa ua Kahea koke mai la oia i ka Hope Makai e hoomakaukau iaia iho no ka mea e hoao ana keia Paele e lalau i kana pu panapana.

            "Ina oe e hoao hou ana e hana pela e lilo ana oe i kanaka make," wahi aka Hope Makai Nui i pane aku ai i keia Paele.  Ua maopopo maila i keia Paele ka weli oia olelo, a ina oia e hoao hou ana e hana pela ua maopopo loa iaia ka mea e loaa aku ana, nolaila ua ku malie oia ma kahi hookahi a hiki i kona loaa ana i na lima o ka Hope Makai.  Lawe ia oia a hookau ia maluna o kekahi kaapio i kelepona ia mai mamua o kona paa ana a hoihoi loa ia mai la no ka Halewai.  I ke kani ana o ka pu, oiai keia Paele e paio ana me ka Hope Makai, ua lohe ko Puowaina poe a i ka hiki ana mai o keia Paele i ka Halewai ua aneane eha haneri kanaka i hele mai e ike iaia.

            I ka hiki ana mai i ka Halewai ua hoike ae la keia Paele, aole oia i hoolala mua e holo i ka la ana i mahuka ai.  Ua ono oia i ka wai a noi i na luna hana e hookuu mai iaia e hile e inu wai.  I ka loaa ana iaia o ka wa, ua nana ae la oia ma o a maanei a ike iho la aohe mea e kiai mai ana iaia, na keia mea i kono ikaika loa mai iaia e hele i keia wahi hale kokoke aku malaila e huli ai i wahi mea ai no ka mea ua ano pololi oia ia manawa.  I kona hiki ana i keia hale, ua loaa aku la iaia kekahi pahi oki ko a me keia mea ma kona lima ua manao iho la ola ua hiki loa iaia ke palo no kona lanakila.

            "Ina no ooe ia, manao wau hana no oe pela," wahi ana i pane mai ai i ka mea kakau Nupepa.  "ina oe i hoopaahao ia e kekahi Lunakanawai ona a pau kou ola ana no kekahi wahi hewa o $16 aole loa e nele kou hoao e pakele mai ka halepaahao mai.  He mea hoonaukiuki loa na'u ka noonoo ana ae he eono mahina wlae no ka hoopa'i o ka mea pepehi kanaka i kekahi manawa a no'u hoi ua hoopaa ia au ma ka halepaahao apau ko'u oia ana no ka aihue.  Ua hooholo iho wau iloko o'u ua oi loa aku ka maikai e paio wau no ko'u lanakila mamua o ka hoi hou ana aku i ka Halepaahao.  He hapalua hora paha mahope mai o ko'u mahuka ana ua ike iho "la au e paa hou ana au i na makai."

            Ua mahuka keia Paele i ka Poaha, ka la 13 o keia mahina, a mai i a manawa mai a hiki wale no i kona manawa i paa hou ai ua piha ka umi la o kona holoholo ana iwaho nei.  Ma kana hoike ua pee oia ma Manoa no elima la iloko o ka laau lanatana i ke ao, a i ka po ua holoholo mai no oia i kai nei o ke kaona.  I ka Poalua o ka pule i hala, wahi ana, ua iho mai oia ma ke alanui Puowaina a hiki i kahi e ku ana ka mokuahi Coptle me kona makemake e kau maluna o keia moku e holo, aka aole i hiki iaia ke hana e like me kana i makemake ai.  Oiai oia ma ka uapo ua ike aku la oia he nui e ua kanaka e nana mai ana iaia, a he mau makai kekahi a na ia mea i kono iaia., e hookaawale koke mamua o kona paa ana i keia poe.  Mai keia moku aku ua hele aku la oia ma kekahi mau moku okoa aku me ka manao e loaa ana iaia kekahi hana ma ia mau moku aka ua nele like no a ua hiki ole hoi iaia ke kau pee maluna o kekahi o keia mau moku me kona ike ole ia mai.

            I ka ninau ana ia aku i hea la i loaa ai iaia kana pu panapana a na wai i haawi aku iaia, ua pane mai ia oia, oiai oia iloko o ka Halepaahao ua hoike mai la kekahi Paele, o HIckory, iaia i kana wahi i huna ai i kana pu panapana mamua o kona paa ana mai.  I kekahi la ua iho mai la oia e huli i keia pu panapana ma ke alanui Moiwahine, kahi e noho nei o ka wahine a keia Paele.  Ua loaa iaia keia wahine, a me ia ua hele like aku la laua e huli a hiki i ka loaa ana o keia pu panapana.  Ua moe oia hookahi po ma kekahi hale ma ke alanui Moiwahine kuai nupepa, ame hookahi kiaha bia.  I ka ninau ana ia aku o kahi i loaa ai kana kala ua hoike ano kalohe mai la oia, i lawe ia e ia mai kekahi mea mai.

