Ka Nupepa Kuokoa, Volume XL, Number 37, 12 September 1902 — Kai Hoee ma Puna, Hawaii. [ARTICLE]

Kai Hoee ma Puna, Hawaii.

KE KILOHANA POOKELA NO KA LAHUI HAWAII Ua loaa mai nei he leta ia Prof. C. J. Laiana o ke Keena Ana Aina o ke Aupuni ma Honolulu nei mai a R. A. Laimana o Hilo e hai mai ana i ka lono o ka hoea ana ae o ke kai hoee ma Puna, Hawaii. Penei na manao i kakauia ma ua leta la: Hilo, Hawaii, Sept. 5, 1902. C. J. Laiana, Esq., Kokua Ana Aina Aupuni. Ua hoi ae nei ka'u keiki, Hanale, mai ka lua Pele no Puna ma ka auwina la o nehinei (Sept. 4), a telepona mai la i ka po nei ua haiia aku iaia i ka pii ana ae o ke kai hoee ma ka hora 2 o ka auwina la Poalua, Sept. 2, a ua ikeia ma ke kahakai e hoomaka ana ma ka aoao hikina a hiki loa i Kahaualea ma Puna. Ma Kula ua komo loa aku i loko o ke kuono a laweia aku na waa e kau ana i ka aina maloo, a mai pau loa i ka nahaha ina aole i hele aku na kanaka e kokua. Ua pii ae ke kai no 5 kapuai maluna o ke ana wai, a holo loa aku iluna o ka aina e hoomau ana no elua hora. Ua oleloia ua hala loa aku keia pii ana iluna o ka aina mamua o ka mea i ikeia mamua. Ua komo mai ke kai iloko o Kapoho, a pii aku he hookahi kapuai maluna o ka pa a'u i hana ai malaila. Ma Kalapana ua oleloia ua pii mai ke kai a lawe aku i kekahi hapa o ka pa kula, ame kekahi pa no ke kanaka Hawaii, me ka hoopoino ana i na waa, a no elua hora i noho ai ka Lunamakaainana Haaheo me ka makau o lilo aku ka puuone e ku ana mamua o kona hale a lilo pu aku me kona hale. Ma Hilo ua pii mai no ke kai a pela no hoi ma Papaikou ma ka Poalua a po ia la, aole no nae au i lohe mai ua hoea mai ke kai hoee maanei. Ke kakau nei au me ka awiwi, a nau ia e hoike aku i keia mea hou i loko o na nupepa. Kou oiaio, R. A. LAIMANA.