Ka Nupepa Kuokoa, Volume XL, Number 28, 11 July 1902 — Page 6
| This text was transcribed by: | Ruth K. Halican |
| This work is dedicated to: | Waianae Coast Comprehensive Health Center |
Ka Nupepa Kuokoa
KE KILOHANA POOKELA NO KA LAHUI HAWAII.
Manaoia ua Poino
KE ALII O KA MOKUPUNI O SWAYNE
Ma ke ku ana mai o ka mokuahi Moana mai kona alahele aukai mai ka hema mai, i loaa mai ai kekahi moolelo pili i ke alii o ka mokupuni Swayne I haohao nuiia no kona nalowale me ka maopopo ole o kahi i hele ai. A o keia nuhou hoohikilele he mea ia i maa mau ole ilaila.
O ka inoa o ka mokupuni “Swayne” ua loaa mai ia mamuli o kekahi haole nona kela inoa i hele ilaila me kona ohana a hookamaaina a lilo i kupa nolaila, alaila puka mai la ka leo o ka lehulehu i alii oia no ua aina la. Ua lokahi ko lakou noho ana me na kanaka o ia wahi aka ua loaa kekahi haohao nui ia nona ame kona ohana mamuli o ko lakou nalowale honua ana a maopopo ole ka hopena. O kekahi kono wale aku no ua loaa paha kekahi paee mawaena ona me ka lahui o ia mokupuni.
O ka mokupuni Swayne he wahi kiko uuku loa ia o na mokupuni moana Pakipika ma ka hema aku nei o kakou a aohe wahi ona i oi aku maluna o 100 kapuai ke kiekie maluna o ka ili kai. Aia he kuono kai nui iloko ona i hoopuniia e kona mau pea mawaho, he mehameha maoli oia nona iho, oiai o Samoa wale no ka aiana i lihi kokoke aku iaia ma kahi o ka haneri mile aoi paha ka mamao, eia nae, ua noho alii ia oia e kekahi haole mamulii o kona hiki ana ilaila me kona ohana a nookupa a lilo ae la ka mana hoomalu ame ka mana hooponopono i ua kanaka la no ua mokupuna la. Ua noho alii oia no ua aina la no 35 makahiki, a aole mea nana i hoonioni iaia a hiki wale no i kona nalowale ana me ka ohana. He aina keia I uluia me na laau niu ame kekahi ano e ai a ma ia mau mea i lawelaweia ai ka oihana kalepa ma ia wahi. O na Paniolo ka poe i loaa mua ai keia mokupuni i ka makahiki 1602, eia nae aole he aupuni i kukuluia ia manawa a pela mai no i ka manawa i loaa aku ai i na Pelekane. Ua manao lakou aole waiwai o ke kukulu ana I ka mana aupuni a huki hoi i ka hae i mana ai, nolaila ua waiho ia aku la ke alii haole Swayne e Iula i kona aupuni o ke kai.
He nui na manawa e maalo ae ai na mokuahi malaila a hookuu aku la i na pahu i hoopihaia me na nupepa alaila iana hele aku la a pae i ka mokupuni Swayne, pela e loaa ai i ua ohana haole la ka ike i na mea hou o ke ao. Ma ke kaalo ana ae o ka mokuahi Moana he hookahi mile ka mamao mai iaia aku a hiki i ka mokupuni Swayne ua ikeia aku la kekahi hale o ko Europa ano hale e pihaia ana i kanaka mawhao ua hukiia ae he hae a e kani ana na pu, a ua holo mai kekahi poe i kahi o ka moku, eia nae, aole maopopo oia
Mau hana apau, a haalele wale aku no ka mokuahi Moana aole i maopopo ke kulana o ka moi haole Swayne.
