Ka Nupepa Kuokoa, Volume XL, Number 35, 29 August 1902 — Page 6

Ka Nupepa Kuokoa

KE KILOHANA POOKELA NO KA LAHUI HAWAII

NUPEPA KUOKOA, AUGATE 29, 1902

 

Na hoolala no ka hoolilo ana aku i ka Aoao Home Rula i Aoao Demokarata.

            Eia na Home Rula ke oili mai nei ma kekahi ano e hiki ai ke hui aku me ka aoao kalai-aupuni Demokarata.  Ma ka halawai anas o na luna nui o na aoao kalai aupuni Home Rula ame Demokarata i malamaia ma ka Poaha o ka pule i hala, Augate 21, ua akoakoa ae o Wilikoki ma o Kepalakika ma ka aoao o na Home Rula, Konuela, S.M. Kaimana, E.B. Makalenahana ame C.J. Makake ma ka aoao o na Demokarata a noonoo no ka hoohui ana'i na aoao Home Rula ame Demokarata i hookahi ma ka waiho ana ae i ka inoa Home Rula a hoolilo aku i Demokarata.

            O keia no ka manawa a Wilikoki i huna kele loa ai ma keia hoi ana mai nei ona, pela ka hoike a kona lukanela haole oia noo Kepalakika, a oia no ka ke Kuokoa i hoaiai mua aku ai imua o na Hawaii no ke ano o keia haole.  Ua hoike ae ua haoled la ma ka aoao o Wilikoki iloko o ua halawai la, ua ike, o Wilikoki i kona hemahema ma ka lawe ana ae i ka inoa Repubalika a pakui aku mahope o ka inoa, Home Rula i kela kau aku nei i hala, a i keia manawa ke makemake nei e bapakemaia oia me ka inoa Demokarata.

            Ua noonoo nui ia no na mea e pili ana no ka hoohui ana, na kakoo ana i na moho e holo balota aku ana ame ka lokahi ma na hana o keia kau hooikika holo balota ae.  Ua manao ka poe apau i akoakoa ae e huna kele loa i keia mau mea a lakou i noonoo ai, aka, "O ka mea i hanaia ma kahi malu e hoikeia no ma ke akea," pela i puoho ae ai keia mau mea apau a ahuwale ae la i ka la.

            Penei na mea i hoonohonohoia.  Ina e ae aku na Demokarata o Wilikoki ka elele, alaila, o ka hapa o na moho o ka aoao Home Rula e kapaeia ana a hookomoia mai i mau moho Demokarata.  Ma ka mokupuni o Oahu nei e lawe na Demokarata i hookahi senatoa, a i ekolu lunamakaainana.  Ma ka mokupuni o Maui o Bila Konuela oia ke komo ma kahi o Bila White, a o Pama Wood ko Hawaii.

            Ma keia mau hoonohonoho ana, ua ike e mai ia no na Demokarata i ka lawa ole e ko ai ka makemake ma keia hana a Wilikoki ma, nolaila, ua hoopokole ia ka halawai.  Ua ike e mai la no na Demokarata ha hana keia e koi aku ana ia lakou e hoouna aku ia Wilikokii no Wakinekona, a oia mea, aole lakou i makemake, oiai aole o lakou makemake o Wilikoki ka lakou elele o pauakaia ko lakou aoao kalai aupuni.  Ua hooholo iho na Demokarata e kale aku no a pau ka Aha Elele a na Repubalika, a ina kulike ko lakou manao no ka moho elele a na Repubalika, alaial, me na Repubalika lakou e koho ai, a ina aole e huli aku ana no lakou i moho na lakou e paio kuokoa aku no e like me ke kau i hala.

            Ma keia ano e ka lahui, ke ike ae la no oukou i ke ano o ka moho a oukou i koho ai i elele no ka lahui.  Ua makaukau oia mana ano apau e kuai aku i ko oukou pono a oukou i hilinai ai maluna ona, e like no me ia ana i holo aku ai ma Amerika a hoi awiwi mai a kalahea ae ia oukou e pakui aku i ka inoa, Repubalika mahope aku o Home Rula, no ka mea, o na Repubalika ka aoao ikaika ma Amerika.  I keia manawa, ke hihio hou nei oia e hoea mai ana ke kai ho-ee ma Amerika iwaena o na Demokarata, a oia aku ana ka aoao mana iloko o ka hale kau kanawai i keia kau ae.  Ma ia ano ke makemake nei oia e bapakemaia aku oia ma ka aoao Demokarata i loaa mau no ke pokeokeo iloko o kona mau pakeke a o ka kakou no ka o-leo-le waha.