            I kekahi po, wahi ana, ua iho mai oia a ku ma keia aoao aku o ka Halewai me ka a mai no o na kukui, a ua aneane loa oia e hele aku o haawi iaia iho, aka mahope o ka noonoo maikai ana ua hooholo iho la oia aole ia he hana naauao nana e hana ai.  He lehulehu na manawa ana i hele ai e hoao e kau maluna o na moku e ku nei make awa nei, aka aole loa oia i lanakila.  I kekahi la ua makemake loa oia e hele i ka hale o ka Hope Makai a noi aku iaia e haawi mai i elima dala ma ke ano hooweliweli aka aole oia i hoao.  I kekahi po mai loaa oia i ka makai po, Mr. Bowers.  ua huli pono loa mai ke kukui o ke kaa hehi wawae o keia makai imua ona a ua hiki loa oia ke ike mai me ka moakaka loa.  Ua maka'u loa oia, a ku maile oia a hiki i ka hele ana aku o keia makai ma kekahi wahi okoa aku mamua o kona hoao ana e oni mai kahi ana e ku ana.  I kona loaa ana aku he lole like kona me ko ka poe hao lanahu a he kohu kanaka hana lanahu maoli oia ke nana aku.

            Aole i loihi loa ka noho ana o keia Paele ma Hawaii nei, he hookahi makahiki wale no a oi iki aku, aka iloko oia manawa he nui kana mau hana ino i hana ai e hoike ana i kona ano.  Ua komo aihue oia i ka hale waiho kala o ka mahiko o ka Onamiliona ma Paia a lawe mai he $1000.  Ua holo oia me keia mau kala me ka manao e holo mai no Honolulu nei maluna o ka mokuahi Kalaukina, aka ua loaa e oia i na makai a lawe ia no ka hale paahao.  Ua hoopai ia oia e Lunakanawai Kalua, a oiai maka hale paahao ua hoao oia e umi, i ka lunapaahao me ka manao e pakele aka ua hiki e mai ke kokua a pakele ka lunapaahao ia hana ana.  Mai laila mai ua hoouna ia mai la oia no Honolulu nei, a oiai oia ma Kawa ua lele oia i ka pa kiekie o Kawa i kekahi la a holo.  Uhai ia oia no kekahi mau la a hiki i kona paa ana ma Kalihi i kekahi mau makai me na pu panapana ua haawi pio koke oia.  O keia mahuka ana iho la ana ka elua o ka manawa ana i hoao ai e pakele mai ka lima mai o ke kanawai.  I kona mahuka mua ana ua hoopaa ia kona wawae me na poka hao aka no ka nui o kona hoolohe mahope mai ame ka maikai o kana mau hana u ahilinai hou ia oia a hookuu wale ia.  He mea maikai loa e hoopaa mau ia kona mau wawae me kekahi mau poka hao kaumaha i hiki ole iaia ke hemo hou.

           

            Aole he laau ohana i ike nui loa ia elike me ka laau Pain Killer.  No kanaono makahiki a oi ua hoao ia keia laau e na kanaka o na aina like ole no ka hooponopono ana i ka hana a ko lakou mau opu ame na ma'i like ole apau e loaa ana ia lakou.  Ua ike ia kona maikai ame ke ola o na ma'i like ole iaia.  E nana pono i na laau pololei ole oiai he hookahi wale no laau pololei a oia ka Perry Davis.  Kumukuai 25 ame 50 keneta.

 

ONA HOU NO KA MAKAI

            Ona hou no o Emil Ney, ka Makai punahele a Lunakanawai Gia, a iloko o kekahi o na rumi o ka Hotele Aupuni (Halewai) kahi i moe ai i ka po Poakahi nei.  Mai ke awakea mai ka hoomaka ana a hora ehiku no hoi o ke ahi ahi loaa aku ua ona.  Ma ke alanui Nuuanu ua olelo ae oia e hoike ana ia Lunakanawa Wilikoki i kekahi mau mea huna pili kalaiaina.  Iloko o kekahi Hale inu Lama ma ke Alanui Nuuanu ua olelo ae oia e holo pu ana oia me Lunakanawai Gia no Wasinetona maluna o ke Sierra.  I ka hopu ana ia a lawe no ka Halewai ua noi mai la oia e kii ia ka Lunakanawai Gia a lawe ia aku imua ona.  Aole i pau kona kahea ana no ka hoa'loha a hiki i na hora o ke aumoe.

