Ka Nupepa Kuokoa, Volume XLI, Number 6, 6 February 1903 — MAALAHI KE ALA I WAIKIKI [ARTICLE]

MAALAHI KE ALA I WAIKIKI

I keia mau la ua hoomaalahi maopopo ia ko ke kulanakauhale nei pili i ka hele ana ma kahi i makemake ai ke kanaka ma na wahi no nae e holo nei na kaa uwila. Aohe mea hoohalahala i keia manao. Aole o ka hoomaalahi wale ia no aka o ka hikiwawe no, aole emo o ka hiki no ia i kahi i makemake ai o ke kanaka. O na wahi i hoomoeia i ke alahao a e holo nei na kaa uwila ua hoopomaikaiia lakou. Ua nui no ka pomaikai o ka lehulehu mai ke kaa hapaumi mai i hukiia e na hoki ma ka maalahi o ka hele ana i kekahi wahi, o na wahi no nae i hoomoeia i ke alahao a i holo ai ke kaa hapaumi aka o keia ka oi aku ma ka hoomaalahi ana a hoopokole manawa. Ma ka Poaono i hala aku nei Ianuari 31, i hoau mua loa ai ka holo ana o ke kaa uwila, e hoike mai ana ia, ua hoomoeia a ke moe nei ke alahao mai ke kulanakauhale aku a hiki i Waikiki, e pau ana i kahi o ka Onamiliona Campbell. Ua nui no ka poe i konoia no ka hui ana aku ma keia hoau ana i kela la oiai he eha kaa uwila nunui i hookuuia no ia hana, aka, i ka Lapule mai ua nui maoli no na kanaka i holo aku iwaho o Waikiki. Mai ia manawa ka wehe ia ana no ka lehulehu e like me na laina kaa e ae e hoohanaia nei, ke kumu i loaa ai ke poo-manao e kau ae la maluna nona hoi keia kino manao. He ala loihi i'o no o Waikiki a he wahi kau nui ia e na mea apau no ka hoohala manawa a pela no hoi ka ike ana i na hana lealea o Kpiolani Paka aka aole i loaa ka maalahi loa i na mea apau i hele aku ilaila no ka loaa ole o ke alanui maalahi. Pela mai ke aumeume ana a hiki mai i ka wa o ke kaa hapaumi aole no nae i pau ka pekiwawae ana aka i keia manawa ua pau a maalo ae la mau haawina.