            Hoala kaua no oia i ka makahiki 1887 a haule pu, kuhikuhi no ka Moi Kalakaua ka hewa no ka holo ana i kai o Ainahou no ka hoohala manawa ma kona hale waapa.  Hoala kaua hou no ma Kaimana 'Hila a ku ka moku ma Haulepu, kuhikuhi no mea ame mea ke kumu o ka holo ana a pee makai ae nei o Kalihi.  Holo aku i Amerika a hoi nele mai, kuhikuhi i ka hewa no ka loaa ole o ke kakaiapola Repubalika, i keia hoi, e bapakema iho i Demokarata.

_____

POHAI O KA POE INO

AOLE HOME MA HONOLULU NANA E HOOKIPA.

            Ka malihini hookipa ole ia ma Honolulu.

            Ina he mai maneo o ka ili.

            Uha-maneo, ua ikea, aneane pau loa na home.

            Aole malihini ka meeau.

            Launa laua me ka poe ino.

            Hiki mua, -noho loihi.

            Olelo mau makou, "na mea ino" e haalele mai no lakou.

            Lawe i ka Laau Hamo a Doans -nana e hoomamao aku ma kahi e.

            Laau hamo a Doan's ola ka io ulu ma ka uha, me ka maneo o ka ili.

            He kanaka Vitoria, Auseteralia, kana mau hooia keia.

            Ua loihi ko Mr. William Preston noho ana ma Vitoria, oi aku mamua o ka hapalua keneturea, nolaila, ua ike a kamaaina ko makou poe heluhelu.  Mr. Preston, kona wahi e noho nei Helu 68 Alanui Argyle, Kilda.  Wahi ana:  "No kahi manawa ua hoopoinoia a u e ka meeau ma kuu mau wawae.  I kahi manawa ua mahuahua ae, oi aku nae i ka po, nui ka eu o ka ili.  Kii au hookahi pono o ka Laau Hamo a Doans e hau aku au, ua emi koke kela upehupehu o ka ili i ka wa pokole loa.  Ka Laau Hamo a Doan's, oia ka helu ekahi a'u i ike ai, he ola ka meeau."

            O ka Laau Hamo a Doans oia ka laau kupono, e ola ai o na ano mai ma ka'ili, e laa ka meeau, uha hemo, onu, nahu kanapi, pahole, upehupehu, a he nui aku.  Ka laau keia e ola ai.

            Laau Hamo a Doan's, e loaa no ma na hale haawi laau apau, ma ka 50 keneta o ke poho (eono poho $2.50.)  E kauoha mai i ka Hollister Drug Co., Agena no ka Paeaina Hawaii.

_____

            M ka nana aku i na hana kalaiaina iwaena o na Pukiki, e hoike mai ana ka lakou mau hana ua ikaika maoli lakou ma ia mahele, a me he mea la, o lakou ke auamo pu mai ana i ke koikoi e auamo ia nei e na aoao kalaiaina o kakou e ku nei, no ka hakoko ana no ka pono lahui o ke kau o Novemaba ae nei.

_____

KA LAWELAWE OIHANA MUA LOA A KA MOI ELUENE VII O PELEKANE I KONA MANAWA MAI.

(picture)

O KEIA KII MALUNA AE OIA KA AHA KUKA MALU A KA MOI ELUENE VII I MALAMAIA MALUNA O KA MOKU "VICTORIA ME ALABATI" MA KA LA 26 O IULAI.

_____

Ka La o na Limahana

            O ka Poakahi mua o ka mahina o Sepatemaba ae nei oia ka la kulaia o na limahana o ke Aupuni Amerika.  he la ia i loaa i na limahana ma o ka hana ia ana i kanawai e haawi ana i na limahana he la hauoli hookahi no lakou iho iwaena o na la 366 o ka makahiki.