Ma ka nana ana i ke ano o ka mokupuni Swayne ua hiki ke ike iho aole he wahi hoolana manao a hoohauoli hoi e loaa malaila. O ka nui wela o ka la apuni ka makahiki oia ka haawina e kau mai ai i ke kanaka a he ku maoli no i ka mehameha o ke ola ana; a o moku, aole e hiki ke hookomoaku, oiai aole he hohonu loa, a he ooi wanawana okoa ae no na pohaku oloko o ke kai.
Pau na Pohihihi
No Ke Kahua Hoolulu Mokukaua Amerika Ma Ke Awa O Puuloa
No kekahi manawa loihi ka waiho ana o na koi a ka poe kuleana aina ma kahi a ke Aupuni Amerika i ana
ai i kahua hoolulu no kona mau moku kaua ma Ewa. Ma ka la 8 o keia mahina, ua haawiia ae ka pono i na kuleana malaila, mamuli o ka haawiia ana i na kahu malama waiwai o Pauahi he $25,737 no na wahi i lilo aku. O keia no hoi ka olelo hooholo a na kiure na lakou i noonoo i keia hihia ma kekahi manawa i kaahope ae nei. O ka mea pohihihi wale no, oia ka uku ana i ka auhau, nona ka heluna o $265. Ma ka hoike a ka Loio Kuhina Dole, ua maopopo aole e hiki i ke Teritori ke auhau aku ia Amerika, a oiai, na na kahu malama waiwai o Pauahi i hana i ka plapala e hoolilo ana i keia mau wahi ia Amerika; no laila, ua manaoia na lakou no e uku i ka auhau.
Malalo o keia mau hooponopono ana, ua haawi aku ka Hui Alahao ame Aina o Oahu I ke kuleana ia Amerika me ka paa no nae o ko lakou kuleana alahao kahi e holo nei ko lakou mau kaa-ahi. Ua ukuia aku i ko Kimo Pelekane mau kahu malama waiwai he $2,400, a i ko John Ii $300. Mamuli o ka aeia ana, aole e hoopoinoia ka hapa o Mahiko Oahu, nolaila, ua haawi aku keia hui I ko lakou kuleana. O ka hapa wale no i koe, oia no ke kuleana e paa ia nei e ka Hui Mahiko Honolulu, aka, ua manao wale ia e komo mai ana keia hui a apono i na dala a ke Aupuni Amerika e haawi aku ai, a e hoopau wale ia ana ka lakou koi e like me ka hana iho la. O ke koi a Ah Fo, ua kapae loa ia, oiai ma ka imi pono ia ana, aole loa i komo aku ke ana a Amerika ma kona mau palena.
Mai kali iki a hala ka manawa kupono no ka lapaau ana i ka manawa e ikeia ai na hoailona ano kolela maluna o ke keiki. O ka makaala ana i ka wa kupono no na lapaau kupono oia ka hookaawale ana i ua pilikia la. O ka laau lapaau kupono no ia ano mai oia no ka Chamberlain’s Colle, Cholera ame Diarrhoea, he mea hoonana no hoi ia i na tausani makuahine mamuli o ka hoolaia o na keiki a lakou. He puuhonua ia no na home i ka wa pokole a e hele ae i ka halekauai laau lapaau o Benson, Smith Ma, na agena kuai laau i loaa ai ka omole laau. He oluolu ke kumukuai.
Mamuli o ka nui o na mea hou, ua waihoia kekahi mau moolelo kumau a o na mea hou ka i okomoia aku ma ko lakou wahi.
Nui ka hana a na Home Rula i keia pule e pau ole ana paha iloko o ka manawa kupono.
Ma na hana o ka Aha Hookolokolo Kaapuni o ka Poalua nei Iulai la 8 ua hooloheia ka hihia o Starr Kapu, kekahi o na kiure mamuli o kona haule ana i na hana o ka Aha o ka Poakahi iho. Ua hoopaiia oia he $25 e ka Lunakanawai Humphreys.