 

HAUNAELE MA KA HALE KAU KANAWAI O ENELANI.

 

KOKAMI KEKAHI AILIKI ILOKO O KA HALE KAU KANAWAI A HOOKUKE IA NO KEIA MAU OLELO.

           

            Mamuli o ke kokami ana ame ke kapa ana aku i kekahi hoa lunamakaainana he hoopunipuni ua hookukela o Lunamakaainana Dillon, he Ailiki ma ka hale kau kanawai o Pelekane e kona mau hoa lunamakaainana.  He 245 i koho ma ka aoao e hookuke ana iaia a he 48 ma ka aoao e kakoo ana iaia a he 48 ma ka aoao e kakoo ana iaia.  O ke kumu o ka puka ana o keia mau hua olelo ikaika, i lohe mua ole ia ma na hale kau kanawai o Enelani, oia no na hoopaapaa ma ka Hale Kau Kanawai e pili ana i ke kaua mawaena o Pelekane ame na Bua ma Aferika.  O na Ailiki apau ke kokua ikaika nei lakou i na Bua, ke kakoo nei ia lakou ma na ano apau, a ke ku-e nei hoi i ke komo ana aku o Enelani ma keia kaua.  O na Pelekane hoi ke manao nei lakou ua pono keia kaua a nolaila ulu ae keia mau hoopaapaa ana.  Iloko o keia mau hoopaapaa ana ua kapa aku o Lunamakaainana Dillon ia Chamberlain he "damned liar" a mamuli o ke kapa ana aku iaia pela na hookuke ia mai la oia mai keia hale mai.

 

No Kalawaia ana.

 

            O keia ano makau ka ko oukou mea kakau i ike pono ai i ka hala ole o ka pa ana o ka i'a a ku iho ai kaena a kahi poe lawai'a, pa me he nehu ala ka noe o Alakai, a me keia hana he lawai'a he like ole na lihi makau a kela a me keia o kakou o Hawaii nei, a kela a meetaoinetaoin ketaoin etao a pela no hoi me ko na Lahui e, e like me ka Lahui Iapana i keia mau makahiki a kakou e ike nei, aka, he uuku no nae ka mea loaa mai, o ke kumu paha o ka pono ku'u wale no i ka moana, a ina paha he poe ike ina koa lawai'a ina paha ua piha na waapa o lakou, aka, ma ka hana mau, o lakou la ka oi no ka mea, e hala elua ia, elua po i ka moana, ke hoi mai ua keokeo a inoino ka i'a, a o ka i'a hou no hoi, e kapalili ana no.

            O ke au o ka moana, oia ka mahele ano nui o nei mea he lawai'a moana, a me ia ano e nana ai oe i ke kulana au o na koa lawaia a pau, i kekahi manawa, elua wa moakaka loa o ke au, i ka manawa kai nui, a i ka manawa kai maloo, o ka mea mau mai ko'u mau la opiopio mai a hiki no i keia wa, ina he kai piha, e huli mau ana ke au i Hawaii, i ka wa kai maloo, e huli mau ana ke au i Molokai, a ina i ka wa Hailo, ekolu hora i kahi wa huli ae ana, a pela mau a po ka la, a i kekahi wa, e hele kaapuni ana ke au, a o keia ka manawa i'a loa o ka lawai'a moana, a i na i ke kau o ka makalii, hookahi no moe ana o ke au po ka la, huli no hoi ao ka po, he mau au nele loa keia i ka i'a, a maila paha o ninau iho oukou, pehea la e maopopo ai i ko oukou, mea kakau keia mau loli ana o ke au?  Me ka uwaki pakeke no hoi e hele pu ai, i maopopo ka wa a me ka manawa e lawai'a ai.  Eia hou kekahi mahele nui o ka lawai'a moana, i ka manawa au e holo ai a ke koa au e manao ai, hoolei oe i ka pohaku, ike iho la oe ka lawai'a nui o ke au o ka moana he au i'a ia no kai moku, oiai eia paha ko kakou koa e ku nei i Wailele, ia wa e olelo koke oe i kou mau hoa lawai'a, e hoala koke ka pohaku, a holo aku i Kaimoku, i ko kakou wa e hiki ai i Kaimoku, a haule aku na paka ilalo, he i'a mai hoi kau, ia oe nae ka lawai'a nui e olelo aku ai i kou mau hoa lawai'a e hoala i ka pohaku e like me ka'u i kamailio mua ae nei, he mea hoonaukiukiu loa kela i na hoa lawai'a no ka luhi i ka huki hou i ka pohaku, no ka ike ole ke kumu, a oia no ke kumu nele o kahi poe aia nae a hiki aku i ke koa a'u'i olelo ai kani iki ka aka, he hoihoi mai hoi kau, oiai o ke kulana o na koa lawa'a ma ka hapanui, mawaena o Lanaai, Kahoolawe me Ukumehame a Lahaina, he mile a he elua mile ke kaawale a me ka mamao mai kahi koa a kahi koa lawai'a, a i kou lawai'a ana i kahi koa alaila, laweia aku la no ka palu o ka munu a kakou e lawai'a nei iluna oia koa, alaila e pipii mai ana ka i'a oia koa a hiki i kahi a kakou e lawai'a nei, a he mea mau ia ma na lawai'a nei, a he mea mau ia ma na lawai'a ku kaula a pau mai ke aukahiko mai, a ua maopopo aku la ke ano a me na hana, o keia mea he lawai'a a he mea maikai no paha i ko oukou mea kakau e hoikeike aku i ka inoa o na koa lawai'a, a e maopopo pono kahi mau koa lawai'a kahi poe hanohano i holo pu ai me ko oukou mea kakau.