            Elua makahiki i kaahope ae nei, ua hiki mai na hoohiwahiwa apa no keia la ma Hawaii nei, a ua malamaia ae ma ke ka'i huakai ana ame na lealea e ae, a maka nana ana aku, ua pono maoli no ka hanaia ana o keia kanawai, oiai, o na limahana no ka poe i ike i na ehaeha o ka huli ana i ke dala e oia ai ka ohana, a e loaa ai no pono o keia ola ana.  Ua oleloia o na limahana ka pou ha-na o ke aupuni, a ina pela, pono loa no e ikeia aku lakou a e loaa na hauoli kupono ana.

            Ma na wahi apau e ikeia ai ka holomua o na lawelawe hana ana, malaila no e ikeia ai na hoohiwahiwa nui ana, a ua ike kakou i na makahiki i kaahope ae nei, ua ulu mai na hana iluna o ka aina a pela i malamaia ai na hoohiwahiwa nui iloko o na makahiki elua i kaahope ae nei.  I keia wa, eia ka aina iloko o ka pakalaki, a ke hookuuia nei na limahana; ma keia e ike maopopo ia aku ai e emi mai ana na hana o keia la ke hoea mai ua manawa la.

            I na wa i kaahope ae nei, iloko no o ka mahina o Iulai, hoomaka e no na liuliu ana, aka, i keia makahiki aole hookahi wahi mea i hanaia koe wale no ka manao e noonooia nei, na kela ame keia e hana nona iho.  Ma keia ae la, he mea ehaeha no ka hiki ana mai o na haawina pakalaki maluna o ka aina, a he mea kaumaha ka loaa ole ana o na hauoli maikai ana iwaena o na kanaka na lakou e hapai nei i na hana hooholomua iloko o ka aina.

            Ke a'o mai nei keia haawina i na limahana e koho i na kanaka maikai e hele aku iloko o ka Ahaolelo e hana mai i na kanawai maikai e hoohoihoi ana i na hana iluna o ka aina, a e hoomau ana i na pomaikai maluna o ka aina.  Ma kela kau koho aku nei, ua huli nui aku ka lahui a koho i na Home Rula, ma kahi no nae o na manao i manaolanaia ai e na kanaka, oia hoi e hana mai i pono no ka lehulehu, ua ku mai ua poe kanaka nei a hana i na hana pono ole, ma ka hoololoiahili ana i na bila waiwai nui e ola ai ka aina a ola ka lehulehu.  E mahaloia ke Kiaaina Dole no kona noonoo pono ana a hakilo pono ana i na hana o ke kau i hala.

            Ma ka aoao o na limahana, ina he manao nui ko oukou i ka loaa pono o na hana e holomua ai ka aina e pono e noonoo akahele i na moho e koho ai.  E nana i na kanaka e hana ana i na hana hoowaiwai i ka aina, e hoala ana i na hoeueu kalepa ana, e lawelawe ana i na hana no lakou me ka makee e loaa mai he puka ma ia hana ana, e nana i keia poe a ina aia iwaena o na moho no ke kau koho balota e hiki mai ana kohoia aku.  Eia ke Keikialii Kalanianaole, he pua alii e hana ana nona iho, e hoala ana i hana imi waiwai nona iho ame ka lahui, ina oia kekahi moho pono no e koho iaia.  Eia o Ho. W.C. Achi a he nui aku.  E like me ko lakou makee i na hana e holopono ai ka lakou mau hana, pela no e loaa pu ai ka makee ana i ka pono o ka lehulehu.  Mai pono hapuku kakou o huikau na eepa na lakou e hoino i ko kakou aupuni a haule hou na hoohiwahiwa ana i ka la i haawi aloha ia mai nokakou na limahana.  Waiho iho ia Wilikoki i Hawaii nei, hoomoe malie ma na home i ka poe o kela ano o ka Ahaolelo i hala.

_____

Hoike o na Kula o Kamehameha o ka Makahiki i hala.

MAKEMAKE E LOAA.  I HOME NO NA HAUMANA KAIKAMAHINE I HEMO.