Eluene VII iloko o ke Kupilikii
Hoopaneeia Ka Poni Moi-Kela Ame Kela
Ladana, Iune 25.-Ua hoopuiwaia na makaainana i keia la mamuli o ka hoike ana ae o Sir Francis Knollys, ko ke lii kakauolelo, i ke kulana kupilikii o ka Moi Eluene VII, ma ka Halealii Bakinahama ma ka hora 12:45 p.m. penei: “Ke waiho nei ka Moi iloko o ka ehaeha perityphilitis. Ua manaola i ka Poaono nei e hiki ana iaia ke ku aku i na hana apau e pili ana no kona la poni Moi, ke malama pono ia. Ma ke ahiahi Pokahi nei, (Iune 23) ua hiki ole ke hoomanawanui ia, nolaila, ua manao ia e kaha ia kona wahi i pilikia.”
Ma ka hora 2:45 p.m., ua hoopuka hou ia ae e ke kakauolelo keia olelo hoolaha penei: “Ua holopono ke kaha a na kauka. Ua hemo mai he puu nui mai kona wahi eha mai. Ua ikaika ko ka Moi kulana mahope o ke kahaia ana a he mau manaolana no ka lanakila iloko ona.”
Ma ka hora 6 iho, ua loaa hou ae kela lohe mai ka halealii mai: “Ke pii mau ae nei ko ka Moi kulana maikai, a ua loaa mai ka maha mamuli o ke kahaia ana.” Ma ka hora 11:10 p.m., “Ke maikai loa ae nei ke kulana o ka Moi, e like me na manaolana i manaoia mahope o kona hoomanawanui ana i ka ehaeha a ke kauka. Ke mau nei no kona ikaika, a ua emi mai hoi na ehaeha, a ua komo hoi kahi ai. He mau la wale no koe alaila hiki ke puana ia ae ua loaa ka lanakila i ka Moi Eluene VII.”
HOOPANEEIA KA PONI MOI
Ladana, Iune 24.-Ua kuhau iho na hana hoohiwahiwa o ka la Poni Moi, mamuli o ka loaa ana mai o ka lono i hoopukala mai ke keena oihana o ka Earl Makala, penei: Ke hoolaha aku nei au, ua hoopaneeia a hiki i ka wa e hoolaha hou ia aku ai, ka poni ana I ka Moi Eluene VII, ame ka Moiwahine Alexandra.” O ka hiki mua kia o ka nune ana no ke kulana o ka Moi iwaena o na makaainana.
NOHO HOOMANAWANUI KA MOIWAHINE
Landan, Iune 24.-Ua noho hoomanawanui ka Moiwahine Alexandra ilokoo na uluku o ka pule i hala, oiai no nae aia no he manao hophopo no na mea e hiki mai ana maluna o kana alii kane. Aole oia i hoohala ae i na kono i panaiia mai iaia, a ua hele aku no oia me ka hoike ole ae i kona manao kaumaha, a i kona wa I halia aku ai I keia la e kahaia ana kahi pilikia o kana alii kane, a e hoopaneeia ana ka hana poni Moi, ua puana ae oia me ka malia,-“Aole anei ua manaolana mua au e hoea io mai ana no keia haawina?” “Pehea la ka Moi i kona lohe ana?”
I ka wa I lohe ai ka Moiwahine i na haina o kana mau ninau, ua hooholo iho la oia iloko ona, e hele aku e hui me kana alii kane mena nanaina hauoli e hoomama ana I ko ke alii mau manao kaumaha.
NA LEO PULE NO KO KA MOI PALEKANA
Ladana, Iune 26.-I kawa i hoea mai ai ka hora i manaoia ai no ka poni Moi, ua akoakoa ae ma ka halepule St. Paulo kekahi anaina nui hewahewa. Malaila i malamala ai he anaina haipule no ka noi ana I ko ke Akua lokomaikai e hoopakele ae I ke ola o ka Moi Eluene VII.”