            He hookahi haneri ka nui o na koa lawai'a moana a ko oukou mea kakau i paa naau mai ko'u mau la opio mai, a e holo pu hoi me ko'u luaui, a o ka hapa hea la o keia mau koa lawai'a i loaa i ko makou poe lawai'a e holo nei i keia manawa.  Eia na inoa pakahi.

            Nalupaio, Poohina Luluomala, Keawa, Naiakawau.  Naiaakaapa, Hina, Naniuolopa, Nakalo, Kaule, Ouomakeanu, Ouopaopao, Ouokahala, Ainahou, Pohakunui Ke-a Kahono, Hau, Humuhumunui, Kaimokuloko, Lanikaula, Makaokaulu, Alapaki, (Hon. A.P. Judd, Kahapapa, Kanewahine, Pualiilii Oionui, Punapuna, Keawalai, Oloina, Kahea, Puhiaama, Naiaahunalele, Puuohoku, Kahamama Puupehe, Puumahanalua, Kahalanui, Kahamama, Kapaa, Kapaihi, Awehi (1) Awehi (2) Kane, Kala, Kaili, (1) Kaili (2) Kaana Nakiona, Nalaakoena, Kawaawaa, Kumuokawaawaa, Wailele, Kaimoku (1) Kumuokaimoku, Puakailima Kahinahina, Kohenui, Koheliilii Lanikaulanui, Kuou Halekou, Puhinui, Kahikauwa, Kuai, Kapili, Puulaau, Hanalaeehu, Kalepelepe, Kalepa, Nakikala Naopuupuu, Kamalama, Kahakino, Puukahala, Kalu-a Kalua, Kumanawa, Kukaehili, Pele Naaiapuka, Paheehee, Moeawa, Kupali, Puuhoomaha, Laeokukui, Ahupuni, Honokoa, Laepaki a o Kealaikahiki, Keahua, Laemakani, Nakuenui, Nakueiki, Kuuwale, Manowai, Keahuanui, Kealookekaa, Luku.

(Aole i pau)

 

UA IKE NA KANAKA A PAU I KA LAAU PENIKILA HE LAAU KUPONO NO NA HOME.

            He hoola maopopo a hiki wawe no ka

UMII, KUNU, PALAHEHEHI, ANU, PAUAHI, PEHU, A ME KA HAKI.

Hikiwawe ke ola.  Elua ano, 25 Kaneka a me 50 Kaneka Hookahi no Laau Penikila ka Perry Davis'

 

LYLE A. DICKEY

            E hooko ia na hana pili kanawai apaumai na mokupuni mai.  Kihi e Alanui Betela me Moi.  Pahu

 

KAKELA ME KUKE (KAUPALENAIA)

 

Poe Kalepa ma ke Komisina A HE Poe Lawelawe Kopaa.