            Ma ka hoike o ke kumupoo o na kula o Kamehameha Mr. Charles B.Dyke i waihoia ae imua o ka Aha Kaapuni o Honolulu nei i ka Poalua iho la Aug. 26 ma o na kahu malama waiwai la ua ikeia na hana i hoohanaia no na kula i ka makahiki i hala aia na kula ma ke kulana maikai a holomua, malalo o ka noho poo ana o hookahi kanaka.

            I ka makahiki i hala ua pau ae kekahi mau hemahema i ka hooponoponoia pili i na pono kula, hale, wai ame kukui-uwila, aka o ka wai ua loaa keia manao e hookomo mai i ka wai o ke aupuni mamuli o ka lawa ole.

            O na haumana i paa ma ka papainoa o na kula no ka hapaha mua o ka makahiki i hala (oia hoi ka makahiki kula) kula nui o na keikikane he 146, kaikamahine 90; kula pokii 66, a no ka hapaha elua kula keikikane he 127; kula kaikamahine 83; kula pokii 65.

            Ma ua hoike nei ua hoikeia na hana maikai a na haumana mai na keikikane a na kaikamahine iloko o na hana pono o ke akua iwaena o ko Kalihi iho ma ka lilo ana o na haumana i mau kumu kula Sabati iwaena o na kula Sabati o ia mau kini no ka hoonaauao ana iloko o ia mahele, a ua ikeia ka waiwai.  Ma ka hoomaopopo ana ua loaa aku ka huina nui o na kanaka mai ka poe Hawaii a hiki i na Kilipati mawaena o ka 700 ame 800, no ia mea i loaa ai keia manao e kukuluia i kula humuhumu i hiki ai ke hoolaha ia ia mahele o ka ike iwaena o ia wahi a he makaukau no hoi ia no na haumana o ke kula.

            O kekahi mea i makemake loa ia oia ke kukulu ana i home no na haumana kaikamahine i hemo maikai aku mai ke kula aku oiai wahi a ke kumupoo o ke kula kaikamahine aole e hiki e loaa ka holomua i na haumana e hemo aku ana ke hoi lakou ma na home ponoi kahi e loaa mai ai i na wiliau o ka hoowalewale, a no ka mea, aole i loaa ia lakou ka ikaika ame ka maa o ka noho hoowahine ana e ku iho ai kela ame keia nona iho, a ke loaa ka home e like iho la me ia alaila ua hiki lakou ke noho malaila a e hoonaauao hou ia, a i ole ua hiki ke noho hana aku no kekahi hana i haawiia ma no ka hana aku a o kahi loaa e laa ana ua hiki ke malama ia oiai kekahi e hooliloia ana no na lilo kumau a ma ia hana ana e loaa ai ka nohona maikai i na wahine Hawaii opio, he haawina hoi e loaa ole ai ia lakou ke malele aku mawaho aku o keia mau palena.  A wahi a ke kumupoo o ke kula nui o na keikikane, he mea kupono loa e hanaia pela aku aole e hiki ke lawelawe koke i ua hana la i keia manawa oiai aohe mahele loaa no ia hana i hookaawaleia.

            O ke ano o na keiki o ke kula keikikane o ka makahiki i hala ua ikeia ua loaa ia lakou ke ano hookanaka maikai loa, a o ko lakou ola ka i uahi pu aku, a ma na haawina olelo haole ua mahele loa aku lakou ma ka hooikaika nui ana o na kumu e loaa kekahi ike mai ka waihona buke mai.

            Ma na mahele paikau ame hana hooikaika kino.  Ua lilo nui ke eo ke kumu hoi i lilo mai ai na makana, a oia haawina hookahi no ka i hoike ia aku ma ka mahele paani popo.  Ma na manawa o na makahiki 1901-1902 ua ikeia iwaena o na hana hooikaika kino ma ka hookuku ana me na hui owaho ua lilo wale no ia Kamehameha na makana apau pela i lawe haaheo ae ai i ka hanohano o ka hana mai na hui e ae apau i hakoko aku me ia.  ua ikeia he keiki puni paani ke keiki Hawaii a o kekahi mea i loaa ai o ka lanakila maloko olaila oia no ke komo ana i na hana o na halehana akamaio ke kula ame na hana mahiai owaho.