NA MANAO O DEPEW AME KEENE
Nu Ioka, Iune 28.-Ua olelo ae o Senatoa Depew, kekahi o na loea kakaolelo o Amerika, a he kanaka hoi I noonoo akahele i kea no nui o na lono uwea telegarapa mai Ladana mai, no na mea e pili ana i ke ola o ka Moi Eluene VII penei: “Ina e nana pono ia kea no o na olelo i palapalaia ma ka hoika a ke kakauolelo a ka Moi, e ikeia ana, ua huliia na huaolelo kupono e hoala ole ia mai ai na manao uluku no ko ka Moi kulana maoli. Nolaila ke manao nei au, ua ikaika loa ka poino i loaa i ka Moi mamua o na mea i hoolahala ai nona.”
Penei hoi ka james R. Keene: “Aole no ia he mea e loli ae ai ko Amerika kulana, ina no e hala ana ka Moi, e kuahaua koke ia no ke Keikialii o Wale i Moi iloko o na minute he iwkalua. Ua komohia ka manao aloha no Amerika nei ilokoo keia ohana alii e noho mai nei, a ua hoomaopopoia keia kulana iwaena o lakou iloko o na manawa lehulehu a lakou i hui launa ai me kakou. Ke manao nei au, aia ka Moi iloko o ka pilikia kuhohonu.
He Koi Poho o $10,000
MAKEMAKE E PILI HOU KA AINA ME LAKOU
Ma keia pule i hoomaka ai na hana o ka Aha Hookolokolo Kaapuni o ka Apana Hookolokolo Kaapunio Ekahi ma ka noho lunakanawai ana a ka Lunakanawai Kaapuni A. S. Humphreys a o kekahi o na hihia i lilo i mea nui iloko o ka aha hookolokolo oia no ka hihia waiwai a james Auld ame kona maiu pili e koi ana I ko lakou poho o $10,000 ame ko lakou kueana e hoihoi mai I ka aina me lakou. He hoopii keia n James Auld ma e kue ana i ka Hui Pa Papa ame Kukulu Hale o Oahu ka ona e paa nei ia waiwai.
Aia keia aina waiwai nui iloko ponoi o ke kulanakauhale nei e waiho la mauka iho o ka Hale Leta a holo a hiki i ke alanui Moi, a mai ke alanui Betela a hiki I ka halekuai o Dimond ma. He aina waiwai nui keia nona ke kumu waiwai mawaena o $50,000 ame $100,000.
O ka ona mua o keia waiwai oia no ka Hui o Kakela ame Kuke a ma ke kuai ana ua lilo aku la ia James R. Lewis. Pela ka nee ana mai o ka hoolilo ana i keia aina a hiki i ka lilo ana i ka hui e kueia nei.
Ua hooloheia keia hihia i ka Poalua iho nei no ka manawa mua loa me ke kakoo ana o Mr. A. L. C. Atkinson ka lolo o ka aoao hoopii, aka, ua hoohalahala mai o Messrs. Magoon ame Lightfoot na loio o ka aoao pale e noi ana i ka aha e hoopau i ka hihia mamuli o ka loaa ole o na kumu hooialo no ke kuleana o ka aoao hoopii. Ua nana ole aku ka lunakanawai i ke noi a ka aoao I hoopilia. Eia na kiure e hoolohe nei i keia hihia: Ben, Houghtailing, H. N. Crabbe, J. K. Merseberg, Lot K. Lane, J. A. Hughes, Charles Schoelikoph, Solomon Kaleiopu, David Notley, james McKee, Joe Paiko opio, L. H. Dee, ame eli J. Crawford..
.
HOLO KA BILA ALAWAI OKI O PANAMA MA KA HALE SENATE
Wasinetona, Iune 19.-Ua hooholoia ka bila Alawai-Oki o Panama (Canal) e ka hale Senate, e like me na hoololi a Senatoa Spooner ma o na balota 42 no ka hooholo ana a he 84 kue.