 

HE POE AGENA NO NA MAHIKO LEHULEHU

 

E Hoolohe Mai, E o'u mau hoa o ka ua Kukalahale owao o WILLIAM RINGER,

ua wehe ae nei au he Hale Kuai, KIKA, KIKKILIKI, PAKA NAU o na ano apau, pela me na ano KINI MEA AI like ole o na ano apau, pela hoi me na OPELU MALOO ono o na Kona, a e loaa pu ana me na PAKA HAWAII ona o na Kona.  E kipa mai ma ko'u hale Kuai, he oluolu na kuka kamailio ana.  E loaa no wau ma Alanui Muliwai kokoke ia Alanui Kukui.  Ua hiki ke hoolawa ia na kauoha mai na kuaaina mai i na mea i makemake ia.

P.O.Box 483.

 

PALAPALA HOOIA HOAHU Elike me ia i Hoopakaia o ka HUI HAWAIIAN REALTY A ME MATURITY (KAUPALENAIA)

 

Hoohuia Maraki 30, 1901 HUINA WAIWAI, $60,000

5,000 MAHELE; $10.00 PAKAHI; UKU PAUIA

 

HEAHA NA KUMU?

            1.  Aole makou e koi aku ana ia @ e uhaai i kau dala.

            2.  E haawi ana makou i kekahi @ hele palekana e hiki ai ke hoopukapuka a loaa ke dala mamuli o ka hoohui @ na huina liilii i keia ame keia mahina, a mamuli o ia mea e koe ana he huina dala mai ka hoolilo ia ma kekahi ano e ae, a e loaa ole ana ia oe kekahi wahi pomaikai mailoko mai o ia mea.

            3.  O ka nui o na makahiki a me ka oihana a hana a ka mea hoahu, aole loa ia he kumu hoanoe a hoololi, ao ka mea, ua hiki i na kane, na wahine a me na keiki ke lilo i poe hoahu.

 

HOOIA HOAHU

            4.  Na makou e kukulu i mau home no oukou, a e hoopuka no hoi makou i Huina Hoahu Hoopukapuka e hookaa ia iloko o 75 mahina, me eha (4) Palapala (Coupons) Hooia o $50 pakahi hoopili pu ia, a o ka averika no ka puunaue iloko o 19 mahina, a e ohi ana makou i $150, a e loaa ana ia oe he $200.  O kou puka he $33.23 no kela a me keia dala pakahi i hoahu ia e loaa ana ia oe he 33-1-3 keneta puka.

            5.  No ka mea, aole oihana hoopukapuka i ikeia ka oi aku o ka pomaikai mamua o keia.  E kakau mai a e kauoha mai i na hoakaka piha.  E kauoha mau ana ka Hui e hoike a e hoakaka piha aku i na mea a pau a me na lawelawe ana ke makemake ia, ke kakau ia mai ma ka leta a ke ninau @ mai.

HUI HAWAIIAN REALTY & MATURITY.  Kaupalenaia.

Room 3 & 4 McIntyre Bldg.  Fort Street, Honolulu L.K.KENEWELA, Peresidena.

 

UA MAALIHI I KEIA MANAWA

            HE HIKI KE HUKI A HOOPIHAIA NA NIHO POPO ME KA EHA OLE malalo o na paahana ana o kela au naauao e kapiliia ai i ka io o ka papa niho.  Aohe hanaia i ka laau hohiamoe.

            O kela wale no kahi huki a hana niho ma Honolulu nei i loaa na PAAHANA I HOOPAAIA me na mea e ae e hiki ai ke huki, hoopiha a hoopaa i poo gula a puna, paha e hiki ole ai ke ikiea ke ano e mai ka niho maoli ae, a e paa no ia no umi makahiki malalo o ka hoopaa ana, me ka LOAA OLE O KEKAHI HUNAHUNA O KA EHA.  He POE WALE NO I HOONAAUAO A HOOKUU MAIKAI IA na poe lawelawe he poe i lawelawe mua ma keia oihana mai ka 12 a i ka 20 makahiki, a he loaa ma ke poe o na mahele like ole o keia oihana.  E kipa mai ia makou @, a e ike no auanei oukou i ka oiaio o ka makou e hoolaha nei.  E hoike mua aku no makou ia oukou i ka nui o ko oukou lilo i ka wa e NANA MUA AI ME KA UKU OLE.

Paa Niho Ka'i $1.00, Niho Gula 3.00, Keepiha ana me ke Gula 1.00, @ ana me ka Dala .50

NEW YORK DENTAL PARLORS, Room 4, Elite Building, Alanui Hotele.

He mau kokuawahine no kekahi no na wahine