            Maloko o ua hoike nei ua ikeia aia he 90 haumana i komo i ke kula keikikane ma ka hana ana i na hana o ke kula no ko lakou mau uku kula a ua ikeia no hoi ka waiwia o ia mahele hana ma ka hana ana ma na hora no elima keneta a i ole no umi keneta no ka hora hookahi a maloko olaila e a'oia ai lakou i ke ano o ka hana ana ame ka malama ana ma ke ano hookanaka iloko o ka oihana.  He mea oiaio no aole i nele ke kula i koa laa i na kula a o kekahi o lakou oia ka wehe ana ae he ewalu haumana mai ke kula aku mamuli o ka pili waiwai iloko o ke kula he haawina maikai ole e hoomaamaaia malaila.  O kekahi, ma ka aoao o na kumu, ua waiho mai kekahi poe o lakou i ka oihana ma ka hoonaauao hou.  (E nana ma ka aoao 5.)

_____

Lele mai Kaupoku hale mai.

(Mai ka aoaoa mai)

I ka lilo ana aku o kona noonoo maikai mai iaia aku.  Ua hoohiki iho oia e lawe i ke ola, o kana wahine ame ka laua wahi bebe.  Ua laweia ae keia lono no ka Halewai, a ma ka hora 10 o ke kakahiaka ua hoounaia aku ka makai.  Aole i loaa aku keia kupueu oiai ua pii aku la oia a puka maluna o ke kaupoku o kekahi hale e pili kokoke ana me ka hale keaka o na Pake ma ka puka aniani hoomalamalama o luna a malaila kona hele ana aku no kahi ana i lele ai.

            Ua ikeia aku keia kulana kupilikii e na makai, a ua hoao ae lakou e hoomalielie aku iaia a pela no hoi me ke anaina kanaka e ku aku ana malalo a nana aku i kana mau hana hookalakupua.  na ka hiki ole i na makai ke hoomalielie aku iaia, ua kii ia aku he kaula mai kekahi o na halekuai a ua hoouna ia aku ka makai Poko Riko ma ka inoa a Gacia no luna o ke kaupoku me ke kaula i hikiikiiia ma kona opu.  Ua hookuukuuia aku oia a hiki i kona kokoke ana aku i kahi a Aka e noho ana, a malaila i ala mai ai na hakoko ana, a malaila i ala mai ai na hakoko ana.  Aole i hiki i ka makai ke paa loihi aku ia Aka ma keia kulana ana e kau nei, nolaila, ua wehe ae o Siliva i kona kamaa a pii aku la no ka haawi ana i na kokua i kona hoa makai.  Ua ike koke mai la o Aka i kona pilikia, nolaila, ua koho iho la oia i wahi nana e lele aku ai.  Ia Siliva i kokoke aku ai, ua hoomaka aku la o Aka e lele, o kona mau lima e opea ana maluna o kona poo, a e hamama ana hoi kona waha.  Iaia e iho mai ana, ua hihia ae la kona waha i kekahi uweaolelo, a no ka ikaika loa o keia lele ana ua moku pu ae la ka uwea a loaa aku la he alina ma kona papalina.  na keia hihia ana i ka uwea i hoololi i kona kulana o ka iho ana mai, a iaia i kokoke mai ai i ka honua, ua holo koke aku la kekahi o kona mau hoaloha no kahi ana e iho mai ana, ua lawa ole pae ka ikaika o kona hoaloha i ka paa ana aku iaia, nolaila, ua haule aku la ia ma kona aoao akau a haki ae la kona ka.  Ua lawe koke ia aku oia no ka Haukipila a malaila i ikeia ai kona wahi i poino.

_____

(top of column)

Poe Akepau i loaa hou ke Ola Kino Maikai.

            Ke hoike mau mai nei na Kauka ia makou mai na wahi like ole mai o ke ao nei no ka nui o ka poe i aneane e loaa i ka ma'i Akepau i hoopakele ia mai keia ma'i mai mamuli o ka laau "AYER'S CHERRY PECTORAL."

            Ke loaa i keia laau e loaa ana i ka ma'i ka maha no ka wa mau loa, a aole no kekahi manawa pokole e like me kekahi ano laau okoa ae.

            Aohe Laau Kunu i oi ae o ka maikai mamua o ka LAAU KUNU "AYER'S CHERRY PECTORAL."