Ma keia bila, ua loaa ka mana i ka Peresidena e hoohana aku I keia alawai-oki ma Panama ina nae oia ka mea pono e hana ai, ina aole, alaila, e apono aku ia i ka hana ana o ke alawai-oki o Nikarakua.
Ua loaa pu no hoi ka mana i ke kakauolelo Waiwai e hoopuka aku i na bona Aupuni no lakou ka waiwai io o 130 millona dala, no na lilo o keia, alawai-oki, e hoopukala nae keia mau bona i kela ame keia manawa e ikeia ai ua lawa ole na dala i loaa mai no na bona i kualia, a pela e hanaia ai a hiki I ka piha ana o $130,000,000.
Aole i panikuia ka poe e paa ana i kela mau bona, ua loaa i keia ame keia kupa Amerika kela pomaikai.
I ka wa i hooholoia ai o keia bila, ua kohia na komite o ka hale Senate na lakou e lawe aku I keia bila no ka hale o na Lunamakaainana. Aole i maopopo ka hana a keia hale no keia bila, aka, ua wawa ia ae, e kulike ana ka manao o ka hale Lunamakaainanana me kona mua.
Ua loaa hou ae no hoi ka lono, e noho ana na komite o na hana kuloko ame kuwaho i keia po, (Iunee19) e noonoon i keia bila, a ua lono hou ia ae no hoi, ua kulike ole ka manao o ke komite me ka hale Senate.”
Ia ka wa i lohela ai, ua holo keia bila, ua nui ka hauoli o ka poe i kakoo i keia bila, a o ka poe kue, ua nui loa ko lakou ukiuki i na Senatoa i hololua, olai, ma na la mamua iho, he 41 Senatoa ma ka aoao kue a i makemake i ke alawai-oki o Nikalakua, a he 43 ma ka hooholo loa i keia bila.
O na Senatoa i loaa ole ka lakou olelo hooholo no ka lakou aoao e ku ai, ina loli ko lakou mau manao no ka aoao kue alaila e loaa ana he 44 balota kue a he 43 balota no ka hooholo ana. I ka wa nae i balota ia ai,
pau aku nei keia poe i kue mua ai ma ka aoao hooholo, oiai nae ua noho aku kekahi mau Senatoa kakoo i keia bila.
Nui ke Kalohe o na Keiki Pukiki
O LAKOU AME NA AHI KU ANA I KA HALEWAI
Ma ka auwina la o ka Poalua nei ua hoohana aku o Apana he makai i kona mau io paahana ma ke alualu ana i kekahi mau kamalii Pukiki ekolu mamuli o ka hana kolohe a na kamalii i hana ai, a pau noo nae lakou apau ekolu i ka paa.
Ma ke kihi o na alanui Pauahi ame Maunake e waiho kaulaiia ana he ope ahi nui i ka la i maloo ae a pau kea no ko-o-u. He ahi keia na kekahi Kepani halekuai olaila me ka manao e kaulai malaila a hoi hou mai ka ikaika a o kea hi alaila hoihoi I ko lakou wahi mau, aka, mamua o ka hookola ana o kona makemake ua kii mai la ke kolohe a mama ana na kamalii Pukiki ekolu I ka holo me na pakeke ame nap oli o lakou I piha i ke ahi.
Aole nohoi i nalo aku ua poe kamalii la ua ike koke aku la ke Kepani e uhaiia ana e Mr. Apana ka makai i
hoea ae ai malaila a ike aku ai i ka naholo o na keiki, e helelei ana ke ahi, e waiho mokaki ana I ke alanui, ua paa aku la ua poe keiki kolohe la ia Apana, a o lakou nohoi amen a ahi i ohiia mai, ku ana i ke keena hana o ka Halewai, a eia ke kohohe ke paa la i ka halewai.
O ka inoa o keia poe keiki Pukiki oia o Joe Patrice, Jacinto Patrice ame Joe Depunt. Ua hoike ae o Joe Patrice ua aihue io no oia i ka waiwai aka ua manao oia he ahi ia i kilooooiia. Ua hoike ae ka ona nona ka waiwai i aihueia i kona ike mau i ke keiki Pukiki Joe Patrice e maalo mau ana ma kona manao hoohalahala.