He mea maikai e ike kakou i keia, no ka mea ua hoola keia laau i ka poe i loaa i keia haawina no aneane kanaono makahiki.  E malama mau i keia laau.  Ina aole au omole laau kunu o keia ano, e kuai koke mamua o ka loaa ana i ke kunu.  Ina ua loaa kekahi iloko o ka ohana i ke anu e hooinu i keia laau a e loaa no ka maha.

            Hoomakaukau ia e Kauka J.C.Ayers & Co., Lowell, Mass. U.S.A.

            E loaa no keia mau Huaale ma na halekuai laau a pau.

_____

(add)

Eia mai keano hou loa aohe Eha ma ka hana ana a na Kauka Huki Niho

W.E. Allen, D.D.S.  F.L.Ferguson, D.D.S.

Papa Niho Piho pono $5.00  Huki ana i ka Niho 50c

            Ina e makemake oe i ka lawelawe hana o ke ano maikai-oia hoi, he hana a loaa hou ole ai oe i ka pilikia mahope aku, alaila, e hele mai oe ia maua a na maua e hooiaio aku i ka maikai o ka maua hana e like me ka maikai ma kekahi poe kauka huki niho e ae, no ka mea, oia ka mana hana ike a lae oo ma ia mea.  He maikai ka maua mau mea hana o ka oihana kauka huki niho.

            O ka poe e hele mai ana, e nana ia noko lakou niho a ha'iia aku na mea pili poino ame na hana e hana aku ai i pau ia mau eha, me ka auhau ole.

            O na hana apau e hooiaio aku ana no ka maikai a o ua hoohana hou ana e hanaia aku no me ka auhau hou ole aku.

            E loaa no maua ma ARLINGTON HALE, 215, ALANUI HOTELE ma kahi aoao o ka huina o na Alanui Hotele ame Uniona, Honolulu, H.I.

Hoopiha meke Kala    50 keneta

Hoopiha me ke Gula   $1.00 a pii aku

Papa Niho Gula           $5.00

Papa Niho Kala           5.00

Papa Niho Maoli         5.00

_____

HOOLAHA KUMAU

O Keia ka wa no ka Hoahu ana.

HUI HAWAIIAN REALTY AME MATURITY, KAUPALENAIA, HONOLULU.

            He pepa keia e hoolauna aku ana i @ Hui Hawaiian Realty ame Maturity, e hoikeike aku ana i na hoa i ka pomaikai e ala mai ana mahope o ko lakou komo ana i keia hui.  He hui keia ua kaupalenaia no ka poe ilihune ma ka poe waiwai e makemake ana e hoouluulu i ka lakou kenikeni no ka noho ana o keia mua aku.  Ua like pu loa keia hui me ka Banako e hookomo ana kela ame keia $2.50 no ka mahina mua a $2.00 mahope aku i na mahina apau a hiki i ka piha ana o na mahina he 75, alaila, hoihoiia mai ia mau dala i houluuluia ai a kela ame keia me $50.00 mawaho ae, ka puka o ke dala o ka mahele hookahi, huina pau loa $200.00.  He nui no na mea maikai o keia hui, a pomaikai no hoi.  I ka wa o ka lawe ana o ke kanaka i hookahi mahele, e uku ana oia he $2.50, ka waiwai ia he elua dala, a ua hookauia kela hapa@ no ke pooleta o ka palapala hookuleana e haawiia ana i kela ame keia e lawe ana i mahele i mea hookaa no ka @ dala a e paa lakou i keia palapalaia hiki i ka piha ana o keia mau mai na i kauohaia ai.  Ina paha e ma'i @ kekahi kanaka i komo i ka hui a kawaliwali a hiki ole iaia ke imi i ola nona, i ka wa ona e hai ai i ka hui, e hoihoiia ana na dala ana i hookomo mai ai i ka hui me 1-4 hou aku.