HOEUEU NA AOAO KALAI AUPUNI
Eia ka mai fiva o ke koho balota, ke holapu hele nei i kela mau la ma ke kualanakauhale o Honolulu nei. Ke ala mai nein a aoao kalaiaina a liuliu no ka palo hahana e hoea mai ana iloko o ka mahina o Novemaba ae nei me na manao e ahai ae I ka hanohano o ka noho kau kanawai ana ma keia Teritori.
Ma ka Poakahi nei i hoomaka ai ka aoao Home Rula i ka malama ana i na halawai no ka hoolohe ana i ko ka Elele Wilikoki mau manao, ame ka noonoo ana I na mea e pono ai ka aoao Home Rula.
Ma ka haiolelo a ka Elele i ka Poalua nei ua loaa mai keia mau manao penei:
“E lawe mai i na waiwai kipe, a e hoohoka aku i ka poe e kipe mai ana ma ke koho ole ana no lakou.
“E kikiki aku ia Amerika, ina he mea hiki, no ka hoopomaikai ana ia Hawaii ilihune.
“E hoomauia no ke ku ana o na Hawaii no lakou iho,
“I noi ia ka moku kaua hoomaamaa no na Hawaii wale no.
“O na aina hookuonoono e haawila i na kanaka Hawaii wale no.
“E nana aku ia Amerika ma kea no he aupuni i pakaha, a na ia mea i hoolilo i na kanaka i mau kaainana kue mau.
“E kue mau i na hana e hooholomua ai i na oihana maanei a ka aoao mikanele e manao ai e hana.”
O keia na mea ano nui i loaa mai ia makou ma ka nana ana a hoomaopopo i ka haiolelo a ka Eiele i haiolelo ai ma Poka Hale imua o na Elele i hiki mai na kuaaina o Oahu nei.
Ma ia auwina la no, ua malamaia ka halawai ma ka hale Keaka Opluma, a malaila i noonooia ai na hana e pono ai keia aoaao kalai aupuni. Ua waihola ae ka hooponopono kumukanawai ame na rula ma ka lima
o ke komite nana na lala: Ewaliko, Kahlvaum, Long, Makaila ame Kookoo; o lakou no na lala o ke komite imi kumuhana a ka aoao Home Rula e paio ai ma keia kau koho ae.
Na Moses Kaaikaula, i waiho ae he olelo hooholo, e kue ana i na luna nui o keia aoao kalai aupuni, oiai nae o ka manao o ua elele nei no Kalauokalani wale no. Mahope o na olelo kuanui ana a hala ka nui o ka manawa malaila, ua waiho ia keia olelo hooholo ma ka lima o ke komite nona na lala: Ewaliko, Kaohi, Kanui, Emaluka ame Mahiko.
Ma ka halawai o ka Poakolu nei, mahope o na hooponopono ana a ka Elele Wilikoki, ua aponoia ae ka hoike a ke komite imi kumuhana i heluheluia mai e John Wise. Ua waiho pu ae o Emaluka i ka hoike
a ke komite hooponopono kumukanawai. Maanei I komo aku ai ka hale iloko o na uluaoa, a ma ka nana aku ia manawa, e nahaha ana keia aoao kalai aupuni, aka, iloko o ia uluaoa, ua hoomaliliia no mahope iho.
Ma ka nana aku, ina pela iho la ka nee ana o na hana, a kela Aha Elele, alaila e pau ana no keia pule holookoa.
KA AOAO DEMOKARATA
Ma ka po Poakahi nei i hoomaka ai ka aoao Demokarata e hoala i ko lakou aoao kalai aupuni. Ua malamala ae ka halawai ma ‘Waverl6 Block, a malaila i akoakoa ae ai he 12 a oi o na alakai o kela aoao me na manao e hoala hou i ko lakou aoao.
Ma keia halawai I waiho mai ai o McCarthy i kona kulan lunahoomalu, aka, ua ikaika no ke noi a na hoa e hoihoi oia i kana noi, a ua hooko aku oia. Ua noi ia ae e hoopanee a halawai hou ma ka po Poakahi ae nei, a ia manawa e lawe la mai ai ka noonoo ana no ke pani ana i ua noho hakahaka o ia aoao aole i akoakoa mai kekahi hapa o na komite.
NA REPUBALIKA
Ma ka po o ka la apopo a waihoia ae ai ka palapala noi a W. J. Kuelo no ka hookuu ana iaia mai ka noho ana he lala no ke komite kuwaena ame ke komite hooko o ka aoao Repubalika, mamuli o kona lawelawe ana i ka oihana unuhiolelo no ka aha hookolokolo i malamala ma ka Mokupuni o Maui. Eia ke komite o ka apana elima ke noonoo nei i keia palapala am eke kanaka kupono e pani aku ia wahi, ina e ae ia ana kela noi a Kuelo.
O kekahi mea e noonooia ana, oia no ke koho ana I ka lunahoomalu o ke komite.
I keia po e malama mua la ai ka haiawai nui o na Republika ma ka apana Eha, ma ke kihi o na alanui Lunalilo ame Piikoi. Maanei e haiolelo mai ai na alakai o ka aoao Republika a e noonooia ai no hoi na hana no ke kau koho balota e hoea mai ana.
HUI NA PUKIKI
Ma ka po Poaha@nei. Iulai 9, ua akoakoa ae kekahi mau opio o ka lahui Pukiki ma Concordia hale no ke kululu ana i hui no lakou no ke komo pu ana ma na paio kalai aupuni. Ua kohoia o J. M. Camara i lunahoomalu no ka manawa a ia J. B. Freitas i kakauolelo. O ka manao nui o keia hui, oia no ka hooikaika ana i na opio e hookupa i hiki ai ia lakou ke koho, alaila, e hoonaauao ia lakou ma na mea pilo kalai aupuni.
NA LONO HOPE LOA NO HAWAII NEI MA WASINETONA
Ma ka mokuahi Sonoma i ku mai ianei ma ka Poakolu iho la i loaa mai ai ka lono i ka nupepa Advertiser mai kona mea kakau mai ma Kapalakiko penei: “Haule ka bila koi pauahi bubonika ma ka Hale o na Lunamkaainana. Ua haulo hou no ka bila Dala Hawaii. Ua kohoia na komite no ka hele ana aku no Honolulu.”
HOOMAHA KA AHAOLELO
Wainetona, Iulai 1.- I ka hora 5:30 p.m., o keia la I kukala ae ai ka Lunahoomalu Henderson o ka hale o na Lunamakaainana, ua hoomaha ia hale. Ua hookuuia ae na hana iloko o ka ulumahiehie o na manao maikai, a ua hoike ae ka lunahoomalu, o keia ke kau i hana nui loa ai keia aha.
HE HUAALE MAIKAI
Aole he like o na
“Huaale a Ayers”
me na huaale e ae no ka mea he mau huaale kokua keia I ka hana a na naau, a he laau hoomaha maikai loa hoi. I na he paa kou hanalepo o na
“Huaale a Ayers”
ka laau e hemo maikai ai, a e hemo maikai mau ana hoi mahope aka oia manawa.
Aole loa he hiki I kekahi kanaka ke Olelo ae he maikai kona ola kino ina aole he hemo o kona hanalepa
he hookahi manawa o ka la, a oi aku paha. Ina i maopopo keia kanawai o ke ola i na kanaka apau, aole loa e like ka nui o ka poe mai me ka mea e ike ia nei i keia mau la.
Ua hana ia owaho me ke kopaa he maikai loa ka lawe ana.