            E like pu me keia, ina he umi dala i ukuia, e loaa aku ana he umi-kuma-malua me hapalua, a pela wale aku.  Ina e make ana, e hoihoiia aku ana iaia na dala apau ana i hookomo ai me ka nui pu oia mau dala hou e like me keia: Ina he $100.00 ana, e haawiia ana iaia he $200.00.  Ina paha e makemake ana kekahi kanaka o ka hui e aie, ua hiki no iaia ke aie i ka piha ana o ka makahiki, ma ka hapa nae o kana maa kenikeni i hookomo ai i ka hui, aka, e hoao oia e hoihoi hou mai ia mau dala ana i aie ai iloko o eono mahina a hookahi makahiki paha.  He hui keia e hoopomaikai ana i na kanaka: o ka poe nae e makemake ana e hookuonoono ia lakou iho no keia mua aku.  he nui na dala a na kanaka e loaa nei, aka, aole nae lakou e noonoo ana no ko lakou pono o keia mua aku.  Loaa mai no kahi kenikeni, i o no ianei, pau ana a hala ae la keia pule, mahina, a hiki i ka hoea hou ana mai o ka makahiki hou, aole wahi dala i houluuluia.  Ina no hoi e lawe ana oia i hookahi mahele, e uku ana ia he elua dala o ka mahina hookahi; a ina e piha ka makahiki ua loaa iaia he $24.00, me ka puka pu oia mau dala.  Ina ia e hele mai ana i ka hale o ka hui, e loaa ana iaia ka hapa o keia dala me ka puka pu, a he mea no hoi ia e hookalaia ai kahi pilikia.  E na kanaka, e pono kakou e noonoo pono a malama i na wahi kenikeni, oiai he aupuni Amerika keia, a ke hele mai nei ka  poe o ka aina e a ke hao mai nei i na aina o kakou; nolaila, e po@ kakou e hookuonoono i hiki ia kakou pu ke pale aku ia lakou, a aohe hoi e hiki ia lakou ke hoonaikola mai, e like me ka mea mau.  Houluulu kahi kenikeni no ka pono o na wahine me na keiki.  Ina aole e hiki i ka mea hookahi e uku liilii i na mahina apau, e uku mua mai he $10.00 paha, elima paha, iwakalua-kumamalima paha, aia no i ka mea e loaa ana i ke kanaka; kali aku la a piha na mahina oia mau dala, ma ka elua dala o na mahina apau, alaila, uku hou.  Ina kakou e hana ana me keia, aole kakou e mihi ana i keia hana maikai a kuonoono pu.  He poe kuonoono na alakai o keia Hui, nolaila mai minamina i na kenikeni, a ina aole oukou i komo mua i ka hui, e komo mai i keia wa.  Kakau mai i ka Hale hana o ka Hui, oia hoi ka Rumi 3 ame 4,  McIntyre Building.  Ina oukou e hopohopo ma kahi mea, e kakau mai a ua hiki ia makou ke hokaka aku i na mea apau.  Ua hiki ke kanaka ke lawe e like me ka nui o kana mau kea (shares) e makemake ai.  Ina ia e makemake ana e uku mua i $150.00 a $100.00 paha, ua hiki no e haawiia aku i likiki nana no ia mau dala.  Ina ia no Hawaii a Hilo paha, a i ole, no kekahi aina e ae, e hoouna ana ia i kana dala ma ka Bila Hale Poo Leta, a e loaa aku ana kana likiki.  Nolaila, mai hopohopo i ke komo ana i keia hui maikai.

HUI HAWAIIAN REALTY AME MATURITY, KAUPALENAIA, Rumi 3 ame 4 McIntyre Building, Honolulu.

L.K. KENTWELL, General Manager.

_____

S. OZAKI WAIHO I KA OIHANA KUAI PAPALE.

Kuai Hoemi Loa I NA PAPALE

35c NO KA PAPALE $1.00

HALEKUAI 178 - ALANUI HOTELE

_____

            He halawai nui ka na Opio Repubalika ma ka po nei ma ko lakou keena ma Maile Ilima Hale ma Alanui Papa no ka hoolohe ana i na alakai h@ uao e pili ana i ke kulana o ke Aupuni.

_____

            Ua hui a'e nei ka Hui Kalaiaina a na Pukiki me ka Aoao Kalaiaina Repubalika.  Elua alakai o keia Ahahui e like aku ana i mau moho holo balota no ka Aoao Repubalika i keia kau koho ae Wela ka hao i ka Aoao Repubalika.