Aohe mau Huaale i oi ae ka maikai mamua o na
“Huaale a Ayers”
Hoomakaukau ia e Kauka J. C. Ayer & Company, Lowell, Mass., U.S.A.
E loaa no keia mau – Huaale ma ka Hale Kuai Laau o Hollister, alanui Papu.
PALAPALA HOOIA HOAHU
Elike me ia I Hoopukaio e ka
HUI HAWAIIAN REALITY AME MATURITY (KAUPALENAIA)
Hoohuia Maraki 3, 1901
HUINA WAIWAI, $50,000
5,000 MAHELE; $10.00 PAKAHI; UKU PAUIA
HEAHA NA KUMU?
1. Aole makou e kaoi aku ana ia oe e uhaai i kau dala.
2. E haawi ana makou i kekahi alahele palekana e hiki ai ke hoopukapuka a loaa ked ala mamuli o ka hoohui i na huina liilii i kela ame keia mahi@ a mamuli o ia mea e koe ana he h@ dala mai ka hoolilo ia ma kekahi ano e ae, a e loaa ole ana ia oe kekahi wahi pomaikai mailoko mai o ia mea.
3. O ka nui o na makahiki a me ka oihana a hana a ka mea hoahu, aole loa ia he kumu hoanoe a hoolii, me ka mea, ua hiki i na kane, na wahine a me na keiki ke lilo @ poe hoahu.
HOOIA HOAHU
4. Na makou e kululu i mau home no oukou, a e hoopuka no hoi makou I Huina Hoahu Hoopukapuka e hookaa ia iloko o 75 mahina, me eha (4) Palapala (Coupons) Hooia o $50 pakahi i hoopili pu ia, a o ka averika no ka puunaue iloko o 19 mahina, a e ohi ana makou i $150, a e loaa ana ia oe he $@00 O kou puka he $33.33 no kela a me kaia dala pakahi I hoahu ia e loaa ana ia oe he 33-1-3 keneta puka.
5. No ka mea, aole oihana hoopukapuka i ikeia ka oi aku o ka pomaikai mamua o keia. E kakau mai a e kauoha mai i na hoakaka piha. E hauoli mau ana ka Hui e hoike a e hoakaka piha aku i na mea a pau a me na lawelawe ana ka makemake ia, ke kakau ia mai ma ka leta a ke ninau kino ia mai.
HUI HAWAIIAN REALTY & MATURITY. Kaupalenaia
Room 3 & 4 McIntyre Bldg.
Fort Street, Honolulu
L. K. KENEWEAL,
Presidena
S. OZAKI
WAIHO I KA
OIHANA KUAI PAPALE
Kuai Hoemi Loa
I Na
Papale
35c NO KA PAPALE $1.00
Halekauai 178 - Alanui Hotele
Ku ia Halepule hoomana kii Iapana hou
HUI, ALU PU NA KEIKI IAPANA ME KE KOKUAIA MAI
Aia he halepule Budi (Hoomana Iapana) e ku la ma Kahuku, Oahu, i kekuluia e na limahana Iapana o ka @ hiko o Kahuku me ke kokuala e ia lakou lunanui Mr. Adams.
Ua weheia keia hale hoomana akua kii hou ma ke Sabati, Iulai la 6, na lalo o ka hooponopono hana ana a ke kuhana Y. Imamura.
Ua piha kui ka hale ma ka la o ka hana me ka uluhia pu ia o n Iapana I hoea ae malaila e ike i na hana.
He hale nani keia o ke ano hale Iapana no, nona ka waiwai lo he $1,@
Aia o Bihopa Willis ma tonga @ kahunapule bihopa o ka Ekalesia P@ kane o Honolulu nei i pau iho nei. @ holomua kana mau hana malaila iwaena o ko laila poe a ua kauoha mai @ ola i kekahi haumana Pake ana o A Sang, e hui pu aku me ia iloko o e hana pono: a ke liuliu nei ua kanaka opio la no kana huakai malihini.